روايات

رواية على الرف الفصل الثاني 2 بقلم لولو محمد

رواية على الرف الفصل الثاني 2 بقلم لولو محمد

رواية على الرف البارت الثاني

رواية على الرف الجزء الثاني

على الرف
على الرف

رواية على الرف الحلقة الثانية

مى / انا مبسوطه اوى انهم حطونا فى نفس الاوضه فرصه نقرب من بعض اكتر
نهى / اكيد
مى / صحيح انتى ليه اخترتى عمتك ابتسام و ما روحتيش عند عمتك ايات
نهى / النصيب
مى / ايوه بس عمتك ايات عندها بنت مش كنتى هترتاحى اكتر عن وجودك مع مروان فى بيت واحد
نهى / لما قولتلك النصيب كان قصدى ان بابا الله يرحمه كان ساكن و فاتح محله جنب عمتى ابتسام لكن عمتى أيات عايشه بعيد فكنت هضطر انقل من المدرسه و اتشحطت فى اخر بلاد المسلمين لكن عند عمتو ابتسام حياتى ما اتلخبطتش
مى / طب و مروان
نهى / ماله مروان هو اشتكالك من حاجه
مى / لا بس وجودك معاه فى بيت واحد و أوقات عمتك بتكون فى المحل ما اعتقدش انه وضع مريح ما اعرفش اى حد كان هيتكلم
نهى / انا ما اعرفش غير ان مروان اخويا و طول عمرنا رايحين جايين سوا و متربيين سوا عقد الناس دى ما تخصنيش بقولك ايه انا هدخل اغير فى الحمام خدى راحتك
مى / لا لا لا انا اللى هغير فى الحمام اصلى عاوزه اخد دوش بالمره عشان عرق السفر و كدا تمام
نهى / تمام
مى تروح تاخد غيار و تفتح الكاميره بتاعه موبايلها و تبص على نهى بتفضى شنطتها و مش واخده بالها تعدل الموبايل و تاخد غيارها و تدخل الحمام
……………………

 

 

فى المطعم بتاع الفندق
مروان / حنطور ايه يا جدعان مش كبرنا بقي على الحاجات دى
مى / بليز يا مارو بقي بليز
بنت / بيقولوا فى سوق هنا خرافه
شاب ١ / ايوه و نجيب ملوحه بقي و عيش و نديها
مروان/ هى الرحله الهباب بتبان من اولها واحد ضارب مسافه لاسوان عشان ياكل ملوحه
شاب ١ / امال يا عم دا انا امى محلفانى اجبلها صفيحه و انا مروح
مى / ما علينا ما علينا حلوه فكره السوق دى كمان
مروان / طب ما ناخد مركب فى النيل ايه رايكوا
مى / لا مركب بالليل مرعبه اوى خليها بالنهار احسن
البنت / ايوه بس احنا مرتبطين ببرنامج
مى / نبقي نظبط يعني
مروان / خلاص تمام احنا نشوفلنا حنطور يلف بينا شويه و بعدين نطلع على السوق نجيب سودانى … و ملوحه و نطلع نقعد على النيل قشطه كدا
مى / قشطه اوى ايه رايك يا نهى ساكته يعني
نهى / انا معاكوا فى اى وضع
على يدخل
على / الباشا
مروان / اهلا اعرفكوا يا شباب ابو حسن معانا فى الرحله … تعال اقعد
على / لا اقعد ايه مفيش وقت انا و الشباب هنروح متحف النوبه مش موجود فى البرنامج و ما ينفعش ننزل اسوان من غير ما نشوفه و حركه مجدعه منى قولت اقولك يمكن تحبوا تيجوا معانا
مروان / ايه رايكوا يا رجاله
مى / لا انا ما ليش انا فى جو المتاحف و الملل ده
على / انتى نازله لاقصر و اسوان و ما لكيش فى جو المتاحف امال لما تروحى المعابد اللى كلها تقريبا نفس الكلام هتعملى ايه
مى / هتصور
مروان / انا عجبانى الفكره على فكره
نهى / و انا
الشاب / البتاع ده لو هيسحب فلوس كتير
على / التذكره بعشرين جنيه و للطلبه نص تذكره
الشاب/ انا راشق وش
البنت / و انا كمان هاجى
مروان / خلاص بقي يا بيبي نروح النهرده النوبه و بكره ننزل السوق
مى / تمام اللى تشوفوه
على يبتسم و يبص لنهى بتاكل فى هدوء و مى متابعه الموقف
……………….

 

 

على النيل
نهى / انا انبسطت اوى بصراحه اخدت كميه صور رهيبه
مروان/ الا ما فيهم صوره لنفسك
نهى / يعني انت ما صورتنيش
مروان/ صورتك طبعا بس هى محتاجه شويه تظبيط و ايديت على كام فلتر يعني بصي هى محتاجه زى ما بيقولوا احلال و تجديد فى الملامح
نهى / بس يلا
مى تدخل
مى / النيل حلو اوى بس ما يفرقش حاجه عن عندنا نفس الجو و نفس الوقفه و نفس البياعين
مروان / الصحبه يا بنتى
مى / اعمل ايه ما صاحبى سايبني و واقف مع بنت خاله … اللى اسمه على و صحابه دول ايه حكايتهم جايين معانا ليه ما دام واخدين جنب كدا
نهى / انتوا اخدتوا بينج و هم راحوا قعدوا على البينج اللى بعده يعملوا ايه يعني
مى / ما يعملوش حاجه انا بس … جبنا فى سيره القط دا جاى
على يدخل
مروان / انا بجد عاوز اشكرك انك ما استندلتش و روحت لوحدك احنا انبسطنا جدا
على / انا هطلب لهشام صاحبك ملوحه من محل حلو اوى بيوصل دليفرى و على ضمانتى اجيبلكوا
نهى / هو انت جيت هنا قبل كدا
على / كل سنه … فسحتى المفضله اصلا … السد العالى و معبد فيله و عرض الصوت و الضوء فى معبد ابو سمبل هتنبسطى اوى
مى / روحت جزيره النباتات اللى هيودوهالنا بكره دى
على / دى حلوه جدا هتاخدى فيها مليون سيلفى ما تقلقيش
مروان / احنا طلع معانا مرشد سياحى و احنا مش واخدين بالنا
على / صدقنى لما هتروح هتلاقى نفسك بتحن
مى / انت مش هتصدق انه ما كانش عاوز يجي اصلا بس البركه فى نهى بقي قدرت تقنعه
على / خير ما عملت … ها اطلبلكوا و لا اجبلكوا عشوه صغيره و لا ايه
مى / لا الكلام ده مش جوى خالص و لو هتاكلوا يبقي بعيد عنى
نهى / ماشي ممكن تجيب صفيحه ناخدها و احنا مروحين… و عشان مى هنسيبها فى اوضه مروان
على يبق لمروان
مروان / مفيش كلام بعد كلام نهى

 

 

على / تمام
على يجى يمشي و يرجعلها
على / صحيح انتى ليكي صور كتير معايا لو فى ايميل او واتس ابعتلك عليه الحاجه
نهى / صور ليا انا !!!
على / فى المتحف طالعه فى اكتر من كدر
مروان / ابعتهملى انا على الواتس يا كبير
على / تمام
على يبص لنهى و يبتسم و يمشي نهى تبص لمروان بحرج مى تسند على كتف نهى و تبصلها بطرف عينها
مى / دا شكل الحكايه فيها ان بقي
نهى / و انا مالى بتبصيلى كدا ليه
مى / اصل سبحان الله شوفى احنا كام نفر انتى اللى طلعتى فى الكدر و ياريته مره و لا اتنين دا بيقولك كتير
مروان / خفى يا مى الجدع ما قالش حاجه عادى
مى / بتعجبنى و انت اوبن مايندد كدا
مى تمشي رسايل تيجي على موبايل مروان يفتحها
مروان / انا ما اتكلماش قدامها بس فعلا … هى الصور حلوه
نهى تروح تتفرج و مروان بيقلب فى الصور كلها لنهى لوحدها مش واخده بالها
مروان/ لا كدا كتير
مروان يروح ناحيه على و هو مضايق
مروان / لول ما تيجي خمسه كدا
على / عيني تعال
مروان يشد على فى جنب
مروان / بص كدا و من غير لف و دوران انا لحد خمس دقايق فاتو كنت مستجدعك
على / على فكره انا غرضي شريف
مروان / نعم !!
على / انا فى رابعه ميكانيكا و كلها ترم و اتخرج و الحمد لله مستوايا الاجتماعى و المادى كويس
مروان / لنفسك يا بابا احنا مش مركبين ارايل تمام
على / تمام حقك و انا اسف اوعدك انى هاخد جنب باقي الرحله لحد ما نرجع مصر ادخل البيت من بابه انت صح
مروان / و لا تعتب المنطقه حتى هو لعب عيال و لا ايه
مروان صوته يعلا الشباب يتلموا
على / طب اهدى و فهمنى فين المشكله انا اتكلمت مع صحابك و اكدولى انها مش مرتبطه
مروان/ و انت تتكلم معاها بمناسبه ايه اصلا انت عاوزنى اتغابى عليك
هشام / ايه يا مروان اهدى الجدع غرضه شريف ما راحش صاحبها يعني قال عاوز يتقدم رسمي
مروان / هو يعرفها عشان يتجوزها دا حياله اول مره يشوفها فى القطر
على / ما هم عملوا الخطوبه عشان كدا و بعدين يا سيدي انت متعصب اوى كدا ليه كل شئ بالخناق الا الجواز بالاتفاق و لعله خير يعنى

 

 

مروان يبص لعلى و يرجع يشد ايد نهى و يروح يشاور لتاكس و يزقها جوه و يركب و يمشي مى تجرى خطوتين وراه ما تحصلوش تقف و الغضب عاميها
شاب / اوفر اوى انت مش قولت يا هشام انها مش مرتبطه
هشام/ هى بتكلم حد و لا تعرف حد
مى تبصلهم و ترجع تبص مكان ما مروان مشي
…………………
فى اوضه مى
نهى ممده على السرير مديه مى ضهرها
مى / انتى نمتى
نهى تلفلها
نهى/ لا مش جايلى نوم
مى / بتفكرى فى اللى حصل
نهى تقوم تقعد
نهى / على فكره مروان اتخانق معايا جامد طول الطريق لا تكلميه و لا تقفى معاه و ان كلمك تسبيه و تمشي
مى / اوفر اوى صح
نهى / مش عارفه بس هو اصلا على ده غلطان يصورنى بتاع ايه دا مروان قال هيستناه يتاكد انه حذف كل الصور دى و قعد يلوم نفسه انه مشي قبل ما يتاكد انه حذفها انا خايفه اوى يكونوا اتخانقوا تانى
مى / مروان اعقل من كدا ما تخافيش و بعدين على مش لوحده و واضح ان صحابه و حبايبه كتير شكله واد جامد بصراحه بلف مروان فى ثوانى و من بعده هشام شكله واد شخصيه بصراحه
نهى / على فكره مروان اللى جراه عليه فى القطر على ده ما حاولش يفتح حوار كان بيطلب قهوه قعد يهزر معاه و هو ما يعرفوش و لما عرف انه معانا فى الرحله اداله رقمه و لا كانهم يعرفوا بعض من سنين
مى / عشان على انسان مريح اوى تشوفيه تستريحيله كدا بالله عليكى مش مستريحاله
نهى / انا ما اعرفوش يا مى و مش غبيه زيه انى ارتبط بحد انا لسه متعرفه عليه من كام ساعه
مى / غلطانه دا ذكى جدا اولا هو عارف ان البنت الحلوه ما بتقعدش و مروان نفسه عارف ده مروان ما كانش يعرفنى لما جه يتعرف عليا فى الكليه و لو كان اتاخر كنت طيرت من ايده
نهى / بالبساطه دى

 

 

مى / و ابسط من كدا اللى سبق اكل النبق
نهى / ايوه بس الطباع ما بتبانش الشخصيه بتحتاج وقت عشان تحكمى عليها
مى / و دا بالظبط اللى على عمله شافك عجبتيه اتعرف على اللى معاكى و صاحبهم و سال عنك من تحت لتحت و لما اتاكد انك تمام حاول يتعرف عليكي و ياخد رقمك لما مروان وقفله قال باس هى دى انا هتقدم بقي و امشيها رسمي
نهى / و لو كنت اديته رقمى ما كانش اتقدم صح
مى / ما اعرفش بس اللى يسيبنا فى نص الرحله و يجرى يصلى يبقي واد بتاع ربنا و اكيد مش هيصاحب و كدا و بعدين مش احسن من ابن عمتك ده اللى رابطنى جنبه بقاله كام سنه و ما فكرش حتى يكلم ماما و لا يخليني اكلم مامته
نهى / معاكى حق
مى / مش هكدب عليكي ساعات كتير بحس انه بيتسلى بيا يعني بيملا فراغ لحد ما يلاقى حاجه احسن بس العيب مش عليه العيب عليا انا
نهى / اشمعن
مى / عشان حبيته يا نهى اعجبت بيه اول ما كلمنى طيرت من الفرحه و بينتله ده ما تعبتوش عشان يوصل لقلبى فاطمن و حطنى على الرف
نهى / بس انتوا بتتخانقوا كتير اوى يا مى
مى / عمره ما اتنازل عمره ما فكر انا بحس بايه اللبسي ده ما تلبسيش ده تمام انت بتغير عليا بس انا كمان محتاجه اشوف الغيره دى دى الحاجه الوحيده اللى بتخليني احس انك موجود انت لما بتعرفنى على حد بتقول زميلتى عمرك قولت حبيبتى انتى عارفه احساسي لما اقوله كلم ماما و ما يرضاش و يتحجج بالظروف و الفلوس و لما ابقي جاهز طب هتبقي جاهز امتى و ازاى
نهى / بس هو مش فاهم ده ليه ما تتكلميش معاه

 

 

مى / و اخره الكلام ايه و لا حاجه
نهى / بس مروان طيب و مش لعبى
مى / الحوار مش مروان او غيره دا مبدا ايزى كم ايزى جو و دا اللى مروان عمله مع على عززك قاله فوق دى ليها راجل بقولك ايه سيبك من كل ده انتى ايه رايك فى على ده
نهى/ انا ما اعرفوش … بصي هو جه قعد جنبى فى الباص و كان هادى شويه يلعب فى الموبايل و شويه يفتح روايه يقراها او كتاب قاعد فى مكانه كدا مش بيفرك و يحكها كل شويه زى غيره فهمانى
مى / اها
نهى / بالصدفه برده معديه وسط كل الدوشه اللى فى القطر الاقيه واخد جنب و بيصلى عشان خايف الصلاه تفوته طبعا ممكن اوى اقولك زى ما قالو لما سابنا و جرى يصلى انه بيتمنظر و كدا بس هو كان لوحده ما حدش شايفه و ما يعرفش انى هعدى فى الوقت ده عشان يرسم او كدا فهمانى
مى / يعني شيفاه حلو و كويس يعنى لو اتقدم فعلا هتوافقى
نهى / بس حركه الصور دى وحشه اوى ضايقتني انت ليه بتصورنى كل الصور دى
مى / الجمال بيخطف العين يا نونو غصب عنه هو نفسه قال كدا لما مشيتو قال انه غلط بس هو ما حسش باللى بيعمله و كان ناوى يمسحها و فوجئ بنفسه بيعترف باللى حصل و كان مضايق جدا انكوا زعلتوا على فكره هو قال انه ماديا جاهز و انه فاضله ترم واحد بس و يتخرج و شكله فعلا مبسوط
نهى / انا الماديات ما بتفرقش معايا
مى / و الله و لا انا بس اديكي شايفه النتيجه لما ترتبطتى بواحد مش جاهز قاعده قدامك اهى
نهى / وجهه نظر بس انا ضد الارتباط اصلا بصراحه انا قلبي مش حمل وجع يا تكون رسمي يا بناقص
مى / ما هو حتى الرسمي بيفشكلوا عادى
نهى / وجع واحد و دعم من الاهل غير لما اتوجع و مش قاده افسر لاهلى سبب وجعى فهمانى
مى / مش عارفه اصل انا اهلى مش زى اهلك انا ماما تعرف كل حاجه عن مروان انا مش بخبى عليها حاجه فالموضوع بالنسبالى فى الامان

 

 

نهى/ فهماكى
مى / بقولك ايه الواد على ده عاجبنى صلى استخاره و فكرى انا متاكده ان ربنا جمعكوا فى الرحله دى عشان النصيب انتى اصلك مش فاهمه حاجه
نهى / ازاى
مى / هفهمك اولا انا بقالى اسبوع و زياده بزن على مروان و هو يقول لا مفيش فلوس الرحله دى مصاريفه اكتر من اشتراكها خلى الفلوس لحاجه تانيه احسن و سبحان الله فى اخر يوم لدفع الاشتراك الفلوس تيجي و ما يطلعش لوحده دا ياخدك معاه يعنى كل جنيه هيصرفه اضربيه فى اتنين دا تسميه ايه
نهى / مش عارفه
مى / النصيب يا هبله النصيب عشان يجمعك بعلى و يشوفك اصل واحد فى هندسه هيشوف واحده فى تجاره امتى و فين
نهى / انا مش عاوزه افكر فى اى حاجه دلوقت غير مروان و اللى هيعمله فى باقي الرحله
مى / خليكي يا اختى ورا مروان انا هنام تصبحى على خير
نهى / و انتى من اهله
مى تستغطى و تنام و نهى تمدد و تبص للسقف و تفكر
………………..
فى اوضه مروان
مروان / و انت تكلمه عنها بتاع ايه اصلا
هشام/ يا عم الكلام جاب بعضه
مروان / محستش يعني انه بيقررك
هشام / و فيها ايه الجدع قصده شريف و من نفسه حذف كل الصور قدامنا عشان ما تزعلش و من غير ما حد يطلب منه و اعتزر و حلف انه قصده شريف
مروان/ يا عم بلاش استفزاز بقي اصلا العيب مش عليه هى قالتلى انت كل من هب و دب تصاحبه انا ما سمعتلهاش و خدت فيه قلم
هشام / يا عم والله الواد زى الفل و بشهاده صحابه و اللى شوفناه منه و بعدين انت مضايق كدا ليه ما تديله فرصه يمكن غرضه شريف فعلا انت ايه مشكلتك
مروان / مشكلتى انه استغفلنى انه خدنى كبرى عشان يقرب منها
هشام / انت بنفسك قولت ان انت اللى فتحت معاه الكلام فى القطر و انه ما عملش حاجه
مروان / بص خلاصه الكلام يا انا يا الكائن ده تكمل معاه الرحله
هشام / مش كبرنا على الهبل ده
مروان / دا اللى عندى و احمد ربنا انى عديتلك اللى عملته
هشام/ انا هعمل نفسي ما سمعتش حاجه عشان ما نضيعش العشره اللى بينا فى لحظه شيطان … اهدى كدا و نام و لما تصحى فكر فى الموضوع كله على رواقه هتعرف انك مافور و الدنيا ابسط من كدا … تصبح على خير
…………………

 

 

فى محل مروان
راجل محترم يدخل يقف قدام ابتسام
الراجل / السلام عليكم
ابتسام / و عليكم السلام اى خدمه اؤمر
الراجل / حضرتك مدام ابتسام عمه نهى شلش
ابتسام تتخض
ابتسام / خير يا استاذ فى حاجه و لا ايه ايوه انا عمتها
الراجل / خير باذن الله كل خير تسمحيلى اقعد اتكلم معاكى كلمتين
ابتسام / اتفضل … تشرب ايه
الراجل / و لا حاجه ناجلها للزياره الجايه تكون نهى رجعت من الرحله باذن الله
ابتسام / حضرتك قلقتنى جدا هو فى ايه
الراجل / لا والله كل خير زى ما قولت اولا انا محمود عبد السلام منصور عندى مصنع صغير للعب الاطفال البلاستيك و الحمد لله شغلنا مسمع فى السوق كله
ابتسام / ربنا يزيدك بس ايه علاقه نهى بالكلام ده
محمود / اهدى عليا يا ست الكل انا اساسا متوتر و الموضوع كله جديد عليا المهم انا ربنا رزقنى بولد بعد اربع بنات الحمد لله جهزتهم و جوزتهم كلهم مش فاضل غير على ابنى
ابتسام / اللهم بارك عقبال ما تفرح بيه
محمود / الصراحه انا فوجئت بعلى بيكلمنى بالليل من الاقصر و يقولى انه شاف الانسه نهى و اعجب بيها و طلب منى اجى و افتح مع حضرتك كلام لحد ما يرجعوا بالسلامه نيجي نتقدم رسمي … على ابنى هو اللى طلعت بيه من الدنيا مهندس شاطر فى اخر سنه فى كليه الهندسه بينزل يشتغل و ياخد مرتبه مش زى العيال اللى بياخدوا مصروفهم من ابهاتهم صدقيني على ابنى شاب محترم و ملتزم و على خلق الحقيقه انا فرحت جدا لان لاول مره يجيب سيره بنت و ياما والدته عرضت عليه الموضوع كان رافض المبدء و بيقول لما اتخرج لما ابقي جاهز بس حماسه انى اجى اطلب الانسه نهى اكدلى قد ايه هى بنت جميله و مثاليه
ابتسام / حضرتك فاجئتنى نهى صغيره و لسه فى اولى تجاره يعني قدامها تلت سنين
محمود / يا ست الكل حضرتك ادرى منى بالكلام ده دا مش سبب يمنع جوازه و كليه تجاره ممكن تكملها فى بيت جوزها عادى او نقسم البلد نصين و بعدين بدرى اوى على الكلام ده يعني الاول فى خطوبه يدرسوا بعض و ساعتها هم يقرروا يتجوزوا دلوقت يتجوزوا بعدين المهم المبدا انهم يقبلوا ببعض
ابتسام / معاك حق و برده حضرتك فاجئتنى حضرتك ما تعرفش ظروف نهى البنت والدتها اتوفت و هى بتولدها و والدها اتوفى من سنتين بعد ما عاش عليها عمره كله و انا بحكم انى اقرب واحده كنت بروح و اجى عليهم
محمود / انا عارف يا ست الكل و دا اللى خلانى اجى لحضرتك ما هو اكيد على ما كلمنيش الا اما سال
ابتسام/ حضرتك قولت انه فى الاقصر دلوقت يعني هو شافها فى الرحله و لا ايه

 

 

محمود / ايوه شافها و اتعرف عليها و على مروان ابن حضرتك و اتصاحبوا و على بيشكر فيهم جدا
ابتسام / الله يحفظك بس اللى اقصده انهم لسه ما يعرفوش بعض
محمود/ البيوت بتدخل من ابواها يا ست الكل و بعدين هم عملوا الخطوبه ليه مش عشان الناس تتعرف على بعض
ابتسام / ايوه انا والله ما عارفه اقول لحضرتك ايه
محمود / يا ست الكل ما تقوليش اى حاجه انا زيي زيك مش طرف اخرى أبارك و اهنى الرد رد العروسه و حضرتك بقي ربنا يبارك فيكي تكلميها و تقوليلها ان على اتقدملها البنت تصلى استخاره و تقرر و اللى تقول عليه حضرتك اكيد عارفه كل شئ بالخناق الا الجواز بالاتفاق و صدقيني اقسملك بالله انى هشيلها فى عنيا و هتبقي بنتى الخامسه طب والله و الله كمان مره ام على كان نفسها تيجي و انا اللى منعتها حضرتك مش متخيله احنا مستنين اللحظه دى قد ايه
ابتسام / ربنا يقدم اللى فيه الخير على العموم انا هبلغها و اكيد حضرتك هتديني فرصه اسال عنكوا و كدا
محمود / طبعا و ده الكارت بتاعى فيه عنوان المصنع و ارقام التليفونات و هكتبلك على ضهره كمان عنوان البيت عشان تسالوا عننا فى كل حته
محمود يطلع كارت و يسحب قلم من على المكتب و يكتب
محمود / و دا رقم على و اسم الجامعه عشان تسالوا عنه فيها
ابتسام / كل ده
محمود / يا ست الكل احنا شاريين و اسالي عننا محمود منصور له اسمه فى السوق
ابتسام / اللهم بارك اللهم بارك
………………
فى معبد حتشبسوت
مروان يروح طايح يزق على صحابه يتلموا و هشام بيحوش
مروان / انت جامد كدا يعنى بتلف من ورايا و تبعت ابوك فاكر ان كدا الموضوع خلص
على / انت بجد مضايق انى متقدم رسمي امال اعمل ايه عشان اثبتلك انى شارى
مروان / و لا شارى و لا بايع و لا ليك دعوه بيها و تنسي انك شوفتها اصلا
على / طب ممكن افهم ليه
مروان / مزاجى مش مرتاحلك
على / طب و هى رايها ايه
مروان يحاول يطول على الكل يحوش
على / على فكره انا اقدر ارد عليك بس لحد دلوقت عامل حساب للى ممكن يبقي بينا فاهدى كدا و اعقل احنا مش عيال الجواز عرض و طلب
مروان / و احنا رافضين انت ايه ما بتفهمش
على / انت الل رافض و مش عاوز تقول ليه
دكتور يدخل

 

 

الدكتور / فى ايه هنا … مروان !!! انت اللى بتزعق بالشكل ده
على / يا دكتور مفيش حاجه عادى يعني
مروان / لا مش عادى الكلب ده بيعاكس بنت خالى و كان بيصورها
الدكتور / كرنيهك و وريني موبايلك
على يطلع الكارنيه من المحفظه و يدى الموبايل للدكتور يقلب فى الصور مفيش حاجه
مروان / مش هتلاقى حاجه لانه مسحها الصور عندى على الموبايل هو بعتهالى امبارح
شاب ١ / هو لو كانت نيته وحشه كان بعتلك الصور بنفسه
شاب ٢ / يا دكتور الموضوع ده خلص و بابا على راح لاهل نهى يطلبها مروان عرف الخبر اتجنن زى ما حضرتك شايف
مروان / اتكلم عدل
الدكتور / خلاصه الكلام انتوا الاتنين ما اشوفكوش مع بعض لاخر الرحله الحوار ده ما يتحلش هنا و لا بالطريقه الهمجيه دى انتوا لو حصل نصيب هتبقوا عيله و انا لو ما كنتش عارف اخلاقك يا مروان ما كنتش عديت ابدا اسلوبك الهمجى فى مكان سياحى زى ده دا انا جار اجرى على الصوت فاكر فى مصيبه
مروان / يعني حضرتك مش شايف انه غلطان ؟
الدكتور / غلط لما صور و مسح الصور و اثبت حسن نيه و اتقدم رسمي
مروان / و احنا مش موافقين
الدكتور/ تمام يبقي القصه انتهت و اى قله ادب تانى هزعلكوا كلكوا مفهوم ؟
على / مفهوم يا دكتور
مروان / مفهوم عن اذنكوا
مروان يمشي و هشام يجرى وراه
الدكتور / مروان على فكره شاب كويس و انا درستله اربع سنين حتى نهى ندرستلها بنت كويسه … يا زين ما اخترت … انا هتكلم معاه
على يبتسم اوى
على / و الله يا دكتور انا عارف انى غلطت لما صورتها بس انا ما اعرفش و الله عملت كدا ازاى بس والله كان غرضي شريف
شاب ١ / يا دكتور باباه راح كلم اهلها النهرده و هيتقدم رسمي اول ما نرجع
على / هو اتعصب بسبب الصور اللى انا بايدي باعتهاله طب انا لو نيتي وحشه كنت ابعتهاله بنفسي دا ازاى يعني و بعدين هو لما اضايق انا مسحتهم
الدكتور / خلاص يا رجاله قولت هكلمه اهدوا بقي السياح بتتفرج علينا يلا مش عاوز دوشه فى المكان الموضوع خلص يلا اهدوا بقي
الدكتور يروح ناحيه مروان

 

 

مى / هو انت هتخللها جنبك عريس كويس رافضه ليه و لا رافضه بصفتك ايه
مروان / هو كدا
مى / طب اسالها حتى على فكره هى موافقه
مروان يبص باستغراب الدكتور يدخل
الدكتور / مروان
مروان يسيبها و يروح للدكتور
الدكتور / بص اولا انا مقدر موقفك انك اضايقت من الصور بس اعتقد انه يتقدم رسمي دى بتحسن من موقفه
مروان / يا دكتور الموضوع اكبر من كدا انا مش شايفه مناسب ليها
الدكتور / هو انت اللى هتتجوزه عشان تشوف ايوه انت معاك حق طول ما انتوا فى الرحله يبقي بعيد بس كلها ايام و تروحوا و يجي هو و باباه لو جه يبقي اهلا و سهلا ما جاش يبقي يا دار ما دخلك شر و من هنا لوقتها هو كدا كدا ما لوش اى علاقه بنهى تمام اهدى بقي
مروان يهز راسه الدكتور يمشي مروان يروح يقعد جنب نهى مى بتكلمها
مى / لو ما كانش جاهز ابوه ما كانش راح اتكلم مع عمتك بقلب جامد كدا شكله شاريكي بجد و بعدين الجدع
مروان / خلصنا بقي من السيره دى و لا ايه
مى / انت غريب جدا على فكره انا ما كنتش اعرف انك دكتاتورى كدا
مروان / انا ديكتاتور انا ظالم انا انسان متحكم و متملك و متسلط حد ليه فيه
مى / هى عشان سكتالك يعنى و محترمه غضبك اللى ما لوش تلاتين تفسير فاكر انك صح كلف نفسك و اسألها مش يمكن عاجبها
مروان / ماشي .. ايه رايك يا ست نهى عاوزه تكملى حياتك مع واحد زى ده ؟
نهى / انا ما اعرفوش لسه عشان اقرر حاجه زى دى
مى / بالظبط و عشان تعرفيه لازم تقعدى معاه مره و اتنين و تلاته و تتكلموا و تقربوا من بعض
مروان / دا عند امه الكلام ده
مى / ما هى مش هتترهبن يعني اهدى كدا و فكر بالعقل
مروان / انا شايفك متحمسه اوى للحكايه دى خير
مى / و ما اتحمسش ليه عريس كويس ما يتعيبش و شارى ترفض ليه من غير ما تديله فرصه و تقعد و تتكلم معاه
مروان / طب ما دام هو حلو كدا ما تروحيله انتى
مى / انا هعتبر نفسي ما سمعتش حاجه عشان انا ما استحملتكش السنين دى كلها بحججك بظروفك عشان اخرتى يتقالى حاجه زى دى و بعدين بنت خالك اهى عندك اشبع بيها عم اذنكوا
مى تمشي نهى تيجى تحصلها مروان يمنعها
نهى / مى مى استنى يا مى ما يقصدش
مروان / استنى هنا عاوزك
نهى / انت بتعمل كدا ليه
مروان/ عشان خايف عليكى النوعيه دى انا عارفها كويس

 

 

نهى / انا ما اعرفوش و مش هحابيله على حسابك بس انت رد فعلك غلط انت كبرت المواضيع و خليت كل اللى فى الرحله ما لهمش كلام غيرى الموضوع كان بينا و قفلناه امبارح اللى انت عملته دلوقت هتلاقى الكل بيسال و بيتكلم و بعدين مى مش عدوتك مى معاك بقالها سنين ليه تزعلها كدا بكل بساطه انا عمرى ما شوفتك كدا
مروان / مجرد فكره انك تكونى معاه خنقتنى
نهى / ليه عشان الصور هو اللى قالك على فكره لو كانت نيته وحشه ما كنتش عرفت ما تعاقبوش انه صريح معاك اه غلط انه صورنى بس كنت اساله عملت كدا ليه و بعدين انت بنفسك امبارح قولت عنه ابن ناس و كويس فجاه لمجرد انه بصلى بقي وحش
مروان / انتى مش بايره عشان اول واحد يبصلك تجرى عليه انتى الف من يتمناكى
نهى / سبحان الله برده انا اللى لسه من كام يوم كنت بتقول عاوز تجوزنى عشان ترتاح و انا برده اللى كنت بتقولى ان مين هيبصلى و ان اللى هيتجوزنى هينجد البشريه و يظلم نفسه
مروان / كنت بهزر كل ده مش حقيقي انتى عارفه غلاوتك عندى انتى عارفه انتى بالنسبالى ايه
نهى / اختك و اكتر من اختك كمان انا عارفه بس انت فعلا لحد دلوقت ما فكرتش تسالني و لو مره انا رايي ايه
مروان / رايك ايه يا نهى
نهى / ما اعرفش و لسه بدرى انى اخد قرار بس انا مش رافضه الموضوع
مروان / افندم !!!
نهى / ايوه فين المشكله على شاب كويس و مش بيعمل كدا رياء انا حسيته اه غلط و اه لسه بدرى على اى كلام بس انا
مروان / انتى بس نفسك تحسي باحساس الارتباط عاوزه تحسي انك زى كل البنات مش اكتر نفسك تحسي انك مرغوبه عشان كدا موافقه على اى وضع و خلاص
نهى / مش حقيقي انا لو عاوزه ارتبط كنت عملتها من زمان بس انا بصون نفسي للى يقدرنى
مروان / و سي على ده قدرك
نهى / مجيه ابوه لعمتى تقدير و على العموم انا قولتلك انى لسه ما وافقتش بس لازم تفهم انى مش رافضه و انى لما هرجع مصر عند عمتى لو حصل و على جه هو و اهله انا هقعد معاهم
مروان / حتى لو انا مش موافق ايه ما ليش راى خالص فى الموضوع
نهى / رايك على عيني و راسي انا ما عنديش اغلى منك بس
مروان / ما بسش يا نهى ما بسش ما دام ما عندكيش اغلى منى عاوزه تسبيني و تروحيله ليه
نهى / ايه !! اسيبك ! ما فيش اخت بتسيب اخوها يا مروان مفيش اى علاقه فى الدنيا ممكن تكسر علاقه الاخوه اللى بينا
مروان / هياخدك بعيد عنى
نهى / انت بتغير عليا يا مروان
مروان / اه ليه لا حد تعب فيكي قدى حد حبك قدى
نهى تبتسم
مروان/ انا معاكى عمرك كله بوديكي المدرسه و بجيبك و بجبلك طلباتك و بلعب معاكى و بزاكرلك و بعملك كل اللى نفسك فيه هو بقي عملك ايه
نهى / ما حدش فى الدنيا عملى و لا هيعملى ربع اللى انت عملته يا مروان بس … انا على كدا مش هتجوز ابدا ايه هتخللنى جنبك
مروان / و ليه لا لحد ما الاقى اللى يستاهلك اللى اضمن انه مش هيقصر معاكى انا مش هقدر اشوف حد مزعلك
نهى / كما تدين تدان و اللى بتعمله فى بنات الناس هيتردلك فيا
مروان يتفاجئ
نهى / مش مى دى بنت ناس برده مش رابطها بيك و بتسهروا تكلموا بعض طول الليل و يا بيبي و يا قلبي بالبساطه دى زعلتها مستني ايه بقي من الغرب ناحيتي يا مروان
مروان / انتى غير مى
نهى / ليه انا بنت ناس و هى بنت ناس برده بس هى حبتك و وثقت فيك
مروان / انا و مى مختلفين انا و هى
نهى / لو مش عاوزها سبها تروح لحالها قولها يا مى ما تربطيش نفسك بيا و ترسمي احلام انا مش جد معاكى انا بتسلى حاطك على الرف لحد ما الاقى واحده انسب لو واخد قرارك انها مش مناسبه ليك انهى الموضوع انما اللى انت بتعمله ده هو الحرام بعينه كسره قلبها دى هتتحاسب عليها يا مروان اتكلم معاها و حط النقط على الحروف قرر هتكملوا و تعرف عمتى و تقابل مامتها و لا تنهى الموضوع و تسيبها تشوف حياتها
مروان / معاكى حق … انا فعلا … لازم اخد قرار فى حوار مى ده عن اذنك
نهى / مروان … لو سمحت ما تاخدش قرار فى لحظه غضب تندم عليه .. المشاعر لو اتكسرت ما بتتصلحش كلمه اسف بعد كدا مش هتنفع اهدى لو سمحت و فكر قبل ما تقول او تعمل اى حاجه
مروان / انا هادى … عن اذنك
مروان يروح يدور على مى و نهى واقفه مضايقه
…………………..

 

 

فى جنب تانى
مى واقفه مع على
على / انا عندى اخوات بنات و مقدر غضبه من حوار الصور و صدقيني ندمان عليه
مى / هو اوفر اصلا صدقنى ما بيخليهاش تقعد معانا او فى قعده فيها صحابه او تكلم مع اى شاب حتى لو جوه الكليه هو و بس
على / مش وحش و حقه يخاف عليها و انا لو مكانه اكيد هعمل كدا
مى / هتعمل ايه هتحب و ترتبط و هى لما يجيلها عريس شارى تقول لا
على / اكيد لا بس برده الموقف بتاعى اكيد خلاه ياخد فكره غلط عنى و انا فعلا هاخد جنب باقي الرحله و لما نرجع اكيد سوء التفاهم ده هيتحل باذن الله
مى / بالعكس بالعكس على فكره هى مش رفضاك انا اتكلمت معاها هى بس زى ما تقول كدا خام جدا و لو استنيتها تديك اى رد فعل هتضيع على نفسك بنت زى القمر لازم انت اللى تستمر و تحاول تلفت نظرها اكتر و تقرب منها اكتر
على / انا فعلا هعمل ده بس مش هنا
مى / بص انا هعمل معاك جميله عشان انت بجد شاب كويس و تستاهلها و عشان انا عارفه مروان و عارفه انه بيحب ياخد كل حاجه لنفسه حتى لو مش حقه
على / ازاى يعني
مى / بيحب يبقي مركز الكون و الكل حواليه هو كدا هتبقي تفهم و تشوف ده بنفسك كل ما قربت منه المهم انا وقع فى ايدي حاجه كدا هتجبر مروان انه يوافق على جوازك من نهى
على / حاجه ايه دى ؟

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية على الرف)

اترك رد