رواية روز الأحمد الحلقة السادسة 6 بقلم مريم

 رواية روز الأحمد الحلقة السادسة 6 بقلم مريم 

رواية روز الأحمد الحلقة السادسة 6 بقلم مريم

رواية روز الأحمد الحلقة السادسة 6 بقلم مريم 

ابتسم احمد وعقد ذراعيه قائلا : ماشي يا روز يا انا يا انتِ 

ثم رفع سماعة الهاتف و اتصل بشخص ما وبعد لحظات اتاه الرد 

_ تحت امرك يا استاذ احمد

قال احمد بابتسامة خبيثة : بقولك يا مجدي انا عاوزك تجيبلي كل الشغل المتأخر من وقت ما نيڤين السكرتيرة القديمة مشيت 

_ بس يا فندم دول كتير جدا 

فقال بلهجة حازمة : ايه يا مجدي في ايه لما اقول كلمه تتنفذ بدون مناقشة في خلال ساعتين تكون كل الملفات على المكتب الملحق بالمكتب بتاعي 

_ حاضر يا فندم تحت امرك.

اغلق احمد السماعه وقال : مش انت عملالي فيها هيرو لما نشوف بقى هتتحملي لامتى خلينا نتسلى شويه .. 

وفي الخارج..

_ بصي بقى يا ست البنات المكتب ده هيبقى بتاعك 

تلفتت حولها ثم قالت بهمس : طيب معلش يا استاذ ياسين هو مفيش اي مكتب تاني غير ده 

فقال ياسين بهمس مقلدا اياها : مبدئيا اسمي ياسين بس ثانيا انت المكتب ده مش عاجبك في ايه 

_ اصل المكتب ده ما بيفصلش بينه وبين البيه اللي جوا ده غير باب يعني مجرد ان الباب ده هيتفتح هشوفه وانا عاوزه اتجنبه قدر المستطاع 

ضحك ياسين وقال : طب ممكن اعرف انت موطيه صوتك ليه ما تخافيش هو مش هيسمعك لو اتكلمتي عادي. ثانيا بقى انت لازم تعملي حسابك انك هتشوفيه كتير جدا ومش هتعرفي تتجنبيه لان شغلك كله معاه هو لانك مديرة مكتبه هو فلازم تفضلي قريبه منه 

فمفيش مفر منه يا روز وبعدين ما تخافيش احمد ما بيعضش يعني 

فقالت بتوتر : انا مش خايفة منه وهخاف ليه يعني 

_ لأ واضح فعلا انك مش خايفة خالص انت وشك لونه مخطوف بس 

فقالت ببراءة : بصراحه اه خايفة كل حاجه فيه مخيفه بالنسبالي وكمان حساه مش ناويلي على خير يعني سبحان الله انا ارتحتلك جدا حساك طيب مش زيه هو بقى مش قادره ارتاحله حساه بيدبرلي حاجه انا فعلا مش عارفه انت متحمل الشغل مع واحد زيه كده ازاي اصلا تحسه انسان معقد ومتوحش ولا يمت للبشر بصله 

فضحك ياسين وقال : يالهوي كل ده؟ طب يمكن مثلا علشان انا ابن خالته وصاحبه الوحيد فمتحمله ؟!

وضعت روز يدها على فمها بصدمة ثم قالت بلهجة اعتذار : انا اسفه بجد ما كانش قصدي ما كنتش اعرف انه قريبك ..

_ يابنتي مفيش داعي للاعتذار ده كله وبعدين انا عايزك تعرفي حاجه احمد مش وحش والله بالعكس احمد احن واجدع شخص ممكن تقابليه في حياتك بس حصلتله ظروف خلته زي ما انت شايفه كده بس والله هو طيب صحيح عليه شخطه كده بتخضني انا شخصيا بس صدقيني اللي جواه عكس اللي براه تماما انت بس اعملي اللي عليكي واتقني شغلك وهو مش هيقدر يقولك حاجه 

_ هو بصراحه انا كمان ابتديتها معاه بداية مش لطيفة 

فقال ضاحكا : اه ده يعني عشان موضوع انه شبه الانسه حنفي ولا علشان طلعتيه غلطان قدام الكل؟ 

فقالت بحرج : ايه ده هو انت عارف 

_ اي حاجه تخص احمد انا اعرفها 

فقالت بقلق : طب هو قالك انه ناوي يسقطني في المادة؟ 

_ لا لا ما اظنش ، احمد  ما يعملهاش حتى لو قال انه هيعمل كده انا مستحيل اصدق انه ممكن يأذي حد فاطمني 

ابتسمت روز وقالت : والله انا مش عارفه اقولك ايه انا فعلا اطمنت بعد كلامك ده شكرا ليك 

_ يا ستي مفيش حاجه انا عايزك بس تفضلي مطمنه وبعدين انا هنا  معاكي وهحاول قدر المستطاع اني اتدخل وانقذك من بين براثن الاسد وقت اللزوم 

ابتسمت و قالت : انا فعلا سعيدة بمعرفتك انا كنت بتمنى اخ زيك كده 

_ ده انا اللي اتشرف ان يكونلي اخت زيك يا روز و دلوقتي خليني افهمك الشغل هنا ماشي ازاي.. قاطع حديثه صوت رنين هاتفها فاعتذرت له وامسكت هاتفها فوجدته رقم غريب فقالت : معلش يا ياسين ممكن اطلب منك طلب بس ارجوك ما تسألنيش عن السبب او عن اي تفاصيل 

_ تحت امرك طبعا 

_ ممكن ترد على المكالمه دي ولو رد عليك واحد اسمه ادهم قوله ان النمرة غلط 

اخذ منها الهاتف قائلا : اكيد طبعا من عينيا.. اجاب على المكالمه ليأتيه صوت ذكوري يقول : ايه يا جميل هتفضل تقلان لحد امتى 

_ مين حضرتك؟ 

اعتدل ادهم في جلسته وقال : ايه ده مين معايا 

_ والله سيادتك اللي متصل يبقى من حقي انا اسألك السؤال ده 

_ مش ده رقم روز؟ 

_ لا يا فندم النمرة غلط ده رقمي انا 

_ ازاي بس انا متأكد ان ده رقمها انا كلمتها عليه قبل كده ولا هي عندك ومش عاوزه تكلمني

_ والله يا استاذ انا معنديش علم باللي بتقوله ده ممكن اللي انت عايزها دي تكون غيرت رقمها فمن فضلك ما تتصلش هنا تاني لاني مش عايزه عطله وانت كده معطلني

_طيب خلاص بس بلغها اني مسيري هوصلها. اغلق ادهم المكالمه بانزعاج فدلفت إليه ماجده والدته وهي تقول : ودي مين ان شاء الله اللي انت مسيرك هتوصلها 

_ ايه يا جوجو انت كنتي بتتسنطي عليا ولا ايه

قالت وهي تجلس بجواره على الفراش : اتلم يا واد انا كنت دخلالك فسمعتك بتقول كده فما تغيرش الموضوع وقولي انت بتتكلم عن مين

_ هيكون مين غيرها اللي مجنناني روز طبعا 

_ روز مين؟

_ وهو احنا عندنا كام روز يا جوجو؟ روز بنت عمي 

فقالت بغضب : انا مش قولتلك مش عايزه اسمع سيرة الزفته دي هنا 

_ مالك بس ياماما انت مش طيقاها ليه؟ وبعدين انا بحبها 

_ والله انت ما عندك دم يعني ابوك ما فاتش على وفاته اسبوعين و ليك نفس تتكلم في الكلام الفارغ ده وبعدين مانتاش عارف انا مش طايقاها ليه؟ 

_ اولا الحي ابقى من الميت ثانيا انا عارف يا حبيبتي انت مش طيقاها ليه بس اظن هي مالهاش ذنب بمواضيع زمان دي   

_ بقولك ايه يا ادهم ما تلفش وتدور عليا يا حبيبي لان محدش فاهمك قدي انت لا حاببها ولا نيله الموضوع ومافيه انها تقلانه عليك و ده هيجننك و بمجرد انك تطولها خلاص هترميها زي اللي قبلها ولا انت نسيت مراتك الأولانيه اللي حفيت وراها ومجرد انها وافقت على الجواز واتجوزتها مكملتش معاك اسبوع حتى وطلقتها في الصباحيه 

تأفف ادهم وقال : لا يا ستي ما نسيتش و بصراحه بقى اه هو يوم واحد جواز و ورقة طلاقها هتكون عندها 

فقالت بعصبية : و هو اللي خلق الزفتة دي ما خلقش غيرها 

فقال ببرود ممتزج بالخبث : يا جوجو روقي اعصابك يا حبيبتي ده انت حتى المفروض تشجعيني على اللي في دماغي علشان تبقى خدتي بتارك  و انتقمتي من امها فيها 

_ الكلام ده لو امها عايشه وقتها والله لكنت هحسرها على بنتها بس دلوقتي فات الاوان على الكلام ده

_ يا حبيبي ومين قالك بس ان الاموات مش بيحسوا دول بيحسوا اكتر من بشر كتير عايشين صدقيني .. وبما انهم بيحسوا بينا تخيلي شعورها وهي حاسه ببنتها وهي مكسوره ومذلوله ومفيش في ايديها تعمل حاجه 

_ انت باين عليك اتخبلت والله

_ طب ممكن بقى تسيبك من الموضوع ده دلوقتي وتقوليلي المحامي جاي امتى؟

_ يوه ده انا نسيته ، انا اصلا كنت دخلالك علشان اقولك ان البت عفاف قالتلي انه مستنينا تحت فسيبك بقى من الهنومه بتاعتك وتعالى ننزل نشوفه. 

وفي شركة احمد.. 

_ يخربيت بروده

_ هو يا ياسين مش كده؟

_ هو بصراحه ما قالش اسمه يا روز بس هو واثق ومتأكد ان ده رقمك وانك مش عاوزه تكلميه اعمليله بلوك واخلصي 

فقالت وقد لمعت عينيها بالدموع : ده خامس رقم اعمله بلوك وبرضو مش عايز يسيبني و بيكلمني من ارقام مختلفة انا مش عارفه اعمل ايه

_ بصي يا روز انا مش عايز اضغط عليكي ومش عايز اعرف حاجه بس حاولي تنسي اي حاجه مضيقاكي وما تفكريش فيها خالص و لو حسيتي انك محتاجه تتكلمي انا موجود 

_ شكرا بجد يا ياسين

_ خلاص بقى مفيش داعي لشكرا دي و خلينا  نتكلم في الشغل.. اخذ ياسين يشرح لها تفاصيل العمل وبعدما انتهى قال : كده يا ستي ابقى انا عرفتك كل حاجه وعلشان تبقي عارفه احمد هيتقل عليكي في الشغل شوية علشان يعرف انت قد المسؤولية ولا لا فمعلش تعالي على نفسك واتحملي. واثناء كلامه وجد مجدي يتوجه نحوه ومعه اثنين اخرين  يحملون العديد من الاوراق والملفات فنهض ياسين وكذلك روز وقال ياسين بتعجب : ايه ده يا مجدي ايه الملفات دي كلها 

فقال مجدي  وهو يلتقط انفاسه ويضع الملفات على المكتب : استاذ احمد طلب مني اجمعله كل الشغل اللي متأخر من وقت ما نيڤين مشيت من الشغل 

ياسين بصدمة : ده شغل 3 شهور 

_ والله يا استاذ  ياسين قولتله انهم كتير زعق فيا على العموم اديني نفذت الاوامر وجبتهم هو بقى يشوف عاوز يعمل بيهم ايه بعد اذنك 

خرج مجدي ومن معه بعدما تركوا الملفات على مكتب روز 

مط ياسين شفتيه ثم قال : بصراحه مش عارف اقولك ايه يا روز انا قولتلك  انه هيتقل عليكي في الشغل شويه بس بالمنظر اللي انا شوفته ده احب اقولك انه هيتقل عليكي شويتين، عشر شويات كده يعني فربنا يعينك بقى بصي هو انت اكيد عملتي ذنب في حياتك وربنا بيخلصه يا إما ده ابتلاء فاصبري عليه بقى 

روز وهي تنظر إلى الملفات بحزن كالأطفال : انا هعمل ايه في كل ده يا ياسين، اه ياني يا صغيرة على الهم يا لوزه 

وفي الوقت ذاته خرج احمد من مكتبه وعندما رأي الملفات وهي تملأ المكتب صُدم وقال بينه وبين نفسه : يانهار ابيض ايه كل دول انا حاسس ان ده هيبقى كتير اوي عليها وممكن تتعب. ولكنه سرعان ما قال لنفسه : ايه يا ابو حميد قلبك هيرق ولا ايه مش هي اللي شايفه نفسها خليها تتصرف بقى وانشف كده . فقال موجها كلامه لياسين : ها يا ياسين فهمتها شغلها ولا لسه

_ كله تمام يا احمد 

فنظر أحمد إلى روز وقال بابتسامة تحدي : تمام بما انك فهمتي الشغل انت هتشتغلي من انهارده على الملفات دي في أوراق هتترجم من انجليزي لعربي واوراق تانيه العكس وفي ملفات محتاجه تتصنف والباقي انت هتفهميه بنفسك لما تتطلعي على الاوراق بس قبل ده كله طبعا لازم توقعي على عقد الشغل ولا انت صرفتي نظر؟ 

حاولت روز ان تخفي توترها وابتسمت و اخذت منه العقد بكل ثقة و التقطت قلم من على المكتب وقامت بتوقيع العقد ثم اعطته اياه قائلة بنفس الثقة : لو حضرتك كنت فاكر اني اول ما هشوف المنظر ده هخاف وهقول ياماما الحقيني واسيب الوظيفة دي وامشي يبقى حضرتك لسه ما تعرفنيش مش انا اللي اهرب او انسحب 

ابتسم بسخرية وقال وهو يقترب منها بخطوات : ده بجد؟

فقالت بتوتر وهي ترجع خطوات للخلف : طبعا بجد 

توقف احمد وقال : طيب تمام . ثم تابع بجدية : بكره ان  شاء الله الشغل ده كله يكون خلصان 

اتسعت حدقتاها بصدمة وكذلك ياسين الذي قال : في ايه يا احمد انت واعي للي بتقوله كل ده يخلص على بكره ازاي انت عايز شغل 3 شهور يخلص في يوم ونص؟ 

فقال ببرود : والله ماليش فيه انا قولت كلمة و هتتنفذ، بكره هستلم منها الشغل ده ويكون مظبوط ولو احتاجت مساعدة لسانها الطويل موجود خليه ينفعها 

_ يا احمد علشان..  قاطعته روز :

استنى يا ياسين من فضلك . تابعت وهي تنظر إلى احمد بثبات : بكره هيكون الشغل ده خلصان يا احمد بيه اي اوامر تانية 

فقال قبل ان يوليها ظهره ويدخل مكتبه : لو في حاجه تانيه هقولك مش هستناكي تسألي. وانت يا ياسين روح شوف شغلك من فضلك وسيب الانسه تشتغل علشان ما تعطلهاش. ختم جملته بغلقه لباب مكتبه 

فقال ياسين : حبكت يعني تعملي فيها السبع رجاله في بعض وتعندي معاه ياروز 

فقالت روز وهي تجلس خلف مكتبها : معرفش بقى اهو اللي حصل بس مش مهم المهم يعرف اني قدها وقدود وان اللي بيعمله ده مش هيأثر فيا 

_ طب اطلعي بس من ورا العمارتين اللي على مكتبك دول علشان اعرف اشوفك. 

فنهضت روز ليقول ياسين : يا بنتي ده انا ماكنتش شايفك من كتر الورق اللي على المكتب ، هتخلصيهم ازاي في الفترة دي كنتي سيبيني احاول معاه 

_ما تقلقش انا هحاول اتصرف مش هغلب ان شاء الله 

_ خلاص زي ما تحبي ربنا معاكي بقى بعد اذنك 

خرج ياسين فنظرت روز إلى الملفات فقلبت شفتيها بحزن كالأطفال ثم قالت : انا بكرهك يا احمد.وفجأة سمعت صوت يأتِ من خلفها ويقول : اسمها بكرهك يا احمد بيه .. 

وفي قصر الصاوي.. 

كان المحامي يجلس مع ماجده وادهم فقال ادهم : برضو يا استاذ عمر انا مش فاهم انت من ساعة ما جيت ما بتتكلمش غير عن روز و مُصِّر اننا نوصلها و انا بقولك بدور عليها ومش عارف اوصلها مش معايا غير رقمها وكمان ما بتردش عليا فممكن تبقى صريح معانا وتقولنا انت عاوزها في ايه بالظبط ؟ 

عمر : طبعا يا استاذ ادهم انت عارف ان المفروض اننا نعمل إعلام الوراثة 

_ اكيد طبعا عارف والمفروض انك جاي هنا علشان نتكلم في التفاصيل دي مش عن روز 

_ ما هي روز جزء من التفاصيل دي يا استاذ ادهم 

فقالت ماجده بسخريه : ليه بقى ان شاء الله تكونش هتورث معانا 

فرك المحامي يديه بتوتر ثم قال : بصراحه اه هتورث معاكم

وقفت ماجده وكذلك ادهم قائلين بغضب ممتزج بالصدمة : نعم!! 

ادهم : انت اكيد اتجننت مش كده

ماجدة : الزفته دي ملهاش اي حق انها تبقى وريثه؟

_ يا جماعة من فضلكم اقعدوا واسمعوني على حسب الشرع بنت الأخ لا ترث من عمها شئ إذا كان له وارث يحوز المال 

ادهم : تمام اوي وانا وريث والدي يبقى هي ملهاش حق، هي تورث بس لو ابويا مالهوش اولاد وقتها امي هتاخد الربع و روز كانت هتاخد الباقي بس انا بقى موجود هي تورث ازاي ممكن تفهمني 

_ استاذ محمود والدك رحمة الله عليه كتبلها نص ثروته.. 

يتبع..

لقراءة الحلقة السابعة : اضغط هنا

لقراءة باقي حلقات الرواية : اضغط هنا

نرشح لك أيضاً رواية موعد مع الوحوش للكاتبة مروة شطا.