روايات

رواية فرق ساعة الفصل الثاني 2 بقلم عمرو راشد

رواية فرق ساعة الفصل الثاني 2 بقلم عمرو راشد

رواية فرق ساعة البارت الثاني

رواية فرق ساعة الجزء الثاني

رواية فرق ساعة الحلقة الثانية

احنا هنتغدا عند ماما بكرا
= انت اللي قولتلها برضو صح ، ماانت عارف يا أدهم ان هي مبتحبنيش
مين قالك كدا بس يا حبيبتي
= انت مبتشوفش معاملتها وتصرفاتها معايا عاملة ازاي
طب اقولك على حاجة عشان تعرفي ان دي كلها اوهام في دماغك ، هي اللي عزمتني بنفسها و أكدت عليا انك تيجي معايا
= ايوا مانا هروح و هستلم منها التريقة كلها
خلينا نجرب بس ولو حسيتي انك عايزة تمشي أوعدك هنمشي فورا
” كنا قاعدين بنتغدا في المطعم المفضل لينا ، بقالنا شهور مش بنيجي هنا ، ولكن بعد تأخير عقرب الساعة أدهم بنفسه عزمني ، مش مصدقة التغير اللي هو بقا فيه ، كل حاجة فيه اتبدلت كأني كنت مع شخص تاني خالص ، رجع أدهم اللي انا اعرفه وحبيته واتجوزته ، شايفة لمعة عينه وهو بيتكلم معايا ، لسة فاكر كل الحاجات اللي انا بحبها
ناكل ايس كريم
= في الشتا يا أدهم ، لا لا طبعا زوري هيوجعني ، هو انت معندكش قلب ولا رحمة
ايه يا دراما كوين مالك ، أنتي اساسا بتحبي تاكليه في الشتا
= حيث كدا يبقا هاتلنا اتنين مكس شوكولاته وفانيليا
” في الحقيقة دا كان اختبار عشان اعرف هو لسة فاكر ولا لا وطلع لسة فاكر ونجح في الاختبار ، انا حاسة اني بحلم والله ، فرق ساعة واحدة غير مصير يومي كله ، من شخص هيرجع يطلب مني الغدا مش هيلاقيه ف يتخانق معايا ونقضي باقي الأسبوع نكد ل شخص انا وهو بنقضي يوم لطيف جدا وبعد ما كنا هنتغدا ونرجع ، الساعة حاليا 2 بعد منتصف الليل و احنا لسة داخلين البيت حالا
مبسوطة

 

 

= جدا
دا اهم حاجة عندي
= بحبك ، بحبك اوي
” وعشان انهي اليوم الجميل دا ، نمت في حضنه و استغرقت جدا عشان حاسة ب راحة بقالها كتير غايبة عني ، عدا الوقت وصحيت من النوم لقيته قاعد جنبي
تعرفي اننا اتأخرنا جدا بس مش مشكلة ، كله فداكي يا حبيبتي ، صباح الخير يا كل الخير اللي في دنيتي
= صباح النور يا حبيبي
خليكي مكانك ، هحضر الفطار بسرعة و اجيلك
= انت مش بتقول اتأخرنا
اه فعلا احنا اتأخرنا بس وايه يعني نتأخر شوية كمان
= ” رديت ب ضحك” : لا يا أدهم يلا عشان مامتك متبدأش الخناقة من غيرنا
انتي لسة مصممة برضو على اللي في دماغك
= انا مش مصممة يا حبيبي دا انا اتمنى اننا نكون كويسين مع بعض
تيجي نتراهن
= ” ضيقت عيني وأنا بقوله ” على كام
” ابتسم وقال : حضن منك
لا انا بقول نلغي الرهان دا احسن
= دا هو دا وقته

 

 

طب خلينا نروح ونشوف الاول
” لبسنا و نزلنا ، طول السكة مسابنيش وقعد لوحده زي ما بيعمل كل مرة ، لا المرادي كان قاعد معايا نتكلم ونفتكر مواقف كتير عيشناها سوا ، اينعم الناس كانت واخدة بالها مننا ومن صوتنا العالي في مش مهم ، كل دا مش مهم إنما المهم عندي هو رجوع الدنيا ليا والدنيا دي اللي هي أدهم اكيد ، وصلنا بيت مامته وطلعنا ، أدهم فتح الباب بما انه معاه نسخة من المفاتيح ، دخلنا مكنش في حد
يا ماما ، احنا جينا يا ست الكل ، أنتي فين
شكلها في المطبخ ، خليكي هنا وأنا هروح اشوفها و ارجع ومتقلقيش هااا
” سابني و دخل يشوف مامته وانا فضلت قاعدة مكاني وطبعا الساعة في ايدي مش بتفارقني ، لدرجة ان أدهم سألني عليها امبارح واحنا بنتغدا
فلاش باك
بس ايه الساعة دي يا حبيبتي ، جبتيها منين شكلها مش غريب عليا
= دي كانت عندك في درج المكتب ، شكلها عجبني خدتها
اه اه افتكرت دي كانت هدية من واحد صاحبي ، بس انتي عارفة انا مش بلبس ساعات بس محبتش اكسفه وخدتها منه وحطيتها في الدرج

 

 

= بس هي حلوة
عشان أنتي لبساها بس
بااك
بقلم : #عمرو_راشد
” ركزت تاني لقيت أدهم ومامته هما الاتنين داخلين عليا كأنهم اتخانقو جوا
ازيك يا ندى
= الحمدلله يا طنط ، اخبارك حضرتك ايه
انا كويسة يا حبيبتي
” اااه شكلها بداية مش حلوة خالص ”
= طب الحمدلله ، معلش اتأخرنا على حضرتك
لا عادي ، أدهم قالي انك قضلتي قدام المراية ساعة تلبسي و تتذوقي
= انا
” استغربت جدا وبصيت ل أدهم اللي وشه كان مقلوب وحتى مش مركز معايا
اه يا حبيبتي انتي ، و رغم التأخير دا كله برضو مش باين عليكي ، عموما انا هروح اجهز الاكل
” مشيت من قدامي و أدهم جه قعد جنبي
شايف كلام مامتك
= ماله
ماله ايه ، دي هانتني قدامك وانت حتى متكلمتش
= هو مش أنتي اللي غلطانة وفضلتي ساعة تلبسي خلاص استحملي
أدهم انت بتهزر ، انت اللي مأخرنا اصلا
= بجد ، طب اسكتي اسكتي

 

 

مالك يا أدهم
= هيكون مالي مانا كويس اهو
انت فعلا كنت كويس قبل ما تدخل ل مامتك جوا ، بعدها رجعت متغير كدا
= لا انا كويس مش متغير ولا حاجة
” طريقته معايا كأنه بيهاجمني بكلامه ، هو ايه اللي حصل بس ، الدنيا كانت ماشية كويس دا انا ما صدقت ، عموما سكت عشان الموضوع ميوصلش ل خناقة ، مامته جهزت الاكل وقعدنا ناكل
الله تسلم ايدك يا ماما ، الاكل تحفة
= تسلم يا حبيبي
بقالي كتير مكلتش اكل حلو كدا والله
= ليه هي مراتك مش بتعملك اكل
” رد ب استهزاء وقال ” : اكل ، اكل اه
= هو وحش ولا ايه

 

 

بعيد عنك اكل ميتشافش أصلا
” بصيتله وانا مش مصدقة كلامه ، دايما كان بيقول ان اكلي حلو ، ايه اللي اتغير
هو مش انت كنت بتقول انه حلو
= بجبر بخاطرك بس
” امه دخلت بينا و رجعت تتكلم تاني
وانت ايه اللي يصبرك على العيشة دي يا حبيبي ، روح اتجوز تاني
” انا على بعد ثواني و انفجر من العياط ، سمعت صوت صفارة من الساعة بتنبهني ان الساعة 6 برقت بعيني للساعة ، دا معناه ان أدهم رجع لطبيعته تاني ، ازاي مخدتش بالي ، تقريبا كدا مدى التغيير بتاع الساعة بيقعد 24 ساعة بس وبعد كدا كل حاجة بترجع ل طبيعتها ، يارب التخمين يكون صح ، جربت و رجعت ساعة بالوقت يعني بقت 5 ، الدنيا بتلف بيا بسرعة شديدة ، ثواني وانتهت بيا وانا قاعدة على الكنبة مستنية أدهم يخرج هو ومامته من المطبخ وفعلا خرجو ، سكت وانا شيفاهم بيقربو عليا وفجأة مامته قطعت السكوت وقالت
” ازيك يا نودي ، وحشتيني أوي تعالي هاتي حضن!

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية فرق ساعة)

اترك رد