رواية مجرد كارثه الفصل السابع 7 بقلم أروى طاهر المسلاتي

رواية مجرد كارثه الفصل السابع 7 بقلم أروى طاهر المسلاتي

رواية مجرد كارثه البارت السابع

رواية مجرد كارثه الجزء السابع

رواية مجرد كارثه الحلقة السابعة

في هلبا حاجات منقدروش نتحكمو فيها!
زي القدر والزمن واللسان…
احيانا منقدروش نتحكمو لي لساناتنا ونقولو في حاجات تجرح
واحيانا نقولو في حاجات صعب الحد يتقبلها
واحيانا يزلق لسانا وبلغلط نقولو في الحق
اي الحق
لان في هلبااااا حقائق في حياتنا صعب انها تنقال ومفروض اصلاً متنقالش..
عم الهدوء بعد ما قالت كلمتها
ساره :حطت يدها على فمها وهيا مصدومه شن قالت !
ومياسين تشوفلها بصدمه …
ساره:خذت نفس عميق وتراجعت خطوات للخلف …اسمعي
انسي يلي حكيته انا اعصابي متوتره الفتره هاذي وبديت نقول في حاجات غبيه
المهم انصحتك وخلاص
مياسين:انتي شنو يلي ت…….
ساره؛بالله عليك خلاص ….معش عندي شي نقوله انا
تصبحي ع خير
ورقدت في سريرها وغمت نفسها بي البطانيه
مياسين :قضت ليلتها كلللللها وهيا تتصل بأمها ومفيش اي رد ولا عرفت توصل فيها
لمت نفسها وقربت كرسي الزيانه لعند الشباك وقعمزت تتفرج على المطر وتفكر
__________________________
ايات:باعدت التالفون من على وذنها ….ممكن تسكري فمك شويه وتخليني نفهم من الولد
فاطمه:سكتت وحطت راسها على المخده وسرحت شويه
ايات:تحكي ع الهاتف …
قتلك منعرفش
خدت نفس عمييق،،…مش موضوعي هدى

خلاص توفت وربي يرحمها مهما كان السبب سواء يلي درناه او سبب تاني انا موضوعي توا في ساره
مفهمتش كيف كلامها وشن تقصد بي انها في كانت في غرفة هدى هذيك الليله
انا معش فاهمه شي اقسم بالله لو نرتاح من نقان فاطمه بسس
سكتت شويه تسمع في رد الولد ليها ….
اي اي تمام امالا هي كان صار شي جديد تو نكلمك
تمام تصبح على خير
ايات:تنهدت وشافت لي اختها….شنو كنتي تحكي !
فاطمه:انا بنمشي للمعهد بكرا
نبي نداوم وننسي كل شي خلاص ياسر نص السيمستر ضاع عليا
ايات:ردت عليها بفرح….وربي احسن قرار تاخديه اي هكي نبيك
انا قايمه 200جني على غير طريق شن رايك نطلعو نتغدو بكرا؟
فاطمه:جاوبت عليها بنبرة راضيه❤️…خلاص تم
ايات:ناضت من سريرها تلم في شعرها وواقفه قدام الروشن ✨
جت عينها على عزام يحط في الماكله للكلب(حشاكم)
ابتسمت وهيا سرحانه …فاطمه
فاطمه:عيونها في تالفونها…..نعم
ايات:وهيا تتفرج على عزام وراسها مسنود على الروشن وعيونها يلمعو….حسب رايك عزام ياخدني بعد ما توفت هدى!
انا اكبر وحده في بنات العيله توا 🥹
فاطمه؛تتصفح ع الفيس
قالت وهيا تضحك ببصاره….توا جايتك مياسين بنت عمتك ولا نسيتيها !
ايات:تحولت ملامحها وهيا تشوف لي عزام
من عيون لامعه بي الحب❤️
لي عيون معبيه خوف وبداية كره🔥

عزام :قام عيونه شاف زوز رواشن يفصلهم طابق يس
مياسين:يلي كانت سارحه في القمر وتفكر
وايات تشوفله بكل حب وابتسمت اول ما قام راسه
عزام:شافلهم الاثنين كيف كل وحده كانت في عالم
الاولى عندها الف خطوه وعندها هلباااااا طموح وحاجات توصلها واولها انها تتخلص منه
اما ثانيه كان عندها هلبا حاجات ناويه اديرهم واولها انها تتحصل عليها ويكون ليها✨🫶🏻
____________________________
ثاني يوم🌧❤️
الساعه 8:12والشمس رافضه إنها تطلع ✨
والغيوم محتله السماء كأنها تبشر بي مطر وروائح ارض تعطر بيها الدنيا 🌸
مياسين:طلعت من غرفت ساره وسكرت الباب
كانت لابسه سروال جينز ازرق
وفانيليا صوف بيضاء ناعمه✨
وفوقها بالطو طوويل لونه قهوي داكن وبوتيل نفس لون الجاكيت ✨
نزلت وهيا لابسه الطرحه الشتويه البسيطه وحاطه على كتافها وشاح شيفون ابيض
زكيه:ياصباح الانوار والله ….درتلك فطير على كيف كيفك
واهو نراجي في باقي سلفاتي ينوضو
لكن بايرات يبو لضهر
ربيعه:قامت حاجبها….شن النشاط يلي نايض عليك هاذا!
بسم الله الساعه قاعده 8صبح يافتاح

زكيه:مفيش احلى من النوضه بكري يا عزوزتي
هي تفضلي تفضلي عمي درتله فطوره لقيته قاعد يقرا في القرآن من لما ناض للفجر
ربيعه:ردت عليها بدون نفس وبتعابير وجه توضح انها مش طايقه زكيه ولا عاجبها شي اصلاً…..ترا حطيلي الفطور جنب شيبانيه
انا مش متعوده نفطر الا معاه ولا مع عزام وضرار
زكيه:في خاطرها تقول …..لانك عزوزه خايبه وجاهله
انتي مراءه وتكرهي يلي من جنسك تحبي كان راجلك واولادك واحفادك الشباب بس
ربيعه:نكلم فيككك
زكيه:رجعت لي وعيها….هههه حاضر ياعمتي حاضر
ربيعه:شافتلها بنضرة شر وطلعت للمربوعه
زكيه:تنهدت وخدت نفس…..هاذا كله لاني مجبتلكش حفيد ولد؟!…..يالله معليشي يهوون يهون
رجب:يحكي بملامح جاده وصوت واطي …..موافقتي كانت مش على خاطر الفلوس بس
مهما يصير في هاذي الدنيا ومهما بنتي دارت …تقعد ميسم حفيدتي
عزام:مياسين ياجدي اسمها
رجب:زي بعضه زي بعضه
غضوا بعد غضوا تطلع تأجر شقه ولا تمشي لي حد تاني تعيش معاه وتطلع الدوا
الناس بيلومو علينا حني وبيضحكو علينا حني
عزام:منزل راسه للارض ويسمع
رجب:والفلوس يلي متاكلهاش النار بياخدها حد غريب ويتمتع بيها
وانا مستحيل نسمح بي الشي هاذا
عزام:قاطع جده وهوا يقول ….يعني توا شنو مفروض ندير؟
رجب:خوتك الزوز هنيت على جوازهم الحمد الله
ولانك انت فاضي ونعتمد عليك
كلم ولد عمك ضرار وردوبالكم منها البنت هاذي
راسها كاسح وصاااعبه والبيئه يلي تربت فيها قذره
نبيك انت وولد عمك اديرو بالكم كويس وتوقفولها في كل كبيره وصغيره ولو دارت الغلط ربوها مترحموهاش
بنت عمتكم تضربوها حتى الضرب

عزام:رتب شعره للخلف وهوا فاهم كويس جده شن يحكي …
بنت في اول عمرها
جميله رغم ان جمالها غريب❤️
ملامحها شريره رغم صغر سنها لكن جميله🫶🏻
فلوسها وثروتها تتخطى النص مليون دينار وكله بي اسمها من وفات بوها
وبدون لا اب ولا عمام ولا حد يسأل فيها غير امها يلي محبوسه بين 4حيطان
بعد كلام جده فهم كويس انه عنده جميع الصلاحيات انه يتحكم في حياتها
حتى لو اضطر انه يضربها✨
قاطعت هدرزتهم حناه يلي خشت هيا وابتسامتها من الودن للودن
الابتسامه الفتاكه هاذي ميشوف فيها حد غير ولادها واحفادها الشباب
الشباااااب بس….
_____________________________
زكيه:من كثر قوة نبضات قلبها مكانتش سامعه شي تاني
الخوف مالي جسمها
في الوقت هاذا حتى لو ناموسه تقدر ترعبها
خشت لغرفة عزوزتها ربيعه وهيا تمشي على راس صوابعها
نزلت تحت السرير وطلعت شنطه جلد لونها بني
من كثر ما كانت قديمه لين مقشره
كتبت الرقم السري يلي شافاته مره وحفضاته
ونفتحت الشنطه وبان عليها قطع الذهب يلي تلمع لمع
مديت يدها وخدت زوز حدايد وخاتم
دستهم في صدرها وهيا ترعش وسكرت الشنطه وردتها في مكانها
حاولت ترجع كل شي نفس ما كان وطلعت بشويه بشويه
____________________________

ضرار:طلع من باب الحوش الداخلي وهوا يلمع في السبيدرو✨
لابس سروال جينز وجاكيت جلد اسود مسكر وشعره يلمع من الكريمه✨
شاف مياسين مقعمزه على الدرج وكأنها تراجي في حد
ضرار:صباح الخير
مياسين:شافتله وغيرت اتجاه عيونها…..صباح النور
ضرار:وهوا مبتسم….شنو جو النومه مع اختي ساره بالله؟
عارفها نفاخه تحمليها
مياسين:شافتله من فوق لعند لوطه وقلبت عيونها
ضرار:اختفت الضحكه يلي على وجها….اممم
اءءء يعني
حبيت بس نصبح عليك ونعتذر على الموقف يلي صار بيني وبين ساره قدامك
ساره اختي تمر بي فتره صاعبه وانتي عارفه
الخوت يوقفو مع بعض وهكي
مياسين:سارحه….تمام
ضرار:سكت شويه…..شني وين طالعه؟
مياسين:تنهدت…للقرايه
ضرار:اووه….حلو مكنتش نسحابك تقري الحق نسحابك محبوسه😂
مياسين:شافتله بتقزز….واضح ان رزن الدم وراثه عندكم وناضت
ضرار:لحقها….خلاص وربي كنت نبصر
شن تقري!
مياسين:قانون …..وبالله ياسر كلام منحبش نحكي هلبا الصبح
ضرار:ضحك…..به ربي يعاونك يا بنت العمه شنو جايك سواق ولا نوصلك.؟
مياسين:بدون نفس….اي حد مش فارقه
ضرار:خلاص اماله هي ت……

عزام:قاطعهم….صباح الخير
خش يبيك جدي في موضوع ….واتجه لي السياره
ضرار:كنت نبي ن…..
عزام:شوف جدك الموضوع ضروري ….وانتي اركبي وقت عليا
مياسين:قلبت عيونها وهيا متنرفزه…لكن مردتش بحرف
سكتت وركبت
ضرار:يشوفلهم بصوت واطي….بتلف عليها هيا وفلوسها قبلي ياعزام !
والله ما صايره
طلعت سيارة عزام مخليه ضرار وافكاره وراها❤️
______________________________
مياسين:مقعمزه وحاطه شنطتها في حجرها وماسكه تالفونها بيدها وسارحهفي الطريق
عزام:علاش طالعه بي شنطة الكتاف؟
مياسين:قامت حاجبها بي استغراب….عفوا!
عزام:اول يوم كليه
يعني مفروض متستحقيش شنطه كبيره هكي
مياسين:هه….شن دخل اهلك انت!
عزام:يسوق مردش عليها …..
مياسين:كل شويه تشوف لتالفونها تتأكد لو في مكالمه من امها او لا
عزام:درس السياره ونزل
مياسين:راقباته بي عيونها لين خش للقهوه وعطاها بضهر
حطت يدها على الباب فتحاته بدون ما تتحرك وعيونها في باب القهوا
عزام:طلع قدام الباب يحكي تالفون ويشبحلها ومياسين ولا حركه
عزام:رجع للقوه وعطاها بضهر
مياسين:في اللحضه هاذي نزلت من السياره بسرعه لبست شنطتها على كتافها وشدتها جررري وجري وجري بدون وعي على نفسها بي شي

مكانتش تفكر في شي غير انها تهرب وبس
______________________________
الساعه10:30✨
رضت الشمس انها تطلع وتنور السماء بنورها❤️
لكن مره مره تختفي بين الغيوم كأنها تبينا نحسو بي قيمتها🫶🏻
صدام:طلع من الحمام ومريم مكانتش موجوده على السرير
لبس حوايج الخدمه ومشط شعراته وبخ عطره🌸
وطلع من الغرفه
تفاجأ بي سفرة فطور تحل العين المغمضه✨
سفرة في حوش اهله مشافش زيها
مشافش في نزاكتها وترتيبها
مريم :طلعت من المطبخ وهيا لابسه روب شتوي فرو على اللون العنابي❤️
قايمه شعرها ومدايره تنت نفس لون الروب
قابلاته بي ابتسامه ….صباح الخيرات ☺️❤️
شن رايك ؟فطور في اول يوم شغل ليك بعد زواجنا✨
صدام؛رغم اعجابه واندهاشه بكل شي قدامه
جاوبها بكل برود….كويس
صبيلي قهوة انا منحبش نفطر الصبح
مريم:رغم خيبة املها لكن استمرت وهيا مبتسمه❤️
مريم:غير جرب افطر اليوم شوف درتلك شكشوكه تجنن طعمتها
صدام:يلبس في كندرته….مخاطريش صبي القهوا عطلت
مريم:ضهرت على وجها ملامح كسرة الخاطر لكن استمرت….
باهي ذوق السحلب كويس ودافي في ها الصقع ومش م….
صدام؛قاطعها بصوت عصبي ……قتلك منبي شي انتي باش تفهمي؟؟؟
مصره تعصبيني على صباحات ربي بري حتى القهوة معش نبيها ….وطلع وقربع الباب بقوة قوته ✨
مريم:كانت مصدومه منه ومن فعله !
كانت متوقعها ان بعد الليله الرومنسيه يلي قضوها امس ممكن يتغيرو هلبا حاجات
كانت تتخيل ان الاهتمام بتفاصيله قادر يخلق حب وتفاهم
او على الاقل احترام منه!
لكن كل الحاجات هاذي كانت وهم في وهم✨✨✨
_____________________________

اكتر شي حلو في الدنيا التميز❤️
وحلو لما يكونو الناس مش متشابهين وكل واحد عايش ويتصرف بطريقه مختلفه✨
والاختلاف يلي بين بتول ومريم رح يعلمنا هلباااا حاجات❤️
سلطان:فتح عيونه بتعب ….بتووول بتووول نوضي ديري حاجه ناكلها قبل ما نمشي الخدمه
بتول:وعيونها مسكرات….مادرت لي عمري بنديرلك انت وخر عليا صبح يافتاخ
سلطان:وهوا مكسل في السرير والنوم بيغلبه …..نوضي اقسم بالله نركك طريحه على الصبح نخلي الجيران كلهم يسمعو صياحك
بتول:غطت راسها والنوم قاتلها…..نعرف ولد امك ديرها كان مخليتكش تندم انك رجعت للخدمه اصلا
سلطان:ناض قعمز على السرير وهوا يحاول يصحصح…ضربها بي المخده وناض للحمام
بتول:من تحت الغطا ….ان شاء الله يلزوك
سلطان:خش للحمام مش قادر يوقف ولا حاب يدير شي في الصقع هاذا
وطلع منه صاحي منعنش ومعبي نشاط✨
لكن يلي استغرب فيه ان بتول مكانتش في سريرها !
لبس حوايجه وشطب وطلع
ارتسمت على وجها ابتسامه وقال في خاطره
سلطان:والله وعرفت نروضها ….زي الكلبه ناضت اديرلي في فطور
بتول:طلعت من المطبخ ….سلطان
سلطان:خدي نفس وفرد ضهره…شني واتي الفطور؟!
بتول:اسمعني لقيت البنت باعتتلي رساله الزفت بتجيني وانا مريتهاش امس بنعطيك قائمه لازم تجيبهالي باش نجهز ضيافتها

سلطان:اما بنت شن تحكي انتي ؟!
بتول:تحكي بتوتر وتكتب في الفون …..افففف صاحبتي صاحبتي
بعتلك في الواتس
اطلع بسرعه خلي نبدا ترتيب الحوش لازم انفضه قبل ما يجي وقت الضهر ياربي
سلطان:اسمعيني كويس هاذا ميمشيش م…….
بتول:دفاته….هي اطلع توا بسرعه بسرعه لما تجيب الحاجات كلمني
وسكرت الباب
سلطان:قعد واقف لمدة15دقيقه يحاول يستوعب يلي صار!
كيف قدرت تضحك عليه هكي واطلعه من الحوش بدون ما تسمع كلامه وادير فطور؟!
والسؤال الاهم كيف هوا طاوعها ومدارش اي ردة فعل عنيفه اتجاها؟!
كان واقف وحاس ان شكله عبيييييط!!!😂😂
_____________________________
مياسين:واقفه على صراف آلي وهيا داهشه ونفسها رح ينقطع…
كتبت رقم بطاقتها السري وخدت فلوسها
عدتهم وطلعت تالفونها تتصل
وزي العاده الرقم مقفل !…
غيرت اتصلت برقم تاني
استنت لحضات وجاوبت بلهفة ….ايوا نصر
واول ما تلفتت …شافت عزام واقف ومستند على عمرد الكهرباء يستنى فيها
مياسين:نزلت التالفون من على وذنها بهدوء
عزام:كملتي،؟
مياسين:اخفت مل توترها وخوفها…اي
عزام:اشر براسه…تحركي خلي نمشو
مياسين:مش ماشيه
ولو قربت مني رح نعيط ونلم عليك الناس ونقول مخطوفه
عزام:هي نجربو!!

مياسين:شافتله وهيا مش فاهمه
عزام:مسكها من يدها وجرها لي السياره
مياسين:شافت الشاب فايت قدامها بدت تصرخ وتنادي وتقوله ساعدني بيخطفني
نصدمت ونقطع صوتها لما شافت الشاب يقول لي عزام
((ربي يعاونك عزام ))
قعمزت في السياره وهيا مش فاهمه ولا شي !!!
المكان يلي فيه شنو؟
وعزام من يكون؟!!!
وكيف رح تتصرف
عزام:ركب السياره وطلع بيها….
مياسين:بدون ما تحط عينها في عينه….رجعني الحوش
عزام:هاذا يلي بيصير
محاضرتك وقتها تم
مياسين:ضحكت بهزوه….هه وحافض حتى موعد محاضراتي
قداشك فاضي
عزام:حطي في بالك كويس ان العار يلي جي من جيهة امك مستحيل نخليه يتكرر ويجي جيهتك
مياسين:عصبت اول نا سمعت سيرة امها وبدت ….
فمك تغسله بي الزهر قبل ما تجيب سيرة امي ع لسانك
قامت صبعها …..رد بااااااالك تفكر حتى التفكير ان تجيب سيرتها
ماما كان لقت تريس في حوش بوها راهو توا مش في محبوسه
عزام:يحاول يكون هاذي…..ضمي فمك لانك بديتي تغلطي في الدوا
مياسين:اي بنغلط

معش تجيب سيرتها لان وربي ماني ساكته
عزام:ضحك ع جنب ….لو مكانك راهو عشت ساكته عمري كله من عار اماليك
مياسين:بترد وقاطعها صوت تالفونها يلي شرين
فتحت الخط وهيا تسمع ….
صوت متوتر ومعبي خوف ✨
مياسين بنتي دبري كيف تطلعي وتهربي من غادي
بري لي العم جبران تلقيه مستنيك
انا غلطت لما وثقت فيهم مياسين اطلللللعي بنتي من غادي ردي بالك ترضي بي عيشة الذل يلي رح تعيشيها عندهم
مياسين:نزلت التالفون من وذنها بهدوء وسكرت الخط
عيونها تعبو دموع لكن مسكتها
شافت لي سرعة السياره في العداد
يدها تسللت لي بطمة السياره فتحتها
رجعت شافت العداد وشافت الطريق والسيارات
وكانت طريق الشط …
سكرت عيونها لحضات وفتحت الباب ولوحت روحها …

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية مجرد كارثه)