رواية ألمي الفصل الثالث عشر 13 بقلم السمراء

رواية ألمي الفصل الثالث عشر 13 بقلم السمراء

رواية ألمي البارت الثالث عشر

رواية ألمي الجزء الثالث عشر

رواية ألمي الحلقة الثالثة عشر

محمد: رتاج
رتاج: حي علياااا أمشي بسرعه
صلاح بكل برود مد تلفون: رقمك
رتاج: لا.. وجات تبي تسكر الباب في وجه بس صلاح مسكه بيده..
صلاح: انتِ القصه امتعت الباب عندك تبيله حل
رتاج: عارف لو شافك خوي يقتلني ويقتلك
صلاح: عادي أهم شيء نموت معاك.. لو تبيني نمشي رقمك.
رتاج: عليك قصه هات… كتبت رتاج الرقم لكن طبعآ صلاح خاف أنه تكتب غلط.
رتاج: خلاص كتبت أمشي.
صلاح: اصبري.. رن صلاح على الرقم ويرن تلفون رتاج… هك تمام نقدر نمشي لكن لو حطيتي رقمي في الحظر عندي لك كلام اخره.
رتاج: انتِ بس أمشي توا.
محمد: رتاج وينك يا كلبه.
رتاج: جايه جايه
صلاح: باي حبي
رتاج: اتحبك القراده.. وسكرت الباب في وجه.
صلاح: وجي وج تسكير باب
محمد: وينك.
رتاج بخوف: نعم
محمد: وين كنتي ومن على الباب
رتاج: بنت أحلام تبي طماطم
محمد: تمام امشي جيبيلي شاهي.
رتاج: باهي باهي.

تريحت رتاج أن محمد ما سمع شي…
ركب صلاح سيارته.. نرن والله نخلي شوي.. نرن نشوف شن صار امعاه.
رتاج: كنك شن تبي
صلاح: شن صار امعك خوك كلمك
رتاج: لالا.. باي
صلاح: اتسكري انجيك في الحوش.
رتاج: عليك براد فيك يا أخي.
صلاح: لا مش خوك نا أن شاء الله زوجك المستقبلي.
رتاج: تحلم… وقفلت الخط وقفلت تلفونه رتاج نين ترن على ألمى تخلي صقر يشوف حل امعاه.
رنت رتاج على ألمى مردتش.
رتاج: غريبه ليش متردش..
_______________________
«ثاني يوم»
– وعيت تذكرت شن صار أمس ضحكت قلبت وجي لقيت صقر راقد جنبي استغربت قبل نلقا فيه قبلي واعي تأملت ملامحه الي نحبهن وحطيت يدي على خده تلامست لحية شوي وبدأ يفتح في عيون غمضت عيوني حسيت بي الاحراج.
صقر: عارفك واعيه واضح من خدودك الحمرا.
-ضحكت… صباح الخير
صقر: صباح النور والسرور وعبير الزهور ل اجمل عروس في الدنيا.
– أي عروس لنا شهرين.
صقر: بس توا كيف بدأ شهر العسل.
– ههههههه المهم تبي تمشي للشغل.
صقر: معقوله نمشي ونسيب العسل الي عندي.
– بس اليوم عندك اجتماع.
صقر خبط راسه: أوف ذكر… خلاص راح نمشي ونروح بدري.
– باهي يلا نديرلك دوش وتصلي وتفطر عشان ما تأخر.
صقر بغمزه: مع بعضنا قصدك.
– يلا يا قليلة الادب.
-درت دوش ل صقر بعدها لياا صليت لبست ودرت شوي مكياج ونزلت تحت عشان ندير فطور لقيت ميرا وعمتي وهديل واريج في المطبخ.
– صباح الخير.
هديل بضحكه: صباح النور يا عسل.
ميرا: صباح الخير ألمى.
هديل بغمزه: ماشاء الله وجك منور اليوم شن في.
ضحكت: من يومي وجي منور يا قرده.
هديل: والله صار الي في بالي.
– انحرجت نزلت رأسي… المهم نسيتني نبي ندير فطور
ل صقر.
عمتي: ماشاء الله بدري.
– طبعا عمتي وقفتلي على غلط… والله وعيت بدري بس تأخرت درت دوش ولميت غرفتي.
عمتي: المهم جهزت الفطور ل صقر خوذي.
– عليش تعبتي روحك.
عمتي: خوذي وانتِ ساكته.

– حسيت روحي انحرجت مش عارفه ليش ديما اديرلي هك شفت ضحكة الشمته من أريج… شكرا.. وطلعت لحقتني هديل..
هديل: ألمى
– نعم
هديل: خليها عنك انتِ عارفه طبعه هك من يومها
– لا عارفه حتى أصلا تعودت على اسلوبها
هديل: نجكلي انتِ وعقلك.
– مشيت ل صقر..
صقر: ماشاء الله ما تأخرتي.
– لقيت عمتي دايرة فطور.
صقر: باهي أحسن ريحتك
– اها.
– طلع صقر قاعدت بروحي محبيتش ننزل عارفه شن راح يصير في كبدي زعمت وأنا نسمع في كلامهن الي زي السم… لقيت رنت من رتاج.
– الو كنك رن عليا أمس.
رتاج: قرده كنك ما رديتي!
– رقدت
رتاج: ماشاء الله رقدتي بدري والله في حاجه آخر.
– اها في حاجه صارت.
رتاج: احكيلي.
– حكيت شن صار امعاي وهي حكتلي على صلاح انصدمت ما توقعتش هك ايدير.
-غريبه معقوله والله صقر يحكي عليا معندش على الحركات هذين.
رتاج: قصدك نا كذبه يا قرده.
-لا والله مش قصدي يا بتبس استغربت ما دار هك إلا أن هوا يبيك.
رتاج: ليش ما يجي ل باتي طول.
– ما عليك راح نسألك صقر بعد يجي.
رتاج: تمام يا قلبي وربي يهنيكم… رني على عمتي هناء قوليلها شن صار معك.
– يا نعلي ننحرج
رتاج: عليك حركات طمنيه عليك.
– ان شاء الله..
_______________________
أروى: شن صار إمعكي أمس وعليش طلعتي تجري.
أسماء: حيوان ضربني كف.
أروى: أحكي با احترام.
أسماء: يا نعلي عليك حركات ما تقولي مش خوي.
أروى: أسمعي نبيك في موضوع.
أسماء: شنو
أروى: حسين يهدد في بصوري شن اندير.
أسماء: حي عليك شن تبي اديري.
أروى: يا حماره ما أنا نسأل فيك.
أسماء: اممم.. عندي لك فكره.
أروى: شنوو قوليلي الله يربحك.
أسماء: عارفه الفكره هذي اطريلك حسين و.. ألمى
أروى: شن دخل ألمى في القصه.
أسماء: اصبري نحكيلك.
______________________
– كملت اجتماعيّ وجيت نبي نطلع..
أنس: وين ماشي.
صقر: نبي نروح.
أنس : عندنا شغل خليك شوي.
صقر: عليك قصه بكرا توا نكمل.
أنس: يا راجل أنت الرئيس التنفيذي كيف تمشي.
صقر: باهي…
– كل بعد مانكمل اوراق اتجيني اخره جات في بالي ألمى طلعت تلفوني رنيت عليها..
صقر: رايفت عليك.
– طول مفيش الو شخبارك.
صقر: شخبارك تريحتي.
– الحمدلله شخبارك أنت.
صقر: مرايف على مراتي.
– ومراتك مرايف عليك
صقر: أوف نبي نروح لكن طلعلي شغل.
– على مهلك أنا قاعده مش طايره.
صقر: المهم نزلتي تحت.
– بصراحه لا
صقر: عليش.
– تعبانه شوي ونبي نرقد.
صقر: خلاص حبيبتي توا ارقدي عشان نروح منلقش نعسانه.
-ههههههه خلاص تمام باي.
صقر: مفيش تصبريه.
– زي شنو!
صقر : يعني بوسه نحبك حاجه هك.
– صقر.
صقر: عيون صقر
– باي.
-وقفلت في وجه بسرعه بدون ما يكمل كلامه ضحكت عليها مع طقت الباب.
-من!
أروى : أنا أروى
– تعالي.
أروى : شخبارك.
– الحمدلله كويسه تعالي اجلسي.
أروى : كساد الجوو بلا صفاء.
– جدآ فقدتها بكلل… بصراحه استغربت كيف أروى جايه وتحكي معاي .. اكيده رايفت على صفاء عشان هك تحكي معي.
أروى : وين رحتي.
– ها نعم معك..

أروى : صورتي صفاء أمس.
– اها كيف ما صورتيش انتِ.
أروى : في تلفوني لا كذا وريني
– لحظه نجيب تلفوني. جبت تلفوني وفتحت.. تفضلي
أروى : شكرا .. عارفه خاطري في قهوة.
– حسيت عيني عينك تبي قهوة.. توا ننزل نديرلك شوي.
أروى: خلاص نتسنا فيك هنأ.
– طلعت وسيبت أروى معاه تلفوني… جبت قهوة دخلت للغرفه.
– وصلت القهوة
أروى: اشربيها بروحك يا عيني.
– ها.. باهي خوذي فنجانك.
أروى: لا شكرا.
– طلعت أروى استغربت تصرفتها بس مرديتش عليه حسيت روحي تعبانه رقدت.
___________________
أسماء: ما عليك الباقي شوري
أروى: اتبصري صاح تعالي هنا نكملوا مع بعضنا.
أسماء: متخلفه انتِ تبي صقر يشك فينا.
أروى: فعلآ صدقتي تمام بعد تكملي رني عليا.
________________
– كنت في غرفت الاجتماع نتنقش نا وانس وصادق وباتي على شوي ملفات.. ممع جيت رساله قلبت نصدمت ونا نشوف في الكلام.
« شخبارك يا صقر يا زوج ألمى ههههههه المهم شوف مراتك الحقيره شن دزتلي صور اختك تبيني انزلهن على النت ونشهدر بيكم»
– ودزلي صور محادثه من ألمى ورقم ألمى واضحه فيها صور ل أروى اختي وهي شبه عارينه وكاتب.
« قتلك يا حسين نزل الصور هذين نبي ننتقم من أروى الي ديما رافعه خشمها عليا نزلهن على النت المهم قولي المبلغ الي تبي ونا نعطيك أهم شيء متجيبش سيرتي في الموضوع»
«أسمي حسين…. وتعال في المكان…. لو تبي صور اختك وجيبلي معاك 100 ألف الساعه 10 تعال بروحك»
– نصدمت معقوله لدرجه هذي يا ألمى عارف أن العلاقه بينك وبين أروى مش كويسه بس توصل لدرجه هذي
أنس: صقر كنك.
باتي: صقر تسمع في.
صادق خذا مني التلفون: كنك شن جاك نين انقلبت هك.
– مقدرتش حتى نمنع صادق لم خذا تلفوني.
صادق: بنت الكلب الحقيره بنت** وبوه ***
أنس: كنك يا راجل
اب صقر: صادق شن الكلام هذا.
صادق: شوفوا بنت ** شن دايره
أنس: معقوله.. لدرجه هذي تطلع حقيره
اب صقر: أكيد في غلط في الموضوع مش معقوله ألمى ادير هك صقر .. صقر هذا رقم ألمى. قول..
– مقدرتش نرد معقوله ألمى هك ادير فيا وانا الي عطيتها قلبي ليش يا ألمى..
صادق: صقر رد بسرعه هذا شرف اختك
صقر : اها رقمها
صادق: بنت ** وطلع يجري هوا وانس..
اب صقر: لا حول ولاقوة الابالله العلي العظيم معقوله ألمى يطلع منه هك..
– محسيتش بي باتي وهوا يسحب فيه وصلني للسياره ويحكي ليش دارت هك ونا عقلي مش معاي منصدم..
اب صقر: الو شيخ احمد
الشيخ أحمد: مرحبتين سالم شخبارك
اب صقر: تعال للفيلا في موضوع نبيك فيه.
الشيخ أحمد: ان شاء الله خير.
اب صقر: تعال وتفهم كل شي ..
__________________
أروى: شن صار!
أسماء: كل حاجه تمام بس دزي ل حسين قوليلي أن نقدر نمشي معاك في المكان الي تفقت عليه مع صقر
على الساعه 10 ديريلي جوو إنك موافقه وتبي الموضوع توا باهي وبعدين امسحي كل حاجه تخص حسين يمكن خوتك يخذو التلفون يفشتوا.
اروى: خلاص تمام ون شاء الله خير.
أسماء : أن شاء الله بس رني عليا بعده.
أروى: تمام باي..
– رنت أروى على حسين وتفقت امعاه على كل حاجه في البدايه شك بس بعده قال تمام.
__________________
– طحت في سابع نومها مع سمعت عياط برا انفجعت لابسة عبايه وشاحي وطلعت نجري…
ام صقر: كنك يا صادق ليش اتهزب.
صادق: بنت الكلب وين.
ام صقر: قصدك من… مع طلعت أريج وهديل واماني..
– نزلت نجري خفت اتكون حاجه صارت في صقر.
– بسم الله كنكم شن في صقر كويس.
صادق: يا بنت الكلب صقر يوم الي خشيتي في حياته وهوا مش كويس
– انصدمت كيف يحكي معاي بالطريقه هذي.
أنس: يا حقيره كيف اديري هك.
أماني: أنس كنك كيف تحكي هك.
أنس: لو تعرفي الحيوان هذي شن درت فينا.
– ما حسيت الا بكف طيحني على الأرض من صادق.
– اه
ام صقر: صادق شن ادير
صادق: خليني عليها يا امي الكلب هذي.
– منصدمه شن في نا نحلم والله كيف ما حسيت الا بحدا يضرب في… في بطني ب رجله طلع أنس وزاد عليه أنس يضرب في على وجي كف وراء كف.
ام صقر: امين تعال ل خوتك قتلوا البنت
اماني: وقف يا أنس شن ادير.
امين: شن في عليش تضربو فيه.
مع نزلت أروى : شن في شن في
أنس بدهش: الحقيره هذي دزت صور أروى ل حدا وقالت نزلهن على النت بس جاب الله الراجل دزهن ل صقر وقال نبي فلوس.
أروى بدموع التمسيح : شنوووو يا حقيره حسبي الله فيك.
أم صقر طاحت على الأرض: معقوله والله ما تريحتلك من الأول.
– نا نسمع فيهم هذا شنو انا مدرتش هك ومستحيل ندير هك صرخت بصوت عالي….

– مدرتش هك والله مدرتش مستحيل.
– أول ما سمعوا صوتي كلهم جاو في اتجاهي مع بعضهم كل حدا من اتجاه يضرب في مقدرتش انتحمل نطلب في ربي… يارب جيبلي من يفكني منهم.. تميت اندي في صقر.. صقر وينك .. صقر وينك
صقر: أنس صادق آمين.. شن اديرو
اب صقر يكر فيهم: خلاص قتلتو البنت.
صادق: خليني عليها الكلب هذي.
أنس: يا بنت****
آمين: اتفووو عليك.
– حسيت عيوني امغبتش مش قادره انصبي..نبكي نديت.. صقر وينك وينك… حسيت بالكرسي جاي في اتجاهي… والله مادرت هك ظلموني يا صقر ظلموني.
صقر: ليش يا ألمى ليش درتي هك ما تسكريني غير با اختي.
– انصدمت حتى صقر يعني.. صقر معقوله صدقتهم.
صقر : شفت كل شئ بعيني.
صادق: امشي لمي دبشك معش لك قعده هنا.
– حسيت أن كلهم عليا مقدرتش نحكي نبكي وخلاص حولت اني نصبي بروحي مقدرتش مع جيت ميرا وهي تبكي
ميرا: بشويش ألمى تعالي.
– ساعدتني ميرا بحتت فيهم أروى تبكي في حضن أمه وصقر منزل رأس ونظرات الحقاره من خوت صقر وهديل الي قاعده في مكان بعيد واماني الي في عيون نظرت الشفقه واريج الي تضحك في ضحكت الانتصار.
طلعت لغرفتي بكيت تذكرت آية
« وَمَن أَظلَمُ مِمَّنِ افتَرى عَلَى اللَّـهِ كَذِبًا أُولـئِكَ يُعرَضونَ عَلى رَبِّهِم وَيَقولُ الأَشهادُ هـؤُلاءِ الَّذينَ كَذَبوا عَلى رَبِّهِم أَلا لَعنَةُ اللَّـهِ عَلَى الظّالِمينَ». سورة هود الآية 18.
– مش راح ينفع تحكي معاهم يا ألمى صقر صدق شن قالوا عليا مليش لازم نقعد ونبرر..
ميرا: ألمى أنا مصدق أن انت انسان كويس.
– بكيت الظلم واعر يارب يكون حلم.. ميرا ساعديني نجهز شناطي..
__________________
صادق : هذي تبيله قتل والله.
اب صقر: خلاص اسكت
أنس : وانتِ يا كلبه كل من هب ودب ادزيل صورك
وعطه كف.
ام صقر: خلاص يا أنس الي فيها يكفيها.
أروى بدموع : والله كنت وثقه فيها متوقعتش ادير هك.
أنس : جيبي التلفون امعش في نين تجوزي ونتريح من وجك.
محمد : استاذ الشيخ أحمد برا
اب صقر : لا حول ولاقوة الابالله العلي العظيم.
– طلع اب صقر وقال الموضوع ل اب ألمى..
الشيخ أحمد : مستحيل بنتي ادير هك نعرفها ونا مربيها
اب صقر : بس في دليل.
الشيخ أحمد: لو تجيبلي مية دليل مستحيل نصدق.
مع خشت صادق…
صادق : مدام هك خوذ بنتك وورقة توصل لعنده معش تلزمنه.
الشيخ أحمد : مش انت تحكي الكلام هذا رجله وين
اب صقر : صقر عارف كل شي ويبي الطلاق.
الشيخ أحمد : كلملي ألمى.
______________________
توا كيف نبي نكلم بابا ونقوله شن صار في مع خشت أماني.
أماني: باتك برا قالك هيا.
– شنوو من قاله له
أماني : عمي.. وجات تبي تطلع..
– اماني
أماني : هم
– انتِ صدقتي شن قالوا عليا.
– مشت وسبتني… نبي نعرف شن اكدلهم هك اني أنا.
نزلت وخذت ميرا الشناطي وطلعت بيهن.. نا بحتت في غرفتي خشت فيك مكسوره وطلعت مكسوره بكيت خذيت تلفوني وشناطتي الصغيره وطلعت.. نزلت لقيت هديل وعمتي واريج جلست ولا كأن في وحده نضربت طلعت حتى بدون ما نقولهم أوكي.. بس نبي نعرف وين صقر طلعت لقيت آمين وانس وصادق واب صقر.. وصقر جنبهم مقدرتش نمسك روحي لقيت روحي ماشيه إتجاه صقر نزلت على ركبي كيف ما ديما اندير..
– صقر.. صقر بحت في.. رفع رأس وكان يبكي.
صقر : ليش يا ألمى ليش.
– والله ما درت هك وراسك يا أغلا حاجه في دنيتي ما درت هك.. انت عرفني مستحيل ندير هك.
صادق: مش وقت يلا برا
– عيون على صقر نبي يقول اي كلمه اسكت متحكيش مع مراتي هك خليك يا ألمى عارفك مظلومه بس انصدمت
اب صقر: قوله يا صقر
صقر : أنتِ…
اب صقر: هيا
أنس : ما عندك ما تبي فيه
صقر : أنتِ طالق
– انصدمت بكيت وقلت ل صقر…. يا خساره يا صقر يا خساره وقبل ما نطلع مقدرتش ما نقوله…
– نا عمري ما رفعت صوتي على حدا ولا رديت على حدا بس إنتوا ظلمتوني ونا مش مسمحتكم حسبي الله ونعم الوكيل فيكم.. وطلعت ل بابا الي أول ما شفني انصدم.

بابا: من ضربك يا ألمى.
– يا بابا ظلموني.. ظلموني
بابا : من ضربك
– خوت صقر.. جاء بابا يبي يمشيلهم.. خليهم عنك ربي فوق ما يسيب حق حدا.
بابا: حسبي الله ونعم الوكيل هيا…
– طول الطريق ونا نبكي مش قادره عليش هك عليش وصلت للحوش دخلت لغرفتي قفلت على روحي ونا نبكي..
امي : ألمى كنك… شن في يا أحمد.
الشيخ أحمد: تعالي نحكيلك…
– وعيت ثاني يوم على أذان الفجر أمس كله ونا نبكي وما كليت شي وعيت تذكرت الي صار رديت بكيت مش توضيت وصليت وقريت القرأن..
« وَمَن يَعمَل مِنَ الصّالِحاتِ وَهُوَ مُؤمِنٌ فَلا يَخافُ ظُلمًا وَلا هَضمًا». سورة طه الآية 112
– حسيت زي الرساله لياا ريحتني شوي …
____________________
ام ألمى : هيا ألمى اقريب 12 أفتحي الباب..
– وعيت على صوت امي.. هيا هيا.. فتحت الباب.
– نعم
أمي : تعالي وكلي حاجه من امس مش حاطه حاجه في فمك.
– استغربت امي ما فتحتش الموضوع.. شوي بس
امي : بسرعه.. وطلعت
– صبيت خذيت دوش وحطيت على جروحي لصقه شبه دمرولي وجي وطلعت ل أمي..
________________________
– بعد ما مشت ألمى مشيت لغرفتي أول ما دخلت تذكرت كل حاجه بينا وضحكتها نزلنا دموعي كسرت كل حاجه لقيت في وجي. ليش يا ألمى ليش كسرتيني ونا الي حبيتك.
ام صقر على الباب: صقر افتح
اب صقر: خلي عنك شوي توا يهدا.
ام صقر: حسبي الله فيك يا ألمى دمرتي ولدي.
صادق: شن نبوا انديروا في الراجل.
أنس: خلينا نسالو صقر
صادق: كل حاجه صقر راه كبار نحنا وبعدين مش خونا هوا.
اب صقر سمع شن قال صادق: صاح هوا مش خوك من أمك بس خوك من بوك هذي افهمه وهذي مش أول مره نسمع منك يا صادق لو سمعتك تحكي هك على صقر اتشوف شي ما يعجبك وبعدين بعد ماتت ام صقر خذيت أمك وهي الي ربت من هوا صغير مش عارف ليش حقد عليه هك.
صادق : مش قصدي بس
اب صقر: خلاص أسكت مش راح نديروا شي إلا بعد يطلع صقر.
مع خشت صقر.
صقر: راح نمشوا للمكان في الساعه الي قاله لنا.
_______________________
– طلعت من المحكمه ونا مكسوره خلاص معش في أمل نرد ل صقر طلقني حتى بدون ما يسألني طلع بدون ما يشوف وجي سمعت أنهم مسكوا الراجل الي يهدد فيهم على قولتهم نا دزيت حولت نقوي روحي قدام هلي فيهم الي يكفيهم.
بابا: كل حاجه نصيب يا بنيتي.
– الحمدلله على كل حال….
« بعد اسبوعين »
– اوف يا ماما مش عارفه ليش حاسه روحي كبدي زعمه وقبل ما نكمل كلامي مشيت نجري.. لي الحمام «اكرمكم الله » ..
أمي: والله لو صارت بينك وبين صقر حاجه راه قتلك إنك يمكن حمل..
– طقت في عقلي طول انسيت نقول ل أمي بس معقوله نا حمل..
– يمكن زعم كبد وخلاص.. عارفه راح نمشي للصيدليه الي جنبنا نسأل الدكتور الي فيها.
أمي: بسرعه مطوليش.
– تمام.. مشيت لبست وطلعت للصيدليه جبت جهز الحمل بدون ما نوري ل أمي نبي نتأكد بس.
أمي : شن قالتلك.
– قالت ممكن خذيت حاجه منتهي الصلاحية.
أمي: باهي.
– مشيت دخلت للحمام « اكرمكم الله » ودرت التحليل لحظة توتر خايفه مقدرتش انشوف بعد بعد كم دقيقه فتحت عيوني لقيت خطان يعني نا حمل بكيت مفهمتش هذين دموع فرح والله شنو تذكرت صقر اكيده مش راح يصدقني وفي نفس الوقت فرحانه راح يكون عندي بيبي يقولي يا ماما بكيت.. وطلعت ل ماما في البدايه انصدمت شن صار وكيف صار حكيتلها كل شيء.
أمي: تبي تقوليها ل صقر
– خليني نتأكد بس
أمي : ان شاء الله خير
– يارب.

– مع وصلت بابا قلتلت ماما حسيت الفرح في عيون دمع وظبطني بس قلت ل بابا خليني نمشي ندير تحليل في العياده نتأكد قبل وافق مشيت درت تحليل وطلعت حمل اكيده خذا بابا كيكه عشان حملي حسيت بابا فرحان أكثر مني.
– وصلت للحوش خذيت تلفوني نرن والله لا.. لازم نرن
توكلت على ربي رد.
– السلام عليكم.
صقر: وعليكم السلام كنك!
– شخبارك.
صقر: الحمدلله كويس احسن من قبل وبكرا مسافر مش راح نرد هنا سيبتلك الدنيا بلي فيها.
– وقفل الخط في وجي انقهرت معقوله بدون ما يسمع شن نبي نقول قررت إني مش راح نقوله له هوا أختار هك…..
___________________
« بعد مرور 9 شهور»
– قرب موعد ولدتي عرفت أن معاي توم فرحت وفرحت هلي كانت أكبر طبعا رتاج جاء صلاح خطبها وفرحها اليوم معش سمعت شئ على صقر وهل طلبت من رتاج متقولش ل صلاح إني حمل لأن عارفه راح يقوله ل صقر… كان خاطري إني نمشي معاه للكوافيره ونكون معاه في كل لحظه بس ما مقدرتش من حملي قبل منبيش نحضر الفرح خايفه انجيب في اي مكان ههههه بس طبعآ رتاج اصرت والله معش تحكي معي قالت هههههه…
___________________________
– وصلت للمطر نبي ندير مفجأه لصاحبي عمري صلاح عشان فرحه الحمدلله رديت نمشي بعد علاج 4 شهور بس مقدرتش انرد كل مكان يذكر في با ألمى مقدرتش نرن على حدا منبيش حدا من هلي يعرف إني وصلت نبي نحضر الفرح ونرد طول ل امريكا برمت في البلاد شوي….
__________________
– جهزت روحي طبعآ بعد الحمل زاد وزني ما قبل ما لقيت حاجه لمقاسي مكياجات.. وينك يا صقر شخبارك كويس من يساعد فيك تخذ في دواءك.. كل يوم نفكر في عمر ما طلع من عقلي..
أمي: ألمى هيا وقت.
– كملت هيا.. طلعت نا وماما وبابا وصلت لصاله شوي مع دخلت رتاج طبعآ قمر كالعاده سلمت عليها وتهزت شوي على شكلي.
رتاج: يارب بس بطنك كبيره بكلل.
– حيوانه عقبالك توا نشوفك
رتاج: يا نعلي يا ألمى من يصدق أن باتي يوفق على صلاح.
– أصلا سكان ل باتك فا طبيعي يوفق
رتاج: قرده أصلا يحبني.
– الله يقرفك انتِ وهوا.. مع جيت وحده مش غريبه عليا حتى هيا حمل.
صفاء: الف الف مبروك رتاج.
رتاج: الله يبارك فيك صفاء تسلميلي.
– بحتت في رتاج يعني من هذي. وصفاء كذلك متعرفتش عليا.
رتاج بضحكه: مش منكن أصلا وجكن تغير بعد الحمل.
صفاء: انتِ ألمى.
– اها وانتِ
صفاء بدموع: انا صفاء اخت صقر.
– مقدرتش نمسك روحي تظبطت وبكيت… رايفت عليكك.
صفاء: أنا اكثر وينك نرن عليك مقفل شغلتيني عليك.
– غيرت رقمي
رتاج: فضحتنا بي منظركن وانتِ متظبطت بعضكن انزلنا.
صفاء ونا: ههههههههههه
صفاء: تعالي ننزلو.
– هيا.
– نزلت نا وصفاء سألتني على اخباري وأخبار هلي وانا مقدرتش نسأله على حدا..
صفاء: ألمى انتِ تزوجتي.
– عرفتك اكيده تقولي كيف حمل متخفيش من خوك الحمل.
صفاء بصدمه: كيف… قصدي صقر عند العلم
– بصراحه لم رنيت عليه قال أن يبي يسافر وقفل الخط في وجي معش قدرت نرن عليه بعد ظلم لياا هوا وهلك… غريبه كيف سلمتي عليا.
صفاء: لأن عرفتك مستحيل اديري هك انا عرفتك أكثر منهم لم جيت وملقتكش حكولي القصه انقهرت وقتهاا صقر كأن امسافر وماشي امعاه صاحبه معرفتش انحصل.. لعند توا محكش مع حدا غير أمي وبابا بس ..
– خلاص الي فات مات ولي عده مستحيل يرد زي قبل.
صفاء: يعني متبيش صقر يعلم أن عند طفل.
– بعد انجيب بابا يبي يرن على باتك عشان يعرف وعلى فكره مش طفل .. طفلين.
صفاء بضحكه: قصدك توأم يا حبيبي يا صقر ديما خاطر يجي توأم.
– تذكرت صقر نزلنا دموعي… حسيت بيد صفاء.
صفاء: ربي يهدي النفوس.
– طبعا حكتلي صفاء شن صار في هله قالت أن أروى متقدرش ترقد في الليل اتصرخ وكم مره جابوا شيخ قال ما فيه حاجه وصادق يده انكسرت وتجبست بس صار غلط طبي انعدمت يده بكل معش يقدر يحركه
وأنس طلع عند القلب واسماء طلع عنده سرطان الثدي… تذكرت شن داروا في اللهم لا شماته…
– طلعت رتاج مع زوجه خذيت رقم صفاء حسيت بألم في بطني بس قلت ممكن ألم عادي..
___________________
– وصلت لصاله سلمت على صلاح الي فرح بجيتي لقيت راجل صفاء قال أن صفاء البنت صحبتها فا جاءت فرحت ليا زمان عليها خاطري نشوفها.. وأكيد حتى ألمى جوه رايفت عليها خاطري نشوفها حتى شوي لقيت اب ألمى مقدرتش نمشي نسلم عليه حسيت بيه يتبع في بنظرات طلع شوي لحقت نبي نشوفها..
___________________
– رن علينا بابا و الم يزيد تغيطت بس مقدرتش نغطي وجي عشان بالحمل ثقيلة ومعش نقدر نشوف.. أول ما طلعت صدرني حبيبي الي كسرني امصبي على رجله الحمدلله رد يمشي أول ما شفت جمدت مكاني صقر..
زاد الألم مسكت بطني وطحت على الأرض.
_________________
– لو أمه مش جنبها معرفتش زيد وزنها حبيبتي الي كسرتني رايفت عليها بس ليش مش غطيه وجه كأن خاطري نمشي ونغطيه منبيش حدا يشوفها بس لحظه هذي حمل كيف تزوجت ما حسيت بيه إلا وهي طايحه على الأرض شفت أم ألمى مش قادره ترفعها مقدرتش نمسك روحي مشيت نرجي..
صقر: ألمى .. كنك
– ماما اه شكلي نبي نولد.
ام ألمى بصدمه : صقر.
صقر : توا نخذه قولي ل عمي يلحقني.. ما خليتش عمتي تكمل كلامها رفعت ومشيت نجري بيه للسياره الدنيا كله كانت اتبحت في بس معدلتش عليهم حطيت في الكرسي القدامي.. وطلعت نجري.
ألمى: اه يا ماما مش قادره
صقر: تزوجتي بعدي
ألمى بصريخ: يا حمار هذا كله منك
صقر تضايق: شن قصدك.
ألمى تبكي من الألم : الحمل منك لم رنيت عليك قبل ما تسافر كنت نبي تقولك بس قفلت في وجي.
صقر: يعني قصدك يبي يجيني بيبي.
ألمى بصريخ: بسرعه يا صقر بسرعه.
صقر: خلاص وصلنا.
– وصلنا نزلت نجري شلت ومشيت لقسم الولاده دخلت مع الممرضه جيت نبي نلحق.
الممرضه: من انتِ
صقر مش عارف شن ايقول..
الممرضه: خليك برا..
مع جيت عمي وعمتي..
عمتي: وين ألمى .
صقر: جوه

عمي: من يسمحلك تخذا ألمى هك هيا مش مرتك
صقر: اسف بس لم شفت طايحه مقدرتش نمسك روحي… بس ليش ما قلتش أن هي حمل.
عمي: هي لم رنت عليك انتِ مرديتش عليها قالت مش راح تقولك إلا بعد اتجيب بس مقدرتش نمسك روحي رنيت عليك لقيت رقمك مقفل ورنيت على باتك ميردش سألت عليك قالوا مسافر.. ولم مشيت ل باتك في الحوش مابش يطلعلي فا عرفتش شن اندير.
صقر: لا حول ولاقوة الابالله العلي العظيم اسمحلي يا عمي.
عمي: أهم حاجه تطلعي بنتي طيبه متحسبش انسيت شن ردت فيه انتِ وخوتك.
صقر نزل راسه.
عمتي: خلاص يا أحمد ادعي ألمى تطلع طيبه.
– نسمع في صوتها وهي اتألم مع طلعت الممرضه تجري.
ام ألمى: شن صار.
الممرضه: ادعولها حالتها صعب.. شوي
– ومشت الممرضه ام ألمى تبكي واب ألمى يدعي معرفتش شن اندير دعيت ربي تطلع هي طيبه اهم حاجه……
« بعد 5 ساعات»
الممرضه: الف الف مبروك جاكم توأم بنت ولد.
ام ألمى بدموع: الحمدلله
– انا مصدوم ديما خاطري يجيني توأم فرحت من كل قلبي..
صقر: شخبار صحت الأم.
الممرضه: الحمدلله كويسه شوي ونطلعوهم للغرفه.
– مشت الممرضه.
اب ألمى: يتربوا في عزك يا صقر.
صقر : الله يسلمك يارب.. نمشي نبشر الأهل ونرد..
____________________
وصلت للفيلا نسمع في صوت صريخ الساعه 3 في الليل استغربت دخلت نجري لقيت انس وامين وصادق رابط ايده وباتي حط يده على وجه..
صقر : شن في .. حسيت الصدمه في عيونهم
انس: صقر امتى مشيت وكيف روحت
صقر : يعني مفيش الحمدلله بالسلامه.
– سلموا على مع شويت اسأل كيف مشت وليش ما رنيت ومن الخبر هذا..
صقر : وين أمي و أروى وشنو الصريخ هذا
– قبل ما نكمل كلامي نزلت أروى وهي تجري وتصرخ وتبكي لم شفتني وقفت مكانه..
صقر: كنك تصرخي شن في.
أروى وهي تبكي: صقر سامحني ارجوك
صقر: كنك يا أروى
أروى وهي تصرخ : ليا 10 شهور منقدرش نرقد طيف ألمى يلحق في .
اب صقر بستغرب: عليش يا أروى.
أروى: ظلمت يا بابا ظلمت هي مدرتش هك هذا كله مني.
صقر: شن قصدك.
– حكيت أروى كيف خططت ل كل شئ هي واسماء الحقيره و أروى خذت تلفون ألمى ودزت من الرساله وصور للرقم الي عند اسماء وقصة حسين هي كانت مرتبت فيه وكأن يهدد فيها.
صادق: يعني ظلمنا البنت يدي الي انعدمت لأني ضربت ظلم
انس: وانا جاني القلب عشان ضربت.
اب صقر: حسبي الله ونعم الوكيل
– كل حدا يقول في بلوه عند وانا الي زيهم ظلمت ألمى تذكرت نظرات الاخيره ليااا غمضت عيوني بكل قوتي مقدرتش نمسك روحي ضربت أروى كف فر جرت كف
صقر: يا حيوانه خليتني نظلم البنت وطلقت وتوا عي جابت توأم كيف تبيهم يعشوا بعيد عن بوهم خليتي البنت تكرهني ونا الي صدقتك عشان اختى اتفو عليك
-وطلعت وسيبتهم كل حدا يعزق في القصه على لاخر وصدمتهم بحمل ألمى..
________________
– طلعت من غرفة العمليات وحطني في غرفة خاصه.
– ماما.. وينهم
ماما: شوي الممرضه وتجيبهم.
– صحتهم اكويسه.
ماما : متخفيش عليهم الممرضه قالت اكويسين.
– الحمدلله.. وين .. وسكتت
ماما : قصدك صقر.

– نزلت راسي.
ماما : طلع بعد ما سمع إنك جبتي.
شوي ونسمع في صوت بابا..
_______________
– رديت للمستشفى جري لازم ألمى تسامحني ونرده..
وصلت ملقيتمش سألت الممرضه وصفتلي غرفة ألمى مشيت نجري لقيت عمي برا.
عمي : كنك بسم الله .
صقر : نبي نشوف ألمى وين.
عمي: شوي نخليها تلبس.
صقر انقهرت هذي مراتي وحبيتي اتغط قدامي : تمام.
_______________
بابا : صقر برا يبي يدخل البسي.
– بس الاطفال مش هنا عليش يبي يدخل.
بابا: قال يبيك هيا البسي.
– تغطيت شوي ودخل عليا مقدرتش نرفع عيوني عليه
صقر: عمي وعمتي شوي نبي ألمى في موضوع.
بابا: تعالي يا هناء.
– طلع بابا وماما حسيت روحي قعدت بروحي قرب مني.
صقر بصوت حدا يبكي: ألمى سامحيني.
– انصدمت عليش يبكي… على شنو
صقر: إني ظلمتك على قصة أروى اليوم أروى حكتلي أن من تخطيطها هي واسماء.
– انا مسمحتك أنت وهلك من زمان.
صقر نزل على ركبه: ارجوك رديلي بعدك معش في للحياة اي طعمه دنيتي ظلم بعدك يا ألمى.
– صاح سمحتك بس مستحيل نردلك او ترد علاقتي بيك زي قبل.
صقر رفع روحه : بس مع خشت الممرضه ماسكه الاطفال.
الممرضه: يتربوا في عزكم.
– عطتني البنت وعطت صقر الوليد وطلعت..نا وصقر مش مصدقين بحت في وبحتت في ونزلنا دموعي هذوم قطع مني ومن صقر ثمرت حبنا الي ما كملتش.
صقر بدموع: يشبهلي واجد.
– نا نسيت روحي.. كذا وريني.. يا حبيبي ماما
صقر: كذا وريني حبيبتي باته… ألمى فيه منك.
– مش درجة الملامح مش من توا توضح
صقر: ألمى مش عشان خاطري عشان خاطر هذوم تبي تخليهم بلا اب.
– راح نخليك تشوفهم متخفش.
صقر: هك راح يحسوا بنقص انهم مش زي الأطفال باتهم وامهم مش مع بعضهم.
-والله مش مني منك يا صقر انتِ الي طلقتني مش نا الي طلبت الطلاق.

صقر: لحظة شيطان والإنسان خط وانتِ عارفه اني نحبك مع خشت عمي وعمتي.
اب ألمى: يا بنتي ردي ل راجلك أحسن متخليش عيالك هك شن ذنبهم.
ام ألمى: مفيش حدا معصوم عن الخطأ يا ألمى وانتِ عقلك كبير.
– خلوني نفكر.
صقر : مفيش تفكير جبت الشيخ برا قاعد بسرعه يا ألمى
– هههههههه مش طبيعي.
صقر : يعني الضحكه موفقه
– نزلت راسي منقدرش نقول لا صاح نظلمت بس شن ذنب اعيالي .. بس عندي شرطين
صقر : موفق بدون ما تقولي.
– خليني نكمل..
صقر : قولي
– أول شرط أول ما تسمع حاجه عليا اتجي تسألني وتأكد مني.. ثاني شي حوش هلك معش نسكن فيه لا نمشيلها.
صقر : حاضر يا ألمى نتاكل على الله يا عمي.
اب ألمى: ونعم الاتكال.
____________________
« بعد مرور 6 سنوات»
– 6 سنوات عشت حياتي مع صقر الحمدلله بدون مشكلة جات أروى وخوت صقر وعمي عمتي اعتذرو مني سمحتم لأن مش راح ندير بي شئ الحقد أهم حاجه فهموا انهم غلطانين طبعآ عندي توا أربع أطفال التوأم « ليث ~ وليلى» وبعد فتره جبت خالد وبعده خلود طبعا قعدنا في فتره في شقة صقر القديمه بعدين انتقلنا لفيلا صغيره..
– رتاج كل يوم عركه جديده كيف توم وجيري عنده بنت وليد. .. طبعآ أكثر وحده جبت نا بسلامت صقر مفيش فرصه لنفس
– صفاء ردت من السفر عشت جنب هله عنده بنتين.
– أروى واسماء مزال زي ما هنا طبعآ اسماء سافرت عشان اتعلاج برا واروى مزال عند هله.
– قاعده في المطبخ نجهز في الفطور ما حسيت الا بحدا تظبطني من لورا
صقر: صباح النور والسرور وعبير الزهور ل اجمل عروسه.
– استغفر الله منك اي عروسه وبعدين فجعتني.
صقر: في نظري اجمل عروسه.. المهم جيت صلاح ورتاج اكيده
– اها اكيده… وكلمت صفاء وزوجه.
صقر: احسن حاجه وين العيل.
– مزال مرقدين.
صقر: باهي شن رأيك اتجي نبيك في موضوع في الغرفه
-ضربت على يده والله إنك فاضي.
صقر: بصراحه ما ينشبعش منك.
-قلبت وجي على وجه.. صقر
صقر: عيون صقر.
– نا حمل.
صقر: قولي والله.
– والله العظيم.
صقر: حبيبتي تجيبي بالسلامه.
– يا نعلي لو تسمع رتاج تقعد اتهز عليا مش معقوله كيف القطوس كل سنه بوحد.
صقر: لك سنه ما حملتي بعدين عادي نبيهم واجد
– ما اصلآ أنت الي تحمل وترضع.
صقر: ألمى نقاش كل سنه.. توا تعالي نقولك حاجه.
– استغفر الله قول هنا.
صقر بغمزه: متأكده..
– لالا انبصر…..
« النــــــــهاية»

لقراءة الرواية كاملة اضغط على 🙁رواية ألمي)