رواية درة أدهم النادرة الفصل السابع 7 بقلم نور

– مش هترجع يا ادهم 

– مش هرجع يا درتي 

مسك ايديا و باسهم و ابتسملي بعينيه الحزينة 

 أخذ نفس طويل و طلع باقي السلم و دخل بيتهم ، أول مرة ادهم يبوس ايديا بكل احساس و ضعف كده ، و اول مرة اشوفو متلخبط بالطريقة دي 

 كان تعبان و مخنوق ، حسيت ان فيه حاجة مختلفة ، نظرته طريقة كلامه ، تصرفاته 

ده مش ادهم اللي اعرفه اكتر من كف ايدي 

وحشني جدا ، وحشتني كل حاجة فيه 

 وحشني نرجع زي زمان ، وحشني ارجع طفلة وقت ما كنت اركب على ظهره و أفضل اضحك من كل قلبي و انسى اي حاجة وانا معاه 

كنت متأكدة انه مش زعلان مني و من كلامي اللي ميحطهوش في باله اصلا ، بس مش فاهمة ليه اتغير كده ، بقى بيعاملني بكل حذر و ميسمحش لنفسه انه يتصرف عادي زي ما عودني 

 بقيت كأني شخص غريب عنه و في حدود ملازمش يتجاوزها معاه 

– ادهم ، انت عارف مكانتك عندي انا و درة و مقدرش اعمل حاجة من غير ما اسألك 

– طبعا يا طنط نوال ، قولي محتاجة حاجة 

– لا الحمد لله ، بس في حاجة تخص درة و عايزة اخذ رايك فيها 

– قلقتيني ، خير مالها درة 

– خير ان شاء الله ، أصل جايلها عريس و قلت اكيد لازم أقولك انت اول واحد ، و عايزاك تسأل عنه كويس كمان و …..

– هااا… اه حاضر هسألك ، عن اذنك اتأخرت

– طيب استنى يا ابني اديك عنوان بيتهم او اسمه حتى ، يا ادهم  

كنت شايفاه قلقان في الأول  ، بس بعدها اتحول قلقه لكمية غضب عميق ، ملامحه مكشرة 

 كان بيمسك نفسه بالعافية و بعدها بص لباب غرفتي و طلع بره البيت بسرعة 

 استنيته يرفض و يثور ، يقولهم درة ملكي و مش هسمح لحد يأخذها غيري ، لما فاتحتني ماما في موضوع العريس ، طلبت منها تأخذ رأي ادهم الأول ، كان عندي امل بسيط انه يرفض 

انا مش غبية لدرجة اني مفهمش ادهم ، ادهم اللي اتربيت على ايديه ، مش غبية عشان مقراش الحب في عينيه ، بيقولو أن اللي بيحب بيحس بحبيبه و انا حاسة بحبه و المه و حزنه ، يمكن كلمة صغيرة منه كانت هتغير كل حاجة ، بس خلاص فات وقت الكلام 

كل حد شاف طريقه خلاص ، مش هخاطر بمشاعري و كرامتي اكتر من كده ، مش هسمحله يستهزء بيا و بمشاعري و يقابل حبي ليه بالشفقة 

يمكن اتعلق بسلمى و حبها ، يمكن شايف ان ليه مستقبل حلو معاها ، بس لهنا و كفاية ، طول عمري و الناس شايفيني مجرد ظل لادهم ، هما فاكرين ان انا مش هقدر اعيش من غيره ، بس انا هقدر و هثبتله أن وجوده زي عدمه و هبني مستقبلي زي ماهو بيعمل بالظبط ، هقدر اعيش من غيره و هعمل اللي لازم يتعمل

– صباح الخير يا درة

– نعم يا مي 

– ميبقاش قلبك اسود بقا ، أنا آسفة و الله ، انتي عارفة اني كنت زعلانة ، انا مليش غير ادهم 

– و انا كمان ماكانش ليا غيركم ، ادهم بعد عني و بعدها انتي

– سامحيني يا درة ، انتي مش صاحبتي و بس ، انتي اختي اللي مقدرش استغنى عنها و عارفة انك هتسامحيني

– وحشتيني اوي يا مي 

– و انتي كمان ، بقولك ايه ، هنروح نتعشى في بيت ادهم الجديد النهاردة و هو مصر أنكم تيجوا معانا 

– فرصة تانية ان شاء الله ، أصل في عريس جاي لبيتنا الليلة

– عريس ليكي

– آه ليا ، أمال لمامتي 

– يعني خلاص هتوافقي عليه 

– تقريبا كده ، يلا باي دلوقتي ، ابقي سلميلي على ادهم 

عدى شهر و مشوفتوش ، وافقت على كريم ، كان شاب مناسب حلو و مثقف ، عملت خطوبة صغيرة في البيت ، بس ادهم مكانش موجود كالعادة 

 الحقيقة كان كده احسن للكل ، كان لازم اعمل حاجة تقطع املي فيه للأبد 

– اركبي يا درة 

– ادهم ، خير 

– عايز اتكلم معاكي 

– بس ده ميصحش ، ازاي اطلع العربية مع حد غريب 

– أنا غريب 

– ايوه ، بش خلاص اتفضل قول اللي عندك

– مش هنا 

اخذ طريق البحر ، كنا ساكتين طول الطريق 

– على فكرة انا ارتحت منك و من تحكماتك فيا ، كان عندك حق لما قولتلي أن لما ابقى تحت مسؤولية راجل هرتاح من أوامرك و تحكماتك ، و انت عامل ايه في حياتك الجديدة و بيتك الجديد ، ان شاء الله تكون مبسوط من غيري ، أقصد من غيرنا 

– انزلي وصلنا 

– مش نازلة ، لو عندك حاجة قولها هنا 

– زعلانة مني 

– و هزعل ليه يا جاري ، مفيش حاجة تربطنا عشان ازعل منك عشانها 

– أمال مالك متغيرة كده ليه 

– مش متغيرة و لا حاجة ، بس فقت و عقلت

– كذابة  

– سيب ايدي يا ادهم ، انت جايبني هنا ليه هاا ، عايز مني ايه 

– عايزك تسيبي كريم 

– ههههه ، ضحكتني و الله ، انت شارب و لا حاجة استغفر الله 

فضل ساكت بيبصلي و عينيه حمرا ، كان متضايق جدا و مخنوق ، زعلت عشانه و عشان الكلام اللي بجرحه بيه ، بس يستاهل 

– و انت بقى هتسيب سلمى 

– انتي طلعتيلي منين ، ليه دخلتي حياتي ، ليه معيش حياتي مرتاح من غيرك ، ليه اتولدتي اصلا 

– أنت اتجننت يا ادهم ، مالك فيك ايه ، روحني من فضلك و لما تبقى كويس نتكلم 

– درة ، انا سبت سلمى 

– نعم ، دي الحاجة اللي كنت عايز تقولها 

– لا ، كنت عايز اقولك بحبك يا درة ، بحبك و قبل ما تفهمي غلط مش حب اخ لاخته لا ، حب واحد اتعذب حياته كلها و عاش زي الراهب القديس عشانك ، عشان يحميكي من نفسه قبل الكل

 حب واحد بيشوفك بتكبري و تحلوي كل يوم بس محروم من قربها زي الفاكهة المحرمة 

 حب راجل السنين اكلت عمره بس قلبه لسه صغير كل ما بيشوفك ، بكل عيوبي و سني الكبير و مشاعري و قلبي و سنين عمري بحبك ، ومش هاممني اي حد غيرك ، و لا اي حد و لا سلمى و لا كريم 

 انتي حقي انا و انا مش هسيب حقي 

انتي الحاجة الوحيدة اللي طلعت بيها من الدنيا و مش مستعد افرط فيها ، احنا خلقنا لبعض من البداية ، انا بحبك يا درة ، انا بتنفس حبك 

– و انا بحبك يا ادهم 

اول مرة في حياتي مقدرتش انام ، ولا في اسعد أحلامي اتخيلت أن يحصل كده ، كان حلم بعيد اوي يأست انه يتحقق ، بس الحمد لله اتحقق ، و ادهم اعترفلي بحبه ، أول ما طلعت الشمس ، كلمت كريم و طلبت اقابله ، بس قالي انه مسافر و هيرجع الاسبوع الجاي ، حتى ادهم مشوفتوش ما جاش البيت من يومها ، محبيتش أكلمه او اضغط عليه قلت اسيبه براحته اكيد لازم وقت عشان يقدر ينظم حياته من اول و جديد ، أول ما خلص الاسبوع ، كلمت كريم و  أخذت الدبلة عشان ارجعهاله و افهمه كل حاجة ، أصل هو ما يستاهلش اني اسيبه بالطريقة دي ، بس زي ما ادهم قال احنا خلقنا لبعض و مش هسمح لحد انه يفرق بينا ، نزلت من العمارة و كنت هاخذ تاكسي ، بس شوفت مي جاية من بعيد 

– مي ، انتي رايحة فين بدري كده ، انهاردة اجازة 

– مش عارفة اقولك ايه يا درة 

– في ايه يا مي قلقتيني ، ادهم كويس 

– ادهم كتب كتابه على سلمى امبارح ، و الفرح الاسبوع الجاي و بعد كده هياخذها و يسافر……..