روايات

رواية الوقوع في الحب الفصل السابع 7 بقلم هبوش

رواية الوقوع في الحب الفصل السابع 7 بقلم هبوش

رواية الوقوع في الحب البارت السابع

رواية الوقوع في الحب الجزء السابع

رواية الوقوع في الحب الحلقة السابعة

ساعة الواحد

كنت نتصفح بالتلفون خش يامن اتصال مسنجر بالاول مانبيش انرد بس خفت ايكون الحاج صاير معه مكروه رديت قبل مايفصل

يامن/ مساءالخير يا حلوة ????

انا/ مساء النور

يامن/راقدة؟

انا/ لا واعية خير ان شاءالله الحاج كويس؟

يامن/ اي الحمدلله حاله باهي

انا/ باهي الحمد الله بس استغربت متصل في وقت متاخر خفت ايكون صاير حاجة

يامن/ مممم لا الامور طيبة

انا/ اهااا

يامن/ شكلي ازعجتك

انا/ تثاوبت… لا عاااادي ????

يامن/ اسمعي من الاخير يابنت الناس نحن بينا عداوة من ربي هك سبحان الله مافيش حد طايق الثاني يعني لا انتي مناسبة ليا و لا اني مناسب ليك…

انا/ مافهمتش على شنو تحكي صوتك مش واضح كلمة نسمعها كلمة لا

يامن/ نفخ بعصبية… هكي شنوووو صوتي واضح

انا/???? الووو الوووو عليي الصوت

يامن/ انا نسمع فيك صكري توا نعاودلك

صكر الخط واني على طول فصلت النت

انا/ اوووف… حطيت تلفون ع صدري… يااارب ساعدني ????

يامن/ عاود اتصل ومعلقش معه… تي خيره النت الزفت…

جرب كذا اتصال والنت عندي مفصول عزق تلفون وحط ايديه خلف راسه وقعد ايفكر كيف ينسحب قبل مايصير شي رسمي ونتزوجوا

اما اني انخمم ليكون خذيت القرار الغلط و خفت نفشل في المهمة ????

هيا نرجعوا ليوم اللي جاء فيه الحاج لخالي ????????

سليمان/ انت تعرف نا معنديش غير ثلاث شباب وكل حد فيهم لاهي في هالدنيا ومن زمان نجري بروحي مالقيت من ايساعدني ويوقف معاي في شغلي مش هامهم الشغل لا في المزرعة ولا في المصنع وانا كبرت و الصحة مش كيف قبل

خ محمود/ ان شاءالله ربي يعطيك الصحة وطولت العمر… قاطعه

ح سليمان/ تسلم انا نبي نطلب منك طلب وان شاءالله ماتردني…

خ محمود/ ان شاءالله خير…

ح سليمان/ انا طالب منك اتساعدني وتقنع وردة اتوافق على طلبي و عارف ان الشي هذا محرج وصعب عليها بس هي الوحيدة اللي تقدر تغير يامن و متاكد مع الوقت ح ايكون شخص واعي و زوج مخلص تعتمد عليه

خ محمود/ والله يا حاج لو عن نفسي ماعنديش مانع بس وردة مانضمنهاش لك اتوافق بسهولة هي عندها كرامتها فوق كل شي

ح سليمان/ معاش من ايدوس كرامتها انا عارف طبع ولدي و كيف مستهتر و مشاكله هلبا بس يامن داخله طفل تقدر هي تغير فيه انا لو ماواثق ماكنت نطلبها له حتى لو كان ولدي

خ محمود/ و يامن موافق ؟

ح سليمان/ ح ايوافق باذن الله وبيرادته هو

خ محمود/ بتفكير… ان شاءالله خير غدوة ان شاءالله نحكي معها

ح سليمان/ و في حاجة اخرى

خ محمود/ شنو

ح سليمان/ يامن غاير منها وانا قررت انزيد غيرته ونعطي وردة ادارة المزرعة

خ محمود/ بستغراب… ليش شن المغزى

ح سليمان/ اولا ان شاءالله لو ارتبطوا هي ويامن ح يشدوا الشغل بينهم يعني وردة اتهنيني من المزرعة و يامن من المصنع

انا خلاص تعبت والصحة كل يوم في النازل سادني نبي انتريح

خ محمود/ ربي ايطول بعمرك و يعطيك مافي خاطرك

ح سليمان/ امين يارب العالمين

….. ????????

هذا ماصار وقتها وخالي ثاني يوم حكالي بالتفصيل وكنت ح نرفض بس لما فكرت بكلام الحاج حسيت كلامه صح

لاني حسيت ان يامن داخله غير يامن اللي انشوف فيه كل يوم و ان اني منجذبة ليه و عاجبني و من جهة عيلته كويسة وناس معدنهم اصيل وخفت القطار ايفوت وانا ونكمل عمري مع عزيز ونجوى فقررت انخوذ المعركة ونفوز بقلب يامن وان طال النظال ???? ههههههه

الصبح كان يوم حلو وانا وسط عيلة خالي محلاه جو البنات في الحوش والعرايك الصباحية اللي قبل ماتمشي المدرسة وانت شدتها عركة من وحدة لوحدة عاد ست بنات واني السابعة انظميت لمعركة الحمام بكل قوتي بيش حصلت نجهز بسرعة ونمشي للمزرعة ????????

وصلنا ساعة سبعة ونص و لقينا بس الامن خشيت فتحت المكتب وقعمزت ع الكرسي ونلف بيه فرحانة خش خالي

خ محمود/ ضحك… شنو يا مديرة عاجبك الكرسي…

انا/????… ذكرت زمان دزتني الابلة للمديرة ولقيت المكتب فاضي فرحت جيت قعمزت و مع اول لفة خشت المديرة شبحتني مالحقتش نلعب بيه ومن يومها كل مانشبح هك كرسي خاطري انلف بيه…

وزدت لفيت بالقوة وخالي يضحك

خ محمود/ ربي ايثبت علينا العقل ????

انا/ هههههههه لو يشوفني الحاج سليمان ايغير رأيه ????

خ محمود/ يعطيك الصحة نسيتيني شن نبي جاي…

بعد ساعه كانت المزرعة شغالة واني نشرف ع التعقيم وقت الحلب ونعطي في تعليماتي للعمال

اما خالي مهمته يشرف ع شاحنات المصنع اللي اتجي ترفع الحليب و يمشي معهم اينزلوا الحليب للمعاينة ع جودة و ان كان الحليب صالح او لا

و يقعد في المصنع ساعتين ويروح للمزرعة

اما يامن من ساعة سبعة كان الحاج فوق راسه

يامن/ يتقلب… خلووووني راااقد

ح سليمان/ صبي يا راجل اوقف في المصنع قبل مايوصل الحليب

و يامن دوبه انتبه اللي ايوعي فيه بوه مش امه تقعد ع جنبه عين مفتحة عين مغمضة

يامن/ بصوت ضعيف… هااا ياااا حاااج شن في

ح سليمان/ تي نوووض لا اله الا الله ليا ساعة واقف على راسك امشي شوف الشغل في المصنع

يامن/ نفخ… اوووف باااهي بااهي توا نمشي ????????

ح سليمان/ هيااا ماتعطلش عندك ربع ساعة وطير طيران ايوه مش تحجروني في الحوش والشغل ايسيب ????

يامن/ بتمتمة…يا عليك وقعة وقعت فيها وخلاص ????…

و نحى البطنية نزل رجليه من السرير

يامن/ امغير تعب الشغل اهوه لو تسمع مني اتبيع المزرعة والمصنع وتفتح شركة استيراد خير م ها الهم

ح سليمان/????… نوض نوض هذا مافالح فيه…

وطلع مبتسم خش على صفية المطبخ

ح سليمان/ شن دايرتلي فطور…

و تقرب منها اينابش فيها????

صفية/ ???? ييييي عيب ياحاج يشبحوك اعيالك

ح سليمان/لصق فيها… مرتي ونتغزل فيها عيب ولا حرام… وحط يده ع وسطها… جاء في خاطري ع الصبح ???? هياااا

صفية/ وااك خيرررك اهبلت شن واخذ من ع الصبح ان شاءالله مش واخذ اا… قاطعها

ح سليمان/ مزلت شباب مش محتاج ناخذهم تعالي بس …

وقعد اينابش فاها وعاد صفية تدلع عليه وتضحك من زمان ما شخلعها ????????

نزل يامن سمع صوت ضحكهم تنحنح وخش المطبخ

يامن/ صباح الخير

ح سليمان/????

صفية/ وجهها احمر… صباااح النووور

يامن/ فيه قهوة… وشد الكرس قعمز

صفية/ توا انديرهالك

ح سليمان/ توا تشربها لقدام راهو عطلت عليهم

يامن/ بعقدت حاجب… لا مانتحرك لين نشربها ساد واعي بكري…????

قعدت صفية اطيب في القهوة والحاج ايوصي فيه شن ايدير وشن ايخلي

ح سليمان/ بعد تطلع من المصنع امشي للحاج بدر يعطيك امانة اتجيبهالي اهني وبعدين تمشي للمزرعة اتشوف وردة كان ناقصها شي

يامن/بتمتمة… تي زبري

ح سليمان/ شن اتقول

يامن/ راهو هلبا يا حاج نمشي بيناتهم شوف ادم وصيه يمشي للمزرعة

ح سليمان/لالا تمشي انت وبالمرة اتشوف خطيبتك امتى ايناسبها ايزورنها امك وخالتك

يامن/ بنرفزة… من توا بتعلقها في رقبتي

صفية/ قولي قبل الموعد بيوم بيش انقولها لغالية اتفضي روحها

ح سليمان/ اليوم يمشوا التريس ونهاية الاسبوع التلبيسة من توا شوفي من تعزمي وشن ترفعوا معكم

يامن/???? علاش مستعجل يااحاج ماا… قاطعه

ح سليمان/ انت اللي قلتها امبارح ولا انسيت

يامن/بلع ارياقه… خلينا انشوفوا قبل بالكي هي ماتبيش توا

ح سليمان/ لا ماعليك فاها وردة مش ح ترفضلي طلب

يامن/ نفخ وصبى… ايصير خيررر…

صفية/ اشرب قهوتك

يامن/ بغضب… معش نبيها ????…

ومشى ناقم يلعن الساعة اللي نطق فاها ????

.

……. ????????????????????????????????????????????

ساعة الواحد الضهر

اتصل خالي بعزيز وقاله الليلة بيجوا التريس

والحاج سليمان عزم اولاد عمه و زوج اخته

وبلال

وساعة ثلاثة قبل العصر جاء يامن للمزرعة واني كنت واقفة ع الروشن شبحته نازل من سيارته صكرت الروشن وقعمزت ع الكرسي و حطيت وجهي في ملفات على اساس مشغولة ????

لحظات وفتح الباب بدون استاذن طبعا????

يامن/ مساااء الخير

انا/ رفعت راسي شبحتله… مساء النور

…ونزلت الملف واشرت بيدي … تفضل…

شبحلي يامن بطرف عينه ???? و قعمز سالني ع المزرعة و حكينا ع الشغل بشكل عام

و تجنب الاحراج وعشان نحفظ كرامتي اتخذت دور العبيطة وانا عارفة شن اللي يبي ايقوله

يامن/ بنسالك وجاوبيني صدق

انا/ بثقة… ااسال

يامن/ تعرفي الحاج طلبك من خالك

انا/ برتباك… طلللبني لمن؟

يامن/ انا قلت تجاوبيني صدق علاش تستغبي

انا/ بتصنع… لوووسمحت احكي كويس

يامن/ ????الحاج طلبك ليا اني

انا/ شنووو!! اني نتزوجك اانت؟

يامن/ وخيرك اتقولي فاها بتعالي اي تتزوجيني اني واليوم التريس ايجوا لخوك

انا/ بستعباط… مستحيل انوافق لالالالا مش متخيلتها اني ناااخذك ااانت!

يامن/ بزعلة… علاش شن اللي مش عاجبك ????

انا/ بتكبر… ماتزعلش مني انت مش فارس احلامي ولا مناسب ليا ???? اني انحب الراجل ايكون هك راجل عاقل وجدي وشعره في شيب وماليي اهدومه

وانت عكس هذول

يامن/صبى معصب و باصرار… للاسف انا نصيبك مضطرة اتوافقي ???? هيا سلام يا مراتي …ومشى طلع

???? الغبي غروره هو اللي ايوقع فيه بعد ماكان جاي ايقولي مش اموافق ع الزواج وهو اللي رافضني بعد ما سمع جوابي حس بكرامته و عاد مش يامن اللي يرتفض ف حب يكسر غروري وننجبر انوافق عليه ????

وللمرة الثانية يوقع في الفخ ✌????????????

حسيت بسعادة كيف انغير من حاله بكل سهوله وان يامن طفل يتحايل عليه

لفيت بالكرسي نضحك فرحانة و سرحت في خيالي كيف ح تكون حياتي معه ????

نعترف اني حبيته و كل مانشبحه قلبي ينبض بالحياة ❤

شديت التلفون واتصلت بحنين بسعادة

انا/ الووو حنونتي ????

حنين/ ياااخية ع الروقان احكي فرحيني معك

انا/ بتنهيدة طويلة… اااانحبه ااااانحبههههههه ????

حنين/ ههههه مهبولة

انا/ ضحكت… هبلني المجنون ????

حنين/ ان شاءالله نسمعوا الاخبار الطيبة

انا/ الليلة جايين التريس ????

حنين/ بفرحة… اااالف ااالف مبروووك حبيبتي

انا/ بفرحة… الله ايبارك فيك ياروحي

حنين/ هيا اااحكيلي من الاول

انا/ لالا مش ح نحكوا بتلفون تعالي المغرب نحكيلك ومنها اتساعديني ع الضيافة

حنين/ وين في حوشكم ولا عند خالك

انا / لا في حوشنا توا بعد انروح من المزرعة نمشي للحوش اهو نتحمل هالشهر وبعدين نقص رجلي كان دست عتبت الحوش

حنين/ خلاص ان شاءالله المغرب انكون عندك لو ماجيتك ونفرح لفرحك نفرح لمن بس ????????

انا/ ياااحليلي منك امووووه ????????

.

.

ساعة خمسة

عزيز/ خش جايب بضاعة … سيدرا تعالي يا بابا

سيدرا/ جاته تجري… نعمم يابابا

عزيز/ خوذي شدي… واعطاها كيس وهو خذا باقي الاكياس وخشوا للمطبخ

عزيز/ياانجوى يااانجوى

سيدرا/ ماما معها خالتي مريم

عزيز/ نفخ… شن هالهم اربعة وعشرين ساعة عندنا ماعندهش حوش تقعد فيه… وشبح لسيدرا…ااامشي قوليلها يبيك بابا بسرعة

سيدرا/ باهي… ومشيت لامها… ماما بابا قالك تعالي

نجوى/ قوليله بااهي… وشبحت لمريم…اي وشن صار ثاني

مريم/ هذا بعد ورتهالها اقتنعت و…

سيدرا/ رجعتله…قالت بااهي

عزيز/ استغفر اللة العظيم ااامشي قوليلها توا اااتجي…

رجعت سيدرا لامها

سيدرا/ ياماما قالك تعالي توا بسرررعة

مريم/ بري شوفيه

نجوى/ باهي هيا…

وصبت طلعت لعزيز ولما خشت المطبخ قعدت تشبح في البضاعة

عزيز/ باهي اللي جيتي ياست نجوى

نجوى/ بتعجب… هذا شنو

عزيز/ جبت ضيافة لبعدين جايين تريس

نجوى/ بستفهام… شن المناسبة!؟

عزيز/ صاحب المزرعة اللي تشتغل فاها وردة جاي يطلب فاها لولده والليلة جايب التريس

نجوى/ لوت وجهها… ومن يبي ايدير هذا كله

عزيز/ شن تبي اديري كله جاهز امغير تطيب القهوة والشاي

نجوى/ ???? والمحروسة ليش ماهي اتجي واتضيفهم

عزيز/ يااارب الصبر توا صاحبتك اللي داخل ماعندهاش حاجة تلتهي بيها بعيد علينا

نجوى/ اوووص نقص صوتك حشمت بيا

عزيز/ عقد حاجبه… خليها تسمع بالكي

اتحس على حالها وتحل عنا…

نجوى/ طارت صكرت باب المطبخ… شن بنديرلها بعد اتجي انلزها ولا شنو!

وبعدين اني امكسدة اتساير فيا ونهدرزوا ع الدنيا

ساد ما اني محبوسة بين الحيوط تحرم عليا ايجوني صحباتي ????

عزيز/ تاففف… اسطفلوا هيا اني ماشي شوفي لو في شي ناقص اتصلي عليا

نجوى/ قلبت عيونها… باهي بس ماتنساش قول لاختك اتجي…

طلع عزيز ايتمتم ونجوى صكرت باب المطبخ على مافيه ومشيت تكمل هدرزة مع صحبتها

وصلت مع خالي الحوش وشبحت عزيز امقعمز برا

قلتله السلام عليكم وخشيت ماعنديش نية انسلم عليه

نزل خالي هدرز معه وقاله شن الشروط اللي يشرطوهن

وقت خشيت نسمع في نجوى تحكي لمريم

وسمعت اسمي ???? قربت من باب الدار

مريم/ ياما يطلع منها الخبيثة

نجوى/ ياحسرة على اعمارنا دراويش مانعرفوا حاجة

مريم/ ياناري علينا مالناش حظ في الدنيا نبي نعرف شن اللي عاجبه فاها

نجوى/ بخبث… لا حبيبتي زمن توا حطي عينك عليه و ديريله عمل ايجيك حافين لا تتعبي تعجبيه ولا ايحبك ????

انا/????

مريم/ الملعووونة….

انا/ خشيت واصلة عندي لفوق… الله يلعنكم ياااسوس ياا محسديات يا***** اتفوووه????عليكن ياااترباية شوااارع…

مريم/????

نجوى/ ضمي فمك قطعة في اللسانك ياسحارة ????

انا/ قيمت اكمامي.. خلاااااص ياااماما فوتت هلبا اااانتي مانفعش فيك اللسان تبي طريحة بيش اتربي …

وطرت عليها شدينا في بعضنا نتضاربوا

ومريم الخبيثة واقفة تتفرج و بعدين سمعت صوت عزيز اينادي وكانت حنين داخلة معه طلعت مريم شريني راعشة

عزيز/ بغضب… تي ششششن ااالدوشة داخل

مريم/ هذه نجوى و وردة يتضاربوا الله يهديهم بيقطعوا بعضهم

عزيز/ لاااا اله الا الله على هالنهااار…

وخش ايحز بيناتنا و مريم دايرة فاها المصلحة وتشد في نجوى وتعقل فاها

و حنين شدتني وتهدي فيا

عزيز/ بعياط… خيررررركم عااااد فضحتوا بياااا قدااام الناس

نجوى/ امدمعة… هذه اااختك الاول تهجمت علينا الهماجية

انا/ فنصت فاها… وااااك يابت ستين *** اااارخيني ياااحنين بنقتلها … شدتني حنين

بالقوة

عزيز/ بعصبية… خوووذيها ياااحنين قبل مانرتكب فاها جريمة

انا/ عيطت عليه… قااادر غير عليااا اااني ليش ماااتسكتها هي مااسمعتش شن كانت تحكي هي والافعى صحبتهاااا

مريم/????

حنين/ اتشد فيا برا… هيااا يا وردة مش وقت مشاكل بالله عليك

انا/ لااااا وقتهمممم وووونص خليني ماانيش طاالعة قبل ماناخذ حقي منهم

عزيز/ ????… وررررردة ااااكسرري الشرررر راهوووو شاااد عليك روحي باااالسيف????????

نجوى و مريم/????????

حنين/ بتجداي… تررربحي عشااان خاااطري يلا معاااي…

طلعتني من الدار

انا/ شبحتلها وعيوني مدمعة… سمعتهم باوذااني ايقولوا عليااا سحاارة

حنين/ فوتيهم توا ربي ياخذلك حقك اليوم بالذات مانبيش انشوف دموعك ماتخليش حد اينكد عليك

انا/ مسحت دموعي… حسبي الله ونعم الوكيل ديما منكدين عليا ????????

حنين/ شدتني… تعالي انشوفوا شن انجهزوا ضيافة…

خشينا للمطبخ فتحنا الاكياس وبدينا نجهزوا

اما عزيز طلع من الحوش و مريم قالت بتروح للحوش ولحقت عزيز قبل مايمشي بسيارته

مريم/ بصحة وجه… عزززيز بالله انتعبك اتوصلني معك في طريقك

عزيز/???? انحرج… تفضلي

ابتسمت وفتحت باب السيارة وركبت جنبه.

مريم/ بدلع… سامحني ثقلت عليك

عزيز/ لا عادي اني ماشي …

وشغل السيارة وطلعوا

مريم/ نبي نعتذر منك ع الموقف امبكري الله يهديهم الزوز روسهن قاسيات واني واالله ماحكيت عليها بالعكس كنت انقول لنجوى هذه حماتك وديريها كيف اختك حتى لو مش كويسة معك على الاقل عشان عيونك انت ????

عزيز/ انسجم بكلامها… تسلمي بارك الله فيك

مريم/ بحنية… والله نجوى مش حاسة بالنعمة اللي عايشة فاها ????

عزيز/ ابتسم… لا عاد مش للدرجة هذه

مريم/ واكثر والله انت كنز نادر في الزمن هذا…

ذبلت عيونها وعضت شفتها

لين عزيز سرح فاها لثواني ورجع شبح للطريق

درس السيارة جنب حوش اختها

مريم/ صحيت بارك الله فيك… وفتحت باب نزلت

عزيز/ نسيتي شنطتك

مريم/ ضحكت بدلع… اسفة نسيت…

وطبست خذتها وهي تشبحله بلهفة

وقفت اشرتله بيده وصكرت الباب وعزيز ايتبع فاها بعيونه لين خشت الحوش وكل شوي تلتفت تشبحله

……………. ????????????????????????????????

عند يامن

روح المغرب للحوش دوش وخش تسطح لسريره وفي راسه الف سؤال

مش متخيل نفسه يرتبط و يتزوج حس روحه مقيد و عاجز ينهي هالارتباط

استقبل الحاج وادم و بلال شيابين العيلة و ساعة تسعة ونص كانوا في مربوعتنا

وكيف كل العوايل والعادات هدرزوا بالاعراف والشروط وووووو

نزل يامن من فوق و كان عندهم خالته غالية وبناتها ساجدة و جوري

جاء لعندهم سلم عليهم

غالية/ اااالف مبرووك ان شاءالله ربي ايكمل عليك بالخير

يامن/ الله ايبارك فيك ياخالتي عقبال سامي والبنات

ساجدة و جوري/ مبروك يا يامن

يامن/ عقبالكن ان شاءالله

صفية/ ليش مانزلت سلمت ع التريس وستقبلتهم مع بوك

يامن/ الله غالب جاي تاعب رقدت اهو البركة في الموجودين تبي حاجة قبل مانطلع

صفية/ وين ماشي

يامن/ عزميني اصحابي ع العشى

صفية/ بملل… حاول اتجي بكري اتشوف شن شروطهم وتهدرز مع بوك

يامن/ باهي ايصير خير… وشبح لخالته… سلمي ع الشباب يا خالتي

غالية/ بالبسمة… يوصل ان شاء الله…

و مشى لسهريته

غالية/ عقبال عند خوته وسامي

صفية/ امين يارب…

غالية/ شنو العرس قريب؟

صفية/ ان شاءالله نهاية الشهر لو سخر الله

غالية/ ان شاءالله

صفية/ حتى ادم ناوي يتزوج حاط بنت في راسه و يبي نخطبوله…

جوري/????????

غالية/ ومن سعيدة الحظ

صفية/ شبحت لجوري… بنتك جوري

جوري/????❤

ساجدة/ ????

غالية/ بفرحة… مانلقوش اعز منه

صفية/ شنو يا جوري موافقة يابنتي

جوري/ بخجل… مممش عاارفة

صفية/ فكري هاليومين و ردي عليا راهو الحاج بيزوجه مع يامن في نفس اليوم

غالية/ خلينا انشاور خوتها وعمها وان شاءالله مافي الا الخير

جوري/ ????

صفية/ ان شاءالله من نصيبه ياارب…

عندنا

اتفقوا ع الشروط و تموا الخطبة بعد ماروحوا وروحت حنين خش عزيز وخالي باركولي

و جت نجوى اتباركلي لاوية وجهها

المهم مشت الخطبة على خير

في حوش ح سليمان

ح سليمان/ السلام عليكم

صفية وغالية/ وعليكم السلام

صفية/ ها ياحاج شن صار

ح سليمان/ صار الخير ان شاء الله

غالية/ مبرووك عليه ياحاج

صفية/ زغرطت… لولولولولوييييي

الف مبروك ياااحاج

ح سليمان/الله ايبارك فيكن…وشبح لفوق… وين يامن ماشبحتش

صفية/ بفرحة… عازمينه اصحابه ع العشاء

ح سليمان/???? بصوت ضعيف… مشوارك طويل ربي ايعينك

صفية/ قلت حاجة يااااحاج

ح سليمان/ تنهد… نمشي نرقد من الفجر واعي هيا تصبحوا على خير

غالية و صفية/ وانت بخير ياحاج…

في المطبخ

ساجدة/ تغسل في فناجين القهوة… خيرك ساكتة

جوري/ شن بنحكي????

ساجدة/ ضحكت… اتحبيه

جوري/ اوووف مانعرفش

ساجدة/ يعني انت وادم مافيش بينكم اعجاب و حب احكيلي اني اختك

جوري/ زمان اول ماشبحته اعجبت بيه وحبيته و بعدين حسيته مش كيف مانبي اني

ساجدة/ قصدك بترفضي!

جوري/ اااااخ محتااااارة مش عارفة

ادم/ مساء الخير ????

ساجدة/ مساء النور عقبالك ان شاءالله

جوري/☺️????

ادم/ عيونه ع جوري… امييين يارب العالمين

جوري/ بلال روح ولا مزال قاعد

ادم/ خش ايسلم على صفصف

جوري/ شبحت لساجدة… نبي انروح عندي امتحان نقرا فيه…

وجت تطلع

ادم/ جوري ممكن خمس دقائق

جوري/ شن

ادم/ شبح لساجدة… معليش سجودة تخلينا شوي

ساجدة/ ابتسمت… اوكي خوذوا رحتكم ????

جوري/ تذكرت الموقف زمان… لااااا خليكي مااتطلعش

ادم/????

ساجدة/ عضت شفتها… قاعدة هنا قريب منكم شوفي ادم شن يبي… وفنصت فاها

ادم/ يشبح لجوري… انقولك كلمتين وامشي

ساجدة/ قاعدة برا… وطلعت

ادم/ مزلتي خايفة مني مش واثقة فيا

جوري/ انت اللي كسرت ثقتي فيك

ادم/ مش ح نلؤمك معك حق نعترف اغلطت يومها وماكنتش بوعيي ولليوم نادم عاللي بذل مني ياريت اتسامحيني

جوري/ تنهدت… الله ايسامحك…

قرب خطوة شبحتله بتفنيصة

جوري/ خخخليك مكانك

ادم/ تراجع… ااا ااسف

جوري/ هيا قول اللي عندك خليني نمشي

ادم/ خلاص قلت اللي عندي

جوري/ اوكي…

ومشت تبي تطلع

ادم/ جوووري

جوري/ التفتت… نعم

ادم/ دار حركة القلب… اااااانحبك ????…

و جوري ???????? قلبها وقف قعدت تشبحله لحظات وبعدين طلعت…

روحوا لحوشهم وغالية حكت لبلال وسامي ان ادم يبي يخطب جوري و قالتلهم ايشاوروا عمهم

بالاول بلال ماكنش مقتنع هلبا ادم يتزوج جوري بس غالية قالتله ماتبيش اتزعل اختها وووووو

اما سامي قال لو جوري موافقة هو ماعنداش مانع

اما عند يامن بيش ينسى اللي وقع فيه قعد يشرب كاس واراء كاس لين خلاص معش يقدر يوقف كمل الليل كله مع الشلة وماروحش الحوش ????

…………… ????????????????????????????????

الصبح

ح سليمان/ روح من الجامع وقعمز يفطر… يامن مزال ماوعيي

صفية/ اااا ااه لااا ماازل

ح سليمان/ ليش ما وعيتيه وقت على شغله

صفية/ بلعت ارياقها… ماااهو مااروحش من اامباارح ????

ح سليمان/ بضيق… لا حول ولاقوة الابالله

والله خايف ناخذ حشمت البنت و يقعد ذنبها في رقبتي

صفية/ ربي يهديه…

ح سليمان/ اعطيني تلفوني نتصل بالحاج محمود…

صبت جابتله التلفون

اتصل بخالي وصاه وبعدين اتصل بيامن

وكان تلفون يامن تحت منه راقد عليه

يامن/ شده من تحته ورد …الووووو

ح سليمان/ صحة النوووم ????

يامن/ انتبه وين راقد تقعد… اايوة يااحاج صباح الخير

ح سليمان/ وين الخير وانا عابي عليك

يامن/ تؤتؤتؤ خيرك من ع الصبح

ح سليمان/ تنهد … نوض امشي للمصنع الحاج محمود ما عرف وين يجري

يامن/ بتكسل… بااهي ياحاج نص ساعه انبدل حوايجي في الحوش ونمشيله

صكر منه وصبي خش غسل وجه وطلع امروح للحوش قبل مايوصل درس ع كافي خذا قهوة بيش ايصحصح و مشى

وقت خش يامن كان الحاج و صفية في اجنان الحوش عاد جو مشمس وربيعي

يامن/ جاء لعندهم… صباح الخير

صفية/ صباح النور تعال انباركلك…وقربت منه اتبوس فيه… ان شاءالله تبقى بنت حلال تسعدك و تهنيك

يامن/ بتذمر… ان شاءالله

ح سليمان/ نشهد بالله البنت خسارة فيك

بس الله غالب جت من نصيبك

يامن/???? بارك الله فيك ياحاج… ومشى زعلان

صفية/ بزعلة… اسمع ياحاج اللي ايزعلهم ايزعلني حتى ني مانرضاش اتهينهم ونقعد ساكتة ايوه

ح سليمان/ بغضب… توا عاجبك يسهر برا مايروح الا ثاني يوم!

صفية/ الراجل مايعيبه شي

ح سليمان/ يامراة اللي ايدير فيه حرااام بدل ماتنصحيه قاعدة اتساندي فيه ع الغلط

صفية/ في كل صلاة ندعيله ربي يهديه بس ما نجرحه ونكسر بخاطره

.

.

في المزرعة

كنت في مكتبي انتكلم بالتلفون بخصوص الشغل ويامن كان واقف بيفتح الباب ويخش بعدين تراجع ومشى شاف العمال وتلاقى مع خالي وحكيوا ع الشغل وقعد تقريبا ربع ساعة و بعدين مشى المصنع

قالي خالي ان يامن كان هنا واستغربت ما شبحتش قعد على هذا الحال ايام ايجي المزرعة ع السريع ويتجنب ايشوفني

تسريع في الاحداث

وافقت جوري على ادم ومشيوا تموا فاها

وتحدد موعد عرسنا في نفس اليوم بعد شهر ونص لان جوري عندها امتحانات

و اما حنين عرسها بعد اسبوعين اخر يوم مشت فيه للعيادة بتاخذ اجازة ????

شبحها سامي اتودع في زميلاتها وخذت شنطتها من الرسبشن ومشت بتطلع من العيادة لحقها قبل الباب

سامي/ انسة حنين

حنين / صباح الخير دكتور

سامي / صباح النور لاباس خيرك امروحه

حنين / رمشت عيونها بتوتر… خذذيت ااجازة

سامي/ بستغراب… ان شاءالله خير؟

حنين/ وجهها احمر وبغصة… عرررسي بعد اسبوعين

سامي/????بلع ارياقه… اااها الف مبروك

حنين/ بوجع… الله ايبارك فيك عن اذنك بوي برا

سامي/ بكسرة… تفضلي????????????…

طلعت للسيارة دمعتها ع خدها والقلب معصور ????????

فعلا الحب مؤلم و شي يوجع هلبا ودائما ماتكون نهايته فراق ????????

اما سامي برغم عارف انها مخطوبة بس صدمة زواجها شوشت الرؤية عنده وزعل هلبا لدرجة ماقدرش يقعد في العيادة ويكمل شغله اعتذر و روح طلع مش عارف وين يمشي ضاقت بيه الدنيا ????

فاتوا ايام

وفي اسبوع العرس قعدت نمشي كل يوم لحنين بعد العصر ونروح متاخر والصبح نمشي للمزرعة وهكذا لين قبل يوم الحنه

وعاد ضروري اليومين هذول انبات عندها ومانخليهاش لحظة بروحها

في الاسبوعين اللي فاتوا رجع الحاج سليمان للمصنع و يامن مرة ايجي لعنده ومرة ايجي يقعد شوية في المزرعة و الاغلب ايتهرب ويفتح مكتبه يقعد فيه

حنين/????… وينك

انا/ مزلت في الشغل والله

حنين/ بزعلة… لا ماتفقناش هك هيا خوذي اجازة وتعالي تواااا

انا/ باهي والله جيت ناخذ اجازة ونروح بس لقيت شغل هلبا والحاج مشغول في المصنع…قاطعتها

حنين/ مادخلنيش نعطيك ساعة نلقاك قدامي ايوووه????

انا/ اوووف منك حاااضر توا نتصل بالحاج هيا صكري…

صكرت منها واتصلت بالحاج

ح سليمان/ ايووة ياوردة

انا/ كيف حالك توا ياعمي

ح سليمان/ بخير الحمدلله شن جو عندك

انا/ كل شي تمام

ح سليمان/ و يامن جاء للمزرعة اليوم؟

انا/ تنهدت… لااا ماجاش واني نبي اجازة يومين ضروري ياعمي

ح سليمان/ ليش ماتصلتي عليه ايجي يقعد مكانك

انا/ برتباك… ممماااعنديش رقمه

ح سليمان/بعتب… كيف ماعندكش رقم خطيبك مايكلمش فيك هو!؟

انا/ باحراج… لاااا

ح سليمان/ بنفخ… توا نبعثهولك كلميه ابروحك واي حاجة تخصك ولا تخص المزرعة حلوها بيناتكم

انا/???? حاااضر …

صكر مني وشوية بعثلي رقمه سجلته وقعدت نشبح للتلفون نتصل ولا انفوت لين رنت عليا حنين اخرى عطيتها مشغول واتصلت عليه

يامن/ الووو

انا/ بربكة… صبااح الخيرر

يامن/ بستغراب… صباح النور! من معاي؟

انا/ ووردة

يامن/ ضحك… اااها قلت الصوت مش غريب خير في حاجه

انا/ ياريت لو فاضي اتجي للمزرعة نبيك في موضوع

يامن/ اوكي…

بعد نص ساعة ????

يامن/ كالعادة خش ع طول????‍♀️… سلاااام

انا/ كنت سارحة… هيييي رررعشتني ااامتى تستاذن قبل ماتخش ????

يامن/ بتذمر… اانتي اللي على سبلة وين كنتي سارحة…

وجاء قعمز حط رجل على رجل

انا/ ما علينا المهم اني نبي نغيب يومين ثلاث ع المزرعة وانت اتجي تقعد مكاني

يامن/ وشن المناسبة ان شاءالله ????

انا/ عرس صاحبتي وبنقعد معها

يامن/ بستهزاء… حلووة هذه نقعد نشتغل وانتي اتهيجي مع صاحبتك

انا/ ياامن بليييز اعقل خلينا نحكوا بجد

يامن/ عقد حاجبه… مش الحاج حطك المديرة خلاص شديها بروحك مالياش علاقة…

صبيت خذيت تلفوني حطيته في شنطة…

انا/ كلام هذا قوله للحاج اني ماشية سلااااام…

جيت فايتة وقف شدني

يامن/ من سمحلك تمشي اصلا للعرس

انا/ مانبيش من يسمحلي اني حرة نفسي

يامن/ ضحك بهزوة… لااا ياحلوة كان زمان توا انتي خطيبتي و اللي انقوله هو اللي يمشي ????

انا/ هههههه ضحكتني

يامن/ فنص عيونه بغضب… تبي اتجربي اتعاندي ????….

الحق خفت ????وفي نفس الوقت عجبني يفرض عليا شخصيته ك خطيب ومنبيش نكسر كلمته

فكرت بسرعة كيف نقلب موده وذبلت عيوني وهو يشبحلي بتفنيصة

انا/ بحنية… لا بدون عناد لو ايزعلك مش ضروري نمشي…

يامن/ ارخي شوية… غريبة توقعتك اتعاندي و تصكري راسك…

ارمشت عيوني بحركة سريعة وعضيت شفتي

انا/ واخذ عليا فكرة غلط…

وخليت عيوني في عيونه ومذبلتهم

وعاد يامن سرح في شفايفي و نفسه عالي قرب مني وحط يده ع خدي يمسح عليه بلطف وعيونه ذبلوا

يامن/ بصوت حنون… فعلا متغيرة هلبا…

قربت وجهي ليه لفوق عاد اطول مني

انا/ بالعكس ماتغيرتش انت اللي مش فاهمني واني مستحيل اندير حاجة مش راضي عليها خطيبي علاش واخذا راجل لو بنمشي اللي براسي… ????????

وعاد عمكم يامن ذااااب في كلامي ولطافتي ولا ايراديا يمسح ع خدي بابتسامة و عيونه يلمعوا رضى و حب

يامن/ قرص خدي … بالكي تزعل صاحبتك

انا/ بدلع وصوت حنون … عادي خليها تزعل المهم انت ماتزعلش

يامن/ ابتسم بفرحة… مش حلوة اتزعليها خلاص امشي غيري جوك انا توا اندير بالي من المزرعة

انا/ بتصنع… عادي راهو مش مهم نمشي

يامن/ لالا ضروري تمشي هيا نرفعك لعندها

انا/ ربي يحفظك ليا

يامن/ قلبه دق… هيا بسرعة قبل ما يكثر عليا الشغل

انا/ ابتسمت… اوكي…

طلعت معه يرفعني لحنين بدون مشاكل وعلى قلبه زي العسل ????

????????و انتصرت في الجولة ثانية ????????

????????????????

……………????????????????????????????????????

.يوم الحنة

لبست حنين البودري وحطت الحنة و اجتمعنا نحن صحباتها وبنات العيلة درنالها جو حلو ????????????

واني ماروحتش بتت عندها والصبح مشيت معها المزين

خذيت معاي فستاني و لبست في المزين

وطلعت حنين اية من الجمال و في القاعة سرقت الانظار

فات وقت وساعة ال11 خش العريس ياخذ فاها

نحكوا ع العريس اسمه سراج ولد عمتها 31 سنة متوسط الطول شخصيته عادية شخص معروف في العيلة انطواي و علاقته مع حنين جدا عادية ايكلم فاها رسميات يعني مافيش حب

ودعتها بالاحضان و طلعت مع عريسها واني اتصلت بعزيز ايجي ايروح بيا الحوش

عند العرسان

سراج/ ساعدها تخش… نورتي حوشك

حنين/ امنور باهله… وقعدت تشبح للشقة

سراج/ خشي خوذي راحتك الغرفة على يدك اليمين

حنين/ برعشة… اوووكي..

شدت الفيلو من وسط وخشت للغرفة وقفت ع المرايا ونحت الطرحة ولما جت تنحي الفيلو ماعرفتش تفتحه

قعمزت ع حافة السرير بخوف وارتباك استنت ايخش سراج بعد تاخر طلعت تشبح فيه لقاته ع tv جت لعنده اتجر فيه

حنين/ سراج ممكن تساعدني ماعرفتش نفتح الفيلو

سراج/ شبحلها بدون اهمية… تعالي قربي ليا…

جت لعنده اعطاته بضهرها ونزلت شوية بيش يوصلها وفتحلها رباط الفيلو و شداته قبل ماينزل

حنين/ رجعت وقفت… شكرا

سراج/ عيونه ع tv… العفو…

رجعت للغرفة نحت الفيلو وخذت كريم لوشن دهنت بيه ولبست روب الدخلة وعطرت و قفت ع مرايا خففت مكياجها وزادت بس الروج

بعد كملت معش عرفت تطلع عليه ولا تستناه ايخش وبعد تفكير قعمزت ع السرير واستناته ايخش

فات وقت لين نعست و سراج مزال في الصالة يتفرج والتلفزيون صوته عالي

نزلت من ع السرير وطلعت لعنده

حنين/ وقفت جنب الكنبة… ماتبيش اتبدل حوايجك

سراج/ بملل… انكمل الفيلم

حنين/ باحراج… على شنووو الفيلم… وقعمزت جنبه

سراج/ اكشن مش ح يعجبك…

استغربت حنين منه حتى بعد شبحها بالروب ماشبحلهاش بشغف و شهوة و كانه اللي معه شاب كيفه والمسكينة حبت تغير الجو

حنين/ نمشي انجيب حاجة نتسلوا عليه مع الفيلم…

وصبت مشيت للمطبخ

وسراج لا شبحلها ولا دورها كمل الفيلم وخش بدل حوايجه وخش السرير

طلعت حنين بسفرة مشكلة وشبحت لصالون مالقتاش والتلفزيون طافي

خشت عليه الدار

حنين/ درتلك عشاء

سراج/ شبحلها… لالا متعشي كولي انتي لو تبي…

ونزل راسه ع المخدة وتغطى بالورغان

و حنين طلعت رجعت السفرة للمطبخ و جت خشت جنبه ع السرير قعدت مرتبكة و كل شوية تقول توا يتحرك ولا ايغازلها لين صدمها

سراج/ بيش اطفي الضي تصبحي على خير…

ولف ع جهة الثانية ورقد ????

حنين/????

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية الوقوع في الحب)

اترك رد