رواية قلاع الضر الفصل الثاني والعشرون 22 بقلم زينب ماجد

رواية قلاع الضر الفصل الثاني والعشرون 22 بقلم زينب ماجد

رواية قلاع الضر البارت الثاني والعشرون

رواية قلاع الضر الجزء الثاني والعشرون

رواية قلاع الضر الحلقة الثانية والعشرون

(عطا والاحلام )
انه اهتز العمر بيه
ولگيت عيونك مرايات مكسورة
كاظم اسماعيل الكاطع
– انت تعرف اش عتحجي ؟ هذا بيتي تعبني انت شنهو التعبتو ؟ سنين انا ويا الجحش والم بهالفلوس .. سنيييين اتحملت البرد والجوع والعطش والحر والجتل خاطر يصير عدي فلوس اشتري بيت واعيش مثل الناس
امنت بيت وكلت ما اكعد وحدي والناس تاكل وجهي واخوي حال الضيم حاله يشتغل والاجر جتل وطك وتنام ودمعتك بعينك كلت اجيبه اسنده عضيدي اخوي واخلي يشتغل واسويله بيت وازوجه واشوف جهال ونصير حالنا حال الوادم عايلة وكاعديييين ابيت ونفتك من عيشة الخراب والتشرد والتدمغ والجتل
هاي جزاتي يثاير تبيع البيت وتاخذ فلوسي ؟
علييييييش شنهو الكصريته وياك .. شنهو الما عملته الك كلي هااااااي جزاتي
– انا هم رايد مصلحتج هاي الفلوس راح تكبر واطيج منها
– تطيني منها شنهوووو الفلوس فلووووسي والبيت بيتي ثاير ما تبييييع
– بعد وخلصت عاجبج عاجبج ما عاجبك لخي راسج بالحايط انا زلمة واعرف امري
– يول زلمتيش جبتلك فرش ؟جبتلك حاجة للبيت ؟ كديت علي ؟اطيتني ؟ شعملت وانت الزلمة؟ انا كله العملتهن وانت اعلى الجهاز خذيت .. لا حاجيتني لا كتلي خوية شرايج لا شاورتني
هسه جذب عليه وشاورني وكلي ترضين لو لا .. تبيع البيت بلايا علمي شنهييييي
– عليش احاجيج ادريج ما ترضين وراح تصفين اسطوانتج هاي علي بيتي وتعبني وخريط بخريط بعت البيت من الاخر وفكينا
– يحجي مترهي يربي وانا النار ماجلتني احر ما بكلبي ابرد ما عده … شلون بيه احط جيلة ابطنك وانعل البطن النكلتك وشالتنا ابطن وحدة .. وي امداني يوم الفكرت اجيبك واعينك يثاىر
لو عايفتك مدكة لعمامك اخير واحسن
حجتها وهمت علية تريد تجتله
سطرها وطيحها اندارت عليه واتلازموا مجاتل اثنيم
هي تعض وهو يصكع براسها ويملشها وصياحهم لذاك الصوب واصل
جا جدوع يركض هو وولده فاككوهم
وهو استغل وجود جدوع ويكللها : افلوسي كيفي اذبهم بالشط لشتري بيت ابيع كيفي هن فلوس وانا الاتصرف مو زين لميتج من الشارع ساقطة جنتي تنامين ويا المطي لو ما انا جايج
– فد هدوني عليه خل اعلمه ياهي الساقطة اللفاها من الشارع هدوووووووووني
كاموا يجرون بيها منه ويجروه منه
والنار تاكل بكلبها اذا كالت فلوسي هسه يكلولها منيلج وانت كل عمرج تشتغلين ويا جدوع باجرة اكل وشرب منين جبتي فلوس بيت واشتريتي وبنيتي وتفتح عليها باب لا تنسد ولا تنحجي
جرت عباتها وطرت البستان
صاح عليها جدوع : وين رايحة اكربي هين ضلي عدنا الليلة
ما ردت عليه هدت الديرة ومشت لال عكاب ..
راحت لبيت جدتها يازي .. دكت الباب طلع الها خالها مجبل ؛ ها شنهي ؟
– جديتي وينها ؟
– جوا
عافته ع الباب وفاتت للبيت تبجي طلعت الها جدتها تركض وهي تصيح : شكو ها يولي شجالج ..
حضنتها تبجي وتصيح ( جدة )
– احجي ولج شنهو ؟
– جدة ثاىر باكنييييييي
– باكج شنهو الباكج .. شباك منج
– باع البيت وخلاني بالشارع جدة كلها فلوسي والله كلها فلوسييييي
تحجي وتنحب بصوت عالي
– شو تعاي ليجاي اكعدي مسعد جيب لبت اختك ماي .. خل اعرف سالفتج شنهي
كعدت وهي تنوح مسعد جابلها الماي شربت وحطت الكلاص عنها ، حجت يازي : حسي وجهج واحجيلي بهداي شجاريلج خاطر افهم
مسحت وجهه واندارتلها تحجيلها وتكللها انا ما اجذب انتم اهلي انا جنت اطلع ويا جدوع وما يطيني فلوس تعبني وهو ذابني ويا الحيوان كمت اخمط من مخبايتو واجمع وفلس على فلس اجمع وادفن صار اسنين ويوم الردت اشتري خفت جدوع يكلي منيلج كلت اخوي احزام ظهري ضال مغمة لعمامي يجتلونه ويجنون عليه وهو لا حول ولا كوة احط راسي اعلى راسي واعين الحال تالي باكني وحطني اعلى الحديدة .. حت الحجش والعربانة بايعهن
يازي : الجحش من فلوس الداينتهن الج ماله حك يبيع
– وهو ابيش اله حك بس غير الحظ والبختتتت الحظ والبخت اي وانا حظ ما عدي
اندارت لمجبل وكالتله : تروح تجره من اذانه وتكله العربانة والجحش مالت امي تردهن هسه واذا ما رضى تكضبوه انت ومسعد وتجيبوه لي لا اربي من جدة واجديد ابن راشد اعليمن يطلع بعد الخلف ما مات .. وهالعافلة وحيد عار اعلى افادنا امش .. وفلوس البيت كلو اتجيبهن غصبا ما على راسك لو جبتهن العب بحالك لعب
راح مسعد ومجبل .. دوروه ما لكوه
ثاني يوم الفجر كعدت راحت للعربانة مامش وهي معتازة تجيب غراض مشت ويا سيارة حمل اجرة للسوك غاد وصلت اشترت التريده وردت للبيت فرزنت غراضها ونامتلها ساعة
اجا صاحب البيت واحد من الديرة يكللها : يمتى تفرغون البيت نحن نريد نكعد بيه هاذ الاسبوع
لمت غراضها وراحت وهي ادموعها تجري لبيت جدتها
حتى نا فتحت بسطيتها .. ومشى مجبل هو وصحبانة حملوا البيت شفتات شفتات ع العربانة ليما كضوا .
من ليلتها طاحت مريضة من قهرها على بيت هالراح
يدورون ثاىر ما يلكونه .. راحو على اللي ثاىر باعله الجحش والعربانة خذوهن منه وكالوله العربانة والجحش ماهن اله وفلوسهن ما موفيهن دور ثاىر واخذ فلوسك منه
صارت اطلابه جيب ودي
كالوله احنا مالنا غرض الحيوان مالنا والعربانة مالتنا اذا ثاىر نصب عليكم احنا ياهو مالتنا نروح ندفع عنه ذولاك عمامه وروحوا تطابخوا وياهم واخذوا حككم .
جابولها بس المطي والعربانة
كابلته وكامت تبجي .. كالتلها يازي : لا تبجين جدة البجى يهد الحيل ما ينفع ولا يعوض الراح .. العوض بكومتج وتوكيلج اعلى ربج وتردين تشتغلين وتجدين وتعينين نفسج
– وارد اردود ؟
– هاي الدنيا يجدة كل يوم بحال لا يضل غني اعلى حاله ولا فقير .. نعيش بهالدنيا يوم تصعدنا لسابع سما ويوم تدفنا تحت الكاع ما يدوم بس وجه ربج يجدة
كومي حسي دمعج واكفي اعلى حيلج .. الدموع جان ردتلي ضناي ما جنيت منها بس الامراض .. كومي جدة .
كامت ويا جدتها تفرزن غراضها .. وحايرة منين تبدي وشلون تشتغل .. والف فكرة وراي براسها مشوش ما تعرف شلون تخطي ومنين تبدي
ثاني يوم خذت العربانة وراحت على صاحب كاع اشترت منه المحصول بسعر رخيص ومشت تبعيهم بالسوك بسعر اعلى وفتحت البسطية لوحيدها .. ليما وذن راحت خذت التعتازة للنسوان وردت لبيت جدتها
جاي تتغدا .. اجاها مجبل
يكللها : وسام اليوم سايكة العربانة وحدج
– اي عجل ياهو اليجي وياي
– خالد كايم يحجي شايفج جاي وحدج يكول شنهي رايدة شهيرتنا تروح وتجي بالعربانة وحدها مالها محرم
– وخالد ياهو ويحاسبني فردة مالت نعال احسن
– خالد جبيرنا وسام
– جبيرك الك انا مالي جبير بس الله
– بس انت كاعدة عدنا والتعملينا يصير علينا
– عايرتني بكعدتي عدكم لا خلفة الله اعلى كعدتكم .. اكوم انام بالشارع بالعربانة ولا منتكم .
– انت شحاسبة نفسج دخيل الله تراج كبرتي منتي زغيرة اعكلي
– والله اعكلكم واخير منكم بعد عجل شرايد اكعد هين واتحمل حجيك وحجي المصكوع ذاك خويلد
يازي : ها ها شكو شجاريلكم
– يمه اكللها ما يصير تروحين بالعربانة وحدج تكوم تصيح وما يعجبها وخالد ما يرضى
يازي : انا وياج يبتي بس حجيهم صحيح .. اذا ما نحنا فالناس ما تهدج انت زغيرة وشابة ما يصير تسوكين الحيوان وحدج للسوك
– وياهو العدي يروح وياي اكعد واسكت واكل وحل والله الناس تحجي
– شتسوين يجدة نحن بديرة عرب لو غاد ابغداد يم جابر والله ما يحجي بس هين يجدة ما تصح .. اطي العربانة لاحد يكري بيها وانت ضلي على بسطيتج هاي يومية بسطي بيهن والقاسمة الله
– وشلون اجيب غراض لا ما انا اروح بالعربانة
– خلي مسواكج كل ثلث تيام كل اسبوع احسنلج من روحة السوك يومية وتعبها
– لا شغل السوك بيه خبزة شغل البسطيات هيج اتلهي ما بيه خبزة اطلع بس كوت يومك
– عجل شتسوين جدة انت مرة موش زلمة
– هسه ذكرتوا انا مرة مو زلمة عجل من كضيت عمي انام ويا الحيوان محد درى عني جعت وبجيت واتمرضت وتهت وطحت وادميت وصار ما صار بيه ياهو المنكم يدري خاطر هسه تكلولي انت مرة انا مو مرة انا بالف زلمة
– دامج بالف زلمة امشي واخذي حكج من اخوج يولي باك فلوسج وخلاج هاذ حالج بس تتبجبجين لو انت زلمة ما فزعوا ازلام وراح وراحوا فشكوه وجابوا حكج .. لا يجدة مرة وتضلين مرة ولو شتعملين ويجرالج اتضلين بعيون الوادم مرة .
-والله بالف زلمة واعيدها وارد اكولها بس يا حيف زماني الما بيه زلمة كلها تكول عن ارواحها ازلام بس بالفعل نثايا ما بيهم احد كضب شارب وصار اخو خيته.
اندارت بس ضاكت الدنيا بعينها شتعمل ووين تروح مالت تضل هين وخالد وخوالها يكعدولها ع الطالعة والنازلة وهي العاشت حياتها مفردة بلا حسيب ولا رقيب .
للعصر طلعت بسطت بغراضها
اجوها عمامها كالولها : ثاىر وينه
كالتلهم : كضاه البين كون شمدريني عنه
– هسه تكولين شمدريني عجل من لفيتي وخذيتي من عدنا خاطر يشتغل عدج ما كتي شمدريني
– اكلك عمي روحي واصلة لهين رحمة لوالديك توكل
– ما اروح كبل لا اعرف ثاير ها المصيوب الجلوة وين طافر وهاد اثامه اعلينا شنهي احنا نسدد وراه .. انت اخته وانت السددي وراه
– فلس احمر ما اطي يكفي باع البيت وباك فلوسي وشرد
– حيل وابو زايد عساه الحال .. حوبتنا مثل ما شلت جدتج وهدت حيلها تهدج بت الشوارع
حجاها ودفر الغراض برجله
ما ردت عليه لمت غراضها بس روحها طالعة ، بودها تبجي بس حتى البجى مالها خلكة .. اندارت تصفن دحجت بالدرب : شيصير لو يمر واغشعه ؟ اهييي انا بيا حال بطرانة صفيت بالشارع وانا افكر بهالقاسم هاذ
مر جدوع من الدرب سلم عليها : ها الله يساعدج يولي
– هلا بيك عمي
– شنهي وين ما وين
– والله وين هالتشوف حالي بالزورة يملزكتها تلزك اتلزك
وتعمل باديها
– شكو
– والله يا عمي شكلك التمت علي من كل صوب
– وين انت هسه
– عد جدتي وخوالي حقنة كلش هاذ لا تعملي وهاذ ما يصير واريد اطلع منم بس وين اولي
– شنهي وين تولين شلج بيها هاي مثل ما عشتي هالسنين عدي ردي واعلى الشغل القديم بالعربانة انت وواحد من ولدنا
– ووين اكعد ؟
– عدنا خرابة بكفا البيت اعدللها سكف وننبنيها وعيشي بيها
– كولتك تصير
– تدبر بنيتي انا من هاكدج خذيتج هاليوم اذبج صدك
– يطيك العافية الله يديمك خيمة فوك راسي
كامت لمت غراضها ومشت لبيت جدتها كالتلها ، يازي ردتها : يولي تهدين بيت جدتج وتعيشين بخرابة
-والله يا جدة ارضى اعيش بخراب ولا وحيد ما يسوى البرجلي يشمر علي وين ماشية ووين جاية خليني بطرك روحي اعيش ولا حكرة خوالي .
ثاني يوم ما طلعت شغل
راحت لبيت جدوع وتعاونت عي وولده وعكدوا السكف جينكوا ونايلون ولبخوا الحيطان .. وهي نظفته وكنسته وغسلته لثاني يوم .. جابت غراضها مال البيت ذاك الفرش والمخاد الزينة مالتها والجولة والدبات والصحون والبقجة مال هدومها ورتبت الغرفة ونامت بيها : ويلي يروحي طوير حر ما ترتع لا ما اتنام بعشها ما بكفص احد صالبها .
وردت من جدة وجديد تشتغل بالعرابنة الصبح ويا ابن جدوع
والظهر ترد تنام وتطلع الظهر تبسط ببسطيتها
بس جدوع من شافها تشتغل ورزقها خير
كام يطلب ايجار ع الغرفة الكاعدة بيها .. كامت تطي اليطلع بيدها كل شهر ميكول المهم تطي وما تعيش بمنته .
بالسوك وهي تبيع صفت وحدة يمها ندافة .. تندف وتنثر شغلها لليشتري ولان هي مرة كامت تسولف وياها ويحجن ويشكن ووحدة تحجي ضيمها وضيم كلبها علما يكضي الوكت ويردن لبيوتهن
.. كالتلها وسام : انا عدي بسطية ابيع بيها غريضات هيج على كدي عليش ما تخليني اخذ الفرش والخدات والجوودليات مالاتج اعرضهن الينباعن الي نسبة بيهن والما نباعن رادتهن الج اخير ما ضالات نايمات على كلبج غاد النسوان تخوط بالديرة بس كليلات اليجن للسوك زلمهن ما ترضى .
كالتلها : الله وايدج بلكت الله وانرزق على وجهج
اخذتهن وسام وكامت تضرب سعرهن في اثنين وتعرضهن والنسوان بالديرة ياخذن .. تاخذ تلث ارباع السعر الها وترد للمرة فلوسها بالسعر اللي تبيع بيه بالسوك
جانت بيها خبزة
كامت تجمع وتلم وتعني بروحها وتلبس الاحمر والاصفر بلكت الله قاسم يدحج عليها بس قاسم ولا شايفها حتى لو يمر ما تندار عينه ولا ينتبه لوجودها وهي عينها تلاحكة .
وهي بانية امالها واحلامها فرد يوم بدحج بيها
ويحبها وياهذها وتصير عدها عايلة وجهال وبيت دافي بيه
بس هو ولا شايفها .
شافت جثير نسوان ما تطلع زلمهن ما ترضى تطلع
فكرت : انا عليش ما اخذ غريضاتي يوم الجمعة بالعربانة والفتر ع البيوت وادك البيبان باب ياهي التريد تشتري ومنهي توصيني اجيبلها من السوك .. هم ازيد برزكتي وهم امش اعلى بيت قاسم اعرف اهله اتكرب منم
صدك اتفكت ويا ابن جدوع ياخذون الغراض ويفترون بالديرة التشتري منها قماش اللي توصيها لحاف على بطاطين على كلايد محابس واحجار كريمة حتى ذهب كامن يوصن النسوان وهي تجيب وترفع بسعر وتربح والفلس بديها يصير عشر افلوس .
كم مرة مشت لبيت قاسم خواته ونسوان اخوته وبناتهم كلهن يشترن منها ويوصنها وهي ترفح من يوصنها تركض ثاني يوم تجيبه وتجيهن .. بلكت تشوفه
بس ما مرة شافته ..
كامت تسعل عنه بحجة صارت صويحبتهن وتسالهن عن الدار واهلها ووكاللها : بس قاسم عدنا ما معرس
كالتلها : عجل عليش لهساه ما معرس ؟
– ما لاكي بت الحلال لهساه وكلشي قسمة ونصيب
– كلت بكلبي طحل اي والله طحل بكلوبكم ما لاكي بت الحلال شنهي عجل الكدامكم بعبع ؟
ضلت وراه وراه … تروح وتجي وتسعل عنه .. وهو ولا شايلها من كاعها ..
لحد ما فرد يوم اجتهم وجايبتلهن غراض .. حجت اخته : ابشرج يولي
تحجي وهي تعدل بغراضها وتعرض بيهن :- اي بشريني يولي خير
– قاسم
من جابت طاري قاسم فز كلبها وكعدت عدل ووهدت من ايدها : شبيه قاسم
– خطبنالو مرا .. المشية هاي الجمعة
– يا مرة عليش خطب
– يا شني عليش خطب غير يعرس
– يعني كصدي منهي هاي يعرفها تعرفون اهلها عليش رايد يعرس
– لا والله ما يعرفها من طرف امي خطبنا له تا يستقر وويفكنا يولي ملينا من سخرته
– ها اي ..
الحجي غص ابلعومها واختنكت من العبرة وتستحي تبين بيها خلة خاف ينتبهن حجت : انا لاون اروح تاخرت حيل عدكم العافية
– وين يولي توج اجيتي خل ندحج شعدج بعد من غراض شجايبة
– لا خليها بعدين امرلج غير وكت
خذت غراضها بسرعة وطلعت من البيت حطتهن ع العربانة وكالتله : مجيد ردنا للبيت
– بعدنا ما مخلصين
– ردنا اكلك مالي حيل احمل بعد راح اكع
– خيرج
– كل خير ما بيه عسننها امي لا جابتني ولا شفت هالدنيا هاي
– شبيج يولي صاير شي
– اكول امشي وهدني بحالي
صعدت بالعربانة عكس السير وهو ساك بالحيوان وهي كاعدة ليورا ومدندلة رجليها ودموعها تجري وهي اتدحج بيت قاسم .
وصلت غاد للبيت منتهية من البجي
ذبت روحها بفراشها بجت بجت على حالها لحد ما خوت
اجت وحدة من نسوان ولد جدوع تسعل عنها خاف بيها شي كالتلها : ما بيه بس هيج سمعت جلمة خشنت كلبي وانكهرت
وعيت على هالدنيا لا ام لا اب بس ادين الناس اتدمغ فوك روسنا سابكت حلي واشتغلت شغل مو للبعمري وعشت ايام بس الله يدري بمرارتها عليش ما مكتوبلي افرح عليش ما مكتوبلي الهنا .. عليش تكضيت عمري اركض ورا عيشتي وما محصلة شي وين راح اصفى وشنهو حالي .. ياهو اليحس ويكول هالبني ادمة تعبت
هالبني ادمة من دم ولحم تحس وتتضايك والها شعور
مالي حك بعايلة ولا الي حك اعيش مثل باكي النسوان اكعد ابيت ومسواكي يجيني احد بابي معززة مكرمة لا افتر بالبيوت ولا اكعد بالدروب .. شنهو العملته بهالدنيا واعيش هلعيشة هاي
ضلت تحجي وتشكي وتبجي
تمرضت من بعده ثلث تيام وما طلعت من البيت
مرت ابن جدوع رايحة ناقله حجيها لجدوع وكايلتله : المرة طاكة حرصلتها تريدلها رجل
كللها حكها وحك كل وحدة مثل حالها تريد رجل ،انا منا وغادي اشوفلها رجل ابن اوادم يخطبها
بهالاثناء … خالد تمرض يردون يطيحون على علته شنهي ما يعرفون .. حتى جابر خذاه يمه ابغداد راد يعالجه ونفس حاله .. ورد للبيت يعالج الموت .
وسام لا سعلت عن قاسم بعد ولا جابت اسمه خافت احد يكللها عرس .. سكتت .
بيوم من الايام جانت ليلة باردة وعاصفة
اندكت الباب على غرفة وسام وهي مكفكفة يم التنكة وشاعلة الجمر بوسطها وتدفى اعليها ، صاحت : ياهووو
ماكو رد ، كامت من حيلها وصاحت :شنهي انخفت حسك ياهو
صاح انا ، ما فرزنت الصوت
فكت الباب الا وثاىر جدامها عكدت حاجبها : ثاىر ؟ شعدك
– بس خل اطب
حطت روحها عن الباب منعته : وين اتطب ما عدي مجان يكلك هلا عكب العملته بيه وبفلوسي
-ادري مالي عين وياج بس الدنيا باردة ومالي مجان اروحله خل بس تهدى العاصفة وامش
فتحتله الباب بسرعة فات كعد بفراشها وادنى للتنكة
اتخصرتله : اي وشرايد مني ذاكرني بهالليلة الباردة
– مالي مجان اروحله غيرج
– وعساك تنام بالشارع انا ياهو مالتي
– ادري العملته غلط وفلوسج جانت بس وروح امي
– اكلك هد السوالف هاي مالت وروح امي وروح ابوي من الاخير انت جاي لهين شعدك
-انا جان ابالي استثمر الفلوس واشتغل بيهن واكبرهن وبدل البيت نشتري بستان
– اي ووين صفى بستان الامان مالك
– راحت الفلوس
– كرت عينك ووين راحت
– اطيتهن لواحد يشتثمر بيهن لا بين ولا طلع عصفور وانكطع خيطه
– وهسه شرايد ؟
-رايد اسندج ونرد مثل كبل واحد يعاون الاخر ونعيل انفسنا
– لا عيل نفسك انا عايلة نفسي ومكفية وخيري زايد .. والك بس هالليلة يصبح الصبح تفارج وما اشوف ركعة وجهك هين
عافته وجرت الفراش من تحته وراحت نامت من الصفحة الثانية .. للصبح كعدت لكته مطلع لحفان من نضتدها وجودليات وفارشهن ونايم .
تنهدت غمته وطلعت
كضت شغلها وردت الظهر هم نايم كعدته تتكاون وياه
كام يزمخ ويصيح وما يرضى يكعد .. تكاونت وياه تريده يطلع وما يطلع .
لليل ردت وهم كاعد مكضيها تتن وكاعد بالغرفة ويحميله جاي ع الجمرية ويشرب
: انت شني لزكة ما اريدك
– يطبج طوب وين اروح ما عدي مكان
– وانا ياهو ماتي ما عدك مكان كوم اطلع منا
– اكلج زهكان وروحي طالعة امشي عني لا تخليني ابتلي بيج
تكاونت وياهو كوم واكتلها زورك جسمها ..
رادت اطرده ما كدرتله
المن تشكيه والمن تحاجي
جدوع اذا سمع بالمشاكل يطلعها هي وياه ووين تلكالها بيت بعد
راحت لعمامها تكاونوا وياها وطردوها .. وهو جنه نفسه لا يطلع لا يتحرك لا يمشي يخاف يبرد خاتل بهالغرفة وهي مكضية ليلها ونهارها خوارة وشغل .
ليما اجا جدوع كاللها : وسام رايدج
– كول عمي
– عدي شغيلة وياج
– شنهي الشغيلة هاي
– تعاي اليوم عشاج يمنا ونحجي
صدك اندارت يمهم واتعشت وفتح وياها السالفة : كول عمي
– عمي انت كبرتي وانت كبرت وما ادري باجر يصبح علي الصبح عدل ميت
– عمرك طويل عمي
: الله يحفظج انت حسبة بناتي واخاف اهدج وحدج يا عمي وتاكلج الذياب هاي اذا ما كلاج اخوج
– وشبيدي يا عمي هاذ الالله كتبه علي
– لا لا انت مرة والمرة مالها بيت رجلها
– وينه يعمي هو انا صاح وكايلة لاله
– لا لا بيج الخير والبركة مرة مستورة وومعدلة وتسوين ديرة بكاملها والله
– يطيك العافية عمي ..
– انا عدي زلمة ابن صاحبي اسمه عطا وحجيت وياه هةعن حالج وهو رايد لابنه مرة معدلة تلمه وتعدله وكال شوفلي بنيتكم اذا رضت خاطر نجي ونخطب
– يخطب منهو انا ؟
– وشبيج عمي انت جنج ورد
– يا ورد دخيل بختك عمي لا انشاف ولا يدحج بوجهي
– لا تكولين عن روحج هيج كليلات النسوان المثلج التدبر من الماكو اكو وتلم روحها زلم مشوربة وعليها العتب ما تعمل التعملينه والله واكلها يا بنيتي اطلعين اطبين براس زلمة احسن ما يندهولج الدلالة والراي والراد يزت داهريب حجي
– وانا ياهو مالتي بالعالمي عمي مرة اروح بدربي وارد بدربي
– ميخالف عمي تاخذيلج رجل تخلفين منه اتسندين كبرتج الشغل يجتل يا عمي يهد الحسل ولو نهد حيلج اعليمن تميلين وكل الحياطين مايلة وانا ما دايملج اخذيلج رجل خلفي منه وكبري خلفتج وانت معدلة اخير ما ضاله هاذ وضعج .
ردت وحجي عمها ابالها .. ما تعرف شتعرف شتعمل
-حجي عمي جدوع صحيح انا وبهاذ عمري ومهدود حيلي شلون لو كبرت اتمرضت ياكلني الدود ومحد يدري عني
وانا مو مثل ذني اليومية احد داك بابها ورايدها اول واحد يخطبني هاذ وعمت عينه ما شايفني لو شايفني هم هج .. اخذ حجي عمي وارافك ولا اصل بقيد ثاىر يجتلني وعايش بجالي ونايم بفادي وما اكدر افج ثمي كلها تلاومني
ثاني يوم ردتله خبر : عمي وصاية الله ووصايتك انت التشوفه بعد
ردلهم خبر وكاللهم المرة وموافكة
اجوا وودوا مشية عليها .. ثاىر عارض وما رضى يكله لجدوع : انت ما تدخل انت زلمة غريب وسام لاهي بتك ولا هي كرابتك
وسواله كوانه يوم المشية وعود انا اخوها وما ارضى
كامت تتكاون وياه وسام ويكللها : عنبلتي يولي جتلتلي روحج ع الرجل والله اكسر ركبتج بس تحجين زواج ماكو وغصبا ما عنج تكعدين
كاموا ولد جدوع شالوه وذبوه برا بيتهم
تكاون وياهم ويريد اخته .. كالوله الكاع كاعنا واختك عايشة بكاعنا بس ادوس كاعنا الا نخلي الدم للرجاب
كام يتوعد لوسام والا يجتلها الا يطكها .. الا يموتها
تجاهلته ومشوا عليها وخطبوها وتواعدوا اسبوع ويكضون العرس لان غريب وعدهم بعاداتهم الغريب ما يطول بمشيته بس ابن العم يحكله يخطب ووعود العرس يمتى ما تمكن .
وجانت المتفك تروح تعيش وياهم بالبيت
بس هي ما رضت تكعد وبيت اهله جثيرين عيال وجهال وهي منعودة شغل ودلالة وماكو عيال يرضون بهيج حال فطلبت من جدوع انو يعيشون بنفس الغرفة بس هو اليطي اجرة الغرفة عنها
حجه وياهم وهم كيفوا لان اعدادهم جثيرة
واسبوع ونص تم العرس .. كل هالحجي وهي ما شايفته ولا تعرفه .. كل التعرفه عن العريس اسمه ( عطا )
اتخيلته ذاك الطول والهندام الراح بنسيها قاسم ويشيله من باله
وتخايلته بذيج المعاني الرزنة والزينة
ليما جا يوم العرس وصفكة وهلهولة
وبقجة مشتريلها كم كطعة قماش وكحل ومرايا ومن هالامور
خذنها المسوان وزفنها للغرفة والزلم زفرا عطا
مدنجة هي ومستحية واول مرة يدخل عليها زلمة
ومرتعبة وترجف وما تعرف شتعمل .. عافنها النسوان وطلعن النسوان وهدنها .. رفعت عينها ادحج بيه
ولنه من ذاك الطويل حيل ووجهه بالطول وخشمه بالطول وابتسامته حيل عريضة وهو مستحي .. هي شافته ودنج : هاي تالي الاحلام يحظي زلمة بالطول

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية قلاع الضر)