اسكريبت جنان رسمي الجزء الثاني 2 بقلم سارة أسامه نيل

_ ألف مبروك يا عريس، عيني عليك بارده يا ميزو اتنين مره واحده، هتطلع الترند يا صاحبي العريس الذي تزوج الصديقاتان كي لا يفترقا…

_ معتز بضيق طفيف: مش نقصاك يا محمود، اصبر عليا بس واتفرج انت على إللي هيحصل..

_ محمود بضحك: الله يعينك يا صاحبي.. دا النحاسين مش وراهم غير سيرتك وكلهم بيتفرجوا..

_ معتز:  من حقهم، سيبهم يتمتعوا ويتسلوا  … هروح أنا بقى أشوف العروستين..

_ محمود: لا لا مش قادر أمسك نفسي من الضحك ..

وسابه ومشى وهو مش مبطل ضحك ..

_ معتز بغيظ: ماشي ماشي كله بسببك يا ست مريم … والله لأربيكي من أول وجديد ..

_ ألف مبروك يا مريم هانم … ألف مبروك يا هديل..

_ مريم: الله يبارك فيك يا معتز مبارك علينا .. متعرفش فرحانه قد أيه..

وقربت علشان تحضنه لكن سبقتها هديل إللي رمت نفسها في حضن معتز 

_ هديل: مبروك يا معتز، وحابه أشكرك انك مفرقتناش انا ومريم عن بعض .. 

وكملت كلامها بلؤم: أنا حاولت كتير أقولها أن مينفعش كدا بس هي كانت مصممه وزعلت مني جامد.. مش عايزاك تفهمني غلط..

_ معتز ضحك اول ما شاف معالم الأستنكار الطفيفه إللي ظهرت على وجه مريم، وقال: لا يا دودو ولا يهمك… أنا إللي مبسوط علشان ربنا رزقني بزوجه مُضحيه ووفيه لصاحبتها زيك..

بص لمريم وقال: ولا أيه يا مريوم… هنكون كلنا أسره سعيده مع بعض  …

 وكمل كلامه..

_ يلا تعالي يا هديل عايز اتعرف عليكي واقعد معاكي شويه قبل ما أوديكم مركز التجميل..

هديل بفرحه وخبث وهي مش مصدقه ان معتز إللي بيقولها الكلام ده: بس يا معتز أنا محجزتش فستان ومش عارفه أعمل أيه..

معتز بخبث: ودي حاجه تفوتني أنا حجزتلك أجمل فستان على زوقي … وكمان فرشتلك أحلى وأكبر اوضه في شقتنا إللي هتبقى بتاعتك انتي ومريم …

_ بص لمريم وقال: يلا يا مريم اجهزي على ما اكلم هديل شويه وأباركلها ونمشي علشان أوديكم مركز التجميل..

وسابها ومشى وهي فضلت واقفه تبصله بزهول جواها احساس بيقولها مكانش لازم يحصل كدا 

هي ليه محستش بفرحه بالرغم من إللي هي عايزاه حصل ونفذهولها 

هو ليه مهتم بهديل ومش مهتم بيها ..

النهارده يوم فرحها ومش هتتزف لأي حد دا معتز حبيبها 

أقنعت نفسها أن دا كله تفكير أوڤر وإنها عملت الصح علشان كدا هتفضل مع هديل طول العمر..

من بعيد كانت الحاجه بدريه مراقبة الموقف وصعبان عليها بنتها وعارفه إن إللي جاي مش هيبقى سهل…

_ بقولك يا بت يا مريم أعملك محشي ولا مكرونه بالبشاميل … ولا أيه رأيك أعملك الأتنين ..

_ مريم: مش عايزاكي تتعبي نفسك أنتي وخالتي يا ماما أي حاجه .. الحال هيمشي ..

_ بدريه: لا يا قلب أمك لازم أعملك كل إللي بتحبيه .. دا عشاكي … بس بصي بقى البت الحيزبونه دي متدوقش أي حاجه من عشاكي.. أمها تعملها عشا … مع إن عارفه انهم معندهمش دم ومش هيهون عليهم ..

وبدأت بدريه بالنواح: يا خيبتك يا بدريه يا خيبتك في خلفتك … البت خدت جوز بنتك واتجوزت على عفشها وعلى تعبك وشقاكي .. وكمان هتطفح من عشا بنتك..

أقول أيه بس يارب … ربنا يهديكي يا مريم يا بنتي معرفتش أحميكي يا بنتي ..

 مريم قعدت تسمع امها بصمت وحاسه بشعور الندم بيتسلل ليها وبدأت تقتنع بالكلام إلى حدٍ ما ..

بس إمتى… بعد فوات الأوان..

_ مريم: أنا هقوم أجهز يا ماما علشان معتز مستنيني..

وسابتها ومشت قبل ما تندم أكتر من كدا ..

*********************

بعد مده …

معتز خد مريم وهديل علشان يوديهم مركز التجميل وطول الطريق بيتجاهل مريم عن عمد ومندمج مع هديل بس ومش مبطل ضحك معاها وناسوها وكأنها دخيل ونكره بينهم ..

شعور سيء بدأ يتمكن منها وافتكرت بابها الله يرحمه وحنانه عليها وحست أنها مفتقداه..

بصت للشباك وغصب عنها عنيها دمعت وصعبت عليها نفسها .. بس هي زعلانه ليه دي هديل صحبتها وعشرة عملها وممكن تفديها بروحها ..

معتز خد باله وكان مركز معاها طول الوقت.. لازم تفوق واحده واحده .. ولازم تتوجع علشان تتعلم وتبطل هبلها 

عارف أن الدوا مر ومريم بنت رقيقه وأي حاجه بتأثر فيها بس لازم دا يحصل 

= وصلوا لمركز التجميل ..

وأخيرا هديل سابت إيد معتز ودخلت تجري على مركز التجميل بلهفه لأن طول عمرها بتحب الحاجات دي ..

مريم وقفت قدام معتز قبل ما تدخل .. وكان هو ماشي من غير ما يعطيها أدنى إهتمام لكن هي مسكته من أيده وبصتله بعتاب ..

_ مريم: ليه كدا يا معتز… ليه بتتجاهلني .. هو أنا عملت أيه لكل ده ..

_ معتز بسخريه: بجد يا مريم انتي مش عارفه .. إنتي مش واخده بالك من إللي احنا فيه ..

كانت هنتكلم لكن هو قاطعها: تعرفي يا مريم انك ثبتيلي النهارده انك عمرك ما حبتيني.. وكمان قدمتي صاحبتك عليا … وكسرتي كلمتي ونفذتي إللي في دماغك.. دا كله ومش عارفه عملتي أيه ..!!!

_ مريم بوجع: عمري ما حبيتك!! … إنت أكتر واحد عارف أنا بحبك قد أيه يا معتز ..

_ معتز بسخريه: بتحبيني… طب وإللي بيحب حد بيقبل إن يشاركوه مع حد تاني .. طب فين الغيره ..

_ دي هديل يا معتز ..

_ برده .. رجعنا تاني … سلام يا مريم ..

يتبع…..