رواية مذكرات حبيبة 2 الفصل التاسع 9 بقلم عادل عبدالله

رواية مذكرات حبيبة 2 الفصل التاسع 9 بقلم عادل عبدالله

رواية مذكرات حبيبة 2 البارت التاسع

رواية مذكرات حبيبة 2 الجزء التاسع

رواية مذكرات حبيبة 2 الحلقة التاسعة

وبعد حوالي شهرين كنت غيرت حاجات كتير في الشقة اتجوزنا انا و هارون .
بصراحة هارون كان مختلف نهائي عن جمال جوزي الاول وعن شريف جوزي التاني في كل حاجة .
هارون كان مش همجي وظالم زي جمال .
ولا كان في رومانسية شريف الله يرحمه !!
لكن كان عنده حنان وعطف واهتمام ممكن يكفي العالم كله .
ده غير انه كان كريم وسخي جدا عليا وعلي بنتي حبيبة .
مفيش حاجة اشوفها وتعجبني الا لما يشتريها ، وكأنه مصباح علاء الدين اللي بيحقق الاحلام والامنيات .
وكمان كزوج مش حسيت بفارق السن بينا خصوصا في البداية .
وجود هارون معايا في المطعم خصوصا مع خبرته في المجال كان له مفعول كبير ، وازداد نجاح المطعم وزادت ارباحه بشكل كبير .
هارون كان دايما يقولي انه نفسه يخلف مني ولد او بنت لأنه بيحبني .
لكن الحقيقة انا خوفت اخلف منه لأني كنت خايفة أنه يموت بعد كام سنة ويبقي معايا اطفال صغيرين اواجه بيهم الحياة لوحدي !! و علشان كده كنت باخد حبوب منع الحمل بدون علمه !!
معرفش اللي انا كنت بعمله ده صح ولا غلط لكن خوفي من المستقبل هو اللي خلاني اعمل كده .
عدا علي جوازنا حوالي سنة كنت عايشة فيهم في سعادة كبيرة رغم ان صحته بدأت تتأثر لكن حبه وحنانه كان مكفيني وعمري ما حسسته بأني محتاجه حاجه هو مقصر فيها .
لكني اكتشفت انه بياخد حبوب منشطة ظننا منه انه بكده هيسعدني أكتر !!
اول لما عرفت كنت عايزة اقوله ان الحبوب دي مش لها اي لزوم لكني خوفت اشعره بالاحراج قدامي !!
فسألته : هي الحبوب اللي بتاخدها دي بتاعت ايه يا هارون ؟؟
هو طبعا ارتبك شويه وابتسم وقالي : دي حبوب بتنظم ضغط الدم عندي .
مثلت قدامه اني مصدقاه ومش اتكلمت في الموضوع ده تاني .
لكن في يوم كنا نايمين بالليل وفجأة لقيت هارون عرق جدا ومش قادر يتنفس ولما سألته مالك قالي اطلبي الاسعاف بسرعة !!!
وقبل ما يوصل المستشفي كان هارون مات !!!
عرفت في المستشفي انه اخد نوع من المنشطات قوي و قلبه مش اتحمله .
حزنت جدا علي هارون اللي بموته فقدت حنيه وسند وضهر لأنه فعلا حسسني انه كان جوزي وابويا واخويا وملا كل حياتي .
وبعد اسبوع بدأت المشاكل !!!
اولاد هارون رجعوا واتهموني اني السبب في موت ابوهم !!!
ده غير انهم اتهموني بتزوير عقد المطعم والشقة !!
وفي الاخر اضطريت اني اتنازل عن باقي ميراثي منه نظير ان اولاده يتنازلوا عن القضايا اللي ضدي !!
وبعد ما اخدوا ميراثهم سافروا واختفوا من حياتي .
في الوقت ده كانت خبرتي في ادارة المطعم زادت واصبح المطعم من اشهر المطاعم واللي بقي زيارته شئ اساسي لكل السياح في المدينة .
فلوسي زادت وحسيت بالنجاح ولما كنت اقعد وافتكر ايام زمان كنت بحمد ربنا واقول ان اللي بيحصل ده اكيد تعويض من ربنا علي اللي حصل معايا في جوازي الاول والسنين اللي عيشتها في ظلم وقهر .
وبدأت افكر ازود واكبر نجاحي وفكرت ان مش كفاية المطعم لازم اكبر حجم النشاط.
كان حلمي ان يكون عندي فندق سياحي .
طلبت دراسة جدوي للمشروع لكن اكتشفت ان كل الفلوس اللي معايا مش هتكفي ومحتاجة فلوس تانية .
ناس كتير لما عرفوا فكرة الفندق عرضوا عليا انهم يدخلوا كشركاء بنسب صغيرة لأن الجميع كان عارف أني رزقي كبير .
لكن انا رفضت وقررت أني أصبر لحد ما اكمل المبلغ اللي ممكن أبدأ به حلمي .
عدت سنتين تانيين واصبحت الفلوس المطلوبة جاهزة .
حاولت اشتري فندق من الفنادق الموجودة فعلا ، لكن اضطريت في النهاية أني اشتري ارض وابني فندق من البداية ، واتفقت مع مكتب استشارات هندسية اللي اتفق بدوره مع شركة مقاولات علي بناء الفندق .
كل ده حصل وانا في قمة السعادة .
وبدأت شركة المقاولات في حفر الارض لرمي الاساسات .
قولت كل يوم انتهز فرصة يكون شغل المطعم هادي شوية واروح اتابع شغل الشركة في الارض .
وبعد كام يوم من بدء العمل في المشروع صحيت الصبح وفطرت و اخدت عربيتي وروحت الموقع وقعدت اتابع العمل في الارض وانا بشرب القهوة .
واثناء متابعتي للعمل والعمال شوفت حاجة من صدمتي فنجان القهوة وقع من ايدي علي الارض .
مش قدرت اتمالك اعصابي وحسيت بالرعب وبدأت افتكر كل حاجة حصلت في حياتي من بداية جوازي الاول وحتي النهاردة !!
قومت ومشيت بسرعة و كنت متوترة جدا لدرجة أني فجأة مش قدرت اكمل سواقة !! وركنت العربية علي النيل ونزلت وقفت علي النيل وانا مش قادرة استوعب الصدمة ، انا شوفت جمال جوزي الاول !!!!!!!!!
جمال انا شوفته سايق عربية من اللي بتنقل التراب الخارج من الحفر .
ايه اللي جاب جمال هنا كل المسافة دي ؟!!
وهو رجع امتي من السفر ؟!
ياتري اولادي عاملين اي دلوقتي من غيري ؟؟
يا تري لو جمال عرفني دلوقتي هيعمل فيا ايه ؟
اكيد هيقتلني .
لا لا مستحيل يعمل كده دلوقتي ، انا دلوقتي اقوي منه بكتير ويخاف يتعرض لي او يأذيني اكيد .
كنت حيرانة بين اني عايزة اطمن علي اولادي وفي نفس الوقت اعرف جمال قد ايه انا بقيت ناجحة من غيرة بعد الذل والهوان اللي شوفتهم علي ايده ، وبين خوفي ان جمال يعرف مكاني وطريقي ويفكر ينتقم مني ويأذيني !!
لكن انتصر في النهاية شغفي اني اطمن علي اولادي .
رجعت بعربيتي لموقع الفندق ولبست نضارة شمس ، وكانوا لسه شغالين وجمال راكب العربية ، اترددت ثواني وبعدها ناديت عليه : يا اسطي تعالي انزل بعد اذنك عايزاك .
وقف جمال العربية ونزل وقرب مني : ايوه يا هانم تحت أمرك .
: انت اسمك جمال ، صح ؟
: ايوه يا هانم .
: انت عارفني ؟
: لا والله انا اسف مش واخد بالي .
: طيب دقق النظر فيا شوية يمكن تعرفني .
: معلش يا هانم النضارة واخدة وشك ومش عارفك .
: طيب هقلع النضارة يمكن تعرفني .
قلعت النضارة وهو بص لي ودقق النظر فيا ووسعت عينيه علي اخرها و ابتسم وقالي : انت شبه حد اعرفه اوي لكن لأ اكيد طبعا مش حضرتك .
: قصدك اني شبه حبيبة مراتك ؟؟
: ايه ده ؟؟؟ انتي ….!!! لا لا لا !!! مستحيل !!! لا مش ممكن ، لكن انتي شبهها اوي !!!
: انا حبيبة يا جمال .
جمال وقف ساكت وبيبص لي ومش مصدق نفسه ولا مصدق عينيه ومش قادر يتكلم ولا قادر يتحرك !!!
: انت هتفضل واقف ومتنح كده كتير ؟!
: انتي !! ازاي ؟؟!! انا مش فاهم !!! انتي حبيبة ازاي ؟؟ انتي بتعملي ايه هنا ؟؟ ولبسه كده ليه ؟! انا مش فاهم حاجة !!
: لما انت حلفت عليا يمين طلاق اني اقعد مع اهلك ومش امشي ، مشيت علشان اوقع يمينك وبعدها ب ٣ شهور قطعت ورق الجواز العرفي واتجوزت وبعد كده حصلت حاجات كتير في حياتي وصلتني للي انا فيه ده .
: انتي صاحبة المشروع ده ؟؟
: ايوه ، كتير عليا ؟
: لأ مش مسألة كتير ، لكن ازاي ؟!
: ده موضوع كبير اوي مش مهم تعرفه ، المهم طمني ولادي عمر وعمار عاملين ايه دلوقتي ؟؟ اكيد كبروا ، وأمك عاملة ايه ؟؟ واخوك الناقص وشهد

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية مذكرات حبيبة 2)