Uncategorized
رواية كحل عرب الحلقة التاسعة والخمسون 59 للكاتبة زينب ماجد
رواية كحل عرب الحلقة التاسعة والخمسون 59 للكاتبة زينب ماجد
 |
| رواية كحل عرب الحلقة التاسعة والخمسون 59 للكاتبة زينب ماجد |
رواية كحل عرب الحلقة التاسعة والخمسون 59 للكاتبة زينب ماجد
( اتفاق حيدره )
شكثر ليلك چـواني و روحي عطـابه
اعلـ جرحك
(عريان السيد خلف)
سرحان : نايم و باب حجرتي اندكت بكوة ، فزيت اعلى حيلي و صحت : ياااااهو
وانا اتناوش الدشداشة و البسنها
صاح عمي : اصحى يسرحان بسااااع
– شنهي عميييي
فكيت الباب … شصايييييير ؟
– الامن كضو كريم
– لاااااااااا
حجيتها و تعديته بلا وعي و انا هايم للباب ، لكيت خنجر و سالم بالباب : شنهو الصار
– طلع وراح اعلى الحزبي وويكولون داجة ثلث سجاجين و كاضينه الأمن.
– دخيلك يبن ابي طالب … و هساه وين خذوه ؟
خنجر : ما نعرف .. هالحاير انا وعلي دخت دوخة ما دايخها بزماني اعلى هالولد هاذ
سرحان : و شعده طلع من البيت انا موش كتله اركد ليما ادبر طلعتك من العرااااق ، عليش طلع
– الذنب ذنبي يبو مأمون .. انا الكلتله اعلى النذل الأجا يساومك.
سرحان : امشينا لمقر الامن ننشد عنه ، لوف السيارة
ابو فاضل : وين وجهك يسرحان بوية ، انت متبري من عده جدامهم و يو رحت ليهم و نشدت عنه تتورط بمصيبته
– جا اهدن اخوووووي بين اديهم يعمي .
– يو ردت تحافظ اعلى مضيفك و ناسك تصبر يسرحان .
درت عنه و انا عيوني مجمرة و اهيس بركان بفادي وجر .. كمت اصيحن ااااااااخ ولكم يخوتي اااااااخ .
طلعت ملوك من بيتها الثاني و اجت ليجاي صاحت : ابني وينه يسرحااااان ، كلي ابني ابخير سرحان ، وليدي يمممممه.
ولحكنها راديون و النساوين و صياحهن على بنصاص الليالي و انا كاض بكلبي و افرك بيه .. درت لعمي و انا اكلله : النسوان فوتهم داخل عمي .
حجيتها و طلعت للمضيف .. اجا الأمن و بلغاني كريم صار بدينه .. ما اطيته جواب ولا كدرت انطك جلمة و غيضي فاض بفادي و اهيس بروحي راح انفجر .
ملوك ما صبرت اعلى هالحال .. و راحت و ذبت روحها اعلى اعتاب المقر و تصيح : وليدي ادخيلكم و ادخيل الله ابني .
تابعينها ولد عمي و عمي و كاضين بيها ، و الحزبي كايل الهم : بويه انا موش ضدكم .. لجن يو تروحون وما تردون مرت الاخرى عنه يكون افضل .. من كون ورطة الولد جبيرة و ما تنحل و يو دشيتو بيها تتوهدنون و اطيحيون وياه .. خلكم بعيدين عنه .
اعلى هالحجي عمي جار بملوك ورادها بالبيت .. وانا الكعدة ما اكدر ليها .. من اكعد اهيس نار حدري تجويني و اكومن .. محتامة ارويحتي و لايبة و ما ادري شنهو البيدي و اعملنه و اجرن اخيي من هالطلابة .
للظهر اندكت الباب .. و اجا واحد رفيق .
طلعت انا .. السلام عليكم
وعليكم السلام
كريم مطر ضاحي اخوك موووو ؟
– اي بويه اخوي ، شنهو الراي .
طلع من جيبه جيلة و كال : كلب مسعور ما يسوى فلوس الطلقة … حك الطلقة
ومد الجيله ليه و اطانياها .. تنهدت برجفة مالت قهر
فرت الدنيا بيه و اهيس الدم بعد ما يصعد لراسي و عيوني غوشن .. ضاجت الوسيعة بيه بذيج الساعة .
حجه : حك الطلقة ياااا شيخ .. هههههههه
مديت ايدي اعلى جيبي طلعيت فلوس و اطيته حكها ، و كلت اله : ان جان ميت وجتلتوه انا ما رايد غير جثته ادفننها واكرام الميت دفنه .
– لازم رايد تندفن وياه ؟.. الجلب ماله كبر و اخوك اتعدى اعلى الحزب و الجلب اكرم منه .
حجاها و اندار صعد بسيارته ، صكيت ايدي اعلى الجيلة و هملن دموعي .. و عمي واكف حذاي ارتفع ابچاه .
دشيت و اهلنا كلهم مناطرين ورا الباب و يكولون : شنهي خبرونه .. شكالولكم ميت يو عدل
دشيت و فكيت ايدي ليهم و راويتهم الجيلة و كلت الهم : كريم بذمة الله .
صرخت ملوك و صاحن النسوان و اتلاطمن ..
و انا دنكت و كمت انحب بعلو حسي .. وزلم العشيرة التمت اعلى الباب .
سندوني ولد عمي و دشينا للديوان و النسوان عمي دخلاهن جوا .. و انا كعدت .. اعاين للدنيا لا ظلي بيها اخ ولا اب واهل .
تكرب عمي : الناس تجبل يسرحان شنهي الراي ، و الحزب منع نسوي اعليه فاتحه .
– خلنا نكوم للمضيف .. و نستقبلهم غاد و كلل نسوان لطمهن جوا ولا يطلع حسهن .
– ان شاءالله .
توني جاي اكومن .. دشت كواغد و هدية و البنات وياها ، رفعت اديها كواغد و صاحت : ولج ام زنااااااااااد دييييييه .. مت عيني عليج يمه .
صدينا عنهن خاطر يمرن براحتهم .
ودشت كواغد و تلكتها ملوك : راحو مني ولدي .. يمه تصخم راسي يممممه يمه ولدييييييي
رفعت اديها كواغد و لطمت و النسوان لاجنها :
اهل كلبي و عليه يهونون .. اهل كلبي عليه ما يهونون
ردناهم تچيه و للوكت عون ..اهل كلبي …..
صرخت ملوك و كابلتها و ادك اعلى راسها و تصرخ .. وكواغد تكمل : وينك يالشيييييخ مطر وينك .. ولدك ضاعو اخلاف عيييييينك .. يا مطر يا بووووووويه
كامت تصرخ راديون و تصيح : اي والله ضعنا خلاااااااافك بووووووووويه .
كواغد : هدونا ونامووووو بالهمية.. هدونا نامووو بالهيمة.
و النسوان تلطم اعلى دكاتها ليما خلصت كعدت جدامهن وحطت شيلتها اعلى وجها ونعت : اااااااااخ يمااااه يمه
يمه ما لايك اعليك .. الموت ييمه ما لايك اعليك
وخل احاجيك وخل احجيك تريض ييمه وخ احاجيك
اااااااه اااااه لچم كلبه .. اللچم كلبي بيك يا يمه .
وظلن ينعن و يبجن و الزلم صاكه الباب عليهن خوفا يطلع حسهن ليبرا و يبتلون بالامن ..
طلع سرحان للمضيف و ظل جاعد بيه و الناس تجبل و هو يتعذر منهم .. وكال الهم : مامش عزا ، اليودنا يصليله الوحشة و هاي هيه .
وهو اعلى باب مضيفه اجا سالم
:- ابو مأمووووون
– ها يسالم
– ام زناد طاحت و تخربطت الحك
تراكضنا للبيت ، حطيناها بالسيارة و صعدت وياها كواغد و راديون و الدرب كله ينوحن و يبجن و ملوك فاكده .
وصلنا للمستشفى دخليناها .. تلاكفوها من ادينا .. وحطولها مغذي و داروها و راديون تنعى و انا و عمي وخنجر و حميد .
صفنت … حجيت
: اذا جانو عدي اثنين يتامة و جهال زناد بركبتي ، انضافت ليهم بت كريم و طاحت يتيمه اعلى افادي .. بالله كلولي انا وين اطي وجهي بكل هاليتامة و النساوين .
ابو فاضل : الله كريم .. هاذ الله كاتبه علينا .
كواغد : اكلك يمه جا شني مامش فاتحة هيج يظل
– لا فاتحة ولا كبر ولا كلشي ماكو يم ستار .
– مت عينهم كون اعلى ظلايمهم .. جا وين يروحون من الله ، ناخية علي بن ابي طالب اليشل حالهم و يوهدنهم اعلى ظليمتهم هاي .
ابو فاضل : اعلى هونج يم ستار الحيطان الها اذان لا يروح احد يسمعج و مالنا حيل بعد وعلي .
– الله كريم يبو فاضل .. تهون ما تظل متلايمه و يفرجها ربك ..
سرحان : ام ستار خافن نتعبج ويانا ، اخلي خنجر يوصلج
– لا ييمه جا ساعة الضيج اهدنكم شمالني ، ابوكم فضله علي ليجاي ما اجازي يو وكفت وياكم هالساعة .
– الله يطيج العافية .
اندار للمضمد و كاله : شنهي حالها ؟
– انهيار عصبي .. ما عليها شي ان شاءالله تخلص المغذي و ترتاح و تاخذونها.
– مشكور
اطيته فلوس و مشى عنه و ملوك نايمه اعلى سديه و مغطينها بعبايتها ، و راديون تنوح بهداي و كاعدة احذاها ، و عمي رد للمضيف غادي و انا وخنجر واكفين .
كضيت خنجر و طلعت بيه ليغادي : العمل بحالنا هيج يسلم يخنجر
– لا وعلي ما يسلم .
– الحط عينه اعلى عايلة اخينا ووهدن حاله يتوهدن حاله و ثاره يطلع يخنجر .
– امر و الركبة سدادة
– الجيلة الطوها الية .. تنحط بكصة الجان السبب .
ظل يعاين علي ، اندار منا ومنا .. حجيت : تكدر
– اكدر
طلعت الجيلة من جيبي .. و خليتها بجيبه و كلت اله : لا تكصر بثاره .
– اعتبره تم اعلى امرك .
– دايم يخوي .
طلع من عدي و انا رديت للردهة .. اعاين لملوك فاكة حلكها وفاكدة .. الثكل بان اعلى ملامحها .
ظليت موچد بوجهه و رد بالي يفرزن ذيج الأيام
دارت ليه كواغد
– ها يبو مأمون اشوفنك سبلت
– اعلى بلواي يم ستار
– نشمي و كدها و تشيلها عن اهلك .
– يم ستار انت عايشتينا و تورجتي اعلى بلونا و تعرفين شكثر كلبي حمل من هالمرة هاي .. سعت بديها ورجليها خاطر تخليني غريب و جردتني حتى من اسمي و سمتني غريب و بعدتني عن ابوي و عن اخوتي و غربتني عنهم .. وخلت اخوتي ما يشوفوني غير وحيد يتصيدلهم .. جنت اتمناهم يظلون حذاي و اشدن ظهري بيهم ، فركتهم عني ليما خلتني هاذ حالي .
– لا تكول هيج ييمه ، اضكر الله
– و النعم بالله لجن شكثر ما اكولن اسامحنها .. شيناتها بكلبي مورمات منها .. غربتني و بعدتني و تالي التغربوا ولدها وما ظلها احد غير الغربته .
كواغد : جا ما يطي الا الكريم
و يو ردت من الله يطيك .. اطي لعبده
ولا تكول هاذ ما يستحك .. كلنا جدام الله ما نستحك .. يطي و يمد لينا بافضاله و احنا يو صار وكت الصلاة يا ثكلنا و شيخلصها لينا .. نطكطها و نمش نهوى اعلى دنينانا هاطر نترس بطونا ..
بس الله يطي و يو شاف عبد يطي لعبيده يزيد اعليه
اعفي … يعفي عنك
ارحم … يشملك برحمته
اطي … يطيك و يزيد اعليك
اطي وكول لوجه الله ، كلشي بابنادم ضايع بس يم ربك ما يضعلك حك وتلكاه بدل المرة عشر .
لا تتحسف ييمه .. افتخر بروحك لا دنيت الخطية ولا لوثيت كلبك بغمام الردايا ، هل الله واكف حذاك من كونك ماشي عدل ويا خلكه .
– جلماتج يا ام ستار يطيبن الفاد .. يضكرني بناس .. الله يطيج اعلى وكفتج هاي ويانا ، المثلج يخاف ويصك بابه هافن تلوحه الاذية من الجار اعلينه ، لجنج اصيله .
– لا تكول هيج .. انا يو اطيكم ماي عيوني ما اجازيكم عبن افضال ابوك جانت مغوركتني ييمه ، جا انسى شكثر وكف وياي وكفات ما وكفهن الي اخوي المن امي و ابوي .
– الله يرحمه .
كملسنا من المستشفى جم ساعة ، خذينه ملوك وردينا بيها للبيت .. دخلناها جوا .. كابلنها وكعدن داخل و انا برا اكعدت اعلى السكملي .. دنجيت راسي و اسمع لنعاويهن .
هنيال المرة تكدر تصرخ و تعبر و اطلع البفادها و تنعى ، انا جلمة اخ يو طلعت مني تشك افادي اعلى قهري وكسرتي بأخوتي .
مدنج و حاط ايدي اعلى وجهي واستمع ليهن ..
سمعت بچي جريب مني ، رفعت راسي ولنها هدوة تعاين ليه و تبجي .
– ها يهدوة
– الله يشيل عنك
– ادموعج ياذني بويه حسيهن.
– شلون احسنهن و انا اشوفن النار موجرة بيك .
هزيت راسي و تنهدت : الله كريم .. شلونج انت بتج شلونها .
– على الله .
مديت ايدي خاطر تطيني البنية ..
كربت اطتني ياها .. وبعدت .. حبيتها و كلت الها : شسمها ضكريني ؟
– امنية
تبسمت بقهر و انه احبنها .. وكفت جمارة بصف هدوة و هي تكول : بس لا احنا نندهلها نوسة
شلت راسي : عليش ؟
هدية : فلش راسج .. جا دشي انت
جمارة : لا ادفعين
هدية : من كون اسمها شواي يوكف بالحلك اعلى السهولة كمنا نندهلها نوسة .
– حلو .
كرب مامون ووكف بصف ابوه .. و هو يعاين البنية جراه اله وكعداه اعلى رجله و حباه ، حجيت : لا تكدر كلبك يسرحان .. انا دوم اشوفنك كوي بصبرك ، و ان جانها كسرة اخوتك جايدة شد حيلك لخاطر هاليتامه .
– تواسيني يهدوة
– جا ما بيدي غير اوسيك .
ظل يعاين علي .. و كال :- يا بختي .
ظليت اتلفت منا و منا لا ادور يروح احد يسمعه و تصير المصيبة مصيبتين .. ما شفت غير بت عمه ليغاد عنه واكفه لجن اهيسنهن موجده ويانة .
دكيت اعلى ظهر جمارة و كلت الها : ياله كلي لامي نعسينا هل نمش للبيت .
– اوصلنكم
– لا جا انت بيا حال .
– اعلى اي حال ما عدي غير اكعد و اسكت .. خل اوصلنكم خاطر مناك و اطلع لخنجر
جمارة : خنجر وينه ؟
كرصتها حيل فزت .. هو انتبه و ظل يعاين .. دفعتها ليغاد و مشيت وهو طلع ، رديت كرصتها : بربوك جا وكتج تنشدين عن خنجر الدنيا بيا حال و انت همج خنجر .
– جا انت عليش واكفة تواسين بسرحان يو كدرتج بس علي تكرصين بيه .
– صمي بوزج لا الطج اعلى حلكج .. يلا ولي .
دفعتها وكفت وياي بت عم سرحان : انت هدية موش يو لاله
– شنهي دية ما تعرفيني ؟ ترا زماني جنت اشتغل هنا و اعرفنج و جنتي تجين و تكعدين وياي عبيش تنشدين .
– ما جنت اعرف البالي ، عدالي خدامة ابيت عمي و بس ، بس طلعتي موش هينه ، بخدمتج ذيج كوشتي اعلى ابن الشيوخ وورطيتي بيج .
– لمي روحج و احجي وياي عدل ، شعدي وياه
– كل وكفتج هاي وياه و تنشدين ، انا النشدنج .. شعدج وياه
– سرحان زلمة متفضل علي مامش مصيبة طاحت اعلى راسي الا و شال عني و الكاه حذاي بكل مصيبة اطيحن بيها .
– جا معروفة عليش ، بس المرة الاعلى ذمة زلمة و هي تتونس بوكفة اهواها الكديم حذاها شينكال عنها.
– الحجي هاذ ما ارضي .. واحجي عدل يو ردتي تفجين حلكج وياي .. وياريت تبعدين ولا ادخلين روحج بسوالف ما تخصج .
– عيالج يدرون واكفه حذاه و تواسينه ؟
يدرون اتحومين علي و ما جن زلمتج مفكود متونسه بغيابة و انت تتصيدين لشيخ ال ضاحي.
– عيالي مالهم غرض بيه ، و انا ما غلطانه ويا وحيد و سرحان ما عدي شي وياه .
– جا خوش خل نشوف يو دروا شيعملون .
– دية شمالج و شنهو التريدينه مني
وكفت امي : هااا شمالجن
ضحكت هي و تكللها :لا هيج جنت اتغشمر وياها ..
اندارت تمشي وردت تنوعتلي و كالت : يو صارتلي فرصة امرن بيج باجر
حجت امي : هلا بيج يمه ، ياله بناتي امشينا.
درت و انا الخوف كاضني من جلماتها .. طلعنا للشارع سرحان موجف برا بكتر سيارته ، صعدت امي يمه و احنا ورا .
كاد السيارة لي بيتنا و نزلنا و امي تتشكر منا .. وراح .
سرحان : ها خنجر بشر
– الزلمة بالمستشفى .. يطلع و يتنفذ الأمر
حيدرة هو الراح ينفذ .. خاطر انت بعيد عن السالفة و حتى يو حلفت عنك و عن ازلامك .. صادك بحلفك و ما تتورط بدم هالردي .
– حياك الله خويي .
– الله محييك بويه .
داوريت السيارة و رديت للبيت ..
الليل ما نمته من القهر و حس النسوان ينعن . ما بطل ونهن .. ما شفت النوم ولا ضكته وانا اتكلب بفراشي و اهيس بروحي متزوهرة .
زناد ما ادري عنه و كريم هاذ حاله ..
كلبي اعلى اخوتي يوجعني و ما جاي ارتاح بفكدهم .
لثاني يوم … العصر
اجا خنجر و انا ناطر منه الجلمة ، واكف و مدنج راسي وكف احذاي و كال : ابو مامون اشوفن ظهرك محني
– الاخو حزام ظهر يخنجر و اخوتي كسروا ظهري .
– افا عيب عليك وعلي ، تكولها و انا احذاك .. يمن كون التراب اطمن و الجلاب اطلعني و تاكلني يو هديتك يوم يسرحان
دك اعلى جتفه : وياك للمنية ووكت ما تامر الروح الك برخص الماي .
– كفو منك يخوي ، اشدن ظهري بيك يخنيجر .
– و ما اهدنك يخوي .
دكيت اعلى جتفه و مد ايده و حطها اعلى ايدي : شصار عن الكتلك عليه
– اعتبرها الليلة تم
-احذر ، الامن موش سهل ذول واوية وما يخفى عنهم شي .
– ان جانو واوية احنا ذياب چول .. لا تهم بالامر و اخيك موجود .
– خنجر رايد ثار اخوي اعلى ايدي
– انا اخافن عليك لا يشكون بيك ويتلايمون اعليك .
– ما اكدر اوكف هيج بلا كوة و اخوي انهدر دمه و انجتل .
– الله كريم .
ورى يومين …
اجا خنجر و بيده جيس ما اعرفه شنهو
– ها يخنجر
– اعذرني خويي انا جان الود ودي اخليك تاخذ بثارك من الردي الداس اخوك .. لجن ما رايد اوهدننك بيه و هو فرد جربوع اجرب .
– و شنهو الصار ؟
مد ايده و اطاني الجيس ..
: شنهو هاذ
– الزلمة التعدى اعلى اخوك و عايلته .. انجتل
لجن الربع ما ردو فارغين .. العيون النحطت اعلى عرضكم .. شلعوهن .. و هاي هن بالجيس .
تنهدت و مديت ايدي كضيت الجيس ، عايت ليه : اطلب التتمناه يخوي .
– بطل عرك والله يسلم راسك يخوي
تبسمت ليه وخذت الجيس و كلت اله : جثته وينه ؟ دفنتوها ؟ خافن لا يهيسكم احد و تتوهدنون .
– افا ندفنه هالجلب هاذ .. ذبينا لجلاب الجول .
– عليش هالفعل .. احنا موش مثلهم .. يكفي خذنا بثارنا .
-انا رايد اصيرن مثلهم .
– خلك بالمضيف و انا رايح للبيت .
مشيت للبيت دشيت و ملوك مكسورة .. ومدنجه ومحنية ظهر اعلى ولدها ، دشيت و كلت الهم : اطلعو غادي
شالت راسها تعاين ، كلهم طلعوا من الحجرة ، نصيت حسي و كلت الها : الحط عينه اعلى عايلة كريم و بلاه بهالبلية … انجتل و هاي عيونه .
فتحت الجيس مليان دم و المح مال العيون بوسطهن : هاذ ثار ابن ال ضاحي
ساعة الحجيت هيج دموعها هملن و حطت ايدها و هلهلت : كللللللللللللللللللللللوش .
دنجت و شلت الجيس منها دشوا وهم ينشدون .. انا عفتهم و طلعت عنها .. لين حتى عمي ما يدري بهالامر .
خليت العيون بالسيارة و طلعت بيها للنجف ..
توضيت ودشيت زرت الامام علي و من ضريحة طلعت بوجهي للمكبرة .. حطيت العيون جدام كبر ابوي
دنجيت و كعدت عد كبر ابوي و حطيت راسي اعلى كبره .. قريت الفاتحة .. تنهدت و انا اكلله : ما كدرت احمي ولدك بويه .. ما كدرت احوي ولدك ، شما حاولت احويهم ما طاوعوني .. حملك الحطيته اعلى جتافي هد امتوني .
يا شيخ بركبتي كومة نسوان و ايتام .. هديتني هد بوية .. هديتني بوكت كلش اعتاز عكلك و حكمتك بيها ….حجيت و اختنكت سكتت
رديت شلت راسي و عاينت اسمه اعلى الكبر : انوخذ ثار ابنك يبن ضاحي ، لجن ما كدرت اجيبنه و ادفننه احذاك بويه .
ظليت اعلى كبر اشكي واحجي وياه ..
ليما هيسيت الغروب نزل و القبو اظلم ، كمت من مچاني و طلعت .. ما رديت لاهلي و ظليت بايت بالامام علي.
جنت حيل معتاز اشتم عبير كبر الأمام خاطر تسكن روحي و تنام جروحي عده و ارتاح من ثكل الهموم الاعلى اجتافي.
…..
هدية : من بعد شهر من موتت كريم ابن الشيخ مطر … لا شفت سرحان ولا شافني .. اخر شوفه الي ساعة الوصلاني .. و انا اتحاذر اوصله ما اريدن اتوهدن و انا عزبة .
بس يظهر بت عم سرحان خالتني ابالها .. اجت للكاع الضحى .. سلمت اعلى امي و كالتلي : عدي جلمة وياج
تمشينا انا وياها و كلت الها : شرايدة مني ؟
– انا الرايدة انشدنج .. شرايدة من سرحان .. شنهي متأمله ياخذج ؟
– انا لا كاربه سرحان ولا واصلته ، و الجلمه هاي لا تعيدينها بعد
– خايبة دروبج هاي موش علي انا فخريه ، الدود يو مر احذاي اعرف رطنه .
– اكلج ديه الاسمج فخرية .. زلمه ما هاويج لازكه باكتاره عليش
– ورايدة اهدن ابن عمي الشيخ الج يبت حاكم
– انا مرة فاكدة رجلها .. لالي بعرس ولا الي غرض باحد ، بس سرحان ما يهواج ولا يهوى وحيدة عليش معلعله ارويحتج وياه و اهو موش داري عن هواج .
– تظنين راح اسمع جلمتج انا
– ما كايتلح اسمعي بس يو خذيتي ، لا تكليله عليش ما تهواني و عليش ما اداريني من كون .. سو كدرتي فما بيدج غير تاخذين جسم .. لا عكل ولا دليل .
– غصدج عكله و دليله وياج .
– انا نصحتج .. و انت اعلى كيفج ، ومؤت الاخرى يديه لا تكربين مني ولا تجيني
– اسمعي يبت حاكم يو كربيتي صوب سرحان اروحن لال ثجيل و اشهرنج و اخزيج جدامهم .. و تاليتها حتى بنيتج يحرمونج منها ، حطي حعكلج براسج يبت ثجيل و ابعدي عن شيخ ال ضاحي .
– انا مبعده ولا مكربه بس يو بيج زود ابعديني من كلبه .. ساعتها اخذي و اتهني و اترسي حضنه جهال .. خوش ديه .. اسلم عليج .
هديتها و مشيت و امي حاطه ايدها اعلى عينها و تربي ، كربيت منها ، حجت : شمالها هاي عربيد البساتين .
– تكلي لا تكربين صوب سرحان و اريدن اخذنه و يو كربيتي اشهرنج عد ال ثجيل و اكللهم واخليهم يحرمونج من بتج
– يااااع و تهددج
– انا بتج ييمه لا كاربه سرحان ولا واصله ليه ..
– خايبة يالغمة اجت لكاعج هددتج و سكتي ؟
– جا شسويلها يمه اشاعفنهن
– غمني البيت يو سكتت الها
هدت البيدها وراحت للبيت غسلت ولبست شيلتها مالت الطلعة وراحت للمضيف .
كاعد سرحان و ابو فاضل و رحيم .. و الزلم ملتمة و عدهم طلابة عشايرية .
وكفت بعيد عن المضيف و صاحت : وين ابو فااااااضل
فز الزلمه وكام ليها ، و سرحان سمع حس ام ستار و كام .. و طلعو : ها يم ستار
– انا مرة و زلمتي بالعسكرية و ما ادريه يرد سالم يو يستشهد غاد .. و عمري كضيته بخدمتكم ، شنهي الجرى و تجي بتكم تهدد بنيتي
سرحان : بنيتج ياهي و ياهو بتنا ؟ .. فهمينا يم ستار .
كواغد : بت الحجي قاسم .. تجي تهدد هديوة و تكللها بعدي عن سرحان .. عليش يمه شنهي كاربينكم واصلينكم و جاية تظلم بخت بتي و تشهر بيها جا يو صاحت عليها الصايحة و هي عزبة انا شحطن بيدي ..
سرحان : شنهي الحجي ، فخرية جلية ليكم ؟
قاسم : اكصن راسها يو كاربتكم ، حكج اعلى راسي يم ستار
– سالم روسكم يالشيوخ لجن انا ما ارضى بت تجي و تهدد بنيتي فوك ظليمتها وتكلها يو ما جزتي اروحن لال ثجيل اشهرنج و اخليهم يحرمونج من بتج .. هالحجي يرضيكم يممممه ، بحظك و ابختك يسرحان بتي ماشيه حذاك .. كاربتك عليش اطعنون بيها .
سرحان : ام ستار هاذ الحجي انا ما ارضى اليطعن بهدوة احشن راسه حش .. و تمشين ويانا هسه و حكج اعلى يمناج .
مشوا للبيت و انا امشي وراهم ، ليما وصلوا البيت فتحولي الطريج و كالو : تفضلي يم ستار .
دشيت للديوان و هم برا .. تلكتني ردحة و ام فاضل و النساوين .. و قاسم صاح لبته و جابها و ذيج عيونها صارن بالطول من الخوف جدامهم .
حجه قاسم الكلته و كال الها : صكد هالحجي بويه رايحة ليهم
فخرية : لا بويه علي العباس لا حاجيه وياهم ولا متكربه لهديوة .. انا ما لي غرض وهال……..
قاطعيتها و كلت الها : خلف الله عليج يعني انا جذابه ؟
رادوا يحجون كلت الهم : انا ما جاية اكللكم الحجي صكد يو جذب .. المرة اجت و هددت بتي و هالجلمة يو وصلت ال ثجيل يو انجاب سيرة بتي و انعطن بسمعتها . حكي منكم اريدنه و ساعتها اجعدنكم مجاعد زلم و اطلع حك بنيتي .
حجيت و طلعت من للبيت و البت تبجي و تجذبني .. لحكني سرحان : ام ستار ام ستااار
وكفت و انا اكلله : سايم الله و محمد و علي عليك يمه .. يو شفت هدوة بصوب امش بصوب لاخ ولا تكرب ليها من كون تعرفها اعلى زمانعا ذاك وهي متهومة بيك وموش عاد عزبة و الناس تتربص ليها .
– وحك علي ابن ابي طالب ما مكرب منها ولا واصل صوبها اخر شوف ليه الها .. يوم جتلة كريم .
– تريد نصيحتي يمه .. عرس و لم جهال ولا تتامل و اظل معلك بهدوة .. هدية دامك انت مفرد .. ظنونها ما يهدنها و تتامل لدنياها ارد ليك .. وردتها مامش منها من كون عدها بت يو فكرت تطلك من فليح بغيابه يعتبرونها فلفلت اعلى رجل و ياخذون بنيتها ، خلها عايشة و شوف حياتك يمه .
– ام ستار انا موش جاهل واوزن الامور .. مرات تصدف امرن و انشدنها و انا ماشي لجن لا كارب منها ولا واصل ليها و اعرف الطريج موش واحد ..
– فريخاتك معتازين ام و بت قاسم هاويتك و مداريه عيالك ، خذها ولم لحمك .
حجتها ومشت ..
تنهد سرحان ورد للبيت لكه عمه يصيح و يزف ابته و يغلط عليها .. خلص من بته رد على سرحان
– بويه شنهي رايك البت انحجت حجايتها و غطيت عليها و هي ظاله بامالك .
– عمي انا ما رايد اظلم البت وياي .. لا تشوفني وياكم اضحك .. ويا المرة مر و ما اتعاشر و اما انخبط ويا وحيدة و عي بت عمي ما اريدن اتفاشل وياك
– و جهالك عمي ، شنهي تظل بتي طول عمرها اداري بيهم و انت هادها بعد ما حجيت عليها و تأملت بيك .
– الحجي موش وكته يعمي .. كريم توه جرحه اخضر بكلوبنا … خل تعدي السنة مالته و يصير خير .
….
هدية : اعلى نار و انا اناطر امي ترد ..
ليما ردت و هي مشعوطة : ها
– خبصتهم و وردمت واحد بالاخر ورديت منهم
– يمه جا شهرتيني
– لا ما شهرتج .. هاي يو ظلت تهددج و تخافين منها تسويها و تالي ال ثجيل يحشون بلحمج .. رحت ليهم و حطيت الحجي اعلى اديهم خاطر يو طلعت الجلمة باجر عكبة بتهم التعاب .. و يعرفون شلون يصدونها ويردون حكج .
– سرحان شكالج
– ما جاتلج غير سرحان ، و ما مطيح حظوظنا غير سرخان و ما مطين روسنا غير السانج و هو يلهج بسم سرحان ، حطي طويبيجات بجيوبج و اركدي ، بسج استحي اعلى روحج من ساعة النويتي اعلى الطلاك استخفيتي ، شيسمونها هاي .
سكتت .. و هي تكلي : كلت السرحان يعرس و ياخذ بت عمه و هو كالي انا خاطبها وراح اعرس و هدية انا لا واصل صوبها و لا مفكر بيها.
كعدت متضايكة .. من حجت هالحجاية درت ليها : الحجي هاذ منج يو صكد
– لا صكد … الزلمة عده ايتام شنهي تريدينه يكعد عزابي بلا مرة والله شني عود جان يحبها ، اصحي يمه يا زلمه يحمل يظل بلا مرة .. و تاليته يعرس ؤ لا تظلين تعلين بظنونج ليما تطمسين .
– عودن ليش موش حكي ؟ .. انا مفرده و اهو مفرد .. و دنيانا شما لفت بينا كلبي ما هوى غيره ولا هوى غيري ، عليش هيح وياي ، تستكثرون علي اعيشن مرتاحه بجاله .
– رايدة سرحان يمه …
سكتت ..
– لا احجي رايدة سرحان من عين باجر اشدن عباتي و امشي افرن بطلاكج ليما اطلكج من فليح … بس مستعدة يمة تطين ظناج لال ثجيل ؟
ما رديت … : عليش سكتي احجي مستعدة تطين ظناج
– اطلع من الديرة و اشرد ابتي
– خايبة ام حلك الأعطر عليش ما تستجنين ، تشردين شنهي .. جا احنا شنهي نهفي وراج يو شنكل للوادم ..
لا تظلين تتاملين يهديووووووة ال ثجيل ما يهدون .. ما يهدووووونج .. اصيحن بعد يو بسي ؟
ظلت دموعي تجري و انا دايرة عنه ..وهي تحجي و ترزل بيه اعلى ظنوني .
ظليت اخلص ايامي
شما ابعدنه من بالي الاكي روحي افكر بيه و اتخايل نفسي بذاك اليون النصف سويه ويصير واحدنا للاخر .. وارد اهزن ايدي اعلى اظنوني الما تبطل منه .
…..
جمارة : صرت صف سادس .. وانا شما يمر بيه الوكت اعدن ايامي خاطر اكبر و اصيرن دكتورة و يرضى خنجر و نعرس .. بس مرات اهيسنه يضحك علي .
انا احبنه .. و من الزغر احبنه
اشوفنه زلمه ما يهاب شي ، و يطك بالوادم و محد يكدر يحاجيه ، و انا احبن الزلمة الكوي الكلها تخاف منه .
مرات اسمع امي تحجي ويا هديوة و تكللها .. هاي المرة خطبت جميرة لابنها و هاذ رادها مني .. بس لا تكليل لابوج خاطر لا يبطلها.
وانا افرح و انشنش و اهيس بروحي كبرت و راح اعرس ، بس خنجر يريد الا دكتورة .
انا حتى جزت امشي ليه ولا احج وياي . خافن يكول عني هاي خفيفة و ما يحبني و حاطة راسي بالكتاب و اقرأ .
هكو صديج لخنجر اسمه حيدره
مرات اشوفنه يكعد ويا خنجر .. ويسولف وياه ، و انا كلما امرن اظل اعاين عليهم ليما اتعداهم ..
شو هاذ مرة مرتين كمت اشوفنه من اطلع من اهلي اروحن للمدرسة .. يلحك وراي و يمشي و يكول : بت يو كيمر .. جا الله السواج جم يوم ظل يعجن بيج .
-انت شمالك ما تستحي ، لا تكفر جا الله شني يعجن .. امداك وامده وجهك
– عليش تغلطين علي
– جا ما تستحي تلحكني للمدرسة ؟
– جا حلوة والحكنج ما يصير
– انت موش صديج خنجر
– اي
– خنجر يرضى تلحك بيه
– جا وهو شله غرض ؟
– انا و خنجر راح نعرس
– صكد ؟
– اي
– يجذب عليج
– عليش ؟
– خنجر ما يفكر يعرس .. وهو واحد مالت شرب و نسوان .
– يعني شني
– يعني يحب بنات هواي
– صكد
– اي والله
وكفت .. : عليش تحجي عليه هجي هو موش رفيجك
– انا ما حاجي عليه ، انا جاي اكلج هو هيج خاطر لا تتاملين بيه و هو ما يحبج .
– و منو كال هو صكد هيج ؟
– اذا ثبتتلج شتطيني
– نعال
– اتي بت عليش تغلطين
– جا شني تكلي شتطيني .. رايد تاخذ مني فلوس
– موش فلوس
– جا شني .
– تحبيني و تجين وياي
– انت جذاب
– هسه اثبتلج يو لاله ؟
– خوش اثبت خنجر يدور بنات و انا شتريد راح اسوي
– متفكين ..