رواية وأغواهم الشيطان الفصل الأول 1 بقلم عادل عبدالله

رواية وأغواهم الشيطان الفصل الأول 1 بقلم عادل عبدالله

رواية وأغواهم الشيطان البارت الأول

رواية وأغواهم الشيطان الجزء الأول

رواية وأغواهم الشيطان الحلقة الأولى

دخلت مع هاشم بيه مكتبه
وقالي : عاوزك تشرب الليمون و تهدا يا محسن علشان عاوز اعرف منك كل اللي حصل بالتفصيل .
: حاضر يا بيه هقعد واتلم علي اعصابي بس وهحكي لحضرتك كل حاجة بالتفصيل .
قعدت وشربت الليمون وهاشم به طلب لي بعد الليمون قهوة و اداني سيجارة ولعتها وبدأت احكيله الحكاية .
حكايتنا يا بيه حكاية اصحاب حولتهم (…..) لديابة بينهشوا في بعض وكانت دي النتيجة …….
****
انا اسمي محسن ٢٧ سنة صنايعي الومتال مكملتش تعليمي بس بعرف اقرا واكتب كويس ، اقرب اصحاب ليا كانوا ثلاثة .
(ايمن) ٢٤ سنة عامل في محل ،اصغر واحد في الشلة بس الوحيد مننا اللي اتجوز ، وده بقي ضرب المخدرات هي اكتر حاجة عايش حياته علشانها .
(ناصر) ٢٧ سنة كهربائي سيارات رزقه واسع وكسيب واكتر واحد فينا بيكسب ومعاه فلوس وده بقي متخصص في الفسح والسهر عايش حياته بالطول والعرض وبيصرف بعبط ومش بيعمل حساب لأي حاجة.
(فهمي) ٢٩ سنة شغال عامل في بنزينة وحالته المادية وحشة اوي وتقريبا مش بيشتغل الا علي فترات بس بنحبه اوي ودمه خفيف مش بنعرف نتجمع الا لما يكون معنا ونسيت اقولكم ان فهمي ده يبقي صاحبي وفي نفس الوقت ابن عمتي .
احنا الاربعة كنا عايشين حياتنا بالطول وبالعرض نشتغل طول اليوم وبالليل نتقابل ونخرج نتعشي وبعدين نضرب سيجارتين نظبط دماغنا ونروح نسهر علي القهوة نلعب طاولة ونضحك ونهزر لبعد نص الليل ونروح ننام في بيوتنا علشان نصحي الصبح نروح شغلنا ونكمل حياتنا .
وكل اسبوع يوم الاجازة نقضيه كله مع بعض مفيش فرق مين معاه ومين بيصرف كلنا كنا واحد نفطر ونتغدا ونتعشي مع بعض ولو معنا بنات بنخرج كلنا مع بعض .
كنا كده لحد لما ايمن اتجوز وبدأت حياتنا تتغير تدريجيا !!!
ايمن بعد موت ابوه ورث قرشين كويسين وبدأ يصرف منهم فأهله قالوله لازم تتجوز قبل ما الفلوس تضيع منك وفعلا ايمن راح خطب ياسمين وفي كام شهر ايمن كان بيتجوز ياسمين .
البت ياسمين دي كانت جميلة اوي بيضا وحلوة وجسمها ملفوف ومقسم ، وعلشان ايمن اول واحد فينا اتجوز كان كله بيحسده علي عروسته وبيتمني يتجوز بنت زيها خصوصا ناصر اللي كانت ياسمين عجباه اوي لدرجة انه قال انها خسارة في ايمن !!! طبعا انا وفهمي زعلنا من الكلمة دي وقولناله عيب الكلمة دي ، متنساش انها بقيت مرات صاحبك ولازم تعمل حساب له .
بعد الفرح بيومين روحنا لأيمن شقته علشان نباركله وننقطه .
ايمن قعد ولف سيجارتين وقعدنا نشربهم ، واول لما دخلت ياسمين تقدملنا الحاجة الساقعة ناصر منزلش عينه من عليها !!! خصوصا لما ايمن قالها اقعدي اعرفك علي اصحابي وقعدت معنا وعرفها علينا !!!
احنا كنا متعودين ننقط اصحابنا ب ١٠٠ او ٢٠٠ جنيه وفعلا طلعت ٢٠٠ جنيه وفهمي طلع ١٠٠ جنية نقطه ، قام ناصر مطلع فلوس كتير ونقطه .
ياسمين مرات ايمن استغربت من حجم الفلوس من قبل ما تعرف كام وايمن كمان استغرب بس كان فرحان اوي !!!
بعد ما نزلنا من عند ايمن قولت لناصر : ايه يابني ده ؟
: في ايه ؟
: انت نقطت ايمن بكام ؟
: ٢٠٠٠ جنية .
: وليه كده ؟ مش كتير ؟؟
: طبعا مش كتير علي ايمن ، هو مش صاحبنا ولا ايه يا محسن .
: صاحبنا طبعا بس اول مرة اشوفك تنقط بمبلغ زي ده !!!
: لما تتجوز يا محسن هتشوف هنقطك بكام .
: مش مرتاحلك يا ناصر يا صحبي .
: يلا بينا نسهر سهرة حلوة .
: هنسهر فين ؟ انا مش معايا فلوس النهاردة .
: يا عم ملكش دعوة يلا بس ، يلا بينا يا فهمي .
فهمي : لا انا دماغي تقيلة وعاوز اطلع انام .
ناصر : مش هنسهر من غيرك يا فهمي ، ده انت اللي بتطري القعدة ( وضحك ) .
فهمي : نعم يا روح امك !!
ضحك ناصر : بهزر معاك يا عم فيه ايه ! قصدي انت اللي بتخلي القعدة حلوة ودمها خفيف وكلها ضحك وهزار .
فهمي : تعبان يا ناصر وعاوز انام .
ناصر : لما تعرف هنروح فين هتفوق وتصحصح وتيجي جري .
فهمي : هنروح فين ؟
ناصر : فاكر البت سما ؟
فهمي : بجد ؟؟ طب يلا انا جاي معاكم .
ضحك ناصر اوي وقالي : شوفت يا محسن صحبك فاق ازاي !! اهو نسي التعب والنوم وفاق اهو .
ضحكت وقولتله : دا انت مش سهل ياض يا ناصر .
****
وهنا قاطعني هاشم بيه
وقالي : و انت كنت تقصد ايه بكلمة انه مش سهل ؟؟
: كنت اقصد يا بيه ان ناصر كان ذكي اوي و عارف مفاتيح كل واحد وعارف ازاي يخلي كل واحد ينفذ كل طلباته بمنتهي السهولة بارادته .
: وانت شايف دي ميزة ولا عيب ؟
: ميزة لو نستخدمها في الخير انما تبقي عيب لو نستخدمها في الشر .
: وناصر كان بيستخدمها في الخير ولا في الشر ؟
: ناصر يا بيه كان بيعمل كل حاجة لمصلحته وعامل نفسه محور الكون وكل اللي حواليه علي الهامش وبيخدموا عليه .
: تقصد ان ناصر كان مليان شر ؟
: ايوه يا بيه رغم انك كنت تلاقيه جدع كتير واللي في جيبه مش ليه بس في نفس الوقت كان سواد قلبه واضح حتي في عينيه .
: وكنت مصحبه ليه وانت شايفه وحش بالشكل ده ؟
: كنت مش واخد بالي اوي من اللي جوه ناصر ومش ظهر عليه الا بعد جواز ايمن ، وكمان مش هكدب عليك يا بيه ناصر كان مقرش وفلوسه كتير فكنت بحتاجله كل ما اتزنق ويكون مش معايا فلوس .
: طيب كمل يا محسن واحكي كل حاجة بالتفصيل .
: انا وناصر وفهمي روحنا سهرنا وانبسطنا وقعدنا نشرب كتير لدرجة ان ناصر دماغه تاهت وبدأ يخرف في كلامه ويطلع اللي جواه .
: قال ايه لما طلع اللي جواه ؟
: ناصر قعد يقول ان البت ياسمين دي

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية وأغواهم الشيطان)