رواية كحل عرب الحلقة السادسة والأربعون 46 للكاتبة زينب ماجد

(اعتراف جسام ) 

لا ِزحتْ الحيا… ولاضيٌعت معروف 

ولاخنت الوفه.. وربعي اجفلوا مني 

أضحك بالوجوه.. ابغير راحة بال 

واصبر لو .. ليالي العسر ضكني 

واكابر عالشدايد … حد مصب العين 

واسكت.. لو دثو من الناس لاسـٌــني 

واسامح .. ما أبحــٌـر.. وين حد الغيض 

وأزلف ..لو حوافي الزعل وازني 

( عريان السيد خلف ) 

جسام : للمرة الثانية اكلج احجي عدل ، انا ما حجيت شي بس نشدتج شعدج هنا ؟ 

– و انا ما طاري اعلى بالي اكللك شعدي . 

هز راسه : زين . 

تحرك مشى ، ورد وكف : جانو يكلولي هي ما تطلع ولا تخطي عتبة الباب ، بس اشوفنج هدد .. اطلعين و تباتين عد ناس غربة ، وتضيفون خطارهم بعد . 

– درت من عنده و انا اخذ ماي من الحب و اشرب و ما عرت اهتمام لحجاياته ، اغتاض .. تنهد و دش داخل . 

توا دش ، كام ابوه .. و هو يحجي ويا كواغد.: سهلة سهلة ان شاءالله ، محلولة . 

طلع انا واكفة ، حجه : اشوفنج هنا ، شنهي ؟ 

راديون : اجيت اشوفن هديوة من كونها رفيجتي و احبيبتي ، عمة كواغد انا اروحن لبيت سرحان بعد . 

– وين رايحة عمة ، ظلي الليلة عدنا . 

– لا زناد مامش و لزوم اروحن 

سلطان : ياله عدكم العافية 

جسام : امشي اوصلنج بطريجي . 

كواغد: لاله لا .. اليلة تبات عدي ، مالك غرض بيها . 

جسام : ما دام محد ابيت حاكم .. ظلي انت هنا ، و باجر عمتي كواغد توصلج . 

– اي انا اوصلنها . 

تجاهلت الحجي و انا اجرن عباتي، طلعوا هم و اسمع ابوه كام يترادم وياه بالحجي ، كضتني عمتي كواغد : وين رايحة عمة 

– لا هم يالة اروحن .. 

– دكعدي يا بتي ، هو شعدنا شو كلنا نساوين ومامش بالبيت زلمة و بالقصر كل وكتج مسبلة و صافنة، كعدي . 

دخلتني ليجوا ، طلعت هدية ملهوفة : ها يمة شكالج سلطان ؟ 

– يكول انا احلنها و احجي ويا نويصر . 

– ما يحلها وراح يمطمط بالسالفة ليما ينمط كلبي اعلى بتي ، خاطر يجبرني اردن ليهم . 

– كعدي يمه خلنا نسولف .. لويله عمه ، اسهينا تمرات بدهن حر و ذبيلنا اعليه سمسمات خاطر انكش بيهن

– اي عمة 

ردنا نكعد بالهول لجن خذتنا و دخلنا بالحجرة يم ام حاكم مريضة و الكومة صعبة اعليها ، فرشنا وكعدنا غاد ، حجت كواغد : 

-اسمعي يمه هديوة ، انا ما اريدن اضرنج .. ويشهد اعليه العباس ، كعدتج ابيتي ارهى اعلى كلبي من كعدتج غاد ، من كون يو رحتي اللكمة الاكلنها اتعرضين كبالي و اغصن بيها اعليج ، لجن ييمه انا خايفة اعلى البنية منهم ، ذولة ناس ما يخافون الله ساعة الطكها ابوها و هي انفاس ما اغتاضو اعليها تريدينهم هسه يحتاطون اعليها ؟ و البت رضيعة و تلاكينهم هسه مزوهرينها بحليب الهوش و هي الحيمة ترفة .. 

– يمه لا تزيدين الضيم اعلى افادي ، انا من دون عالحجي كلبي متلوع اعلى فكدت بتي ، جا كليلي شسوي.  

– مالج غير تردين ليهم.  

– و ارد لفليح والله ما اطيكن شوفته.  

– لجل عين الف عين تكرمون ، و لجل بنيتج ييمه تردين .. مالج غير الرده ، و هو بالعسكرية صار ، ٢٠ يوم غاد و ١٠ ايام شلون ما بيج اتحمليهن، و مصرفج و اكلتج و شربتج انت و بتج اعليه انا كل يوم امرن بيكم و انطيج هالقاسمة الله ، شكلتي يبنيتي ؟ 

– اردن هسه ؟ 

– لاله ، الصبح و انا اروحن ليسرى تودي اهلها خاطر يجونج.  

– و بتي الليلة وين عنها.  

– اصطبري هالليلة و الله كريم لباجر ، اي هسه اندير لراديون . 

راديون :  ها عمة شو درتي علي ؟ 

– عمة تريديني احجي الحك يو اجاملنج.  

-لا عمة مامش احد ما يريد الحك . 

– كعدتج عد اهلج صعبة و انت بت شيوخ ، يشهد الله و رسوله احسبنج وحيدة من بناتي ، و اخافن اعليج و اعلى سمعتج مثل ما اخافن اعلى بناتي . 

– الله يسلمج عمة ، لجن انا شنهو البيدي ، بيت ثجيل ذبو غيضهم من جدي براسي و طردوني . 

-و اليردج ؟

– جا عمة ردة و بالكوة ما تنراد ، ومالي قسمة وياهم 

– عمة نحجي هيج يو هيج ، 

و فتحت اديها و دارتها …. انت بالج و راسج يم خنيجر و كلبج رايدة ، شنهي متأملة ترديله يو شنهو البالج . 

جمارة : لا لا خنجر انا احبنه ، من اكبر انا اتزوجه ، انت ردي لجسام . 

– يمه هديوة ناوشيني النعال ذاك من يمج.  

ضحكوا ، و راديون ضحكت : والله عمه انا ضايعة و مالي كل راي و منين ما اجيبنها اتيه، خنجر طاب كلبي منه من ساعة الخطف جسام، اعرف انا اتهاونت بيه ووافكت اعلى جسام ، لجن يا عمة انا بت شيوخ و اهلي و سمعتهم عدي اهم من روحي و من كل شي .. و هو بسوايته ما فكر و كال هي عرست انا من سويت هيج شنهي رايد فضيحتها ، يو رايد اشهرها جدام رجلها ، احسبي جسام ما سكت و حجه لهله ، جا ياهو اليفكني من حجي الوادم واهلي بيا وجه يجابلون الناس .. هاذ و سرحان صديجة ورفيج دربه ، انا هاذ الطيب كلبي من خنجر ، و غيضي منه ازود من عشكي ليه . 

– و جسام ؟ 

– يو حجيت الحك الزلمة ما كصر اعليه بشي ، صكد انا ساعة الطلعت منه اغتاضيت من كونه ما رضى اظلن عده ليما تمر فترة ، لجن يو اكعد و احاجي روحي ، اشوفنه حكه .. انا ما اعرف خنجر شحاجي و شمخربط جدامه ، و كل هاي و هو لا جابني ولا جاب اهلي بشينه و اخذني وهو مصوب ورداني لبيت اخوي و ما خله واحد من اهله يكربني ، بس كلبي ما يهوى. 

– احجيلج وياه ؟ 

– لا عمة ما اريدنه . 

جاي يحجن ، دشت لالة و هي شايلة الصينية و مسوية تمر و دهن بطاوة جبيررررة ، حجت كواغد : خايبة جميرة لوفي اعلى بيت المتيريسه و صيحيها ، ابوج ما موجود خل تجي تكعد احذاجن 

راديون : عمه عليج العباس جا انت ما تغارين منها ؟ 

– والله يعمة اول ايامنه .. جنت اشوفن ابليس ووما اشوفنها .. لجن الايام طويلة و اعلى اللجمات اتعود كلبي . 

– وان جان تدخل لجن عمة ابالي انشدنج ، عمي هم يكربج يوصل ليج . 

– اخر مرة كبل ٥ اشهر ازود ما ادري ، لجن يا عمه انا هم طاب كلبي منه .. لا كمت اعاتبنه ولا اريدنه .. شكلله عليش تحبها ، الزلمة لا مكصر وياي و لا مخشن كلبي بجلمة .. و كبرنا و بناتي و ابني و احفادي ترسو البيت عيب بحكي اغتاض و اديرن وجهي اعلى سالفة ما تسوى ، و هو هم زلمة و هي زغيرة وتحلى بعينه، شرايدة غير الله يستر اعليه و اعلى وليدي وبنياتي و احفادي . 

– والله يعمة كلبج كوي ، الضرة مرة . 

– موش كوية لجن جثرة الصدعات تكوي يعمة و انا مامش هم ما صدع بفادي . 

دشت ايمان و ابنها ركض كبالها و طاح اعلى كواغد ، حضنته كواغد و ضحكت : عايني يعمة ، جا هو البشر شيضل من عده غير الجلمة الطيبة و الظكر الزين . 

كعدت ايمان و هي تسلم عليهن ، و ظلن يسولفن يتسامرن ليما نامن كلهن بمجان واحد . 

ثاني يوم .. جان هو 22/9/1980  … انطلاقة معركة القادسية  … في يومها شن العراق هجمة على ايران و اعلن الحرب . 

كان يومها الشمس متلبدة بسد الغيوم .. و الجو كئيب ، و كأن هذا اليوم ينبئ العراقيين بغيمة سوداء ستحل على سماء العراق ، لا يعلم احد متى تزول هذه الغيمة و تشرق شمس السلام على هذا البلد العظيم . 

طلعت جمارة للمدرسة الصبح ، وصلتها كواغد جاي من المدرسة و هي لافت اعلى بيت ستار و مشت لبيت يسرى ، خبرتها خاطر اهلها يمرون ياخذون هديوة، و يسرى كالت الها : امرج عمة . 

ردت كواغد خاطر ادش للكاع ، و شافت جلجول كاعدة بالباب هي و اميدي وبيدها مصغول ، تمص و تطي .. 

– جا انا وصليتج ارد الاكيج جدامي ، شنهي زيبك انت ؟ 

– يمه مامش مدرسة 

– عليش 

– يكولون صديم سوا حرب . 

– صديم ياهو هاذ ؟ 

– يمه الريس مالنا ، يكولون اليوم حرب ومامش مدرسة . 

– يا رحمتك ربي ، من كون فتحنا هالصباح بحرب ، ها يبو خيمة الزركة ادخيلك احنا تستر  اعلينا واعلى زلمنا ووليداتنا من هالحرب يربي ، خيرها لينا و شرها اعلى عدانا .. دخيلك يبو خيمة الزركة. 

– دشي داخل ياله ، و كليلها لهديوة تحضر روحها خافن عيالها يجون الظهر ، ياله يمة . 

درت عن البيت و مشيت للكاع اشوفنها و اعاين اعليها ، خذيت الهويشة مالتي و طلعت بيها ، خافنها مغتاضة من الحصرة بهالكطعة ، و ظليت اداور بيها بالكاع و افسحنها . 

واكفة و اعاين سيارة غاد من عدنا موجفه ما مشت ، ربطت الهويشة ومشيت ليها ، وي ما كربيت ونعلي اشوفن جسام جويعد بيها

– يااااع عمة ، جا شعدك مچسي هنا ؟ 

فز من مجانه ، فك باب السويويرة ، ونزل منها : هلا بيج ام ستار . 

– هلا بيك يمه ، معتاز شي ؟ 

– لا عساج سالمة ، انا اللزوم انشدنج من كون ؤاعي بيتج موش موجود 

– خير من الله ، نحمده و نشكره . 

– الله يديمها 

– جا ما تكعد 

– لا اريد اروحن ، عدي شغل 

– تروح يو جاي تفكد اخبار الولف . 

– ولفيش ؟

– جا هاد مريتك ابيتي ، عليش . 

ابتسم : ام ستار انت ما يفوتج شي . 

– جا ما طول ما يفوتني شي ، اكفل سويويرتك و انزل عدي جم احجاية وياك.

قفل سيارته و دارلها : خير ام ستار 

– والله يعمة انا تعرفني مرة صايمة مصلية و الشينة ما اهواها و يا بخت الصلح بين اثنين ، و اشوفن هدتك لهالبت خسارة الك موش الها . 

– الحجي جثير ، و البكلب مضموم عيب تتخطاه . 

– دام راكد بسيارتك هنا متخطي ورايد و حيد يدفعك خاطر ترد .

ابتسم و هو يمشي ، كملت حجيها : ان جان المضموم سالفة البياض ، انا مستعدة احلف و انا مغمضة اعلى البت رايتها بيضة وما تطلع منها العيبة .. و ان جان اعلى الزلمة الظال بكلبك منه .. وحيد حاله حال الخطبوها .. خليني ما اجذب اعليك .. البت كل اسرارها عد هديوة بتي و اسرار اهديوة عدي ، خنيجر شايفها من زمان مريرة يو مريرتين .. ومن هالمريرة البت جلب ابالها لجن مامش امل بيه ، من سرحان شغلاه عده و عدل هندامه و كونه رفيجه مان اعلى الشيخ و خلاه يخطب ، جا انت كلي بت لا طلعة ولا طبة و خطبها وحيد تتضكره مغازلها .. ما تتحلم ما تبني امالها اعليه و هي بت حديثة ؟ ساعة التجي وتكلها لا ما تاخذينه و تهدم البنته اباله ما تبجي ما تتأثر ، لجن يعمه موش هاي اخر الدينا و الدنيا تعاويد و الواحد يتعود ، و امس انا حجيت وياها ، ما جابت طاري ذاك ولا ضكرتها ، شكت منك . 

– وانا شسويت . 

– انت بحسبة ابني واسمعها مني ، المرة يو انسدحت حدر الزلمة ، تعلكت بيه و نام بفادها .. امس تحجي بيك و كل عين مجبده و تسجب .. و حرام ما ضكرتك بشي لا والله ، لجن العاز اعليها هي بت شيوخ و سوايتك وياها خل اليسوى و الما يسوى يحجي بسمعة اهلها و ابوها غالي اعليها و ما تهون الجلمة تلوحه. 

– انا ما اخفي عنج عمه ، البت عاشكها و موش هالوكت كبل سنين ، لجن شلون اخليها عدي و زلمة اخر يبجي اعليها . 

– عمة اذا اعلى الزلمة ، اخذ زلم موش زلمة واحد ، ابن عمها جتل روحه اعليها و تجار و شيوخ حطو اقصور ياخذونها و الشيخة ما اطتها .. و نص ازلام السلف تتمناها ، و انت مغتاض من وحيد ، يكون هساعك تفرح الله سهل عرسك منها و انت تكول عاشكها ، جا من تمد سجادتك و تصلي ، شلون توكف جدام الله و انت ظالم بت ؟ 

– الله كريم ، هي موجودة عدكم هساعها ؟ 

– اي موجودة ، ظل بمجينك خل انده ليها خاطر اكللها اوصلنج و احطنها بسويويرتك . 

مشت للبيت و صاحت : راديوووون 

– اوصلنج يو لا دام العباية اعلى راسي 

– اي عمة اي ، بس البس عباتي . 

ركضت لبست عباتها و طلعت وياها : ياله عمه خل اوصلنج ، اجدامي غدن اخيوط من الكاع … 

خذيتها و مشيت بيها ، طلع جسام بسيارته جدامي ، كلت : اي دامك هنا ، ما توصلنا لبيت الشيخ ؟ 

جسام : اي ما عدي شي ، اصعدو 

راديون : لا عمة نمشي مشي 

– ما بيه امشي ، اصعدي عمه اصعدي 

– لا عمه خل نمشي . 

– دصعدي يا عمة 

– جا بالصدر ، غير انت 

– سا جا غير مرته و تكعدين احذاه انا شنهو ، صعدي صعدي خلني اصكن الباب . 

وسا ما صعدت ، صاحت كواغد : يا عمى العماني كون نسيت اگل للويلة تحط الفاصولية اعلى النار تسلكها . 

صكت الباب و مشت ، وعافتهم اثنينهم ساكتين ، حجت راديون : امش بطريجك انا اردن لوحيدي 

ردت افكن الباب ، كض ايدي : اوصلنج وارد ، ظلي 

– ما اريدن . 

حرك السيارة : موش كتلك ما اريد ، وكف . 

– انا مالي غرض بيج مو ؟ 

– اي مالك غرض و نزلني ، جاي اكلك نزلني . 

ظل يمشي و ساكت ، و صل لطراف بستان الشيخ مطر ، وكف السيارة ، نزلت هي و نزل هو ، ما نطرته نزلت البستان ابوها ، و هو لحكها للبستان مشى وراها . 

دارت ليه : عليش لاحكني 

– اوصلنج 

-ما جاي افرزن تصرفاتك شنهي ؟ انت الطردتني من بيتك . 

– و رايد ارجعنج 

– و انا اعلى الكيف ، وكت ما تهوى تطلك ووكت ما تهوى تردني . 

– خلينا نكعد نسولف هنا . 

– لا ما اكعد 

جر ايدي: هدها ، وين رايد بيه هددددد . 

سحبني ووكفني عد الشجرة : كعدي 

– ما اكعد 

وكف و حط اديه بجيوب دشداشته و ابتسم : تضكريني ابت اخوي ، من اكللها عمو نامي .. ما انام .. كعدي ما اكعد .. سكتي ما اسكت .. المهم ترادد و تعاند ، و انت مثلها . 

سكتت و درت وجهي عنه و انا اتنهد ، كرب من عدي ردت ابتعد ، سحبني من ايدي ليه و حجه : كبل ٤ سنين حضرت عرس ابن عمي حويكم و ابيت شفت بنية الكمر يغار من خصالها .. من ذيج الساعة و انا كلبي معلك بيها و شما طرو اعليه نسوان خاطر اعرس و اقيسنهن بالبنية العشكها كلبي ، ما يطلعن فلس بسوكها 

عاينت عليه و ظليت موجدة بعينه ، كمل حجيه : جنت احاجي ربي عنها و بكل صلاة انخيه و اطلبنها و انا مأيس تصيرلي من كونها بت واحد ابوي ما يطيك يشوفها ولا يشوف بزريته .. بس سبحان الداور المور و حطها جدامي . 

– كلت الربك طردتها ساعة الستجابيتلي ؟ كتله ربي الطيتها الي رضيت ليها السمعة الشينه الها ولهلها ، كتله ربي ساعة الاختبرتني بيها حلفتلي و بجت و توسلت و انا نهرتها و ما رضيتها .. كتله يو ما كتله . 

– ذيج الليلة ما وكفت عدي ، و كبل لا تحجين طلعيت الدم من جسمي خاطر لا تتأذين . 

– بس ما صدكيتني . 

– دموعج و نهرج الي ساعة الكربة .. و اخيرها الزلمة الخطفني و ما خله حجاية شينة و تكسر الزلمة ما حجاها و فشر بيها جدامي و اهو يحجي بيج ، يو انت بمجاني شنهو التسوينه . 

– يكفيني المجان الانا بيه .. شنهو ذنبي بكطرة دم ما طلعت ببياضي ، انهانيت و انطكيت و اجتلت ، و انشهر بيه ومامش احد سمع مني ولا واحد صكداني ، كطرة دم هانتني جا شرخصني عدكم ؟ 

– انا ما طكيتج 

– وكت الرديتني لهلي مكسورة خاطر شجنت تظن يلاكوني بالهلا ؟ يو ما خوفهم من الوادم جا حطو جيلاتهم براسي ، و السبب كطرة دم انت هنتني بسببها ورديتني ليهم ، و تريدني ارد ؟ 

عليش . 

حجيتها و درت منه ، كضاني : رويدا 

– هاذ موش اسمي ، هد ايدي . 

– بسم اخر ننسى المضى ونرد . 

– رد لهلك و خلني . 

جريت ايدي منه .. و مشي و هو يصيح وراي ، تبعني لجت دشت بممشاي ووصلت قصر ابوي و دشيت ، ساعة الدشيت سرحان صد بوجهي 

: ها خويه شو داشة وحدج 

– عد اهديوة 

– ورادة لوحيدج ؟

– لا 

– جا ياهو الوصلاج . 

اندكت الباب، حجه : دشي داخل خل اشوفن ياهو 

طلع و انا دشي القصر و اعاين ، وكف جسام اعلى الباب : السلام عليكم . 

– اهلا و عليكم السلام ورحمة الله و بركاته ، تفضل  استريح 

– زاد فضلك 

دخل للقصر و هو يكله ؛ سمعت بزناد مامش و جيت انشد 

– صارلنا ثلث تيام ندور اعليه و مامش . 

– جا وينه . 

– اندارت روسنا اعلى هالزلمة ، تفضل اكعد 

كربيت من الديوان و هم كعدوا بيه ، ظلو يحجون بزناد ، و سرحان عرفه ما جاي اعلى زناد و اجا من الخير : صاير شي معتاز شي . 

– ابو مأمون انا خجلان منك وجايك بطرك روحي و المفروض اجي ووحيد وياي . 

– امر ؟ 

– انا كبل فترة رديت المرة و طلكيتها ، لجن ….. سكت ضاع الحجي بلسانه .. نطك : انا رايدها . 

– المرة لساها ما خلصت عدتها و بجلمة تردها ليك ، وانا زلمة صاحب بخت من كون عدي تحفظ اعلى هلك لجن جلمة الطلاك ما احجي بيها من كون تغضب الرحمن. 

– انا اعرف لزوم اجيب اهلي و نحجي بهالموضوع لجن كلت افاتحنك بيه كبل لا اخطيه . 

– لا خير ما سويت و انا كتلك رايي ما ادخل ، و الراي يم اخيتي الرضت ترد ليك ، زلمتها وحكها وان ما رضت هاذ بعد رايها . 

– خوش جا انا اكومن و يومين و اردن ليك خاطر اعرف شنهو الراي ،و يو رضت اجيبن اهلي و نجي ليكم نعاود . 

– الف هلا و مرحبا . 

– بالمهلي يديم عزك . 

كام من عنده ، انا ركضت دشيت داخل ، طلعو و هم يتسالمون ، صك الباب ، و رد دخل سرحان ، مشيت بساع خاطر لا يشوفني ، لجن لمحني ساعة اللفيت ، صاح 

– راديووون 

– ها خوية 

– الجابج من بيت حاكم جسام 

– ام ستار صعدتني بسيارته ، جان موجف غاد عن بيتهم ، هدتني ومشت ، ما رضيت و نزلت عد البستان و لحكني ، شنهو الرايدة 

– الرايدة اظنن تعرفين بيه لجن انا رايد اعرف رايج شنهو . 

– انااااا……. قاطعني 

– اخذي وكتج و شاوري امج و اكعدي ويا روحج وداوي امورج وبعدها اسمع رايج و انا ما ادخل هاي حياتج و انت اعرف بيها …. بس رايد انشدنج .

– شنهو ؟ 

عاين منا و منا ، سحب ايدي و دش للحجرة : شعلوم هدوة ؟ 

– حال الضيم حالها ماخذين بنيتها و دمعتها تسجب ما نشفت اعلى ظنها . 

– عساها بحظهم و ابختهم بجاه العباس من ساعة الخذوها مامش سواية كشرة الا عملوها بحالها .

– جا حظها بعد ، يو تشوفها تكسر باب الكلب . 

تنهد و هو يفرك بوجه : تريدني اساعدها؟ 

– شلون 

– ما اعرف اشوفلي طريجة اساعدنها و اردن بنيتها ليها.  

– لا رضت بردتها ليهم ، و الظهر يجون ياخذونها 

– تسودنت هاي ؟  تعداها الموت من حدر اديهم و ترد ليهم ؟ بعكلها هاي . 

– هدوة صارت ام يسرحان وضعف الام بضناها تتحمل الضيم لجلهم و هاذ حالها . 

اغتاض حيل و كام يتنهد و هو يدور بوجه و يشد اعلى كبضة ايده ، ابتسمت : بعدها متربعة بدليلك 

– من كونها اتغيب عن بالي ليلة . 

– و شناطر ترد ليك 

– وانا بروحي ما اعرف شناطر و ليوين رايد اوصل بشوكي ليها .. سنين مرت و انا ما بطلت انهض لفجرية خاطر اجابل الشط و اتخايلها ، الا انشدنج ، تضكرني يو ناسيتني … هم تحن ؟ 

– يكفي بس اعاين بعيون هدوة ..نظرة بس .. اشوفنك متربع بنصها .. ما يوم شفتك تزحزحت من عينها .. بس ولاها الضيم بعيال ما يرحمون و دنيا ردية ما نصفت وياها . 

دمعت عيونه ساعة الحجيت ، نطك و كال: الله كريم ، ياله انا اروحن . 

طلع من الحجرة مرته موجفة و تتصنت اعلينا ، تعداها و مشت اجت عدي ؛ انا على يابو علي اكولن هلبت نساها تردين تضكرينها بيه عليش ؟ و شنهو الرايدته ؟ 

– و هو نشدني عنها 

– تكدرين تجذبين و تكليله نستك و ما تريدك ، يو صعبه اعليج 

– عليش غيرانه من سالفة ما تصير ولا بيوم تستوي و تصح ؟ تطمني رجلج حذاج و محد ياخذه منج. 

……. 

جمارة : عمي عمي عمي 

خنجر : دخيلك يبو فاضل اجت العجة .. ها شرايدة 

– جا انت موش كتلي يو عرفتي اخبار عن راديون خبريني . 

– و شنهي الاخبار ؟ 

– امس جانت بايته عدنا 

– صكد ؟ 

– اي اجت لينا عبن بيت نويصر خذو امنية بت هديوة و انا ظليت ابجي اعليها و هديوة و امي حتى لاله ، بس اميدي ما بجة 

– بده التذربن.  

– و اجا جسام بالليل و هي دشت كعدت حذاه و اطته جاي . 

– عليش اجا هو موش طلكها ؟ 

-عمي سا طلكها ، حطت الجاي جدامه و هو طربك جنه حصان و مشى وراها . 

– و شحجى وياها؟ 

– جا تريدني اتبعنهم ، و علي امي تكصبني . 

– هاذ شلون ابعدنه عنها .. هالاغم ابن الاغم .. شنهو اعمل بحاله و يجفيني شره . 

– حجت وياها امي بليل .. كالتلها تردين لخنيجر 

– اي ؟ 

– بس هي كالت بعد ما اريدن خنيجر طاب كلبي منه ، و ظلت حمد بذاك و الصبح اجا اعليها و خذاها . 

– هالحجي صكد ؟ 

– جا انا ما اجذب . 

سكت و دنك و هو كاض عودة و يخرمش بيها بالكاع ، كربت منه : عمي اذا ما اتزوجتك راديون لا تضوج انا اتزوجك . 

ابتسم و دار وجهه : و شتطيني مهر ؟ 

– شني يعني مهر ؟ 

– روحي بويه روحي 

– انا اكلل لبوي يطيك الهويشة مالتنا ، جا هو يحبني . 

– يحبج و يطيني هويشتكم 

ضحك بصوت عالي و حجه : شكثر عمرج ولج انت ؟ 

– راح اطبن بالحدعش .. امي تكول انا بحلج و غسلت 

-انا اخووووك ، هههههههههههههههههههههه ولج بويه هاذ الحجي لا تحجينه عيب . 

– عليش 

– سوالف ما فهمين بيها لا تحجينها ما يجوز 

– لا شمالك عميييي ، افهم .. ذاك اليوم شفت هديوو………….قاطعني

– هااااي هييييي خايبة ءهلاااااا  ، بسج اعوينة ابيج 

– جا انا شحجيت ؟ 

– لا تحجين بويه ما يجوز عيب . 

– عمي عودنعليش عيب ؟ 

– ما يجوز 

– اي عليش ؟ 

– خايبة فكي ياخة مني شنهي تالي عمري اكعد اعلمنج عليش عيب . 

– انت بس تصيح 

فتحت اديها و عددت : اجيبلك اخبار تصيح ، احجي وياك تصيح ، اسولفلك على اميدي تصيح ، شمالك 

– طاكني عرج كفيلج العباس مسودن .. هديني و امشي

– جا عليش من اكللك مسودن تكلي اطكنج . 

– اكلج جميرة ، اغدي فدوة الهالراس المصلبخ هاذ ، عليش ما تخليني اكسر هالعودة بفادج و اريح افادي ؟

– عليش تعيب ، كلي روحي بس لا تعيب على راسي 

كامت منه اغتاضت وركضت للبيت ، دشت و هي تبجي ، شافتها حبوبتها : ها شمالج ؟ 

– يعيبون علي يكلولي ام راس المصلبخ . 

– ياهو اليعيب عليج . 

– خنيجر 

– يغديلج فدوة هالنكري . 

– بس انا اريدن كصيبة و امي ما ترضى . 

– بطلي و سوي كصيبة ، جا بعد شتسوين بالمدرسة ما دامج عرفتي القراية و الكتابة بطلي.  

– ما ابطل ما ابطل . 

دشت هدية : شمالها هاي تعوي 

– تريد كصيبة مثل البنات ، خنيجر معيب عليها . 

– جا موش تريدين مدرسة 

– عدنا ويانا بت وحدة والله ، جا انا هم اريدن كصيبة 

– ابوي ما يرضى 

– هم يعرفون انا بت ، شني ما يرضى ، ارييييييدن كصيبة.  

– همي كافي اعليه كومس ولي من عدي 

– جا حبوبة يمتر يجون عيالج ؟ 

– ما اعرف حبوية ، كلبي غادي فلين اعلى بنيتي هساها شحالها بلياي ، عساها بحظهم و ابختهم بجاه العباس ابو فاضل اليعثرهم ان شاءالله . 

دشت لاله وكعدت ساكته .. 

 هدية محزنه و جمارة مغندبة و تبجي ولاله مدوهنة .. اندارت ليهن جسومة : اليعاين عليجن بالعباس عداله عدنا فاتحة شمالجن وجوهجن معبسة ؟ 

هدية : من الخير 

جسومة : انت وجميرة نعرف شنهي علتجن ، لويله انت شمالج مكشخله ؟ 

– عمة انا شفت شوفة ما تسر

– يا ستار ياربي ، شنهي هالشوفة هاي ؟ 

– كبل ايام منجطلة و مامش احد هيسيت خيال احد .. وجنت متاكدة وحيد مر و انت مامش احد منكم بالبيت ، وزاغليت روحي و كلت اتخايل ، لجن اليوم شفت شي انا متأكدة و لهساعة جسمي يتراجف 

– عليش ؟ 

– عمة الضحى خلصيت شغلي وكلت انسدخلي شواي ليما يصير وكت الغدا و خذتني النومه .. وكعدين ولن مرة سودة و عبايتها اعلى راسي وواكفة فوكاي ، ساعة الفزيت و صحت اختفت من عيني . 

جسومة : – دخيلج يالزهرة ، خافنج تتحلمين ولج ؟ 

– لا عمة وعلي ما اتحلم .. انا شفتها موش حلم لجن بساع بساع خفت عن عيني .. لحد يكلي حلم .. انا متاكدة شفت . 

هدية : خافنج عدج تابعة 

– خذتني عمتي كبل اسبوعين للسيد كاللها ما بيها شي بس خل تلوم بصلاتها . 

– وملتزمة ؟ 

– موش كل الاوكات ، ساعات اصلي و ساعات لا ، بس شني قابل بس انا هيج .. و تطلعلي هالشوفات .. حتى خفت ادشن حجرتي ، حيلي كله باد . 

جاي يحجن اندكت الباب ، و صوت نويصر يصيح : هااااااا وينكمممممم 

هدية : لا هله بحسك ، جميرة كومي اندهي امي بساع ياله .. خل تطلع الهم . 

راحت جمارة ندهت امي وكامت ليهم ، حبوبتي ظلت بمجانها ما بيها حيل تكوم .. و انت اتصنت اعليهم . 

كعدت وياهم امي وكامت تشرط اعليهم و هم يكلولها : حالها حالنا ، مامش عزال ، ولا وحدة تفرد غداها . 

حجت امي : شنهي انتم تذلونه بالفرخة  وعلي اروحن للنقطة و اجيبن الامن اعليكم و اوهدنكم ، اكولن خلني كاضة روحي و اكدر الكرابة لجن انتم كلشي ما ينفع وياكم . 

ناصر : هاذ العدنا ووين ما تريدين تطين وجهج ، اطي ،  انت الوديتي يسرى اعلينا خاطر نجي الا احنا ما هاوين الجية ولا هاوين هديوة .. 

كواغد : عساكم لا هويتو ، كومو انتم موش مالت واحد.يحشمكم ، كووووومو . 

كامت وطردتهم من للبيت و انا فرفحيت : يمه وبتي غاد عدهم شلون . 

– جا شنهي يذلونه بالبت ، لج وعلي ما اطلع بت شمخي يو ما خليتهم يجيبونها و يحطونها بيدج . 

لبست عبايتها و طلعت .. و انا ظليت مفرفحة بالبيت ، لحكتها جمارة لبست نعالها وطكتها ركضة وراها 

– يمه يمه 

– انت شجابج وراي 

– عليش ما تكليل لخنيجر يردها 

– و خنيجر شنهي اروحن للامن و هم يجيبونها . 

– يمه خنيجر بطل وعلي يجيبها.  

صدت كواغد : هسه انا رجلي ماموجود و يو رحت للمركز و ندهت الامن اعليهم ، جا غير اصيرن علج بحلوك ال ثجيل و شيخلصني من حجي الوادم . 

دارت و كالت لجمارة : هو خنيجر وين ؟ 

– انا اعرف وينه . 

… 

حميد: سرحان سرحان 

سرحان :- بشر ؟ 

– اجانا خبر زناد بالمستشفى بالولاية 

– صكد ؟ 

– اي وعلي ، توهم خبرونا .

– امشنا نشووووفه 

طلع سرحان للمستشفى ، وصل غاد زناد مسويله عملية و ما ظال بجسمة عظم صاحي ، كوة طلع من الموت ، المستشفى كالت الهم : اخذوه تعدى مرحلة الخطر 

طلعو و رداه سرحان البيت .. 

وزناد حتى حجي ما يكدر يحجي ، رجل مكسورة و ايد مرضوضة ، و فاكد كلى وحدة .. خسرها من جسمه . 

شالوه و جابوه للبيت و هو اخو الميت ..

والزلم تهوبز بالمضيف و تند بالثار و ياهو الطكاه و سلب سيارته .. 

سرحان عرف ياهو المتعرضله .. خلاهم يهودون و طلع . 

….. 

كواغد : شلونك عمة 

خنجر :- هلا ام ستار ، كولي يابه . 

– طالبتك و انا حرمة وزلمتي موش موجود و تولونا . 

– ما عاش اليتولاج ام ستار امري . 

– انا يو اكدر اوهدن اخوتي جا حشميتهم لجن ال ثجيل و انت تعرفهم ما ينحطون بالعب ، وماخذين بت هديوة صارلهم ثلث تيام و اجو فوك جتلتها يتشرطون مامش عزال و ترد للفكر يو ما يطونها البت و يحرمونها من بنيتها . 

– الهم عين بعد السووه بيها و ياخذون البت . 

– ال ثجيل عين صلفة لا تستحي ولا تنرد ، و انا طالبتك . 

– جا انت بس دليني اعلى ثجيل و انا ابرد كلبج بيهم من كون مجمر افادي منهم …. امري بالتردينه و يجرالج . 

– انا شلون و منين تجيبها ما اعرف ، انا جاية اعليك و كل جارة ما عدي .. و رايدتك تعاوني 

– انت رايدة البت ؟ 

– اي 

– اعتبريها عدج الليلة 

– شلون ؟ 

– الشلون هاي خلي افادي تشيلها ، ولا توهدنين روحج بيها و تتورطين ، امشي و البت الليلة عدكم . 

– اي بعد امك ، اغديلك سبع فدوات ، انا اروحن 

– روحي و طمني اخيتنا هدوة و كليلها اخيج خنجر يكول خل تستراح و ابنيتج الليلة ما تبات الا بحضنج . 

مشت كواغد وردت لبيتها ، و خنجر طلع للجول ، كرب من جماعة الشقاوجية و صاح : حيوووو الربع 

– حيهم حيهم .. تعال ضكرناك ، ياله كرب . 

– الليلة عدنا شغل موش مالت شرب . 

– خير

– بت حاكم ال ثجيل ماخذين بتها و امها طالبتنا انرد البت الليلة . 

– حاكم ما يطيكك ولا يطيك شوفتك .. عليش نوهدن روحك بسالفته 

– حاكم مالي غرض بيه ، لجن هدوة تعود لخويي سريحان .. و انا كايم بهالسالفة لجله و لجل امها الاجت تنختني . 

– اعلى طاري سرحان ، ابن الحلال بذكره ، صف سيارته . 

دار وجه خنجر و صدك سرحان نزل من سيارته ، حط ايده بجيوبه و دار عنه ، كرب سرحان : هااااا الله يساعدهم . 

– ياهلا بالشيخ ، حياك الله يا هلا 

– شيخيش .. عوينة ابو المشيخة لابو اليريدها . 

– عليش و احنا الصينا المجان الك خاطر تركد بمجان ابوك . 

– يعني انتم ورى دهست زناد و تسليب سيارته 

– افا عيب هالحجي ، جا هكو غيرنا خاطر تكول انتم ، بس من هسه اكللك السيارة ناطرين تنباع خاطر تنكاسم الحصص و انت ما الك حصة . 

– لا محوللين ولا اموهبين. 

– لا بارك الله بيك ، كرب اكعد . 

– ما جاي اكعد جاي انشد عن واحد هد اخيه و ذلف عنه . 

– انا اشهد انت ما تكصد خنجر الواكف جدامك وعود مطيك الاذن الطرشة و هو حتى ……. مفتحه خاطر يسمعك . 

خنجر : بطلو هالكلاوات و المزاغل ، وياله همو نفسكم خاطر نمش . 

سرحان : وين 

– حيدره كله انت مالك غرض 

حيدره : خنيجر يكول مالك غرض سرحان . 

سرحان : دام هيج الحجي خوش ، بس كله زعلك دغش .. انا ما عملت الشينة بحكه كثر ما هو توهدن بحكي ، و يو ناطر منين تبرير ، يحلم ابررله يو احاجيه .. من كون الاخو يفهم اخوه بلا تبرير .. و ان جانه اعلى تالي الوكت يطالبني ابررله غليش عملت هيج ، يصبح موش اخوه وخله يطخ راسه بالحايط . 

دار ظهره و مشى ، التفت خنجر : سرحااااان ؟ 

ابتسم سرحان ووكف ، دار ليه ، حجه خنجر : كرب لا انعل والديك . 

– ردي اعرفنك لا تحشم ميت ولا صاحب 

– امشي لك 

كرب منه و تحاضنو ، حجه خنجر : انا اعرف انت سويت اليطلع بيدك لخاطر لجن الصار موش هين اعليه و بالموت يالة كدرت اتعداه .. 

– لا تحجيلي عن احساس انا عايشة لليوم و محترك بلهيبه. 

– اعلى طاري الاحساس ، انا رايح لبيت ناصر اخذ البت من اهلها و اردنها للعوجة اليهواها دليلك . 

– ياهو الطلب منك تدخل ؟ 

– ام ستار اجت علي و رادتني اجيبن البت حاكم موش هنا و مستغلين غيابه و كاعدين يذلون بيهن وهن مامش احد الهن . 

– و شنهو الراح تسويه ؟ 

– نتلثم و ندش اعليهم .. ناخذ البت 

– اي خاطر يعيبون هدوة و امها و هنه بلا عرس مزوكات .. شنهي نسيت سلطان شيخهم و هاذ ذيب يضيعهن و يضيع الاكبر منهن . 

– خل يفك حلكه سلطان .. و شوف شنسوي بيه 

– لا تستهين بيه ، هو يو عرف انتم ورى السوايات السويتوهن يمحيكم … ازلامه جثيرين و اسلاحه بكدهم .. و انتم جم وحيد مطششين بالجول . 

– و الراي . 

– الراي يمي . 

اعلى وصية سرحان .. طشو خنجر و جماعته .. 

مشى سرحان لبيت ام ستار و دك الباب : ها ام ستار اشلونج 

– هلا يمه هلا بيك 

– اجيت انشد عنكم شنهي ما شنهي ، ابو ستار بالتجنيد اعذريني بعلي ملتهي بفدت زناد و التهيت عنكم . 

– عساك سالم ييمه يحفظك و يحفظ عويلك 

– ام ستار ، هدوة ما ترد لال ثجيل . 

– عوينة ابيهم انا يو ما ماخذين البت افكر اردنها لجن يو تشوفها ينكسر باب كلبك عليها وعلي ، طريح وساد بس تبجي . 

– خنجر اطاني خبر ، خل تصبر الليلة ، و بتها باجر تلكاها ابيتي … تجي تاخذها لجن الاريدنه منج ……

– بيتك شنهو يمه ، فدوتك ما اريدن اشبج لحية بلحية .. 

– مالج غرض .. كليلها بتها تاخذها من عدي … و تنفذون الأكللكم عليه …..