رواية عالم آخر الفصل الرابع 4 بقلم عمرو علي

رواية عالم آخر الفصل الرابع 4 بقلم عمرو علي

رواية عالم آخر البارت الرابع

رواية عالم آخر الجزء الرابع

رواية عالم آخر الحلقة الرابعة

ممكن اكلم هيثم
= انت غبي ، قولتلك هيثم مات
انا اسف ، مع السلامة
” كدا الامر بقا واضح قدامي ، انا معايا كنز ولكن هستفيد منه ازاي ، اللي زعلني ان هيثم هيموت بس دا مش دلوقتي ، لسة بدري قدامه 19 سنة كمان ، خدت التليفون ونزلت الشارع ، وبما اني من النوع اللي بيحب الصور جدا ، كان لازم اتصور سيلفي ، لكن شكلي كان بيطلع غريب في الصورة ، مش شكلي او انا بس كبرت شوية ، وواضح ان كاميرا التليفون هي كمان كنز ، افتكرت اني رجعت التاريخ ل 2040 ، بدأت اصور المحلات والشوارع ، كل حاجة متغيرة ، صورت عم فتحي الراجل الغلبان اللي عنده 60 سنة صاحب الكشك اللي تحت بيتي ، بعد ما صورته ، لقيت ان الكشك مش موجود وموجود مكانه محل تاني خالص ، وعم فتحي برضو مش موجود لانه تقريبا مات ، التليفون دا هيغير حياتي كلها ، رجعت البيت وانا مبسوط ، مين هيصدق اني معايا كنز زي دا ولكن لازم استخدمه صح بس قبل ما استخدمه صح ، لازم ااخد حقي من مديري في الشغل اللي دايما يقلل مني بدون سبب رغم اني ببذل كل جهدي و عشان كدا هو اول واحد هاخد حقي منه ، كان لازم انام عشان اعرف اصحا للشغل ، نمت وصحيت تاني يوم في معادي ، حاسس ان كل حاجة خفيفة ، قبل ما انزل ظبطت التليفون على 2021 ، روحت الشغل ، دخلت و هزرت وضحكت وكأني عندي فرح ، لسة بقعد على مكتبي لمحت حد جاي عليا
ممكن تمضيلي الورقة دي يا مازن
” كانت سلمى ”
= طب اتفضلي الاول

لا معلش عشان المدير عايزها دلوقتي ضروري
= اقعدي وانا هبعت حد يديهاله
ماشي
= تشربي ايه
شكرا مش عايزة
= بصراحة انا لسة مفطرتش ، ايه رأيك نفطر سوا
لا انا فطرت من بدري ، افطر انت بالهنا والشفا
” محاولات لفتح الكلام معاها بأي طريقة ولكنها كلها بتفشل
= أنتي ليه مش معانا ، ليه دايما قاعدة لوحدك
لوحدي افضل ما اكون تقيلة على حد
= ومين قالك انك تقيلة
مش كله هيحب وجودي ، انت ممكن تحب وغيرك لأ
= على فكرة كلنا بنحب وجودك ومشاركتك معانا
حاضر ممكن افكر
= امال أنتي مين صحابك يا سلمى
انا مليش صحاب

= خالص
خالص
= ليه
مش حاسة ان حد شبهي
= مش لازم
ماهو اكيد انا مش هختار اي حد يكون صاحبي وخلاص
= بس مش شرط تكونو متشابهين أوي يعني
انا مش لاقية أي حد يقبلني اصلا يا مازن ، كلهم بيحبو البنت اللي بتتكلم و بتضحك مش ساكتة دايما
= السكوت أصلا من علامات جمال المرأة
بجد
= اه طبعا
جايز
= طب احنا ممكن نكون صحاب
اكيد
” واضح انه يوم ملئ بالانتصارات ، اخيرا هعرف اتكلم معاها براحتي ، قامت وراحت قعدت على مكتبها ، طبعا الموضوع مش هينتهي كدا ، اول ما قعدت على مكتبها ، جالها الشخص السمج اللي اسمه وائل ، بني آدم ميعرفش يعني ايه قبول ومسمعش عنه اساسا ، ورغم دا كله مش بيسيب واحدة في حالها ، و دايما ماشي يعاكس ويضايق في اي واحدة معانا ، سيبته دلوقتي و افتكرت المدير ، طلعت التليفون وظبطته على 2023 وكلمت المدير
الو
= ايوا ، مين حضرتك
” قفلت المكالمة ، و رجعت اظبط التاريخ على 2025 ، كلمته
الو
= ايوا
” صوت انثوي رقيق
ممكن اكلم أستاذ شاكر
= للاسف استاذ شاكر تعبان ومش هيقدر يكلم حد
الف سلامه عليه ، هبقا اكلمه وقت تاني
” اللوكيشن اللي ظهر بعد المكالمة مش هو بيت أستاذ شاكر ، ولو اللي في دماغي صح هتبقا ايامه سودا ، كلمت مراته مدام هناء بنفس التاريخ 2025
ممكن اكلم أستاذ شاكر
= أستاذ شاكر مش موجود والله ، عنده اجتماع في الشركة
اصل اتصلت عليه من شوية وواحدة هي اللي ردت عليا وقالت انه تعبان ونايم ، انا قولت اكيد هو في البيت
= واحدة مين دي وقالتلك ايه بالظبط
من الواضح حضرتك ان جوزك بيخونك ، اه والله بيخونك ، ولو حابة تتأكدي هقولك على عنوانه
= انت كداب وحيوان ، جوزي بيحبني ومستحيل يخوني
براحتك ، انا قولت اقولك عشان ضميري يبقا مرتاح ، عموما هبعتلك عنوانه دلوقتي

” بعت العنوان وقفلت المكالمة ، انتقمت منه وخدت حقي ، لما انتبهت تاني ل سلمى لقيت انها لسة قاعدة مع الشخص السمج دا ، لميت حاجتي ومشيت وانا متعصب ، انا مش هقبل انه ياخدها مني ، دا انا ماصدقت اتكلم معاها كلمتين ، رجعت البيت ومن غير ما اغير هدومي ، قعدت ومسكت التليفون كان لسة التاريخ 2025 ، رجعته شوية 2022، كلمت سلمى ، لكن التليفون مقفول ، حاولت مرة واتنين وتلاتة بس برضو مفيش فايدة ، رجعت التاريخ كام يوم وكلمتها تاني وبرضو مقفول ، رجعت 2021 ، وكان التاريخ كالاتي 8/12/2021 ، كلمتها
الو
= مين معايا
انا مازن يا سلمى
= ايه يا مازن ، انت لحقت تعرف ولا ايه ، طبعا انت مش محتاج عزومة على الفرح
فرح مين
= فرحي انا و وائل ، النهاردة خطوبتي و هنعمل الفرح اخر الشهر
” قفلت المكالمة بسرعة ، النهاردة 1/12 ، يعني فاضل أسبوع ويتخطبو لا مش ممكن يكون دا اللي هيحصل ، يعني ايه ، يعني كل محاولاتي دي ضايعة ، لا امال انا معايا التليفون ليه ، انا لازم اوقف الفرح دا ، لازم ميحصلش اصلا ، كان لازم اغير وجهة نظره عنها ، بدأت ابعتله رسايل و اشككه فيها
• انت متأكد ان سلمى متعرفش حد
• بصراحة انا بشوفها كتير واقفة مع واحد في الشركة وكل الناس واخدة بالها الا انت يا عيني
• تفتكر ممكن تكون غلطت معاه وعايزة تتجوزك عشان تداري على غلطتها
” كنت ببعت رسايل كل يوم من اول يوم 8/12 اللي هو يوم خطوبتهم ، كنت على امل انه يسيبها ، عدا 20 يوم وانا مستمر و كل يوم ببعت رسالة ، لحد ما زهقت ، خلاص سلمى اتخطبت ، مفيش فايدة ، الظاهر انها مش مكتوبالي ، النهاردة 21/12/2021 ، و فرحهم 23/12/2021 ، ظبطت التاريخ على معاد الفرح للمرة الأخيرة اللي هستخدم فيها التليفون لإني بعدها هرميه ، خلاص انا مبقتش محتاجه ، كلمت سلمى موبايلها مقفول ، حاولت كتير وبرضو مفيش نتيجة ، كلمت وائل برضو تليفونه مقفول ، اتصلت ب تليفون البيت بتاع وائل ، ردت عليا واحدة وكان باين انها بتعيط
ممكن اكلم وائل
” عياطها زاد
خير هو في حاجة
= وائل مش موجود
امال هو فين

” مكنتش عارف اسمع او اجمع منها كلمة بسبب صوت عياطها
= وائل اتقبض عليه ، وائل قتل عروسته وقتل واحد تاني
” اتصدمت من اللي سمعته ”
قتل سلمى ، ليه يقتلها ، هي عملتله ايه عشان يقتلها ، ومين التاني دا اللي قتله ، وقتله ليه
= معرفش والله
طب اسمه ايه
= بيقولو اسمه مازن!!
” دلوقتي انا عارض التليفون للبيع ، لو حد عايزه يتواصل معايا بس ارجوك استخدمه صح ، انا قدامي يومين بالظبط قبل ما الاقي مصيري على ايد وائل ، وحاليا انا بجهز كل حاجتي عشان امشي من البيت دا ، تفتكر هقدر اغير القدر!!
” اكتر من رواية بتتأجل بسبب انها مش واخدة حقها ف ببدأ انزل اسكريبتات ، لو لقيت الدعم هنزل رواية قريب ، اشوفكو في حكاية جديدة 💛 ”

• لقراءة جميع فصول الرواية اضغط على ( رواية عالم آخر )