رواية لن أعشق سواك الفصل السابع 7 بقلم منى مرزوق
رواية لن أعشق سواك الفصل السابع 7 بقلم منى مرزوق
رواية لن أعشق سواك البارت السابع
رواية لن أعشق سواك الجزء السابع
رواية لن أعشق سواك الحلقة السابعة
بتحضن نور عمر و كأنها بتضم روحه مش جسمه و في نفس الوقت عمر كان في دنيا تانيه مش قادر يصدق ان نور خلاص رضيت عنه و بقيت بين ايديه وف حضنه و في نفس الوقت حاسس بخوف عليها لكن ده مامنعهوش من انه يحضن نور بقوة مشاعر كل حبيب في الدنيا وفضلوا في حضن بعض حوالي دقيقتين لكن بالنسبه ليهم كأنهم كانوا سنتين قالوا فيهم كل حاجه حلوه من غير كلام قالوها بس بدفى احضانهم و بدقات قلوبهم اللي كانوا كأنهم بيعزفوا مقطوعة حب مش بيدقوا عادي وبعد ما فاقوا من حالة العشق اللي كانت اشبه بغيبوبه بس ب تحيي مش بتموت، بصوا في عيون بعض من غير كلام و بعد ثواني ( تليفون عمر بيرن)
عمر : الو ايوه مع حضرتك يا افندم، ايه؟ السفر بقى يوم الاثنين؟ بس يا افندم انا كنت هكلم حضرتك عشان اعتذر عن السفر لظروف خاصه
نور وهي بتهز راسها بالرفض و بصوت واطي بتقول : لا يا عمر لا
عمر : والله يا افندم ظروف مفاجئة، ايه؟ بس انا… حاضر يا افندم هشوف و هكلم حضرتك ( بيقفل عمر الخط)
نور : ليه يا عمر قولتله كده ماهو السفر اتأجل اهه كام يوم يعني هتكون معايا يوم اول جلسه و بعدها تقدر تسافر لشغلك
عمر : وهي المشكلة اني اكون معاكي في اول جلسه؟ حبيبتي انا مش هسيبك ولا هبعد عنك يوم واحد و لو الشغل هيخليني ابعد ف انا مستعد استقيل منه حالاً
نور : يا عمر بلاش عِند عشان خاطري بلاش تحسسني اني عقبه في حياتك اكتر من كده
عمر : عقبه؟ بلاش بس الكلام الكبير ده عشان انا دلوقتي ولا شايف شغل ولا سفر ولا ناس من اساسه، انا مش شايف غير سعادة الدنيا كلها في بنوته قمر واقفه ادامي
نور بتبتسم و وشها بيحمر و بترد بلغبطه: ربنا يخليك و انا يعني والله انا بس يعني مش عايزه اي حاجه تضر شغلك
عمر بيبتسم و بيرد : يا شيخه شغلي ايه بس ادام الضحكه الحلوه و الخدود اللي احمرت من كلمتين قولتهم، ( بيقرب عمر من نور اكتر و بيهمس في ودنها) اومال لو شفايفي لمست شفايفك هتعملي ايه
نور بتبلع ريقها و بتتحرك بسرعه و هي بتقول : اي انا هطلع اشوف بقى عندي ايه ينفع عشان خطوبة ٱيه يعني
عمر بيضحك و بيرد : ماشي يا ستي من غير ما تجري بس بالراحه متقلقيش مش هجري وراكي،اطلعي انتي شوفي الهدوم وانا هكلمهم في الشركة عشان اشوف مين من اللي معايا في المكتب هيقدر يسافر مكاني
نور : اوكي ماشي
( بتطلع نور الاوضه و بتقفل الباب و بتسند ضهرها عليه و هي بتتنهد) و بتقول : ااااه بحبه يا ربي بحبه، بس لا امسكي نفسك يا نور بلاش تقعي كده بسهوله، اقع بسهوله ؟ يا شيخه اتنيلي ده انتي احتمال تودعي الدنيا كمان شهرين،بس يلا خليني قويه و تقيله شويه بردو
( بيعدي كام يوم و بتتصل مامت عمر عشان تسلم عليهم و بتقوله انها هتيجي و معاها خالته و سمر بنتها عشان يزوروهم في البيت)
عمر : ماشي يا ماما هتنورونا يا حبيبتي في اي وقت، مع السلامه
( بيقفل عمر الخط و بيلاقي نور نازله من فوق)
نور : خير في حاجة ولا ايه؟
عمر : لا دي ماما بتسلم علينا و بتقول انها هتيجي مع خالتي و سمر بنتها يزورونا قريب
نور بعوجة بق: سمر؟
عمر : ايه مالها؟
نور : ولا حاجه بس اصل انا ملاحظه انها واخده عليك بزيادة شويتين
عمر : طبعا يابنتي مش بنت خالتي
نور : متستهبلش يا عمر انت عارف قصدي، ده يوم العزبه كانت جايه ولا كأنها في شهر عسل معاك
عمر : ياستي كتر خيرها اهه ابقى دوقت شوية عسل من اللي انتي مدتينيش حتى لحسه منه
نور بعصبيه : والله؟!
عمر : هههههههههه بهزر معاكي يا ست البنات هو انا في واحده خلقها ربنا تملى عيني غيرك، قوليلي بقى طلعتي فوق كل ده تعملي ايه؟
نور : كنت بجهزلك شنطة السفر
عمر : ده اللي هو ازاي ده؟ انتي قررتيها كده مع نفسك خلاص انك هتسفريني؟
نور : عمر انا عارفه انك لحد دلوقتي لسه بتدور على بديل في الشركه يسافر مكانك و بعدين اهه انا جهزتها من باب الاحتياط في اوضتك عشان لو قررت تسافر
عمر : رغم اني مستحيل ارجع في قراري و اسيبك و اسافر بس تسلم ايدك يا ست البنات، دي احلى شنطة سفر عشان من ايدك يا قمري، تصدقي انا مش هفضي منها الهدوم و هفضل سايبها كده بلمسة ايدك على طول، ده انا احتمال اطلع ٱخد سيلفي مع الشنطه
نور : هههههههههههه طب كفايه كلام و يلا ادخل اغسل ايدك و استعد للغدا؟
عمر : اوعي تقولي، طبختي تاني؟
نور : لا يا سيدي طلبتلنا اكل صيني من المطعم اللي في الشارع اللي ورانا و الاكل زمانه على وصول
عمر : ده ايه الدلع ده كمان اكل صيني، احبك يا بروس لي
( بيعدي الاسبوع و بييجي يوم الخميس ميعاد اول جلسة علاج ل نور)
عمر : جاهزة يا حبيبتي؟
نور بحزن : اه تمام انا جاهزه
عمر : لا مش عايز اشوف الحزن ده على وش القمر، انا معاكي يا حبيبتي مش هسيبك لحظه
نور : ربنا يخليك يا عمر يا رب
عمر : و يخليكي ليا يا قمري، يلا بينا
( بينزل عمر و نور لعربية عمر و بيوصلوا المستشفى و بيدخلوا الاستقبال)
نور : صباح الخير، لو سمحتى انا عندي النهارده ميعاد جلسة كيماوي
الممرضة : ثواني هو اسم حضرتك مدام نور علي صح؟نور : ايوه انا
الممرضة : حضرتك فين من امبارح يا مدام نور ده احنا اتصلنا عليكي كتير و التليفون كان مغلق
نور : اه انا كنت قافله تليفوني فعلا بس.. هو انتو كنتو بتكلموني ليه هو مش ميعاد الجلسه اتحدد النهارده الممرضة : ايوه يا افندم بس حصل ظروف طارئة و الدكتور كان عايز يكلم حضرتك
نور : ظروف طارئة؟ ظروف ايه؟!
الممرضة : حضرتك اتفضلي للدكتور جوه و هو هيفهم حضرتك كل حاجه
( بتدخل الممرضة و معاها نور و عمر اوضة الكشف للدكتور)
الممرضة : مدام نور على يا دكتور
الدكتور : اهلا اتفضلي يا مدام ده احنا دوخنا على حضرتك
عمر بقلق : هو في حاجة يا دكتور؟
الدكتور : هو حضرتك مين؟
عمر : انا جوزها
الدكتور : اه اهلا و سهلا،لا متقلقش هو في اخبار و ان شاء الله تكون بُشرة خير
نور بلهفة : ايه يا دكتور؟ ايه هي الاخبار
الدكتور : احنا اكتشفنا ان جهاز الاشعه عندنا هنا فيه عطل و ان 90% من الاشعه اللي كانت بتتعمل من 6 شهور كل نتايجها كانت غلط
عمر : يعني ايه يا دكتور؟
الدكتور : يعني في احتمال كبير ان اشعة مدام نور غلط و انه بإذن الله ميكنش في عندها كانسر و لا حاجة
عمر بفرحه : بجد والله يا دكتور بتتكلم بجد؟
الدكتور : اه والله و انا بعتذر لكم عن اي قلق حصل بسبب الاشعه و فلوس الاشعه هتوصلكم و انتو خارجين من هنا
عمر : فلوس ايه يا دكتور ده انا مستعد اديك حق الاشعه دي 100 مره عالبُشره الجميله دي،يا راجل ده انا نفسي ابوسك…احم قصدي ابوس حضرتك
الدكتور : هههههههههه ربنا يخليك و يكمل فرحتكم على خير
نور و هي بتعيط من الفرحه : الحمدلله يا رب الحمدلله احمدك و اشكر فضلك يا رب
عمر : طب يا دكتور احنا دلوقتي المفروض عشان نطمن نعمل ايه؟
الدكتور : هتعملوا الاشعه في معهد الاورام و ده طبعا اضمن مكان في البلد و كمان متقلقوش نتيجه الاشعه بتاخدوها بعد 24 ساعه و ياريت تكونوا هناك يوم السبت و انا هكلملكم دكتور ابراهيم اللي هيكون مسئول هناك عشان يساعدكم تخلصوا الاشعه بسرعه
عمر : تمام يا دكتور تماام،ميرسي اوي يا دكتور حقيقي شكرا
الدكتور : عفوا و انا ٱسف مره تانيه عالخطأ اللي حصل
عمر : ٱسف ايه يا راجل ولا يهمك…احم اقصد ولا يهم حضرتك يا دكتور ربنا يخليك
( بيخرج عمر و نور من المستشفى و اول ما بيوصلوا الشارع )
عمر بيصرخ : بحبها يا نااااس بحبهاااا مش قولتلك انتي قمري و بتاعتي و مفيش اي حاجه على وجه الارض و لا حتى مرض هيشاركني فيكي
نور : بسسس اسكت وطي صوتك الناس بتبص علينا
عمر : ما يبصوا انا عايزهم يبصوا يا نااااس بصوا علينا كويس عشان تعرفوا ان نور دي ملكيه خاصه ، ملكي انااااااا بحببببك ( و بيشيل عمر نور في الشارع و بيلف بيها و الناس عماله تبص عليهم بس عمر مكنش حاسس غير بإنه طاير من الفرحه و انه اسعد انسان في الوجود و كأن روحه ردت فيه من جديد )
بيرجع عمر و نور البيت و هما طايرين من الفرحه و حاسين ان ربنا رد فيهم الروح من تاني
عمر : نفسك في ايه يا ست البنات وانا اجيبهولك دلوقتي لحد عندك حالا
نور : اممم هتقدر تجيبلي اللي انا عيزاه؟
عمر : ااه انا عارف السؤال ده ( بيفتح عمر دراعاته) ايه عايزه تروحي احلى مكان في الدنيا؟ انا جاهز و المكان بيرحب بيكي والله
نور : ههههههههههههه لا يا سيدي عايزه حاجه تانيه اسهل
عمر : حاجة ايه يا ستي؟
نور : عيزاك تجيبلي سوشي
عمر : يا الله ايه يا بنتي وجع البطن ده، ما كنتي روحتي احلى مكان في الدنيا اسهل و احسن
نور : ههههههههههه مش قولتلك، مش هتقدر تجيبلي اللي انا عيزاه
عمر : لا يا ستي هجيبلك طبعا، انتي تؤمري يا ست البنات و لو عيزاني اجيبلك الشيف نفسه ييجي يعملك السوشي هنا في البيت معنديش مانع
نور : ههههههههههه، ربنا يخليك، عموما انا عايزه اخلص اكل بسرعه عشان اطلع اجهز هدومي عشان خطوبة ٱيه بكره بإذن الله
عمر : يااااااه ده انا كنت نسيت والله حوار الخطوبة ده، بس اعمل ايه كنت هتجنن و اطمن عليكي يا قمري ، عموماً انا هطلب الاكل عشان نتغدى بسرعه و نجهز لخطوبة المجانين بتوعنا
نور : تمام اوي و كمان هقول لٱيه بكره على مفاجأة الاشعة الغلط دي عشان تبقى فرحتها فرحتين
عمر : والله ما في حد فرحان اددي النهارده في كل الدنيا دي
( بيعدى اليوم و بييجي يوم الخطوبة)
عمر : ايه يا نور هتقضي اليوم كله بتجهزي عندك ف الاوضه؟
نور : انا جهزت خلاص و نازله اهه
( بتنزل نور وهي لابسه فستان سواريه اسود و عامله ميكب خفيف و تسريحة شعر بسيطه، و كان شكلها قمر لدرجه خلت عمر يقف ادامها متسمر)
نور : ايه شكلي كويس؟
عمر : كويس؟! قولي قمر قولي بدر منور، والله العظيم انا خايف عليكي من عيون كل اللي هيشوفوكي
نور : ههههههههههههه يااه ربنا يخليك انا كده هتغر ف نفسي
عمر : وماله، ان مكنتيش انتي تتغري مين هيتغر يا ست البنات، بس عموماً في الخطوبه بلاش تقومي من جنبي عشان انا مش مستعد اقتل حد النهارده لو فكر يقربلك بكلمه او بنظره واحده
نور : ههههههههههههه لا وعلى ايه الطيب احسن، يلا بينا
( بيوصل عمر و نور للنادي اللي فيه الخطوبه)
ٱيه : ايه ده نور حبيبتي وحشتيني، انتي بتعملي ايه هنا؟ ولابسه سواريه ليه هو انتي معزومه على فرح هنا؟
نور : ايه؟ اه ايوه معزومين على فرح واحد صاحب عمر
ٱيه : طب و جايه من دلوقتي ليه ده احنا لسه 3 العصر
نور : ماهو فرح بالنهار ما انتي عارفه الموضه بقى
ٱيه : اه تمام،المهم طب طمنيني عليكي يا حبيبتي، انتي عامله ايه دلوقتي؟
نور : الحمدلله انا روحت اول جلسة علاج كيماوي
ٱيه بحزن : روحتي لوحدك يا نور؟
نور : لا كان معايا عمر
ٱيه : ايه ده انتي قولتيله؟
نور : لا ياستي المستشفى اتصلوا عليا و هو رد و عرف منهم الموضوع
ٱيه : بس الحمدلله انه عرف يا نور عشان انا عارفه وجود عمر جنبك في حاجة زي دي بيمثلك ايه
نور بإبتسامه : لا و لسه هتحمدي ربنا اكتر و اكتر
ٱيه : ليه خير حصل ايه؟
نور : حصل ياستي ان الاشعه طلعت غلط، وان معنديش حاجه الحمدلله
ٱيه بصريخ : ايه؟ بتهزرررري بجد يا نور؟ بجد؟ الحمدلله يا رب الحمدلله انا كنت بدعيلك طول الوقت والله كنت بدعي ربنا يبعد عنك اي شر و الحمدلله ربنا استجاب
نور : الحمدلله يا حبيبتي ربنا يخليكي ليا يا ٱيه و ميحرمنيش منك ابدا ياا رب، المهم قوليلي انتي بتعملي ايه هنا؟
ٱيه : مفيش ياستي مستنية احمد باشا قالي ٱجي هنا عشان عايزني في موضوع و بقالي ساعه اهه مستنيه جنابه يشرف
( فجأة بيظهر صوت احمد) : انا شرفت اهه يا ستي و مش اي تشريفه دي تشريفه متكلفه والله
( بتبص ٱيه وراها بتلاقي احمد لابس بدلة و معاه والده و والدته و والد ٱيه و والدتها)
ٱيه : بسم الله الرحمن الرحيم ايه ده في ايه؟
احمد : فيه اني قررت نخلي خناقاتنا تاخد منحنى جديد يعني تبقى رسميه كده عشان اتنكد نكد يستاهل
ٱيه : انت بتقول ايه و اهلك و اهلي بيعملوا ايه هنا؟
( بينزل احمد على ركبته و بيطلع من جيبه علبة قطيفه و هو بيقول) : طب والله انا ما بنزل النزله دي ولا حتى في الجيم بس يلا كله بثوابه
ٱيه بصدمه وهي ايديها على بوقها: احمد هو انت ..انت بتعمل ايه
( بيفتح احمد العلبه) : تتجوزيني يا ست حلويات؟ قصدي يا ست البنات؟
ٱيه و هي بتضحك و الدموع نازله من عينيها ردت بفرحه : ايوه ايووه
بيقوم احمد و بياخد ٱيه في حضنه و بيلف بيها و بيبص بيلاقي باباها في وشه : احم معلش يا عمي والله بس اللحظة متكملش الا كده
( بيبدأ كل اللي في النادي يصقفوا و الزغاريط بتعلى)
عمر : الف مبروك يا عريس وربنا يتمملكم بخير
احمد: الله يبارك فيك احبيب قلبي بس بذمتك ايه رأيك في المكان و البدله و النزله اللي نزلتها على رجلي دي؟
عمر : ههههههههههههه ياعم انت هتزيط انت بتعمل اعلان عن نفسك؟
احمد : لا بس بذمتك الصرف باين؟
عمر : اه طبعا باين جدا، ابقى اخصم كل ده م المهر
( الناحية التانيه واقفه نور مع ٱيه) : الف مبروك يا قلبي الف مبروك ربنا يسعدكم و يفرحكم يا رب
ٱيه : يا روحي انا تسلميلي يا رب، بس تعالى هنا انتي كنتي عارفه؟
نور : ههههههههههههه صحى النوم عارفه من بدري بس احمد فهمنا ان الخطوبه هتكون مفاجأة و بعدين مش انا اول ما جيت قولتلك اني جايه فرح صاحب عمر يعني مكذبتش عليكي اهه
ٱيه: ههههههههههههه حياتي تسلمولي يا رب، انا بجد حاسه اني اسعد واحده في الدنيا دي كلها يعني اتطمنت عليكي و اتخطبت لاحمد في يوم واحد، انا حاسه اني هيجرالي حاجه من الفرحه
احمد اللي بيظهر فجأة جنب ٱيه : لا يجرالك حاجه ايه ده انا اقتلك فيها بعد كل الصرف و المرمطه دي، بصي من هنا و رايح انا عايز اعيش في سعادة غامره من غير قلق ولا نكد ولا خناقات
ٱيه : نعم.. أؤمرني
احمد : احم يعني لمدة يومين كده بس افرح بالدبله حتى
نور : ههههههههههههه طب ايه يا عريس خلاص كده الفرح خلص نروح؟
احمد : لا خلص مين استهدي بالله ده لسه في بيبسي و جاتوه هينزل دلوقتي وانا هاخد عروسة المولد قصدي عروسة البحر بتاعتي و هنطلع عالخشبه اللي بيسموها بيست دي نرقص slow زي فيلم توايلايت كده
نور : ههههههههههههه ماشي ياعم ده انت مخطط كويس
احمد : فخامة يابنتي بقولك فخااامه
( بياخد احمد ٱيه و بيروحوا للبيست، و عمر بييجي جنب نور)
عمر : الف مبروك
نور : الله يبارك فيك، مبروك ليك انت كمان ماهو صاحبك
عمر : انا مش ببارك عالفرح
نور : اومال على ايه
عمر : ع الضحكه الجميلة اللي رجعت تنور وشك تاني بعد ما وحشتني ايام كتير
نور : ربنا يخليك انا فعلا فرحانه اوي
عمر : و انا اسعد واحد ف الدنيا بفرحتك يا ملاكي، بقولك ايه تيجي نرقص معاهم عال بيست
نور : لا نرقص ايه انت عارف اني مش بعرف ارقص slow
عمر : متخافيش انا هخليكي ترقصيه و تتعلميه بسرعه كمان
( بيطلع عمر و نور عالبيست و بتبص نور ل عمر بقلق و هو بيبتسم و بيحط ايديها على كتافه و بيلف ايديه على وسطها و بيبدأوا الرقص ال slow على اغنية صدقني خلاص بتاعت عمرو دياب )
عمر و هو مركز في عيون نور : عارفه ان انا نفسي يكون عندي قوة خارقه اقدر بيها اخليكي تحسي بقلبي لما ببص ف عينيكي
(نور بتبتسم و بتبص في الارض)
عمر : نفسي اصرخ بعلو صوتي و اقول لكل الناس اني بحبك.. نفسي اقولهم اني مجنون ب حبك .. نفسي اقولهم انك اكسجيني اللي بتنفسه و عايش بيه يا نور
نور : عمر …. انا بحبك
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية لن أعشق سواك)