روايات

رواية على الرف الفصل الثالث 3 بقلم لولو محمد

رواية على الرف الفصل الثالث 3 بقلم لولو محمد

رواية على الرف البارت الثالث

رواية على الرف الجزء الثالث

على الرف
على الرف

رواية على الرف الحلقة الثالثة

مى واقفه مع على
على / انا عندى اخوات بنات و مقدر غضبه من حوار الصور و صدقيني ندمان عليه
مى / هو اوفر اصلا صدقنى ما بيخليهاش تقعد معانا او فى قعده فيها صحابه او تكلم مع اى شاب حتى لو جوه الكليه هو و بس
على / مش وحش و حقه يخاف عليها و انا لو مكانه اكيد هعمل كدا
مى / هتعمل ايه هتحب و ترتبط و هى لما يجيلها عريس شارى تقول لا
على / اكيد لا بس برده الموقف بتاعى اكيد خلاه ياخد فكره غلط عنى و انا فعلا هاخد جنب باقي الرحله و لما نرجع اكيد سوء التفاهم ده هيتحل باذن الله
مى / بالعكس بالعكس على فكره هى مش رفضاك انا اتكلمت معاها هى بس زى ما تقول كدا خام جدا و لو استنيتها تديك اى رد فعل هتضيع على نفسك بنت زى القمر لازم انت اللى تستمر و تحاول تلفت نظرها اكتر و تقرب منها اكتر
على / انا فعلا هعمل ده بس مش هنا
مى / بص انا هعمل معاك جميله عشان انت بجد شاب كويس و تستاهلها و عشان انا عارفه مروان و عارفه انه بيحب ياخد كل حاجه لنفسه حتى لو مش حقه
على / ازاى يعني
مى / بيحب يبقي مركز الكون و الكل حواليه هو كدا هتبقي تفهم و تشوف ده بنفسك كل ما قربت منه المهم انا وقع فى ايدي حاجه كدا هتجبر مروان انه يوافق على جوازك من نهى
على / حاجه ايه دى ؟
…………………….
مروان يدخل يقف على بعد خطوات
مى / الاول لازم تفهم انى مش كدا بس انا مش بعد السنين دى كلها …
مروان / مى
مى تبص لمروان
مروان/ بعد اذنك دقيقه
مى تبص لعلى باصصلها باهتمام و تبص لمروان و تهز راسها
مى / عن اذنك يا على
صمت ثانيه مى تروح تقف مع مروان
مروان / ما كنتش متخيل انك هتاخدى كلامى حرفيا و تجرى عليه
مى / انا زعلانه منك
مروان/ حقك … مى انا عاوز اعتزرلك على حاجتين

 

 

 

مى تبصله باهتمام
مروان / بصي انتى لازم تفهمى اننا اول ما ارتبطنا كنا صغيرين اوى و تفكيرنا مش ناضج
مى تبتسم بسخرية و تبص الناحيه التانيه و ترجع تبصله و هى بتجز
مروان / و دا السبب اللى كان بيخلينا نتخانق كتير الفتره اللى فاتت
مى / ما تقولى احنا لازم نسيب بعض بدل اللف و الدوران ده
مروان / انا ما قولتش كدا
مى / بس هتقول
مروان / احنا مختلفين جدا
مى / ما تقولها و تخلص
مروان/ صدقيني مش ده اللى انا عاوزه انا لو عاوز نسيب بعض كنت سبتك من زمان انا مش بتسلى بيكي
مى / انت مش عارف انت عاوز ايه يا مروان انت عاوز كل حاجه مى و الشله و نهى على البيعه بس لاسف ما حدش بياخد كل حاجه و اختلافنا ده اللى شدك ليا زمان بس انت خدت عليا خلاص ما عدش عندى جديد فزهقت قولت اجرب بقي اللى عارفها
مروان / مش حقيقي
مى / اروح للى بتلبس زى ما انا عايز و بتتكلم زى ما انا عايز عشان اللى كانت بتمشي بدماغها و ليها شخصيه زهقتنى
مروان / نهى ما لهاش دعوه بعلاقتنا
مى / انا ما جبتش سيره نهى على فكره… انت اللى قولت … زى ما كنت بتقول لحد امبارح انها اختك لحد ما اكتشفت انها كبرت و ممكن تطير حليت فى عنيك
مروان / على فكره انتى لسه بتفاجئيني برده … اول مره اعرف انك غبيه انا رافض على عشان مش مناسب
مى / زى ما اكتشفت فى نفس الوقت انى انا كمان مش مناسبه على العموم تمام انا بعفيك من اى احراج تقدر تروحلها
مروان / الغريب انى فى عز عصبيتي هدتنى و خلتنى اجى عشان اصالحك فتقومى انتى ناهيه العلاقه و شيطانى ليها
مى / انت بتضحك على نفسك و لا على مين انت جتلى فعلا بس عشان تنهى بس انت ما كانش عندك الجراه انك تقولها انما انت اللى بايع يا مروان مش انا … عن اذنك
مى تمشي و مروان متابعها مى تعدى من جنب على و ما تبصلوش و تروح تقف تضحك مع صحابها و تمثل انها تمام على يبص لمروان و يروح يقف مع صحابه و مروان لسه واقف لوحده
…………………….
فى بيت ابتسام
ابتسام بتكلم ايات فى التليفون
ابتسام / صغيره ايه انتى هتعومى على عوم مروان و لا ايه
ايات / برده البت لسه قدامها تلت سنين على ما تتخرج
ابتسام / هى يعنى هتدخل بكره ما لسه قرايه فاتحه و خطوبه و ليله دا انا ما جبتش قشايه فى جهازها
ايات / لو على الجهاز محلوله ننزل انا و انتى و هى نجبلها كل حاجه من الابره و الصاروخ
ابتسام / و هى النازله دى بالساهل يا ايه دى محتاجه شئ و شويات
ايات / ربك بيعين و انا كدا كدا كنت شيلالها قرشين لوقت عوزه الفلوس اللى ما كنتيش بترضي تاخديها منى عشان تصرفى عليها عملت دفتر توفير فى البريد و بحط فيه القرشين كل اول شهر زمانهم بقوا مبلغ اهم ينفعوا
ابتسام / المهم دلوقت نسال على الواد ده كويس مروان مش طايقه هناك و شكلهم متخانقين بس لما كلمت البت حسيت انها مرتاحه و مش معترضه ففرحت بس برده قلقانه اصل مروان بيفهم فى الناس اكيد شاف منه حاجه
ايات / الله يرحم اخوكى و لا نسيتي كان بيغير علينا ازاى
ابتسام / و الله لسه قيلاله الكلمه دى فى التليفون النهرده

 

 

 

ايات / على العموم ما تشغليش بالك انا هقول لمحمد يسال عنه و يجيب قراره انتى عارفه ان حبايبه كتير و الف من يحب يخدم
ابتسام / و الله لو تشوفى دخله الراجل عليا هيبه
ايات / ربنا يقدملها اللى فيه الخير و النصيب دى بت غلبانه
ابتسام / هتقطع بيا يا ايه
ابتسام تدمع
ايات / جرا ايه يا بوسه البت لسه ما اتقراش فتحتها و انتى هتعملى مناحه ما تهدى كدا و توحدى الله
ابتسام / لا اله الا الله لا اله الا الله
…………………..
فى اوضه مى
مى ممدده على السرير باصه للسقف و نهى قاعده على السرير التانى بصالها
نهى / بس انتى ما كانش المفروض تتنازلى بالبساطه دى
مى تبصلها
مى / اعيطله يعنى؟؟ ابوس ايده عشان يحبنى .. انا اقدر اخليه هو اللى يجي تحت رجلى و يترجانى بس مش هعمل كدا عارفه ليه
نهى / عشان لسه بتحبيه
مى / لا عشان انا بحب نفسي و لو عملت كدا هخسرها انا مش واحده شمال و لا ربايه شوارع
نهى / انتى انسانه جميله يا مى صدقيني مفيش حد زعلان من اللى حصل قدى
مى / ليه مع انه فى مصلحتك
نهى / انا !! اكيد لا طبعا انتى بتقولى ايه
مى / ايه معقول لسه ما ترجمتيش اللى حصل لحد دلوقت
نهى / مش فاهمه
مى / انتى و مروان
نهى / مالنا
مى / من يوم ما نقلتى مع مروان فى نفس الشقه و هو يوم عن يوم بيتغير … بيبعد عننا و بيقرب منك … اسمك فى كل جمله و كل حكايه … حتى الرحله دى مع انه كان بيحلفلى ان معهوش يطلع طلع معاكى عشان ما قدرش يتخيل نفسه اسبوع بحاله بعيد عنك
نهى / طبيعي انا و مروان طول عمرنا مع بعض دول كانوا بينيمونا فى سرير واحد
مى / و فجاه كبرتى و بدا يجيلك عرسان لا و عريس كويس ما يترفضش
نهى / على فكره مفيش الكلام ده … انا و مروان اخوات و عمر ما صدر منه او منى اى تصرف اننا مش كدا
مى / خلاص تمام
نهى / كنت فكراكى تعرفى مروان كويس مروان مش من النوع اللى بيستنى الحاجه تجيله مروان لو عاوز حاجه هيحارب الدنيا كلها و هياخدها
مى / ما هو بيحارب اهو
نهى / بالله عليكي يا مى بلاش هبل بيحارب مين بس
مى / على مثلا
نهى / على غلط و اى حد مكان مروان كان هيضايق طبعا تصرف مروان منطقى
مى / انه يثور كدا لما يعرف انه بعت ابوه يتقدم منطقى !!
نهى / هو له وجهه نظر
مى / ماشي
نهى / اقسملك ان مروان زى اخويا بالظبط انا حتى ما بلبسش قدامه حجابى
مى ترفع حاجبها
نهى / بقولك كانوا بينيمونا فى سرير واحد يعني اخوات
مى / ماشي … بصي … حكايه بنام فى سرير واحد و بقلع قدامه دى خليها بينا ماشي ما تكرريهاش تانى
نهى / دا الطرحه بس غير كدا صيف شتا بكم
مى تبتسم و تفرد ضهرها تانى
مى / نامى يا نهى نامى ورانا رحله نكملها بكره
نهى / تمام تصبحى على خير
مى تغمض و نهى تفضل تفكر صاحيه
………………….

 

 

 

فى الاوتوبيس
الشباب و البنات رايحين جايين و صوت ضحك و هزار و مروان قاعد جنب نهى ساكتين
نهى / ما لو مضايق اوى كدا روح كلمها و صالحها
مروان / الموضوع خلص يا نهى و انا قايلك من زمان
نهى / امال تفسر بايه انك ساكت على غير العاده و سايب صحابك و لازق جنبى
مروان / عوزانى اقوم عشان ينط مكانى صح
نهى / اخص عليك
مروان / فى حوار مهم عاوز اكلمك فيه بس لما ننزل مصر و ننهى حوار على ده خالص
نهى / حوار ايه
مروان / انا بفكر اتجوز
نهى / و الله كنت عارفه انك بتشتغلنى و الهدوء ده هيطلع وراه مقلب فى الاخر
مروان / بتكلم جد
نهى / طب ما تروح تصالحها بدل ما تطير من ايدك
مروان / انا مش هتجوز مى
نهى / انت سخن يا ابنى ايه الهبل ده
مروان / على فكره انا ما غفلتش حتى فى الرحله دى انا بقالى فتره طويله متغير و مش فاهم مالى امبارح بس فهمت
نهى / مالك بقي
مروان / مش دلوقت لما نرجع
نهى / اشمعن بقي
مروان / عشان فى حاجه لازم اتاكد منها الاول قبل ما اخد اى قرار
نهى تبصله باستغراب
نهى / يعني مى كدا اوفر خلاص بح
مروان / كان المفروض الخطوه دى اخدها من زمان اوى انا غلطت فى حقها جامد فى كل يوم اتاخرت فيه و ربطتها بيا و اتاخرت فى حق نفسي انى ربطها بواحده مش مناسبه
نهى / و اللى انت ناوى تتجوزها دى هتتجوزها صالونات يعنى و لا حد اعرفه ما انت ما شاء الله حبايبك مفيش اكتر منهم
مروان / بس انا ما حبتش غير واحده بس
نهى/ انا اصغر من انى افهم كل الكلكعه دى منين اكتشفت فجاه انك ما حبتش مى فتسيبها و تانى يوم تكتشف انك حبيت واحده تانيه و عاوز تتجوزها ايه ازاى يعني قلبك ده بيشتغل ازاى
مروان / ساعات الواحد ما بيعرفش يفسر مشاعره صح ساعات السكينه بتسرقه ما بيفهمش العلامات بيفسر مشاعره باسامى تانيه لحد ما يجي عليه وقت يا يلحق نفسه يا يضيع
نهى تبص على مى واقفه بتلعب و تضحك
نهى / هو مش انا بحبك و كل حاجه
مروان يبتسم
نهى / بس مش قادره اتعاطف معاك انت ظلمتها
مروان / و ظلمت نفسي اكتر و دلوقت واقف على حرف المنحدر يا اقع يا ربنا يطلع بيحبنى و ما اكونش اتاخرت كتير
نهى / عشان كدا عمرى ما حبيت و لا رضيت احب عشان اللخبطه دى كلها
مروان / ايه ده ايه ده ايه ده هو كان فى مشاريع ما اعرفش عنها حاجه و لا ايه
نهى / كنت عاوزنى اقولك عشان تتجنن زى ما عملت مع مصطفى انا كنت بصد من بره بره
مروان / امال ما صديتيش على ليه … عاجبك ؟
نهى / انت بتقول ايه اولا على ما عملش اى حاجه لا جه قالى بحبك و لا معجب و لا وجهلى اى كلام بالعكس كان محترم جدا
مروان / محترم اه

 

 

 

نهى / و بعدين على اتقدم رسمي لكن
مروان / انتى صدقتى الهبل ده انتى متاكده ان اللى راح ده ابوه فعلا
نهى / مش للدرجادى يا مروان
مروان/ انا ليا نظره فى الناس
نهى / و كنت مبسوط منه اوى و بتشكر فيه و تقول ابن ناس و كلام حلو جدا
مروان / لحد ما صدمنى بحقيقته
نهى تبتسم
نهى / انت بتغير عليا منه مش اكتر … زى بابا الله يرحمه لما كان بيغير على عماتى
مروان / تعرفى تتلهى
نهى / اتلهيت
نهى تحط السماعه فى ودانها و تبص من الشباك مروان يبص على مى يلاقيها بتضحك مع صحابهم يبتسم بحزن
………………….
فى المعبد
على / انا ما رضيتش اتطفل عليكي امبارح خالص خصوصا لما عرفت انك انفصلتى عن مروان
مى / ميرسي … انت عاوز تسال عن كلامنا امبارح صح
على / الحقيقه اه … انا من امبارح بفكر ايه الحاجه اللى ممكن تجبر مروان عليا و الشيطان شغال اخماس فى اسداس
مى / انت بجد شاريها و لا بتتسلى و خلاص
على / لا طبعا شاريها
مى / كنت بتصورها ليه
على / مش عارف حاجه جوايا خلتنى اعمل كدا و صدقيني ندمان جدا على اللى حصل ده تخيلى لولاه كان يمكن علاقتى بيهم ما كانتش بقت بالحساسيه دى
مى / و انا كمان ندمانه انا كمان فى حاجه جوايا خلتنى اخد نفس الصور
على ينتبه
مى / انا و نهى فى اوضه واحده استغليت الفرصه و صورتها
على / ليه
مى / شيطانى غيرتى زعلى سميها زى ما تسميها
على / حد شاف الصور دى
مى / و ما حدش هيشوفها انا مسحتها امبارح بالليل لما نهى نامت دى مش انا و حتى لو جوايا غضب شديد ناحيه مروان و حتى لو ما كنتش ملاك بس انا مش هخسر احترامى لنفسي عشان خاطر اى حد
على / امممم … انا سعيد و حزين فى نفس الوقت
مى / لو ما كانش ربنا بعت مروان امبارح كان زمانى بعتهالك ويمكن ساعتها تطلع واطى و
على / تروحى السجن
مى تبصله باستغراب
على / بغض النظر انها جريمه اخلاقيه دى جريمه بيعاقب عليها القانون و الحمد لله انك فوقتى لنفسك قبل ما الشيطان يعميكي زى غيرك و تفضحى نفسك و تفضحى واحده ما لهاش اى ذنب غير ان اخوها انفصل عنك اى كانت الاسباب
مى / هى الاسباب مروان مش رافضك عشان انت صورتها مروان رافضك عشان هو طمعان فى نهى لنفسه
على يبص الناحيه التانيه و يرجع يبصلها
مى / مروان متغير من زمان و كل ما يقرب من نهى اكتر يبعد عنى اكتر و امبارح لما انت اتقدمت سابنى عشان انا اللى كنت واقفه بينهم
على / على فكره كل ده ممكن يكون مجرد اوهام فى دماغك
مى / ممكن المهم انى ما عدتش اقدر اساعدك
على / الحمد لله قدر و لطف
مى تبتسم و تشاورله و تمشي و على متابعها
……………………..

 

 

 

فى شقه نهى فى مصر
مروان / و مين اللى قال لجوز خالتى يسال عنه
ابتسام / انا
مروان/ و ليه بقي ان شاء الله
ابتسام / الله امال لما يكلمنى تانى اقوله ايه
مروان / يا ماما نهى صغيره ايه ما هنصدق نرميها لاول عريس كدا
ابتسام / على العموم على و اهله جايين النهرده نتعرف عليهم و نشوف يستاهل و لا لا
مروان / و كان ما ليش اى راى فى الموضوع مش كدا
ابتسام / يا حبيبي الولد ما يتعيبش و شارى و ادينى هقعد معاه النهرده و احكم بنفسي انا و خالتك و جوزها يعني مش هنرميها
مروان / و انتى لما تلزقيها لاول واحد يتقدم تبقي مش بترميها
ابتسام / لا يا حبيبي على مش اول عريس يجي لاختك البت ما شاء الله عليها جمال و ربايه و خطابها من سنتين بيتقدموا و انا اللى برفض من بره بره عشان صغيره
مروان / و فجاه كبرت مش كدا
ابتسام / لا ما كبرتش بس اللى متقدم مناسب فرق السن مش كبير و جاهز و شارى و بعدين الراى فى الاول و الاخر ليها
مروان / و هى بقي موافقه سالتيها و قالت موافقه
ابتسام/ ما رفضتش زى اللى قبله
مروان/ تمام
مروان يدخل اوضه نهى قاعده بتزاكر يفتح الباب من غير ما يخبط
مروان / قاعده انتى هنا و لا على بالك و الدنيا تولع بره صح
نهى / كان ممكن اكون بغير
مروان / طظ انتى موافقه على الجدع ده
نهى / لا وافقت و لا رفضت لسه هقعد معاه و اشوف
مروان / تشوفى ايه ما انتى قعادك معاه اصلا يعتبر موافقه
نهى / نوعا ما مرتحاله مش هقول لا
مروان يروح يقعد قدامها
مروان / يعنى ايه مرتحاله دى
نهى / ما اعرفش ما اتقفلتش منه زى غيره يعني حاسه ان ممكن يكون فى نصيب
مروان / و انا ليه ما اعرفش حاجه عن غيره عايش معاكوا طيشه مثلا
نهى / لا مش طيشه بس انت برده ليك دنيتك مش كل صغيره و كبيره هنوقف عندها يعني
مروان / لا نقف … اى حاجه تخصك نقف عندها
نهى / بغض النظر عن موقف التصوير انت ايه اللى مش عاجبك فى على
مروان / كلو على بعضه مش عاجبنى ملزق كدا و مفتعل و مستشيخ النوع ده ما ينفعناش
نهى / هو انا مش شايفه حاجه من اللى انت بتقول عليها بس … هو ايه النوع اللى ينفعنى
مروان / حد يحبك من غير شروط حد شاريكي و مستعد يعمل اى حاجه عشانك و عشان سعادتك حد بيخاف عليكي اكتر من نفسه يستخسر فى نفسه و ما يستخسرش فيكي حد تعب عشانك و عارف قيمتك مش واحد كدا جاى من الشارع ابوه جابله كل حاجه على الجاهز يجي كدا ياخدك و يبهدلك
نهى / مش هيقدر يبهدلنى … ما حدش هيقدر يبهدلنى … انت هتقفله
مروان يبص الناحيه التانيه و هو بيهز رجله بعصبيه
نهى / انا مش همشي بكره مش هتجوزه بكره فى فتره خطوبه ندرس بعض فيها و انا صليت استخاره و مرتاحه
مروان / انتى بس عندك شويه هرمونات مش فهماهم
نهى / ههههههههه و انت بقي فاهم هرموناتى اكتر منى
مروان/ نهى انتى جميله سيبك من الهبل اللى كنت بغيظك بيه انا كنت بهزر انتى قمر و الف من يتمناكى انتى تستاهلى احسن حاجه فى الدنيا
نهى / ربنا يخليك ليا

 

 

 

 

مروان/ ما تاخديش اول واحد يتقدملك صدقيني لو رفضتيه هيجي الاحسن منه … هيجي … وعد
نهى / انت ليه كارهه اوى كدا
مروان/ عشان مش ده اللى يستاهلك يعرفك منين هو هو الجواز لعبه واحد شاف واحده مره بعت ابوه يخطبها ما اتعلمتيش حاجه من علاقتى بمى الارتباط فى السن ده علاقه اكيد هتفشل لا عقليتك كامله و لا شخصيتك نضجت اللى هيعجبك النهرده مش هيعجبك بكره
نهى / هنا بقي يجي دور الرضا انا اخترت حاجه عجبتنى ارضي و احمد ربنا و احافظ عليها انما طول ما انا عايشه ان الاحتمالات مفتوحه عمرى ما هلاقى اللى يملا عيني
مروان / دا مش معناه انى اقبل باى حاجه و ارضي و خلاص احنا بنتكلم فى علاقه بتعيش العمر كله يبقي نختارها صح
نهى / هو انا اخترتك ؟ اخترت بابا الله يرحمه امى ؟ عمتى اهلى اخترت اسمى او شكلى ما كل دى علاقات بتعيش العمر كله و ما اخترناهاش
مروان/ اهو الكلام ده اكبر دليل انك مش جاهزه الجواز لانك بتقارنى بين علاقه دايمه مفيش شئ فى الكون يقدر يكسرها الا الموت و بين علاقه سهل تطلقى و تنهيها فى يوم و ليله
نهى / ايوه بس اساس العلاقه انها تعيش العمر كله ما بتجوزش و انا ناويه اطلق يعني
مروان / يعني على ده اللى ناويه تعيشي معاه العمر كله ؟ تعرفى عنه ايه
نهى / مرتحاله لما شوفته سايب الرحله باللى فيها بكل حاجه و واخد جنب لوحده بيصلى فى كل مره كان بيسيبنا فيها و يجرى يصلى
مروان / دا بيعمل كدا عشان يلفت الانتباه بصوا اللى بيصلى اهو
نهى / لما بدا الصلاه فى القطر ما كانش يعرف انه هيتشاف
مروان / انتى بتدافعى عنه ليه
نهى / و انت بتهاجمه ليه شوفت منه ايه موقف التصوير اعترف و اعتزر دا فى حد ذاته يكبره فى نظرى
مروان / دا انتى واخده قرارك بقي
نهى / اكيد لا بس مرتحاله و الا ما كنتش وافقت على المقابله
مروان / و انا مش مرتاحله هتتجوزيه و انا مش موافق
نهى تبصله بحزن
نهى / لا يا مروان لو انت مش موافق انا هرفض بس برده دا مش معناه انى هوافق على اللى يعجبك
جرس الباب يضرب
نهى / دى اكيد عمتى … بص عدى اليوم و لما يمشوا خلينا نقعد و نتكلم تانى يمكن تغير رايك
مروان / انا مش بتحكم فيكي انا خايف عليكي
نهى / عارفه و واثقه فيك انا ما ليش اخوات غيرك… اطلع بره بقي خليني اغير هدومى اديني لا زاكرت و لا لبست و لا عملت اى حاجه بسببك
مروان يبصلها بحزن تقوم و تزقه بره
نهى / بره بقي بره انت لزقت بره
مروان يطلع بره
نهى / مش هيحصل غير اللى انت عاوزه و مش هوافق غير لما انت توافق فاهدى بقي .. عن اذنك
نهى تقفل الباب بالمفتاح ست تدخل
ايات / ازيك يا مارو امال العروسه فين
مروان / ازيك يا خالتى …بتلبس جوه
ايات / عمك سال على الواد و طلع بلسم ان كان هو و لا اهله ربنا يتملها على خير … انت هتقابل الناس كدا … لا دا انت لازم تلبس و تتانتك و تشرف اختك قدام نسايبها يقولوا ايه
مروان / حاضر يا خالتى عن اذنك هدخل اغير
مروان يروح اوضته و ايات تخبط على نهى
ايات / افتحى يا نونو خلينى اساعدك
نهى تفتح الباب ايات تاخدها فى حضنها
………………….
فى البلكونة عند نهى
نهى و على واقفين لوحدهم و الكل قاعدين جوه بيضحكوا الا مروان مش مبسوط من اللى بيحصل
نهى / على كدا بتلعب حلو
على / مش زى زمان بصراحه الكليه و المشاريع و الشغل كل الحاجات دى بتاخد من وقتى ما عدتش بتمرن خالص بس يعني كل فتره بروح انا و صحابى ناجر ملعب و نفك عن نفسنا ساعتين كدا و نرجع للفحته تانى سيبك منى بقي خلينا فيكي انتى … انا كمان عاوز اعرفك اكتر
نهى / عاوز تعرف ايه
على / بتحبى ايه بتكرهى ايه ايه هواياتك ايه الحاجات اللى بتعصبك يعني الحاجات دى
نهى / انا بصراحه عمرى ما لعبت رياضه عكس مروان لا كان ديما يروح جيم من و هو صغير بس تمرين لا ما كانش لا انا و لا هو انا ما اعرفش انت عارف و لا لا بس انا ماما اتوفت و انا نونو و بابا و جوز عمتى كان مغترب فبابا الله يرحمه هو و عمتى كانوا شبه عايشين سوا يربونا ما كانش فى وقت خالص حد يودى و يجيب كدا بس الشهاده لله ما قصروش فى حقنا فى حاجه بحب الاغنيه اكتر من المغنى يعني مليش مغنى مفضل او نوع مزيكا مفضل بس ممكن اقولك ليا كام اغنيه كدا اه بحبهم عارف جو من بكل بستان زهره ده
على / عارفه

 

 

 

نهى / امممم ما اعتقدش انى بكره حاجه بس ممكن اقول انى بتعصب من صوت الاكل و خصوصا شفط الشاى السخن عارف انت الصوت ده مزعج جدا بالنسبالى
على / ههههههههههههه احم اتمنى ان الصوت ده ما ياثرش على علاقتنا فى المستقبل
نهى / انت بتعمله
على / الصراحه بابا ديما بيعمله انا ساعات مش ديما بس خلينا نبدا على نور يعني عشان ما ابقاش بغشك هو مبدا لا اكذب و لكنى اتجمل بيبقي حلو اوى فى المواقف اللى زى دى بس اعتقد اننا عدينا المرحله دى خلاص
نهى / مرحله ايه ؟
على / مرحله ان كل واحد يحاول يلفت نظر التانى
نهى / امال احنا فى مرحله ايه دلوقت
على / فى مرحله اننا نتاكد من مشاعرنا و عشان قرارنا يكون صح لازم نكون صرحا مع نفسنا
نهى / مش فاهمه
على / احم … يعني انا المفروض انى اطلع احسن ما عندى عشان اضمن انك توافقى بعد كدا بقي الصراحه مطلوبه
نهى / معنى اننا فى مرحله الصراحه انك متاكد انى وافقت انا لسه ما اخدتش قرار على فكره
على / اسميه ايه ده بقي ان شاء الله ما حدش قالك ان الكدب حرام
نهى / لا مش بكدب انا فعلا لسه ما اخدتش قرار
على / هو بغض النظر ان جبر الخواطر على الله و انك كسرتى خاطرى جامد اوى دلوقت بس خلينا بمقارنه بسيطه بين طريقتك فى الكلام معايا طول الرحله من اول الباص مرتين لحد ما روحنا … الكلمه على القد عينك نادرا ما تيجي فى عيني و بين ضحكتك دلوقت و لمعه عينيكي
نهى / مفيش الكلام ده و مش معنى انى بديك فرصه انى خلاص اخدت قرارى
على / اااااه طيب
نهى / طيب ايه ؟
على / ما فيش هتتقلى هتقل عادى يعني خلينا نضيع وقت
نهى / هو انت كدا مع كل الناس
على / مع كل الرجاله اه مع كل البنات لا
نهى / و اشمعن انا بقي
على / السؤال ده كنت متوقع يجي بدرى و كنت لسه بحمد ربنا انك نسيتيه اصلى سالته لنفسي طول الرحله ما لقيتلوش اجابه غير انه النصيب
نهى / للدرجادى ما فييش ميزه
على / لا لا ما فيناش من نكد دا احنا لسه فى حلاوه البدايات
نهى / انت مش قولت عدينا مرحله لا اكذب و لكنى اتجمل و نتعامل بصراحه
على / مش قولتى لسه ما وافقتيش
نهى تبص الناحيه التانيه
نهى / انا ما بحبش نوعيتك دى
على / انهى نوعيه
نهى / نرجع ليا
على / نرجع ليكى نرجع من الاول خالص انا كنت تقريبا من اول الناس اللى وصلت الباص حطيت شنطتى و روحت اقف عند نصبه الشاى افوق كدا لقيتك داخله مع مروان لفتى انتباهى و يعنى ما انكرش فى الاول قولت يمكن و ما يمكنش و بعدين شوفته واقف مع مى و يا بيبي و يا قلبي و الكلام الحلو ده قولت الله ما هى سالكه اهى اتشجع ياض و خش كلمها و الشهاده لله محسوبك فى الحوارات دى … احم خيبه
نهى تضحك
على / دخلت الباص لقيت الكرسي اللى جنبك فاضي قولت و ما نيل المطالب بالتمنى روح بقي و الحمد لله لسه هقعد
نهى / قولتلك محجوز
على / قولت تمام ما ليش نصيب بس عيني ما اتشالتش من على الكرسي و فضلت استنى لحد ما فضى تانى و جريت قعدت قبل ما حد ياخده … و طبعا زى ما شوفتى لا عرفت افتح كلام و لا ايه حاجه صوت صرصور الحقل طول الطريق
نهى / و فى القطر
على / دا النصيب … كنت متاكد اننا هنتقابل تانى لما نوصل كنت اكيد هدور عليكي بس لما خلصت صلاه و رفعت عيني و شوفتك فرحت اوى بس برده ما عرفتش افتح كلام بس ربنا يباركله مروان بقي شجعنى لما فتح معايا الكلام و استغليت الفرصه و جيت الترابيزه عشان تبقي معايا فى المتحف يمكن الاقى فرصه اكلمك بس برده ما عرفتش اتكلم هاجى اقولك ايه
نهى / فصورتنى من بعيد

 

 

 

على / مش فخور بيها و كنت مضايق جدا عشان كدا جيت قولتلك
نهى / بس الشخصيه الخجوله دى ما كانتش باينه عليك
على / ما انا مش خجول فى العاده و لا هادى بالعكس … بس مش عارف بقي وقتها كل ما كنت اقرب منك يحصل براين ستورم فى عقلى و الكلام يدخل فى بعضه و اتلجلج فاسكت
نهى / و ايه اللى فك عقده لسانك دلوقت
على / هو اكل و لا بحلقه ما تحمدى ربنا
نهى / ههههههههههههه الحمد لله يا سيدي احنا هننهي الف حمد و شكر ليك يا رب
على / لا بعد الضحكه دى موافقه بقي ان شاء الله
نهى / انا مش رافضه بس الراى الاول لاهلى
على / و باهلك دى تقصدى مروان صح
نهى / مروان اخويا الوحيد و اللى حصل بينكوا مضايقه هو حاسس انك استغليته و خدته كوبرى عشان توصلى و انت دلوقت اعترفت ان معاه حق … مروان بالنسبالى مكان ابويا الله يرحمه صدقنى مروان من احسن الشباب اللى ممكن تتعامل معاهم انسان جدع و راجل و حنين انا ما اقدرش ازعله
على / حتى لو وقف فى طريق سعادتك
نهى / عمره ما عملها بالعكس مروان طول عمره بيبقيني على نفسه كان ممكن يلغى خروجه بيتربلها كتير عشان انا طلبت حاجه او احتجت حاجه مروان عمره ما بخل عليا و لا زعلنى بالعكس
على / انا بقول ندخل نتكلم مع الكبار بقي شويه
نهى / تمام
نهى و على يدخلوا و نهى مكسوفه
مروان / ما بدرى
ايات / هههههههههه الله يا مروان مش يتعرفوا على بعض
محمود / من دخلتكوا دى اقول نقرا الفاتحه
مروان / انا اسف بس مش لسه بدرى على الحوار ده
ايات / بدرى من عمرك يا مروان ايه الكلام ده
والده على / احنا نقرا الفاتحه و الاتفاقات دى بقي تبقي بينا و بين بعض و بعدين الواد شارى يعني مش هنختلف
محمد / و احنا بنشترى راجل احنا عمر الماديات ما فرقت معانا
مروان / هى ما تفرقش بس دا حقها اقعدى يا نهى
نهى و على يقعدوا
على / حقها يا مروان و ما حدش اعترض و اللى هتقولوا عليه موافقين
محمود / انا الحمد لله مجوز اربع بنات و زى ما عملت مع بناتى هعمل مع نهى و اكتر
والده على / طبعا ما هى بقت بنتنا الخامسه مش كدا يا عروسه
نهى تبتسم

 

 

 

 

على / انا محوش حوالى خمسه و عشرين الف اعتقد هيبقوا كويسين للشبكه مش هنتكلم فيها
محمد / الشبكه كدا كدا هديه العريس مش هنتكلام فيها
مروان / لا معلش يا عمى هنتكلم خمسه و عشرين ايه انت لو ماجر عربيه استعمال هتدفع اكتر من كدا
محمود / احنا كدا كدا هنزود برده يا مروان يا ابنى
على / انا اسف يا جماعه بس انا الحقيقه مش متعود اخد مصروف او ان حد يساعدنى و ما اعتقدش ان عيب ان انا و هى نبدا حياتنا على قدنا و نبنيها سوا
مروان / برافو حقيقي برافو بس حضرتك يعني هتاخدها من بيت عندها فيه كل حاجه عشان تعيشها فى بيت على قدك تضحى بصحتها و شبابها تبنيهولك و فى الاخر تسيبها و تروح لغيرها صح ما اللى بيجي بالرخيص بيروح رخيص برده يا هندسه
الكل محرج و بيبص لبعضه
على / ولاد الاصول ما بيعملوش كدا يا مروان
مروان يقوم يقف
مروان / ولاد الاصول ما بيصوروش بنات الناس و يستغلوا صحابهم يا باشمهندس … انا اسف انا مش موافق على اللى بيحصل ده عن اذنكوا
مروان يمشي و يرزع باب الشقه وراه و نهى عينها عليه و الكل محرج
ابتسام / انا اسفه اوى يا جماعه هو مروان كدا طبعه حامى بس و الله حنين ما حدش ياخد على كلامه
على / انا فعلا غلطت بس والله الموضوع مش زى ما هو فاكر خالص
نهى / عن اذنكوا اعمل شاى
نهى تجرى على جوه و هى بتعيط من غير ما حد من اللى قاعدين ياخد باله

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية على الرف)

‫4 تعليقات

اترك رد