رواية 30 يوم حياة 2 الفصل الثاني 2 بقلم أميرة أسامة

رواية 30 يوم حياة 2 الفصل الثاني 2 بقلم أميرة أسامة

رواية 30 يوم حياة 2 البارت الثاني

رواية 30 يوم حياة 2 الجزء الثاني

رواية 30 يوم حياة 2 الحلقة الثانية

وصل عامر السيده اخيرا
زين.كان واقف جوه معاهم والفرح كان شغال الكل فرحان وبيرقص
رن تليفون زين
زين…وهو بيبعد شويه عن الدوشه…الوووو
عامر…ايه ياصاحبي انا وصلت
زين…طيب تعالي من الشارع اللي ورا عشان محدش يشوفك وانا هجيلك اهو ومعايا عمر عشان لو معاك شنطه ولا حاجه ياخدها منك
عامر…انا معايا شنطتين
زين…متقلقش هو هيعرف وهخليه يوديهم جمب مديحه وشويه ونبقي نطلعهم
عامر…طيب انا لفيت الشارع اللي ورا يلا انجز وحشتني ياض
زين…وانت كمان يا واطي
عامر…بقولك ايه منار واقفه
بص من بعيد زين عليها لقاها بصاله ومتبعاه
زين…اه واقفه ادامي هناك اهي
عامر…طيب تمام يلا انا ورا مستنيك متنساش المايك هاا
زين….ماشي
مشي زين وخد معاه عمر ومنار واقفه مراقبه تصرفات زين وقلبها حس ان عامر جه مشيت في هدوء تام من غير ما أي حد يحس بيها
وقفتها وعد…راحه فين يامنار
منار ..بارتباك انا انا
وعد..في ايه مالك

 

 

 

منار…معرفش بس حاسه ان عامر جه يا وعد ولازم اطلع
وعد…فين ده
منار…معرفش بس احساسي خليني اطلع بس لو مجاش هنزل تاني
وعد…بوسي وشهد هيزعلوا
منار…بأبتسامه لا متقلقيش هما بيرقصوا مش معانا اصلا
وعد…بحزن اللي يريحك يا منار بس قبل ما تمشي عايزه اقولك حاجه الهروب مش حل يا منار هيجي وقت وهتتقابلوا انتي ناسيه ان فرح عادل اخوكي قرب وفرح منه ورحاب اكيد بردو مش هتسبيهم
منار….خلينا فالوقت ياوعد يلا انا لازم اطلع
وعد…ماشي ياحبيبتي
منار مشيت بسرعه قبل ما اي حد تاني ياخد باله طلعت شقتهم وقفلت الباب وهي بتحط ايدها علي قلبها وجريت بسرعه عالشباك فتحته فتحه بسيطه تشوف منه.
…….
زين وهو بيحضن عامر وحشتني يا واطي
عامر…حضنه جامد انت اكتر والله يازين عامل ايه
زين…الحمد لله ايه الحلاوه دي ياض
عامر…دي اقل حاجه عندي🤨
ضربه زين علي راسه اتنيل هتتغر من اولها يامعفن
عامرحط ايده علي راسه بوجع ااااه يخربيت ايدك مرزبه
ازيك ياض ياعمر
عمر…الحمد لله يا عم عامر حمدالله عالسلامه
عامر…الله يسلمك ياعمر هتعرف تودي الشنطتين دول
عمر…اه هقدر
زين…انا هدخلهم الشقه عندنا مؤقتا ماشي
عامر…طيب اشطا
زين…امسك المايك ده واوعي تفتحه الوقت متوديناش في داهيه
عامر..ادخل امته طيب
زين…استني هدخل الشنط انا وعمر بسرعه وهروح اقول للواد بتاع الدي چي
وهديك تليفون تفتح المايك علي طول بس بقولك ايه
عامر…ايه
زين…اقفلك بقي في حته علي جنب كده فالمداري عشان لو حد قفشك هيجري يقولهم والمفاجأة تبوظ
عامر…متقلقش هقف هناك كده
زين…الله يحرقك كان مالي انا ومال المفجآت دي

 

 

 

عامر…ياض صاحبك بقي نجم كبير بزمتك ينفع يدخل اي داخله😉😉
زين…بضحك وحشتني ياواطي😂
عامر…يلا انجز بقي
دخل زين هو وعمر بسرعه بالشنط طلعها فوق قبل ما اي حد يلاحظه غير منار اللي كانت شيفاه ماسك شنط عامر وأتأكدت انه جه وعاملها مفجأه وحمدت ربنا أنها طلعت عشان لو كانت فضلت مكنتش هتقدر تجيب عينها في عينه ولا هتقدر تخبي شوق عينها اللي كانت هتفضحها…فضل قلبها يدق بسرعه فظيعه وهي حاطه ايدها عليه وفاتحه الشباك بسيط عشان تلمحه..
نزل ادام عينها زين ومشي ناحيه المسرح وطلع لبتاع الدي چي قاله حاجه وبعدها مسك موبايله أتكلم ثانيتين وقفل وفضلت عينه عالمكان اللي جه منه
وفجأه الصوت بتاع الاغاني سكت..
واول ما سمعت أهاااااته خارجه فالمايك دموعها نزلت
عامر….اااااااه اااااه ااااه
الكل استغرب وفضلو يبصوا لبعض.
شهد حطت ايدها علي قلبها
ده صوت عامر🥺
عامر….الفرحه اللي انا حاسس بيها لا انا قادر أقولها ولا أحكيها أختي حبيبتي وضي عيوني لعريسها بأيدي هاوديها من يوم ما وعينا علي الدنيا ما فرقناش بعضنا لو ثانيه علي عيني أنك تبعدي عني دمعتي مش قادر أخبيها
لحد ما ظهر أدامهم عامر جاي من بعيد
صرخت شهد ونزلت بسرعه جريت عليه وجريوا عليه صحابه كلهم..
وكل الشباب فضلوا ينادوا عليه ويلقبوه بفخر وحب يا نجم يا فنان
فضل عامر يحضن في شهد ويطبط عليها وهي بتعيط ويسلم علي صحابه
وكمل غنا وهو واخد شهد في حضنه..

 

 

 

عامر…وأوعي تنسي انا حضنك سرك اخوكي سندك ضهرك وأوعي تخافي من اي حاجه وهجبلك حقك لو ضايقك..ويص لصالح بتحزير🤨🤨
وكمل بضحك لحد ما خلص الاغنيه خد شهد في حضنه وسط تصفير الجميع وتصقيفهم حضن ايهاب وخد والده في حضنه ورجع تاني لصحابه يسلم عليهم ويحضنهم بحب وسلم علي كل الناس وهو بيدور بعينه علي منار
منار كانت شيفاه ومتأثره بموقفه مع شهد ودموعها نازله وحشها اوي ومش قادره تمنع قلبها من حبها ليه
طلع عامر عالمسرح
عامر…فالمايك انا مش عارف اقول ايه اولا انا بعتذر عن تأخيري كان نفسي والله أكون معاكم من بدري بس مقدرتش اجي غير الوقت وحشتوني كلكم بجد عايز ابارك لاخواتي واصحابي وسندي صالح ولاحه أرجل رجاله فيكي يا سيده زينب
صاح الكل وهما بيحيوهم
عامر…وعايز ابارك لشهد اختي وحبيبتي وصحبتي انا مش مرتب كلام والله بس انا مبسوط اوي وفرحان عشانهم من قلبي والاهم من كل ده فرحان اني في وسط اهلي وصحابي ومكاني ويلا بقي نولع الدنيا
فضل يغني عامر وطلع ايهاب غني معاه ومعاه الشباب كلها واتقلب الشارع في ثانيه لمهرجان حقيقي وبالرغم من ان الكل كان بيرقص ومش أعدين في مكانهم قبل عامر ما يوصل إلا انه كعادته حضوره طغي عالمكان وكان سبب في ألابتسامه العريضه اللي كانت مرسومه علي وش كل واحد كان موجود فالفرح رقص عامر وغني معاهم والكل كان مبسوط وبعد وقت نزل من عالمسرح يرتاح شويه
زين…وحشتني يا عامر
عامر….انتوا وحشتوني اكتر
يوسف…كنت مفتقدك اللي يخربيت عقلك
عامر….والله وانا ياچو فين روحيه صحيح
يوسف…تعالي اعده هناك اهي

 

 

 

راح معاهم عامر وشاف روحيه
عامر…ياروحيييييه وحشتيني
روحيه….انت مين ياولا
عامر…قرب منها وحضنها انا عامر ياروحيه وحشتيني والله
روحيه…ازيك ياواد ياعامر انت وحشتني اوي
راح عامر علي فاطمه باس راسها وايدها
خدته فاطمه في حضنها اوي وكأنها بتشم فيه ريحه كريم
فاطمه….وحشتني ياعامر
عامر…انتي اكتر يا بطوط عامله ايه
فاطمه…الحمد لله يا حبيبي مبسوطه اني شوفتك بخير الشارع من غيرك كان ملوش طعم
عامر…اديني ياستي رجعتلك اهو واعد علي قلبكم
فاطمه…يارب ديما اعد وسطنا بدعيلك من قلبي ياعامر
عامر…عارف يابطوط عشان كده ربنا كارمني
فاطمه….ولسه ياواد هيكرمك اكتر انا حلمالك كذا حلم احلي من بعض
عامر…متبطليش تدعيلي يابطوط والنبي
فاطمه…دعيالك من قلبي ياعامر تحقق حلمك ويقرب منك كل حاجه بتتمناها وهدعيلك قريب فالكعبه
عامر….ايووووه ركزي عالدعوه دي والنبي
ابتسمت فاطمه وفهمت قصده وكملت بحب متقلقش ربنا مش بيعمل حاجه وحشه واكيد ليه حكمه في كل حاجه. بتحصل حوالينا
عامر…ابتسم بحزن عارف المهم انتي مسافره ولا ايه

 

 

 

فاطمه….اه ان شاء الله اخر الشهر ده راحه عمره انا وحاج سعيد وست مديحه وست نعمه وحاج فاروق وابوك قال انه ممكن يجي معانا لو ورقه خلص وجهزه وهنروح لمه مع بعض
عامر…ايه ده بجد والله ما اعرف مبروك عمره مقبوله يارب عقبال الحج..
فاطمه …يارب يا عامر
…..
سلم علي باقي الناس وراح سلم علي حاج سعيد واحمد العربي وباقي الناس كلها
واعد يرتاح شويه
جابله يوسف جاتوه ومايه وبيبسي
زين..يلا كل وظبط نفسك عشان لسه وراك نمره اعمل حسابك مش ناويين يسيبوك
عامر…بضحك مانا عارف وفضل يبص حواليه كتير
زين…كانت هنا قبل ما اجيلك
عامر….طيب راحت فين
زين…اكيد هنا او هنا الوقت تظهر
عامر…بحزن مش هتظهر يا زين هربت كالعاده عشان متشوفنيش
زين….حتي لو زي ما بتقول اكيد هتشوفها انت بتقول اعد معانا خلاص وبعدين كلها اربع ايام وفرح اخوك وهيما هيجي واكيد هتشوفها
عامر…خطيبها موجود يا زين
زين…لا مجاش

 

 

 

جه عادل فالوقت ده اعد جمبهم عالكرسي
عادل….عامل ايه يافنان
ابتسم عامر بحزن اتلم بدل ما اروقك امك اعده وهتسمعني
ضحك عادل طب والله ما بتريق صحيح الكليب بتاعك منزلش ليه مش قولت كلها 6 ايام وينزل
عامر…كان لسه في شويه لغبطه فالمومتاچ وبتتظبط واتأجل هينزل يوم الخميس الجاي
عادل….ده يوم فرح ايهاب وهيما
عامر…اه ان شاء الله
عادل…هيكسر الدنيا ان شاء الله
عامر…يارب ادعولي
زين…ان شاء الله ربنا هيراضيك علي اد تعبك
عامر…يارب يازين
وبص لعادل بحزن ونبره عتاب مقولتليش ليه ياصاحبي
فهم عادل قصده
عادل…مقدرتش يا عامر
عامر….مكلمتهاش ولا وقفتها ليه ياصاحبي
عادل…لا بقولك ابه بلاش نبره التأنيب دي أسأل زين انا كلمتها كتير بس هي اللي صممت ومقدرش اقف ادامها
عامر….ماشي ياعادل
عادل…هو ايه اللي ماشي لا بقولك ايه
زين…بقولك ايه انت وهو مش وقت كلام الوقت احنا لينا أعدات كتير مع بعض خلينا الوقت فالفرح اللي احنا فيه ده
عامر…عندك حق

 

 

 

جه حاج سعيد اعد معاهم
سعيد….عامل ايه ياعامر
عامر…الحمد لله يا حاج سعيد واحشني والله اوي
سعيد…انت اكتر والله مبسوط اني شوفتك بخير
عامر…انا اللي مبسوط اني شوفتك والله وحشتوني اوي والشارع وحشتي وبص علي محل كريم بحزن وكمل كل حاجه فالمكان وحشتني وكأني مسافر من سنين
سعيد…مسافر امته
عامر…لا خلاص مش مسافر هكمل هنا مضيت عقد والايام الجايه في كذا اغنيه هتنزلي غير الكليب بس طبعا لو في اي شغل جالي سفر هيبقي يوم او اتنين بالكتير وهرجع
سعيد…يالتوفيق يارب المهم ياعامر زي ما قولتلك اعمل كل اللي انت عايزه بس اوعي تنسي ربنا يا ابني
عامر….متخفش يا حاج سعيد اللي اتربي علي ايدك عمره ما ينسي دينه ولا عاداته وتقاليده
سعيد….ربنا يفتح عليك يا ابني
عامر…بص لزين صحيح يا زين بقولك ايه هي الشقه اللي فوق ام توته اتباعت
زين…بتاعت عم محمود صاحب البيت لا ليه عايزها ولا ايه..
عامر…اه بس مش ليا دي بنت اتعرفت عليها فالطياره كانت راجعه معايا هي دكتوره نفسيه وبتدور علي مكان كويس
زين….لا موجوده زي ما هي بس ايه حوار البنت دي
حكالهم عامر باختصار حكايتها
سعيد….لو عايزيني اكلمهولك بكره اكلمه انا مش هيقول حاجه ده راجل طيب
عامر…ياريت يا حاج سعيد بس حاول تظبط معاه الايجار والكلام ده البنت واضح كده ان الظروف مش اوي زي ماقولت
سعيد…اطمن هجبلك معاه من الاخر أنا ليا كلام معاه بس الاول اتاكد تاني منها بدل ما اكلم الراجل عالفاضي
عامر….خلاص بكره بأمر الله هتأكد منها وهبلغك
سعيد…ربنا يقدم اللي فيه الخير.
بعد شويه رجعوا تاني لصحابهم وكملوا رقص وتنطيط وغنا وكل ده تحت انظار عيون منار اللي دموعها موقفش ثواني
وفجأه لاحظت عامر بيبص من بعيد علي شباك اوضتها
بعدت لورا بسرعه قبل ما يلمحها وهي ايدها علي قلبها..
فضل الفرح مستمر لحد قرب الفجر واخيرا خلص
وقف الجميع يسلم علي العرسان وعملولهم احلي زفه لحد ما طلعوا علي بيتهم
فضلوا الشباب فالشارع لحد ما كل اللي في الفرح مشيوا والدنيا هديت وابتدوا بتوع الفراشه يلموا الفرح وعامر كان لسه عينه عالشباك بتاعها
وبعد وقت بسيط راح هو وايهاب ياخدوا الشنط من بيت زين. وطلعوا علي بيتهم
………..

 

 

 

دخلت شهد شقتها هي وصلاح بعد ما ودعوا الكل
كانت حاسه انها محرجه ومتوتره وخايفه
صلاح…نورتي بيتك يا شهد
شهد…بتوتر شكرا
صلاح…رفع حواجبه🤨🤨 مالك يابت عامله كده ليه
شهد..عامله ازاي يعني مانا كويسه اهو🙄
صلاح…قرب منها صلاح باسها من راسها
بعدت بسرعه شهد لورا
صلاح…في ايه يابت عامله زي اللي قرصها تعبان كده ليه
وفجأه عيطت شهد وبقت تترعش
صلاح…ايه ده ايه ده بس بس في ايه ياشهد مالك
شهد…مفيش ابعد عني
أبتسم صلاح بحب
صلاح…قرب منها براحه شهد انتي خايفه مني
هزت شهد راسها بالايجاب بسرعه🥺🥺
صلاح….خايفه مني انا ياشهد طب ده انا بحبك وبتمني اشوفك اسعد واحده فالدنيا يابت ده انا اللي بطمنك ديما تخافي مني
شهد….صلاح انااا
قرب منها صلاح وخدها في حضنه بحنيه. اهدي ياشهد اهدي ياقلبي متخافيش وبعدين مينفعش تنكدي علي نفسك وتخلي الخوف يسيطر عليكي في يوم زي ده
فضلت شهد تعيط وهو حاضنها
شهد…يابت في ايه للعياط ده كله انا هموت طب بصي
هزت راسها بلا
صلاح…يابت بصي🤨
رفع وشها ليه.
انتي عارفه ان انا بحبك صح
شهد….🥺🥺

 

 

 

صلاح…يابت ردي هخنقك بأيدي🤨
ابتسمت شهد غصب عنها
صلاح…بأبتسامه وبطريقه تضحك اولا انا كنت داخل الشقه وانا محضر كلمتين زي اي عريس كده اخيرا اتجوزنا اخيرا بقينا في بيت واحد يعني الكلام والحوارات بتاعت العرسان دي عرفاهم
هزت راسها بضحك من بين دموعها
صلاح كمل بعصبيه تضحك بس البعيده عيطت وضيعت عليا اللحظه
شهد…انا
صلاح…انا مش عايزك تقولي حاجه كل اللي انا عايزه اقولهولك ومن قلبي بجد اني مبسوط فعلا اننا بقينا مع بعض وبيجمعنا بيت واحد وسقف واربع حيطان والأهم من كل ده اني بحبك اوي وعارف ان انتي كمان بتحبييني وده عندي بالدنيا علي فكره مش عايزك تعيطي ولا تنكدي علي نفسك ولا تخافي ولا تتوتري انا عايز اشوف ضحكتك بس والوقت بقي يلا ندخل نغير
بصتله شهد وهي مبرقه
صلاح…بضحك يابت مش قصدي حاجه يخربيت دماغك
نغير وناخد دش كده ونصلي مع بعض عشان حياتنا تبتدي اول يوم صح وبعدين نروح نحضر الاكل عشان هموت من الجوع و بعدين ياستي لو حابه نتفرج مع بعض علي فيلم ولا اي حاجه معنديش مانع حابه تنامي بردو معنديش مانع
شهد…يعني انت مش هتزعل
صلاح….مقدرش ازعل منك ياشهد واي حاجه هتكون فيها راحتك انا هعملها المهم ماشوفش احساس الخوف ده في عينك من ناحيتي ابدا والاهم من كل ده انا عارف انك بقالك كام يوم تعبانه من فرش لتجهيز وانهرده طول اليوم بره واليوم كان طويل ومتعب اوي وعارف انك محتاجه ترتاحي.
أبتسمت شهد أبتسامه عريضه وقربت من حضنه بفرحه انا بحبك اوي يا لاحه
صلاح….🙄🙄لا بقولك ايه انا اصلا من يومي وانا عيل
فا نحترم نفسنا عشان انا ما بصدق وممكن عادي ارجع في كلامي في ثانيه
بعدت شهد لورا بسرعه وهي مبتسمه لا خلاص خلاص
صلاح بحب….كيب يلا يا ستي ادخلي دش لحد ما اشرب سيجاره
شهد…ماشي😍
صلاح….بحبك يا اجمل عروسه فالدنيا
……….

 

 

 

 

عند صالح وبوسي
بوسي واقفه عالسرير
صالح…يابت عيب كده انزلي
بوسي…بقولك ايه ياصالح لو قربت مني هدب السكينه دي في بطنك
صالح…يابنت المجانين
بوسي…ابعد عني انا اصلا مبتكلمش معاك ولا انت بتتكلم معايا
صالح…يابت عيب كده وبعدين مانا مكنتش بكلمك عشان مضايق منك ومن دماغك الزباله وبعدين انتي اصلا مش من حقك تزعلي انتي اللي كنتي مزعلاني
بوسي…انت اصلا مبتغلكش نفسك وبعدين مزعلاك ولا مزعلني مش مهم المهم اننا نفضل زي ما كنا لا تتكلم معايا ولا اتكلم معاك كل واحد فينا في حاله
صالح… اغزي الشيطان يابوسي انهرده ليله فرحنا يعني اي زعل المفروض ننساه يابت
بوسي…ايوه يا خويا جر ناعم جر كل ده عشان تاخد غرضك مني
صالح…يابت غرض ايه الله يخربيتك هو انا شاقطتك انتي مراتي
بوسي…هي كلمه اطلع بره يا صالح ومش هتسلمني ولا هخليك تيجي جمبي
صالح…يابوسي مينفعش اول ليله ياقلبي نبتديها كده اهدي ربنا يهديكي
بوسي…لما تبقي تلتزم بوعدك ليا ابقي اخليك تعمل الانت عايزه وهي كلمه ياصالح مش هتلمسني يعني مش هتلمسني
صالح…بقت كده يابوسي
بوسي….اه ياصالح بقت كده
صالح…اخر كلام عندك يعني
بوسي….اه اخر كلام عندي
صالح…ماشي يابوسي اللي يريحك بس متبقيش تزعلي
وافتكري كده ان صالح ابن الحاج فاروق مبيتهددش ومش معني اني بحبك تسوقي فيها وتساوميني
يا أما تروحي تشتغلي فالكوافير اللي فالفندق ده يا اما تحرمي نفسك عليا..وعايز اقولك لو انتي جتيلي برجلك عشان تقوليلي أنك موافقه اني اقرب منك مش هوافق
يا بوسي ومش عايزك وانتي اللي حددتي طريقتي معاكي ومن غير زعل…تصبحي علي خير يا حبيبتي نورتي بيتك
خرج صالح وقفل الباب أطمنت بوسي انه خرج سابت السكينه من ايدها واعدت عالسرير بحزن تعنف في نفسها
بوسي…ايه اللي هببتيه ده طول عمرك دبش كده في حد يعمل كده في يوم زي ده
بوسي…لنفسها هو اللي بدأ معايا من اول
بس مكانش ينفع اقفش عليه بالطريقه دي والله ما كنت قصدي ازعله انا بحبه
🥺🥺🥺😔😔
عند عامر بعد ما خد دش ودخل اوضته عشان ينام
أفتكر سهر.
عانر…ينهار اسود مطمنتش عالبت لا تكون اتخطفت ولا حاجه
جاب رقمها بسرعه واتصل عليها
فتحت سهر التليفون الووو
عامر….ايوه ياسهر عامله ايه طمنيني وصلتي
سهر…بضحك ياراجل انت لسه فاكر ده انا اتخطفت والسواق طالب فديه 10مليون كمان
ضحك عامر….يانهار اسود 10مليون مره واحده طب وهتعملي ايه
سهر…هو انا لو معايا ربعهم كنت ركبت تاكسي اصلا😂
عامر…بضحك ايوه صح المهم طمنيني
سهر…الحمد لله وصلت علي طول

 

 

 

عامر…طيب الحمد لله حقك عليا والله لسه الفرح خلصان من شويه واتلخمت مع الكل
سهر…ولا يهمك يا عامر عقبال فرحك يارب
عامر…..يارب المهم انا كلمت حد عشان حوار الشقه وهو بس حابب يتأكد منك لو تمام يكلم صاحب الشقه بكره عشان ميتحرجش
سهر…بفرحه طبعا انت لسه بتسأل اكيد موافقه
عامر….خلاص بكره بامر الله هنكلمه
سهر…شكرا بجد يا عامر مش عارفه اقولك ايه مكنتش اعرف انك هتدور بالسرعه دي
عامر…انا قولتلك احنا ولاد بلد و متقلقيش بامر الله بكره هبلغك باللي حصل وهنشوف يوم تيجي فيه عشان تمضي العقد
سهر…ان شاء الله انا جاهزه اي وقت
عامر…خلاص يبقي اتفقنا يلا هسيبك بقى وحمد الله علي سلامتك
سهر…الله يسلمك ياعامر تصبح علي خير
عامر…وانتي من اهل الخير يلا سلام
سهر…سلام.

يتبع…

• لقراءة الفصل التالي : اضغط هنا
• لقراءة باقي حلقات الرواية اضغط على (رواية 30 يوم حياة 2)