روايات

رواية حطام ماضي و مستقبل مجهول الفصل الثاني 2 بقلم سما معتز

رواية حطام ماضي و مستقبل مجهول الفصل الثاني 2 بقلم سما معتز

رواية حطام ماضي و مستقبل مجهول البارت الثاني

رواية حطام ماضي و مستقبل مجهول الجزء الثاني

حطام ماضي و مستقبل مجهول
حطام ماضي و مستقبل مجهول

رواية حطام ماضي و مستقبل مجهول الحلقة الثانية

عائشة : هو انت ؟؟!
دخل يحيى المعرض
يحيى : ازيك يا عيوش
عائشة : كويسة الحمدالله انت عامل ايه و مريم اخبارها هي و البيبي ايه ؟
يحيى : كلنا كويسين زي الفل بصي بقى يا عيوش ده يونس صديقي من زمان جدا و بيظبط فيلا جديدة ليه و عايز يشتري كام لوحة كدا يكون شكلهم فخم كدا ف قلت نيجي نشوف عندك هنا
عائشة : اه اهلا يا استاذ يونس
يونس : اهلا بيكي
هو ده اللي اخد مني الكتاب انا فاكرة يلا قلبي ابيض بقى ، بدأت اوريه اللوح الموجودة و عجبه كذا لوحة و اخدهم
يونس : هو مين اللي عامل ديكور المعرض ده ؟؟
عائشة : انا
يونس : شغلك حقيقي فوق الروعة الديكور هادي و بسيط جدا و ده مديله منظر رائع
عائشة : فعلا انا بحب الحاجات الهادية اللي زي كدا
يحيى : طب يلا بقى ولا ايه انت لسة وراك مشاوير
يونس : اه يلا بينا
يحيى : اوعي تنسيني يا عيوش
عائشة بضحك : متخافش مش هنساك ولا حاجة
مشوا و انا خلصت شغل في المعرض و روحت سوبر ماركت و جبت شوية حاجات و روحت لأروى البيت زي ما كنا متفقين اه نسيت اقولكوا اروى اهلها متوفيين و معندهاش غير اخ واحد و سافر بيشتغل برا مصر بعد ما خلص جيش بس بيتواصل معاها دايما و هي بقت قاعدة لوحدها ف بروحلها عادي ، روحت و فضلنا قاعدين بنهزر و نضحك و ناكل و قضينا اليوم كدا
عائشة : ياااه يا اروى كنت بتمنى يكون عندي اخت نعمل مع بعض زي كدا نسهر و نهزر و ناكل مع بعض بس كويس انها مش موجودة كانت كرهت حياتها زيي

 

 

اروى : يخربيت كئابتك يا شيخة يعني قاعدين بنضحك من بدري و تيجي انتي تعكنني على اللي خلفونا ازأزي بس ازأزي و انسي
عائشة : انسى ايه ولا ايه بس يا اروى بس انسى ايه ولا ايه
اروى : انسي كل حاجة يا عائشة اعتبري ان حياتك بدأت من دلوقتي و عيشي من الاول و انسي
عائشة : بحاول والله بحاول “حسيت بألم في بطني” اااه
اروى بقلق : مالك يا عائشة ؟
عائشة بألم : مش عارفة قاديلي فترة بطني بتوجعني اوي معرفش ليه
اروى : كلتي حاجة من برا طيب او شربتي حاجة
عائشة : لا لا مكلتش
فجأة حسيت انني عايزة ارجع قمت جريت على الحمام و فضيت كل اللي في بطني و أعصابي سابت و دموعي نزلت و انا مش حاسة بيها مكنتش عارفة اسند نفسي ، اروى ساعدتني اقف و غسلت وشي و سندتني لحد برا
اروى : استني هنا هنزل اجيبلك حاجة من اي صيدلية و اجي بسرعة
عائشة بتعب : تنزلي فين الساعة واحدة بليل
اروى : تعرفي تسكتي اسكتي و افضلي مكانك متتحركيش
نزلت و بعد عشر دقايق تقريبا رجعت و معاها العلاج اللي معرفش ايه هو
اروى : الصيدلي كان بيقول انه احتمال يكون قولون عصبي ف اداني الدوا ده خديه دلوقتي لحد ما نبقى نروح لأي دكتور نتطمن عليكي
اخدت الدوا و نمت مكاني بعد ما الالم راح
صحيت الصبح لاقيت اروى بتكلم يحيى من تليفوني و بتقوله اللي حصل و الظاهر كدا انه قال انه جاي
و فعلا جيه و اخدني روحنا المستشفى و طلع عندي القولون العصبي و الدكتور كتبلي على علاج امشي عليه و قالي على حاجات ماكلهاش و حاجات تانية اكلها و حوار كدا يعني و انا مش هلتزم بيه و البقاء للأقوى
يحيى : ياريت بقى نلتزم باللي الدكتور قال عليه علشان انا عارفك عنيدة و في دماغك انك هتاكلي كل اللي منعك عنه
عائشة : طب ما انت شطور و فاهمني اهو
يحيى : يلا بقى علشان هتيجي تقعدي معانا
عائشة : معاكوا فين ؟؟
يحيى : عندنا في البيت منا مش هسيبك لوحدك
عائشة : يحيى اتكلمنا في الموضوع ده قبل كدا و انا هرجع بيتي و انت ابقى تعالى اتطمن عليا مفيهاش حاجة
يحيى : هتفضلي طول عمرك عنيدة كدا خلاص اللي يريحك

 

 

رجعت البيت اخدت شاور و ظبطت نفسي كدا و نزلت المعرض بعد ما فطرت و اخدت الأدوية بتاعتي
عدى الوقت عادي ناس بتيجي تتفرج و تشتري و عادي و كملت اليوم
“في شركة Al Alfi Steel”
يحيى : ايه مالك سرحان في ايه ؟
يونس بانتباه : ها لا مفيش
يحيى : بس شايفك هادي كدا انهردة و مزعقتش متعصبتش زي كل يوم خير كدا
يونس : مش عارف حاسس انني مش على طبيعتي
يحيى بهزار : لو دي مش طبيعتك خليك عليها احسن
يونس : فاكر البنت اللي كنت بحكيلك عليها زمان و اختفت
يحيى : ياااه انت لسة فاكرها
يونس : عمري ما نسيتها يا يحيى تعرف لو ساعتها كانت كبيرة مكنتش اترددت ثانية واحدة انني اتجوزها بس بقى انت عارف الظروف ساعتها كانت عاملة ازاي و هي كمان كانت لسة في حدود 14 / 15 سنة ف مكنش ينفع نهائي
يحيى : ايوة ايوة مفهمتش برضه ايه اللي جابها في بالك و مخليك تتكلم عنها دلوقتي
يونس بتنهيدة : ظهرت تاني يا صاحبي كنت شوفتها من كذا شهر ده لو مكانش من سنة و فضلت اسبوعين براقبها من بعيد لحد ما اختفت تاني كل شوية تختفي و تظهر تختفي و تظهر ، تاعبة قلبي والله يا صاحبي
يحيى : طب ما تروح لأهلها و تطلبها رسمي ايه منعك
يونس : لسة الوقت مجاش و اول ما ييجي هتكون انت اول واحد يعرف
يحيى : اومال كنت عايز مين يعرف قبلي ياض
يونس بضحك : عندك حق والله انا اعرف مين غيرك اصلا من يوم ما طلعت من السجن
يحيى بتنهيدة : ربنا يعينك على اللي انت فيه يا صاحبي
يونس : بقولك ايه تعالى نروح اي مطعم نقعد عليه لحسن انا مفطرتش و الساعة داخلة على أربعة العصر
يحيى : ماشي بس انا مش هاكل هشرب اي حاجة و هتغدى في البيت
يونس بتريقة : طبعا لازم تاكل في البيت ده المدام تعمل منك شاورما و انت راجع واكل من برا
يحيى بضحك : لا والله ابدا انا بيصعب عليا بس تاكل لوحدها باعدين انا من ساعة ما اتجوزت و حرمت اكل من برا تاني
يونس : طب يلا يلا بس
روحنا مطعم و طلبت ليا غدا و هو طلب قهوة و قعدنا نتكلم في شغل شوية و نهزر شوية لحد ما الكلام جابنا ل…
يحيى : صحيح عملت ايه مع ابوك ؟؟
سبت الشوكة و السكينة من ايدي بضيق

 

 

يونس : ليه بقى السيرة الزفت دي
يحيى : يابني ده ابوك انت ازاي بتقول عليه كدا و ازاي قبلك بالقسوة دي
بدأت اكل تاني و رديت عليه ببرود
يونس : انا مش بعتبره ابويا يا يحيى هو اسم مكتوب جنب اسمي و بس و عمري ما هسامحه على اللي اتعرضتله بسببه اللي انت عارفه كويس و كمان هو شاف ان ابنه بقى حاجة عالية ف حب يطور و يكبر البيزنس بتاعه مش اكتر
يحيى : و يمكن كمان عايز ابنه جنبه عادي
يونس : عايزة ابنه جنبه بعد 30 سنة مش معبره صح طب اشمعنى ظهر دلوقتي بالذات في آخر فترة دي اللي الشركة اللي انا و انت تعبنا فيها لوحدنا بدأت تتشهر اكتر و اكتر و نجاحها بيزيد ليه مظهرش لما كانت الدنيا ملطشة معايا ؟ ليه مظهرش لما كنت في السجن و انا لسة 17 سنة يا يحيى تقدر تقولي ؟!!
يحيى : ……….
يونس : باعدين بلاش تيجي انت و تقولي كدا ما انت كمان سايب ابوك و اخواتك قاديلك 8 سنين و محدش اتكلم
يحيى ببرود : دي نكرة و دي نكرة تانية يا يونس و انا مش مضطر اقولك انا عملت كدا ليه بس عندي أسباب قوية تعذرني و تسمحلي انني اعمل كدا يمكن لو مكنتش اتعرضت للأسباب دي مكنش ده حالي دلوقتي اه كان هيكون في بينا مشاكل و مش متفقين مع بعض عادي بس كان هيكون اهون من اللي حصل و متفتحش الموضوع ده تاني علشان متفتحش جوايا حاجات متقفلة من زمان
يونس : انت عندك عذرك و انا كمان عندي عذري يا يحيى يبقى لا انا ولا انت نفتح الموضوع ده تاني
رفع ايديه باستسلام : تمام زي ما تحب بس اليوم اللي هلاقيك فيه فعلا بتتخذ قرارات ممكن تعود عليك بالسلب هتدخل و هتكلم و مش هتقدر تمنعني يا يونس غير لما توافقني الرأي
يونس : قفل بقى على السيرة الزفت دي عكرت مزاجي اطلب الحساب انا خلصت
“بليل في بيت عائشة”
قاعدة قدام التليفزيون بعد ما اخدت علاجي…بفكر في حياتي من يوم ما فتحت عيني على الدنيا..فضلت الذكريات تعدي قدام عيني لحد ذكرى اليوم ده..لسة محفورة جوايا…سايبة علامة خاصة فيا..علامة عمرها ما هتخليني انسى..هه..بصيت على معصم ايدي و حسست على العلامة اللي فيه بايدي..قد ايه كنت بتمنى يومها مقومش و اخلص من اللي كنت فيه…قد ايه زعلت و اتحرقت من جوايا لما قمت و لقيت نفسي لسة عايشة مموتش !!..قاطعت أفكاري و ذكرياتي اروى و هي خارجة من المطبخ و مدتلي ايديها بطبق سلطة فواكه…اخدته منها و قعدت جنبي و بدأت تقلب في القنوات على التليفزيون…وقتها جيه سؤال غريب في دماغي……

 

 

عائشة : اروى هو انتي شايفاني ايه ؟
اروى : ايه السؤال ؟؟؟
عائشة : شايفاني ايه ك شخصية ك انسانة ك اي حاجة شايفاني ازاي ؟
اروى : عائشة أسئلة المريخ اللي بتيجي بعد نص الليل دي انا ماليش فيها باعدين الساعة لسة عشرة مجتش اتناشر علشان تسألي الأسئلة الغريبة دي هو ايه اللي شايفاكي ايه شايفاكي كيس جوافة
عائشة بيأس : ابقي قابليني لو سألتك تاني على حاجة اتفو عليكي صاحبة تعر و تفصل الواحد من المود
اروى : والنبي تخرجي انتي من المود اللي انتي فيه بس و بطلي بقى بطلي تشغلي ده ( شاورت على دماغي ) خليه ينام شوية
عائشة : خلاص هنيمه بس افرحي بقى لما الأفكار دي تتراكم عليا و تصحي تلاقيني عاملة حاجة في نف…….
اروى بمقاطعة و انفعال : اقسم بالله لو جبتي ام السيرة دي تاني بالطاسة اللي جوا دي و هديكي بيها على دماغك و اخليكي تفقدي الذاكرة و ترتاحي بقى و ارتاح انا كمان من كلامك السم ده بطلي يا عائشة تفكري في الموضوع ده كفاية كفاية بجد
عائشة : تصدقي فكرة حلوة يلا تعمليها اهو ابطل تفكير
اروى : انا ماشية بدل ما ارتكب فيكي جناية……لا انا لو مشيت هتفضلي تفكري و انتي قاعدة لوحدك و الشيطان معاكي

 

 

 

طب اعمل ايه
مسكت مخدة و قعدت تضرب فيا بيها و انا عمالة اضحك عليها
اروى : اعمل فيكي ايه قوليلي اعمل فيكي ايه
عائشة بضحك : خلاص خلاص كفاية تعالي اقعدي و انا مش هتكلم في حاجة وعد
اروى و بترفع ايدها للسما : يا رب الصبر من عندك يا رب و ادي قاعدة
قعدنا قدام التليفزيون و بعد شوية لاقيت الجرس بيرن
اروى : انتي مستنية حد ولا ايه ؟
عائشة : لا بس ممكن يكون يحيى عادي استني هقوم افتحله
قمت فتحت و اول ما شوفته اتصنمت مكاني من الصدمة
عائشة بصدمة : انت انت بتعمل ايه هنا و و عرفت مكاني ازاي ؟؟!!!

يتبع…

اترك رد