رواية نغم العاصم الفصل السادس 6 بقلم هاجر محمود

رواية نغم العاصم الفصل السادس 6 بقلم هاجر محمود

رواية نغم العاصم البارت السادس

رواية نغم العاصم الجزء السادس

رواية نغم العاصم الحلقة السادسة

“نرجع لبيت كامل بعد ما كلهم ناموا”
كانت فريده في اوضتها بتتكلم مع حد عالفون بس بصوت واطي عشان محدش يسمعها، وفي المكالمه دي قالت فريده: مش عارفه اعمل ايه انا تعبانه اوي وخايفه منه
-:اهدي طيب
فريده: سامحني، ياريتني سمعت كلام اللواء رفعت
-:وبعدين، مش وقته الكلام ده
فريده: خوفي انا وحياة منه اللي خلانا نكتب نصيبنا بأسمه، لكن نغم مخافتش منه
-:عشان كده مش هيسيبها ف حالها
فريده بعياط: حرام والله
-:متقلقيش كل حاجه هتنحل بإذن الله
فريده: يارب
-: طيب انا لازم اقفل دلوقتي وهحاول اكلمك تاني اول ما اعرف
فريده: طيب يا حبيبي خلي بالك من نفسك
-: حاضر، تصبحي على خير
فريده: وانت من اهله يا حبيبي
وقفلت السكه وحاولت تنام ولكن قضت ليلتها بين كوابيس وقلق
******************
“وفي مكان تاني بعيد اوي اوي عن مصر”
في دوله اجنبيه، وفي اوضة فندق كان شخص معين قاعد بيتكلم في الفون ولما خلص المكالمه قفل الخط ونفخ بغضب وقلة حيله وحاول يهدأ ولكن معرفش فقرر يروح لصديقه المقرب عشان ينفس عن غضبه بالكلام معاه، فخرج من اوضته وراح لأوضة صاحبه وخبط ودخل وقعد قدامه وهو بيقول بعصبيه وزعيق: وبعدين هفضل متكتف كده ومش عارف اعمل حاجه
بصله صاحبه بأستغراب ورد عليه: ومين قال انك مبتعملش حاجه
-:انا بفكر اسيب الخدمه
=: ايه انت اللي بتقوله ده
-:عاوز اخد حقي والبدله دي هي اللي مكتفاني

=: اهدأ كده وخلينا نفكر بهدوء
-:هدوء ايه انا مبقاش فيا عقل خلاص طول ما انا بعيد عن اهلي وكل ده بيحصلهم من واحد ابن***، سنه وهو مستفرد بيهم من ساعة اللي حصل
=: ايه اللي حصل تاني؟
حكى لصاحبه عالكلام اللي دار في المكالمه واخد نفس وطلعه بصوت مسموع وقال: عرفت اللي جوايا عرفت انا شايط ازاي
=: اهدأ طيب وخلينا نفكر
-:انا عاوز انزل لازم اظهر كفايه كده
=: احنا مصدقنا انه ناسيك وفاكرك مت عشان وقت ما ترجع تعرف تاخد حقك وحق اهلك كلهم
-:ازاي بس؟؟
=: انت فاضل لك حاجات بسيطه وتوقعه
-:ويوم ما اوقعه هخليه عبره لكل الناس
فقال صديقه بقلة حيله: ابقا ولع فيه
-:طيب انا عاوز حد يطمني على نغم وحط عليها مراقبه ف المستشفى لأنه اكيد هيعمل فيها حاجه
=: بكره الصبح هبلغ والدي يقوم باللازم ويطمنا عليهم
-:تمام
=: قوم نام كفايه كده
-:لا عاوز اقعد مع نفسي شويه
=: على راحتك
خرج من اوضة صاحبه ودخل اوضته وفتح البلكونه وقعد على كرسي ومدد رجله عالكرسي التاني وولع سيجاره واتنهد وسرح مع ذكرياته من سنتين
Flash Back
علي: اهلا بيكم اتفضلوا اتفضلوا
كامل: شكرا عالضيافه
ودخلوا كلهم لأوضة الضيوف وقعدوا مع بعض واخدوا واجب الضيافه
علي: بقول لك ايه؟
كامل: خير يا اخويا
علي: مش آن الاوان نجوز الاولاد لبعض
سيف:بعد اذنك، لا طبعا مستحيل

فقال علي بضيق: ملكش دعوه انت لما الكبار تتكلم الصغار يخرسوا
قال سيف بعصبيه: انا مش صغير
كامل بعصبيه: اهدوا انتوا الاتنين ومفيش جواز هيتم بينهم
علي بتعجب: ليه بقا؟
اتكلموا مع بعض كتير وكل واحد شرح للتاني وجهه نظره، لحد ما الحج علي قال بأبتسامه صفرا: خلاص كلامك يمشي يا كبير العيله
بص كامل لسيف وقال: طيب يلا بينا عشان نلحق نرجع قبل الليل ولا ايه؟
فقالت حياة من وراهم: لا يا بابا استنوا لازم تتغدوا معانا
كامل: مش لازم يابنتي المهم اني اطمنت عليكي
سيف بمرح: بقول لك ايه فين جوزك احسن واحشني اوي
فقال حسام من وراه وهو بيمسك راس سيف بهزار: وانت واحشني اكتر، تعالى عاوزك
سيف: عن اذنكم (وسابهم ومشي مع حسام)
ضحكت حياة عليهم وبعدين بصت لوالدها بنظره طويله وقالت: مالك يا بابا؟
كامل بتنهيدة: ابدا يا بنتي مفيش
وضمها اليه بقوه كأنه بيودعها، وفجأه نزلت دموع حياة كتير اوي وضمت ابوها بقوه وفضلوا يتكلموا مع بعض
صفا: يلا يا جماعه اتفضلوا الغدا جاهز
سيف بهزار: عامله اكل ايه المره دي؟
صفا: اللي انت بتحبه يا حبيبي
حسام بغيرة: لما هو حبيبك انا ايه؟
صفا: انتو الاتنين حبايبي ومليش غيركم اوعوا تنسوا دي
قربوا منها وكل واحد فيهم باس راسها وايدها، وقال سيف: طيب يلا ناكل احسن الكلام معاك بيجوع
حسام: يلا بينا
******************
وبعد الغدا مشي كامل وسيف بعربيتهم راجعين القاهره، وهما في الطريق كانوا بيتكلموا سوا فقال كامل من ضمن الكلام: خلي بالك منهم انت عارف علي طماع قد ايه ومش هيهدا غير لما ياخد كل حاجه
قال سيف بمرح: متقلقش انت معاك راجل
كامل: كويس اني كتبت كل حاجه بأسمك، عشان ميقدرش ياخد حاجه بعد ما ام….
قاطعه سيف: بعد الشر عنك
كامل: سيف! في ورق مهم في خزنتي محدش يعرف عنه حاجه، وان حصل لي حاجه تاخده انت وتخلي بالك لأن في وقت هتحتاجه اوي
سيف: امرك يا والدي، وبعدين فك كده، ومتقلقش
راح كامل بنظره ناحية البحر اللي ماشي جنب الطريق واتنهد بحزن ولف لسيف وقال: انا مطمن عليهم طول ما انت معاهم
بص سيف في المرايه الخلفيه بقلق وقال: ها؟! ربنا يخليك لينا احنا منسواش حاجه من غيرك
كامل: مالك فيه ايه؟
سيف: في عربيه من ساعة ما طلعنا عالطريق وهي ورانا
لف كامل بنظره لورا وشاف السلاح اللي في ايدين الناس اللي جوا العربيه فقال بسرعه: اهرب منهم بسرعه دول معاهم سلاح
سيف: اربط حزامك كويس
داس سيف بنزين جامد وزاد سرعته ووراهم العربيه دي وبدأ الناس اللي فيها يضربوا نار عليهم وسيف بيتفادى ضرباتهم بحركه العربيه يمين وشمال وفجأه ظهرت عربيه تانيه وقطعت عليهم الطريق، وفي ثانيه سيف شد فرامل ولف العربيه وجري عكس وطلع على كوبري عالبحر والعربيتين وراهم، وكامل سحب سلاحه وفضل يضرب نار عليهم لحد ما فجأه صرخ بعد ما اتصاب في دراعه
وفضل يضرب نار عليهم بأيده التانيه، فشده سيف في ثانيه لتحت وبدأ هو يضرب نار عليهم لحد ما قتل سواق عربيه فيهم وفرقع عجلها كمان واتقلبت وولعت، والعربيه التانيه وراهم وبيضربوا نار عليهم، وفجأه سمع سيف فرقعة عجله من عربيته فحاول يدوس فرامل ولكن مفيش والعربيه بدأت تولع من قدام، وفجأه فك حزام الامان وحضن ابوه ونط به من العربيه في المايه وعربيتهم فضلت تتقلب لحد ما ولعت، والعربيه اللي كانت وراهم وقفت ونزلوا الناس منها وفضلوا يضربوا نار على سيف وكامل في المايه، فغطس سيف وكامل لتحت لحد ما اتصاب كامل في صدره ورجله اليمين، ولما الناس الملثمين اتأكدوا ان سيف وكامل ماتوا مشيوا.
******************

اما سيف فضل ماسك ابوه لحد ما أتأكد انهم مشيوا وبالراحه شال ابوه على ضهره وعام به لحد الشط واترموا عليه بتعب، وفجأه نادى كامل على سيف بصوت واطي، فزحف سيف بتعب وراح جنبه وضمه وقال: شششش انا هنا وهتبقا كويس
كامل بصوت مبحوح: خلاص
سيف وهو بيضمه اكثر: لا متقولش كده
قال كامل وهو في انفاسه الاخيره: خد بالك منهم
فقال سيف بخوف: لا لا فوق انت هتعيش الاسعاف اهي
كامل:…………
نزلت دموع سيف وصرخ: رد عليا، متسبناش، يا رب
في الوقت ده وصل صديقه عاصم بعربيته ومعاه الاسعاف، بعد ما سيف بعتله رساله على فونه بموقعهم وقت المطارده، فنزل عاصم بسرعه من العربيه وجري ووراه المسعفين، فلقى سيف حاضن كامل وبيعيط
عاصم وهو بيطبطب على كتفه بحزن: قوم معايا
سيف: اتأخرت اوي
عاصم: قوم معايا وسيب الناس تتصرف
المسعف: بعد اذنك يافندم
تحامل سيف على نفسه وحاول يقف بس لقى نفسه بيقع ومش قادر فلحقه عاصم وشاله لعربيته، اما المسعفين شالوا كامل عالترولي ودخلوه عربية الاسعاف، وبسرعه كلهم راحوا المستشفى
******************
وبعد وصولهم، دخل كامل بسرعه اوضة العمليات، بس خلاص كان قلبه وقف قبل ما يوصل، فخرج الدكتور لسيف وعاصم الواقفين برا بعد ما اتعمل لسيف الاسعافات اللازمه وقال: البقاء لله
زعق سيف في الدكتور: لا مش ممكن، انت كداب
ودخل اوضة العمليات بسرعه وفضل يحضن كامل ويبوسه وهو بيعيط وقال: سامحني عشان معرفتش احميك، لكن وعد مني حقك هيجي وهيدفع التمن، وباس رأسه وخرج للدكتور وعاصم بثبات وقال: من فضلك يا دكتور جهز الاجراءات بسرعه
الطبيب: تحت امرك، بس الاجراءت القانونيه
سيف:امشي ف كل الاجراءات
الطبيب: تحت امرك
Back to the present

فاق سيف من ذكرياته على آذان الفجر والدموع في عينيه، فاستغفر ربه وراح يصلي، وهو داخل اوضته سمع عاصم من بلكونته وهو بيتكلم وبيقول: وحشتيني اوي، ياريتني كنت جنبك مكانش كل ده حصل، سامحيني
شب سيف بجسمه ناحية بلكونة عاصم وسأله: انت لسه صاحي؟
ارتبك عاصم وحط صورة نغم في جيبه ورد على سيف: انا انا منمتش اصلا
سيف: طيب يلا عشان نصلي
عاصم: يلا
وراحوا يصلوا وكل واحد منهم جواه اسئله كتير وكلام اكتر……

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية نغم العاصم)