روايات

رواية عائلة بالإكراه الفصل السادس عشر 16 بقلم سلمى بسيوني

رواية عائلة بالإكراه الفصل السادس عشر 16 بقلم سلمى بسيوني

رواية عائلة بالإكراه البارت السادس عشر

رواية عائلة بالإكراه الجزء السادس عشر

عائلة بالإكراه
عائلة بالإكراه

رواية عائلة بالإكراه الحلقة السادسة عشر

رمى الورد في الزباله وقام على مكتب حنان بخطوات سريعه بس قبل ما يفتح سمع يونس بيتكلم
_تتجوزيني يا حنان ؟!!!
يوسف مجرد سماعه للكلمه كان عايز يدخل يخنقه لغايه ما روحه تطلع بس حاجه جواه قالتله يستنى يسمع رد حنان
حنان واقفه قدام يونس وبصاله بمنتهى الاستغراب : انت اتجننت يا يونس
يونس عيونه دمعت : اتجننت عشان بحبك
حنان حاولت تهدى :يونس انا قلتلك كذا مره ..متقربش مني .. قلتلك كذا مره قربك مني غلط وانت ملكش الحق دا
يونس : انا جاي بطلب منك الحق دا
حنان بأسف : و انا مش موافقه يا يونس
يوسف اتنهد بإرتياح …ومستني يسمع يونس
يونس اتعصب جدا وصوته علي بشكل جنوني ومسك حنان من اكتافها وهزها بعنف : ليييه …عشان بتحبيه هو ….بتحبي يوسف
حنان ضربته بالقلم : ابعد عني يا حيوان انت ازاي
يوسف فتح الباب ودخل وهو بيشمر أكمام قميصه: جميل اوى …انت اللي جبته لنفسك
بعد وقت مش كتير
يونس طالع من باب الشركه الرئيسي شعره منكوش وشه مليان كدمات واكمام بدلته مقطوعه على الاخر يوسف فتح شباك المكتب وصفر بصوت عالي ف يونس انتبهله
يوسف وهو بيرمي علبه الخاتم اللي كان جايبها وقاله بصوت عالي بتوعد : نسيت دا … مشوفش وشك هنا تاني يلا …طريق السلامه
العلبه وقعت علي دماغ يونس والغضب ماليه
ومردش على يوسف ومشى
ويوسف فوق دخل من الشباك وهو بينفض ايده وكأنه اتخلص من صندوق زباله
بيبص الحنان اللي واقفه مربعه اديها وهتموت وتضحك بس كاتمه الضحكه : افردي بوزك ..دا غلط وربيته ..قال تتجوزيني قال ..سكر اوى
طلع من المكتب وهو بيبرطم وحنان قعدت على اقرب كرسي تضحك على تصرفه ويونس وغبائه وقله ادبه دي
فتحت فيديو كول مع البنات وحكتلهم
ساره : طب والله يوسف دا كفاءه
اسراء : حصل …بس يونس دا مش مظبوط ..اي التخلف اللي عمله دا
نور : مترجعيله بقا وتريحي قلبه وقلبنا يا شيخه ..مش قلنا بيتنيل يحبك الراجل كل يوم يبعتلك رسايل على البيت ومبهدل نفسه محاولات معاكي ارحميه بقا
حنان اتنهدت ف ساره غيرت الموضوع : خدي بالك ان المعرض بتاعنا بعد بكرا وعايزين ننزل مع بعض نجيب كذا فستان
حنان : تمام هخلص شغل هنا وارنلكوا نتجمع
************
يونس دخل ڤيلته راح علي المطبخ وفتح ازازه مياه كبها عليه و راح لأوضه تانيه في آخر الڤيلا فتحها كانت مضلمه ففتح النور وظهرت الصور اللى متعلقه على الحيطه …صور لحنان ..صور كتير في مل حته على الحيطان ..صور ليها في كل حالاتها وهي متعصبه وهي بتضحك ومشغوله وهي بتشرب وهي بتاكل ..كل حاجه
سحب صوره من على الحيطه وقعد علي الارض وهو متغرق مياه ببدلته المتقطعه وحضن الصوره
وهمس:حبيبه قلبي ..انا عارف انك بتحبيني بس يوسف مهددك ..انتي بتحبيني زي ما انا بحبك .. وانا عارف انك بتحبيني …قريب اوي خلصك من يوسف يا حبيبتي ونتجوز ونعيش سوا ومحدش هيبعدنا عن بعض ابدا يا روحي
************

 

 

 

 

حنان خلصت شغل والبنات اتقابلوا ولفوا كتير اتعشوا برا وجابوا الفساتين والكل روح مهدود من كتر اللف
حنان وساره ونور داخلين في ايديهم الاكياس لقوا منيره وعبير قاعدين سوا
ساره :هو انتوا مبتزهقوش من بعض
منيره : وانتي مالك يا رخمه
ساره : اشتمي براحتك يا طنط ما هي الشتيمه مبتلزقش ..الولا اسلام فين
عبير : يا اما نايم يا بيتمرقع ..وراه ايه يعني
ساره ندهت بصوت عالي : اسلااااام ….ولااااا يا اسلااام
اسلام مردش عليه فندهت بصوت عالي
_أُس أُس …يا أُس أُس
اسلام طلع متعصب :بت قلتلك مبحبش الاسم دا
حنان : مانتا بتتمرقع ومبتردش …خساره فيك اللبس اللي جبناه دا يلا يا بنات نطلع ننام بقا
اسلام بتراجع : خلاص خلاص ..وروني بقا جبتوا ايه
وروه اللبس اللي هيروح بيه المعرض وقعدوا مع بعض وحنان خرجت من مودها نوعاً ما
طلعت اوضتها تنام لقت رساله النهارده على الكومودينو وهتموت وتعرف بتوصل لهنا ازاي
فتحتها وقرأتها
قابلتكِ فى مُنتصف طريقى تُعيقين قلبى على النبض لِغيركِ … فأصبح قلبي مِلكُ لكِ مر اسبوعان ..تتصرفين بشكل لم اعهده من قبل ..انتظرت لسنوات لاطلب ارتباطك بي ..وسأنتظر حتي لو لآخر عمري
تصبحي على خير يا حبيبتي
يوسف غفران
اتنهدت وقفلتها : انت عايز تعمل فيا اي تاني يا يوسف
*********
صحيت الصبح وهي عازمه امرها تعرف مين بيساعده هنا في البيت يوصل الرسايل دي اول حد شكوكها جت ناحيته مديحه ..اللي بتساعدهم في البيت شابه صغيره بس دمها خفيف دخلت عليها المطبخ كانت واقفه بتحضر الفطار وهي مشغله ام كلثوم “ياما عيون شاغلوني لكن ولا شغلوني”
بصتلها بصه مريبه :صباح الخير يا مديحه
مديحه بإستغراب :صباح الخير يا حنان هانم..اعملك القهوه بتاعتك
حنان بنفس البصه : ياريت
مديحه استغربت : انتي كويسه يا هانم ..في حاجه
حنان :قلتلك ميت مره متقوليليش هانم دي ..حنان عادي
راحت قعدت معاهم على السفره ونفس البصه المريبه
ساره وهي بتشرب شاي : في حاجه يا حنان
حنان بتشرب قهوتها وبصالهم : لا مفيش ..انا نازله …(بصت لنور ) سلام
منيره لعبير : مالها البت دي علي الصبح
نور بضحك : دي غريبه …بقولكوا اي انا قعدتي هنا طولت اوي ..هرجع شقتي بقا
عبير مسكتلها سكينه : يعني والدك مرجعش قصدك مثلا انك تروحي تقعدي لوحدك ..الشكينه دي بتوجع على فكره
نور بتراجع : مين قال شقه وبتاع انا قلت كدا (شاورت لساره ) يلا قومي قدامي على المرسم
عبير :ايوا اظبطي كدا
*********
حنان في مكتبها دخل عليها يوسف وفي ايده دعوه لفرح
_صباح الخير
حنان بهدوء : صباح الخير مستر يوسف
يوسف بضيق :اووف …امسكي ..دعوه فرح ليلى الحناوي ..عزمانا كلنا الفرح بعد بكرا
حنان : تمام هنحضر بإذن الله …احم ..على فكره بكرا افتتاح معرض اللوح ..ساره عزماك
يوسف ابتسم : ساره اللي عزماني هاا ؟!
حنان : ايوا
********
حازم مع يوسف
_يعني البنت ماتت بسبب حسن
يوسف : بالظبط كدا …انا بقا هجننه …هنوهمه ان حبيبته دي لسه عايشه
حازم بحذر : متأكد من الموضوع دا
يوسف : ايوا هات بس صور ليها و هنبدأ بجواب وهنحطه في العربيه ساعت فرح ليلي ..هو كمان معزوم فهنحطه في العربيه وهو في الفرح
حازم : تمام هبقي معاك وقتها
**********
_يا عم معرض اي اللي اروحه دا
_ يا علي يسرا اصرت انك تيجي ..متبقاش رخم كدا
_ ورايا عمليه طيب
_ خلصها وتعالا
_ حاضر بطل زن بقا
**********
حنان روحت وطالعه تغير هدومها لقت نور طالعه من الاوضه بتتسحب
حنان : هو انتي بقا ..خدي هنا يا بت
نور بإرتباك : ك …كنت بدور على حلقي عندك
حنان : وهو حلقك هيعمل ايه في اوضتي
نور طلعت تجري وتصرخ : الحقووونااااي …حد يلحقناااي
دخلت المطبخ تجري عبير ومنير كانوا جوا ادرات ورا عبير بتستخبي منها : بيحبك يا مفتريه ارحميه بقا
حنان : وربنا لوريكي
طلعوا يجروا ورا بعض واسلام وساره قعدوا يضحكوا عليهم
********

 

 

 

يوم المعرض والكل متحمس البنات كانوا زي القمر اسراء وامها راحوا مع يوسف وحنان والبنات مع بعض واسلام مع منيره وعبير
الدنيا كانت زحمه والصحافه بتصور نور وساره كانوا بسوطين جدا باللوح بتاعهم
على دخل وسط الناس ووقف يبص على اللوح وقف قدام لوحه ساره يستني صاحبه فين
ساره كانت واقفه مع نور وشويه وراحت للوحه بتاعتها وشافت علي
ساره بإستغراب : دكتور علي ..هلا بيك ..
علي اتفاجئ ب ساره بتسلم عليه : انا تمام الحمدلله وانتي عامله ايه
ساره بإبتسامه :بخير الحمدلله …بتعمل ايه هنا كدا
علي بيفتي : لأ دانتي متعرفيش بقا ..دانا مهتم بالفن واللوح جداا (شاور على لوحتها ) بس لفتت نظري اللوحه دي …لا لا ..مش حلوه خالص لا ..
ساره : معقوله مش حلوه
علي كمل فتي : طب اقولك علي حاجه ..الالوان مش متوزعه صح كدا ..حاسس اللي راسمها نقاش مش فنان ..مش عارف ازاي
ساره : اممم
واحده جت على ساره ..بإندفاع
البنت : اخيرا شفتك يا فنانه ممكن اتصور معاكي انتي واللوحه الرهيبه دي
ساره بصت لعلي بطرف عينها : اكيد يا حبيبتي اتفضلي
علي في نفسه : يا كسفتك يا حازم
علي بصوت عالي : طب هخلع انا بقا عشان منظري بقا عره
ساره ضحكت : ماشي
اسلام ماشي بين الحضور ونور معاه
_ المكان هادي ليه كدا ..انا مش حاسس الميوزك الهبله دي …. هاديه اوي
نور : دا طبيعي ..دا معرض لوح مش حنه شيماء
اسلام : طب استني عليا بقا وانا اوريكي حنه شيماء
انصرف من قدامها بسرعه وهي بتدور عليه ومتأكده انه هيعمل مصيبه
يوسف وصل بأمه واخته واسراء اول ما وصلت انضمت للبنات
وزينب امه واقفه معاه حنان راحت تسلم عليها
_ازي حضرتك يا طنط
_الحمد لله يا حبيبتي ..اي الحلاوه دي كلها
_ دا من زوقك يا طنط والله ..
_ مكنتش موجوده ساعه الهبل اللي حصل دا منيره اللي قالتلى ..كنت مسافره ..لينا قاعده سوا
حنان بصت لامها ورجعت بصت لزينب وابتسمت : اكيد يا طنط
يوسف راح للبنات يبارك لساره ونور
ساره بإمتنان : مبسوطه انك جيت والله يا يوسف
يوسف رد عليها وهو باصص لحنان : منا مقدرش ابدا ارد دعوتك ولا اي
ساره بإستغراب : بس انا م..
نغزتها حنان في جنبها ففهمت وضحكت بصوت : اه اه اكيد
نور جت عليهم :حد شاف اسلام
يوسف : لا الحقيقه …ليه يعني
نور :هنتفضح انا حاسه
فجأة الميوزك الهاديه اختفت واشتغل مكانها مهرجان والناس كلها مستغربه اي اللي بيحصل
اسلام ماشي ناحيتهم بيدندن : متغاظ عارفك يلا مننا متغاظ مخك فاضي
حنان مسكته من قفاه : يا فضحنا في كل حته …ارحم بقا يلا ..بصت ليوسف من غير ما تتكلم
فبصلها وضحك : هتصرف
اليوم كان لطيف وساره ونور انبسطوا جداا وروحوا كلهم عايزين يولعوا في اسلام واللي عمله
دخلوا الڤيلا كلهم مهدودين
حنان : احب اقولكوا ان عندنا فرح مهم بكرا
كلهم اتكلموا بصوت عالي
فكملت كلامها :لا مش ناقصه قريفه .. الفرح مهم ولازم نبقى كلنا هناك
طلعت ساره اوضتها وكل ما تفتكر منظر علي تموت من الضحك
حنان طلعت اوضتها لقت رساله على الفون من يوسف
_ بما ان نور اتقفشت فهبعتهالك هنا
تصبحي على خير يا حنه … ومش مستني رد على فكره
فاجأته وردت عليه : مش مستني رد ليه
_يمكن مش عايزه تردي
_ ومين قالك اني مش عايزه ارد
يوسف اتعدل في سريره وكتبلها : طب ما تردي
_ وانت من اهله (حطت جنبها قلب )
********

 

 

 

 

يونس صحي بدري وجهز نفسه للي هيعمله
وقف قدام صور حنان وهو بيلمع سلاحه :هخلصك منه النهارده يقلبي ..هنفضل مع بعض على طول
*********
الكل صاحي بيجهز بدري لان الفرح بالنهار وكلهم جهزوا ووصلوا للقاعه
حنان ماشيه جنب اسلام : عارف لو فضحتنا زي امبارح هعمل فيك ايه ..هشلوحك يا اسلام
اسلام : بقيت اشك انك بتاكلي العيال الصغيره
يوسف داخل هو وحازم سوا واسراء كانت مع البنات كالعاده مبيفترقوش
نور : حنان ..انا الشوز الكعب اللي لبساها دي قضت على رجلي ومش قادره يخربيتك
حنان ضحكت : هتتعلمي تلبسيه امتا بقا ..استحملي النهارده وهتتعودي
البنات شويه ووقفوا يتصوروا سوا
وسمير دخل ومعاه حسن
حسن وسمير راحوا يسلموا على يوسف وحازم يوسف رد السلام بإقتضاب ودخلوا يسلموا على البنات
_ازيك يا حنان
_كنت بخير قبل ما اشوفك يا عمي والله
اسلام بص لسمير بصه طويله
حسن وابنه سابوهم ومشيوا
نور طلعت برا وقلعت الكعب اللي لبساه ووقفت علي الرصيف الرخام اللي بتطل علي ركنه العربيات
حازم : سمير وصل اهو …هقوم اشوف الموضوع دا
يوسف : هتعرف تفتح العربيه من غير مفتاح
حازم : هو انت مشغل معاك سوسن ..متعصبنيش ..
يوسف ضحك عليه وحازم خرج
قرب من العربيه واحده واحده وبدأ يفتحها
نور شافت من فوق واحد بيحاول يفتح عربيه بطريقه غريبه …اكيد حرامي
صرخت بعلوا صوتها كله : امسك حرااااماااااي …ولا ولا ولا …حرااااماااي
الناس اللي في الشارع كلها طلعت تجري ورا حازم اللي جري مجرد ما سمع صوتها وهو بيهمس :غبييييه …بالله غبيييه
لبست جزمتها ودخلت القاعه تاني بإنتصار بعد ما الناس كلها جريت وراه
يوسف رايح ناحيه حنان يتكلم معاها وجت عليهم نور
نور بفخر : الله عليا والله …بجد انا فخوره بيا
حنان : افحميني
نور : قفشت حرامي كان عايز يسرق عربيه راكنه تحت
يوسف ظهرت عليه اعراض شلل: كان لابس بدله وكراڤت لونه ازرق كدا
نور بفرحه : ايوا هو دا
يوسف مسح على شعره بنفاذ صبر : هتشلل ..هتنقط
انسحب يكلم حازم يطمن عليه
نور :ماله دا
تليفونها رن فمشيت وسابت حنان واقفه لوحدها
جت عليها بنت وابتسمت بسماجه : ازيك يا حنان
حنان مش طيقاها : الحمدلله
البنت بسماجه : سمعت ان خطوبتك اتلغت قبلها بيوم ..يا حرام ..هو اللي خانك بقا والا انتي اللي خنتيه
حنان قربت من ودنها واتكلمت بهدوء : لولا اننا في فرح كنت رديت عليكي بس مش عايزه ابوظ ليله ليلي
حنان راحت سلمت على العروسه والعريس ومشيت لانها اتخنقت ..يوسف كان بيكلم حازم
وقفل معاه بعد ما طمنه انه هرب من اااي بيجروا وراه لقاها طلعت وركبت عربيتها ركب عربيته واتحرك وراها
وقفت عند حته قريبه من كورنيش النيل ونزلت اخدت نفس طويل وحاولت تسترخي وصل يوسف وراها ونزل قرب منها وفي عيون مراقباهم من بعيد
_حنان مالك ..مشيتي بسرعه ليه كدا
حنان اتفاجأت بيه بس مبينتش :اتخنقت شويه فقلت اشم شويه هوا
_مين اللي ضايقك
_ مفي..
قاطعها : قولي !

 

 

 

 

_بنت سمجه ورخمه دايقتني ..قعدت تلقح كلام عشان الخطوبه ..
يوسف ما صدق الموضوع اتفتح : دي متشغليش بالك بيها ..بني ادمه متخلفه ..فكك منها ….فكك منهم كلهم …خليكي فينا احنا يا حنان ..احنا لغايه دلوقتي مش راسيين على بر ..
حنان حاولت تتكلم بس قاطعها وكمل كلامه : بقالك قد ايه بتتعاملي كدا …عاجبك اللي احنا فيه ..غلطان ..وعارف ومعترف بغلطي وندمان عليه بس طالب منك فرصه …فرصه واحده يا حنان اعوضك فيها عن تسرعي ..حنان انا بحبك ..مش عايز استنى كمان ٨ سنين وانتي بعيده عني معدتش قادر استحمل بعدك ولا الجفا اللي بنتعامل بيه دا ..
حنان كانت هترد بس في لحظه واحده رصاصه انطلقت من مسدس يونس وسكنت صدر يوسف
حنان بتصرخ ويونس بيبتسم بتشفي ..اتكرك من مكانه وغادر المكان في لحظه
يوسف وقع على الارض حنان جنبه بتصرخ : يوسف …يوسف فوق ارجوووك ..متغيبش خليك هنا معايا
يوسف حط ايده علي مكان الجرح وايده اتلطخت بدمه
يوسف بصوت ضعيف وراسه علي رجلها على الأرض : ع…عارفه كنت ناوي اعملنا مكان ..(بلع ريقه بصعوبه ) مزرعه …واجيبلك فيها الاحصنه اللي بتحبيها …كنا هنروح هناك في الاجازات …وتعمليلي الغذا بإيدك ..(نزلت دمعه من عيونه وابتسم) وتحرقي الفراخ زي العزومات قبل كدا واقولك متزعليش نفسك يا حبيبي …ونجيب بيتزا ونقضي اليوم كله سوا …
حنان بتصرخ جنبه :متقولش كدا يا يوسف هنعمل كل دا سوا …متقولش كدا هتبقي كويس صدقني …قامت عشان تجيب تليفونها من العربيه تكلم الاسعاف ..
يوسف بسرعه : لا يا حنان ..متقوميش ..استني هنا جنبي …عايز تبقي آخر حاجه المحها
حنان بتبكي :متقولش كدا ارجوك ..
يوسف بضعف : حنان
حنان ردت ودموعها بتنزل على وشه : نعم
يوسف ابتسم: قوليلي حاجه جميله للمره الاخيره
حنان بتعيط وفستانها اتوسخ بدمه: خليك معايا هنا يا يوسف …متسبنيش …انا ..انا بحبك
يوسف ابتسم وغمض عينه بضعف وهمس : وانا بحبك يا نور عيني
يتبع…
يا تري كدا يوسف وحنان قصتهم انتهت ولا ايه الحكايه

يتبع ….

اترك رد