روايات

رواية عائلة بالإكراه الفصل الخامس عشر 15 بقلم سلمى بسيوني

رواية عائلة بالإكراه الفصل الخامس عشر 15 بقلم سلمى بسيوني

رواية عائلة بالإكراه البارت الخامس عشر

رواية عائلة بالإكراه الجزء الخامس عشر

عائلة بالإكراه
عائلة بالإكراه

رواية عائلة بالإكراه الحلقة الخامسة عشر

جه معاد الميتنج والكلاينت وصل ويوسف كان وصل واستقبله فى غرفه الاجتماعات
منى بلغت حنان انهم وصلوا وحنان خدت ورقها المهم وراحت لغرفه الأجتماعات …بس اتصدمت لما شافت الكلاينت
_انت ؟!!!!
يونس المنشاوي بضحكه خفيفه: ايوا بالظبط كدا ..قابلت حضرتك فى الغردقه الاسبوع اللى فات
حنان بإنتباه وخبطت راسها بخفه : ايوا صح …يونس المنشاوي مش كدا … تشرفنا
حنان قعدت بتحاول عنيها متقابلش عيونه ..خايفه عنيها تخونها هى مش عايزه تعاتبه ابدا العتاب دايما بيبقا بين الاحبه ..عقلها اقنعها انها كرهاه .. بس متعرفش ان روحها فيه للابد
يوسف مستنى عنيهم تتلاقى ويشوف عنيها فيها اى ..عيونها هتعاتبه ..ولا هتكتفى بالكلام اللى اتقال ليله امبارح
‏حنان بتفكر هو انا هشوفه قدامى كل يوم كدا …
قطع حبل افكارهم يونس : انا مصري بس عشت حياتى كلها فى أوروبا و رجعت من سنتين بس اسست مستشفى خاصه بيا…
يوسف وهو بيقلب فى الورق اللى قدامه وقال بملل : اه وبعدين
حنان بصتله وكأنها بتقوله ” بطل استهتار قدام الراجل ”
بصلها بصه معناها ” والله انا حُر بقا ” حمحم بعدها وقال بوضوح : كمل كلامك دكتور يونس
يونس بضيق : قلت مفيش احسن واضمن منكوا فى المستلزمات الطبيه ..ف شحنات المستلزمات السنادي من القاضي جروب لو مفيش موانع يعني
الاجتماع خلص وحنان اتحركت لمكتبها وقابلت منى قبل ما تدخل
حنان : منى عايزه تقرير كامل عن الدكتور يونس المنشاوى ..وعايزه قهوه
منى : تمام يا فندم
دخلت مكتبها وقفت في شباكها وعطت ظهرها للباب بتبص على العربيات من فوق وسرحانه في كل اللى فات والحال هيوصل بيهم لفين اكتر من كدا ..
خانتها دمعه ونزلت من عنيها لما افتكرت اللي عمله فيها حبيبها ..الباب خبط فمسحت دمعتها واخدت نفس طويل وقالت بصوت محشرج : ادخل
دخلت منى وفي اديها القهوه : القهوه اهى يا فندم والتقرير هيحتاج وقت شويه
حنان حاولت تبتسم :تمام تسلم ايدك يا منى …
منى بتردد : هو حضرتك كويسه ..

 

 

 

حنان ابتسمت بسخريه : انا كويسه جدا ..
منى خرجت في حيره لقت هادى مستنيها بره
_ هاا اي اخبارها
_مسهمه …بتسرح ..ابتسامتها صعبه اوى يا هادي ..حبيبتي المفروض خطوبتها النهارده واتلغت
هادي اتنهد : مش عارف آخرتها اي
_طب مستر يوسف
_ ميختلفش عنها حاجه ..ولسه مكلمتهوش من الصبح ..ربنا يوفق
**********
اسلام بيكلم عماد
_ اي يا دود ..واحشني يا عم
_وانت والله يا صاحبي
_ بقولك اي ..ماتيجي ننزل النهارده
_ ياريت يا اسلام والله الواحد زهق من النوم
_ اشطاا على بليل كدا نتقابل فى كافيه..هبعتلك اللوكيشن وننزل شويه …بس طالب منك حاجه
_قول
_عايز من نفس الدواء ..بس المرادي مش ٣ علب ..عايز ١٢ علبه
_نعم !!!
_ عايزهم معايا يعني وكدا ..اصلي تعبت جامد اخر فتره عارف انه صعب عليك بس انا لازم اخده منك النهارده …لو اضطريت هديك دبل حقهم
عماد كدا اتأكد ان اسلام ادمن وش
_ ماشي اتفقنا …هحاول اجيبهم
اسلام قفل معاه وهو مبتسم بمكر
ومستني بليل بفارغ الصبر
*********
اسراء في مطعمها بتغسل المواعين وهي مراقبه الزينه اللى كانت مجهزاها عشان الخطوبه
رمت الطبق اللى في ايدها في الحوض بضيق
_يووه …لازم اشوف حد يغسل المواعين دى ..انا تعبت
طلعت تليفونها واتصلت على رقم
_ سوسو …ليكي وحشه يا بنتي والله
_ وانت والله يا معلم ..بقولك اي ..انا فتحت المطعم تاني وبما انك قاعد في بيت خالتي اكل ومرعى وقله صنعه من ساعه ما رجعت من السعوديه..فتعالى ساعدني بقا
_ بس انا حبيت الاكل والمرعى وقله الصنعه
_تصدق ..انا غلطانه ..اقفل يلا
_استنى كدا متزوقيش ..طيب اجي امتا
_ايوا كدا اظبط ..تعالا من بكرا بقا
_اشطا ..خالتي عامله اي
_كويسه ..وخالتي
_كويسه …مبتبطلش خناق معايا بس كويسه ..
قفلت معاه بعد كلام كتير اتصلت فيديو كول على البنات فتحت حنان من مكتبها وساره ونور من المرسم
ساره بتحاول تغير من مود حنان : يا اهلا يا اهلا يعني يونس دا حلو يعني ولا اي
حنان : اتنيلي بقا يختي ..وانا كان في دماغي حاجه ..
اسراء : انتي كويسه يا حنان
حنان بتعب : مصدعه اوي ودايخه
نور بقلق : آخر مره كلتي امتا
حنان : امبارح علي الغذاء
اسراء : انتى غبيه يا حنان ..احنا العصر ..لازم تاكلي حاجه
ساره : حبيبتي مينفعش
اسراء : انا هبعتلك وجبه علي الشركه وتاكليها يا حنان
حنان اتنهدت : حاضر
الباب خبط على ودخل بوكيه ورد كبير عليه كارت قلبها دق بعنف ..ممكن يكون يوسف البنات لاحظوا تغيرها
نور : ايه يا حنان في اي
حنان : دا بوكيه ورد ..استنوا اشوف مين بعته
ساره : بيحبك يا حنان ..صدقيني بيحبك
حنان بضيق : ممكن تستني شويه
قامت اخدت الورد من العامل وحطته علي المكتب وفتحته الكارت اللي محطوط فيه
” نهارك جميل شبهك”
يونس المنشاوي

 

 

 

حنان زعلت اوي انه مش يوسف بس مبينتش قالت للبنات بإسغراب : دا يونس
ساره بضيق :انا مش مرتاحه للراجل دا ..محبتهوش من قبل ما اشوفه كدا
اسراء : ودا يبعتلك ورد بمناسبه ايه ان شاء الله
حنان : مش عارفه ..بس هتجاهل الموضوع
نور : الولا دا رخم …رخم اوي يعني ..اكيد يعرف ان خطوبتك كانت النهارده ..الوسط بتاعكوا كله يعرف
الباب خبط على حنان فقالت بصوت محشرج :اتفضل
دخل يوسف وعينه واتلاقت بعنيها قبل ما يتكلموا
عنيه بتعتزرلها مليون مره وتطلب منها السماح
وهي عيونها بتعاتبه على اللى عمله
قطع حديث النظرات ساره : ايه يا حنان رحتي فين
حنان فاقت بإرتباك : لازم اقفل يا بنات ..هكلمكم تاني
قفلت معاهم
_في حاجه مستر يوسف
يوسف : حنان لازم نتكلم
حنان بهدوء بتتجاهله وراحت ناحيه مكتبتها وتقلب في الكتب : مفيش حاجه نتكلم فيها يا مستر يوسف
يوسف برجاء : حنان انا بحبك
كانت اول مره يقولها …حست قلبها بيتنفض ..كان نفسها تسمعها وتصدقها ..كان نفسها تسمعها وعنيها في عينه وقلبها وعقلها متفقين وراضيين عنه
سابت الكتاب من ايديها وماشيه تطلع بره المكتب كله مسكها من ايديها زعقت فيه : اياك تمسك ايدي تانى ..متلمسنيش ..متلمسنيش ومتكلمنيش ومتحطش اعزار …(زعقت بصوتها كله) سيبني في حالي يا يوسف ارجوك …ابعد عني بقا
بعد ايده عنها واتكلم بنرفزه : كنت مضطر …صدقيني …انتي اكتر واحده عارفه اسراء كانت عامله ازاي ..اسراء كانت هتموت يا حنان ..وانتي شاهده على دا ..مكنتش اقدر اشوف اختي كدا واسكت ..الناس بقت تتكلم ..جوزها سابها قبل الفرح وخلع ولا أكن ليه زوجه بتحبه وبيحبها ..مكنتش قادر اسيب اختي كدا ..كان لازم اجيب حقها ..حق كسرتها ووجعها ..انتي شاهده صدقيني مكنش بإيدي
حنان زعقت : مقلتليش لييييه …كنت متخيل اني اعرف مكانه وساكته وسايبه صاحبتي بتعاني ..عملت فيا كدا ليه يا يوسف …انت عارف انا حاسه بإيه …نفس اللي اسراء حست بيه وقتها ..(زعقت بقهره ودموعها نزلت ) انت كسرتني ..كسرتني ووجعت روحي ..كنت مستنيه فيك عوض عن وهم ابويا عيشني فيه سنين بس مفرقتش حاجه عنه يا يوسف ..دست على قلبي انت كمان …
يوسف بكسره : مكنتش قادر اقولك ..كنت حاسس دايما بالذنب ناحيه اسراء …كنت ناكر حبي ليكي …ازاي احب واعيش حياتي واختي لسه بتداوي وجعها ..مكنتش قادر يا حنان ..اسراء مع الوقت حست حبي ليكي …اتكلمت معايا …وساعتها اتقدمتلك للمره الاولي ..
حنان : اي !!!!
يوسف : طلبتك من ابوكي ..ورفض ..حسسني اني ولا حاجه ..ازاي راجل بيشتغل عنده يتجوز بنته ..رفضني وسكت ومقلتلكيش حاجه ..واتقدمتلك للمره التانيه ورفض بردو …
مكنش يعرف اني واقع فيكي
حنان : مش مبرر عدم قولك ليا
يوسف : كنت خايف اجرحك ..كنت بحافظ على حبي
حنان : وانت كدا حافظت عليه ؟!
ملوش لازمه الكلام يا يوسف ..ملوش لازمه الكلام …
يوسف : يمكن كذبت في دي …بس حبي ليكى عمره ما كان كذبه
حنان ووجعها ظاهر على وشها : للاسف يا يوسف ..حبك مش كفايه يداوي الجرح اللي سببته ولا يرجع الثقه اللي ضاعت
اخدت شنطتها وتليفونها ونزلت جري
وقعد هو على اقرب كرسي حط دماغه بين اديه الاتنين دمعه نزلت من عينه ندمان اشد الندم على اللى عمله لحبيبته
حنان مجرد ما ركبت عربيتها انهارت وبكت كتير
هديت بعد مده مش قليله واتحركت بالعربيه فضلت سايقه كتير اوي ..لغايه ما وصلت لمكانها .. دائما شايفه انها مكانها ..اسكندريه ركنت العربيه ونزلت قعدت على البحر ..كاتم اسرارها .. دائماً تيجي تشتكيله وكأنه بني ادم مش امواج
نزل من عربيته وقرب عليها وقال بهدوء : كل دا ..دا البحر يزهق منك بقا
بصت له بعيونها اللى غلب عليها اللون الاحمر من كتر العياط : دكتور يونس ؟! …بتعمل اي هنا
يونس : عرفت انك هنا وزعلانه بالمنظر دا ..ماهنش عليا اسيبك لوحدك
حنان بإندفاع : وانا مطلبتش وجودك
حطت اديها على وشها وهديت شويه : عفواً ..انا تعبانه بس شويه ..وهبقي كويسه ..اسفه بس عايزه اقعد لوحدي
يونس : متأكده ؟!
حنان بملل : اه متأكده ؟!
يونس : طب ممكن تبقي تطمنيني عليكي
حنان : ان شاء الله
**********

 

 

 

عماد دبر ال١٢ علبه بالاتفاق مع سمير ونزل لأسلام فى الوقت اللى اتفقوا عليه
اسلام :هاا انت فين
عماد: لسه فى العربيه يا معلم
اسلام :اي اتصرفت ! جبتهم
عماد : ايوا يا صحبي ..العلب معايا ربع ساعه وابقي قدامك
اسلام قفل معاه ورن على تليفون تانى
_ الو ..سياده المقدم …اي يا عم ..نسيتنا ولا اي
_ازاي يا اسلام عيب عليك يلا والله
_ عامل اي .. واي اخبار عيالك العفاريت
_عيالي عفاريت زي ما هم يا عم ..وانت عامل اي النتيجه هتطلع امتى
_متفكرنيييش ..انا لسه مخلص امتحانات ..المهم ..كنت عايزك في حوار كدا
_عنيا ليك يا معلم
_ في ولا كدا مش مظبوط ..بيبع مخدرات للشباب ..بيخليهم يدمنوا غصب عنهم ويوقعهم ويجيبلهم المخدرات بعد كدا
_حلو اوي ..معاك عنوان التاجر اللى بيجيب منه
_ لا ..بس انا عرفت ان الولا ربع ساعه وهيبقي في كافيه (…..) ومعاه ١٢ علبه (……)
_تمم كويس جدا يا اسلام .. عموماً مكافحه المخدرات هتتحرك حالا .. شكراً علي خدماتك يا معلم
_ اي خدمه يا سياده المقدم
اسلام فضل قاعد بعيد مراقب عماد لما جه وفضل مستني لغايه ما جم قبضوا عليه
_انت اللي عملت كدا في نفسك يا صحبي ..
اسلام اتحرك وراح لسوبر ماركت ومن هناك على القسم ودخل وقابل المقدم
_انت بتعمل ايه هنا
_ممكن اتكلم معاه شويه
_لازم يعني يا اسلام
_اه ..معلش مش هطول
_طيب
طلعوا عماد من الحجز وودوه علي المكتب مكان اسلام
_ اسلام ..الحقني ..اتقفشت بالعلب يا صحبي
_اتقفشت !!! …ليه مالها العلب مش فاهم
عماد مكنش عارف يرد عليه قعد اسلام على الكرسي وحط رجل على رجل واتكلم بهدوء : مغفل اوي يا عماد ..وراح جاي يا صحبي يا حبيبي …يا اخي جتك القرف ..استني بقا وشوف سمير بيه هيخرجك من هنا ازاي ..
عماد بخوف : اسلام …
قاطعه اسلام بهدوء مريب : اخرس
قام بنفس الهدوء وعدل هدومه وعطاه الكيس اللي جايبه معاه
عماد : اي دا
اسلام : دا عيش وحلاوه يا ميدو …لزوم السجن وكدا .
سابه ومشي وعماد معرفش ينطق كلمه
طلع و قابله المقدم : دانت داهيه
_انا يا سياده المقدم ….. شكراً على ثقتك الغاليه
المقدم بجديه : اسلام اوعى تكون انت اللي حاطتهم في شنطته
اسلام اتكلم بجديه : اكيد مش هعمل كدا ..دا مش بريئ …وانا مش كدا وانت عارف
ابتسم بهدوء: شكراً تاني مره ..كويس انك عرفتني
**********

 

 

 

حنان رجعت البيت بليل مهدوده لقت اسلام وساره ونور قاعدين سوا
_مش مطمنه لمنظركوا والقعده دي
نور : لألألأ …اخص يبنتي والله
ساره :كنتي فين يا بت
حنان : رحت اسكندريه شويه
اسلام : من غير ما تعرفيني ..ازاي تعملي كدا
حنان : معلش اسفه يا سي السيد ..هبقي اديك سجل بتحركاتي
ساره : بقولك اي ..انا جعت … ماتيجي تقول للبت اسراء وتيجي وتجيب معاها عشاء …ومتقوليش لأ
حنان ابتسمت اخيرا :ماشي يستي هطلع اغير هدومي واجي
مجرد ما طلعت بصوا كلهم لبعض واتنهدوا بحزن
اسراء جت وحنان نزلت وقعدوا كتير يضحكوا سوا واسلام طلع عشان يسيبهم شويه لوحدهم
حنان : قالها !
اسراء : قال اي
حنان : بحبك …اول مره اسمعها منه النهارده …
كان نفسي اجي اقولكم وانا مبسوطه وبتنطط ..بس اهو ..
اسراء بصتلها : اخويا دا حمار اوي ..
ساره : وغبي
نور: واهبل
حنان : اهدي يختى انتى وهي ..انا هقوم انام تصبحوا على خير
الايام بتعدي وتفوت ..سمير عرف ان عماد اتقبض عليه وطبعاً عمل حيله عشان ميجيش سيرته في القضيه وعماد اعترف على التاجر اللى كان بيجيب منه المخدرات
حنان ويوسف على حالهم ..يوسف كل يوم بالليل يبعتلها مرسال على البيت ..بيعتذر فيه ..كل يوم ..مافوتش يوم ..مستني من عيونها نظره او اشاره ..مفقدش الامل في كلامه معاها ابدا
ويونس بقا دايما يبعت ورد لحنان ..بلاتوقف مهما اتكلمت معاه .. بيحاول دائما يقرب منها ويعودها على وجوده
اسلام قلقان جدا لان نتيجته قربت
وساره ونور مستمرين في شغلهم للمعرض
يوسف بقى يلاحظ ان كل شويه حنان يجيلها ورد
في مره كان داخل العامل بورد جديد
_يا برنس
_ايون

 

 

 

_ لمين الورد دا
_حنان القاضي يا فندم
_تمام هاته وانا هديهولها
العامل بصله بتردد ويوسف اخده من ايده فمشي
دخل هو مكتبه وفتح الكارت اللى على الورد
“صباحك جميل زيك ”
يونس المنشاوي
اتعصب جدا :لا دا يونس زفت المنشاوي ..
رمى الورد في الزباله وقام على مكتب حنان بس قبل ما يفتح سمع يونس بيتكلم
_تتجوزيني يا حنان ؟!!!

يتبع ….

اترك رد