رواية حب وكبرياء الفصل الثاني 2 بقلم آلاء محمد

رواية حب وكبرياء الفصل الثاني 2 بقلم آلاء محمد

رواية حب وكبرياء البارت الثاني

رواية حب وكبرياء الجزء الثاني

رواية حب وكبرياء الحلقة الثانية

هاجر فضلت واقفه بصالهم و مش مدية اي رد فعل .. فاقت علي صوت سارة ..
سارة بكسوف / ده بيتك ! شكله حلو اوي ..
……مازن ابتسم/ تسلميلي .. لو حابه تغيري اي حاجة فيه قوليلي .. تعالي اوريكي اوضتنا .. بعد اذنك يا هاجر في عشا في المطبخ ممكن تجهزيه عقبال ما أفرج سارة علي الشقه ..
…..مازن مستناش ردها و اخد سارة و دخلوا الاوضه وقفل عليهم .. أما هاجر كانت واقفه مكانها مصدومه..
مكنتش متخيلة ان مازن فعلا يتجوز عليها كانت فكراه بيهددها بس
لكن اتفاجئت انو نفذ .. خرجت من صدمتها أما سمعت صوت ضحكتهم سوا ..
…..هاجر لنفسها / فيها ايه ما يتجوز وانا مالي واصلا انا مش بحبه ولا بطيقه ..
…..اتحركت و دخلت المطبخ جهزت الأكل و خرجته .. قربت من الاوضه ولسه هتخبط سمعتهم بيتكلموا و بيضحكوا .. خبطت و مازن فتح ..
هاجر بتوتر / الأكل .. الأكل جاهز ..
مازن / شكرا .. ياريت متضايقيش لو صوتنا علي شوية ..
هاجر بتردد / لا .. لا يعني واتضايق ليه ! خدوا راحتكم ..
……هاجر سابته و دخلت اوضتها بس مكنتش مرتاحه .. كانت حاسه انها مخنوقه و نفسها تعترض و تقول لا .. فضلت رايحه جايه في الاوضه وهي مش عارفه تعمل ايه لحد ما جتلها فكرة ..
…..أما في اوضه مازن .. كان قاعد بحرج قدام سارة اللي بتبصله بحب واضح اوي ..
زهرة / تحب ننام يا مازن ..
…..مازن بصلها وابتسم / ياريت بس ناكل الأول .. يلا ..
…..قعدوا ياكلوا و هما بيتكلموا بهدوء .. لفت نظر مازن رقه و احترام سارة .
. كانت مبتسمه و بتضحك بخفه .. كان نفسه هاجر تكون كده بس للأسف هي مش كده ..
لو كان قلبه بايده كان اختار سارة مش هاجر .. فجأة وهما بيتكلموا لقي هاجر بتخبط عليه ..
مازن / ايوا يا هاجر!
…..هاجر/ اصل .. يعني .. اصل فيه حاجة غريبة في الاوضه ..انا سامعه صوت غريب ..
مازن بقلق / صوت ايه ..
….هاجر/ مش عارفه ممكن تيجي معايا لو سمحت .. أنا خايفه اوي ..
…..مازن بصلها باستغراب وفهم ايه اللي بتعمله .. ابتسم بخبث ..
…..مازن / انا اسف يا هاجر .. مقدرش اسيب مراتي و اجي .. انتي عارفه بقي دي ليلة دخلتنا ..و محدش بيسيب عروسته كده خصوصا انها بتحبني و بتحاول ترضيني ..
……هاجر بغيظ / ماشي بس انا كمان مراتك وليا حقوق .. وانت المفروض تعدل بينا ..
……
مازن / انتي اخر واحده تتكلم في موضوع الحقوق ده .. بعد اذنك بقي ..وبعدين مش دى كانت رغبتك
……مازن قفل الباب في وشها و دخل تاني .. فضلت واقفه مكانها بصدمه ..
مكنتش متخيلة ان مازن يبقي قاسي كده معاها رغم أنه بيحبها ..
قعدت في الريسبشن و دموعها نزلت .. كان جواها نار مش عارفه تتغلب عليها ..
تاني يوم صحيت من النوم و خرجت من اوضتها وجت تدخل الحمام اتفاجئت ب مازن خارج منه .. بصتله وجت تدخل مسكها من ايدها ..
……مازن ابتسم / مفيش مبروك ولا صباحيه مباركه ولا اي حاجة ..
هاجر بلعت ريقها / مبروك ..
….مازن / الله يبارك فيكي .. ممكن بعد اذنك بقي تظبطي الحمام كده عشان مراتي تاخد شاور .. اصلها مرهقه اوي ..
…..هاجر بصتله / وانا مالي انا .. هي تقوم تعمل لنفسها ..
……مازن / معلش اصلها عروسة بقي و كده .. انتي مش هتفهمي ده ..
…..هاجر/ مازن .. بطل تستفزني .. انا صحيح مش فارق معايا بس بطل حركاتك دي وكأنك عايز تثبت اني غيرانه ..
……مازن/ لا خالص انا مش عايز اثبت حاجة .. انا بس بطلب مساعدتك و عارف انك مش هتغيري .. اكيد مش هتغيري ..
…..هاجر بتحدي / ايوا مش هغير .. و هوضب الحمام عشان اثبتلك وهعملكم اكل كمان ..
مازن / مستني .. أما نشوف ..
…..هاجر كانت حاسه ان مازن هينتصر عليها ف قررت تعمل ده عشان تثبتله انها مش بتحبه
و مش بتغير .. كانت بتعمل الأكل وهي بتغلي من جواها و بتلعن الظروف اللي حطتها في الموقف ده ..
…..أما عند مازن في اوضته .. كانت سارة مستغربة هدوءه و سرحانه .. قربت منه ..
سارة / مازن .. انت فيه حاجة مضيقاك ..
….مازن / لا ابدا .. انا بس حاسس اني تعبان و مصدع ..
سارة بقلق / طيب تخب نروح لدكتور او اجبلك دوا ..
مازن / لا شكرا يا ساره .. تحبي ننزل نتمشى شويه ..
….. سارة ابتسمت بحماس/ ياريت .. انت عارف انا بحلم باليوم اللي هنزل معاك فيه قدام كل الناس وانا ماسكه ايدك
من قد ايه ! انا بحبك اوي يا مازن ..
بس انت ال مكنتش حاسس بيا
……الكلام صدمه اوي .. كان عارف انها يتحبه بس مكنش يتخيل انها بتحبه كده .. حس بالذنب لانه مش قادر يتعامل معاها ك زوجه ..
…..مازن / يبقي ننزل .. جهزي نفسك يلا ..
فات وقت وكانوا خارجين من اوضتهم .. و هاجر كانت بتحط الأكل علي السفرة ..
هاجر/ انا عملت الأكل يا مازن ..
…..مازن / لا بعدين بقي يا هاجر .. انا و سارة نازلين نتفسح شوية و كده واحتمال نتعشي برا .. كلي انتي ..
……اخد سارة و نزلوا تحت نظرات هاجر اللي كلها وجع و غيرة .. دموعها نزلت ..
……هاجر قعدت علي الركنه/ انا ليه كده .. ليه ببقي متغاظه كل ما اشوفه معاها .. ليه وانا بعمل الأكل دموعي مبطلتش تنزل ..
ليه ! انا اكيد مش بحبه .. اكيد كل ده غيرة لمجرد ان فيه واحده غيري ف حياته .. طيب لو بحبه ! ليه رفضته .. انا تعبانه اوي ..
……فضلت تفكر و هي مش لاقيه اي إجابة علي كل اسألتها .. الإجابة الوحيدة المنطقيه بالنسبالها هي انها بتحبه بس رفضت تعترف بده ..
حلمها و مستقبلها كانوا عندها اهم من اي حاجة حتي لو كان مازن .. افتكرت هي كانت معجبة قد ايه ..
فلاااش ..
…..كانت قاعده في الدرس بتاعها و معاها صحبتها الوحيدة شيماء ..
شيماء / مالك يا بت عامله كده ليه ..
…..هاجر/ اصلي شوفت مازن ابن عمي وانا جايه .. كان لابس بدلة شيك اوي .. هيييح كان قمر في ليله هادية و فيها سحاب كتير ..
….شيماء/ الله الله .. ايه الهيام ده كله .. انتي بتحبيه يا بت ولا ايه ..
….هاجر اتخضت / احبه ! لا طبعا .. انتي بتقولي ايه !
شيماء / مالك اتخضيتي كده ليه ! و ايه المشكلة أما تكوني بتحبيه .. اكيد هيتجوزك ..
….هاجر/ لا لا .. أنا مش عايزة اتجوز دلوقتي أنا لسه ورايا جامعه ..
شيماء / طيب ما تكملي وانتي معاه .. انا بنت عمي عملت كده و دخلت هندسه اهو ..
هاجر/ لا .. أنا هخلص الاول .. الجامعه عندي اهم من اي حاجة .. و بعدين افرضي وافقت وعملت كده وجيت بعد الجواز اعترض ولا انا حملت ابقى خلاص كده حلمي ضاع .. لا لا انا لازم ادخل الجامعة .. يارب بس بابا يوافق ..
باك ..
…..هاجر/ معقوله كل الحب ده يتحول لغضب و ضيق كده .. بس انا عارفه هعمل ايه ..
….فجأة تليفونها رن وكانت والدتها .. ردت وهي بتحاول تبان طبيعيه ..
…..نجوي / هاجر .. تعالي بسرعه ابوكي تعبان وعايز يشوفك ..
….هاجر وقفت / تعبان ماله .. وامتي وليه مقولتيش يا ماما ..
نجوي / مش وقته .. تعالي يلا ..
…..هاجر قفلت التليفون وجريت بسرعه لبست وهي مش في وعيها .. فضلت تكلم مازن كتير بس مكنش بيرد عليها .. نزلت واخدت تاكسي بسرعه .. طول الطريق كانت بتدعي ان والدها يبقي كويس ..
هاجر بدموع / بابا .. بابا .. انت كويس يا حبيبي ..
والدها / هاجر .. عامله ايه يا حبيبتي ..
…هاجر/ انا كويسه طول ما انت كويس .. مالك بس انت بتشوف غلاوتك عندنا ولا ايه ..
….والدها ابتسم بتعب / انا عرفت اللي حصل يا هاجر .. سامحيني يا بنتي .. أنا آسف.
هاجر بتوتر / عرفت ايه .. مفيش حاجة اصلا ..
….والدها / عمرك ما عرفتي تكدبي يا حبيبتي .. عرفت ان مازن اتجوز عليكي قبل ما يفوت اسبوع علي جوازكم .. واضح اني فعلا ظلمتك بالجوازة دي ..
…..هاجر/ ابدا يا بابا .. انا بس كان نفسي اكمل تعليمي .. حضرتك عارف من زمان وده حلمي اللي انت بنفسك زرعته فيا ..
ماما كانت دايما تدعي وتقول يارب اعيش أما اشوفك عروسه انما انت كنت بتقول نفسي أما لحد ما تدخلي الجامعه .. فاكر ؟
والدها ابتسم / فاكر وعشان كده أنا هصلح غلطتي .. هجبر مازن يدخلك الجامعه و يطلق البت اللي اتجوزها دي .. يا اما كده يا امل يطلقك ..
……هاجر/ لا حرام يا بابا هي ذنبها ايه بس .. انا بس عايزة ارجع اعيش معاكوا هنا وافضل علي ذمته لحد ما يتم سنه و ممكن نتطلق ..
والدها / حاضر يا حبيبتي ..
هاجر ابتسمت و حضنت ابوها .. شوية و الباب خبط و دخل منه مازن ..
…..مازن / الف سلامه على حضرتك يا عمي .. أنا آسف والله بس كنت برا و مسمعتش التليفون أما هاجر كلمتني ..
….ظوالد هاجر / طبيعي متسمعش ما انت مشغول مع مراتك الجديده ..
مازن بلع ريقه بصدمه و بص لهاجر بلوم ..
….والد هاجر/ متبصلهاش كده هي مقالتش انا اللي عرفت من برا .. و واضح اني استأمنت الشخص الغلط ..على بنتى الوحيده
مازن / يا عمي انا مكنش قصدي .. انا كنت بغيظها بس مش اكتر ..
…..والد هاجر / خلاص الكلام خلص .. بنتي عندي و انت هتطلقها بس مش دلوقتي ..
…..مازن/ نعم .. طلاق ايه .. أنا مش هطلق .. انا بحب هاجر و مستحيل اسيبها ..
والد هاجر/ مش بمزاجك يا مازن .. انت هتطلقها ..
…..هاجر/ بابا خلاص متعصبش نفسك .. بعد اذنك انا هروح الم حاجتي و هدومي واجي .. عشان خاطري سيبني احل الموضوع ده لوحدي ..
……هاجر اقنعت والدها انه يسمحلها تتصرف هي .. روحت مع مازن اللي كان طول الطريق بيبصلها بجمود .. اول ما دخلوا اوضتهم قعدوا بصمت ..
هاجر/ ليه !
مازن / مش فاهم .. ليه ايه ؟!
…..هاجر/ انت عارف كويس اوي اني عايزة اكمل تعليمي .. كنت بتقولي في الخطوبة انك دايما بتراقب اكونتي وانا كنت ليل نهار بشير ادعيه و حاجات كتير واني متحمسه لفترة الجامعه دي ..
يعني كنت عارف .. ليه عملت كده و حرمتني من حاجة بحبها !
…..مازن بعصبية/ ما هو عشان الحماس ده .. انتي عارفه انا بحبك من امتي يا هاجر .. بحبك من وانتي عيلة صغيرة بنت ١٠ سنين ..
كنت بتخانق دايما مع ولاد خالتك عشان قريبين منك و انتي بتحبيهم و بتلعبي معاهم وانا لا ..
وقرات في النوت بتاعتك انك معجبة بيا اوي ونفسك نتجوز بس بعد ما تخلصي جامعه ..
عارفه ساعتها كان ايه احساسي .. خوفت .. ايوا خوفت يا هاجر .. خوفت تخشي الجامعه و تتغيري و تنسيني او تعتبريني حب مراهقه و انتهي .. فهمتي بقي ..
……هاجر بصدمه/ انا مكنتش اعرف انك اناني و ضعيف للدرجادي ..
.
…..مازن قرب منها ومسكها بقوه / انا ضعيف قدامك انتي بس .. حبك الحاجة الوحيده اللي هزمتني وخلتني اعمل حاجة ضد مبادئي ..
عشان حبيتك حطيت كرامتي في الارض و فرضت نفسي عليكي .. بس اول ما اتجوزنا قولت خلاص هتنسي وكده كده بتحبيني …
هاجر/ للأسف حسبتك كانت غلط .. ايوا انا بحبك بس بحب حلمي و دراستي اكتر .. ايوا بحبك بس مش هقبل علي نفسي اعيش مع انسان اناني .. ايوا بحبك بس مش هوافق ابدا اني افضل في ضلك و انك تمحيني عشان انت تبقي موجود ..
…..مازن بحزن / مكنش قصدي .. والله مكنش قصدي .. هاجر اديني فرصه وانا اوعدك بكل اللي انتي عيزاه ..
……هاجر/ انا اسفه يا مازن .. رصيدك خلص عندي ما قبل حتي ما نبدأ سوا .. طلقني و ركز في حياتك مع سارة .. واضح انها بتحبك وانت للأسف استغليت ده ..
……برا إلاوضه كانت سارة بتسمع كل الكلام ده وهي بتعيط .. حاسه أنها كانت لعبه مازن بيستخدمها عشان يحقق غرضه
..حطت ايدها علي بقها عشان محدش يسمع صوت عياطها و دخلت اوضتها قفلت عليها ..
…..فات وقت وكانت هاجر خارجه من البيت و راحت علي بيت والدها .. كان حاسه انها رجعت لحياتها .. رجعت بيتها والمكان اللي بتنتمي ليه مهما حصل
كان وجود مازن في حياتها كان السجن اللي هيربطها و يمنعها من الحياة .. اه لسه بتحبه بس متقدرش تعيش معاه في السجن اللي بناه ده .. مازن قرر انه هيبعتلها ورقه الطلاق و فعلا طلقها ..
……فات علي اليوم ده اسبوع .. كان والد هاجر واقف في الصاله بيستعجلها ..
والدها / هاجر .. يلا يا بنتي هنتاخر ..
هاجر / حاضر يا بابا جاية اهو ..
خرجت من اوضتها ..
……هاجر/ أنا مش فاهمه يا بابا لزمته ايه نروح لصاحبك ده ما قالوا التقديم قفل خلاص و مفيش فايدة ..
والدها / يا بنتي ادينا بنحاول و بنعمل اللي علينا .. إن شاء الله نقدر نقدملك ..
هاجر / ماشي يا بابا .. يارب بس يبقي بفايده ..
….راحوا لصاحبه وقدر يساعدهم وهاجر قدمت في الكلية اللي بتحلم بيها ..
وبعدها بكام يوم فى اوصتها كانت سعادتها متتوصفش وهي بتلبس و بتظبط نفسها في المرايا عشان تروح للكلية ..
نزلت بسرعه وهي مبسوطة و متحمسة .. بس كل ده اختفي اول ما شافته علي باب العمارة .. كان باين عليه الحزن و التعب ..
خس جدا و عيونه كلها ندم .. قرب منها ..
مازن/ الف مبروك علي الكلية ..
هاجر بتوتر / الله يبارك فيك .. بعد اذنك ..
مازن / استني .. ممكن اوصلك يا هاجر .. لو سمحتي اعتبريه اخر طلب هطلبه منك ..
هاجر وافقت من غير ما تعترض .. لمعه الفرحه اللي شافتها في عينه خلتها ترتبك اكتر ..
هاجر بتردد / سارة عامله ايه .
….مازن / اتطلقنا .. هي كانت عارفه و واثقه اني مش بحبها بس كانت بتحاول .. و للأسف فشلنا ..
هاجر/ ربنا يعوضها و يعوضك خير ..
فضلوا ساكتين طول الطريق لحد ما وصلوا ..
هاجر بابتسامة/ شكرا يا مازن .. سلام ..
….مازن / سلام يا هاجر .. خلي بالك علي نفسك ونصيحه متثقيش في اي بسهولة عشان هتتوجعي اوي ..
هاجر/ شكرا علي النصيحه .. باي .
نزلت ودخلت الجامعه بسعادة .. قابلت شيماء صحبتها ..
….شيماء/ عملتيها يا بنت المحظوظة .. بجد انتي ربنا بيحبك عشان يخلي عمو يقف في صفك كده ويساعدك ..
…هاجر بحماس / الحمد لله .. أنا مبسوطة اوي يا شيماء .. يلا ندخل المحاضرة بقي .. و ناكل بطاطس سوري زي قرايبي اللي كانوا بيقولوا انها اهم حاجة في الكلية .. و نروح نجيب كتب و نتزنق زنقة الكلاب في الامتحانات ..
….شيماء / يا بنتي خدي نفسك مش كده وعموما هنعمل كل اللي انتي عايزاه بس اهدي شويه ..
خلص اليوم و هاجر روحت البيت وهي هتطير من السعاده .. بس لقيت مرات عمها بتعيط و امها قاعده بتطبطب عليها ..
هاجر/ ايه مالكوا يا جماعة ..
نجوي / مازن مسافر .. طيارته كمان ساعه ..
….هاجر بصدمه و عصبية / مسافر .. مسافر ليه .. هو بيستهبل ولا ايه .. اي شغل العيال الصغيرة دي .. هو اي حد يفشل في جوازه او شغله او اي حاجه يهرب كده ..
…..والدة مازن / انا ابني مفشلش .. أبني حب واحده مرضيتش حتي تديله فرصه .. غلط اه بس انتي كمان غلطانه لأنك حددتي نهاية من غير ما حتي ما تحاولي في البداية ..
هاجر بصت لوالدها / بابا ممكن تيجي معايا نلحق الواد ده ..
والدها بصلها / متأكده يا هاجر ..
هاجر/ ايوا متأكده ..
…..نزلت هي وباباها و هي متوترة .. كانت خايفه متلحقش مازن و يمشي و يسيبها .. شوية و وصلوا و دخلت بسرعه لقيته قاعد مستني .. اول ما شافها استغرب ..
مازن / هاجر !
هاجر بصتله / كالعاده طبعا .. هتهرب و تسيب كل حاجة .. ماشي ليه يا مازن .. ماشي ليه هااا ..
مازن بصلها وشدها بعيد و وقفوا في مكان هادي
مازن / ماشي عشان مفيش حاجة تخليني استني .. شغلي اقدر انقله برا .. و اهلي هكلمهم كل يوم .. غير كده مليش حد ..
هاجر / والله .. انت بتستهبل صح .. طب وانا .. انا يا مازن هتسيبني بعد كل ده ..
…..مازن / كل ده ايه ! هاجر انتي رفضتيني و رفضتي حياتنا بكل قوتك .. انا تعبت ومبقاش عندي طاقه احاول معاكي ..
…..هاجر / يسلام .. يعني انت تفاجئني كده و الاقي نفسي فجأة في دنيا غريبة ومعرفش فيها حاجة ومنتظر مني اتقبل بسهولة .. مازن اعترف انك كنت غلطان أما حرمتني من حلمي لمجرد انك خايف اتغير ..
مازن / ايوا غلطت .. عارف اني غلطت وكان لازم اعرف ان الحب لو بجد و صادق مهما حصل مش هيخلص او يتغير .. انا اسف يا هاجر ..
هاجر/ مازن انا دلوقتي حققت حلمي ودخلت الكلية اللي نفسي فيها .. ايه رأيك لو نحاول تاني .. بس بشرط توعدني انك تسيبني اكمل و متخنقنيش ..
مازن ابتسم/ مقدرش اقولك اي حاجة غير يلا بينا علي المأذون ..
مسك ايدها و باسها و لسه هيقرب يحضنها .. والد هاجر جه ..
والد هاجر/ لم نفسك يلا ..
مازن بصله / خير يا عمي ما هي مراتي .. هردها حالا ..
والدها/ ولو .. يلا يا هاجر علي البيت .. وانت يا ابني لو عايز بنتي تجيب امك و ابوك وتيجي تتقدملها رسمي ..
مازن / نعم ازاي يعني .. احنا نروح للماذون انهاردة وخلاص وكده كده بيتنا زي ما هو .. انا مشيلتش منه أي حاجة ..
هاجر ضحكت / بس يا مازن بصراحه انا عايزه بيت جديد .. ايه رايك نبيع الشقه دي ونجيب شقه تانيه .
. انا عايزه مكان نبدا فيه من اول وجديد صفحه جديده بيضا نكتب فيها بنفسنا كل حاجه حلوه او وحشه هتحصلنا .. عشان خاطري وافق ..
مازن / انتي تؤمري يا هاجر .. خلاص هنجيب بيت جديد ..
والدها / طب يلا يا هاجر .
والد هاجر اخدها من ايدها ومشيوا وهاجر بصت لمازن وابتسمت ..
فات ٦ شهور وكانت هاجر داخله مع مازن بيتهم الجديد وهي مبسوطة ..
مازن بصلها / اللي يشوفك كده يقول اننا اول مرة نتجوز ..
هاجر/ ما هي فعلا اول مرة بالنسبالي .. كل حاجة بعيشها معاك دلوقتي حاسه اني اول مرة احسها ..
مازن ابتسم و باسها / بحبك ..
هاجر/ وانا كمان بحبك ..
تمت ..

لقراءة باقي حلقات الرواية اضغط على : (رواية حب وكبرياء)