رواية طفلة أرهقت قلبي الفصل العشرون 20 بقلم عائشة البشير

رواية طفلة أرهقت قلبي الفصل العشرون 20 بقلم عائشة البشير

رواية طفلة أرهقت قلبي البارت العشرون

رواية طفلة أرهقت قلبي الجزء العشرون

رواية طفلة أرهقت قلبي الحلقة العشرون

” القُوة تأتي من بعد التحمل… أصمُدْ سيأتي الله بأيام تسرُّنا لن يدوم العُسْر للأبد.. واللهِ ما خابَ من قال يارب 🤲 لَا تَدْرِي لَعَلَّ اللَّهَ يُحْدِثُ بَعْدَ ذَٰلِكَ أَمْرًا “🤍🤍
حسام قربزت قدامها وبغضب😠: شني كنتو إديرو يادنيا!! شني اللي بينكم!! شني هوا الموضوع اللي بتحكو فيه!! أصلا شني اللي يربطك بعادل من الأساس!! تكلمي يادنيا تكلمي ماتزيدينيش أكثر على اللي فيا
دنيا شفتله بحده: كلكم حقراء وأولهم أنت، ونضت وقفت وخشيت بسرعه
حسام كلمتها زادت الطين بله وعصبتني فوق ماني معصب وظلمت الدنيا في عيوني ومعاش عرفت نتحكم في تصرفاتي، نضت وخشيت وأني معصب وواصل حدي😡، نبي نلاحق عليها مش راح نخليها على راحتها زي كل مره لازم تواجهني وتفهمني القصد من كلامها لو مش برضاها أكيد غصبآ عنها، بس كانت أسرع مني ومجرد ماخشيت سمعت تقربيعة باب دارها ولفة المفتاح وهالشي بدل مايخليني نيأس ونستسلم للنقاش في الوقت الحالي لا، إلا أنه زادني إصرار أني نعرف شني اللي صار بينها وبين عادل وخلاها تقولي هالكلام، أمي اللي كانت طالعه من المطبخ وشافت دنيا كيف خاشه وهيا معصبه قعدت واقفه وتشوفلي بنظرات ترقب وتحاول تفسر ملامحي اللي مادلش على شي إلا أنه الغضب اللي عندي لو طلع راح يصير شي مش لصالح حد
سعاد، بقلق: خيركم ياحسام شني فيه خيرها دنيا شني اللي صار توا العفو ماكانت فيها شي، وقربت منه
حسام أشرت لأمي بإيدي توقف في مكانها، وتوجهت للباب ونحاول على قد مانقدر نمسك أعصابي ومانتهورش ونتصرف تصرف غير لائق لاليا ولا ليها، طقيت بهدوء عكس الإعصار اللي قاعد يدور في داخلي، وبضيق: دنيا لو سمحتي أفتحي الباب وخلينا نحكو
دنيا، بعياط: مانبيش نحكي معاك خليني في حالي
حسام، بغضب😠: لا مش راح نخليك على راحتك زي كل مره، ياسر من حركات العواويل أفتحي الباب وناقشيني بعقل قوليلي شني فيه وأسمعي مني وبعدين أحكمي، وقربعت الباب بقوه: أفتحي البلي
سعاد، بخوف😟: باللهي ياوليدي خليها توا تهدأ وتفتح، فكنا من النشاف ماترعشونيش وأني صايمه
حسام، بغضب😠: بعدي ياأمي خليك بعيد فاهمه!! ماتدخليش بيني وبينها مافيش شي يخليك ترعشي قعمزي وريحي روحك
سعاد، بخوف😟: ياوليدي ربي يهديك خلي……..
حسام، بعياط: خلاص ياأمي خلاص معاش متحمل راهو خلوني معاش نبي نسمع حرف، وتلفتت وقربعت الباب بقوه من جديد، وبعصبيه😡: ماتبيش تفتحي يادنيا باهي سكري رأسك، وطلعت
دنيا الكلام اللي سمعته مش من الساهل أني نتقبله بسهوله، أني مش بارده لدرجة أنه ماتكونش عندي ردة فعل إتجاه إهانه مقدمه ليا ومن شخص مكانته خاصه وغير الكل عندي، نسمع فيه يعيط ويقربع حاولت أني نبرد روحي ونتجاهله، توقعت أنه طلع لما معاش سمعت صوته مانعرفش على شني ناوي، بس سخفتني عمتي لما تكلمت
سعاد، بخوف😟: أفتحي يادنيا راهو بيكسر الباب، يابنتي ماترعشينيش في هاليوم المبارك، غير قوليلي شني فيه وأني والله مانخليه يمسك ولا يقربك، أفتحي ربي يهديك ويهديه
دنيا وقفت وفتحت الباب، وبضيق: ها ياعمتي فتحت الباب وأني كويسه مافيا شي نعرف كيف نتخطي كل شي بروحي، غير شدي ولدك عليا بس
سعاد، بحزن😔: غير شني اللي صار بينكم شن…… وتلفتو الإثنين لما إنفتح الباب كان حسام جايب قادومه وشاكوش في إيده، أول ماشافها واقفه بحدا أمه حذفهم من إيده وقدم بسرعه
دنيا بصراحه منظره يخوف جيت وراء عمتي كردة فعل طبيعيه من خوفي
حسام شديت إيدها بالقوه وأني نجبد فيها من وراء أمي، وبعصبيه😡: حولي من قدامي ياأمي حولي
سعاد، برجاء🥺: ورأس وليدي خليها عيب عليك راهو اللي إدير فيه
حسام، بغضب😞: وهيا مش عيب عليها اللي قاعده إدير فيه فيا ياأمي، تي تحرق فيا وأني حي، تستغفل فيا تقول عيل قدامها وتهرب كالعاده تحساب روحها بتنفذ مني زي كل مره
سعاد، بخوف😟: ربي يهديك ياحسام قولي شني دارت أهو أني نقعمز معاكم وكلمها بالهادي الله، هنوني الله يهنيكم شوفني كيف نرعش معاش نتحمل راهو
حسام وجعتني أمي كيف تترجا فيا، حاولت نهدي روحي شويه، وبضيق: خلاص ياأمي ماعندك علاش ترعشي مش راح إنديرلها شي بنكلمها بس حولي من قدامي
دنيا ليش نخاف مادامني مش إمدايره شي، طلعت من وراء عمتي ووقفت قدامه، وبحده: قول اللي عندك هي خلينا نشوفو شني بتكذب هالمره
حسام جبدتها للدار وخشيت وسكرت الباب بالمفتاح، كلمت أمي من وراء الباب، وبأسف😞: ماتخافيش ياأمي مش راح إندير شي كلهم كلمتين وطالع
سعاد إنهد حيلها وفشلت وقعمزت على أول فراش قابلها وهيا الخوف والقلق بيأكلها مأكله
دنيا قعمزت وأني نشوفله بحده
حسام قعمزت مقابلها وبضيق: شني اللي صاير!! خليك صريحه ولو لمره معاي وقوليلي شني قصدك بالكلام اللي قلتيه برا، شني قالك عادل!!
دنيا أول ماشفت لعيونه ضعت بصراحه حسيت القوة اللي نتصنع فيها راح تنهار كلها لو قعدت نشوفلهم أكثر، غمضت عيوني وتنهدت بقوه معقوله يكون يكذب عليا طول الوقت اللي فات، معقوله هوا يكون شايفني زيهم، لا يادنيا ليش ماتسمعيشي قبل ليش تبني في حواجز بينكم، أنتي بروحك قلتي أنك راح تتغيري لازم تعطي فرصه ليك وليه، زفرت بضيق: حسام راح نقولك شي!!
حسام هز رأسه بلهفه: وهذا اللي نبيه منك أنك تقوليلي كل شي ومادسيش في قلبك ماتحمليش عليا يادنيا من غير ماتعرفي الحق من الباطل
دنيا قررت نحكي شي كنت محتفظه بيه لنفسي، بس مافيش إلا هالشي، ردة فعله على هالموضوع راح تبينلي نظرته من ناحيتي، نزلت رأسي بأسف😞: أنت عارف أنه…….. وقعدت نحكيله في قصة أمي اللي كنت واخذه عهدي بيني وبين نفسي أني مانحكيها لحد، بس مالقيتش إلا هالحل اللي راح يبينلي لو هوا فعلا شاريني زي مايقول أو يلعب عليا
حسام كنت مركز عليها كيف تحكي بغصه وبحة صوتها تتغير من جمله للثانيه، كانت منزله رأسها وكأنها إمدايره شي كبير وخايفه تواجهني بيه، قطعت على كلامها وهيا قاعده في نص الحكي واللي قالاته مابين شي بس الموضوع كان واضح بالنسبه ليا، نضت وقعمزت في جنبها، وبضيق: أنتي يادنيا متخيله أني لو عرفت هالموضوع راح تتغير نظرتي من ناحيتك، سكتت وأني نتنهد: معناها أنت قاعده ماتعرفيش أنتي بالنسبه ليا شني!!
دنيا الموضوع كان صعب عليا تقدرو تتخيلو الموقف اللي إنحطيت فيه نحكي على العمله الوسخه لأمي للشخص اللي يحبني، كلامه اللي مفروض يقويني ضعفني أكثر ونزلو دموعي بديت نكره في حالة الضعف اللي كاثره عندي هالفتره بدو دموعي ساهلات وعلى سبله
حسام، بحزن😔: ليش الدموع يادنيا، أمسحي دموعك وأسمعيني للنهايه بالله عليك
دنيا قمت رأسي وأني نشوفله برجاء🥺 بس إبتسامته المطمنه خلتني نرتاح نوعا ما
حسام، بضيق: من البدايه كانت نظرتي للمرحومه أمك زي نظرة الكل أنتي تعرفي المجتمع اللي أحني عايشين فيه وهيا كانت قويه وضاربه الكل بعرض الحيط، وهالشي غير مألوف عندنا والكل فسروه بشكل ثاني وكل واحد قال رأي شكل وشككو في أخلاقها، بس لأنه مافيش حد شد عليها حاجه فالكل أكتفو بالكلام وبس، وباش نكون صريح معاك حتى أني كنت نتكلم معاهم، بس ردي بالك تفهمي كلامي غلط، كان إعتراضي على طريقة لبسها ومظهرها وكيف أنه خالي سامحلها إدير اللي تبيه وعاطيها الحريه الكامله، وزادت فكرة الكره اللي عششتها في عقلي من ناحيتك في تشويه الموقف في نظري، يعني أي حد في مكاني راح يحكم نفس حكمي، نشوف في الأم اللي هيا أساس الحوش بهالشكل كنت متوقع أنه البنت تكون زيها وأحرف، نعترف أني غلطت وحكمت على المظهر، بس والله العظيم بيني وبين نفسي ماكنتش مصدق هالكلام وأول ماشفتك وشفت تصرفاتك زدت تأكدت من غلطي في الحكم على الناس من المنظر قبل مانعاشرهم ونشوف معدنهم الداخلي
حسام تنهدت بضيق وأني مش قادر نحط عيوني في عيونها، وبتوتر: والله العظيم وربي يشهد عليا أني لما عرفتك ألتغت كل الفكره السخيفه اللي كنت مكونها في عقلي عليك، وبالنسبة للمرحومه أمك ف هيا في دار الحق توا والنبي صل الله عليه وسلم قال أذكرو محاسن موتاكم، ولو حتى كان فيه شي فعلا فهو مات وأنتهي معاها، وأكيد أني مش راح نحكم عليك بطريقه جاهله بعد ماعاشرتك وعرفتك كويس، كيف تفكري أنه ممكن تتغير نظرتي ليك بشوية كلام مش معروف صحته من غلطه، وحتى لو كان صح أنتي ماليكش ذنب ومش مجبوره تتحملي أخطاء غيرك وأكيد ماحدش ليه الحق يحكم عليك بذنب أنتي ماليكش يد فيه
دنيا، بدموع😢: يعني أنت ماتشوفليش بنفس نظرتهم، ماقلتش أني ماننفعش وفاجره زي أمي
حسام الكلمه صدمتني أني لما سمعتها، يابالك هيا!!، صح ممكن قلت كلام من هالنوع بس قصدي منه ماكانش هكي، مستحيل نقول كلمه زي توا، مانعرفش ليش تفسر كلامي بهالطريقه، ولا اللي قاله غرضه أنه يفسره هكي ويشوه صورتي قدامها، نزلت وقعمزت قدامه، وبرجاء🥺: قيمي رأسك يادنيا وشوفيلي أنتي تصدقي أني ممكن نقول عليك كلام زي توا!! قوليلي مصدقه وأنتي تشوفي لعيوني
دنيا قمت رأسي ودموعي ينزلو وهزيت بمعني لا😢
حسام زفرت براحه: معناها توا تمسحي دموعك وتقوليلي شني اللي صار بالضبط ومني اللي قالك هالكلام!!
دنيا إستسلمت لرغبته وحكيتله اللي قاله عادل
حسام عادل الحيوان كنت شاك فيه أنه عنده مشاعر ناحيتها هذا ليش بعدت عليه وإنقطعت صحبتنا، بس ماتوقعتاش يطلع نذل للدرجه هذي ويدير هكي ويحرف كلامي ويشوه صورتي قدامها بالشكل هذا، زفرت بغضب😤 وأني نشوف فيها كيف تمسح في دموعها، وبضيق: خليها تقعد في بالك من اليوم لأخر يوم في حياتك مش مسامحك هالدموع تخليهم ينزلو على أسباب تافهه زي توا أو أشخاص حقيره زي عادل وغيره،
وبالنسبه للي قاله عادل على المرحومه فهوا مجرد إستنتاج منه لما الشرطه جابت شنطة أمك وتليفونها وقالو لقوهم في سيارة الراجل اللي دار معاهم الحادث، واختفاء الراجل وسيارته بسرعه زاد أكد هالإستنتاج في دماغه، بس ماقدرش يتكلم لأنه مافيش حد عنده دليل كافي، ف مات الموضوع في أرضه وكأنه مافي شي،
ماتخافيش أني راح نتفاهم معاه ونوقفه عند حده ليش يجيك أصلا بأي صفه يحكي معاك ويتعرضلك بالشكل هذا، ووقفت وأني نأخذ في نفس بالقوه😤
دنيا توترت وأني نفكر نقوله على كل شي، وبتوتر: حسام مازال فيه شي ماقلتاش
حسام، بإستغراب🤔: كيف شني هوا اللي مازال!!
دنيا، بتوتر: عمي مفتاح خطبني لعادل من حوالي شهر
حسام، بصدمه😲: كيف!! وأحني وين!! وليش ماقلتيش من قبل!!
دنيا نزلت رأسي وقعدت ساكته
حسام، بغضب😠: وأنتي شني رديتي عليه!!
دنيا، بتوتر: قتله خليني نفكر وقاعده ماعطيتاش جواب لتوا
حسام، بصدمه😲: كيف!! لا أنتي أكيد ناويه تجنيني، تكذبي صح!!
دنيا هزيت رأسي ب لا، وبتوتر: هذا اللي صار مانكذبش عليك
حسام شديت رأسي بإيديا وأني مش مستوعب اللي قاعد يصير
دنيا معاش نبي نخاف من شي قررت نقول كل شي مره واحده واللي يصير يصير، وبضيق: ولما كنت في حوش خالتي عمي بشير خطبني لسعد وقتله نفس الشي نبي وقت ومعاش رديت عليه
حسام إنفتحو عيوني بصدمه، شني اللي قاعد نسمع فيه حطتهولي كله مره واحده والمطلوب أني نستوعب!! قدمت وشديتها من إيدها بعصبيه😡: هالكلام اللي تقولي فيه حق!! ولا تلعبي عليا ولاكيف!!
دنيا، بحزن😔: أي حق، بس ممكن تسمعني زي ماسمعتك
حسام حذفتها على السرير بكل قوتي، وبغضب😠: شني بنسمع قوليلي ها شني بتقوليلي ثاني، أمتي كنتي ناويه تقولي!! لين تكملي كل شي بروحك وتعزمينا على العرس، شني بنسمع يانعن🤬، شني بنسمع هبلتيني شويه ثانيه بنمشي في الشارع وأني نكلم في روحي، نقولك نبيك وناوي الحلال وبنكلم أمي وبوي عليك وبندير شي رسمي تقوليلي لا مازال الوقت، وأنت متسرع هلبا في مشاعرك، وأنتي تقابلي في الخطاب من وراي!! شني بنسمع ثاني قوليلي، نقولك ماتخليش شي يوقف بينا ومادسي عليا شي تمشي تنخطبي من وراي وإمدايره مافي رأسك
دنيا، بحزن😔: ماعرفتش كيف نتصرف معاهم، وأنت عارف كيف كنا وقتها
حسام، بغضب😠: حتى لو كنا متعاركين هالشي مش مبرر أنك إدسي عليا ليش ماقلتيلي أول ماروحتي، شني اللي خلاك إدسي عليا تكلمي
دنيا وقفت، بتوتر: مش عارفه الحق، بس خفت عليك من أنك ممكن إدير شي متهور وخصوصا بعد ماعرفت اللي درته في ناصر
حسام، بعصبيه😡: مفكره أنه توا راح نسكت ومش راح نتهور، بس نبي نفهم أنتي شني قصدك من هالحركه بالذات، ليش مارفضيتش على طول فرحانه أنك لافته إنتباه الكل وحاسه روحك نجمه والكل يتهافتو عليه ومني للي راح يفوز بيها الأول
دنيا، بإستغراب🤔: حسام أنت شني تقول!!
حسام، بعصبيه😡: فعلا أثبتيلي أنك واحده مغروره وأنانيه ماتفكريش إلا في روحك، لو الندم يقتل راني ميت توا، مش فاهم لشني تبي توصلي بالضبط شني هوا اللي تحاولي ثتبتيه، يوم عن يوم تصرفاتك تخليني نقتنع أني غلطت لما حبيتك، ياريتني ماروحت ولاشفتك ولا عرفتك يادنيا ياريت، وفتحت الباب وطلعت وأني مش شايف شي قدامي
سعاد خشت تجري، بخوف😟: شني فيه يادنيا شني صاير يابنتي؟
دنيا كنت واقفه زي الصنم مش قادره نتحرك نهائي، نادم أنه عرفني معقوله وصلت بيه الدرجه أنه يقولي كلام زي هذا، إنهارت بقايا القوة اللي عندي وقعمزت بهدة حيل، قعدت نهز في رأسي يمين يسار، أنتي شني درتي يادنيا شني درتي!!
في هالوقت خش مصطفي وهوا ينادي: سعاد ياسعاد وين فطورك المغرب قريب راهو
سعاد شافت لدنيا اللي مابتش تتكلم بأسف، وبصوت عالي: أهو جايه أهو جايه، وطلعت وهيا تقول: أستغفر الله العظيم لاحول ولاقوة الابالله، يارب أعطيني الصبر عليهم يارب
^^^^^^^^^^^^^^^^^^^^^^^^^^^^^^^
عند محمد خش للشقه قابلاته أيه مقعمزه في الصاله وشاده المصحف وتقرأ في القرأن بصوت عالي، منظرها وصوتها وهيا تقرأ بخشوع، سحر قلبه وخلاه يقعمز وراها ويسمعلها بإصغاء كامل وهوا منسجم معاها على الأخر
بعد حوالي ربع ساعه سكرت الكتاب ووقفت حطاته على الطاوله وأول ماتلفتت تفاجأت بمحمد اللي كان يبتسم بطريقه حلوه، حست بيه خش بس ماكنتش عارفه أنه مقعمز وراها ويسمعلها
أيه، بتوتر: من أمتي وأنت مقعمز إهنايا!!
محمد، بإبتسامه😊: من لما خشيت، بصراحه صوتك روعه، حنجره ذهبيه عندك ماشاءالله
أيه نزلت رأسها بخجل: بجد!! شكرا
محمد، بإبتسامه😊: العفو، قعمزي ليش واقفه
أيه، بتوتر: معاش وقت على المغرب وأني ماعرفتش شني إندير للفطور، ياريت مشينا لخالتي أحسن
محمد، بإبتسامه😊: ماتعبيش روحك في التفكير، شويه وجهزي روحك باش نطلعو نتعشو برا
أيه، بفرحه: تحكي جد، وين بنأكلو في مطعم قصدك!!
محمد، بإبتسامه😊: إيه، علاش ماتبيش أنتي!!
أيه، بضحكه😅: لا أبدا في حد يرفض طلب زي هذا، مش مصدقه بس
محمد: أنتي ديمه هكي أي شي يفرحك
أيه، بخجل☺: زي الهبله صح!!
محمد،بإبتسامه😊: وأحلى هبله شفتها في حياتي، خليك ديمه هكي عفويتك الحلوه مخلياتك سمحه واجد على قولتكم😉
أيه نزلت رأسها وهيا متحشمه ومشت خشت بسرعه
محمد، بضحكه: عليك هبله هالبنت ماتغيرتش بكل حتي بعد هالسنين😅
عفويتك سبب سعادتي
^^^^^^^^^^^^^^^^^^^^^^^^^^^^^^^
في حوش مفتاح
كانو الكل مجتمعين على سفرة الفطور، مفتاح وولاده الثلاثه على سفره
وسالمه وبناويتها وكناينها على سفره والصغار يلعبو بحداهم
سالمه: راهو نبي إندير منه قديد متاع الموسم مش تشووه كله
عادل، بضحكه😅: نفس الاسطوانه كل عيد فاهمينها ياأمي
مفتاح: كلمتي سعاد ياسالمه باش تجي تسهر معانا ولا لا
سالمه: أي كلمتها هيا مفروض واخذه على الوضع ماهو كل موسم نكلمو فيها، وتلفتت لسناء: قولتي لأمك إمبكري لما إمشيتيلها وله
سناء: أي ياعمتي قلتلها قالت توا إنجي
علا، بهزوه😏: وليش ماداروش موسم السنه هذي عاد توا معاهم كنه جديده مفروض يكبرو بيه رغم أنها ماتستاهل شي وجهها فقر
سناء شافتلها بحده ولفتت وجهها للجهة الثانيه
سالمه، بغضب😠: أسكتي ياعلا وضمي فمك شني دخلك أنتي
علا شافت بغيض وسكتت
سميه بحسن نيه: مش إمروحين حاتم وعليوه حتى على خاطر العيد
عبير، بحده: أنتي شني دخلك بالضبط باش تسألي؟ هنيه فمك وفكيني من شرك
علا، بهزوه😏: ماقالت شي تسأل فيك على ولدك اللي من يوم سلمتي فيه معاش سألتي عليه حتى بالكذب، حتى الكلاب مادارو ديرك
عبير، بغضب😠: أنتي أخر واحده تتكلمي فاهمه ماتخلينيش نفتح أوراقك فاهمه!!
علا إنصمتت بخوف😟، أما سميه وسناء قعدو يشوفو لبعضهم بتوتر🙁
سالمه، بعياط: بتهنونا بهاللفم ولا ماتبوش، كأن هذا نوضو من وجهي وفكوني من بلاكم
مفتاح، بصوت عالي: خير بلاكم وأنتم ماتسكتوش بكل تقول خلية نحل، وتلفت لعادل اللي ناض بيشوف تليفونه لما رن، وبتساؤل: مني اللي يرن عليك توا؟
عادل، بإستغراب🤔: هذا حسام يابوي، وفتح الخط: نعم ياحسام، باهي شويه أهو جايك، حط تليفونه في جيبه وخذي مفتاحه وطلع
مفتاح وقف: هيا خفو أرواحكم وراكم ذبح وعناد، ومشي طلع للمربوعه، وهوا يقول: علا ديرلي قهوه
حسام طلعت من الحوش وأني معصب لدرجة ماأستوعبتش ونسيت كل شي قتله، ومش عارف وين بنمشي في مني بنفش غلي هوا الأول، طلعت للجامع صليت المغرب ورجعت مشيت لحوش خالي مفتاح، أتصلت بعادل قتله نبيه برا وواقف نستني فيه، تلفتت بسرعه وأني نسمع في الباب إنفتح
حسام، بغضب😠: أهلا وسهلا بولد الخال بصاحب عمري اللي يلعب من وراي
عادل، بضحكه😅: قالتلك قصدك!! ماتوقعتهاش تطلع خفيفه للدرجه هذي، وبعدين ليش ماتطلعش انت اللي تلعب من وراي، أنت اللي درقت عليا قصة حبك الملحميه مش أني
حسام كلامه وضحكه ماعطانيش مجال نصبر ولا دقيقه، وفي لمح البصر كنت فوقه وطحت فيه ضرب وسبان
عادل كان مستسلم لضربي وعنفي معاه على الأخر، محاولش يدافع عن نفسه ولا بأي حركه، وبالرغم من أني كنت صايم ومش فاطر بس مش عارف منين جتني هالقوه كلها، وكل مانذكر دموعها اللي نزلو بسببه تزيد قوتي أكثر، مابعدتش إلا لما طلع عامر وأنصدم في المنظر اللي شافه قدامه، وقعد يعيط وينادي في عصام، وقتها بس وقفت
طلع عصام وصدمته ماكنتش أقل من صدمة عامر اللي قرب من عادل بعد ماطلقه حسام وهوا يتحسس في جروحه ويطمن عليه، ويعيط على خوه
عامر، بعياط: تحرك ياعصام ولع السياره بسرعه تحرك
عصام المنظر خلاه يرتبك ويتوتر ومعاش عرف كيف يتصرف وقعد واقف في مكانه لين طلع بوه على صوت عياط عامر
مفتاح، بصدمه😯: شني اللي صار!! وقرب لعادل اللي كان خشمه وفمه ينزفو وهوا دايخ ومش قادر يفتح عيونه، ولحظات وصابه الإغماء
عامر، بعياط: تحرك ياعصام بسرعه خوك بيموت تحرك
هالكلمه كان واقع أثرها كبير على عصام اللي وأخيرا قدر يتزحزح من مكانه ومشي لسيارته بخطوات سريعه ولعها وقربها من خوها ونزل قامه مع عامر وطلعو بأقصي سرعه
هالشي كله كان تحت أنظار حسام اللي واقف في مكانه ويشوف ببرود ولا حتى موقف عادل الغارق في دمه قدر يحرك ساكن بالنسبه ليه، وواضح أنه شحنة الغضب اللي فيه كانت أكبر من أنه يكتفي بشخص واحد
مفتاح، بعصبيه😡: إنت شني اللي درته ها!! والله لو تصير في ولدي حاجه ماني راحمك ياكلب، لما نخليك تندم على اللي درته وتقول خالي قالها
حسام، بغضب😠: هذي جزات اللي يفكر حتى مجرد التفكير أنه يأخذ حاجه تخصني، حذرتكم من الأول وقلتلكم ماتخلوش حسام القديم يطلع، بس طمعكم والجشع اللي عندكم عمي عيونكم وخلاكم ماتفكروش إلا في أنفسكم، وتوا تلقو اللي بيجيكم وربي يحبكم لو جي اللي يأخذني من بينكم فيسع، ومشي بعد ماعطي لخاله نظره حاده خلاته يوقف ساكت في مكانه

في حوش مصطفي وعلى سفرة الفطور
مصطفي، بإستغراب🤔: وين حسام إمالا!! توا لما جيت شفته طالع مالحقتش نكلمه
سعاد، بتوتر: أي طلع توا كلمته قال في الجامع شويه وجاي
مصطفي: باهي نادي دنيا خليها تتعشي معانا مادامه هوا مهناش
سعاد، بضيق: قالت ماتبيش تأكل توا، صلت ورقدت
مصطفي، بأسف😞: لا حول ولاقوة الابالله العلي العظيم
سعاد، بحزن😔: قتل…..وسكتت وهيا تشوف للباب اللي إنفتح وخش منه حسام وأول ماركزت على هيئته وقفت بفزع: بسم الله عليك ياوليدي شني هالدم، سترك ياربي سترك، ومشت تجري
حسام نزل عيونه لحوايجه وإيديه اللي كانو معبيات دم وكأنه في هاللحظه هذي بس إنتبهلهم، تنهد بضيق: ماتخافيش ياأمي مش مني الدم
مصطفي وقف بخوف😟: إمالا منين هالدم تكلم ياحسام وين كنت!!
دنيا كنت متكيه لما سمعت صوت عمتي وقفت بخوف وطلعت بسرعه، وتجمدت في مكاني وأني نشوف في هيئته المبهدله وحوايجه وإيديه ملطخات بالدم، تعبو عيوني بالدموع وأني نشوفله بخوف بس ماقدرتش إنقرب وأني نشوف في نظراته الحاده ليا
حسام شكلها وهيا ضعيفه هكي مانقدرش نتحمله مش متعود عليها هكي، نزلت عيوني من عليها بسرعه مانبيش نظرتها إضعفني وتحنن قلبي عليها، اللي داراته مايتفوتش بالساهل
حسام، بضيق: مافيا شي وماصار شي باللهي نبي نرتاح شويه خلوني بروحي، وإنسحبت من بينهم وتوجهت للدروج
سعاد، بحزن😔: ربي يهديك إن شاءالله تعالا كول فمين باهي
حسام من غير مانتلفت: ماعنديش نيه توا وين إنجوع تو نأكل، ووقفت في نهاية الدروج وأني نسمع فيها
سعاد، بضيق: باهي تعالي انتي يادنيا أفطري يابنتي
دنيا، بضيق: ماخاطريش ياعمتي وخشيت وسكرت الباب
حسام تنهدت بقوه وخشيت لداري وتوجهت للدوش
مفتاح ماشي جاي في الجنان وخايف ومتوتر ومره مره يتصل بواحد من ولاده ويسأل على عادل، ومرتاحش لين طمنه عصام أنه كويس شوية جروح ورضوض، وتكمل التغذيه ومروحين
عادل طلب منهم أنه ماحد يقول اللي صار وهالشي قعد بينه هوا وبوه وخوته وحسام، والعيله كلها قالولهم أنه شاف إثنين صحابه متعاركين خش بيحز بينهم حصل نصيبه حتى هوا، بس هوا مادار هالشي إلا وهوا ناوي على شي ثاني ربك يستر
كملو موسهم عادي بضحكة ولعبه وبالرغم من أنه أغلب الأحيان حوش مفتاح مغلف بالحقد والكأبه على قلوب الناس اللي فيه، إلا أنه هالليله الكناين بصغارهم والولاد ومع لمة عمامهم خلت الضحكه ترن في هالحوش وهما ماعندهمش علم باللي مدسوسلهم في الأيام الجايه
سعاد ماقدرتش تمشي لأنه بالها مشغول مع ولدها وبنت خوها اللي كل واحد فيهم ماطلعش من داره نهائيا، صلت العشي وإستنتهم شويه وبعدين إستسلمت للنوم نتيجة الإرهاق
دنيا من لحظتها دموعي ماجفوش نهائي وأني نستني في طقت الباب أو إتصال منه أو حتى رسالة زي كل مره ينفي بيه أخر جمله قالها، بس لا للأسف هذا كله ماصارش وكأنه كان قاصدها فعلا” ياريتني ماروحت ولاشفتك ولاعرفتك يادنيا” مسحت دموعي وتنهدت بقوه صليت ركعات قيام الليل، وحاسه بقلبي يعصر فيا من خوفي عليه، مافيها شي لو أطمنتي عليه يادنيا، مافيش باس من الإعتذار مادامك غلطتي، وهالمره إستسلمت لرغبة قلبي الملحه بقوه للاطمئنان عليه ومالقيتش روحي إلا قدام داره، تنهدت بقوه وطقيت الباب بخفه وأني متأكده أنه لو راقد مش راح يسمع طقتي هذي بس ماقدرتش نقوي أكثر خايفه حد ثاني يسمعني
حسام حالتي أقرب ماينقال عنها إنسان منتهي فعليا الإرهاق النفسي والجسدي والتعب والضغط اللي قاعد يمر عليا نتيجة للرسائل المتكرره اللي مش عارف مصدرها، وزادتني هيا بأنها قدرت تفني أخر ذرة راحه موجوده عندي، وبالرغم من كل اللي درته إلا أني قاعد نحط في اللوم على نفسه في أني ماعرفتش كيف نكسبها ونغيرها للأحسن، ماعرفتش نخليها تحبني زي ماأني حبيتها
قفلت تليفوني بعد مابعت رساله لمحمد طمنته أني كويس وقاعد في الحوش، ماقدرتش نرقد أو تغفي عيني لحظه، كنت واقف في البلكونه وعيوني على المكان اللي جمعني بيها في أكثر من موقف المنور اللي كان شاهد على أولى دقات قلبي ليه وعلى إرتباكي وتوتري قدام نظرات عيونها القويه، وإذكرت واحد من المواقف
Flashback
دنيا، بإنزعاج: مره ثانيه تجيب قهوتك معاك وأني نطيبهالك فاهم!، كل ماتشوفني تبي قهوه منين بنجيبهالك أني!
حسام، بإبتسامه: حاضر من عيوني، أحلى قهوه في طرابلس وليبيا كلها تحضرلك
دنيا، بإبتسامه جانبيه: نبي من جيبك، عيونك شني بنحصل منهم أني
حسام، بإبتسامه😊: حطي عيونك فيهم ترا لو تقدري، وقوليلي شني حصلتي، كان غرضي أنه أني نبي نغرق في عيونها وهيا مش عاطيتني مجال أبدا، بصرف نظرها على أشياء ثانيه في جنبنا إلا أني
دنيا، بحده: وليش مانقدرش يعني ها ورفعت عيوني بثقه اللي في أقل جزء من الثانيه تبعثرت كلها قدام اللمعه اللي في عيونه، نزلت عيوني بسرعه وأني نحاول نتبث نظري على شي ثاني
حسام، بحب❤: في عيونك إجتمعو كل تفاصيل الجمال، بنظره واحد منهم إضيعيني وتزيدي نبضات قلبي، ليش تحرميني منهم وتنزليهم بسرعه
دنيا، بتوتر: ماحصلت شي إلا عيون عسليات عادي، شني المميز والغريب باش نشوفلهم
حسام، بضحكه: وليش متوتره أكثر مني باهي خلاص ماقتلك شي أهدي، سكتت شويه وأني نشرب في قهوتي بإبتسامه عريضه على وجهي
حسام، بجديه: بنقولك شي مهم
دنيا بتركيز: شني فيه!!
حسام، بإبتسامه: عارفه أنه عيونك مصدر سعادتي، قوتي وضعفي فيهم هما
دنيا، بإنزعاج: أستغفر الله من هبالك اللي معاش بيكمل أقعد فيها أنت والعيون اللي واخذين عقلك، خذيت قهوتي وخشيت بسرعه
حسام، بإبتسامه: أستني خليلي عيونك وبري
دنيا شفتله بإنزعاج، وطرمت شواربي بزعل وسكرت الباب
حسام ضحكت على حركتها رغم العناد والقوه اللي قاعده تتصنع فيها إلا أنه ملامح الطفوله تسيطر على تقاسيم وجهها أحيانا
Noe
حسام أبتسمت وأني نذكر في عنادها وقوتها في كدا موقف، وقطع على تأملها في خيالي، طقت الباب، توجهت للباب وأني مستغرب🤔 من اللي يطق عليا في وقت زي هذا كانت س 3، وزاد إستغرابي أضعاف لما فتحت الباب وشفتها هيا🙄، حاولت نبان بشكل عادر ونزلت عيوني لوطا باش مانضعفش قدامها، وبضيق: خيرك جايه في هالوقت شني فيه!! إنزلي بسرعه مرات أمي تفقدك، خشيت وسكرت الباب بدون مانعطيها فرصه تتكلم، وأتكيت عليه وأني نسمع في شهقاتها، وقلبي يتقطع عليها بس لازم نخليها تحس بغلطها لازم تعرف حجم الوجع والقهر اللي سببتهولي بحركاتها الغير مسؤوله
دنيا كنت إنشوفله بنظرات رجاء يكسوها الندم🥺، بس هوا ماكلفش روحه حتى يشوفلي صدني من غير مانفتح فمي، قعمزت قدام الباب وأني نبكي ونشهق زي العيل😭، ماتوقعتش أنه يكون قاسي معاي للدرجه هذي، دقايق ووقفت وأني نمسح في دموعي ونزلت بسرعه والندم بيأكلني لأني رقيتله أصلا، ماتوقعتاش يردني بالشكل هذا😔
” يُشعرني مرّه أنّي فراشتَه… ومرّة أُخرى يبتُر أجنحتي😔💔”
^^^^^^^^^^^^^^^^^^^^^^^^^^^^^^^
فات يوم العيد زي المعتاد في كل حوش ليبي، كل واحد كان يعيد بروحه وفي العشيه كلهم يلتمو على الشواء، وهالسنه كانت التقعميزه في جنان عمي المبروك
أيه، بإستغراب🤔: خيرك يادنيا مش على بعضك، عيد راهو خوذي كيكه أني درتها إمبكري وقوليلي رأيك، مدتلها الحافظه وهيا تقول: الكل يشكرو في كيكتي والحلويات اللي إندير فيهم، تعرفي من فتره في واحده جارتنا صاحبة معمل للحلو والحار قداش ماحاولت معاي تبيني نخدم معاها بس بوي الله يسامحه سكر رأسه
دنيا، أبتسمت😊 وأني نشوف لحماسها كيف تتكلم والابتسامه مرسومه على وجهها، اللي يشوفها مايصدقش اللي صار فيها، كيف قادره تكون هكي بعد اللي شافاته، بس عفويتها وروحها الحلوه غالبه على همومها، تمنيت لو نكون زيها خذيت طرف ذقته، وبإعجاب: ماشاءالله قنينه
أيه أبتسمت بس بسرعه ماأختفت هالإبتسامه لما تلفتت وشافت نظرات علا الحاده والمليانه حقد وكره، نزلت رأسها وحاولت تشتت نظرها في أي شي ثاني
محمد، بصدمه😯: تكذب صح!! أنت اللي درت فيه هكي!! تي خيرك هبلت مهما كان ولد خالك راهو!!
حسام، بغضب😠: يحمد ربه اللي جاته على هكي مش أكثر، اللي يفكر حتى التفكير أنه يأخذها مني بس راح يلقاني في وجهه ومن هاللحظه معاش ضامن روحي شني ممكن إندير
محمد، بإستغراب🤔: بس ليش ماتكلمش معقوله كلي طريحه وسكت هكي، تي كلهم قالو انه يحز في عركه حصل بوكسين بالغلط
حسام، بضيق: وينه هوا مش إمبين!!
محمد: جي إمبكري شويه عيد على بوي وروح، تي حالته بكل ياراجل ربي يهديك وخلاص، وبعدين الحق مش عليه هوا بس، حتى هيا دنيا غالطه كيف ماتقولش على شي زي هذا
حسام، بغضب😠: باللهي هيا فكني منها توا مش متحمل شي، لكن هوا يستاهل إن شاءالله غير يتربي بس، تي خسارة الصحبه اللي كانت بينا الزفت معقوله توصل بيه الدرجه يكذب ويتبلي عليا هكي، قتلك من قبل حاسه عنده شي من ناحيتها ماصدقتنيش قسما بأيات الله نشرب من دمه قبل مايكمل اللي في رأسه
تنهد بضيق على الحاله اللي وصللها حسام من الضغط المتراكم عليه وخايف أنه يضر روحه من تهوره، ناض وهوا يشوف لأيه اللي منزله رأسها وتفرك في إيديها بتوتر
^^^^^^^^^^^^^^^^^^^^^^^^^^^^^^^
محمد وهوا خاش لحوشهم ونادى: أيه تعالي شويه
فوزيه، بإبتسامه😊: نوضي يابنيتي شوفي راجلك شني يبي
أيه أبتسمت ☺ووقفت وهيا تقول: حاضر
دنيا أبتسمت بهزوه😏 وأني نشوف لعلا اللي بتتفجر من غيظها، وفي خاطري تطربقي على سطاش إن شاءالله
فاطمه، بحقد: إمالا ولدك أحمد ماروحش يافوزيه، ماقالش حتى نشوف أهلى على العيد!!
فوزيه، بضيق: ياحنه العمل عمل الله غالب الكليه ماعطتهمش إجازه حتى في العيد
(( كانو مفهمين العيله أنه أحمد يدرب في كلية الشرطه، باش لما يغيب فتره ويروح ماحدش يشك أو يتكلم عليه بشي))
سالمه، بإبتسامه: معليشي ياحنه توا يتخرج ويروح ويقعد بحداكم، وشوق من أعياد جايات توا يحضرهم
فوزيه، إبتسمت😊: إن شاءالله يارب
فاطمه لوت شواربها بغيض وسكتت
سعاد، بتساؤل: وين عادل ياسالمه ماشفتاش ولا عيد عليا قبل كل سنه يجيني هوا الأول
سالمه، بحزن😔: ياناري على وليدي والله إمبارح يحز في عركة بين زوز صحابه مشي بينهم حتى هوا والله وجهه منفخ اليوم وحالته حاله، صحيح اللي قال خيرا تعمل شرا تلقي
وهالكلام اللي قالاته سالمه لسعاد نفسه اللي قاله مفتاح لمصطفي لما سأل على عادل، وهالشي اللي خلا سعاد ومصطفي يستنتجو أنه حسام كان معاهم في عركة إمبارح هذا باش روح وهوا حوايجه دم وحالته حاله، بس دنيا كان ليها تفكير ثاني وبعد اللي سمعاته على عادل تأكدت أنه حسام هوا اللي دار فيه هكي
^^^^^^^^^^^^^^^^^^^^^^^^^^^^^^^
محمد، بقلق: خيرك شني فيه!!
أيه، بإبتسامه😊: مافي شي شني اللي خالك تسأل
محمد نشوف فيك منزله رأسك ومتوتره توقعت أنه حد ضايقك أو شي
أيه، بتوتر: لا أبدا بس مش عارفه ليش علا هكي تتصرف معاي، شكلها كرهتني لأني خذيت مكانها وخربت عليكم، بس تقدر إطمنها فتره بسيطه وكل شي ينتهي وتقدرو تكملو من وين وقفتو
محمد، بضيق: أي مكان اللي تحكي عليها، علا ماليهاش مكان عندي نهائي، وهالكلام معاش نبي نسمعه منك فاهمه!!
أيه، بضيق: بس…
محمد، بإنزعاج🤨: لا بس ولا شي، ياأيه باللهي خلينا حلوين مع بعض وماتخليش حد يأثر عليك أو تسمعي كلام من غيري وتصدقيه، صدقيني لو في عندي شي إتجاهها كنت صارحتك بس ماننكرش أنه كان وأنتهي خلاص، فلهذا نحي هالكلام الفاضي من رأسك ومعاش تفكري فيه باهي
أيه هزت رأسها بباهي وهيا تشوف للأرض
محمد قرب ووقف قدامها، شد إيدها وقام رأسها بإيده الثانيه وأبتسم على حمرة الخجل اللي لونت خدودها من لمسة إيده، وبهمس: في حاجات حلوه ليك قاعده تلعب إهنايا، وهوا يأشر على قلبه ❤ماتخليش أيا كان يخربها تمام😉
أيه، بإبتسامه☺: تمام، وجبدت إيدها وطلعت تجري بسرعه وهيا حاسه بحرارة جسمها باينه على وجهها وهالشي اللي خلاها تبتسم بتوتر
محمد ضحك وهوا يهز في رأسه يمين يسار ويردد: ورأس أمي إلا مهبوله😂
” تفاصيلها وملامحها العاديه والتي لاتلفت إنتباه أحد من حولها… أنها تأسرني كلي🤍 ”
^^^^^^^^^^^^^^^^^^^^^^^^^^^^^^^
رجعت أيه قعمزت جنب دنيا وهيا مبتسمه وخدودها حمر، وهالشي ماغابش على دنيا اللي ضحكت بصوت😅 وهيا تمرر في نظرها بين أيه ومحمد اللي طالع من باب الحوش وهوا مبتسم، وغمزتله😉 بضحكه لما قرب منهم
وهالشي ماغابش على علا اللي كانت مركزه عليهم وتتأفف بغضب😤، ناضت ومشت قعمزت جنب سنيه وسرور بالك تقدر تستفيد منهم وتأخذ شي ينفعها لضربتها الثانيه
محمد قعمز في جنب حسام اللي مركز بنظره عليها ومضايق من ضحكتها، وبإبتسامة😊: خطيره البنت مش عاديه بكل، تفهمها وهيا طايره
حسام، بضيق: إلا معاي أني للأسف أغبي مخلوقه على وجه الأرض، غبائها وإستعباطها كله أطلع فيه عليا
‏”لقد أهلكتني تمامًا ولكني لا اعرف طريقًا اخر سوى الصبر.. لعلها تتحسن”🥀🍂
^^^^^^^^^^^^^^^^^^^^^^^^^^^^^^^
دنيا فات هاليوم بليلته وهوا ماقاليش حتى كلمه كان يتجنب فيا على طول، وكل مانقرب منه هوا يبعد ويمشي لمكان ثاني ماكلفش روحه أنه يعيد عليا حتى برساله، بس أني عاذراته وأول مره نحس روحي غالطه للدرجه هذي، ولأول مره حتى نفتح النت وإندور على رساله حلوه ممكن نراضيه أو حتى نخليه يلين شويه معاي، وبصراحه أغلب الكلام تافه ومايمشيش معاي أكيد مش راح نبعتله أحبك ياأكسجيني ولا عشقتك ياأحلى صدفه في حياتي😓، سكرت وأني نتأفف على حجم التفاهه اللي شفتها في معظم الرسائل، ماكنتش عارفه بأنه هالتفاهه أستوطنت قلبي وراح تبدأ تسيطر عليا وعلاماتها راح تبان بعد إيامات قليله، وأخيرا لقيت شي مرسوخ في ذاكرتي من قرأتي للكتب، بعت الرساله وقعدت مقعمزه على أعصابي نستني في رده
حسام كنت مقعمز في داري ونتصفح في الفيس نحاول نلهي روحي في أي شي باش مانفكرش فيها، وصلتني رساله ” بدأ العد التنازلي 4″ مافهمتش شني قصده بهالكلام شكله بدي يعدلي في الأيام ولا كيف!! تنهدت بضيق وأني نستغفر، وشويه وصلتني رساله ثانيه، تأففت بغضب توقعتها منه ثاني، بس تفاجأت وأني نشوف المرسل 🤍 دنيتي 🤍 غريبه كيف تنازلت😕 فتحت الرساله
“لم اكن بهذا اللين إلا معك.. ولكنكَ أعمي لا ترا 💔”
أبتسمت بضيق كأن أني أعمي إمالا أنتي شني😞، سكرت التليفون بكل ومارديتش، فرحتني الرساله وأنها مش ناسيتني وشاغل تفكيرها ولو حتى شويه، بس كنت حاط في بالي أنه لازم تتأدب وتتعلم هالمره، إتكيت ورجعت الرساله الأولى شغلت تفكيري زعما مني هذا!! وشني يبي مني!!
^^^^^^^^^^^^^^^^^^^^^^^^^^^^^^^
ثاني يوم في حوش ناجيه
مؤيد، بإستغراب🤔: كيف هكي!! معقوله حاطتني في الحظر، خش بسرعه وهوا ينادي على إنتصار بصوت عالى
إنتصار، طلعت من المطبخ، وبخلعه: خيرك تعيط مني مات!!
مؤيد، بغضب😠: راجلك المستقبلي مات قبل مايشوفك تفكه منك
إنتصار ضيقت عيوني بإنزعاج
مؤيد، بغضب😠: هاتي تليفونك ترا
إنتصار طلعت التليفون من جيبها ومدتهوله وبخوف😟: شني فيه علاش تبي تليفوني، وقربت شويه بتشوف شني يدير، ولما شافاته حط على رقم دنيا، تكلمت بتوتر: كان بتكلمها على الجيان أمي كلمتها من شويه وقالتلها تشوف عمتها وترد عليها
مؤيد، فنص فيها بحده وأتصل وسمعه يرن عادي فصل من إنتصار ورجع أتصل من تليفونه لقاه يفصل على طول، لوحلها تليفونها وطلع وهوا معصب وعلى تقربيعة الباب طلعت ناجيه من الدار
ناجيه، بقلق: خير بلاه المنجوه هذا!!
إنتصار، بضيق: شكله دنيا حطاته في الحظر هذا باش معصب سي السيد
ناجيه، بمكر: أحسن مادارتله إن شاءالله غير يرجعله عقله ويفكنا من بلاه، خشي ألهي بغذاك خشي أختك وراجلها على جيه
^^^^^^^^^^^^^^^^^^^^^^^^^^^^^^^
دنيا طلعت بسفرة القهوه لعمتي وبناتها اللي جو من الصبح، حطيتها قدامهم: تفضلو
سميره، بإبتسامه😊: صحيتي يادنيا قعمزي أرتاحي قعمزي
دنيا، بتوتر: عمتي بتجي خالتي ترفعني
والكل قامو عيونهم لمصدر الصوت اللي قال… لاااااا
حسام وهوا نازل من فوق، وبغضب😠: لا مافيش مشي
سلوى، بإستغراب🤔: وعلاش تدخل أنت، خليها تمشي تعيد على خالتها
حسام، بغضب😠: أنتي أخر واحده تتكلمي فاهمه، هالشي مايخصكش ريحيلي روحك، وتلفت لدنيا اللي منزله رأسها، وبحده: خالتك تبي تشوفك وتعيد عليك تجيك إهنايا، نلقاك طالعه من إهنايا رجليك هاذم اللي واقفه عليهم إنشيلهولك في غمرك فاهمه!! هذا اللي ناقص غير تمشي غاذي، باش تروحيلنا متزوجه بكل المره هذي
دنيا بصراحه على قد مامضايقه من تحكمه إلا أني فرحانه بأنه ماسلمش فيا زي المره اللي فاتت وخلاني نمشي لخالتي، بس بغض النظر عن هالشي فعلا كنت مضايقه ونبي نطلع نغير جو خصوصا بعد اللي صار وتصرفاته معاي اللي تجيب الكأبه مش متعوده على هالتجاهل منه، هزيت رأسي وإنسحبت من بحداهم للدار بهدوء ومن غير ماننطق بكلمه
سميره، بحزن😔: ياناري والله تسخف لا طلعه ولا خشه خليتها مشت لخالتها حرام عليك
حسام، بغضب😠: تشوفو فيها سكتت ورضت ولا خلاص ماحدش يدخل باللهي خلوكم بعاد عليا وعليها، مش ناقصني أني راهو، وشاف لسلوى بحده وطلع
سلوى، بضيق: قاعد حامل مني من هذيكا المره حتى السلام ماباش يسلم عليا ولايعيد والله لين تحشمت قدام علي إمبكري لما فاتني وسلم على سميره، ونزلت رأسها وهيا عيونها معبيات دموع، حزت في خاطرها لقطة خوها، فعلا اللقطه بايخه ومهما كان هذي أخته وغلط يعاملها بهالطريقه، بس بطلنا ياناري قداش منه مني بيتحمل ومني بيساير وعلى مني بيطبطب وقداش بيسمع وينسي ويسكت، راهو حتى هوا دم ولحم
^^^^^^^^^^^^^^^^^^^^^^^^^^^^^^^
رابع يوم العيد في الجبل في الليل
سليمان خو خليفه: غذوه موعد المحمكه راهو باش تنزل لطرابلس مش تفوتها وتقول نسيت زي المره اللي فاتت
خليفه، بإبتسامه😊: لا هالمره بننزل ومش ناسي لأنه عندي شي أهم من قطعة الأرض اللي شهدرتو بينا بيها أنت وبوك وعمك وهيا واضحه في الأخير لمني
سليمان، بضيق: مش عارف شني بنقولو لبوك لما تحكم المحكمه وتنباع الأرض ياريتك وكلت محامي الزفت
خليفه، بغضب😠: والنبي لا محامي لا هم ليش الخساير في قضيه معروفه نهايتها وبعدين أني أكثر واحد نبيه يأخذها ويفكنا من هالدوه والنشاف ياسرنا مشاكل وهم
سليمان، بضيق: بس بوك وعمك ك..
خليفه، بغضب😠: والنبي لا بوك ولاعمك ولا الشيطان الأزرق، فكني منهم ومن عقليتهم المتخلفه ياسر من الطغيان والجبروت متاعهم ضيعونا معاهم حتى أحني، ألهي بروحك ورأس خوي ولوح عليك هالحقد والكره اللي مافيش منه فايده
سليمان تنهد بضيق وسكت هوا عارف أنه كلام خوه صح والأرض مش ليهم ولا من حقهم، بس بوه وعمه من يوم يومهم حاقدين على خوهم مصطفي لأنه من مرأه ثانيه ومش خوهم شقيقهم، وزاد حقدهم وكرههم ليه لما بوهم كتبله أحسن وأكبر أرض بأسمه باش يضمنله حقه معاهم لأنه عارفهم طاغيين ومصطفي مش راح يحصل معاهم شي
خليفه: بعتو عشي للراجل اللي في المربوعه اللي برا؟؟
سليمان، بإستغراب🤔: بعتوله، بس ماقتليش مني هذا اللي ليه قريب الإسبوع عندك، وماروحش حتى في العيد شني ماعنداش أهل يسألو عليه ولا كيف!!
خليفه، أبتسم بهزوه😏: هذا تشوف فيه، بيجيبلي اللي ليا سنين وأني نراجي فيه، وماتخافش مجرد مانوصل للي نبيه منه راح نسلمه بإيدي لأقرب مركز هوا والبضاعه اللي معاه ونرتاح من دوشته
سليمان، بضحكه: كويس بكل حتى بعد سيبت الكتيبه دماغك قاعد يشتغل😉
وكملو الإثنين هدرزتهم وهما مايعلموش باللي واقف يسمع فيهم ويبتسم بهزوه😏
^^^^^^^^^^^^^^^^^^^^^^^^^^^^^^^
في حوش مصطفي س 1 في الليل والجو كان هادي نوعا ما
دنيا قاعده نتقلب من جهه لجهه وأني النوم مجافي عيوني، عندي أرق غير طبيعي الأيام اللي فاتو، قعمزت وأني نسمع في صوت حركة في المطبخ، أستغربت🤔 مني اللي قاعد نايض هالوقت، رجعت إتكيت من غير إهتمام، بس فزيت بسرعه لما فكرت أنه ممكن يكون حسام، بصراحه تعبت من تجاهله الأيام اللي فاتو كنت نبي نفسرله موقفي بس هوا مش عاطيني مجال، بس الواضح أنه لازم نستخدم معاه طريقة الفرض الإجباري، طلعت بسرعه للمطبخ، وأبتسمت😊 لأنه شكي طلع في محله
حسام كنت في داري لما وصلتني رسالة ” أقترب موعد الحسم 1″ لوحت التليفون بغضب على طول حذفتي، ونزلت للمطبخ بندور حبوب لرأسي اللي بيتفجر، خذيت الحبه وقعمزت على الكرسي وشديت رأسي بإيديا، تنهدت من قلبي لما عرفت أنها وراي، وبضيق: ولي لدارك وأرقدي مش متحمل روحي راهو
دنيا،بإستغراب🤔: كيف عرفت أني إهنايا!!
حسام، بضيق: واضحه من ريحتك اللي تفحفح يافالحه😒
دنيا قربت وأني متوتره على الأخر مش عارف كيف نبدأ أو شني نقول باش نخليه يسمعني، بس أول ماأنتبهت لوجهه الأسود وملامحه الباهته وكيف شاد رأسه بإيديه كان منظره تعبان بكل، قدمت بخوف😟: حسام أنت كويس؟؟
حسام، بضيق: كويس، بري أرقدي
دنيا، بإصرار: لا مش راح نرقد لين تقولي لأمتي بتقعد تعامل فيا هكي، ليش ماتبيش تسمعني، أعطيني فرصه نشرحلك وجهة نظري وليش أني درت هكي
حسام قمت رأسي وسحرتني لمعة الحزن اللي في عيونها عارف روحي على قد ماتجاهلتها وتصنعت القوه وبعدت عليها، في لحظه واحده نضعف قدامهم ونستسلم
” عيناك مازالت تهزمني وأنا أدعي القوه كذبا “

” كوني قويه فالعالم لايعترف بالضعفاء.. وماأوهنكِ بالأمس اليوم وغذا سيقويك ”
حسام قمت رأسي وسحرتني لمعة الحزن اللي في عيونها عارف روحي على قد ماتجاهلتها وتصنعت القوه وبعدت عليها، في لحظه واحده نضعف قدامهم ونستسلم
” عيناك مازالت تهزمني وأنا أدعي القوه كذبا ”
دنيا جبدت كرسي وقعمزت جنبه، وبأسف😞: حسام أني أسفه والله ماعرفتش كيف نتصرف، بالنسبه لعمي مفتاح هوا ضغط عليا وأني تحشمت منه ماقدرتش نرفض على طول، قلت نقوله نفكر أيامات وبعدين نقوله مش موافقه
وبالنسبه لعمي بشير كنت عارفه أنه عصبي ومش راح يسكت ويفوتها بالساهل لو قتله لا، وقتها كنت قاعده أني وإنتصار بروحنا خفت منه بصراحه سكتت وخلاص، والله وربي يشهد عليا مافيش لحظه فكرت في الموضوع حتي شويه، كنت راح نبلغهم بالرفض بس أنت شفت مافيش وقت مناسب، وماكنتش نقدر إنقولك لأني خايفه عليك والدليل اللي درته في عادل لما عرفت
حسام، بضيق: قولي خايفه عليه هوا مش أني!!
دنيا تنهدت ومديت يدي ونزلت إيده من على رأسها وحضنتها بإيديا الإثنين، وبرجاء🥺: باللهي ياحسام ماديرش هكي، والله مافي واحد يعنيلي ولايهمني غيرك
حسام لمسة إيدها دواء لجروحي، تمنيت هالكلام إنقال في وقت غير هذا كنت فرحت بيه أكثر، شفتلها بحده: مش قتلك النظره هذي معاش تستخدميها معاي وله، نوضي أرقدي
دنيا تجاهل كلامي ولا كأني قلت شي، نفضت إيده بقوه وتلفتت للجهه الثانيه وأني نزفر بغضب😤
حسام وقف، وبضيق: نوضي لدارك هيا
دنيا وقفت، بغضب😠: تمام ماتنساش تباركلي غذوه لما نوافق على عادل
حسام، ببرود: مبروك من توا ياستي والورد عليا
دنيا مطيت شواربي بزعل☹، وخبطت رجلي في الأرض بغيض وطلعت بسرعه
حسام هزيت رأسي وأني نضحك على تصرفاتها طفله😅
دنيا من الباب، وبحزن😔: أنت ماحبيتنيش أصلا كان هذا ماكنت قسيت عليا للدرجه هذي
حسام، برفعة حاجب🤨: ماحبيتكش صار!! تعالي نقولك الحب كيف، قربت وأني ملامح وجهي حاده، وماشفتش إلا غبرتها، ضحكت وأني نسمع في لفة المفتاح متاع الدار: خوافه😅
“هـيَ نعمـة مُقيمـة بأضلُعـي ؛ اللهـمّ هـيَ إلى النهايـة❤️🦋”
^^^^^^^^^^^^^^^^^^^^^^^^^^^^^^^
ثاني يوم الصبح في الجبل
خليفه، بضيق: تي هيا ياأحمد
أحمد طلع وهوا يكركر في الكيسات اللي معاه
خليفه، بغضب😠: تي وين رافعهم هاذم رد البلي الداخل، مرات يشدونا بيهم فكنا مش لازم تعرفهم
أحمد: لا والله مانقدر نخليهم أمانه من ناس كيف نخليهم وأني مش عارف إذا مازال بنرجع أو لا
خليفه، بضيق: ترجع ترجع مانقدرش نرفعهم في سيارتي مرات يشدونا بوابه تودرنا معاك
أحمد، برفعة حاجب🤨: مش كنت تخدم معاهم مني بيكلمك؟
خليفه: أهنايا في الجبل أموري سالكه عادي مايوقفني حد لكن غاذي في طرابلس مانعرف حد ومرات يوقفونا ونمشو فيها
أحمد أبتسم على جنب😏 ورد الكيسات في مربوعة خليفه وطلع وهوا معصب على أساس
خليفه فتح باب السياره وهوا يقول: هيا عطلتنا ماتخافش حاجتك إهنايا في الحفظ والصون لين ترجعلها وبعدين أحني مش معطلين بنحضر الجلسه وعندي مشوار ع السريع ومروحين بإذن الله
أحمد هز رأسه بدون مايتكلم وركب وهوا يفكر في اللي داره إن شاءالله مايجيش على رأسه في الأخير
^^^^^^^^^^^^^^^^^^^^^^^^^^^^^^^
في حوش مصطفي
حسام: خليني نمشي معاك يابوي
مصطفي برفض: قلت لا يعني لا، خليك في الحوش ولابرا دور حاجه تخدمها على حالك، أني مش معطل كلها نص ساعه بالكثير وتفض الجلسه
سعاد: إن شاءالله غير يجو بس ومايديروش زي المره اللي فاتت
مصطفي: لا المره هذي حتى لو ماجي حد معاش تتأجل خلاص، يعني اليوم تحز بإذن الله جو ولا ماجوش
سعاد: إن شاءالله تكمل على خير ونرتاحو من هالقصه
مصطفي: إن شاء الله، وين دنيا خيرها معاش تطلع تقعمز معانا على السفره
سعاد شافت لحسام بضيق ونزلت عيونها بسرعه باش مايشكش مصطفي في شي، وقعدت ساكته
مصطفي: ناديها تشرب قهوه على الأقل من مني متحشمه
وقفت سعاد ومشت تنادي في دنيا، وحسام قعد يشوف لوطه
مصطفي: وأنت خيرك معاش مشيت للمحل قداش يوم
حسام، بضيق: مامشاش معاي يابوي مش ليا بكل الخدمه هذي
مصطفي تنهد بأسف😞: شوف عمل ثاني ماتقعدش هكي مش صغير راهو باش ترقدلي في الحوش
حسام :حتى أني مش عاجبتني راهو لكن على عينك مافيش حاجه عليها القيمه، وقام رأسه على صوتها
دنيا، بإبتسامه😊: صباح الخير
مصطفي: صباح النور يابنتي قعمزي
دنيا قعمزت وأني عيوني عليه، ماكلفش روحه حتى يرد عليا
حسام تجاهلتها وشفي للتليفون اللى رن بنغمة رساله ” اليوم موعدنا رد بالك تنسى” وقفت وطلعت بسرعه
دنيا نزلت رأسي بحزن😔 معقوله لهالدرجه مش طايق وجودي، بس شني قصة المسجات هاذم اللي لما يوصلوه ينقلب مع بعضه!!
” أ لهذا الحد لم يعد وجودي جنبه يعنيه 💔 ”
^^^^^^^^^^^^^^^^^^^^^^^^^^^^^^^
عبير بدلع: قتلك ياحبي من الأول في التليفون عادي لكن طلوع لا
……: هيا ساعه بس وتأخذي اللي تبيه
عبير: لا خلينا هكي خير صعب نقدر نطلع والله
……: قولي ماشيه إنعاين وأني نأخذك من أقرب عياده، ساعه بس إنديرو دوره بالسياره ونردك، نأخذلك شني تبي هيا شني قلتي ياروحي
عبير بتفكير🤔: مش عارفه صعب والله خايفه يشكو فيا
……: إمالا خلاص خليك خايفه ومعاش تكلميني، وسكر في وجهها الخط
عبير قعدت تشوف للتليفون بصدمه😯
علا بهزوه😏: يبيك تطلعي معاه!! ردي بالك تفكري حتى التفكير بوي من توا واقفلك على سبله راهو وديمه وهوا يعارك لما يلقك مسكره على روحك في الدار
عبير، بغيض: مش مهبوله لين إندير حاجه زي هكي، بس خساره الزفت كان يعطي في كروت بالهبل وجوه مليح
علا، بهزوه: لا خساره لاشي عندك شركه مايضرش لو نقص واحد
عبير: لكن هذا مختلف مش زيهم بكل، ورنت عليه لقاته حاطها في الحظر لوحت التليفون بغيض وناضت طلعت
علا قعدت تشوفلها بنص عين😒: الفجي وخلاص، وتلفتت لتليفونها بصدمه لما شافته يرن برقم هيا تعرفه كويس، ضحكت بإنتصار😌: عرفتك بتوليلي زي الكلب، جيت في وقتك
^^^^^^^^^^^^^^^^^^^^^^^^^^^^^^^
في السياره رن نقال أحمد اللي هوا معايره على المنبه، رد وعلى أساس إتصال من واحد صاحبه
أحمد: ها ياحسن شني الجو، أهو ياراجل وحلتني في بضاعتك وخليتني نلود بيها من مكان لمكان، كيف تبيها توا!! لا توا والله مانقدر مش معاي هيا، تي كيف بنديرلك ياراجل لازم توا يعني، أني كيف نازل من غريان جي غاذي لطرابلس، تي قتلك مش معاي، إيه علينا الزفت تي باهي خلاص خلاص، تلقاني واقف في الشريوني نستني فيك خلاص تمام، نزل التليفون وشاف لخليفه بتوتر: باللهي نزلني إهنايا
خليفه، بشك🙄: وعلاش إن شاءالله
أحمد، بضيق: هذا الولد صاحب البضاعه، قالي جايك توا يبي يأخذ بضاعته، خلي نعطيهاله ونتفكا منها
خليفه: بتولي تأخذها قصدك وكيف يصير في موضوعنا!!
أحمد: تي بنمشي أني وياه نأخذو البضاعة وبننزلو لطرابلس لبين أنت ماتكمل الجلسه تلاقني بحداك بإذن الله
خليفه شافله بشك🙄
أحمد، برفعة حاجب🤨: أكيد مش خايف مني نرخي بيك أني أكثر واحد متمني نتفكا منه باش يفضالي الجو مع الحب
خليفه صدق كلامه ونزله وكمل طريقه لطرابلس وهوا مطمن، وزاد أطمن أنه أحمد مايكذبش عليها لما كلم خوه وقاله جي أحمد هوا وواحد ثاني خذي حاجاته وطلع
أما أحمد وقف أول سياره ورجع لحوش خليفه خذي الكيسات اللي معبيهم بصوف المخدات اللي كانو في المربوعه، ولوحها في أول مكب قابله ورجع لطرابلس حتى هوا وتحديدا لشركة ليبيانا، سحب شفرة ببطاقة واحد سوداني من المقعمزين في المحطه وأتصل بمركز الشرطه قدم بلاغ وطلع للمحكمة طول وهوا يبتسم بهزوه😏: بتضحك عليا أني قاعده ماجابتش أمك للأسف
^^^^^^^^^^^^^^^^^^^^^^^^^^^^^^
حسام: خيرك جايني على صبح ربي شني حالم بيا ولا كيف
محمد قعمز على الكرسي، وضحك😅: إستاحشتك، ماهو قلت مرات اليوم أخرلك يوم معانا مانبيش نخليك بروحك
حسام، بنص عين😒: نوض نخشو للمربوعه
محمد: لا لا خلينا إهنايا الشمس مليحه، شني مافيش رساله اليوم؟؟
حسام تنهد بضيق ومدله التليفون
محمد قري الرساله وحطت التليفون بتوتر: ماتطلعش اليوم بكل خلي إنشوفو لوين بيوصل، عندي إحساس أنه واحد يلعب راهو
حسام، بغيض: أهو قاعد حتى أني على قد مادرت في بوي بنمشي معاه للمحكمة سكر رأسه
محمد: باهي اللي سكر رأسه قعمز وريح روحك
وتلفتو الإثنين لدنيا اللي طلعت من فم الباب وواضح أنها ماشافتهمش
حسام بغضب😠: على وين إن شاءالله
دنيا تفاجأت لما تكلم نحسابه طلع، تلفتت وشفت محمد، مشيت جيهتهم، وبإبتسامة😊: صباح الخير يامحمد، كيف حالك وكيف حال أيه؟
محمد، بإبتسامه😊: صباح النور، الحمدلله أني وياها كويسين، كيف حال…… وقبل مايكمل قطع عليه حسام لما قال
حسام، برفعة حاجب🤨: ليش طالعه برا، شني تبي!!
دنيا، بإبتسامه مستفزه: بنمشي نصبح على خطيبي
حسام، بغيض: على أساس اليوم بس بتعطيه الموافقه أمتي ولا خطيبك!!
دنيا، بإبتسامه😊: أي نصبح عليه ونفرحه بموافقتي بالمره، رد بالك تنسي الورد نحب الجوري راهو، وأبتسمت وتلفتت كيف بننزل الدرجه
حسام بغضب😠: زيدي خطوه واحده بس وشوفي شني يصير
دنيا تلفتت بعصبيه😡: أنت شني هوا اللي تبيه بالضبط فهمني!! أني ساكتتلك لأني عارفه روحي غالطه مش خوف منك راهو، وأتاسفت بدل المره إثنين، شني تبيني إنديرلك كأنك أنت قلبك أسود من ناحيتي هذا مايعطيكش الحق بأنك تتحكم فيا فاهم
حسام بصراحه مانكذبش عليكم كنت متوقع يطلع منها أكثر من هكي على هدوئها الأيام اللي فاتو وسمعها الكلام من غير نقاش، بس صدمني كلامها أني قلبي أسود من ناحيتها مش عارف هالمخلوقه منين نازله عليا لهالدرجه مش فاهمه شني إحساسي ناحيتها، زفرت بغضب😤: أبعدي الشيطان وخشي الداخل أفضل
دنيا، بحده: مش خاشه وبنمشي غصبآ عنك
حسام، بعصبيه😡: ديريها يادنيا وبريله كان ماباتش الليله في الجبانه مانبداش راجل
محمد نشوفلهم وساكت ماحبيتش ندخل بس عصبية حسام خلتني نخاف أنه يدير شي وخصوصا هالفتره هذي هوا مش طبيعي، وقفت بسرعه وقدمت جهة دنيا، لقطه عفويه مني جيت بنشد إيدها نبيها تخش الداخل
حسام، بعياط: حول إيدك يانعن🤬
دنيا شفتله بحده وخشيت بسرعه
محمد قمت إيديا فوق، وبتوتر: ها والله مامسيتها، هدي روحك وفكنا من النشاف الزفت خيرك إمولي عيل هكي
حسام نزلت رأسي بأسف😞: شفتها كيف خافت عليه وخشت
محمد، بملل: والنبي فكنا من الدراما الزايده شني خافت عليه هذي طلعت عيل في نهاية الحلقه ضحكت عليك وهبلاتك بكلمتين صدقت أنها ماشيه لعادل!!، تي أيه كلمتها قبل شويه بحداي وقالتلها تعالي نشربو قهوه مع بعض في حوش خالتي
حسام قعمزت على الكرسي وشديت رأسي بإيديا
محمد جبدت الكرسي وقعمزت قدامه، وبضيق: راك مزودها حبتين ياحسام ماتضغطش عليها هلبا راهي عندها سوابق البنت وتخوف، مرات إدير في روحها حاج….، وقبل مايكمل كلامه شاف لحسام اللي وقف وخش بسرعه، أبتسم وهز رأسه يمين ويسار ولهي في تليفونه
” عند المواجهه يصبحون مثل النار والوقود إذا أختلطا يهيجان بقوه غير مهتمين بما يخلفون من وراهم.. وعند الإحتياج يصبحان كالأم وطفلها الذي يلتقيان بعد طول غياب فيأخذهم الحنين ولا أحد يستطيع تفريقهم ”
^^^^^^^^^^^^^^^^^^^^^^^^^^^^^^^
حسام واقف على باب الدار، وبضيق: وليش تبكي لهالدرجه خايفه عليه
دنيا، بدموع😢: أي خايفه بس مش عليه، خايفه منك أنت اللي شكلك ماصدقت حصلت فرصه باش تتهرب بيها مني ومن مسؤوليتي
حسام قدمت شويه، وبضيق: دنيا أنتي تسمعي في روحك شني تقولي!! أني نتهرب منك أنتي وين عقلك وين!!
دنيا، بغيض: أي تتهرب ولا شني تفسير تصرفاتك معاي، أنت مش متحمل حتى تقعد معاي في مكان واحد شني درتلك أني، باهي غلطت وأعتذرت خلاص وين المشكله ليش تعاملني هكي، علاش تحسس فيا أني نكره بالنسبه ليك، ونزلت رأسي وقعدت نبكي😭
حسام اااااااااه ياقلبي شني درت فيا بس!! علاش هالعذاب اللي وحلتني فيها، قعمزت قدامها، وبإبتسامة😊: باهي خلاص أمسحي دموعك إموليه بكايه زي زمان راهو
دنيا بحده: كله منك أنت اللي رديت دنيا الصغيره الضعيفه قدامك اللي تقدر تبكيها من أتفه شي، إن شاءالله غير مرتاح توا
حسام، بأسف😞: لا مش مرتاح يادنيا صح متمنيك ضعيفه من غيري ووجودي جنبك هوا اللي يقويك، بس في نفس الوقت نبيك قويه باش تأخذي حقك وماتستسلميش لأي حد في غيابي
دنيا، بخوف😟: غياب شني أنت مش ناوي تمشي وتسيبني صح!! أنت معاش تحبني!!
حسام تنهدت من قلبي: اااااه كيف معاش نحبك كيف!! مفكره الموضوع لعبه نحبك أمتي مانبي ونكرهك أمتي مانبي، لا يادنيا على قد ماتغلطي وتجرحيني بكلامك وتصرفاتك مستحيل نتغير عليك أو ينقص حبي ليك، أنتي أحلى شي صار أو ممكن يصير في حياتي كلها، ردي بالك مهما يصير بينا تفكري التفكير هذا مره ثانيه فاهمه!! شديت إيديها وقمتهم ومسحت بيهم دموعها، وبحب❤: أنتي نبضي في حد يسيب نبضه ويقدر يعيش، خلاص عاد يابكايه ليش ماقلتيش من الأول بتمشي لأيه، نوضي أني نوصلك
” قالت: أنت لا تحبني
قلت متعجباً: أأنا!! أم لغيري كلامك توجهي؟؟
قالت: بلي أنت من لاتريد أن تغفر لي زلتي
قلت مستغربا: أو كيف أقولُ لقلبي المغرم أنكِ أخطاتي، وهو عن كل أخطائكِ عيناهُ مغمضاٍ
قالت بحزنً: إذا ماتفسير تجاهلكَ إليا المتقصدِ
قلت بحب: حبيبتي لاتحزني مهما فعلتي ستظلي أنتِ نقطتي التي بها أبدا وفيها أنتهي ”
بديت نشعر ياجماعه باركولي😅 شني رأيكم في إشعاراتي 😌🖐
“حالتكم مستعصيه بكل ربي يكون في العون إن شاءالله” قالها محمد بضحكه😅 لما شاف دنيا وحسام طالعين مع بعض وأبتسامتهم مزينه وجوههم
حسام فنص فيه: خليك نوصلها وإموليلك، وتلفت لدنيا اللي تضحك: عاجبك هكي خليتينا مضحكه للكل
دنيا، بإبتسامه😊: أنت اللي أتشحط في عروقك شني دخلني أني،وقعدت نضحك😅
حسام، بنص عين😒: خلاص بطلي ضحك خير ماتولي للحوش راهو
دنيا ها خلاص سكتت🤭
وصلها حسام وتأكد أنها خشت ولف ورجع لمحمد، اللي من لما قعمز حسام بدي في التسهويك
^^^^^^^^^^^^^^^^^^^^^^^^^^^^^^^
أيه، بغمزه😉: لا اليوم وجهك ناير والإبتسامه من القلب ماشاءالله، شني فيه
دنيا، بنص عين😒: أشي أنت اللي وجهك قريب يتفجر دم ريحي روحك خيرلك
أيه، بتوتر: ووووك منك ماحد يقدرك أنتي ولاكيف
سنيه، بضحكه: ماتعبيش روحك مع دنيا بكل راهو، القادر ربي😁
دنيا، بثقه😌: الحمدلله خمسه في عيونكم🖐
أيه: لا ماعندي علاش بنحسدك حتى أني الحمدلله☺
سنيه، بغمزه😉: أيواه ياست أيه أطلع ياحق ربي توا
أيه نزلت رأسها وأبتسمت بخجل☺
دنيا، بجديه: باللهي ركزو معاي شويه نبي نأخذ رأيكم في موضوع مهم
أيه، بإعجاب: كويس بكل وأني أول واحده معاك بس نسأل محمد قبل
دنيا: بالنسبه لمحمد ماأعتقدش يرفض تسبيله واحده بس تلقيه موافق، المشكله في اللي عندي أني ياكبدي، وتلفتت لسنيه: شني أنتي ياسنيه!!
سنيه، بتفكير🤔: والله ماني عارفه الجامعه معاش مازال هلبا وتبدأ الحق مانيش نلهي على قرايتي
أيه: ومن قالك ألهي على قرايتك تقدري إديري الإثنين مع بعض، ومنه تحصلي مصروفك راهو الجامعه مصروفها هلبا مش زي المدرسه
سنيه: باهي نفكر ونسأل بوي ونقوللكم
دنيا، برجاء: باهي تفاهمنا إمالا، باللهي نبيكم معاي يابنات بروحي مانقدر إندير شي
أيه وسنيه، بإبتسامه😊: معاك بإذن الله
^^^^^^^^^^^^^^^^^^^^^^^^^^^^^^^
مصطفي، بإبتسامه😊: لا الحمدلله كل شي مشي على خير، والله جبل وإنزاح من على كتافي، وإنباعت بسعر كويس كيف مانبي وأحسن
سعاد، بفرحه: الحمدلله ياربي وجو خوتك للمحكمة
مصطفي لا جي خليفه ولد الهادي، لأنه بوه وعمه إمدايرليه توكيل
حسام، بضيق: وهوا خليفه شني قال!!
مصطفي: ماقالش ولا كلمه طول الوقت ساكت وفي النهايه وقع على التعاهد وطلع
محمد، بإبتسامه😊: باهي كويس طيب فيك ياعمي اللي إنحلت على خير،
مصطفي: طيب وقتك الحمدلله، وطلع تليفونه، وبإبتسامة: خلي نكلم حاتم ونقوله
^^^^^^^^^^^^^^^^^^^^^^^^^^^^^^^
قبل المغرب في حوش المبروك
أيه جايبه سفرة الشاهي وحطتها قدام المبروك، وبإبتسامة😊: تفضل ياعمي
المبروك: بارك فيك يابنتي، كيف حال أهلك تكلمي فيهم!!
أيه: الحمدلله كويسين، أي مره مره مش ديمه
المبروك: باهي كويس، شني جوك أنتي ومحمد إن شاءالله غير مش إمضايقك ولا مقصر معاك؟؟
أيه نزلت رأسها: الحمدلله لا بالعكس ياعمي مش مقصر معاي بكل
فوزيه، بإبتسامه😊: حميدا مافيش منه ربي يحفظه إن شاءالله
أيه، بإبتسامه: إن شاءالله
فوزيه: كلمي سنيه وديري أنتي وياها العشي ذوقينا تطيبك الليله
أيه، أبتسمت😊: حاضر ياخالتي، وتلفتت ومشت للمطبخ، شافت تليفونها اللي يرن وداراته صامت، هذي 7 مره من بعد العصر يرن نفس الرقم، فكرت ترد مرات واحده تعرفها، بس بعدين تراجعت وقالت لو تبيني تو تبعث رساله، وطلعت بتنادي سنيه باش يبدو في العشي
^^^^^^^^^^^^^^^^^^^^^^^^^^^^^^^
دنيا، بتوتر: أيوا ياعمي كيف حالك؟
مفتاح، بإستغراب🤔: مني معاي!!
دنيا: أني دنيا ياعمي
مفتاح: أها أهلين يابنتي، ماعرفتكش أول مره تتصلي بيا
دنيا: أي توا خذيت رقمك من تليفون عمتي
مفتاح، بضيق: حتي رقمي ماعندكش!!
دنيا بتوتر: عمي بصراحة إتصلت بيك نبي نقولك شي، بالنسبه للموضوع اللي كلمتني فيه من قبل الحق أني فكرت هلبا وشفت أنه مايناسبنيش بصراحه، أني وعادل مش مناسبين لبعض نهائي،
مفتاح، بغضب😠: كيف عرفتي أنكم مش مناسبين لبعض، من أي ناحيه مثلا!!
دنيا، بتوتر: من ناحية كل شي ياعمي، وبعدين أني نبي نقرأ مانبيش نفكر في الحاجات هذي توا، ومانبيش شي يشغلني على قرايتي
مفتاح، بضيق: متأكده هذا رأيك أنتي!! مافيش حد ضاغط عليك
دنيا، بنفي: لا أبدا ياعمي أصلا مافيش حد يعرف بالموضوع حتى عمتي ماقلتلهاش، هذا رأيي أني ونتمني أنك تحترمه ياعمي وتقدر موقفي شويه أني قاعده صغيره والمواضيع هذي مش ليا بكل
مفتاح، بضيق: باهي باهي يصير خير، في النهايه انتي حره وماحدش يقدر يجبرك على شي، هيا بالسلامه توا
دنيا سكرت التليفون وتنهدت براحه وأخيرا هذا واحد من المواضيع وأنتهي على خير، مازال عمي بشير شني يفكني منه هذاكا، مجرد ماأذكرت عصبيته جسمي رعش مع بعضه، زفرت بضيق وطلعت للمطبخ بنساعد عمتي في العشي
أما مفتاح فهو مايبيش يكون خاسر في الحالتين حتى لو رفضت ولده ماكانش يبيها تكرهه زي قبل ويكسب عداوتها ويخلي مصطفي يكون أقرب منه ليها، وياريت يكون تفكيره هذا لمصلحة دنيا، بس للأسف كل همه مصلحته وبس عابي لو توددلها وكسب رضاها ممكن يحصل شي من وراها، قلوب لاتحمل ذرة مشاعر مجرده من الإنسانيه مغلفه بحب المال والتسلط
^^^^^^^^^^^^^^^^^^^^^^^^^^^^^^^
في الجنان كان محمد وحسام مقعمزين لما طلعتلهم دنيا القهوة
محمد، بإستفزاز: أوووو قهوه ومن إيدين دنيا مش عاديه بكل
حسام، برفعة حاجب🤨: تعرف تهني روحك ولا لا
محمد، بغمزه😉: نحركولك في مشاعرك الخامده خيرك معانا
حسام، بنص عين😒: ماتخافش متحركه وبقوه خليك في حالك أنت بس
دنيا حطيت السفره وقعدت نشوفلهم بنظرات شك، وجبدت كرسي وقعمزت
حسام برفعة حاجب🤨: شني جديده الحركات هذي نوضي خشي
دنيا، بحزن😔: باللهي خليني مضايقه شويه وبعدين عندي موضوع بنأخذ رأيكم فيه
حسام، بغضب😠: نوضي خشي قتلك
دنيا شفت لمحمد بنظرات رجاء🥺 نبيه يتكلم
محمد، بضيق: تي خليها ياراجل خيرك معقوله غاير عليها مني، كأنك ناسي راهو نحب إنذكرك أني راجل متزوج وماعنديش في حركة العيون اللعابه هني روحك وإرتاح، وبعدين حتى أني ولد عمها زي ماأنت ولد عمتها خليها تقعمز معاي ولا حلال عليك حرام علينا😁
حسام وهوا ضاغط على سنونه بغيض: تعرف لو كنت واحد ثاني راهو نطرتهولك سنونك اللي تضحك بيهم على الكلمتين الأخريات أهما
دنيا، بضيق: باللهي عليكم أسكتو وأسمعوني شويه
حسام، بغضب😠: تفضلي ياست دنيا أنطقي هالجوهره، ونوضي أنتلفي من قدامي، وبسرعه ماتحول الغضب وأرتسمت بداله أبتسامه حلوه لما قالت دنيا أنها كلمت عمها مفتاح ورفضت طلبه بخصوص عادل
محمد: خير مادرتي يادنيا أنتي مفروض رفضتي من الأول أصلا
دنيا نزلت رأسي بأسف😞: مفروض بس هذا اللي صار، أني خايفه من ردة فعل عمي بشير ماقدرتش نكلمه
حسام: وليش تخافي ماعنده مايدير مش بالغصب هوا
ومن ملامح الأسف اللي إمتسحت من على وجه دنيا بلحظه وحلت بدلهم إبتسامه مشرقه😊: بنقوللكم على شي ثاني
حسام تلفت لمحمد: شفت التحويله المفاجئه اللي صارت أهيا تي تخليك أطلع دخان معاش تفهم شي
محمد قعد يضحك😅: لا عندك حق بصراحه من ناحية صعبه فهيا صعبه وهلبا
دنيا، بنص عين: مبردكم بكل راهو، أسمعوني دقيقه
محمد، بإبتسامه😊: حلو وأني موافق ماعنديش مانع، ونقدر نساعدكم أصلا فاضي وماعندي ماندير لين تبدأ الجامعه
حسام، بحده: شني هوا الحلو!! أني مش موافق بكل شني هذا مستحقين لين تفكرو في موضوع زي هذا
دنيا، بزعل☹: خيرك ديمه تسكر فيها ياحسام مش قصة مستحقين بس مشروع مناسب للكل ويقدرو الكل يستفيدو منه، غير فكر قبل ليش ترفض على طول
محمد: وتبي الحق أكثر شي ماشي ومربح في ليبيا هالموضوع، ماتسكرهاش باللهي وأنت بروحك ماعندك لاخدمه ولا قدمه تلهي معاهم شويه وتوا نتفاهمو مع دنيا إديرلك معاش كويس وعليه القيمه😅
دنيا، بضحكه😁: حتى حصتي يأخذها غير يوافق بس
حسام فنص في دنيا اللي شدت ضحكتها وسكتت
حسام، بجديه: الموضوع مش ساهل خليني نفكر قبل
محمد، بهزوه😏: قالك نفكر قبل تقول عليه صاحب المشروع، أنت عامل يابابا عامل ماتشوفش روحك
حسام، بحده: عامل ولا مهما كان بس من غير موافقتي مايصير شي، وتلفت لدنيا: يصير ولا مايصيرش
دنيا، بأسف😞: لا مايصيرش
حسام أبتسم😊 ورقص حواجبه لمحمد بإستفزاز
ألتفتو الثلاثه على صوت ليهم فتره ماسمعوشي وهوا يقول: ماشاء الله الحبايب متجمعين، قدم وجبد كرسي وقعمز بحداهم
حسام بصوت واطي: أعوذ بالله من الشيطان الرجيم، وفنص في دنيا: نوضي خشي أنتي
أحمد، برفعة حاجب🤨: مش واكلها راهو مانأكلش في الحلوين أني
دنيا أبتسمت 😊لأحمد وناضت خشت
حسام قعد يشوفلها بحده ومافهمش شني يفسر إبتسامتها اللي طلعت منها تلقائيا لما إذكرت الكلام الأخير اللي صار بينها وبين أحمد
أحمد جبد سفرة القهوه وخذي فنجان شرب منه، وبغمزه😉: قهوه مليحه تسلم الإيدين اللي دارتها
حسام فنص فيه، وتلفت لمحمد بغيض: بتشد خوك ولا نتصرف أني وبعدين ماتلومنيش
محمد، بضيق: خلاص سكره فمك ياأحمد، وين كنت هذا كله، حتى على العيد ماروحت
أحمد، بضحكه😁: في أرض الله الواسعه كنت نجاهد في سبيل الحياه
حسام، بضيق: ياعليك حياه اللي تجاهد في سبيلها، أستغفر الله العظيم، واللهي تسخف فيا مرات بتفكيرك التافه
أحمد، بهزوه😏: لا واللهي أنت اللي تسخف، على فكره لو تعرف اللي درته على خاطرك راهو خذيتني بالأحضان، أنت مديونلي برقبتك ياولد العمه😉
حسام بصدمه😯: كيف أنت شني قصدك!!
ولعلا ماكنت تستهين به بالأمس.. كان سبباً في نجوة الله لك
” لا تخف ولا تحزن إنا منجوك “🤍

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)