رواية تزوجت عاشقة فجعلتني أعشقها الفصل الخامس 5 بقلم عائشة البشير

 رواية تزوجت عاشقة فجعلتني أعشقها الفصل الخامس 5 بقلم عائشة البشير

رواية تزوجت عاشقة فجعلتني أعشقها البارت الخامس

رواية تزوجت عاشقة فجعلتني أعشقها الجزء الخامس

رواية تزوجت عاشقة فجعلتني أعشقها الفصل الخامس 5 بقلم عائشة البشير

رواية تزوجت عاشقة فجعلتني أعشقها الحلقة الخامسة

""" أشياء كثيرة ليس بإيدينا أنما هيا أقدار....!!

حب يسيطر على قلوبنا فيغير ترتيب أفكارنا....

وشخص نشتاق إليه وكتب على القلب فراقه....

وأخر تركنا ورحل فغابت من بعده شمسنا، وذبلت أزهارنا....

وأحدهم يتلهف لرؤيتنا ولكنه بعيد عن قلوبنا....

وأخر يريد إمتلاكنا ولكننا أصبنا بسهام غيره....

فعلا ليست بإيدينا إنما هيا أقداراً مكتوبة """

خالد: مش تعب عليك هكي، خلي نمشو إحني بعد العصر وخلاص

فرح بإصرار: لا كلمهم، ماجوناش إلا مره واحده، فاش بنتعب؟؟ كله عشي عادي.

خالد بحب😍: بس أني كنت نبي نقعد معاك بروحنا اليوم مستاحشك موت❤

فرح بخجل: أني مش راح نهرب، هيا إتصل ولا نكلم عمتي أني

خالد: خلاص أني بنمشي نسلم عليهم توا إنقوللهم

^^^^^^^^^^^^^^^^^^^^^^^^^^^^^^^^^^

منال بحقد😏: وينها فرح مش روحت خيرها ماقالتش إنجي حتي تسلم عليكم

زاهيه: لا جي خالد إمبكري وقال فرح تستني فيكم على العشي، عازمتنا في حوشها😌

منال ياريتني ماجيت مايصيرش منها اليوم معناها🤨، وإبتسمت بخبث لما خطرت على بالها فكره😈

خلود: بسم الله العظيم خيرك توزعي في إبتسامات ولا إضحك فيك الملائكة، رغم أني نشك أنه فيك ذرة منهم😏

منال توا خودي راحتك وتسهوكي كيف ماتبي مش راح إنرد عليك، توا نوريك من هيك الملائكة، وإبتسمت ببرود🙂

خوله طلعت تجري من دارها: ياماما خالد قال جايكم في الطريق نلقاكم واتيين هيا نوضو

خلود تشبح لمنال بنص عين😒: قوليله عندنا ضيوف باردين، نستنو فيهم يتحشمو على وجهوهم ويفهمو

منال: العفو مني الضيوف كأنك عليا أني عادي نمشي معاكم سلفتي مش برانيه😌

زاهيه: خلاص إمالا هيا خفو إرواحكم

منال ناضت: خلي نكلم خليل نقوله يلحقني غادي إمالا

خلود بغضب😡: علاش تمشي معانا ياأمي هالنفخ هذي

زاهيه🤫: تي أسكتي فكينا من المشاكل توا تسمعك، وبعدين شن تبينا إنخلوها في الحوش بروحها عيب وهيا جايتنا🤨، هيا بري كان بتلبسي خوك قريب إيجي

فرح درت دوره على الحوش، ووتيت كل شي حتى العشي، هكي طبعي إنحب نوتي كل شي قبلها بوقت بالذات لما بيجوني ضيوف مانحبش نقعد نجري والضيوف عندي😊

خالد جبت أمي والبنات وبعد المغرب جي بوي وخوتي، وكلنا ملتمين في حوشي، بصراحه هاللحظه مافيش شاب مايتمنهاش أنه يطيح في زوجة تحب عيلته وتقدرهم وماتحاولش تفرق بين زوجها وبين أهله، كنت إنشوف لفرح بكل فخر، فيها كل مقومات الزوجه الصالحه لولا ماضيها اللي معرقل حياتي أني وهيا😔💔

خيري بصوت عالى: أسمعوني ياعيله، أنا وبجلالة قدري وتواضعي قررت أنه كل خميس نتعشو عند خالد😂😂

عمران: ومن حضرتك باش تقرر إن شاءالله 

خالد: شكله صاحب الحوش وأحني مانندروش😅

فرح بإبتسامه😊: عادي تفضلو في أي وقت الحوش حوشكم

خيري: والله عارفك قدر يامرت خوي👍، ماتقصريش مش زي هالبخيل راجلك😏 كان لاقي يلزنا غير مش عارف كيف😅

خالد فنص🤨 في فرح متاع من عاجبه إنها تأخذ وتعطي مع خوته هكي، بغضب: ههههه بارد خلاص ضم فمك وأسكت وأنت كان فتحته شني مزال يسكره😡

خليل: والله عشي مقنط ماشاء الله الحق، مايطلع منها هال.... وإنخرس🤭 لما شاف تفنيصة خالد😠

خلود بمكر😏: والله أول مره نحس أنه عندي حوش خو، يسلمو يافروحه😚

منال بحقد: وعلاش خليل مش خوك ولاشن قصدك؟

خلود: لا واللهي خوي اللي مانخشوله حوش غير في المناسبات😒

فرح لاحظت أنه الجو توتر، مانبيش هالليله تنتهي بعركه، بإبتسامه: ماقلتوليش شن رأيكم في العشي ننفع طباخه ولا لا😅

زاهيه بفرحه: ماشاء الله يسلمو إيدياتك والله زي العسل يعطيك الصحه

فرح بصوت واطي: أشبح عمي عجبه العشي ولا لا

زاهيه: وين يلقاه عشي مشكل وكامل مكمل وواتي ويجيه لبين إيديه

خوله: أي محلاها الحاجه اللي تجيك من غير تعب وأنت مقعمز😁

زاهيه: باهي نوضي أنتي وياها تحشمو على وجوهكم وأغسلو الماعين على الأقل 

فرح: لا والله ماصايره أني حلفتلهم ياعمتي أنتم ضيوفي الليله

فرح كنت في المطبخ إنجهز في النسكافي، لما خشت عليا منال

منال بإبتسامه: فرح هاتي نكمل عليك، شوفي خالد ينادي عليك في داركم

فرح الحق إستغربت مافيش كلام بيني وبين منال ديمه شايفه روحها وماتحكيش معاي، وتوا جايه تساعدني منين جتها هذي !!  بصراحه ماعنديش فيها ثقة مانبيش نخليها بروحه، بس إطريت نطلع لما سمعت خالد ينادي فعلا: شويه وإنجي نكملهم إرتاحي أنتي

خالد😍: شن قاعده إديري في المطبخ ياسرك تعب إرتاحي

فرح: والله مرتاحه خيرك أنت، كنت إندير في نسكافي 

خالد🙁: فرح مش عاجبتني هدرزتك مع خيري وخليل، خليك رسميه أكثر معاهم

فرح بإستغراب: بس هاذم خوتك شن فيها عادي زي خوتي

خالد بغضب😠: لافيها هلبا حاجات، وبعدين هما مش زي خوتك، وأني مش عاجبني اللي قاعد يصير

فرح الحق كنت نفكر في منال اللي خليتها في المطبخ بروحها، تكلمت بسرعه: باهي حاضر من عيوني معاش إنعاودها😊

خالد شديت إيديها وبستهم😘 بحب😍: يسلمولي عيونك وكل شي فيك❤، تي كان نعرف شن جاك يافرح وغيرك هكي😉

فرح بغضب😠: حول خلاص وجهك مش وجه نعمه😆، وطلعت نجري للمطبخ، بس إستغربت في منال😒 اللي لقيتها رافعه السفره ومضيفتهم حتي الضيافه شن قصدها هذي🤔: ليش متعبه روحك يامنال مش قتلك خلي عليك توا إنكملهم أني

منال: عادي مافيش تعب، أشي هالحاجه الكبيره اللي درتها، أني لقيتها السفره واتيه جبتها وخلاص، قعمزي إرتاحي ياسر تعبناك 

فرح بصراحه ماكنتش مطمنه تحذيرات خالد ليا من أهله خلتني نشك في أي حد، رجعت للمطبخ على أساس بنجيب الكيكه، ودرت دوره في المطبخ بس مالقيت شي، رفعت الكيكه وطلعت

خالد كنت مقعمز على التلفزيون وعيوني على فرح اللي تلف وتبخر في الحوش، زعما يصير منها الليله🤤: فروحه حبي تعالي قعمزي، فيه فيلم حلو خلينا نتفرجو عليه مع بعض❤❤

فرح بتوتر: بنخش إندوش وإنجي، ومشت بسرعه

خالد قعدت مقعمز ونستني فيها لين ريقي جف😅، نضت على أساس بنشوفها عطلت هذا كله دوش معقولة، بس إنصدمت لما شفتها راقده وفي سابع حلمه😴

ياعليك حظ نحس ياخالد وأني اللي كنت متأمل🤦‍♂️ قربت منها: فرح روحي فرح، بس لاحياة لمن تنادي، أكيده تعبانه خلاص خلي ترتاح ورجعت قعمزت على التلفزيون ورقدت من غير مانعلم بروحي😴

خالد نضت مخلوع لما رن تليفوني، مني يتصل في هالوقت إن شاءالله خير،

خالد بخوف: خيرك ياأمي شن فيه؟ كيف!! شن جاها وهيا إمبكري مافيها شي، باهي باهي أهو جاي

نضت لبست كبوطي وطلعت بسرعه وطول الطريق عقلي يرفع ويجيب شني اللي جاها فجأة، وصلت وفتحتلي خوله اللي تبكي وترعش وشكلها خايفه، ولاقتني أمي تبكي وحالتها حاله وبوي مقعمز وشاد رأسه بإيديه الزوز وكأنه حامل هم الدنيا على كتافه

خالد بخوف: خيركم شن فيه، شني اللي ص... وسكتت بصدمه لما سمعت تخبيط وصوت خلود تعيط باأعلى صوت: أفتحولي الباب معاش نبيكم مانحبكمش أفتحولي

خالد🙁: خيركم ياأمي إمسكرين عليها وين المفتاح

زاهيه بدموع😢: كانت بتهرب مادخلناها لدارها وسكرنا عليه لين خليني ونخليك

خالد بغضب😠:وين المفتاح؟؟

عمران: ماتفتحش عليها، أختك مش طبيعيه، شكلها متخطيه حاجه، أستغفر الله العظيم وخلاص 

خالد بصدمه😲: كيف !! غير خليني إنشوفها؟؟

عمران بعصبيه😡: قتلك ماتفتحش الباب، خيري مشي بيجيب الشيخ عيسي قريب إيجي

خالد بغضب😤: ليش الشيخ والتشهدير في هالليل، غير قريتو عليها رقية وفتحتولها قرأن راهي هدت، أكيده عين من ساعتين ماكان فيها شي، ليش تتسرعو هكي 

زاهيه تبكي😭: قد ماقرينا مافيش فايده تزيد في العياط وقعدت تخبط وتريش لما سمعت القرأن، ياحليلي على بنيتي، شن جاها

خالد: خلاص ياأمي أهدي بإذن الله مافيها شي، وشفت لخوله اللي كانت ترعش من الخوف: خوله خشي أرقدي في الصاله

خوله تبكي وبخوف😢: لا نخاف بروحي، وكان يجيني شي نفس خلود، لا مانبيش، وجت قعمزت بحد أمي وشدت فيها بإيديها الزوز وكأنها خايفه أنها تهرب وتخليها

دقايق هدوء ورجع صوت التخبيط ثاني،

خالد بخوف😟: خلوني نفتحلها مرات إدير في روحها حاجه كيف هكي؟؟

عمران😠: قلنالك كانت بتهرب، أحني كلنا إنشدو فيها وماقدرنهاش، كيف بتقدرها بروحك

خالد: بس يابوي مرات، وسكتت لما إنفتح الباب وخش خيري

خيري بتوتر: يابوي الشيخ عيسي برا

عمران تلفت لزاهيه: خشي أنتي وخوله للصاله وردو بالكم تطلعو

خالد خش الشيخ وقدمت أني وفتحت باب الدار، وإنصدمت كانت الدار مقلوبه عاليها واطيها، لفيت بعيوني كل الدار بخوف لين طاحت عيوني عليها وهيا مقعمزه في زواية الدار ورأسها تحت وضامه رجليها بإيديه، ومنظرها مزري،🙀

قربت منها وماعدلتش على بوي اللي يحذر فيا مانقربش لين يشوفها الشيخ: خلود خلود تسمعي فيا أني خالد قيمي رأسك، قامت رأسها وشبحتلي بنظره عجزت نفهمها 🤔كره غضب حقد مش عارف وعيونها كانو حمر😡، وبلحظه دفتني من قدامها وناضت تجري للباب، بس شدوها خيري وبوي على أخر لحظه😔

مانطولش عليكم فاتت هذيكا الليلة من أبشع الليالي اللي ممكن يتخيلها العقل ساعتين الشيخ يقرأ في القرآن ويرقي فيه، وهيا في عيطة واحده وشي قالت نسكت مافهمتش منين جتها هالقوة، أخر شي أطر بوي يكلبشها في السرير خوفا منها أنها تغافلنا وتهرب، طلع بوي مع الشيخ عيسي وشويه وخش

زاهيه بخوف: ها شن قال شني فيها

عمران تنهد بحزن: على حسب كلام الشيخ قال هذي واكلاته في بطنها وواضح أنه جديد ومش متمكن قاعد، بس قال الخوف أنه يتجدد ومعاش نقدرو نسيطرو عليه، لازم تراقبوها في كل شي 

خالد: كيف واكلاته شن كلت هيا

خوله:من لما تعشينا في حوشك مع بعضنا معاش كلت شي

زاهيه: خيرها ساكته توا

خالد بحزن☹: رقدت، مابعدها إعييت من العياط

عمران: الشيخ قال الصبح توا يجي يشوفها ثاني، ان شاءالله خير

فرح نضت الصبح وتفاجأت😯 لما مالقيتش خالد، اليوم جمعه وين بيكون مشي، ومشيت نجري لما سمعت صوت الباب إنفتح: خالد وين كنت

خالد كنت تعبان وطول الليل مش راقد: صباح الورد، كنت في حوش بوي

فرح بصدمه😱: كيف صار هكي، ياناري على خلود

خالد: والله مافاهم حاجه، رأسي بيتفجر، باللهي وتيلي قهوه بنخش إندوش وبنرجع غادي

خالد فاتو ثلاثة أسابيع، وحالة خلود زايده للأسوء، ومافيش شيخ نعرفوه إلا وجبناه وقري عليها، وشي مافيش فايده، اللي كان مخوفني، حاس أنه أهلي بدو يشكو في فرح وبالأخص أنه خلود تنفر منها وتزيد في العياط لما تشوفها واليوم الشيخ قالنا اللي إمدايرله هالشيء واحد من وسط حوشكم😓

زاهيه: كيف من وسط حوشنا، الواحد بدي يشك في روحه

منال بصوت واطي لخوله: مش قتلك أني !! أهو بدي يبان بالشويه بالشويه، توا تشوفي كان ماطلعتش هيا 😏

خوله بخوف😦: زعما هيا !!

منال: تي مافيش غيرها، من ليلة تعشينا عندها خلود مرضت، وتعرفي حتي أني بطني اول ماروحت دارت فيا حالة غير أني إستاقضت بروحي فيسع عندي إمية رقية شربت منها وعطيت لخليل وقصي، ياخوفي نقعدو ساكتين وتزيد تتمادى هالسحاره وإديرلك حتي أنتي حاجه😒

خوله بفزع وبصوت عالى😨: لا أني لا باللهي

عمران إنخلع لما عيطت خوله، ويحسابها صارلها زي خلود، بخوف😟: خيرك ياخوله شن فيك

زاهيه بفزع😦: بسم الله العظيم، شن صارلك يابنيتي؟؟

خوله: مافيا شي ماتخافوش، بس أني خايفه يصيرلي زي ماصار لخلود مادامه هذي قاعده بينا، وهيا تأشر على فرح

خالد بغضب😠: أنتي شني تفتفتي، سكري فمك خير...وسكتت لما عيطت خوله

خولة: أنت اللي أسكت، مرتك هيا السبب في اللي قاعد يصير، خلود ماكان فيها شي لين مشينا تعشينا عندكم، هذي اللفعه أشبح شني حطتلنا في العشي

عمران: خلاص أسكتي ياخوله، مادامك مش متأكده ماتتبليش على حد

فرح في لحظه حسيت روحي رجعت أضعف من لما كنت في حوشنا قدام خوتي، كنت نبي نتكلم إندافع على روحي بس شي عجزت نخلى لساني ينطق، نزلو دموعي ومعاش قدرت إنقيم رأسي فوق😭

زاهيه😟: معقوله تطلع فرح !!

منال: كان مش هيا ليش خلود كل ماتشوفها تعيط وتنفر منها، والشيخ قال واحده من وسط حوشكم مني بتكون يعني

خليل بغضب: أنتي أسكتي يامنال ماتتدخليش في حاجه ماتخصكش

خوله: مافيش غيرها حتي يوم العشي ماخلتناش نخشو معاها للمطبخ هذا كله خايفتنا نكشفوها😏

خالد كانو عيوني تابتات على فرح نبيها تتكلم إدافع على روحها، يكفيني أنها تنكر وأني مصدقها، بس اللي حارقني أنها قاعده ساكته وهيا تسمع فيهم يتهمو فيها😔

خوله بصوت عالى: طلعوها هالسحاره من حوشنا، أني بديت نخاف منها

زاهيه: والله لو تطلعي أنتي اللي درتي في بنيتي هكي، قتلك حلال يابنت ال🤬

خالد بغضب😡: شني تقولي ياأمي، كيف تشكو في مرتي فرح مستحيل إدير هكي

خوله: مش بعيد تكون ساحراتك حتي أنت، باش توقف في صفها😒

عمران بعصبيه😡: سكرو فمكم، خيري نوض جيبلي المصحف، 

خالد إنصدمت لما بوي حط المصحف قدام فرح، قدمت بسرعه: شن قاعد إدير يابوي؟؟

عمران: أسكت أنت، وتلفت لفرح: أحلفي على المصحف أنك مش أنتي اللي درتي هكي في خلود

خالد بغضب: تي كيف...وسكتت لما فرح قامت رأسها وأشرتلي بإيدها أني نسكت🤫

فرح تبكي😢: عادي نحلف ياعمي، أني واللهي مافي مره فكرت إنضر حد ولاممكن نفكر إندير هكي

خالد وقفت وجبدت فرح معاي وطلعنا بعد ماحلفت على المصحف، فرح طول الطريق وهيا تبكي😭، أني بروحي حسيت بالإهانه كيف يتهمو مرتي في شي زي هذا، يابالك هيا😔، حاولت على قد مانقدر نواسيها بس كل مانكلمها تزيد تبكي وتقولي الظلم حار😭 قطعتلي قلبي💔

فاتو إسبوعين ثانيات ومعاش رفعت فرح لحوش بوي من هذاكا اليوم، كانت حالتها النفسيه تحت الصفر، وخلود كانت على نفس الحاله، بس الفتره الأخيرة نقص عياطها شويه

عمران: لازم واحد منكم يطلع ويجيب البضاعه، كيف هكي نوقفو حالنا وأحوالنا، اليوم يمشي واحد منكم يحجز ويطلع في طيارة غدوه

خالد قعدنا نتناقشو لين جت الطبه فيا😰

عمران: خلاص ياخالد أنت اللي بتسافر، توا نكلم خالك صلاح يحجزلك توا في طيارة غدوه

خالد: بس توا معاش وقت الدنيا ليل، أمتي بنوصل فرح لحوش أهلها وبنرجع وهيا الطياره الصبح

زاهيه بحزم🤨: ليش ترفعها لأهلها، جيبها تقعد معانا، وبعدين عيب عليها من هذاكا اليوم لاقالت إنجي ولاحتي تسأل على خلود

خالد تنهدت بحزن😔: اللي درتوه مش ساهل ياأمي إتهمتوها عيني عينك، وبعدين أني اللي مانبيش إنجيبها فكوني من مشاكلكم

عمران: خلاص اللي صار صار  أسمع كلام أمك وجيبها تقعد إهنايا، وبعدين انت مش معطل كلها 5 أو 6 إيام وتروح

خالد ماكانش عاجبني ومش مقتنع وخايف على فرح يضايقوها بكلامهم أو شي

فرح: عادى نقعد مادامك مش معطل،

خالد: بس أني خايف عليك

فرح بإبتسامه: ماتخافش بإذن الله مايصير إلا الخير، يكفيني أنك مصدقني

خالد بستها على خدها😘: أنتي أجمل هدية رزقني بيها ربي❤

فرح بتوتر: خلاص نوض أرقد غدوه بتنوض بكري

خالد شديتها من إيدها: فرح ممكن تخليك جنبي الليلة❤❤

فرح بخوف: بس أني، وسكتت لما خالد حط إيده على فمي

خالد: اسسسسس🤫 عارفك شني بتقولي، مش جاهزه وقاعده مش متقبله الوضع😔 

فرح وجعني😔 خالد،حاسه كل شي ضده وزدتها عليه أني، قعدت نبكي😢: عارفه روحي ظلمتك معاي بس أني نبي شوية وقت

"""""""""""""""""""""""""""""""""""""""""""

أتحبني؟

تقبلني إذا كما أنا بعيوبي قبل مميزاتي... بدموعي قبل إبتساماتي... بصمتي وكلماتي والممل من حكاياتي... بيأسي وإستبشاري... بجنوني وبمنطق أفكاري... بإختصار تقبلني كما أنا لأني لاأعلم هل أستطيع محوه من خيالي😔💔

"""""""""""""""""""""""""""""""""""""""""""

خالد بإستغراب: ليش الدموع ياروحي، وقداش مره إنقولك وقتي كله ليك، ومافيش حاجه راح تصير غصبآ عنك بس أني محتاجك خليك جنبي الليله بس، مش راح إنضايقك والله❤

""""""""""""""""""""""""""""""""""""""""""

أريدكِ أن تشاركيني فرحي وأحزاني... كوني لي كأمي وأبي... 

فأنا لا أرغب بأن أكون معكِ مثلما أكون مع الناس...

أنصت لهم وأتحدث من غير شعور أو إحساس...

أظهر لهم القوة والضعف عندي أساس...

أريدك أن تكوني روحي وعقلي وأجمل إحساس...

أريدك أن تكوني ضعفي وقوتي وفي حياتي أنتي الأساس...

فهل تسمحين لي !! 

بأن أملككِ أنتِ وقلبكِ ياأغلى الناس❤❤

""""""""""""""""""""""""""""""""""""""""""

فرح: باهي خلي إنجهزلك شنطتك، قعدت إنجهز في الشنطه، وحاولت نعطل على قد مانقدر نبي خالد يرقد🤭

بس تفاجأت لما لقيته متكي على الصالون اللي فاتحه زي السرير ويبربش في تليفونه

خالد بفرحه: تميتي ياروحي😍

فرح: أي تميت، هيا تصبح على خير 

خالد وقفت بسرعه وشديتها من خصرها🤤: وين تصبح على خير، شني تفهمنا أحني😘

فرح توترت😟 من حركاته وكيف قعد يشوفلي بنظرة شهوه، خفت وحاولت نفك روحي منه: خالد أطلقني ماتخوفنيش منك😨

خالد: ياعمري ليش تخافي مستحيل إنضرك خيرك، قتلك نبي نرقد جنبك بس، علاش تكسري بخاطري هكي إنهون عليك😔

فرح بإستسلام: باهي، بس رد بالك أي حركه هكي ولاهكي نعيط وإنلم عليك الجيران

خالد: ههههههه هذا فاش فالحين أنتم إلا في العياط، 😒وبعد ماتلمي الجيران شني بتقوليلهم مانبيش راجلي يمسني😉

فرح: ااااف منك😞 باهي هيا أرقد انت الأول وأني نرقد بعدك😁

خالد🤨: لا واللهي تبصري أنتي صح !! قمتها في غمري وهيا تعيط 😅 وحطيتها على الصالون، وحضنتها بسرعه من الخلف، وتبتها بإيديا ورجليا باش ماتهربش: اااااااه دهشتيني تقول عليا إنصارع في عشره مش واحده طشه زيك😂

فرح قاعده نتحرك نبي نتخلص من قبضة الديناصور😅 بس شي واخيرا إستسلمت: أني طلعتلك طشه توا؟؟ خلاص أطلقني☹

خالد: ياحليلي أني من الزعلان😍 وأحلى طشه في الدنيا💋، ماوخرتش لين قرصتني في إيدي تصدقو لين صبت دم😵: يامتوحشه ليش هكي😣

فرح بإبتسامه: قتلك ماتقربش مني😏

خالد🤨: خلاص أرقدي هي، وغمضت عيوني، ورجعت فتحتهم: ليش تشبحيلي لهالدرجة عاجبك ولا تبي حاجه ثانيه😉

فرح نحسابه رقد فعلا، قعدت مركز على ملامحه أول مره نشوفه من قريب هكي😊 بس تفاجأت لما فتح عيونه، تحشمت وتلفتت للجهة الثانيه، قعدت متوتره لما نحس باأنفاسه على رقبتي وشويه وإستسلمت للنوم😴

خالد كانت هالليله من أسعد الليالي في حياتي وأخيرا وصلنا لهالمرحله، ماقدرتش نرقد مش مصدق أنها جنبي وفي حضني😍، ماقدرتش نمنع عيوني من أنهم يفصلوها تفصيل وكأني نحاول نحفظ ملامحها بصم،

ريحتها🤤 اللي كأنها أكسجين ينعش القلب😍 قعدت عالقة في خشمي،

كنت متمني أنه الليل مايكملش، ماكنتش نبي نفارقها، مانبيش الصبح يجي وتنوض من حضني❤❤

فرح فتحت عيوني وتفاجأت بخالد اللي كان متكي وعيونه تابتات عليا، إبتسمت: صباح الورد، من أمتي نايض أنت؟؟

خالد: صباح العسل ياقلبي❤وبستها على جبينها😘 أصلا من قالك رقدت أني، ماقدرتش نغمض عيوني وأنتي جنبي😍

فرح إبتسمت وكنت بنوض، بس رجع خالد حضني بقوة: خالد وقت راح تتأخر😊 

خالد برجاء: خمسه دقايق بس ياعمري💋

خالد حطيت فرح في حوش بوي وسلمت على الكل ووصلني خيري للمطار، قلبي قابضني ومش مرتاح، بس تعوذت من الشيطان وحاولت نقنع روحي أنه كل شي راح يكون كويس

** أحيانا يخبرنا الله بشكل غير مباشر بأن هناك شيئآ سيحصل... ولكننا نحاول إقناع أنفسنا بالأمر الواقع **

خالد صارت شوية مشاكل في الشحن وإطريت نتأخر شويه، من 6 أيام ولو 15 يوم😔 كنت حاس روحي تعبان ومرهق وشوقي لفرح زايدني ماكنتش عارف أنها ولت جزء لايتجزأ مني وأنه غيابها عليا ولو يوم واحد يأثر فيا هكي😔

بس اللي كان مطمني كنت نكلم فيها كل يوم والحمدلله مافيش مشاكل😊 اليوم مروح، كنت مستعجل وكأني نسابق في الوقت نبي نوصل باأسرع وقت مش مصدق أمتي إنشوفها😍 

خالد بغضب: خيرك تقول تمشي على الدحي خايفه يتكسر، خف روحك شويه ياخيري

خيري يضحك: وعلى شني مستعجل أنت😅

خالد سكتت ماعنديش جو لبرادة خيري وصلنا للحوش وكنت متمني أني نشوفها أول واحده بس تنهدت بحزن😔 لما لاقتني أمي

زاهيه بفرحه: الحمدلله على سلامتك ياخلوده

خالد: الله إيسلمك ياأمي، كيف حالك وكيف حال خلود

زاهيه تنهدت بحزن: قاعده على حالها ياوليدي، ربي يفرج إن شاءالله 

خوله من بعيد: الحمدلله على السلامه ياخالد

زاهيه فنصت فيها: تعالي سلمي على خوك كويس

خالد😒: خليها ياأمي المحبه مش بالطلبه، وخشيت لخلود اللي كانت متمدده على السرير وعيونها مفتوحات في الفراغ، وعلى قد ماكلمتها وحاولت معاها مافيش أي ردة فعل منها

طلعت وقعدت إندور بعيوني على فرح وينها معقوله ماسمعتش صوتي: أمي وين ف....وسكتت لما خش بوي ومعاه خليل

قعد بوي يسأل على البضاعه وشن صار وأني كل همي فرح وينها؟؟

خالد خلاص معاش عندي صبر: وين فرح ياأمي؟؟

زاهيه بتوتر: واللهي شني بنقولك ياوليدي

خالد بخوف😟: شني فيه ياأمي؟؟ فرح فيها حاجه تكلمي

زاهيه بتوتر: لا والله مافيها حاجه ماتخافش ياخالد، بس...

خالد بسرعه: بس شني ياأمي تكلمي بسرعه حرقتيلي دمي، فرح وينها؟؟

خوله: ليش خايفه ياماما، وشافت لخالد بحقد😏: فرح متاعتك كلمت خوها وجي رفعها

خالد بصدمه😲: كيف !! وأمتي صار هذا !! وعلاش أني ماعنديش علم؟؟

زاهيه: من أول يوم جي خوها ورفعها

خالد إمبارح كلمتها وماقالتش كيف هكي، وقعت إنشوفلهم بشك: وعلاش مشت شني صار؟ شني درتولها؟؟

عمران😠: أني من الأول ساكت ومانبيش نتكلم، بس طفح الكيل واحده سحاره زي هذي معاش تلزمنا فاهم، ولاتشرفنا أنها تكون مرت ولدنا سمعتني !!

خالد بإستغراب: شني الكلام هذا يابوي، مش حلفتوها على المصحف وأنتهي هالموضوع شني مازال تبو بعد هالإهانه اللي درتوهالها

عمران بعصبيه😠: الكذاب يقعد كذاب وربي فاضحه لو يحلف على الكعبه، هذي البنت تنساها فاهم؟؟ وفي أقرب وقت توصلها ورقتها

خالد وقفت😮 بصدمه: فهموني شني اللي قاعد يصير طلاق شني🥺

زاهيه: والله ياوليدي أني ماشفتش بعيني على قولت خوله ومنال قالو شافوها وهيا تصب في حاجه في غذي خلود

خالد قعدت واقف بصدمه، وكملت خوله

خوله بغضب: ووين واجهناها قعدت تكذب وتتبلي على منال وقالت هيا اللي عطتها الشيشه وقتلها أنها إمية رقيه😏 هالحيوانه هذي

خالد بعصبيه: هي سكري فمك وأحترمي نفسك، وقربت بنضرب خوله، بس وقفت أيدي في الهواء لما عيط بوي

عمران بصوت عالى😡: ياللي ماتتحشم تضرب أختك على خاطر وحده بنت حرام زي هذي

خالد بعصبيه😠: راهو ساكت لأنك بوي وإحتراما ليك بس، مانسمحش لي ولا واحد فيكم يقول على مرتي هكي

عمران: ترد على بوك ياخالد، لا والله عرفت تلعبها صح هالطرابلسيه شكلها سحراتك أنت الأول، حتي أنت تبي شيخ، لا شيوخ مش شيخ واحد وإن شاءالله يقدروك 

خالد مستحيل نقتنع أنه ممكن فرح إدير هكي، كنت مصر على كلامي، بغضب😠: ماليكمش حق تتهموها هكي من غير دليل، بس لمجرد شافتها خوله ومنال هما الإثنين أكبر كذابات في العيله ولا توا غلت عليكم منال ونسيتو كيف كانت

خليل: تحشم ياخالد أحترمني شويه، واحترام مرتي جزء من إحترامي، راهو أني خوك الأكبر كأنك ناسي

خالد بعصبيه وبعياط😡: وأني من يحترمني تهينو في مرتي قدامي وتبوني نسكت، لو كان منال مرتك ومارضيتش فيها كلمه، 

فاأني فرح روحي ومستحيل نرضي فيها حرف، وهالكلام للكل، ومادامني مش هامكم ولا إمدايريلي قدر، حتي أني معاش تهموني، وتوجهت بنطلع وكان في بالي راح نطلع طول لفرح ومستحيل نروح من غيرها ولو عاديت العالم كله، بس فعلا

      ** تجري الرياح بما لا تشتهي السفن **

كلمات بوي نزلت عليا زي الصاعقة وجمدتني في مكاني🥶، ليش أني😔 ليش الدنيا كلها ضدي☹ ليش فرحتي ماتكملش💔 ليش وليش وليش، قعد الكلام يتردد في دماغي أكثر من مليون مره عقلي رافض يستوعبه، كيف يحرموني منها💔😔 

""" لو أنها ورقة لامزقتها، لو أنها زجاجة لكسرتها، لو أنها جداراً لهدمته، لكنها قلبي❤ كيف تتجرأون على إنتزاعها مني💔💔 """

عمران 😡: تحرم عليا أمك لأخر يوم في حياتي لو فكرت حتى التفكير أنك ترجعها أو تمشيلها أو حتي تشوفها السحاره هذيكا، وأنت ورأيك دير اللي يعجبك.....

""" أولئك الذين يكسرون قلباً... فينتزعون شيئاً من سلامه... كيف تملك أفواههم ان يقولو في صلاتهم **السلام علينا وعلى عباد الله الصالحين ** """

يتبع..
لقراءة الفصل التالي : اضغط هنا
لقراءة الرواية كاملة اضغط علي : (رواية تزوجت عاشقة فجعلتني أعشقها)
google-playkhamsatmostaqltradent