رواية التضحية الفصل التاسع 9 بقلم آية حسن

رواية التضحية الفصل التاسع 9 بقلم آية حسن

رواية التضحية البارت التاسع

رواية التضحية الجزء التاسع

رواية التضحية الحلقة التاسعة

شهد: ايوا نورة حبيبتي كيف حالك؟ باللهي نبي رقم محمد ولا ايميله لان الموضوع ضروري مايمشيش تفكيرك بعيد❤
نورة: انشالله خير شهودة، عيب عليك مافكرت في شي ☺️
شهد: شوية الموضوع خاص، نبيه بحكم وجوده في مصراته والله الموضوع يهمني وهلبا هدا علاش طلبت منك رقمه 🥀
نورة: ادللي ي عيوني عادي اهو رقمه جاك في رسالة هي❤
نورة واثقة في محمد مش ح يخونها وعارفة شهد قلبها وين معلق ❤
شهد: السلام عليكم، محمد ولا؟ اني شهد………. عرفتني؟🤔
محمد: وعليكم السلام، شهد الساعدي نفسها ولا؟ 🤔❤
شهد: اي اني، سلم وخيي عندي معاك موضوع، في شاب غالط معاي وهو في مصراته اني نبي نجيبه لطرابلس
محمد: ولا يهمك، صورته ونوع سيارته وغدوة الصبح يكون عندي مربوط⛓️🪢نكلمك ناخد منك عنوانك تمام؟ 🤔
شهد: صورته بعتهالك وسيارته مرسيدس سودة، اول ما تحصل عليه كلمني، لكن انت كيف بتعرفه مصراتة كبيرة؟
محمد: عيب الكلام هدا، اني وولاد عمامي وخوتي مع بعضنا 25شاب منغير الصحاب والمعارف 🥀
شهد: اللهم بارك، ربي يحفظكم جميع، ريحتني الله يريحك، اهاا حقا باللهي تتأسفلي من نورة لان خديت منها رقمك، مرات تغار ولا حاجة، مانبيش نسبب مشكله بيناتكم 🥺💔

محمد: لالا ما ادوري شي نورة عندي، وموضوعك باذن الله غدوة ينحل خليك واثقة بس 💪🏻💪🏻
زينب اتصلت بشهد والكل طبعا متوتر الا شهد مستريحة توا
زينب: ماتقوليش وينك ليا قرن نتصل يعطي مشغول 😡
شهد: لالا مش مشغول، اسمعي نبيك في خدمة مهمة توا 😒
زينب: قبل خدماتي، اني غدوة بنمشي لمريم في حوش خالتها من الصبح، تمشي معاي؟ مانبيش نمشي بروحي
شهد: هادي هي الخدمة اللي نبيها منك، نبيك ترفعيني الصبح غادي، نبي نكلم مؤيد خوها ضروري الصبح 😶
زينب: في حاجة صايرة من وراي، لكن ما علينا غدوة كل شي يبان، راهو عرف بقصة اخته هو، وقالب الدنيا علي معاذ لكن يا شهد ونعم الخو تعرفي قعد يهدي فيها ويقوللها حقك حنرده مدامني اني سندك ماتخافي من شي 🥀💕
ثاني يوم … الساعة 8الصبح تليفون شهد يرن 😴🤔
شهد: واااك مش راقدة كويس منو ع الصبح؟
محمد: ردي يهديك ربي…ايوا شهودة، طلبيتك عندي امتا تبيها توصلك واعطيني المكان اللي بنوصلهالك فيه 😏😏
شهد: بالسرعة هادي جبته؟ قصدك معاذ توا عندك؟ بجديات انت مافيش زيك، اعطيني دقايق ونبعتلك موقع الحوش اللي تجيبه فيه، نبيه مربوط ومش مضروب لو سمحت☺️
محمد: ل توا الامور زي ماتبي لكن لو بيكتر توا بياكل علي قلبه 😏😏
شهد: شد اعصابك لاحق عليها هني من مؤيد وصلهاله 😏

معاذ لما سمع اسم مؤيد زبط ان محمد من طرف مريم وعيلتها وعرف شهد تكون صاحبة مريم وهي اللي طيحاته
بعتت الموقع وكلمت زينب جتها ومشو لمريم لقو مريم ومؤيد وخالتهم مقعمزين في الصالون حايرين في روحهم
شهد: مؤيد نبيك دقيقة بعد اذنك الموضوع خاص ومهم ☺️
مؤيد: تفضلي وخيتي، انشالله خبر حلو لاني عييت من التفكير للصراحة 😓
شهد: اتصل بالرقم هدا واعطيه نعتة الحوش بالتحديد لان الشاب هدا جايب معاذ وبيسلمه ليك 🔥❤
مؤيد: كيييف؟ كيف وصلتي وامتا ووين الولد؟ 🤔🤔
شهد حكتله القصة ومن يكون محمد وكيف جاب معاذ 💕
مؤيد: انتي بنت بالف راجل ومش صاحبة بس انتي اكتر من اخت، ينصر دينك ويرحم من رباك، ربي يحفظك وخيتي 🥀
مؤيد يتكلم: خديت الرقم من شهد وكلمت الشاب فهمت منه ان بيوصل بعد ساعتين يعني مع اذان الظهر قررت نكلم بو معاذ ونحكيله بش يعرف ولده شن بيصير فيه 🪢وبحكم انه راجل كبير وصعب عليه اللي بيسمعه قلت خليه يجي عندي نعزمه علي قهوة عندي ونحكيله 🥀☕
جي بو معاذ وحكاله مؤيد اللي صار، الراجل من الصدمة فنجانة طاح منه
مؤيد: يا عمي ما ترعشش روحك اني كنت موافق علي ولدك مع اختي لكن ولدك غلط وبيدفع الثمن غالي راهو 😶
الاب: طيح من قيمتي، هو راس ولد عندي، اني ياولدي كنت ومزال نبي بنتكم لولدي ولو تبي غدوة فضانيتهم لكن اهم شي ماتقتليش ولدي الوحيد 💔

مؤيد: غر يوصل ولد وساهل ياعمي ماادور شي حني في الاخير جيران ماتوصلش للدم بيناتنا🥀
شهد واقفة في الروشن تفكر في مريم وشن بيصير فيها عيونها دمعوا فجاة🥺 شافتها زينب جتها وقفت جنبها 👭🏻
زينب: شن تفكري شهودتي، علاش تبكي توا؟ ما جفيتيش مزال؟ ديما وانتي تبكي خلاص ياسرك بكي ريحي عيونك
شهد: شن مدايرة مريم؟ خدت دواها؟ مزال تبكي هي؟ 🥺
زينب: خدت دواها ورقدت توا، انتي شن قلتي لمؤيد ومنو اللي معاه برا هدا الشيباني؟🧓🏻🤔
شهد: بعد شوية تعرفي شن قلتله، هدا بو معاذ اللي معاه 🥀
زينب: بديتي زي جماعة العصابات كله بالالغاز والاسرار😒
ومع اذان الظهر ناض بو معاذ ومؤيد مشو للجامع صلو ولما روحو للحوش لقو محمد مدرس السيارة ومعاذ في الكوفينو
محمد: السلام عليكم، مؤيد ولا غالط؟ 🤔🥀
مؤيد: وعليك السلام وصلت يا غالي، بارك فيك عالخدمة 😏
محمد: وفيك يبارك الله، نبو خدمة باهية ياغالي 😏
ونزل معاذ من السيارة هو وولد عمه، مؤيد اول ما شاف معاذ علي قد ماكان هادي وواخد الموضوع بكل هدوء وعقل كبير علي قد ما توا نار ركبت فيه، وطاح فيه ضرب 🤬
جي محمد يبي يحز شده بو معاذ من يده ووقفه

بو معاذ: خليه اني بوه وراضي، خليه سلم ولدي………، هي تعالو تغدو في حوشنا جايين من مكان بعيد وطريق طويلة هي تفضلو مايكون الغدي الا عندي وبعدين نتفاهمو 🕊
مشو كلهم تغدو عند بو معاذ، ومعاذ روح دوش وخش لداره وفاق علي روحه شن دار ونادم 😞
محمد: يدوم عزك يا عمي، حني اصحاب خدمة لازم نروحو اليوم وانشالله سفرتك وخيرك دايم هي نستادنوكم. 🥀
روح محمد كلماته شهد شكراته وحمدت بسلامته من الطريق وخلاص كل واحد مشي في طريقه.
مؤيد قعد في حوش معاذ لين طلع معاذ من داره وقعمز في جنب بوه ومؤيد
بو معاذ: ولدي مؤيد تقبلنا اليوم بعد العصر نجو نخطبو بنتكم، مانبيش العيلة تعرف بالقصة خوفاً علي سمعة البنت
مؤيد: تفضل يا عمي اني قاعد في حوشنا 💕
روح مؤيد للحوش وحكي اللي صار معاه كله من الصبح، طبعا الكل مصدوم من موقف شهد وكيف جي معاذ وشن قاله بوه وشن بيصير بعدين؟ 😯🤔🤔
الخالة: يرحم بوك وامك اللي ربوك يابنتي والله انتي كنز ❤
زينب: اني كنت حاسة ان في شي من وراي تقول تخدمي في مافيا كله بالدرقة يابنت 😂💕سلمها التريسة ❤
مريم: اني لو انتي ماعنديش شن كان صاير فيا توا؟ ❤🥺
شهد: هدا واجبي تجاه صاحبتي، مستحيل نشوفك مدمرة وماندير شي،وبعدين اني مادرت شي كلمت الولد وطلبت منه مساعدة ماردنيش خايبة هي هادي ☺️

مؤيد: ربي يحفظك وخيتي، اسمعوني وبالاخص انتي مريم بعدين بيجي معاذ وبوه بنتفاهمو علي زواجكم اني كلمت بوي قلتله روح وهو مش مدورني ولو مزال خدمته مطولة بنكون اني وكيلك في الفاتحة لان مش حنطولو الموضوع
مريم: اللي تشوفه يصلح بيا ديره واني واثقة في سندي مش ح يضرني خلاص كلامك مسموع وكله تمام 🥺💕
شهد: ربي ما يحرمك منه ياريت عندي خو اكبر مني 🥺
اذن العصر وجي معاذ وبوه، مؤيد نادى علي مريم تقعمز معاهم
مريم: مستحيل نمشي، بديت خايفة نشوفه، علي قد ماحبيته توا مش قادرة نشوفه
شهد: بري خوك معاك ومعاذ غلط لكن اهو جاك ويبيك تسامحيه وتبدو من جديد، بعد ايامات بتكوني مرته وحلمكم بيتحقق قداش ليك تتمني تتزوجيه وتكوني ليه اهو الحمد لله كله يهون هيا البسي لبسة مستورة وبري قعمزي توا تشوفي كيف ترتخي معاه 🥺💕💕
ناضت مريم لبست قفطان كلوش من تحت ووشاح ومشت قعمزت جنب خوها في الصالون
بو معاذ: مؤيد ولدي حني جايين نطلبو في مريم لمعاذ ولدي واي حاجة تطلبوها حني مستعدين ليها ☺️🥀
مؤيد: اني ماعندي ما نقول، مريم انتي تبي معاذ ولا لا؟
مريم: اللي تقوله انت اني موافقة عليه انت وكيلي بعد ربي🥀
مؤيد: خلاص يا عمي حني عطيناكم بنتنا وربي يتمم بالخير
معاذ: مريم اني اسف عاللي درته، اني كنت مش علي وعيي والله نحبك ومانبيش حد ياخدك مني اسف عاللي درته اني هربت مش لاني درت معاك هكي اني لما هربت كنت مش عارف شن درت وكيف درت هكي كنت مصدوم وربي 😞💔

مريم: خلاص توا، اني نستادن، بارك الله فيك يا عمي، 🥀
مؤيد: تفضلو غدوة للفضانية ومعاها فاتحة مرة وحدة اني نجمع خوتي وخالي وعمي وانتو تفضلو وانشالله ربي يتمم بالخير 🕊
بو معاذ: انشالله يارب، بوك مزال مش مروح؟ 🤔
مؤيد: والله ياعمي خدمته مطولة، مرات يروح غدوة الصبح يحضر الفاتحة ويرجع الله اعلم لكن مايوقف شي بعون الله 🥀
بو معاذ: لالا ما تكترش عليه لو مش مروح خليه مشالله عنده راجل طول وعرض الله يبارك عليك 🌺
مؤيد: سلمك ياعمي، هي نتشرفو بيكم غدوة انشالله..
طلعو الناس وجو مريم وشهد وزينب لمؤيد يبو يعرفو شن صار؟
مؤيد: غدوة فضانية وفاتحة مع بعض اسف يا اختي مافرحتيش زي البنات كله جي بسرعة، مافيش حل الا هكي😔
شهد: وعلاش مش ح تفرح، احلى فضانية وفاتحة لاحلى مريم في الدنيا، سادهم انهم بياخدو نوارة حوش بوها شن مزال يبو؟

قعدت شهد وزينب بايتين عند مريم، طلعو في الليل شرو اماعين وخدو حاجات الفضانية والضيافة وكله علي ذوق مريم وبضحكة شهد كله مشي تمام وروحو قعدو يخططو طول الليل عاللي بيديروه غدوة وكيف بيمشو الامور 😍
ثاني يوم ناضت زينب الصبح طلعت هي وخالة مريم شرو اللي ناقص وخطمو علي شركة التغليف جابو زوز بنات معاهم بش يغلفولهم البوكسات متع عيلة العريس 🦋
وجو الرجالة ع الغدي دارو فضانية 🖇ومع العصر مشو للجامع قرو فاتحة💍 وفي الليل تلبيسة 💍
جي العريس وامه وخواته ومريم وزينب وشهد وخالتها ونساوين خوتها ولبسها دبلتها وصورو ورقصو وكله تمام 🦋
لهني اكتفت مريم، مزال الحلقة العاشرة شن بيصير فيها؟🥀