رواية هو مين دا الفصل الحادي والعشرون 21 بقلم أسماء الطبلاوي

رواية هو مين دا الفصل الحادي والعشرون 21 بقلم أسماء الطبلاوي

رواية هو مين دا البارت الحادي والعشرون

رواية هو مين دا الجزء الحادي والعشرون

رواية هو مين دا الحلقة الحادية والعشرون

(زي ما اتفق المعلم شعبان مع فاروق والمعلم جابر خدوا بعضهم وراحوا على طول على الفندق اللي كان نازل فيه سمير علشان يعرفوا هو مسؤول عن اختفاء نسمه ولا لا ولما وصلوا على الريسبشن عشان يسالوا بصت لهم الموظفه بقرف.
الموظفه: ايه ده انت وهو ايه اللي جايبكم هنا بمناظركم دي ده فندق محترم على فكره.
فاروق: في ايه يا مزمزيل حد قالك ان احنا جايين نقعد عندكم احنا كل واحد فينا عنده بيت يسد عين الشمس احنا جايين نسال على حاجه وماشيين على طول
شعبان: وبعدين مالها مناظرنا يا سنيوره ايه مش رجاله واقفين قدامك.
الموظفه: لو سمحت ما تتكلمش معايا بالاسلوب ده.
جابر: هو قالك حاجه علشان تتكلمي بالمنظر ده عموما احنا جايين نسال على حاجه وماشيين مش جايين نجالسك يعني
الموظفه: اتفضل قول عاوز ايه عشان تمشي بسرعه المدير لو شافكوا هنا مش هيحصل كويس
فاروق: اسكتي عشان نعرف نقول الكلمتين ونمشي عندكم واحد اسمه سمير فرحات اخذ اوضه عندكم هنا.
الموظفه: ثواني هبص على الكمبيوتر واقولك.
( بصت الموظفه على الكمبيوتر وعملت سيرش على اسم سمير فرحات وبصتلهم تاني بنفس النظره واتكلمت.
الموظفه: ايوه في واحد هنا اسمه سمير فرحات بس هو مش موجود حاليا في غرفته.
فاروق: امال راح فين.
الموظفه: والله انا مش مسؤوله اني امشي ورا النزلاء واعرف بيروحوا فين هو خرج وخلاص
فاروق: طيب ممكن اعرف رقم الاوضه بتاعته.
الموظفه: اسفه يا فندم مش مسموح ان احنا نقول لحد رقم غرفه عميل الا بعد ما نستاذنه وهو مش موجود علشان استاذنه
شعبان: انتى باين عليكي غاويه وجع قلب اللي انتى عماله تتكلمي عنه ده خطف واحده من عندنا ولازم نعرف هي فين
جابر: اه وخلي بالك لو ما قلتلناش رقم الاوضه هتبقي شريكته لان ممكن جدا يكون مخبيها عندكم هنا قوللنا رقم الاوضه علشان رجلك ما تجيش في الموضوع.
( خافت الموظفه جدا من كلامهم وقالتلهم.
الموظفه: لا خطف ايه وموضوع ايه انا هجيبلكم المدير وهو بنفسه هيقولكم على رقم الغرفه احنا في فندق محترم.
فاروق: انا بردز بقول كده روحي هاتي المدير.
( في الوقت ده كانت هيام قاعده هي وهادي وهو بيبصلها ومستني انها تتكلم عشان تقوله اللي هو شافه ده يطلع ايه.
هادي: طيب انا هديت قدامك اهو وكويس جدا ممكن بقى تفهميني ايه اللي حصل ومين الشخص اللي كان هنا ده وازاي ظهر فجاه كده من العدم.
هيام: اهدى يا حبيبي وانا هفهمك كل حاجه اللي انت شفته ده يبقى امير من الجان.
هادي: نعم امير منين.
هيام: امير من الجن يا حبيبي
هادي: ومالك بتقوليها كده ليه كأن عادي يعني ان انتى تبقي تعرفي امير من الجن انا مش فاهم حاجه.
هيام: انا هفهمك منصور زي ما عمل في ابوك عمل في ابويا ويمكن اكثر كمان علشان كده قررت انى اسيب دراستي وارجع علشان اخد حقي منه فضلت الف حواليه لحد ما شافني واعجب بيا وشغلني عنده وبقيت ذراعه اليمين لكن كل يوم شره كان بيزيد كان في مقبره عاوز يفتحها والمقبره دي مش هتفتح الا بأمير من الجان واحد بس وهو اللي انت شفته ده الامير راكان والامراء والملوك بتوع الجان ما ينفعش اي حد يستدعيهم كده وخلاص الامير راكان اللي انت شفته ده بيحب بنت انسيه اسمها نسمه ودي صاحبتي وبقت صاحبتي بس لما منصور خطفها علشان يلوي بيها دراع الامير راكان عشان يرضى يفتحله المقبره وفعلا خطفها وانا ساعدتها علشان تخرج بس بشرط قلتلها خلي الامير يخلصني منه للابد.
هادي: لحظه واحده بعيد عن موضوع الجن والعفاريت والكلام اللي انتى قلتيه ده كله هو انتي المسؤوله عن موت منصور؟؟؟
هيام: هي دي الحاجه اللي انا ما كنتش عاوزه اقولهالك عشان كنت فاكره انك هتخاف مني بس واضح انك مش بس هتخاف مني انت كمان ممكن تسيبني.
هادي: ردي على سؤالي بوضوح من فضلك يا هيام.
هيام: ايوه انا اللي مسؤوله عن موت منصور طلبت من نسمه انها تقول للامير راكان يخلصني منه وهو علشان عارف ان منصور هو اللي خطف نسمه ده غير كمان انه ما كانش ناوي يسيبها بعد ما المقبره تتفتح وكان هيحتجزها عنده وتبقى من املاكه نفذ على طول بس هو ما قتلوش بايده كده هو حبسوا هو والشيخ اللي كان معاهم ورجالته جوه المقبره اللي كانوا عاوزين يفتحوها وسابهم بقى جوه يواجهوا مصيرهم وخرجني من هناك انا ونسمه.
هادي: طيب ليه عملتى كده كان ممكن تبلغي عنه ويتقبض عليه وخلاص.
هيام: تفتكر ما عملتش كده او ما حاولتش حتى انا بلغت عنه بدل المره 10 وبطرق مختلفه لكن كل مره كان بيلبسها لحد من رجالته ويطلع منها زي الشعره من العجين ما كانش قدامي حل غير كده منصور كان ناوي يحتجز نسمه عنده ويعاملها على انها حاجه تخصه وانت فاهمني وده اللي كان عاوز يعمله معايا لولا ان انا قلتله لو فكرت في حاجه زي دي انا همشي ومش هتشوف وشي ولانه كان معتمد عليا في كل حاجه في شغله قرر انه يسيبني براحتي.
هادي: ايه اللي دخلك في كل ده بس…. يعني دلوقتي اللي كان واقف هنا ده امير من الجن واللي بيدور عليها اللي اسمها نسمه دي تبقى حبيبته وصاحبتك.
هيام: بالظبط ودلوقتي ليك حريه الاختيار لو عاوز تسيبني قولي ولو عاوز تفضل معايا انا مش هسيبك ابدا.
(في الوقت ده كانت ام فاروق قاعده مستنيه اي خبر عن نسمه مسكت تليفونها واتصلت على فاروق علشان تحاول تعرف منه اي حاجه يكونوا هم عرفوها عن نسمه.
ام فاروق: الو ايوه يا ضنايا انتم فين.
فاروق: احنا في الفندق اللي هو قاعد فيه ياما هنخش دلوقتي نقابل المدير.
ام فاروق: يعني ما عرفتوش حاجه عن البنت.
فاروق: لسه ياما من ساعه ما جينا واحنا بنحاول نقنع الناس اللي هنا اننا عاوزين رقم الاوضه بتاعته علشان نشوفها معاه هنا ولا لا وما كانوش راضيين يعرفونا حاجه لكن دلوقتي احنا مستنيين نخش للمدير اهو الموظفه راحت تديله خبر بقى لها اكتر من ساعه واحنا قاعدين مستنيين.
ام فاروق: طب عشان خاطري يا ضنايا اول ما تعرف اي حاجه رن عليا وكلمني.
فاروق: حاضر ياما خلي بالك من نفسك وما تفتحيش الباب لحد.
ام فاروق: حاضر يا ابني يلا سلام
( قفلت ام فاروق مع ابنها وقعدت تعيط وتدعي.
ام فاروق: يا رب رجعها بالسلامه يا رب واحفظها فين ما تكون دي بنت غلبانه ومالهاش في الدنيا حد ومكسوره الجناح وانت اكثر واحد يا رب عارف اللي هي عدت بيه كفايه انها يتيمه احرسها يا رب ورجعها بالسلامه ولو انها ايدها طويله ولسانها عامل زي المبرد بس والله وحشتني.
(خلصت ام فاروق دعوتها وما لحقتش تكمل كلامها والباب خبط قلقت لكن قامت وقفت ورا الباب وندهت.
ام فاروق: مين على الباب.
سنيه: انا يا خالتي انا سنيه مرات شعبان ما تخافيش.
( استغربت ام فاروق لكن فتحت الباب لقت سنيه قدامها.
سنيه: العوافي يا خالتي المعلم راح معاهم زي ما انتى عارفه قلت اجي اقعد معاكي شويه واهو بالمره اطمن عليكى.
ام فاروق: اتفضلي يا بنتي بيتك و مطرحك.
( دخلت سنيه وقعدت هي وام فاروق يتكلموا شويه.
ام فاروق: نورتيني تشربي ايه يا حبيبتي.
سنيه: مالوش لازمه يا خالتي انا كنت جايه عشان اتكلم معاكي شويه.
اما فاروق: عيني ليكي في حاجه ولا ايه.
سنيه: بصي يا خالتي انا دلوقتي همشي بالمثل اللي بيقولك اخطب لبنتك وما تخطبش لابنك وانا والمعلم كنا من امبارح بنتكلم في الموضوع ده.
ام فاروق: انا مش فاهمه حاجه من كلامك انتى تقصدي ايه.
سنيه: بنتي ناديه راجعه بكره من بلاد بره خلصت دراستها وبرغم انها دارسه بره ومتعلمه احسن علام الا انك عارفه انها كانت من قبل ما تسافر وهي بتحب فاروق لكن ما كانتش بتتكلم زي ما انت فاهمه انا عاوزاكى تاخدي وتدى معاه في الكلام مش عاوزه قلب البنت يتكسر ثاني.
ام فاروق: يعني ناديه راجعه بكره يا الف نهار ابيض ربنا يباركلك فيها يا حبيبتي بصي يا سنيه النصيب ده بتاع ربنا لكن انا اوعدك ان انا هكلم الواد فاروق واشوف هو هيقولي ايه وبعدين يعني هو انا هلاقي احسن من بنتك اخذها لابني ده انا يزيدني شرف صحيح انا قلبي شايل من جوزك علشان كان حاطط عينه على البنت نسمه لكن فاروق بيقول انا اتغير وان ربنا هداه.
سنيه: او والنبي ربنا هداه يا خالتي والنبي تبقي تكلميه البنت بتحبه والله و انا مجهزاها يعني مش هينقص عليها اي حاجه لو قالوا يا جواز الصبح هتلاقيها جاهزه.
ام فاروق: انا اللي ابني مش هيبقى جاهز وهتبقوا عايزين تستنوا شويه بس بردو هكلمه وهرد عليكى ما تقلقيش.
سنيه: ما اتحرمش منك يا خالتي ربنا يديك الصحه يا رب انا هقوم انا بقى عشان لو المعلم رجع فجاه يلاقيني هناك.
ام فاروق: بس الشويه الصغيرين دول كنتى قعدتى معانا شويه.
سنيه: الجايات اكثر وان شاء الله ابقى كل يوم عندك في الفرح يا رب.
(خرجت سنيه وسابت ام فاروق تفكر في الموضوع وهي للامانه موافقه على البنت وبتحبها لكن مستنيه لما تشوف فاروق هيقول ايه في الفندق دخل شعبان وفاروق والمعلم رجب للمدير علشان يسالوه على رقم اوضه سمير.
المدير: اتفضلوا اقعدوا الموظفه قالتلي انكم عاوزين تعرفوا رقم غرفه عميل ومصممين ممكن اعرف ايه السبب لان زي ما انتم عارفين ان دي اسرار عميل وما ينفعش اقولها لاي حد الا باذن منه
فاروق: انا بس عاوزك تعرف ان العميل اللي انت بتتكلم عنه ده اخذ واحده من حارتنا وخفيها عنده بالعافيه واحنا عاملين محضر علشان كده عاوزين نعرف هي معاه فوق ولا لا ونطلع نبص بصه في الاوضه يمكن نلاقي اي حاجه تخصها.
جابر: وكمان احنا قلبنا عليك علشان الموضوع لو كبر رجلك هتيجي في الموضوع واسم المكان بتاعك ده هيتلط وانت عارف العيار اللي ما يصيبش يدوش يعني سمعتك هتبقى في الارض انت والمكان بتاعك ده.
شعبان: وبعدين احنا مش طالبين كثير احنا عاوزين بس ناخد بصه في الاوضه ولا مين شاف ولا من دري وصدقني لو هو عرف ان احنا كنا هنا مش هيدخل المكان ده ثاني.
المدير: لا ده واضح ان الموضوع كده كبير اتفضلوا معايا انا هطلع معاكوا الغرفه بنفسي ولو لقينا اي حاجه تخص البنت اللي بتتكلموا عنها انا اللي هبلغ الشرطه ولو ما لقيناش مش هدخله الفندق ثاني
فاروق: عين العقل يا باشا اتفضل
( في نفس الوقت ده كان سمير خرج من المكان اللي مخبي فيه نسمه وراح مشوار وراكان كان حواليه علشان يشوف هو هيروح فين ويقدر يخرج نسمه بسهوله من غير ما تتاذي.
راكان: لو كان ربنا ادانا قدرة اننا نعلم الغيب او كنت لسه بقوتى كان زمانها في حضني دلوقتي وكان زماني خلصت منك ببساطه بس كل شيء ربنا عمله لسبب وحكمه وانا بالي طويل ومستني اول ما ترجع هناك عندها واعرف انها في المكان هخلص منك للابد.
( كان الحوار ده بيدور في دماغ راكان من زعله انه مش عارف يوصل لنسمه لحد دلوقتي وهناك عند هيام وهادي وقفت هيام وقامت علشان تخرج لكن هادي وقف قدامها بعصبيه.
هادي: ممكن افهم انتى رايحه فين دلوقتي.
هيام: اظن ان انا سبتلك القرار وقلتلك قرر انت ناوي تعمل ايه ولحد دلوقتي انت ما نطقتش بحرف وما اتكلمتش علشان كده انا فهمت خلاص انك قررت انك مش عاوزني لمجرد اني اخذت حقي.
هادي: انا ما قلتش حاجه زي دي كل الحكايه اني كنت بدور الكلام كله في دماغي ما تحكميش على كل حاجه من قبل ما انا اتكلم هو انتى كنتى دخلتى في نيتي.
هيام: يعني ايه.
هادي: يعني الاعمار بيد الله لو كان ربنا رايدله انه يعيش كان قدر يخرج من المقبره وكان زمانه لسه لحد دلوقتي موجود انا مش هشيلك ذنبه ولا هشيل ذنبه معاكي اللي حصل حصل وخلاص وهو كان شيطان ماشي على الارض ربنا بقى يرحمه ويغفرله انما انا مش ممكن اتخلى عنك.
هيام: يعني مش زعلان مني ان انا خبيت عليك ومش هتسيبني.
هادي بحب: انا عمري ما هسيبك ما تخافيش.
( في نفس الوقت عند شعبان وفاروق وجابر كانوا مع المدير في اوضه سمير في الفندق.
المدير: اديكوا فتشتوا بنفسكم وما لقيتوش اي اثر لقريبتكم اللي بتقولوا عنها دي في الاوضه وانا اضمنلكم انه مش هيدخل المكان هنا تاني ابدا ولو جه انا هبلغكم على طول.
فاروق: يبقى شاكرين افضالك يا باشا وتبقى عملت معانا الصح.
( نزل فاروق وشعبان وجابر مع المدير.
المدير: اتفضلوا معايا اخد بياناتكم وارقام تليفوناتكم علشان لو حصل وسمير ده ظهر هنا في اي وقت ابلغكم على طول وده علشان مصلحه قريبتكم اللي هو اخدها وكمان سمعت الاوتيل.
فاروق: طيب روحوا معاه انتم وملوه رقمي و بياناتي وانا هستناكم هنا رجلي وجعتني من كتر اللف.
( راح شعبان وجابر مع المدير علشان يدوله البيانات ووقف فاروق قريب من موظفه الريسبشن مستنيهم لما يرجعوا واحد دخل متوجه للريسبشن وسال عن اوضه سمير.
الراجل: انا عاوز المفتاح الاحتياطي بتاع اوضه سمير بيه فرحات هو اللي بعتني عشان اخذ حاجته.
الموظفه: حضرتك معاك اللي يثبت كلامك ده.
الراجل: ايوه في رساله على التليفون اهي هو بعتهالي اتفضلي شوفيها.
( اتاكدت الموظفه من كلام الراجل واديتله المفتاح كل ده فاروق كان سامعه جرى بسرعه ونده لجابر وشعبان ووقفوا يستنوا الراجل لما نزل وركبوا العربيه بتاعت شعبان وطلعوا وراه.
فاروق: هو ده الراجل اللي انا قلتلكم عليه خليك وراه يا معلم شعبان ده اللي هيوصلنا لسمير ولنسمه.
شعبان: هيروح فين خلاص انا وراه على طول.

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية هو مين دا)