رواية كحل عرب الحلقة الثانية والأربعون 42 بقلم زينب ماجد

 رواية كحل عرب الحلقة الثانية والأربعون 42 بقلم زينب ماجد

رواية كحل عرب الجزء الثاني والأربعون 

رواية كحل عرب البارت الثاني والأربعين 

رواية كحل عرب الحلقة الثانية والأربعون 42 بقلم زينب ماجد


رواية كحل عرب الحلقة 42


((( زينب ماجد )))

الحلقة_42
(شرف على المحك )

گطره اعله گطره ...
وليل يعگب ليل
ويدوخ الندى..
او يلتم بلل وردي
اثاري اشما المن من وشال الصيف
حد ما وصل حلكي..ولنه متبدي
شماته وليل....غربه
وجلمة الياحيف
يلتمن دمع ويطيحن بخدي
يلتمن دمع ويطيحن بخدي
(عريان السيد خلف )

ابتسم جسام أبتسامة خفيفة و عاين لاخته .. رد عاين الها : متأكدة .

ردت ليورة و دنجت، هد المچان وطلع ، و زناد كاض كلبه و ملوك تترقب .. خافن بتها تكول لاله ، طلع بسام و كال الهم : انا اتعذر منكم .. لجن لزوم اخذ رايها و دام هي موافكة ... اعلى بركة الله .

ملوك كضت نقابها و دشت لبتها للحجرة ، لكت راديون مدنجة و تبجي ، صكت الباب وراها و كالت الها: بتي و اعرفنج ما تخيبين ظنوني .

- عوفوني انتم دمرتوني عوفوني .

- الزلمة خوش زلمة ، شدي حيلج و كومي ولا تخلين الناس تكضلها لزمة اعلى ابوج و يكولون بته و يمسونه بچلمه .. اذكري ابوج وارباه ورفعي راسه ، و كل خطوة تخطينها خليه اعلى بالج لا تنزلين سمعته، خاصة عد ال ثجيل .

كامت من مكانها : انا نطقت موافقة بس ما اريدنه يمه ، كلوله ماتت راحت .. اي شي بس ما اعرس .

- كومي و توكلي على ربج .. ياله بنيتي .

راديون : دنجيت ابجي و انا انشد روحي صكد وافكت .. هاي انتهت و عفت عشك عمري النطرته سنين ...

حطيت اديه اعلى وجهي و كمت اشهك ببچاي ..
دش زناد و كال : اوجفي يراديون

وكفت بكل حيلي و خزرته و انا احاجيه : شتكل لابوي يو كابلته ها ، اطيت بتك لعدوينك .. سرحان نط و هو يريد هدوة ولأن من ال ثجيل ما رضاله و اليوم بايعني ليهم برخص ، برخصصصصص.

- ششش حسج ما اهيسنة ، كومي اعلى حيلج و اسمعيني ، تصيرين مرة امعتبرة و تبيضين وجهنا جدامهم خوش .. و سوالف سرحان و شقاواته انسيهن ، انت بت شيوخ .. وعشتي ابيت شيوخ ما عشتي ببيوت الشقاوات مثله خاطر ترضيله

- تروح فدوة لجدم سرحان ، وكل الجرالي ذمة بركبتك و ما اسامحنك الى يوم الدين و انت موش اخوي .

- راح اكضمنها و ما اجيسنج عبنج هساعة تطلعين من بيتي، الله يوفكج خوية .

حجاها و طلع .. توكل عني بالعقد .. و دشن علي النسوان وكفني ورا باب الديوان .. ساعة الكال الرايد ياخذني : و انا اقبل .

باركنلي النساوين و انا مدنجة و بس دموعي تهل ..
كربت مني ليلى و حطت الكوار مالي ، شالته عنها مرة من ال ثجيل.

كربت من عدي امي حبت راسي و انا الدموع تهل ، حجت : لا زناد ولا كريم ولا ابوج ولا قصره .. ولا كل هاي الدنيا .. ما تسوى عدي اظفرج .. لا تظنين امج تهدج و انا وياج و الياذيج بس اشري بيه .. و انا اتصرف وياه .

انا نشدت كبل اسبوع عن الزلمة الرايد ياخذج كالولي اسمه جسام و زلمة مفرد عن ال ثجيل .. خلق و اخلاق ورضيته الج ياله وافكت اعليه و ساندت اخيج .

- انت موش امي و السويتي بيه انانية و انا ما انساه الكم ... كلشي يصير بيه ذمة بركبتكم .. وما اسامحنكم ..

خذو غراضي و طلعو .. ومشيت و ادموعي سجابة ، غمضيت عيوني و خليتهم هم يكودوني .. ما تمنيت بهاللحظة غير ابوي .. و اشكيله شصار و شجرى بحالي عكبه .

شهرين بس المرن على موته
بهالشهرين ذبيت دموع مالت سنين الدلال و الغنج الجنت اتغنج بيه بعهد ابوي .. جنت بعهدة ملكة زماني و اليوم انا مكيودة مثل السبية الماخذينه لالها كول ولا راي .. تمنيت بهالساعة يطلع ابوي من كبره
ويرد زناد عني و يبعد ال ثجيل و يلمني بشليله.

جلمة ((بويه)) ما فاركت الساني اردد بيها وانا امش
فتحولي باب السيارة ، و صعدت و البوشية اعلى وجهي ، لا رفعتها ولا شفت احد .

مشت السيارة و كل دورة يدور بيها التاير .. يفل احلامي و يبدي امنياتي اعلى كاع صبخايه و يتبخرن جدام عيني.

وصلنا البيت ، و نزلني النسوان .. و استقبلوني بالهلهل و الواهلية ، وصف حذاي الزلمة النشدني كبل شواي ..

عرض بعيني خنجر ..
تاب و تغير بس خاطر يحصل علي ، و السويته اني وافكت اعلى غيره و هديته .. شحاله و شحال كلبه يو سمع بسواياي ليه .. راح يعذرني يو شراح يعمل ..
راح يكرهني و راح ينعل الساعة الحب بت ضيع عمره اعليه وبالنهاية هدته و مشت لغيره.

كعدوني بالگبة ، و النسوان يصكن و ملاية تغني ، و بنات يصيحن و يشتغلن .. و كاعد يفرشن بحجرة وحيد اسمه ( جسام ) يكولون هو هاذ الأخذني ونفسه الملج اعليه .

محد كعدت يمي ولا وحيدة نشدتني ، منزله بوشيتي و دموعي تسجب ، كربت مني مرة و كالت : شنهي عليش مغشاية ، ارفعي خل نعاين وجهج.

نشفت دموعي ببوشيتي ورفعتها عن وجهي وكشفته ، والكاعدات كلهن يتورجن علي .. جدامهن تلفزيون موش مرة مهدود حيلها.

واسمع شوشرتهن ... هاي بت الشيخ مطر الجان شارط اعلى عرسها قصر مثل قصره ؟

والثانية تردها : حكه جا عاينيها . الوجه كيمر

وتردفها الأخرة : جا يو شايفه امها شتكولين ، بعمرها هاذ و الكمر ما يصف حذاها اعلى الحسن الشايلته ، يكولون الشيخ جان عابدها عبادة .

ردتها الاخرة : هيج و جويسم يعبدلنا بت ال ضاحي و يكدرها .

- يا غدي ، جا غير سلطان ناطرها نطرة .. ابوها خذه ردحة ورداها جلد و عظم و ذبوها و ما نشدو عنها تريدين جويسم يغدر بتهم و يحترمها ، عليش بويه.

جويعدة مدنجة و اسمعنهم ..
والعن زماني الحطني بهالمجان ، ذول خدم ما يخطهم ابوي بقصرة موش يجعدون و يحجن و يسمعني ولا جني جويعدة حذاهن .

درت وجهي اعاين لمرة تصخر ابتها و تكوم بيها ، العرفته هاي البت .. بت سلطان الرايد ينطيها لزناد .

درت ليهن وحجيت ويا وحدة منهن : الحجرة الأكعد بيها وينها ؟

- شرايدة منها

- رايدة اكعد بيها

- بعدهن جاي يشتغلن بيها ، و اتعلمي يمه احنا موش خدم عدج ولا عد ابيج خاطر اديرين وجهج و تنشدينه ، انشدي عدل .

دش رجال جبير بالعمر يمشي و يستند اعلى العكازة .. ضخم طويل و عكاله اعلى راسه ، عرفته هو هاذ سلطان ..

دشوا وراه ازلام يتبينون هم ولدة ، لجن كبار بالعمر تطلع اعمارهم ب٥٠ .. كامن النسوان خاطر يستقبلن و يكولن : هلا شيخ .. هلا بويه .. تفضل ..
تجاهلهن و اجا عدي وكفت اعلى حيلي و دنجت .

ابتسم و حجه : يكولون ابوج جان شارط .. اليريدج يبنيلج قصر مثل قصر جدي جلوب .... ههههههههههههههههههههههه وينه مطر ويجي يعاين الرايدلها قصر ، حتى اخشاب ما جددينا الها ، يو ابوج حاضر الساعة شتظنينه يعمل .

رفعت عيني و عاينتله : الله يرحمه جان صاكر جثير واوية تربي من ابعيد و تتصيد لمضيفه ، لجنها ما كدرتله ، ساعة الطاح الذيب .....

رفع عكازته ، فزيت و كطعت كلامي و انا ارفع ايدي ... و خلاها اعلى جتفي وحجه : هلمرة راح اجزيها الجن من كونج جديدة عهد .. مرت الأخرى ادفننج بصف ابيج ... فهمتي بنيتي .

نعمة: بت ال ضاحي شناطر منها بويه ، لا تحج وياها و اطها لجسام يعيد تربيتها .

سلطان : نجممممة

- امر يبو نعمة

- خذيها من جدامي ما اريد اشوفنها .

كضتني من ايدي و سحبتني و دخلتني ، و سلطان صاح .... جسااااااام

دشيت الحجرة و صكت علي الباب .. كعدت اعلى القريولة و دنجيت راسي ابجي : وينك بوية وينك عني ، يو بس تكعد و تشوف بتك شحالها بنص عدوينك بوووية .

......

سرحان : دشيت للبيت الظهر توني جاي من المعمل ، كعدت بالكبة و ام سالم كربت عدي : صبنلك غدة يمه ؟

- اي والله حجية

بشرى : ها الله يساعدك

-يساعد بختج
احجي و انا انزع السترة و اكللها : جيبيلي دشداشتي البيضة ، بس كونج مبخرتها ؟

- اي اي مبخرتها ومعطرتها ، وين رايح

- امش لبيت زناد افضن سالفة راديون ، لزوم اجيبنها واحطن حد لزنيد .

- هي ودت طارش الصبح و تكول خل يجي سرحان يطلعني من بيت زناد بعد ما اكدر اصبر اظلن هنا .

- يمتى الصبح

- هيج كبل الضحى

- و عليش ما طرشتيلي وحيد للمعمل .

- كلت ترد و تروحلها

- دتستجلي جيبيلي الدشداشة خل اروحن ، ياله تحركي .

مشت عني و انا انزع بقميص ، واصيح اعلى امي خاطر تحضر روحها تمش وياي ، و رحت اسبح .. رديت لبست و حطيت عكالي ، طلعت جدامي ام سالم : الغدا محطوط .

- لا اروحن لراديون اجيبنها ، عوفي الغدا هسه .

خذت امي و رحت لبيت زناد .. دكيت الباب ، فتحته ليه مرت زناد، رحبت بأمي و فتحت الها الباب و انا ظليت انشد و اكللها : زناد وينه ؟

- زناد طلع كبل شواي للمضيف.

- اندهيلي راديون رايدها

- عرست

اندرت ليها : عرست شنهي

- اجا سلطان كبل ساعتين ملجوا و خذوها بلا زفة و صفكة و مشت.

- انت تحجين صكد يو تشاقين ؟

دفع الباب و صاح ، راديووووووووون وين ؟

طلعت ملوك : سمعت و كالتلك مشت لبيت رجلها ، عليش تصيح بنص البيت .

هدهم بساع و طلع للمضيف ، دش المضيف و كض زناد من هدومه و جابه ابوكس ، و كاله : ولك زوجتها من عدوين ابووووووووي ، يالرديييييييي ، منهوبة و تطيها بهالعطيييييية

وزناد طال ايده وتكاضض وياه .. وتكاومو بنص المضيف و عمامهم صارو بنصهم ويجرون بيهم .. و سرحان يصرخ : تبرى منك مضيف ابوي ، ولك تطي اخيتك بظهرية حمرة و جنها منهووووووبة ، ولك هيج تزف بت الشيوووووخ ولك .

و زناد يكله : اطلع من مضيفي ، امش يااااالع و من السوم انا اذبن بيك سند و اطردنك من العشيرة

تفل عليه سرحان بنص الزلام .. و كلها ضجت اعلى سوايته ... هداهم متكاومين و طلع من المضيف موجره اعصابه .

اخذ امه بسيارته و طلع لال ثجيل ، و هو يصرخ : نذل نذل نذذذذل بس حتى يمشي جلمته هون بيها و اطاها بظهرية حمرة و هي مخطوووووبة .. شايفتلج بت مخطوبة يطيها لواحد ثااااني .. هاي عماااايل شيخ كليليييييييييي .. يا خيف زنيد النذل يخلف ابوي ، بس انا اله منا و غاد .. ولك يا زناد تلكاها مني .. وعلي لاخربط احوالك .

....

راديون : تمددت و حطيت راسي اعلى الوسادة ، و لميت رجلية لجسمي و دموعي يجرن بهداي ، انفكت الباب .. كعدت من حيلي ودرت وراي .

دش الزلمة نفسه النشدني ابيت زناد ...

- السلام عليكم

عدلت كعدتي و انا احس بعيوني ورديت : وعليكم السلام .

تنهد وظل واكف يعاين ، و انا مدنجة، حجه : نزعي عنج العباية خافنها مضايكتج .

ما تحركت من مجاني ولا اطيت ردة فعل .. شافني ما حجيت ، سكت و تكرب كعد اعلى القريولة من الجهة الأخرى .

وظليت اعلى حطتي .. و هو يعاين بكتار الحجرة ... نزلن دموعي بهداي ، و اعلى جرة خشمي و انا ابجي ، انتبه .. اندار و حجه

- عليش هالبچى ؟

ما رديت ، تنهد و كام من مجانه و اجا جدامي ، وكف يم راسي ، غمضيت عيوني و هو واكف .. ما صدر من عده اي ردة فعل ، فكيت عيني وشلت راسي اعاين ليه .. ابتسم و كعد جدامي .
اخذ ايدي و حجه : اعرف ابوي اذاج بفعلته .. لجن انا اريدن منج ما تردينه مرت الأخرى .. ولا تجاوبينه .

- ان جان ابوك يخوفك .. ما يخوفني .

- مامش احد يخاف من احد لجن الاحترام واجب و هو زلمة جبير و الامور البين اجدادنا ما اظنن تخفى عنج ، ومثل ما ابوي ما يود اهلج .. هاذ الشعور جنتي تشوفينه عد ابوج الله يرحمه ما يودنا .. صح يو انا غلطان .

- هزيت راسي ودرت عنه .. تنهد و كال : ارتاحي و اخذي راحتج ، المغرب كرب توضي و مدي السجادة و خلي كلبج يتطمن بذكر الله .

حجاها و كام و هو يطلع .. توضى و دشت بت جايبة طشت و كيتلي و كالتلي : هاج تغوسلي

وكفت اعلى طولي ، نزعت العباية عن اجتافي ، لكيته وراي ، جرها و حطاها اعلى القريولة ، كعدت وخذت الكيتلي صبيت ماي و توضيت و هو كاعد بكتري .

كملت ، حجت المرة : ساعة و يجهز العشا .. و اجيبنه الكم .

- اخذي راحتج خوية .

خذت الماي و طلعت و صكت الباب وراها ، اندار و هو يسحب الغترة من على اجتافه و يعلكها بالزاوية ، سحب السجادة وكال : اخذي هاي الج منا وجاي ما استعملها انا ، بس شوفي بيها تربة .

شافني كاعدة و ما اردن عليه ، هد السجادة من ايده و كعد .. دنج راسه حيل و هو يعاين لوجهي ، عاينتله ، ابتسم : بعدج مقهورة ؟

- انا ما رايدة اكشن بوجهك لجن رويحتي تعبانة .

- انا اعرف وفاة ابوج كبل شهرين و كل هاذ الصار انا مقدر الوضع .. بس .... سكت
ضيع الكلام .. ابتسم و هو ما يلكه حجاية يحجيها ، طرى الحجاية بضحكة : شنهو اسمج ؟

درت اعاين .. استغربت الأسم .. ورديت : رويدا

عقد حواجبه : الأعرفنه راديون ؟

- هاذ اسمي البالهوية سمتني سستر مسيحية .. بس يصيحولي راديون .

- بس رويدا احلى ؟

ما رديت عليه وظليت كاعدة بمجاني و انا احاول استوعبه و اكضم البداخلي و اسيطر اعلى روحي ، حجه هو : اسمي جسام .. و عمري ٢٩ سنة .. امي ميته و ابوي سلطان وانا ازغر ولده ...

رفعت اعاينله ، كمل و هو يحجي : ماتت امي و انا بعمر السنة و نص .

- جتلها ابوك ؟

- عقد حاجبه بأستغراب و ردف : عليش تحجين هيج اعلى ابوي .. ابوي موش جتال .

سكت و ما جاوبته .. كمل : جانت حامل و تعسرت ولادتها و ماتت هي و الفرخ و اتربيت اعلى ايد مرت ابوي نجمة .. انا ازود واحد من بين اخواني حظيت برعاية ابوي و عطفه من كون انا الوحيد بينهم يتيم.

سكتت و هو سكت .. مد ايده و حطاها اعلى ركبة رجلي و كالي : ادري الأمور تلايمت و كلشي صار بساع بساع لجن لا تحطين ابالج .........

جاي يحجيها و ارتفع صوت سرحان بنص البيت ، كمت من مجاني و انا اكلله : هاذ اخوي سرحان .

كام هو من مجانه و طلع و انا فرفحت روحي ساعة السمعيت حس وحيد من اهلي بنص هالوجوه الغريبة .. سمعت سرحان يتصايح وياهم و حسه عالي و يكللهم : هسه تطلع لا تخلوني وعلي اهدن البيت اعلى اهله ، بت ما الكم عدي

و سلطان يتصايح وياه ، و جسام واكف و يتصايح وهوسه .. هم يكلوله بموافكتها .. و هو يكللهم البت مخطوبة و زناد غصبها اعليكم ... انتم ما تستحون تاخذون بت مخطوبة .

جسام وكف بوجه و كاله : البت ما رضيت املج اعليها الا ساعة النشدتها و اخذت الرضى من شفاها .

كامو يتصايحون ، اخر شي صاحتني المرة الأسمها نجمة و سحبتني ، خذت عباتي و حطيتها اعلى راسي ، دشت ليهم للديوان سلطان وولده واكفين و سرحان يصيح .

ساعة الشفته ولذت بكتاره و ذبيت روحي بين اديه وانا ابجي ، حب راسي و كالي : جيبي اغراضج و امشي وياي ، و انت يو زلمة اطلكها و ما تاخذ بت مخطوبة .

جسام : انا جاي اكللك ما خذيتها غصب هي الوافكت اعلى العرس بلسانها .. انشدها .

سلطان : تراك زودتها ... اخذ امك ولم غيضك عنا و لا تخلنا نتلايم .

سرحان : انتم شنهو من ملة .. زناد غصبها ...موش بت الشيخ مطر التنطي هيج عطية

راديون : سرحان سرحان .. عاين

- ما اعاين جيبي اغراضج

- انا وافكت يسرحان

- وافكتي شنهو ..اهد الدنيا فوكهم و فوك زناد ، امشييي

تكرب اعليه نعمة و تكاضض وياه : تهد الدنيا فوكمن .. هااا

وكضاه سرحان و راد يمطله ، ذبت روحها امه ، و اخوته التمو ويكلوله : لونك موش ابيتنا جا عرفنا نتصرف وياه .

كضاه جسام و كاله : انا الزلمة الملجت اعليها ، و انا جانت عدك حجوة ، احجيها وياي ، و اخذ الجلمة مني

سرحان : ان جانك زلمة وواكف بطولك ..طلكهاااااا

سلطان : فاض الصبر و ووصل حده يسرحااااان ، نعممممة...... قاطعه جسام و هو يكله

- بويه ان جان الي خاطر يمك .. خلني تحلنخا وياه ، احبن راسك استريح ، نعمة خوية بس شويه اطني مجال .

يحجيها و سرحان جر ايدي : وكفتج شنهي ، لمي غراضج ومالج غرض باحد

- سرحاان .

طلع سلطان وولده و ظل الديوان لسرحان و جسام و ردحة وراديون واكفات ، وكف جسام و كال : هاي البت بعدها مثل ما جبتها، يشهد الله ما جستها .. اهي جدامك ، واتخير اعليها ، ان جانت مغصوبة اخذها بعبايتها و اعتبرها مطلكة بالثلاث .

ردحة : بس اهدى يمه يواشج فدوة اغديلك

سرحان يفرك بوجه و شاب نار اندارلها : الراي شنهي ؟

- هم حجو الحك الملجة صارت بموافكتي و انا الرضيت ...

صرخ : انت تسودنتي ، عكل ما براسج .. عرسج باجر و الزلمة ناطر انا شكلله .. انطيت جلمه و اهو مزهب روحه و تكسرين بجلمتي لخاطر زناد

- موش لزناد ، انا ما رايدتكم تتكاومون والسبب انا .. زناد ما راح يهدك ..وانا جنت اظنن الملجة باجر و حطوني هالحطة شكولن ؟ و يو مفشلة زناد جدام كل هالزلام شتظن يعمل ؟ اذا ما كدرلك يكدرلي .. انا والله ما رايدة اكسر بجلمتك بس ما رايدتكم تتكاومون .. بأذني هاي سمعت ابوي يوصيك انت و زناد و يكللكم يو تكاومتو وواحدك تبرى من الاخر ما ارضى عنكم و العنكم و انا بكبري .. هاي وصيت ابوي يو لاله .. حاجيني .

اخذ نفس قوي و تقرب منها :- ولج انت اتسودنتي ، ولج هااااذ بيت ثجيل راديون ، خاطر زناد ما يكاومني ذبيتي روحج هالذبة و الزلمة الناطر عرسه ومعلك اماله اعلى باجر .. شكلله عرست .. اكلله الانطيتها الك هساعها ببيت رجلها شكلله فهميني، انا ما غصبتج اعلى خنجر ..تحطيني بهالموقف ويا صاحب ورفيج دربي .

ظلت مدنكه و تبجي ، و هو يصيح : بيا عين اكابلنه ، شكلله .. تحطيني بهالموقف ليييييش .

ظلت تشهك و تبجي ، كام يفرك بوجه و يستغفر اندار لجسام و كاله : اسمع لك وعلي داحي الباب يو سمعيت جايس شعره من راسها احركنك انت و ال ثجيل بكاعكم .

ما رد عليه جسام .. و امه كامت تجر بيه ، اندار عليه و كال : يا حسافه بس يا حسافة .

حجاها و طلع من البيت كله و امه وراه ، انداريت من مجاني و فكيت الباب و طلعت من الديوان ، كلهم مجتمعين بالكبة ، تعديتهم و انا امش لحجرتي

دشيت بيها و صكيت الباب .

سلطان : اوكف

جسام : شنهي بويه

- ساعة و بياض البت عد امك نجمة .. فهمت .

تعداه و مشه و دش للحجرة ، راديون لامة روحها و تبجي : نشدتج و كلت الج مغصوبة كتيلي لا ، و طلعتي مغصوبة ... انا رايد اعرف الزلمة الجان خاطبج شنهو ؟

ما ترد عليه و حاطه وجهه بحظنها و تبجي ، صاح و كرب منها وجرها من ايدها : احجي ويااااااي الزلمة الخاطبج شنهوووو .

- ولا شي .

- ان جانه ولا شي ، عليش سرحان يحجي هيج ، وعليش انت من الأساس راضية تتزوجين وحيد جان شقاوجي .

جرت ايدها من ايده و دارت وجهه من عده و كالتله : اتركني وحيدي .

- هاذ موش قصر ابوج ولا هاي حجرتج غاد واطردين الما يحلالج .. الحجرة هاي النا اثنينه من تحجين تحجين باحترام موش تأمريني افتهمتي.

كامت من القريوله و كعدت اعلى السكملي و حضنت نفسها ، كعد هو اعلى القريولة و دنج راسه .. ارتفع صوت الأذان .. واحد من اخوته مد سجادته و اذن بالبيت .

كام من مجانه و تكرب : استغفري الله وكومي صلي فرضج ..

دارت وجهه عنه و ما ردت ، هده ومشى جر السجادة و مداها .. ورفع اديه و كبر و دش بصلاته .

راديون : انصابيت بفلاونزة عالكثر ما بجيت ، كمت من مجاني ادور جفية و هو يصلي ، فتحت المجرات مامش .. دوريت بالزاوية مامش .

خلص فرضه و هو يعاين علي ادور بالحجرة و كاض بالمسبحة و يسبح .. خلص تسبيح فرك السبحه حبها و حجه : عليش جاي ادورين

- اريدلي وصلة

- شتسوين بيها ؟

- اريدنها .

حك ركبته و كال الها : ان جنتي ادورين اعلى الوصلة البيضة حاطينها حدر الفراش ، بس شتسوين بيها ؟

اندرت ليه اعاين له .

ابتسم : خل اخلص فرض العشا ...

- خشمي اريدلي جفية .

- اي دكولي جفية
مد ايده بجيبه طلع جفيته و انطاها

درت عنه ... و ما خذتها و انا ادور جفية نظيفة

- مو مادلج ايدي شمالج .

-ما اريدنها

كام من مجانه و حطاها اعلى القريوله و حجه : نظيفة ما مستعملها ان جنتي بحاجتها اخذيها .

حجاها و رد لسجادته ووكف يصلي العشا ، كربت خذتها ورديت للسكملي ، رفعت رجليه وكعدت .. اعاين الحجرة لاهي مجاني ولا هي رادتي .. انا وين جنت ووين صرت .. انا اخلص عمري بهالمچان !!

جلمات سرحان يرنن بذني
شكلله .. المعلك امالك بيها هساها ابيت رجلها
خنجر مسودن .. يو درى ما اعرف شراح يسوي .. جبت عمري انطر اليوم الله يجمعني بيه ، ومن وصل و ظل يوم واحد يفصلني عن مناي ومنيتي .. اعرس وتضيع ظنوني .

- ما تصلين ؟

- فزيت من صفنتي و اندرت ليه : لا ما اصلي

- عليش ؟

- ما اصلي .

- عذر شرعي يو انت الما تصلين ؟

- عليش تنشد .

- ترانا عرسان جدد عليش جلمتج حادة وياي ، ليني و جاوبي اعلى السؤال بليونه ما راح يكلفج ولا راح ينزل من مقامج .

ظليت صادة عنه و ما اجاوب ، و امسح بخشمي بالجفية ، كام هو يتنهد و يستغفر .. اندكت الباب ، صاح : يااااهو

- انا سعاد جبت العشا

- دشي خوية

دخلت و هو طلع من الحجرة ، مشى لمرت ابوه و هو يكللها : دشي علميها و حطي ابالها اللي لازم يصير الليلة .

نجمة : وشنهي تاخذ رايها ، غصبا عنها و عن الخلفوها ترضى ما ترضى جا تعاين لطولها .

- الوكت موش وكت غصب ولا انا الي حيل مشاكل ، دشي بس انطيها خبر .

كامت وراحت لراديون الكاعدة اعلى السكملي ولامة روحها و دنوعها هماله و تمسح بخشمها : موش نحط العشا ؟

- ما اشتهي الزاد

- اسمعي هاذ موش بيت ابوج وتتصرفين و جن الناس خدم عدج ، من يحجي وياج واحد تكومين اعلى حيلج و تحجين موش من وره خشمج .

ظلت دايرة و ما ردت عليها : موش احاجيج .

اندرت ليها : كلت الج ما اشتهي الزاد .. مو بالغصب اكل .

- لا شو غصب عنج ، و تكومين تذبين الأسود و تتحضرين لزلمتج خاطر ياخذج .. يااااله

ظلت دايرة عنها و ما ترد ، تكربت ليها و جرتها بقوة : شنعي من بنيييييية انت ، كومي
و دفعتها ليغاد .

- شرااايدة مني ... زادج ما اريدنه فكي عني و خليني .

نشغت المرة همت اعليها وكضتها من راسها ، دش جسام : ها ها ها يمه .. مو هيج

- لاله لا هاي يظهر انها ما متربيه و حاسبة الوادم خدم عدها خلني اعلمنها شلون الأحترام .

- ايدج عنيييييي .

وكضاها جسام و نجمة نزلت غلط و تريد تجتلها ، سحب امه و طلعها و هي تصيح و تكللهم : خلوني اشفي دمي ببت ال ضاحي الشايفتنه خدم عد الخلفوها .

هد امه و دش لحجرته و حجه : كومي

- ما حجيت وياها شي ، كتلها ما اشتهي الزاد

- كومي

- انتم ليش تأمرون ؟

تكرب كض ايدها و كعدها : انا اعرف جنتي ابيت اهلج عدج خدم و حشم .. وما متعودة احد يتأمر اعلى راسج ... بس الوضع هنا يختلف و حياتج ذيج تنسي ، انا ما اكدر ادافع عنج الوكت كله ، هساه سكتت نجمة عنج لجن يو مدخل ابوي بالسالفة ، ما اكدر اوكف بوجهه و ادافعلج .

- ادافعلج و ادافعلي .. شنهو الصار بس لإن كتلها ما اريدن الزاد ؟

- من تحجي وياج تكليلها امرج .. و تكعدين حتى يو ما مشتهية

- انا اكللها امرج

- اي تكليلها امرج لأنها جبيرة البيت و الجبير اله احترامه يبت الشيوخ .

- موش تحترم الأول

- ولونه ... تحترمين .

- هاي اول ساعتين و جزعت روحي انا شلون اكضي عمري هنا .

- انا هسه ياله عرفت عليش ابوج جان رايدلج قصر ، دلاله طالع من خشمج و معودة حدر ايدج خدم وحشم و تتأمرين و اوامرج مجابه ...

درت عنه و ردت اكوم .. كض ايدي : اكعدي تعشي

- ظليت اعاين بوجهه
حجه : رايد احجي وياج اكعدي .

- رايدة انامن .

- ثوب ابيض حذاج .. البسي

- الأسود ما انزعنه .. و هذا الثوب ما البسنه ، و هدني بحالي الله يخليك والله البية ما يشيله جبال هدوووني .

حجيتها و كمت من الزاد ، اخذت الجفية ، شلت الوسادة و جريت الغطا و دشيت بالفراش ، انسدحت و اتغطيت ، ولملميت روحي وانا ابجي .

ظل هو كاعد اعلى كعده و يردد : لا حول ولا قوة الا بالله .

ظل شوية و كام من مجانه وكعد اعلى اطراف القريولة ، تجى روحه و حط عكسه اعلى الوسادة الناسمة اعليها .. اصطكيت بمجاني .. جر الشيل من راسي .. فزيت و هميت ارد اكومن ، حط ايده اعلى راسي و كالي : مجانج لا تتحركين

كض كباية شعري و جراها .. انفل شعري بيده ، انداريت و هو دفعني للوسادة بصدره و يكلي : هشششش ...

- ميل عني

-غمضي عيونج و بس .

سحبت روحي وكمت من عنده ،كض شعري : اااااي شعري هده .

ارتفع من مجانه و حط ايده اعلى الدكمة و طفة الكلوب .. كام كلبي يدك وجسمي كله يرجف ومامش غير خنجر اعلى بالي ، اطي روحي و اعوفنه ..

سحبني و انا اجرن بروحي ، و هو يكلي: لا تعقدينها ..

- اعلك الضوة

- شتسوين بالضوة ، عيفي ، بس كربي .

-اعلكه ..

كا من مجانه مغتاض و علك الضوة ، ورد فتح فراشه : ميل عني

- اميل عليش انا رجلج .

حجاها و هو يسحبني اله ، ادفع بيه و هو يتكاوى ..
وصلني وانا ابجي و ادفع بيه ، ابتعد مني مغتاض كلش .

سحبت الغطا و انا ابجي ، حجا : دم مامش يبت الشيوخ

دنجت راسي و انا ابجي ، كام و لبس دشداشته و جر ايد و حجه : بجي لا تبجيييين و حاجيني شنهو الاسباب

- اسباب شنهو انت بعد كل السويته جاي ادور وياي اسباب ، ميل عني .

- دم مامش .. شنهي سالفتج

- شكصدك

- انا الرايد اعرف الكصد شنهو ، كليلي غلطانه ويا واحد ؟

- انت شجاي تحجي ..

- بسج بجى و جاوبيني شنهي الأسباب ... خذيتج من بيت اهلج برضاتج .. ما غصبتج .. مانعتني عنج و ادفعين بيه و ما رايدتني علييييش ، جا غير افهم اسبابج شنهي .

ظليت ابجي و اعاين بي ، الزلم تحول وحيد لاخ ، الوجه انطعن احمر و كام يطي الوان و العصبية ظهرت اعلى كل ملامه ، اديه ترجف و حجايته يحجيها همس و بعصبية

- ولج يبت الناس احجي انا ما رايد فضيحتج ، اهلي ناطرين بياض و ابوي يو عرف مامش دم .. يدك لهلج طبل و فضيحتهم اعلى كل السان .. كليلي ويامن غلطانة

- وعلي ما غلطانة ويا احد ..
حجيتها و دموعي تهل

مسح وجهه و حجه : اسمعي راح اكربنج .. بجى ما اريد و ايدج ما تدفعني و لا تميلين روحج عني افتهمتي .

ما جاوبت بس دموعي تجري و جسمي كله يرجف ، طفى الضوى .. وفتح الفراش .. حطني اعلى ايده و كال : هششش لا تبجين

- وعلي ما غلطانه ويا واحد .. بيش تريد احلف الك .. ما غلطيت ويا احد ..

- اهدي و كفي دموعج .. و اذكري الله

- انا ما غلطيت

- هششش

كام يهدي بيه و يمشي ايده اعلى شعري .. و يحجي : ما رايد غير تهدين ، جسمج جاي يرجف

- ما اريد الفضيحة لهلي ، كلشي ولا ابوك يفضحهم و علي اموتن .

- عاملة شي

- لا وعلي ، و العباس ابو فاظل عمري كله محد كاضني والله العظيم .

- مصدكج ، اهدي و هدي الموضوع ..

سحبني لحضنه .. وانا كل شبر بعضاي يتراجف و انا اتخايل سمعة اهلي بحلك سلطان و هو ناطرها نطرة .. من اتخايل اليصير اهيس يرد يغمن عليه .

كام يمسح اعلى شعري و هو يكلي : مصدكج .. بس لا ترجفين اهدي ..

رفعتله راسي .. ظلمة هندس بس وجه و انفاسه جدامي .. حجيت : ويو نشدوك

- انت عليش متأكدة مامش دم ، هساع نهدا و نعيد الامر و يفض لا تخافين .

- و يو ما طلع

- ظل ساكت و هو يسحب براسي و يرجعني لصدره .. يكلي اهدى و انا تخيلاتي ما جاي يخلني اهدى .. كل فكرة تطرى اعلى بالي اطير عكلي من مجانه و انا اتخايل اخوتي منكسين عكلهم من وراي .

حاول بس يخليني اهدى بس ما جاي اهدئ .. رد يشم بشعري ويلاعب بخصلاته و ردني للتخت .. و عاد وياي بهداي

والمصيبة مامش دم ..
كعد لبس دشداشته و فتح الضوة وهو و مدنج راسه و متونه باين اعليهن الحمل .. ودايخ ، و انا لامه روحي وابجي و احلف : وعلي ، وروح الحسين ما غلطانه ويا احد .. والرسول محمد ما غلطت ويا احد .

- ولج بويه اهدي ما تاهمج وعلي ما تاهمج ، بس راسي افتر بس خليني اوجد امري .

- ويو عرف ابوك ؟

كام يمسح اعلى وجهه .. و دايخ بأمره .. وانا ملفلفه روحي ، جريت ثيابي كض ايدي و كال : اتحمليني اعلى الضوة .

ورد فتح الفراش و اخذني عده .. وعاد وياي
ونفس الموضوع .. دم مامش .

كلبي فرغ .. وروحي صارت باطرافي من الخوف ، شفتي غدة زركة و شما اريد اهدى ارجف ، فتح المجر و جر مكص زغير مالت شوارب .. كضاه و رفع ادان دشداشته ..

مرر المكص اعلى ايده و جرح روحه و كام يعصر بأيده و يطلع الدم منها ، تكرب من السرير ، اخذ الوصلة البيضة وكام يمسح ، ظل يعصر بيده و يمسح .

عاين على الوصلة كال : هاهية ، لبسي ثيابج .

- لبست ثوبي وهو توجه للباب يفتحه ، جريت الشيل و لبسته اعلى راسي ، طلع من عندي .. و انا كمت اراوح بمجاني و اطكطك بأصابيعي ودموعي تهل و ما خليت اامام ما نخيته .

اجت اخته وهي تكلي : بالمبارك اعبيبة يجعلها دخلة مباركة و الله يهنيكم ان شاءالله .

ظليت اتجاوب وياها و اتبسم الها كوة ، بس اريد اعرف جسام شنهو تصرفه .

طلعت من عدي هي .. وانا اعلى نار وروحي موجرة ..
رد دخل للحجرة ، ويا ما دش طفت الكهرباء .

حجيت: شسويت ؟

- اششش لا تحجين اي شي

فك الباب و صاح : سعاد الفانوس جيبي ليجاي .

جابت اله ، خذاه من ايدها و حطاه اعلى الميز وصك الباب ، حجيت : يعني ما راح تكول لاحد

ما رد علي ومشى للفراش .. فتحه و نام .. تكربت و كعدت اعلى القريولة .. منجطل هو و حاط ايده اعلى كصته و صافن بالسكف .

- مصدكني يو لاله ؟

- ما رد
تنهد و هو يدور وجهه ، حجيت : عليش ما تجاوبني ؟

فز من مجانه : رايتج بيضة اطمني ، محد يجيسج ولا احد.يجيس سمعة اهلج .. نامي و هديني بروحي رحمة لوالديج .

- زناد موش بالليل ياخذ اختك .. عليش ما اجا

-رايدة تروحين وياه لو تبشرينه بهالفضيحة يو شنهي

- انا بس نشدت .

-تأجل اعلى باجر .. نامي .

حجاها و اندار انطاني ظهره ورفع الغطى ليفوك راسه .

كعدت بفراشي ما اعرف شنهو الأسوي .. سترني ودارى الفضيحة عني ، لجن شنهو موقفة ؟ شراح يسوي بعدها ؟
راح يخبر اهلي يو يضم عنهم
ويو خبراهم اهلي يصكدوني يو يتهموني ..

عدى نص الليل و انا بظنوني ..
وحتى هو ما نايم .. الليل كله يتنهد و يتكلب بفراشه ..
الى ان غفيت اعلى حطيتي و هو ظل كاعد .

ليغاد فكيت عيني .. هو ضارب عكس و كعد يعاين بملامحي .. فركت عيني : ها

- امس ما نايم من الفرحة .. و اتاني الصبح يطلع خاطر املج .. و اليوم ما نمت و هاي طلع فجر جديد لجن الفرحة طارت من عيوني .. ما اعرف الله جاي يختبرني يو شنهو ما اعرف .. النوم ما ضكت طعمة يبت الناس .

كعدت من مجاني، تعدل هو .. وكام
راح توضى ورد صلى الفجر ..
ظليت كاعدة بمجاني ، هو فك الباب و طلع ..

تبعته و طلعت وراه .. وصل للديوان
ابوه كاعد وحاط اديه اعلى عكازته .. وكل اليكعد.يحب ايده وراسه .. جنه ملك بالبيت موش ابو .

دنج جسام و حب ايد ابوه ، و حب راسه ، و اشرلي اعمل مثله ،كربيت حبيت ايده .. اشرلي اعلى راسه ...

رفع عينه و عاين علينا .. طاحت عينه اعلى ايد جسام .. من متوضي مسرفن اردانه و طالعة ايده .

انتجى اعلى عكازته و كام و كاله : جسام .. ان جنت تظن ابوك كديش و تمرمر اعليه البالك اتكون غلطان يوليدي .

ابوك متزوج ٧ نسوان ... اندار ليه
كلهن بنات بيوت و ان جنت بوصلة امس توهمني هاذ نيشان عرس ، فايدك المصوبه تشرحلي الضامه عني .
نيشان مرتك وينه يجساااام ؟..... يتبع

google-playkhamsatmostaqltradent