رواية نقيض بلهفة عاشق الحلقة الرابعة 4 كاملة

 رواية نقيض بلهفة عاشق الحلقة الرابعة 4 كاملة

رواية نقيض بلهفة عاشق الجزء الرابع 

رواية نقيض بلهفة عاشق الحلقة الرابعة

رواية نقيض بلهفة عاشق الحلقة الرابعة 4 كاملة


رواية نقيض بلهفة عاشق الفصل الرابع

روايه شاب واقعيه
#بعنوان_نقيض_بلهفة_عاشق_الحلقه_الرابعه_للكاتبه_shosheta..

للعبره❤️❤️
بعتذر عن التأخير الي صار 《اشوي ظروف
قراءه ممتعه..

#تذكير_بما_سبق

بعد وفات امي💔 بعد4اسنين من بعد بوي علينا..ردلنا بس بدون م يراعينا ولا ايدير واجباته نحونا
زي م نحن انديرو له

وبعد الي صار عرفنا من الي قلبه معانا ومن الي منظر بس مش هامينهم

وللاسف
الاقارب باعو
والبرانيه شرو

وديمه الشي هذا ح تلقوه ف حياتكم
البراني يصيبلك زي خوك مرات

وخوك تلقاه واقف اتقول براني

رايح وقت......🤬👎🏼

المهم بعد صدمتي من باتي واقربائي
الصدمه الثالثه جتني من رفيق عمري
بعد م طلعت معاهم وعليم الله كانت ضايقه بي ومشيت بنوسع خاطري مع شباب..

عطاني كف غير مباشر..
لاني كنت مفلس وماشي معاهم
دارني كلب حشاكم لاحقهم عشان الاكل وانتلصق فيهم عشان مصلحه

ونا والله لو كنت بنموت من الجوع والله مستحيل نقول ولا نمد يدي لحد نزمط ريقي ونرقد.
وهذا كلا عشان خاطر مصلحه وجو دارا هو مع رفاقا اجدد سيبوه بعد م عاب في..وهم عارفين صحبتنا شقد
عمرها..

روحت مضايق للحوش
وخشيت للمربوعه وطبقت الباب
بعد اشوي

طقققططقططقطقطقطقطق

نا ..مننن مش عارفتني دلفت الباب اشتبي.

طقططقطقطقططقطقطقطق

نا..مغطي ع اعيوني .خشيييييي🤬
كنك سكنتي منبش نشوف حد اطلعي بعدين نحكو

هي..

نا..محسيتش بشي الا ب يد(الهبله) هذك ع كتفي.

هي..اتجي اتعشى معانا😍

نا..😳هي انتي🤬😡

هي..هي نا😋🥰 كنك متعقد

نا..😤نرجس مش جوك بكل لفي واطلعي

هي..العشاء واتي🤤هيااااا تعال معاي

نا..منبش نسمسم امشي اطلعي برا خيرلك😠

هي..😍🥰وكان م طلعت شنو اديرلي..

نا..احمقت ازيادا...نرجاااااااااااااااسسسسسسس🤬🤬🤬😡😡😡

صبت تجري..🏃🏼‍♀️🏃🏼‍♀️🏃🏼‍♀️

نا..اطلعي وصكري الخارب كذا🤬

هي..طلعت رديت تمددت اخرا وغطيت ع اعيوني

هي..فتحت الباب.مهاااااب خيرلك عشاء سمح متبيش😁

نا..بديت انتأفف واحمقت منها

هي..مهاااب.يهلبك العشاء راهو😌معش تسمسم راهو..صبي خيرلك..😜

نا..نرجااااااسسس🤬🤬😤😤ي بنت ال وجيت بنغلط استغفرت

هي..هاااااا😝

عصبتني ..
صبيت ف جرتها كنت بنضربها والله
بس طلعت تجري المطيورا تسهوك وتجري عفست

لحقتها مطقيتش فيها..
فتحت باب الحوش وبحتت ملقيتهاش دلفت الباب وخشيت خبطته

وناديت ع خواتي قتلهن والله كان خشيتنها نرجس الليله اخرا للحوش والله ماكن قاعدات فيه..

طلعت منفجعات يسألن من. ايش .كيف.

خشيت للمربوعه طبقت الباب وكملتها دخان ورا دخان
سبسي ورا الثاني..لين كملت الدخان وخذاني النوم

ف صبح ثاني يوم
اوعيت ع صوت خالتي اتسرق ف خواتي.واتقوللهن امكن كان عندها ذهب يسوا من الذهب لولي زمان
وينهو امتاعي نبي ناخذا

****************************
#خالتي متجوزه راجل حالته الماديه اكويسه يعني مش مستحقه

#وامي اجوزت باتي والحاله يادوب
عشان هكي بوها كان يمدلها ف افلوس ويساعد فيها من تحت لتحت..
وامي عشان م تصرفهنش تحط فيهن ف ذهب وادس.
لان لو بوي عرف بيهن راهو صارفهن من زماااان..

وعمرها امي م خذت حاجه مش لها ف كيف توا خالتي اتقول اذهبي

وامي لحد م اتموت قالت ان ذهبها لمت كل حقه قرش ب قرش ليوم العازا..

كيف خالتي اتجي تبي شي مش من حقها لا وتحلف واتقول امتاعي..

طلعت انبلطت فيها وألفتلي قصه
وقالت ان لها وعندها مناسبه تبيه

خواتي جن يبن يناقشنها مخليتهنش
سكتتهن وقعدت نا الي نرد عليها

نا..ع اثر موعييني ع دوشه ع اثر اتسرقي ف خواتي ي خالتي

خالتي..مش قصدي انوعيك جيت لخواتك مبنش يعطنى لي..

نا..ليش عمرنا شفنه ذهب على امي نحن بيش اتجي اتسرقينا فيه
شهاده من دينك
من يوم كبرنا عمرك شفتي امي لابسه ذهب.🤬

هي..اسكتت وتلبكت.

نا..انتي نذكر كل مره اتجي بذهبك واتقولي لامي شريت طاقم بهذك السعر.والبنات يسألنك بس امي عمرها م قالتلك نبيه صاح ولالا

عمرها م شحتاته منك
ديمه اتباركلك وتسكت صاح🤬

هي..💔

نا..خلاص عليش جايه دايره عرس عند راسي من شي اصلا مفش وبعدين وين قربجك انتي ذهبك وين
الي جايه تبي ذهب امي ع قولك

هي..بعته عشان نصين الجزء الي بنيته لاوره

نا..وايش دخلنا جايه اتسرقي فينا وتبي شي اتمشي بيه

خالتي.. انقاااني ماني متريحه نبي انفتش داري اختي

البنات 😳😳😳

خالتي اسمحولي فيها بس نبي انفتشها

اختي الوسطيه..انقاانك زودتيها ي خالتي ومش راهو

نا..ندى🤬اسكتي .عدي ي خالتي
الحوش حوشك..بس اذكري
انك جايه بعد اقريب 5اسنين تحكي ف موضوع باطل ف باطل وامي مش واخذا منك شي.

خالتي معدلتش وخشت برمت وم خلت شي ع بعضه واختي كبيره تبكي
ولخره حامقه وتبي تطلق لسانها..
ونا واعي ع دوشه وهذي م نقبلهش بكل وعيه هك وفوقها موضوع يخص امي💔

#ف نهايه قلبت الدار وملقتش شي
وطلعت ووجها ف الارض لان حتى افلوس م لقتش

خالتي..سامحوني بس كيف عايشين انتم حتى حاجه مسقمه م عندكم ولا حتى افلوس

نا..كان هامك حالنا راهو م قعدنا هكي ولا اصلا انتي درتي الي درتيه

خالتي..😔سامحني ي وليدي هذي بنتي قال....

قطعت عليها.

نا..لا بنت لا ولدك انتي جيتي بروحك وفوقها هنتيني نا وخواتي ب السراقين والكذابين..وانتي عارفه حالنا تحت الصفر وامي معمرهش رقدت وحاجه لغيرها قاعدا عندها ف حوشنا.. لا واخرا بعد اقريب5 جايه اتقولي هكي..

ياريتك درتيها بعد موتتها ع طول بيش صكرنا عليك زي م صكرنا ع غيرك وكنا حاطين فيك امل انك غيرهم ومستحيل ايكون بعينك الماديات ووسخ الدنيا.

بس للاسف طلعتي كيفهم واشر..

خالتي..والله ي وليدي نا......

نا.قطعت عليها.انتي الي تبيها ديرتيها
والحوش حوشك اه مديريش غيبه
بنخش ندوش ونطلع اندور ع شغل

وقلت للبنات حطن حاجه كان في
لخالتكن.

ومشيت خذيت ادبشي وخشيت ندوش.طلعت لقيتها مش قاعدا
خواتي قالن قعدت تبكي واتعذر وطلعت روحت.

فطرت الي فيها النصيب ومشيت

: ومشيت اندور ف شغل

روحت يومها ف ليل..
لقيت نرجس(الهبله عندنا..

هي..😋مهااااااااب🤤

نا😒 كنك جيتي
هي..مش عشان وجك جايه اطمن

نا..🤨ف نيتي انصدقك بس مش قادر😒

هي..اصلا نا كذابه وجايه عشانك😍
امالا غلا ف خواتك..لالا😌
[
جايه عشان انشوفك بعد امس شفتك متعقد😌

نا..اذكرت وجيت بنهزبها..
طق الباب..


طلعت وشفت لقيتهم جماعه وجايبين معاهم《الي كان صاحبي ورفيق عمري》..

وحاولوا يلطفوا الجو ويصالحونا

انا《رفضت》
لا في مواقف يبن بتر من الاول ميتحملنش فرص ثانيه.👎🏼👌🏼

وقتلهم لان هو عطاني قدام البرانيه وانا قدامه.

ف مش بعيده يعطيني ف ظهري وانا مش معاه

ف رميت حجره(عزقت حيطته)
ومعش يلزمني✋🏼

حاولوا يردو العلاقه الشباب صكرت الموضوع..
ومعش دورته..

فاتن ايام بين شغل بالتقطيع
وبين دراسه...

وبين تكسيد مع جماعه..
[

واشوي اشوي صرت ناخذ ع نرجس وامنابشتها.. وجوها..بس الموضوع علني..مش متحشم فيه.
وصرت نحكي معاها قدام خواتي..
مش بالخفى..

تبو الحق..هي شهدرت مشاعرها❤️ ب أفعالها متعرفش تمسك روحها قدامي بكل..
اعيونها اقلوب .وتنسته فيا..
وكم مره نلقاها واخذا ادبشي من عالحبل وحاطته ف كترها(ع رجليها

وكم مره اتخش لدار فيها دولابي وتفتح فيه وع قولها(اتشم ف ريحتي

ع اساس ماركه عالميه نا😒🥴

وايام واجد تقعد تبي اتعشى مع البنات ولما انجي اتبيع خواتي واتجي اتلصق فيا هي واتقولي انتعشا معاك🤤

نا..😒🤨انطردها طول..بس هي هبله ولصقه لازم تحرق دمي 60.000 مره بيش تطلع وتمشي..

#خواتي عرفن بالقصه وهي فقشتها انها تحبني وتبيني.. ودارت البهادل

ف خواتي وهي اتحايل واتقوللهن نا نبي خوكن نبي مهاب😍جوزني له ومستعدا نقعد معاه ف مربوعه غير خلطوني بيه😅..(عصير اتحق في هي..

وياما خواتي هزبنها وشي تحشمي وشي عيب وشي مش هكي وشي اثقلي..

بس عبس البنت متنحه.ملصقه.ميته فيا ع قولها..😅

واتجو للحق ..من كثر م سكنتلي ومن كثر م تحكي ع حبها لي ومن كثر م اتقولي نحبك ومنتحملش بدونك..........الخ

وبعد إلحاح كبيييير منها خشيت معاها ف علاقه

وارتبطنا بشكل رسمي (ك علاقه..وك حبيبين ❤️

وشرطت عليها قدام خواتي
جواز مفش توا قالت عادي المهم نحكي معاك ونكون حبيبتك..🤗🥰🤤🔥🔥

قتلها بتسمعي كلامي ومنبش مخالفات..عطت الولاء والطاعه وقالت باهي موافقه.🤤😍❤️

قتلها بتحمليني وقت عصبيتي وبتحمليني لين انروق
قالت م ديمه متحملتك..😤

قتلها لا مدام بتقعدي حبيبتي بتحملي ايش م نقول ونطلب.
قالت باهي ب رضاها.🥰😋

قتلها بتحملي اوامري زي م نبي نا
قالت آمين/تمام باهي يعني.🤗❤️

قتلها راكي ب موافقتك هذي ح تخسري وتنحرمي من حجات واااااااااجد 👌🏼🤨.قالت عادي المهم انت معايا منبش شي..😋🤤😍

قتلها بكامل قواك العقليه موافقه مش ب حالتك الهبله.😏😎
قالت ااه..🤤😍

قتلها باهي
نقرو فاتحة العقد واثبات هالكلام ..

كنت نبصر نا ف اخر شي..
بس هي هبله صدقت وقرت الفاتحه وزغرتت اخرا 😂

نا...صكري خاربك من اولها صوتك ايلعلع..

هي..مش مصدقه اني صرت حبيبتك بس 😍😋


نا..امالا كان بتقعدي امرتي شنو بديري😏😎

هي..بتجوزني يعني صاح🔥😍
وشرعت اعيونها وحلت فمها هك🤤 وهي اتبحت في..

نا..لا نحكي مع روحي وانتي م صدقتي..طول موافقه..

اختي..ي نرجس مش قد مهاب راكي مستحيل اتحمليه نحن خواتا ومرات منقدروش عليه ولا انطيقوه انتي بتحمليه..

هي..انتن شي ونا شي ي صبياني😝

اختى ثانيه..🤨عليك صحة وجه طول صبياتك قعدنا😤

هي..خوات حبيبي ايش بتكونن امي مثلا😂

نا..والله شكلي بنتعب معاك نا مش العكس😒

هي..😌حبيبة مهاب واخيييرا😍

نا..باهي خلاص مش حاجه كبيره مهاب اسكتي وارتزعي..😒🤨

هي..😍😋لا حبيبي واصلا قهرت بنات المنقطه كلهن نا بس صرت حبيبتك هن لاءه🤪

نا..باهي باهي بلش اهبال وهي صبي اسقدي لحوش هلك ووجك معش نبي انشوفه..خلينا انرايفوا اشوي عليكي وانتي قريب نحطوك معانا فالكتيب العائله😒

هي..😒منش مروحه

نا..صبي قتلك..مش قعدتي حبيبتي وتسمعي ف كلام خلاص صبي روحي

هي..بس مش هكي ي مهااااااااااب😭قعدت حبيبتك مفروض24 ساعه عندكم نقعد مش اطردني من اولها..

نا..وآنك قلتيها حبيبه مش زوجه🤨 يبقى فزي هيا شور حوش باتك وزي م قتلك.. خلينا انرايفو عليكي..😎

هي..باه ي مهاب. تو انوريك لرياف معش انوريك وجي بكل😤

نا..يكون احسن😅

هي..احمقتت طلعت تجري دلفت الباب وروحت..

ثاني يوم ع المغرب كانت عندنا قالت مسكت روحي واجد عشان هك جيتكم توا..😤

نا..😅والله الا هبله هي

هي..😋😍❤️

والفتره هذك وفي ظرف اربع خمس ايام الدنيا كلها عرفت عرفت ب علاقتنا...
ومنها هي بثتها.. ع قولها نبي نقهر بنات الجيران كلهن.لان حبيبي شخصيه ومعطش طريق إلا ليا

ف عقلي هو اصلا في طريق غير الطريق الي ساكنتلنا بيها😅

ف بدايه احمقت بعد سمعت أن الموضوع( انتش)(اشهدر)
بس بعدها اهديت لان فعلا واقع وانا خشيت ف علاقه معاها..

بوها وامها ناس طيبين بكل..
وخذو الامر بروح رياضيه.. وعارفين بنتهم مطرشقه مطيوره..مش ثابته بكل..معدلوش عليها ف البدايه.يسحابوها تكذب..

وهي كبيرة خوتها وبكرية هلها
الي بعدها اصغر منها.

ومشت علاقتنا..
بس ي ناس محسيتش بغيره بكل ف علاقتي معاها..
محسيتش انها حبيبتي يعني محسيتش اني متعلق بيها وهي جزء مني.. لا محسيتش

هكي كانت علاقه مش عارف كيف انوصصلكم شعوري معاها...

ومشن ليام ورا ايام..

وصرت مضغوط من المعيشه الي قريب تدفني وانا حي..
والله وربي شاهد عليا نطلع من7 الصبح واندور بس مفش شغل قبل بيا..

ولا اصلا لقيت شغل ثابت..
ليييييييييين في يوم ربي سهلي واندليت ع صاحب محل ملابس نساء. وصرت نشتغل فيه وهذا يعتبر أول شغل ليا ثابت وبراااااتب ثابت شهري❤️❤️ومسكت فيه

#الحمدالله

》》》》》》》》》》》》》》》》》》》》》》》》》》

#بوي غاب فتره وجا.. يسأل ع رواتب تعينا نحن ولالا..
وقنالا محصلنش عدا؟استغربنا سؤالا

مش متعودين عليه يدور فينا اصلا

وبعد مده جاب السنيوره معاه زوجته
ومعاها بيبي جديد..عمره 2\3اشهور هك..

قالت جبتا لكم نبيكم اتسلموا ع خوكم الجديد😈

نحن انصدمنا والله..
يعني بوي مسديناش نحن.
وجاب اثنين من قبل وتوا هذا الثالث..كنه فيش ايدور.

طارتلي منه.صاح حقهم وهوا حر
هو الي يبي يصرف

بس يانااااااس.بوي ليش داير الفرق بينا

ليش م يصرف علينا قبل..
ليش يجيب اجدد ويصرف عليهم ونحن ناسينا بكل..مش حاسبنا اعيالا ولا كيف.. تقهر في لقطه هذي لما انشوف كيف يفضل فيهم علينا تقهرني بس والله عمري م تكلمت عليه..ولا قتله دورنا.نفكر بيني وبين روحي بس.

وبعد هاليوم ب اسبوعين..

رد علينا وجايب عريس لاختي الكبيره وجاي يعطي فيها علم
مش ياخذ ف رايها..

نا وقتها كنت فالمحل نشتغل
روحت لقيتها مضايقه وقاعدا ف الجنان لاوره.

من عادتها اول م نجي تحكي معاي
خشيت وعيطت هي مردتش
ولخره تغسل ف الدبش قاعدا..

مشيتلها لاوره لقيتها مضايقه
قمعزت جنبها وسألتها

اختي.. بوي جاني امبدري قالي ف عرب جايينك راجل اطلبك ونا وافقت وتي روحك مقابله بكرا بعد العصر.. ونا منبش..😭

نا..باهي متبكيش توا بلكي يطلع راجل اكويس

اختي..ليش بونا يجي من وراه شي اكويس😭😭

نا..لاحولا ولا قوه الا بالله..غير استهدي بالرحمان كنك انتي

هي..منبش نجوز بكل نا منبش ايكون مصيري زي امي..
منبش نعيش مع راجل يمد ف يده علي وايوجعني منبش منبش منبييييييييييششش😭

نا..يمد يده نقطعها له من منبتها والله م تصير مدام فيا نفس ونا خيك.متخافيش..نا معاك.

هي..😭😭😭😭

نا..توا عليش تبكي انتي..مش هوا يبي يجي..خليه يجي..
عجبك وتريحتيلا وافقي معجبكش ارفضيه..

ع خشت باتي ..ترفض من ي ولد ال........🤬

الراجل اتفقت معاه وخذيت الدفع 3000فيها اختك.. وقبضتهن.
بكرا جاي بيشوفها والاسبوع الجاي فاتحه.وبعد شهرين الفرح😡

نا..وين ي باتي السلعه هذي.. حتى لبضاعه مش هكي ايبيعوها كنك هذي بنتك

باتي..مدخلكش بنتي وحر فيها م ناقص غير اتوريني شندير وم اندير

نا..مش القصد ي بوي بس مش قطعة ارض هي اتبيع ومتاخذش موافقتها شوفها كيف تبكي ورافضه متبش ..

بوي ..😡م ناقص غير ناخذ كلام بنات ع اخر عمري. الي قلته هو الي ماشي..
وجبتلكم حلو ومشروب متفضحوش بينا قدام الراجل فاهما🤬😡

اختي😭😭

بوي ..بكرا بعد العصر الراجل جاي وانت ارتزع قدام الحوش استقبل الراجل مع اختك مرات منجش نا

نا..نستقبل قتلي 😏تمام كون هاني

ف عقلي كان م قلت الي نبيها منكونش مهاب🤨🤨😏👌🏼

ليلتها اختي م رقدت وكملتها غير ابكا..

ندى.اختي الوسطي مبرده ومدورتش موضوع ورقدت..

نا حكيت مع نرجس اشوي وصكرت مجتنش نيه نحكي

مشيت لاختي وقعدت معاها
ولاول مره نلف عليها ف حضني.
نبيها تهدا.نبيها تطمن..منبيهاش تبكي..

#الي مزلتوا م تعرفوش ع مهاب..
فيه جانب ميحبش يطلعه بكل ولا ينحط فيه وهوا《حنيته وتعاطفه مع المقربات..الي هن امه الله يرحمها وخواته و...........!!

ديمه باين واعر.. وديمه نرفوز وعصبي وايتعارك من اي شي

برغم طبعه هذا إلا أن فيه حنيه مفش في غيره..❤️..

وزي م انقولوا ديمه العصبي تلقوه حنون🌸❤️

◇◇◇◇◇◇◇◇◇◇◇◇◇

ضميت اختي لحضني و ويدي ع راسها.. وطبطبت عليها لين هدت ورقدت..

وانا مجانش نوم قعدت اندخن
وسارح وخلاص..

ثاني يوم وتت اختي روحها ولخره وتت الضيافه ونا حطيت واحد مكاني فالمحل...

وقعدت قهوا ودخان لين شرف نسيبي الجديد..

حوش بو..........

نا..انعم تفضل😒🤨

هو..نا اشرف عزالدين ال..... نسيبك الجديد..

نا..اهلا وسهلا تفضل.
وخشيته للمربوعه والمقابله درتها معاه نا نزلت فيه اسئله من يوم جا اليوم هذا.. وهو زامط ويرد..

جبتلا القهوا وكملت اسئلتي معاه. وعرفت الي نبيه.. ومشيت جبت اختي وقتلها احكي الي تبيه وخليهم يتعرفوا على بعض وقاعدلا لو نسيب زي عظم بوغصاص واقفله عند الباب
ومربع ايدي ورافع حاجبي فيه..🤨

حكو الي فيها النصيب وقالت اختي الي عندها وسمعت من راجل..

وهوا طالع قتلا من الاخر اتفافقك مع بوي منعلمش عليه ولا نبي انخش ف لمفاصله ودفع والمشروطه..

الي بنقولا لك. بوي مسيبنا لا اليوم ولا امس.. يعني يوم تستغل نقطه هذي واتقول《نجوى》 معندهاش اب يسأل عليها بتكون غلطان..

راني نا بوها وخوها..يوم اتفكر اتزعلها ولا اتنزل دمعتها اعرف اني ف ظهرها واحسابك بيكون معاي..

هو..ضحك😏

نا..وهكي عطيتك علم بيش يصير م يصير لقدام ايكون واصلك الخبر..وتوقع اي شي انديرا منحسش لا ف بوي لا في حد.

هو..خير ان شاءالله😏

نا ..ان شاءالله.. وشرفت وانست. وفتحتلا الباب واسقد الراجل

ومشيت للمحل نا

ثاني يوم جا باتي وجايب ل اختي1000 اجنيه وقاللها كسي بيهن فرحك نفس تاريخ اليوم بعد شهرين

لما نطت ندى وقالتلا دفعها3000
كيف جايبلها 1000.شنو بيديرن هذن

بوي..امالا عليش مجوزها نا..مجوزها عشان نحصل من وراها افلوس مش عشان تصرف هي لفلوس

سمعت الكلام ووقفت اوكال كزتلي بكل تمنيته الي حكا مش بوي راني ورحمة امي كسرتلا فمه هذا الي حكاا بيه..

بس معلش ..كلا ملحووق👌🏼

وحط لأختي الالف وعدا

اختي وجعتها روحها حستها تجاره/سلعه مبيوعه عشان اشوي افلوس💔..

قتلها والله م تزعلي وم تطلعي إلا وانتي فرحانه وراضيه..

مشيت وقفت قيدي لان معش نقدر نكمل قرايه حاليا..

وتوكلت ع الله ووقتي حطيته ف شغل كلا..

وهلب اول شهر وباتي مورش وجه بكل خايف نطلبوا منه افلوس..

بس والله م نقعد راجل كان طلبت منه منش موقف عليه..

وطلعت خواتي لسوق عشان اتكسي العروس..
وقدرت ندين 1200د.من 4وحدين بالتقطيع والله

وشغلي اقريب ال 700د.حصلت وقبلها عندي داسهن 150د.

حطيتهن ع بعضهن
مجن شي بس والله هذا الي قدرت عليه

مشيت لسوق كذا مشوار وايش م تبي قتلها خوذي متشيليش هم لفلوس..

بعد ايام كملن لفلوس..

مشيت لتربه لاوره وين م امي دفنة ذهبها وخذيت منها طرفين وقتلهن البنات منصرفش فيه كلا مرات يجيبن مبلغ اكويس

وفعلا مشيت لسوق بس صاحب المحل قالي الذهب نازل توا بلكي يومين هك ويرقى

روحت بلغت البنات وراجينا يومين ثلاثه.. ومشيت سألت بس مرقش
ف معش في وقت خذيت6حدايد من ذهب واختي مكنتش راضيه متبش تصرف الذهب ع روحها بس..

بس قنعتها لان مفش عندا حد مستحق توا وانتي اولى بيه عشان امك قالت للعازه وتوا عازتهن.
❤️..فالخير والهنا ❤️..

وبعتهن وجابن مبلغ كويس وشرت بيهن اختي الي ناقصها. وصح منقبلش السوق وخوطته ولا سريبه بس تحملته المشي والجي والرد عشان خاطر فرحتها ❤️

وقرب الفرح والحق الجارات لكبار صاحبات امي الله يرحمها مسيبنش اختي وتكفلن ب خبر لاخر
وتسواي ايام الفرح وحلو وكعك م كعك وفطاير و.....الخ

وشباب شارع

ب زفه واعقود الفرح والخيمه قدام الحوش..

وطبعا الفاتحه مقريه لها ايام
قبل الفرح ب 4ايام جابو لسياق

ومنها الخبر بدا يوصل وكيف ومن وينلهم عات مهاب لفلوس وكيف كسو بنتهم الدبش هذا كلا..........الخ

مسمعتش الخبر هذا وقتها..
وعدن ليام ويوم الزفه مسكت راجلها وأكدتلا ع الكلام الي قلته له ف مربوعه .. وسقدتهم..

وعارفين الصدمه الي صارت شنو.

الاقارب كلهم احضروا وبالايام وباتو اخرا وكلو عندنا وضحكو ولعبوا..
وقرموا علينا وهم في حوشنا ونا م نندري ع شي قاعد برا

يعني وقت الحاجه والمرض تهربوا كلهم
ووقت الفرح احضروا كلهم بدون اغياب واسبال..

هه😏مش قتلكم ان الاقارب عباره عن كميه كبيره من النفاااااق مش اكثر ..
ولا..
حتى بوي يجيب ف امرته كل يوم ..لين تم الفرح..

وبعد م تم الفرح والله كلهم عدو وم حد قعد وساعد اختي ف الحوش بعد م قعدت بروحها.

》》》》》》》》》》》》》
#نرجس..
الفتره الاخيره يعني9\10ايام الي قبل الفرح كل يوم انحق فيها
وكل يوم تطلع قدامي ونعارك فيها منبش نشوفها عند فم الحوش عشان دوشه وشباب وزحمه🤨

وهي متريحش لين تحرق
دمي😤

كم مره نادت علي وكلمت ف موبايل
ونعارك فيها منبيهاش تطلع..
وصكرت ف وجها كم مره.. لانها تبي تمشي ف الزفه
كلام هذا يوم الفرح

المهم صكرت عليها كم مره..

بعد وقت اتجيني بنيه اصغيره اتقولي راهي نرجس قاعدا مع (بدر) صاحبك ف الحوش من لاوره تحكي
معاه..

وفعلا (بدر) كان يحوس قدامي واختفى بعدها ...

وبعد البنت قالت الي قالاته بحتت جنبي الحوش ملقيتاش بدر..

احمقت..😡🤬
لان مش لدرجه هذي مضحكه نا..
وطارتلي بكل سد وجيج الفرح ف راسي بروحي وبوي مش سائل ع شي .. وفوقها نرجس
وبدر يلعبوا من وراي والله ندفنهم وهم حيين ..

موس لحلقه🗡️ ديمه معلق ع سروالي مستحيل نمشي لمكان بدونه.

فكيت الموس من جيبي ومشيت بسرعه للحوش من لاوره ف شارع لاخر.لان ساهلا الخشه من السانيه الي قدامه
مشيت بسرعه ووجيت بحتت للباب لقيته مردووووود😳🤬🤬🤬

والله نقتلهم والله نوريهم اللعب كيف يكون ونا خشيت هك ونسمع صوووووت عالي يقوووول

.......

نا🔥🔥🔥😳🤬🤬😡😡

#يتبع..
#shosheta..
وردينا لتشويق من جديد😍😍🔥🔥 حبااايبي

ديمه انقول افرحوا لغيركم وتمنولهم الخير مش تلقوهم فرحانين اتزعلوهم..

راهي شيييينا بكل الزعله الي اتجي بعد فرحه تعتبر زي كسرت الخاطر

هل مهاب دارو اللقطه هذي بس بتفصيل مزلنا م عرفنا شنو قالو..

وهل مواقف الاقارب يعلمن ويكونن ف داخل مهاب ويأثرن فيه ويغيرن منه ولا يعتبرن مواقف عاديات تسييبت كل ناسه لهم لين لقى روحه راجل مسؤول ع بنتين ..

زواج اخته.. وخوفه عليها بتهديد زوجها هل كان صائب ام لا..

ونننننننننرجس او زي م يقول عليها مهاب(الهبله / المطيوره) هل تقدر ادير الشي الي ف بال مهاب صح مع صاحبه بدر ولا مجرد شك خش راسه لمهاب بعد فقد صاحبه.. وهي تبي تعاقبه ع التكسيرات الي دارهن لها

وحجات واااجد نبو نعرفوهن..
نتلاقوا ف حلقه جايه مع تفاصيل يوضحن حجات ثانيات..

متنسوش لايك. وتعليق حلو بعد هالغيبه هاه😚

ليلتكم سعيده 🥰❤️🔥

لقراءة باقي حلقات الرواية : اضغط هنا 
google-playkhamsatmostaqltradent