رواية نقيض بلهفة عاشق الحلقة السابعة 7 كاملة

 رواية نقيض بلهفة عاشق الحلقة السابعة 7 كاملة

رواية نقيض بلهفة عاشق الجزء السابع 

رواية نقيض بلهفة عاشق البارت السابع 

رواية نقيض بلهفة عاشق الحلقة السابعة 7 كاملة


رواية نقيض بلهفة عاشق الفصل السابع 

رواية شاب واقعيه
#بعنوان_نقيض_بلهفة_عاشق_الحلقه_السابعه_للكاتبه_shosheta..

للعبره❤️

قراءه🔥ممتعه

شفت تعليقات البعض وكيف قالو ع اختي بتمد يدها ع ذهب وامي ولفلوس وتسرقهن وتكسرنا..

نا وخواتي ايدينا ف بعض عشان مينكسرش حد فينا وانساندو ف بعضنا

انتم بقولكن هذا غلطتوا فينا..
لان انا وخواتي تربايت المرحومه مش تربايت بوي ومرته عشان اتقولو هكي..

صح حالته شبه انها صفر وصح ايام واااااجد بتنا بلا اكل ولبس ثقيل يدفي .
بس نحن شبعانين.. ولو شمينا كف ايدينا نحمدوا ربي ونشكروه..
بس الحرام م انديروه..

م بالكم ب اخت طيبه وحنونه زي امي.💔❤️هل من الممكن انها تكسرني💔..

معتقدش🤚🏼.

♤♤♤♤♤♤♤♤♤♤♤♤♤

بعد م سيبت مفتاح الحوش عند الجاره عشان نجوى تبيه..

ع ساعه1 كيف طالع من محاضره كنت..

اترن علي ندى واتقووولي..

نا..الوو

ندى..ي مهاب..تعال بسرعه للحوش..نجوى مريضه عندها نزيف

نا..😳😳😳😳😳ك ك كييييف

ندى..بسرعه ي مهااااب بسرعه وراس مهاب..متطولش

نا..غير اصبري كيف ومن امته 😨

ندى..خشيت للحوش امبدري اشوي
لقيتها اتألم وتبكي طايحه ف وسط الحوش


نا باهي هي اني جاي..
وكنت مواعد شاب ف موضوع نسيته بكل..
ف عقلي نجوى والي صارللها..

ومشيت ف تكسي وخشيت للحوش وشفتها كيف تعاني فيها ندى وهي اتألم هكي..

شلتها بين ايدي وع طول لسياره للمستشفى ع طووووووول..

بعد وقت دكتوره طلعت وتسأل في ع حجات مش عارفهن
تسحابني راجلها.. وجت اتعارك في اتقولي زوجتك حامل معقولا تضربها كل هالضرب وهي حامل
سببتها نزيف وخسرت الجنين..😡

نا.. غير وكلي ربك نا خوها مش راجلها وفهميني الي صار🤬

الدكتوره حكت كل شي وان زوج نجوى ضاربها عشان مبتش تخدم هله لان مريضه فجبرها بالضرب تنزل وتشتغل وتخدم خواته بالقوا
واختك جسمها ميتحمل حتى الحمل كيف ثبت فيها المده هذي كلها مش عارفه ربي كان معاها..

توا طالبين دم فصيلة AB+
شوفولنا حد واتصل ب راجلها خليه يحضر.. وجيب امك عدي خليها توقف احذاها كنكم مسيبين بنتكم انتم...

نا.. والله انكسرك ي اشرف الكلب
واقسم بالله ماني امشيها له..🤬😡

رنيت على بدر قتلا جيب ندى وامك للمستشفى ضروري توا

ورنيت ع ندى قالها وتي روحك جايك بدر وامه

صكرت منهم واتصلت ب اشرف وفي نفس الوقت نجري جوا وبرا نبي حد فصيلته زي اختي نا مش زيها

واشرف مبش يرد لهيت ع الدم وماحوتني لقيت واحد متبرع...

وعدى تبرعلها...
وجا بدر وندى وامه.. وحكيتلهم الي قالاته دكتوره..

مسكت ندى ع جنب وسألتها ع قصة الضرب وهكي.. قالت والله م عندي علم محكتلش شي هي..

بعد وقققققققتتتتتتتتتتتت..
طلعوها للقسم وندى وام بدر معاها..

نا كملتها غير نولع ف دخان وانطفي ونطبخ من جوا عشان الي صار

واتصل ب أشرف فوق10مرات وقتلا نجوى تعبانه اشوي دايخه شلتها للمستشفى تعال خوذها للحوش نا عندي شغل..

قعد يهزب وصكر..قال اني جاي

كذبت عليه نبيه يجي بروحه منبيش انقولا الي صار ولا نتعبلا فالحوش ويهرب مني..
خصوصا.. ان منبه ع نجوى متحكيش شي لنا..

قعدت رابطلا جوا وراء باب المستشفى..
والموس ف يدي وانراجي
..

بعد اشوي خش من الباب وايتلفت ايدور.. مسك تليفونه وجا يبي يرن
علي..

نا...اششششششرررففف🤬😡

هو..هوا انت هنا

نا..مش قتلك متمدش يدك عليها ي وليه ولا مقلتش..

هو..هااو هاااو احترم نفسك واعرف مع من تحكي راجل قدامك نا واقف

نا..لا عارف روحي مع من نحكي بس تعال نعرفك انت مع من عالق وتحكي
وهديت عليه ونزلت فيه مسبان وضرب وجو ناس يحزو حلفت لو حد جا وفكه مني ورحمة امي نقتلا هنا..🤬🤬🤬🤬🤬

بدر ميقدرش يوقفني لان عارفني منتريحش لين
جهدي كلا نحطه ف التافه هذا..

قعد يبعد ف الناس من احذايا وايقوللهم خلوه معاه الحق ضارب اخته الراجل..

شايب كبير يعيط من بعيد يقولي فك عليه وناااا شي الضربه الي بيديرها انردها له الضعف..

#ربي_م_يوريكم_شكلي_وانا_مفلم_هكي

ننقلب بكل ولا مهاب لكويس هذك الي تعرفوه.

بعد ضربته ونهنهته قتلا طلقها والله ماهي قاعدا ع ذمتك. ولا نبوه نسبك🤬 طلقها قتلك..

جاني امتاع التمريض وسحبني من ورايا.. جا بدر وكره شوره وطلقني..

قتلك ي اشرف طلقها خير م والله اندير فيك شي تندم عليه طول عمرك..

طلقها قتلك..

اشرف وجه كلا ادماوات..
بعد اشوي.. نطقها وطلقها..

بنفس اللحظه خذيت الموس وغرسته ف اذراعه وطلعته سحب لوطه ع باقي اليد فتحتها له وانشر دم قعدت..
خشو فيها الناس هكي وبعدوني..
واعياط ودوشه وناس ايعاركو..

هكي خذيت حقها وقتلك من قبل نبهتك وحذرتك مني بس متسمعش عدي توا شوف من يلمك ي.......🤬

مسكني بدر ودفني لاوره بعد فك الموس مني..


#اختي..قعدت يومين فالمستشفى..

وهل اشرف عدو لبوي وبلغوه ب الي صار..
وجا هزبني قدام الناس.. وبرضوا معدلتش..تناقشنا وتهارجنا ف مستشفى.. وسمعونا الناس واحتراما له سكتت ومعش رديت..

بعد روحنا للحوش كان يبي يرد اختي له ودارها هي الغلطانه والمش متربيه

وقفتله وقتلا مهش رادا وهي مطلقه توا ومعش تبيه ولا حتى نحن..

نط هو وقال اترد معندش بنت تطلق
ونا انقولا نجوى معندش رده ل لاشرف

بوي..اترد 😠
نا متردش 😠

وكلمه بكلمه..سحب سير السروال وقعد يضرب فيا..

وجت ندى تمسك ف بوي من ادبشه متبيش يضربني..

دفها وطيحها..
وقعد يسب فيا ويضرب
وع قول حشمتو بيا قدام الناس
الله يحشم بيكم وفضحتوني ويضرب في عشان معانده وانرد عليه.. ومخليتش كلمته تمشي

ي ناس والله ظلم .مش ضربته لي لالا فوتوها هذي لان كان ب امكاني نوقفه ونا مش زي قبل توا شاب كبير وواطول منه وحتى ف الصحه خير منه بس ..خليته..

الظلم ان هوا راضي ب عيشة الذل لأختي وفوقها يقوللها مش متربيه
وديمه يقول عديمين التربيه امكم مربتكمش مشت هي ونا انربيكم وانكسر روسكم..

ليش الظلم هذا
امي مربيتنا.. ونعرفوا الحق والحلال من الحرام..ليش هوا يدير هكي

ليش مُصر ديمه ان يهينا ويكسر بخاطرنا ويعزقنا كل مره ف شي

ليش اتهون عليه اختي وهي بكريته
ليش ديمه فايتني ويعامل في ع اني صايع فاشل مش متربي
ليش ديمه كاره ندى ويضرب فيها لين دايرلها اعاقه حتى الناس يديروا منها..

ليش مش امساوينا ب اعيالا من زوجته لخره
ليش م يساوينا زينا زي بعضنا
ليش الظلم هذا..
وليش..
وليييش....
وليييييييييشششش....

عن نفسي مش عارف السبب💔🔥😔

وردو بالكم اتقول سحر مديور.
عمايل بوي فينا مفيهنش سحر ولا فترتها في سحر بالدرجه الي موجود توا.🚫

♤♤♤♤♤♤♤♤♤♤♤♤♤
#ليلتها م رقدتش والله

وهوا قال ان نجوى ح اترد لراجلها وغصبن عني..

ونا عند كلمتي.. نجوى مهش رادا..
واشرف والله م يفرح بردتها..

وهوا من يوم خذاها وهوا يعامل فيها معامله اتقول واخذ جاريه ولا حيوانه حشاكم.. ماهي بنت ناس اختي عليش نرضالها فالذل ونا
عارف ان الراجل عطيب..

#نجوى راجلها يبيها زي الخادمه
من صبح ربي وهي تشتغل ف حوش هله وهوا عنده4 بنات فالحوش وامه..
وفوقها ترقى لشقه وتشتغل ميبيهاش تركح وايعامل فيها ب همجيه لا منطق ولا اسلوب وألفاظ شوارعيه..

وياما دست من خوفها منه
وياما ضربها غير متحكش الا فالمرتين الي انكشفت فيهن ونا عرفتهن..

وعاااتبتها ع خوفها واسكووتها
منبيهاش ي ناس اتعيش معيشة امي مع بوي ..
منبش نقعد طرطور كيف خوالي بعد م امي تنضرب وتنهان ميدوروهاش

ليش اسمك راجل انت متاخذش حق الولايا الي عندك..
ولا الرجوله والمرجله ع هل البيت والشارع بالباطل
اما فالحق مفش ادوارا بكل🤬

ومني نا.الله يلعن كل راجل مد يده ع امه ولا اخته ولا زوووجته
ومنهم باتي باهي🤬 ومحد يقولي غلط م غلط انت معشتت معيشتي يبقى متوريتيش شندير👌🏼

◇◇◇◇◇◇◇◇◇◇◇◇◇

ليلتها مرقدتش ومشيت غيرت قفل باب السانيه وصكرته من جوا.

والباب الي يطلع من الحوش لسانيه
دورت قفله وصكرته..

وم صدقت الصبح طلع مشيت شريت قفل جديد وغيرت امتاع الباب الرئيسي..

ونبهت عالبنات الباب الوراني مينفتحش بكل ونا مش قاعد باب الحوش متفتحنش لحد ان شاءالله من جاي ويطق متفتحوش..

درت هكي عشان حتى لو طلعت .نضمن بوي ميخشش من وراي..

صح هوا بونا والخبر هذا مفروض ميندارش..بس ي ناس والله بوي م زي ابهاااتكم ف اعذروني توا ع الي اندير فيه...

ومزااااال لقدام تو تحقوا العمايل لخرات منه هو

المهم غيرت لقفال واطمنت عليهن . وخشيت ادوشت..
ونا تحت لميه شفت الضرب بوي ع جسمي كيف ملطع..
حتى ع صدري.. ف علامة السير حممممراااااااا..اتقول مسلوووخ المكان🔥💔.

م علينا... والي ضرب 《بوي 》مش براني
منقدرش نضربه ولا نهينه ..
مهما كان العين م تعلى ع الحااااجب
💔😔.

كملت حمامي.. وطلعت لبست وحطن خواتي الفطور وفطرنا وكلنا ساكتين..

طق الباب بالقوا...طقققطططقطقق

نجوى😧😣😭😭😭😭هذا بوي اكيد جاي يبي ياخذني

نا..لا متخافيش ميقدرش يخش ولا يدير شي.. خليه يطق لين يشبع
تو يمشي..
المهم متفتحوش الباب بس

حسيتها فوق الي صارلها بوي ركبها حاله.

فطرت وطلعت وخذيت نسخه من مفتاح..
ومشيت نبرم ع حالي وانجيب ف حجات للحوش..

اتصلت بي ندى بعد ساعه وقالت بوي يطق قااعد..

قتلها طنشي مترديش عليه ولا تفتحي تو يمشي..

بعد وقت اتصل بدر يسأل فيا وين نا

وان بوي سألنا عليه
قالي قتلا انكم طلعتوا للمستشفى

نا...منور ي طيري..زلحقته..

بدر..😅والله مش عارف طلعت معاي هكي اصلا

نا..باهي تمام اشوي وامروح تو انجي نحكيلك..

بدر خلاص..انجيب ف خبزه للحوش تو تلقاني ف شارع.

نا..تمام بكل.هي سلام.. وصكرت..

وبعد كملت برنامجي وجبت الي نبيه.

روحت للحوش..

ومشيت لبدر وحكيتلا كل شي
💔🔥

ومتحشمتش منه ولا دسيت عليه..
حتى ضربت بوي لي قلتها له
تو تعرفوا عليش..

#ارقامي نا وخواتي معندش بوي..عشان هكي مكلمنش.

اليومين الي بعدها ردينا لدراستنا نا وندى.. ونبهة ع نجوى حتى لو حاول يعتل الباب ردبالك تفتحيلا..

ثالث يوم جيت انتغدى طق هو
لحد امته بنهرب منه
مشيت فتحتلا..خش يهزب ويعارك
ووين كنا وهو عارف ان معندنش حد نمشولا..

قتلا قاعدين.. مطلعنش
هو.. وكيف متفتحوليش..ونفتح فالباب مبش يفتح.غيرت القفل انت😠

نا.. ايواه غيرته..وبصراحه اكثر ي بوي منبيكش اتخش للحوش وانا مش فيه..

بوي..بتمنعني من خشت حوشي ي ولد 《مريم》ورفع يده وضربني كف.

خواتي😨😨😱😱

نا..

بوي والله م ناقص غير هك .ع اخر عمري تمنعني من حوشي
توا بترد القفل القديم فااهم
وامتى م نبي نخشلا حوشي لا انت ولا غيرك يمنعني فاهم 😠

نا..

بوي..وانتي ي مطلقه متريحه هكي جبتيلي العار والفضايح..😠

نجوى..😔💔

ندى مش بالقوا ي بوي كنك انت تضرب واتعارك وخلاص

بوي..صكري فمك انتي😠ي فانص
متجوش إلا بالهزايب والضرب انتم..

بعدين بنجي بنلقاك مغير القفل فاهم

نا..

بوي..رد كنك انبكمت😠
نا.. طلعت ونا ساكت من جنبه

مشيت قدام الباب ف شارع.

بعد اشوي طلع وهو ايتخزر في ركب سياره ومشى.

خشيت ادوشت ومبيتش انتغدى اصلا خلاص النيه طارت💔

ادوشت وطلعت ومن طلعتي هذي معش رديت الا ثاني يوم ف صبح

مسكت ف مستشفى.. ليل
وقفلت نقال

روحت ف صبح.

محكيتش مع حد
ادوشت ولبست وطلعت للمعهد..
روحت منه ف قايلا للمربوعه ع طول مبيتش انتغدى..
شربت قهوا برا ودخان..غير هك مخشش شي في فمي.

غيرت ادبشي وتمددت وغمضت اعيوني ومزال الكف نشوف فيه ونحس بيه وسط صدري..

طق الباب..

نا..

نجوى..مهاب🥺 متبيش اتغدى
نا..لا تغدو انتم معندش نيه

نجوى..مهاب انت كويس🥺

نا..ااه كويس. نبي نرقد مصدع اشوي بس..

هي..💔😔..

بعد اشوي قربت مني ويدها ع كتفي

هي..مهاب.حاسه بيك .سامحني نا سببتلك عارفه روحي💔😔 وبوي يضرب فيك عشاني.

نا..هه ليش هو امته م ضربش. من صغري متعود عليه يضرب فيا..
مفش مرا نذكرلا فيها حاجه كويسه

نجوى..😔💔..حتى اوكان بس نا زددتها عليك

نا..ي نجوى الي صار غلط من الاول.والحمدالله انتهى على هكي واطلقتي.وانتي معندكش عيل منه

تخيلي نا وافقت وخليت بوي ياخذك يردك غصب عنك.. والله حياة اعيالك ح اتكون كيف عيشتنا واشر..

عشان هكي منبيش حد يذوق الي ذقناه وساد امي م جاها المرض إلا من الهم الي نحن فيه..

وكان ع بوي..خليه.. يضرب..متعود ع المهزلا والهزايب منه مش جديد الكلام هذا..متفكريش انتي مزلتي مريضه راكي.

نجوى..اسكتت وطلعت..

نا..بيني وبين روحي..والله قعدت انفكر ف بوي..امتى عمرا دللني
امتى دورني ولا فرحني بشي

امتى عمره طبطب علي

امته اصلا خذاني ف حضنه وضمني حتى اشوي..

امتى..امتى😔💔 ولااااااا مره

سألتكم ع الشي هذا..

بس نا غيركم نا النسيان منقدرش عليه لان كل فتره يرد يدير ف شي وكأن يجدد ف عقد معاي

منقدرش انفوته《لان بوي》

ومنقدرش انقااطعه ونتخلى عليه واندير زي م داير هوا فينا ونسيب طاعتي له وانكون عاصيه(نقدرش)

🔥💔🔥💔🔥💔
#shosheta
#شفتوا النقيض توا

شفتوا كيف يكون الانسان بين شي مش متقبله بس مضطر يتحملا عشان سبب معين

شفتوا فوق كيف حكا علي بوه
وكيف يبي يعانده ويفوت كلامه

وبعد اشوي قال بنتحمل ف روحي
ونتحمل الضرب عشان هوا بوي

شفتوا كيف المواقف بدن يسببن نقيض داخلي ف شخصيته ل مهاب..

#النقيض هو شي يكون عكس الرغبه الي يبيها الشخص
يكون يبي يدير شي ..وفي نفس الوقت شي بداخله يقولا لا مديرش

وكأن روح الطفل الي بصغره لمهاب
الروح الشيطانيه اتقولا رد على بوك
اكسر بوك متعدلش عليه

بس صوت ثاني يقولا ردبالك اتنبه هذا بوك..متعصيش..

شفتوا توا شنو النقيض 👌🏼🚫💔

♤♤♤♤♤♤♤♤♤♤♤♤♤♤♤♤♤♤♤♤♤♤♤♤♤♤

بعد طلعت نجوى..تقلبت وااااجد مجانش نوم..

وراسي انحس فيه منشق كلا صدااااع قوي واعيوني حمر..

راجيت العصر اذن صليت.وطلعت.. ومشيت للمحل..

مشيت جوي خارب بكل..
نشتغل بلا نيه والله

ومش متحمل دوشة الشاارع والزباين.. وبيها بكل قعدت لحد نهاية الدوام.

روحت لقيت بوي قدامي مدرس سيارته

نا..جيت.. هو..مش قتلك غير الخارب القفل كنك م غيرته..

نا..مرديتش.. وفتحت الباب وصبيت ع جنب وقتلا بيدي تفضل خش
بوي.. خش وبعده نا..

خش..يعااارك ع طول وتركب فالبنات عشان يطق مبنش يفتحلا.

بوي.. جاي شايط..متركب في..تريحت توا ب عمايلك ولد شارع انت داير دورة المحابيس اتقطع ف يدين الناس😠

نا..

بوي..رد علي نحكي معاك
نا..انت جوزتها ومعدلتش علي يوم قتلك الراجل مش كويس..

خلص مسكته. بروحه ونبهتا اشرف قتلا اتمد يدك على اختي نا قاعدلك

بوي .ونا وين ماني قاعد

نا..وين قاعد كذا قولي
يوم طاحت ندى من ع ادروج انت وين

يوم نجوى مرضت مرضه قويه ودخلوها للمستشفى ورقدت نا وندى معاها قبل جيزتها بفتره انت وين كنت من يوم هذا

يوم صار ماصه فالحوش واطربق العداد امتاع الضي و دخن الحوش وفيه البنات بس والحمدالله م انحرق انت وين كنت فهمني

وين كنت ايام انرقدوا بلا عشاوات
ايام حوشنا م دخلاته حاجه وين كنت..

يوم الجيران يجيبولنا ف اكل منهم
انت وقتها تاكل مع اعيالك لخرين

يوم اطق الجاره واتقول لبنتك عندك خبزه ولا نعطيكم ..

وين دورك انت هنا..
ليش م تفرض وجودك ف الحجات الاساسيه المهمه ليش
حاجة الذل هي الي اتبين فيها دورك ب قوة الكلمه والتسليط..
هذي بنتك الي هاينه عليك وراميها عند واحد جزار دايرها جاريه عنده ويمرط فيها

رااااضيها شهاده من دينك راضيها انت بنتك من لحمك ودمك واحد يسبها ويسبك
جاااوبني رااااضيها..

يوم ندى وقفت قدامك عشان الحق وعشان امي درتلها اعاقه لازمتها طول عمرها..

سألتك بالله م في يوم وجعك حالها
مفش يوم حسيت انك ظالمها.

توا جاي بتسلم بنتك لخره ل راجل ايدير فيها اشر من الي درته انت

منبش نحكي ع روحي.. ومني نا اقتلني حتى القتل بالك نفتك وانتريح
بس
قولي..انت راااضي بالمرمده والظلم هذا ..جاااااااوبني..
مش قتلي احكي.. اني حكيييت جاوبني انت توا..

هااا كنك سكتت... معش عندك م اتقول صح...

تمام بكل..

هذا مفتاح الحوش.. خليه عندك..
ومني نا لاعاد هامني ردك ولا نبي منك شي..

وفتحت يده وحطيتلا المفتاح وطلعت مخنوووق وراااقيتلي بكل..

ومشييت طلعت قدام الباب
وقعدت اندخنننننننن

بعد وقت طلع بوي وراسه مرفعش فيا
ركب سيااارته وعدا.
ومن اليوم معش شفته.

مشيت لصيدليه وجبت دواء لراس ومنوم معش فيها نبي نرررررقدددد تعبااان..

روحت خذيت جرعه اكبر من الي مكتوبه. ورقدت..

معش وعيت إلا ساعه2 ف قايلا

وعيت راسي ثقيييييييييل اتقول مضروب عليه.

فطرت .تغديت مش عارف المهم كليت وكلت سجين محروم من طعااااامه..

ندى جاك بدر كم مره يسأل عليك
نا..

ندى..قالك توعا تعالي فالحوش

كملت اوكال وغيرت وصليت وجيت بنطلع..نجوى..

مهااب..هاك المفتاح بوي مخذش.سيبه وعدا

نا..🙁😕منبش خليه

وطلعت طبقت الباب

مشيت لبدر..
وجوي مش رايق مزال.
وهوا جاي يبي يشوفني شنو صار

# اشرف قطعولا يده بعد م حليتها له
قصدي حليتها له حله تباعد فيها اللحم من بعضه..لان عازوها لين معش صار منها بكل.

ومقدروش ايجو شوري
لا بالعرف ولا بالقانون

لان ولدهم ضارب اختي الي هي زوجته وسببلها نزيف/اجهاض واخسرت روح كانت شايلتها.
ودرت تقرير لها في حالة حد جا تكلم شهود قاعدين والتقرير عندي

وغير هك مبش يرد اختي لما بوي من قبل عدا يبي يردها.مبوش هم

ولا نا ميت ع نسبهم ونبيهم يردوها.

#بوي من الموقف والرد الي عطيته له اشهور مرن م شفناه.

#بدر.بعد حكيتلا الي صار.. وفضفضت له كل الي ف صدري وحتى ان دمعتني نزلت قدامه

وانتبهوا ونا دمعتني مش قدام اي حد نخليها تنزل..

بعد م حسيت اني بعد الجهد والتعب والجري هذا كلا مزلت ف نظر بوي العيل الصايع الفاشل الي كل م اندير شي.. يجي ويعطي في ع راسي وقدام الناس مش برواحنا بس

وتعبت اصلا من السكوت كتمت وااااجد واتعبت..

فضفضت ل بدر وحكيتلا وع عقبت شي
وكأني نحكي لروحي ف لمرايه بدر..

تررريييحتتتتت بعد لقيته جنبي وشاد يدي وساااندني..

حسيت بثقل اجبال انزاااح.. بوقفته وتفهمه لي..

خفف علي وارتحت..
وديمه كنت انقول بيني وبين روحي
ان عندي سند ونقدر انشد فيه ونعتمد عليه ونأمن فيه حتى ع خواتي وميغدرش بيا..

ديمه كنت نحس ب ان خوي..
ب اني مش وحيد ف الدنيا..

بس ليش الدنيا مُصره اتخليني بلا قوه ليش مصره تقعد اتخبط فيا من كل مككان لين نلتذع وننكسر وتاخذ من قوتي..

ليش ديمه مُصره اتخليني بروحي..
ولحد امته مش عارف💔🔥😔

الحصيل بعد اشهرين من الشي الي صار.. كنت مروح من معهد.. واليوم الي قبله مش راقد..

مروح تعععباااان للحوش ونقال مش واخذا ناسيه فالحوش..

روحت ف التكسي.. واول م وصلت ل بداية الشارع..
وانشوف زحمة سيارات..

ف عقلي عندنا واحد جارنا غلبان فالعنايه نسحابه توفى

بعد قربت اكثر واكثر نسمع ف صريخ واعياط والخيمه منصووبه

قدام حوشنا اتصااادر

جيت انبحت منففففجججعععع.. من..
حوش هل بدر هضم..جيت بسرعه وقلبي والله اتقول حد مسكه بين ايديه.

قربت وانبحت.. ونلقى بوه يبكي..
ونسمع ف امه تعيط.. قربت اكثر ويقولي.جارنا..

عظم الله اجرك..بدر عطاك عمره💔

نا....
🔥🔥🔥🔥🔥🔥🔥🔥🔥
#يتبع
#shosheta..

الدنيا احظووظ زي م يقووولو ولالا..

المره مش ح نعلق نا..
ح انخليلكم التعليق لكم..
بعد م شفتوا جاااانب كبييييير من حياة مهاب

نتلاقوا ف حلقه جايه...

ليلتكم🔥🔥❤️❤️


google-playkhamsatmostaqltradent