رواية نقيض بلهفة عاشق الحلقة الثالثة 3 كاملة

 رواية نقيض بلهفة عاشق الحلقة الثالثة 3 كاملة

رواية نقيض بلهفة عاشق الفصل الثالث 

رواية نقيض بلهفة عاشق الجزء الثالث

رواية نقيض بلهفة عاشق الحلقة الثالثة 3 كاملة


رواية نقيض بلهفة عاشق البارت الثالث

رواية شاب واقعيه
#بعنوان_نقيض_بلهفة_عاشق_الحلقه_الثالثه_للكاتبه_shosheta..

قراءه ممتعه💙❤️

نا.. قولي شنو في كنكم متبوش تقولو ..امي كنها

مرت بوي..😏م الاخر الدكتور قال معش عندي م انديرلها مرض امك ملش علاج

نا..كيف..
هي..😏 امك ي مهاب فيها المرض الشين.. جاااايها السرطاااااااااااااااننن

واقسم بالله لو نقدر ندويلكم صوت
راني قتلكم كيف نطقاااته مرض امي الحروف يرنن في وذني كانن منها

#عفانا_الله_وياكم..من كل سوء

نا..وقتها اول مره نسمع بيه.
اسم المرض وايش هو مش عارفه
كنت كيف كابر وحاجة15 سنه وقتها
بس والله عمري م سمعت بيه..
حتى المرض العادي من النادر وين واحد يمرض احذانا..

المهم

نا نسحابه شي عادي يصيب الناس ويتعايشو معاه زي الاعاقه مثلا

و الله هذا م جاب عقلي قلت امي بتقعد زي اختي فيها اعاقه وطايحه ف لفراش عشان هكي كلهم ميبوش
يخدموها ...

كلهم ايتهربو منها ميبوش..

بس ليش ايقولو خايفين منهاا..مرض امي عادي بيقعد زي اختي واختي اعاقتها مش معديه...

واقسم بالله كان تفكيري هكي
بريئ ودوب حالي وعقلي وقتها

ولا تكه إجا ف بالي ان مرض خطير ويموت💔😔

شنو يعني عادي ونخدمها امي اصلا كان م صبيتلهاش نا وخواتي محد يصبيلها..
ديمه مصبيتلنا هي..

《《《《《《《《《《《《《

نا..وطلعوها عادي نحن نخدموها
عليش اسمنا اعيالها..

مرت بوي..حتى هم امطلعينها ميبوهاش فالمستشفى معندهم م ايديرولها..هي فتره وتمشي اصلا😏
معش اتثقل عليكم

نا..فرحت ..قصدك فتره واترد تصبي ع رجليها وتمشي زي قبل❤️

هي..لالا..قصدي امك مش فاضللها واجد.. ف دنيتها ..فتره واتموت..
لان مرضها خطير ومنتشر السرطان ف كل جسمها لين تالفه وضاعفه خلاص معش تنفع.😏

نا.. سمعت هالخبر وحسيته زي الكف
جاني

قتلها بفرحه بترد اتصبي😍
قالتلي.لا بتموت واتخليك💔😔

ياعليك خبر نزل ع مسامعي وقتها..
جمدت ف ارضي
حسيت جوفي اسخن..
صدري نااااار
بس اطرافي باردات برود الثلج

قعدت نستوعب ف الي قالوه..
هم ردو لدار الدكتور..
ومعاهم سنيوره مرت بوي..

بعد وقت طلع وقالي عدي روح انت امك تو انجيبوها نحن

نا..حاجه قست جوا قلبي..
قوه غريبه تملكتني.. ورديت عليهم
قتلهم منش ماشي وامي تطلع من دار هذي نا ف جنبها..

بوي..قتلك يولد روح لخواتك امك تو انجيبها نا معاي لكم امشي هي


نا..لا منش ماشي كان تبي اتجي انت راك جيت لما طقيت عليك ليام لولا انقولك تعال امي مريضه تطلع اتلز في واتقولي باهي ومتجيش

عليش تبي اتجي توا عشان تبي تموت هي..

(قلبي انكسر من قولتها والله) مابالكم نخسرها صح😔💔

بوي سكت ونزل راسه

وبعد وقت جابو سياره وروحنا بيها.

والله مكنتش فاهم ولا عارف اعراض المرض..غير الي سمعته
مرض خطير ومنتشر فيها

امي واعيه مش راقدا..
بس وجها لونه منسمر واجد ونااقصه بكل بكل..
وجهدها ياادووب
وواعيه وفاطنه
وتحكي بس بشويش..

وبيها بكل لما اتبحت فينا والله تضحك ف اوجوهنا..

دسيت ع خواتي انها مرض موت
وقتلهن ان قال دكتور تبي راحه فالحوش

وقلتها لبوي قتلا ردبالك اتقوللهن حاجه..
بوي سكت..والله كان اتشوفو حالها يوجع 💔من شكلها..

والبنات كل م يشوفنها ايتباكن..
وكل يوم حالها يرد لاوره

اختي الكبيره اتقولي امي مش عاجبتني وكيف مفش ادويه وكيف وكيف وكيف...

ونا كل مره نكذب عليهن..
هي ولخره
وراني رديت ع دكتور بالسرقه وسألته ع امي وع كلام مرت بوي الي قالا ليا..

وحكالي كل شي وشنو هوا المرض هذا.. وقتلا امي معندش غيري ونبي نعرف هي دواء معش يأثر فيها ولا عادي نشرولها واتحسن..

وللاسف..كلام كلا يخليه تكره الساعه الي انحطيت فيها فالموقف هذا.. وتخبط راسك ف مية حيط

وقتها العيشه قيس الحال..
والفلوس مفش ..
والعلاج برا نادر يكلف لان..
م علينا.. كلكم توا سامعين بالمرض وعارفينا..

وربي ي يفجع حد ب خبر زي الي سمعته ..
◇◇◇◇◇◇◇◇◇◇◇◇
shosheta
#نبيكم اتفرقوا بين
عيل15 سنه ف وقت زمان وعيشة زمان البسيطه

وبين عيل 15سنه ف وقت توا وعيشة التطور المخيفه الي نحن فيها

فرق كبيييييير راهو

》》》》》》》》》》》》》
مسكت خواتي وقتلهن
معش تبكن قدامها ارفعلها معنوياتها وسهرنها..
◇◇◇◇◇◇◇◇
راهي النفسيه عامل كبير ومهم ف الامراض هذن
.............

امي..نحسها تشكي من شي

حتى الصرف ميصرفش علينا.
لفلوس الي يجيب فيهن خالي لامي
هن الي نمشو بيهن.. و مرات يجن لفلوس ناقصاات..

اندبروا حالنا..
قعدت نشتغل فالصيف وفالوقت الي معندش فيه شي عشان نجيب افلوس

#بعد رسوبي ف شهاده الاعداديه
عدتها من جديد سنه الجديده ونجحت فيها..بتقدير عالي..

وخشيت ع الثنوي وكملته وع الطب طول

بين شغل وبين دراسه

بوي رزقه ربي ب اعيال بس مش عارف كم عنده الحق

اختي الكبيره طبعاً دراستها ..كملتها واتراجي ف تعيين محصلتش

اختي ثانيه..اشوي واتكمل

◇◇◇◇◇◇◇◇◇◇◇◇◇

تعالوا نحكو ع جانب ثاني

اختي الوسطيه كانت عندها صحبات.. اكثر من الكبيره
عشان منطلقه واجد فالجيران
المهم ..

بنات جيرانا يجنها واجد ويكسد عندنا..

وشاءت الصدف و تلاقيت مع وحدا من البنات ..وعجبتني شخصيتها..
او ب الاصح.. هي عجبتها نا.

وصار الاعجاب متبادل..
بس انتبهت لروحي ووقفته..

بس هي معطتنش فرصه
قعدت ديمه عندنا..
وطايشه اصغيره.هبله متفكرش ايش م يطلع ع لسانها اتقوله..

والمشكله تحكي بسرعه 140 كلمه
ف دقيقه😅

لسانها بكل.وروروروووروورور

المهم كانت بداية اعجاب..
وراهي مش سمحه واجد هي بس
كويسه .. بيضاء.اقصيره.ارقيقه لسانها اطول منها.
اعيونها سود

مكنتش متوقع ان يصير شي بينا.

كنت انروح من شغل نلقاها ف وجي

انكسد مع جماعه انروح نلقاها ف وجي

نقعد راقد ونوعا متأخر اشوي ف صبح نلقاها ف وجي..

وفاطنين جو (😍)..هي هكي👉🏼😅

اتشوفني تنسته وتضحك وتخبط ف ساس وهي ماشيه اتبحت في..عادي جدا..

راهو مش وسيم نا لا الكذب ع الله حرام..شكلي عادي جداً مفش ملامح الجمال الواو هذك..

بس البنت كبدت في😅..لين خواتي افطنن للموضوع..
وهي بصت ع روحها اصلا..

ح اتقولو كيف ديمه عندكم هي..

هي اتكون بنت جيرانا وبينا وبينهم شارع.. تفتح اعيونها اتجي طول لخواتي..

وقتلكم نحن نظام حاره شعبيه مفش جو عيب م عيب.. لالا

اقريب ونعطو الناس كلهم مفتاح الباب مش نحن بس
كلنا زي بعضنا هكي❤️

ولنفس السبب بنات الجيران ميمسكوش فيهن هلهن عشان نا رابي بينهم.. وعشان عارفين حياة امي وتربيتها لنا...
ف الهبله هذي ديمه عندنا..💙

》》》》》》》》》》》》》
انردوا ل بوي..

بعد السنين هذن جانا ف يوم وشكلا متغير .. وجايب مرته معاه.. ومعاه 3 اعيال.. ولدها هي... و2 من بوي نا

المهم جونا ودايرين ارواحهم يسألو علينا ويطمنوا .. وتعشو عندنا وعدو..

بس ي ناس..بوي مقالش كيف تصرف بدوني..

مقالش كيف عايشين
مقالش عندك افلوس ف جيبك ولا نعطيك

مقالش تخدم ولا مكسد
مقالش وين وصلت ف اقرايك انت عارف ان من تخرج ومن مزال

مقالش كيف مرت عليكم مرحلة غيبة امكم وهوا عارف شكثر متعلقين بيها

مقالش تاكلو اكويس
تلبسو كويس..
لالا..مقالش شي
شي
شي
شي بكل..

جا ولا كأن غاب4اسنين..

وسهرا عادي وتعشو وعدو بدون م يفتحوا اي موضوع من مواضيعنا لقدم..

تفاجئنا صح بجيتهم بس بعدها معدلنش..

قعدو كل اسبوع عندنا.. وبدون م يجيبو شي معاهم

ونا مستحيل نطلب منه شي..

》》》》》》》》》》》》》》》》》》》》》》》》》》

#هل بوي من بعد عزاء امي معش شفنا اوجوهم

#خالتي اتجينا بعد4\5 مره وتمشي
حتى اعيالها بالاسم نعرفوا بعضنا.. متجيبش فيهم هي..

#خالي الثاني..اتجوز ومرته حاكمه فيه ..كان يطلطل عالبنات بعد اجوز معش دورهن

#خالي الكبير الاول..قعد يبلد ف حق امي ومعش يجيبلنا ف لفلوس ..
كل كم شهر يدز بعدها وقف
وقطع علينا.. ع قولة زوجته مهوش ملزوم بيكم راجلي..ايام اخته قاعدا يعطي فيها توا ماتت خلاص معش يحقلكم تاخذو.. واصلا اعيالي اولى ب لفلوس منكم..😏..

شفتو الدنيا كيف بدت توا...

حجات واجد الناس داروهن عشان امي بعد ماتت محد دورنا بالعكس.. قعدو يهدو ف حيلنا كل م رقينا اشوي فوق... ايردوا ايذكرونا ان نحن ايتاما.. وملنش حد و مضايقينهم وع اساس شاقيينهم نحن ودايريلهم مشاكل.. ومن هالقبيل.

م علينا لنا ربي

》》》》》》》》》》》》》》》》》》》》》》》》》》

في جانب محكيتش عليه لان
(يمس قلبي واااااااجد) ومنتحملش..ينفتح.
لان فترتها والله صعبه..

لا حضن يحن..💔
ولا نعمه تسكت الجوع..💔

وصلت بينا لدرجه والله غير لميه فالحوش م في شي..

وزيدها زايد
فقدة امي الي شنو صار فينا من بعدها نا والبنات وكيف تغيرت نا 180 درجه..

برغم سني الصغير إلا اني حسيت روحي كبير ومسؤول ع بنتين ف وقت المفروض بوي يغطي ع غيبة امي بس م غطش وخلانا انحسوا ب ان يتيمين الاب والام مش الام بس....

ومنها تغيرت شخصيتي والحمدالله مكنتش من لعيال الي تفكيرهم تافه حشاكم ..وقدرت نفكر صح ونصبي لحوشنا ..

وحطيت روحي صنايعي عند كل واحد نعرفه وما نعرفه عشان نحصل شي للحوش

وراهي ايام وااااجد قعدت فيهن بلا شغل ومتسكره ف وجي بس مش بيدي الي ف جهدي درته

◇◇◇◇◇◇◇◇◇◇◇
#shosheta
يقولو الراجل مهما كبر فالعمر يكون اصغير..
لين اتموت امه..
اتموت الام يكبر ولدها..

المعنى او المقصد شنو..

يعني ي حباايبي..وجود الام شي كبير وتقدر هي اتكون مغطيه ع ولدها و لو كان عمره30 سنه..

تقدر اتكون هي الأم والأب
وتقدر تشتغل 100 شغله عشان اعيالها ومستحيل تشكي..

بس بمجرد غيبتها..
الاب يبان دوره ك اب.. فقط👌🏻
والحوش ينهز..
والعيل يكبر

ويصير راجل كبير..
اذ هوا راجل فعلا مش مجرد (ذكر)

و قصتهم اقرب مثل

الام رغم قل حيلها.. الا انها تعرف تصرف وادير ف حوش وتستر ع اعيالها وم خلت حد يوصل فيهم ويهينهم..
وغطت ع عيب وتقصير زوجها
ودلعت طفلها
بعد ماتت دور الاب بان وللاسف كان مش تمام بكل..

وطفلها النرفوز ابو عصبيه صار راجل يعتمد عليه.. وصار يمسك ف روحه عشان خاطر حجات وااااجد

☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆☆

الحمدالله منبش نشكي من حالي.. ولا نبيكم تقرو كلام واتروفو بيا

لالا..الجانب هذا خلوه لنفسي..

خلونا ف جانب اخرا..
تعلمت الدخان من بعد توفايت امي.. خالطت شله بس خشيت فيه ب رغبتني مش تقليد ولا اجباري مت اصحابي نا برغبتي دخنته..
وكل م كبرت سنه.. وكبرن مشاكلي والمواقف كل م انفش ف غلي ف دخاني..

فالحوش اندخن لين يقعد مضبب..
بس يوم يجي باتي مندخنش قدامه احتراماً له مش خوف منه.

اختي الوسطيه.. وقفت سنه تعبت فيها وقفت قيدها..((ب الاصح الامكانيات معش يسمحن وقررت هي اتوقف ونا نكمل))

ع قولها حتى لو كملت بنمد وجي فالحوش لا خليني نا نوقف
ونكمل سنه لخره احسن نمشي الجو

وعمكم مهاب يجري ع دراسه والعمل والحوش واصحابي..

والحمدالله الحال مستور.

》》》》》》》》》》》》》

في مره شباب كانو بيتعشو برا..
والحق وقتها مكنتش متبحبح مادياً
وقلتها فقش منتحشمش فيها..لان ارزاق ف نهايه هذن..

قتلهم انقه افلوس م عندي.. وأجلوها يوم اخرا وحاضر..

نطو الجماعه وقالو لا عادي نمشو والخير واجد مدورش .. يوم لنا ويوم لك..عادي..

والحق مدرتش غيبه لان اصحاب من الصغر نحن..
ومعانا وحدين اخرا اصحاب اصحابي منعرفهمش.. وبالجوده بيهم.. عادي

المهم هي زردة عشاء هكي

وع اساس الماديات مش بينا..

وهم بس عارفين حالي ووضعي البرانيه منحبش نحكيلهم شي.

المهم
مشيت معاهم وجو سمح وسهاري وضحك ولعب وامنابشه

وجهزنا العشاء وما يتبعه..
وقمعزنا كلنا وبدينا ناكلو..
ونفتحو ف مواضيع...انمشو بيهن الجو..

مكنتش عارف ان سيرتي حتى نا بيديرها رفيق عمري تسليه عشان يضحك اصحابه لجدد..💔🤚🏼

ومن كلمه لكلمه ..
نط 《رفيقي》 وقال من ضمن الكلام..

زي مهاب..م عندا بيش ياكل ويلبس
وطالع ف جرتنا عشان ياكل من قعدتنا.و(ضحك)

نا كنت ناكل واقسم بالله اللقمه وقفت ف رقبتي لا بت ترقى ولا بت تنزل..حسيتها حجر مش نعمه من كلمة رفيقي.💔.

رفيقي يبحت ف الباقي ويبيهم يضحكو ويكملوا بيها..

هم بحتو فيه و م داروش زيه
والبرانيه الي جايبهم معاه ضحكو..

نا..زمطت اللقمه بصعووبه

هو..😅 سمح لوكال متاعنا اه

نا..منش كلب بيش اتعايرني و اتقول ياكل من قعدتنا .تهيالي لحد امس كنا ناكلو ف سفره وحدا نا وياك عندي فالحوش

هو..(جا يبي يرقعها.خربها)
هو..يرا بجو بصاره كنك انت..وكليت معاك صح بس انقنا م يوتكل خبر امس..
بالجو هك .متحسسش😅

نا..لا مش متحسس ي رفيقي..
بس تهيالي الحال من بعضه نا وياك..
وعيبا منك تنكر اصلك واتلون عشان ترضي ناس ثانيه واتكون زيهم

هو......

نا..اعرف من اترافق مره ثانيه..كلا صحبة المال والله م ادوملك..
وعن نفسي وبحضورهم اه
حيطتك ورميتها.. متفكرش اتجي ف يوم واطق حوشي..

وصبيت مشيت نادوني مبيتش انرد و روحت.بروحي

الي تقهر ان من دون ليام امس تعشى عندي خاطي العشوات الي فاتن..

جاي توا اتعايرني عشان م لميتش معاكم وكنت مفلس جديات ..

لا واخرا قدام البرانيه عشان حالهم خير مني ومنه لا وفوقها يبي روحه منهم بالقوا

هه..مش عارف ان الي ينكر اصله
هو(ولد الحرام)بس .حشاكم.

روحت متعقد بكل..
مش عشان نا مفلس لا والله

متعقد عشان مكنتش متوقع رفيقي من الصغر ايدير هكي..
وباعني ف قعدة رجالا عشان يضحكم ويكسبهم ..

انقااااااني انخدعت فيه..
ونا الي والله حتى من لبسي لما يطلب نعطي فيه وعاده خوي

قتلكم حالنا المادي زي بعضه..
بس هالشي مدورش هو

دور مصلحته عشان يبان هوا فوق
بس للاسف الجدد عرفوا رفقته طعن وفكو عليه وخسرهم

وبرضوا تعاركو معاه اصحابه لقدم الي هم اصحابي وصكرو عليه

وخسرهم بعد عركه داروها
وخسرني حتى نا

صح نا مكانتي منش شخصيه ومركز وافلوس..
بس تعال اوفق علي..واطلبني ف شي والله انلبيك ع قطع رقبتي.مش انوخر وانبيعك

روحت الحوش.. وخشيت للمربوعه ودلفت الباب بالقوا..

وتمددت..ويدي ع اعيوني.

اشوي وطق الباب

نا..مننننننننننن

الباب..ططقققق

نا..🤬 الخارب مفتوح خشي
(نسحابها اختي)

( )..فتحت الباب وخشت بلا صوت
مفتحتش اعيوني نا.. ومحسيتش بيها نسحابها حلت وواقفه عند
الباب

نا..مسكر اعيوني.اشتبي مش عارفتني دلفت الباب عليش جايه

( ).. بصوووت اقريب مني قالت
قالت.......

نا.... 😳هي انتي

هي..❤️❤️
🔥🔥🔥🔥🔥🔥🔥

#يتبع..
#shosheta..

الاعمال بالنيات يقولو ولالا..
يوم توقفوا مع حد محتاج اوقفوا ب كلمه طيبه ب دعم ب سند ب قوه.مش فرض ب افلوس..

لبو المحتاج والمريض مديروش زي م دارو هل مهاب ف مرض امه

راهو الي متلقش ف ضعفك وشدتك
معندك م تبي فيه ف فرحك وقوتك.

وجودكم ف حياة غيرهم ك اخ واخت وزوج وزوجه مش ابلاش راهو
اوفقوا مع اعيالكم مع خوتكم..
كان هم م نلقوكم من بيلقوا..
وصدقوني ح يجي يوم واتقولو ياريتنا عاملناهم اكويس وكسبناهم بيش اليوم ف كسرتنا لقيناهم👌🏻

الرفقه والعشره عمرها م كانت ب لفلوس..بس الي يبي مصلحته.
يبيع حتى شرفه عشان يوصللها

وراهي صحبة العمر محتاجه موقف واحد عشان بس اتبان (حقيقتها)

وصحبة المواقف عمرها م تحتاج لشي..تبي حد يقول نبي.. والثاني يقول تكرم. (هكي بس)

العائله وطلعت مفيهاش خير
وصاحبه كذالك طلع عيل

1..هل برايكم مزال ف خبر اخرا ح يطلع قدامه ولا الي صار يكفي..؟؟

2..و..دور الاب هل ح ايتغير ولا ع يقعد زي م هو بعد عرفتوا الي عرفتوه
عليه؟؟

اووو ..والباب الي طق..هل عرفتوا من كان ولا تبو توضيح اكبر
وتتوقعوا شنو يتقولا هي
ف المكان والوقت هذا❤️❤️

نتلاقوا بكرا بس ياريت م نلقاش
(قصيره.وتم)..مديروهنش ليا

علقولي ع الي صار..
هل في ناس صح ديمه متسكره قدامهم ولا مهاب بس حالته هكي.

ليلتكم❤️❤️❤️


google-playkhamsatmostaqltradent