رواية نقيض بلهفة عاشق الحلقة السادسة 6 كاملة

 رواية نقيض بلهفة عاشق الحلقة السادسة 6 كاملة

رواية نقيض بلهفة عاشق الجزء السادس 

رواية نقيض بلهفة عاشق البارت السادس 

رواية نقيض بلهفة عاشق الحلقة السادسة 6 كاملة


رواية نقيض بلهفة عاشق الفصل السادس

رواية شاب واقعيه
#بعنوان_نقيض_بلهفة_عاشق_الحلقه_السادسه_للكاتبه_shosheta..

للعبره❤️
قراءه ممتعه🔥❤️🔥

بعد م عششت نرجس ف بالي
وبعد م تعلقت بيها بشكل غريب رغم اني منحبش انبين بس هذا الواقع

قعدت هي تترفع مني
قعدت اتخف علي وتختفي بعد ن تلقاني بيها

وبعد م ح. ح. حبيتها💔 يمكن

المهم اليوم هذك سكنتلها
بتليفوني وتليفون الشاب

شي مشغووول
وشي مقفل متريحتش بكل وتنرفزت

هلبت وقت ورديت عاودت🤬عليها ب رقم الشااااب لقيتها انتظاااااااااار
🤬🤬🤬🤬😡😡

صكرت.. هلبت اشوي وقت واتصلت اخرا ايييييه انتظار😠

فاتت 15 دقيقه.. و25.. ونص ساعه

معش فيها وانقني ضجت بكل وعصبت... انولع ف دخان وانطفي..

بعد نص ساعه. رنيت عليها برقمي
وضرب عندها وهي انتظار ..قعدت اشوي وصكرت
رنيت اخرا..
《《الرقم المطلوووب مقفل》》
《《الرقم المطلوب مققفللللل》》
😡😡😡😡🔥🔥🔥🔥

الدخان الي ناخذ فيه
كأن يولع ف جوف صدري..
نار والعه في وضااايج

منبه عليها مكالمات بعد 12 مفش..
وتوا ساعه 3 وانظااااار💔🔥😡

تعرفوا والله بدون مباالغه نقال من يدي محولش ومن ع رقمها مبطلتش اتصالات وكل اشوي مقفل وتهيالي نبيها اترد وحتى هي مسكره نبي نعرف مع من تحكي..

م صدقت طلع الصبح.. وطول من المستشفى ل باب الجامعه..
وقعدت رابطلها من ساعه8لل11 مجتش..

مشيت للمحل طول مروحتش حتى للحوش وبديت ف شغل وبلا نيه

رديت كلمت نرجس بس مقفل مزالت.

كلمتني ندى منشغلا علي مجيتش..
طمنتها وصكرت..

وهات ع نقيق الزبونات ومقاس كذا ولون كذا..
وهكذا.

روحت ساعه2للحوش تااااالف بكل وجعاااااااان ..دوب م كليت هك وطحت رقدت طول..

معش وعيت إلا 8 ف ليل بالقوا
صليت م فاتني..

وكليت .. وسألتني اختي كني باين وجي مقلوب..
مقلتش كني وشفت ايش ناقصها
وشريتلها ومشيت..لشغل..

ساعه11بالليل .رنت علي نرجس بروحها..

نا..ايوا نعم

هي..ولا كان في شي صاير تحكي عادي جدا..وتدلع

نا.. طارتلي منبش نحكي قبل
هي.. مهاااب مرايفه عليك خليك معايا اشوي ماهو مكسد انت مفش شي غير ماسك وخلاص

نا..نرجس صكري😤مش جوك

هي.. مهاااب..😣😣

نا..فكيني من الصوت اهواه ومن دلعك واحكي كويس🤨😠

هي..😖😖😖😖😖

نا..نررررجس سؤال واحد..جاوبي عليه اه(مع من انتظار البارح)😡

هي..نا😧😧

نا..قتلك مع من انتظار البارح جاوبي

هي..محد ي مهاب كنك انت..

نا..محد ااه..تمام بكل.. وصكرت ف وجها نقال..

وطلعت اندخن..
فالعاده..حتى نعصب وانسكر اترد اتكلم ونسكنلي.. بس المره م سكنت

ونا..انقااااااني م ننقرب فالغلط..
صح اصلا نرفوز وعصبي من ابسط شي..بس الغلط مفش يما ارحميني🤬..

وهي عارفه روحها دايره شي وشي كبير وعارفه كيف رد فعلي عليها عشان هك مبتش اتكلم واتحااول

نا..متريحتش... وبعد طفيت دخان عاودت كلمتها مبتش اترد

كتبتلها مسج
(عارفك ع نقال واقسم بالله كان م اتردي توا تلقيني قدام وجك ف دارك)

طووول اتصلت هي..

هي..😭😭
نا..تعرفي اتردي توا اه.

هي..اشتبي ي مهاب نبي نرقد عندي جامعه بكرا..

نا..وتوا طلعت اشنبي يعني..
كويس الأدب والله..متبش اتقولي مع من كنتي تمطخي البارح😠

هي..مع بنت خالتي دايره مشكله وانشوف فيها..

نا..بنت خاااالتك اهاااااااااااا لا اقتنعت وشنو الموضوع بيش نقتنع اكثر ونسكت..

هي..مهاب موضوع وخلاص كنك انت ..😒

نا..ومن امتى اصلا عندك مواضيع..حتى عطيسك اتقوليلي كم عطستي مره من قبل توا قعدن مواضيع من وراي..

هي..اسكتت😖😖

نا..مفش رد يعني.. تمام ي نرجس..
بس ورحمة امي اه نتصل نلقاك مع الكلبه بنت خالك والله انهد عليك ف وسط الحوش وعارفتيني انديرها واندير بوها راهو اه..اني حذرتك👌🏼😠..

هي..طفت مرا وحدا..

نا..ونقالك ردبالك نلقاه مقفل خليه مفتوح

هي..تمام باهي باهي خلاص فهمت
هيا باي..

نا..اسمعي..بكرا صبح تلقيني قدام خلقتك ف جامعه الله يطعمك وانشوفك ب لبسه اقصيره ومكياج فاهمه🤨😠😡

هي..ب ..ب..باهي فهمت فهمت خلاص بنسكر

#تغيرت نبرة صوتها وزي الي كانت متعقده..

صكرت عليها..

وقعدت طيلة الليل وانا كل اشوي اندير ف رنه وانسكر وانشوف فيها انتظار ولالا..

ماهو المشكله ادير الشي الي م يندار وتسحابني غافل. ومنندريش ونسكت
بس ورحمة امي م تنكتب علي نقعدلها طرطور ..

ف صبح مشيت ربطلتها عند جامعه وعند باب ب ضبط.. وشاافتني كيف متخزر فيها..

خشت تجري لجامعه..

وكانت لا مكياج ولا شي اقصير

يعني ليش الجو البايخ هذا م من الاول نسمع الكلام وخلاص..

》》》》》》》》》》》》》
#ردبالكم انتم اتقولولي مزودها معاها واصلا مفش شي بينكم رسمي..

نا مضربتهش ع يدها ولا جبرتها ترتبط بي انا هكي طبعي..شكاك غيور عصبي حطيتلها شروط قالت أمين عليهن..يعني راضيه مزريتهش ع شي
يبقى توا شنو..يبقى منش غلطان وهي الي وافقت وخالفت وبالتالي هي الي غلطانا.

####################

ومرن كذا يوم ع وضع هذا
منحكش معاها واجد وكل صبح رااابلطلها..

لين بروحها احلفت قالت معش انديرها ولا نحكي مع حد ف ليل إلا لما انقولك لو شي ضروري بكل

تبيني انفك عليها معش نقعد ناشف معاها هكي..

#ومرات الامور مش بيدك مشاعرك يحركنك ي اتحب واتقرب
ي اتحب واتصد
ي اتحب واتعاقب

بعد ايام ردت العلاقه كويسه بينا ..
والحال ماشي..

#راجل وحدا من عماتي توفى مشيت يوم واحد مع خواتي عزينا وروحت بينهم.. الواجب ودرناه
الا النفاق منديرش نا..
هم لا يقبلونا ولا نقبلوهم..عليش بنجوهم اياام..نص ساعه تكفي

بوي..جد عليه مولود اخرا

يرا الواحد معد عرف روحه هو الي مفروض يجوز ويخلف ولا يكمل حياته وهوا كل يومين يسمع ان جاه أخ جديد😅 ي عليك حالا و خلاص

اتصدقوا والله حتى اساميهم ماني عارفهم خوتي من بوي ..
ولا في مره سألت عليهم لان كل م يجونا يوتروا الجو لين ترقالك بكل ومعش تركز ف ايش كنت تبي تعرف.

بعد فتره من جيبة امرته..(بوي

جا وعزمنا نا وخواتي ع العشاء عنده..
واصر واااجد ع الجيه

كلمت نجوى وقتلها اتجينا يوم كذا
وتو بوي يجي ياخذنا هكي قال هو

وكلنا مستغربين كيف نزل عليه الحن هذا.. لا ومش هكي بس..

حتى زوجته عليك استقبال داراته لنا
متقولوش هذي مرت بونا ام طبع زفت..

وفعلا عشاء مقيوم..دايره
المشوي ولمحمر والمقلي والمبوخ..
والحلو ب انواع ومشاريب..

نا وخواتي الحق مستغربين

بالله عليكم بعد قطعيه فوق من7 اسنين.. ايجو توا ايتغيروا ف يوم وليله ويقولولكم عشاكم عندنا مش تستغربوووووووو😑😑
..

المهم..تعشينا عشاء من الاخر الحق
وبوي يجري ويجيب ويقول كولو..
معش نبي انفرق بينكم كل
جمعه غداكم وعشاكم عندي..تعالو انتم بس..

ويااناااس اتقول واخذين احبوب بوي ومرته والله مش هم لولين بكل

وم عقبوا موضوع م حكينا فيه ويضاحكوا ومنسجمين..

لما جينا بنروحو..
عدت مرت بوي وجابت 3 اكياس

كل واحد منا هديه جايبتلا..

نحن والله طول اليوم منصدمين ومتفاجئين..ومذهولين الامر مش طبيعي حسيناه ولا اشرايكم انتم

الود ودنا ديمه هكي والله يكونو معانا بس والله ياناس امر. نا عن نفسي مش مريحني

بس شنقوول.. ان شاءالله ربي يدون هكي..

واستمر الحال وكل جمعه يجي باتي ياخذنا غدا وعشاء عنده..

خوتي مع تكرار الجيات عرفت اساميهم. بس ديمه ايقولولي كيف قاعد انت معانا انت راجل تقعد ف مربوعه مش انت صاحب بابا عيب تقعد مع صبايا...

هه حتى خوتي ماهم مصدقين اني خوهم ب الطول هذا

معاهم حق نا بروحي مش مصدق ان بعد العمر صار عندي خوت 5 اذكورت ف وقت غريب بكل..

هه..م علينا..😏

مرن الايام...
وشبه شهر عدا عليا وماشاءالله من كل النواحي..

راتب اكويس المحل❤️
وراتب المستشفى❤️

والحوش والله حسيته م نقصه شي رغم الدخل هوا هوا بس والله شهر مرضي عليا من ربي هك

رواتب طولن ف جيبي..
وقسمت منهن ودسيته للعازه

#تعلمت من امي هالعاده

وايش م نجيب والله م يكمل
والخير تهيالي يطلع من كل مكان..

الحمدالله❤️❤️

وجوي مع نرجس ماشاءالله رااايق بكل .. وجتنا فالحوش وشفتها كم مره..
ومزالت هبله بس والله خذيت عليها❤️🔥

وشغلي ف المستشفى كونت منه معارف ماشاءالله صح صدفه ومعرفة شغل.. وزيارات.. بس معرفة الناس كويسه..

افطنوووو تعرفت اوكي..
بس ثقه مش ب ساهل نعطيها.

المهم في يوم كنت ماسك وجاي راجل واصل (واسطات يعني)
جايب مرته حالة وضع
وقعد معاي يسهري وتعرفت عليه وتعرف علي وقالي

هو..متعين ولالا..
نا..والله مزلت اصلا مكملتش قرايتي

هو..كيف مكملتش وانت اقريب توصل نهاية العشرينات

نا..وكل ربك ي راجل مزااال😅 والله شنقولك ظروف توفت (لميمه) الله يرحمها قعدت نجري عالحوش مصروف ومتطلبات معش لحقت الحق..

هو..الله يرحمها .كيف حتى الوالد متوفي..

نا.. للحظه جمدت صح بنظري بوي كان ميت بس بعد الي دارا ليام هذن.. قتلا لا الحمدالله عايش غير مش معانا مع وليه اخرا..

هو..ااها باهي ربي يخليه لك..
قتلك نا المدام مزال برنامجها امطول فالمستشفى..كان تبيني انعينك بكرا الصبح وتيلي ملف لك ب الاوراق..
بأذن الله الشهر الجاي ينزل راتب ع طول واتريح اشوي ويشيل عنك كتف...اشقوووولك

نا..من الفرحه نطيت مصبي تحكي جد😍😍

هو..والله..عندي معارف وحبيت نخدمك..

نا..خدمت العمر والله كان صارت وعينتني.. ندعيلك طول العمر..😍

هو..قول غير ربي يرزقني ب(عبدالكريم)الي نراجي فيه لي8اسنين ..توا قاعد جوا

نا..قصدك جاي اتراجي ف بكريك ينولد..

هو..والله كان صخر الله..اليومين هذن يجي دارولها دخول الوليه عشان ملاحظه توا

نا..ربي يطعمك عبدالكريم وعبدالله وعبدالرحمان ويكثرهم ربي وتفرح بيه وبيهم..❤️❤️

ومن فرحتي كلمت صاحبي بدر وقلته له ساعه3 الليل

من فرحتي والله لقيت روحي متصل بيه
لان بدون كلمة الراجل التعيين ناسيه بكل لان ف نظري لازم من شهاده.. ونا تبيلي بيش انكمل اصلا
اذا صارت وكملت..

ثاني يوم مشيت طلعت كل الاوراق الي قالي عليهن 😍😍
ودرت ملف ل ندى ولي ورفيق دربي وعمري بدر❤️.. ونجوى درتلها بدون م تعلم❤️❤️ 😉 كل شي خذيته من الحوش.

4ملفات.. ثاني يوم جيت لراجل وعطيته الملفات قالي جيب كل الي تبيهم ايتعينوا ونا جاهز..

وفعلا خذاهن من هن ثاني يوم قالي كون هاني درتي دورتي ع معارف وتم التوقيع عليهن وبأذن الله بداية الشهر الجاي يكون اول راتب لك من الدوله ينزل ع احسابك..

نا..من فرحتي قعدت نضبط ف راجل.. لان الراتب والله ح يغنيييني ع حجات وااااجد ويساااعدني يساعد خواتي.. تعبت من المرمده والتعب ف اوقات مش تمام بكل.

وصدفت بعد ثواني اتصلت ام الراجل هذا وبلغاته ان مرته ولدت بخير وسلامه وجابتلا عبدالكريم..

تعرفوا والله من الفرحه اتقول جايني نا العيل.. وتهيالي فرحت اكثر من الراجل.. 😅مشيت شريتلا حلاوه وعصير ووزعناها ع الي خاش وطالع..قتلا ع احساابي..

واااو..عليك يوم والله م ننساه..
وجميلا ع رقبتي ..

تبادلنا الارقام وقتلا تبي اي شي غير اتصل بس..

# والله ياناس فرحتي م تنوصف
مش مصدق مزلت بس في رااحه غريييبه جواتي الحمدالله❤️

ومرن ليام وتم الشهر
وقعدت انراجي ف موعد انزول الراتب..

لين جا يوم الجمعه.
واتصل بيا الراجل قالي
يوم الاحد عدي للمصرف وأسئل ع واحد ينقالا(فلان الفولاني) وهوا عارفك واموصيه عليك..

معش عرفت شنو صارلي والله الفرحه هذي غطت ع كل تعبي والسهر وتمنيت امي قاعدا راهي دعتلا..ديمه دعاء الام غير❤️

وفعلا. تعينا ..نا و..بدر فالصحه😍
و نجوى فالتعليم🥰
وندى راتب اقل لان من ذوات الاعاقه
سجلها..بس معلش ..نا معاها منخليهاش تحتاج شي💙

ومشيت للمصرف وعطاني دفاتر وسحبت لي ولخواتي❤️💛وبدر

وعينكم م اتشوف مهاب وهو فرحان

خطمت عالسوق وشريت الي عمري م قدرت نشريه.. وجبتلها فاكها وحلو من النوع الغالي..

وروحت الحوش وفرحتها معاي وكلمت بدر وياما دعتلي امه بدر ودعت لراجل..

لان بدر شبه ان حالته كيفي.

وكلمنا نجوى وقنالها.... وفرحت.. بس قتلها متقوليش لراجلك..

لان واطي هو عارفه مش ح يهنيها لو عرف ب موضوع..

المهم تعشيت نا وبدر وامه وندى..
وسهرينا لين قلنا بس..

والحمدالله ع الفرحه والشي الي صار💛🥰😍❤️💙

منبش اندير دوة العمى بعد ربي كرمه بالنظر وشاف كسر عكازه الي واقف بيه كان

منبش نخسر شغلي الي توا فيه عشان راتب..
لا بنشتغل هكي وهكي لين نعرف روحي ايش نبي اندير لقدام😍😍

بعد ايام مشيت شريت دبش جديد
لان والله كنت حارم روحي عشان الاهم والي هو الحوش ولوازم والمرض لقدرالله.

مشيت جبت كم حاجه هك..
ونطت ندى قالت نبي حتى نا..
قتلها باهي
كلمت ندى ..نجوى عشان نشيلهن مع بعض...

ونسقن بعد هذك شاورت راجلها
وشلتهن... وجبتلهن عشاء من برا..
وكان اول وجبه ناخذوها من المطعم..

#في حد ح يقولي كيف تشتغل شغلين ومش قادر توفر لروحك شي..
صح كنت نشتغل بس راتبي كلا والله اندس منه ونصرف منه للاساس الاكل والشرب..
وانتم عارفين كيف الاسعار دايرات.

ولما ربي كرمني دلعت روحي وشفت خاطر البنات💛..

ومشت حياتنا احسن الحمدالله
وتحسنا للافضل اشوي..

ومنسيتش الهبله هذك.. وشريتلها هديه وخاتم وعطر وبدون مناسبه عطيتهن لها ف حوشنا قتلها تعالي نبيك عندنا😁
وكحلتها وعطيتها هديتها بالمقابل قعدت اتثرثر ع راسي.. تحكي واجد صدعتني😅 معلش..بنتخملها..

مهبوولتي🤗🤗

وفاتن ليام والاساابيع..

وبوي عرف ان نحن حصلنا تعيين بس كيف عرف مش عارف سمعها من برا.. جا ايعاااتب بس بدون م يورينا اللسان هذن..

بعد ايام كلمتني ندى واتقولي نبي
لبشاارا ..ح تقعد خااال😍😍 بعد9اشهور

نا..😳يعني بيجينا فرخ اصغير انكسد عليه وانطلعه معاي لشارع

ندى..قصدك😤بنوته نلعب عليها وانديرلها شعراتها وناخذا نا..

نا..😤 ف عينك..عيل نا نبيه عشان نطلع بيه لشارع وانعلمه العرايك

ندى..عدي روح بنت خير اتونسني😤

والله بعد وقت انتبهت لروحي كيف مصغر عقلي و انتعارك مع ندى ع شي ربي العليم بيه شيكون❤️

هزبت ندى وهي كسدت علي وضحكنا ع بعضنا وصكرت..
كنت ماسك يومها ف مستشفى..
فرحان بنقعد خال..😍😍
رنت نرجس كسدت معاها اشوي. وحكيتلها وصكرت...

والدنيا ماشاءالله ضاحكتلي وقتها
ووين م نبرم نلقى فالخبر الزين والحاجه الباهيه...لين والله مستغرب من الوضع.. ونحمد ونشكر ف ربي..
بس نتمناها الخير والحال يدوم

بعد مده من شغلي ف بواب ع المستشفى ونسعف معاهم مرات ف ساعه الحوادث وغير هك انحب الشغله نا وعندي خلفيه عليها ونسأل ف الممرضين..الي نكسد معاهم مرات
وبدين نعرف اكثر عن قبل..

ف قلت نسجل ف معهد تمريض
وقت اقل.. واسرع واحسن إلا دراستي السابقه السنه اتمر عليك سنه جديات365 يوم كأني نقرا فيهن كلهن..

ومشيت سألت ع موعد وامتى يبدوا وشنو المطلوب ودرت اللازم..

بعد مده بديت نا فالمعهد تمريض❤️
وبدت ندى ف اخر سنه لها
وبدت نرجس ف سنه لخره..

صرت نمشي ف صبح نوصل ف ندى ونرجس..مع بعض

والمرواحه يروح بيهن خو نرجس المتوسط.

اول فتره هكي بعدها اشتركن ف حافله...بعد م زبدت ع راجل قبل م يمشن معاه.. 😁

والحمد الله الوضع تحت السيطره
والدنيا ضاحكتلي مزالت ❤️
وبديت ف معهد نا ومعاي بدر و2 اخرا نعرفهم..

المهم..شغل صبح سيبته ودرته عشيه..
نطلع من العشيه انروح انغير وناكل وانرد للمستشفى..
وهكذا❤️❤️

ومشت الحياه..
وبوي معش قعدنا نمشولهم واجد
وهو معش دور بالحيل

مرات يجيبهم ويجي ومرات معش نسمعوا عليه شي

وع حد علمي كان داير محل قد الحال يشتغل فيه
بس توا قاعد عطال بطال عايش ع راتب بس

عدن ي ليام وجا عيد الاضحى..
ويعتبر هذا اول عيد ليا نا وندى نشرو فيه اضحيه.دوبنا

قبل ف العيد ف حياة امي نجيبو

بس بعد موتتها لليوم هذا كنا منضحوش..لان الحال دوب الدوب

توا عطانا ربي وشريت دوب افلوسي..

وجبت م يتبع ..وضحيت نا واختي برواحنا..

وحسينا ب طعمت العيد هالمره

قبل يوم العيد م نقبله بكل عشان مكنتش نقدر نوفر زي غيري اضحيه
انحسه يوم ثقييل..

المهم ضحينا وحولت جزء ع جنب نبي نعطي منى جار لنا المسكين معندش حتى هو من يومه..
وديمه جيران ايلمولا اشوي لحم ويعطوه..

الحق اذكرته وما نسيته ومشيت عيدت عليه قبل حتى م نشوي والله وعطيته الي فيها النصيب..

ثاني يوم..جتنى نجوى وراجلها مبش يجي ايتغدى..ف عقلي ملح ريت هالنسب الي رافع خشمه بيه..

قعدت مع خواتي ودرنا جو سمح.. وجو جيرانا وحسيته عائله جديات..

والله العيد بلا عائله مينفع بكل

بوي مع اعيالا مدورنش..

وشوينا وكلينا وابصارا وضحك ولعب..

ف ليل روحت نجوى..

بعد اسبوع. وردينا للدراسه واشغالنا اترن علي نجوى ف صبح بدري واتقولي عقبلي مفتاح الحوش عند جارتنا نبي انجي ناخذ حجات مالحوش
ندى عندها محاضرات..

قتلها باهي.. ومفكرتش ف شي بكل..

ونا طالع سيبت مفتاح عند الجاره..
ومشيت

ع ساعه1 هك.. اترن علي ندى واتقوووولي..........

نا....
🔥🔥🔥🔥🔥🔥😳🤬

#يتبع
#shosheta..

الحال عمره م دام زي م يقولو..
والدنيا مش ديمه تسكرها قدامك وفي نفس الوقت مش ديمه تضحكلك..

ي ترى مهاب مزالت الدنيا بتضحكلا اكثر من هكي..
ولا المسكين توا يبي ياخذ الوجه الي ديمه يلقى فيه من الدنيا..

ووو ندى شنو قالت ل مهاب..خلاته يشيط ويعصب هكي..

وليش بدر صاحب مهاب ح يكون ف المستشفى..

شنو اتقولوا انتم..

تفاعلو معي.. ف الي صار ف حلقة اليوم والحلقه الجايه وشاركوني ب تعليقات مليت وانا انقول ملصقات وتم لا منبيهنش..

نتلاقوا السبت ف حلقه الجديده
ليلتكم❤️❤️❤️🔥🔥🔥


لقراءة باقي حلقات الرواية : اضغط هنا 
google-playkhamsatmostaqltradent