رواية نقيض بلهفة عاشق الحلقة الثالثة عشر 13 كاملة

 رواية نقيض بلهفة عاشق الحلقة الثالثة عشر 13 كاملة

رواية نقيض بلهفة عاشق الجزء الثالث عشر 

رواية نقيض بلهفة عاشق البارت الثالث عشر 

رواية نقيض بلهفة عاشق الحلقة الثالثة عشر 13 كاملة


رواية نقيض بلهفة عاشق الفصل الثالث عشر

رواية شاب واقعيه
#بعنوان_نقيض_بلهة_عاشق_الحلقه_الثالثه_عشر_للكاتبه_shosheta..


#عجبني تعليقاتكم ع مهاب وكيف ان مرخش بوه ووقف مهاه

والكلمه لكويسه بحد ذاتها اتريح واتفرح❤️ شكرا للي علق ب شي من هالقبيل.

قراءه ممتعه🔥🔥

ف العشيه جبت قهوا يبنها البنات..

وبعد اشوي جت ندى ردت الباب.. وطلعت فتحت باب الحوش..
نسمع في حد جا بس مش عارف..من..

ندى..بس نسمع ف صووتها تبكي..
وبعدها نجوى...

كنت اندخن ف مربوعه جوا نا...

كملت دخان وقاعد مع روحي وجوي مش تمام بكل..

طق الباب..
ندى..مهاب

نا..نعم كنك..
هي....في من يبي يعزيك..

نا..من..💔
هي..هنادي

نا...سكتت

هي..هنادي تعالي هي اهو مهاب..

صبيت نا وعدلت جاكيتي... وراسي ف الارض.. ونفضت روحي..

ندى..خشي خشي..

جت..هي..هنادي... السلام عليكم

نا..وعليكم السلام..

هي..قربت ومدة يدها.. وقالت..
عظم الله اجرك..

نا..ارتبكت ورديت واعيوني لا شعوريا قعدت عليها..حتى كل م انزلهن نلقى روحي انبحت فيها

هي..كيف حالك اليوم ..اشداير..

نا..الحمدالله كويس..

هي..يدوم حمدك وربي يصبركم ع فقيدكم.. كلنا لها..

نا..طلعت مني تنهيده تتبعها الحمدالله ع كل حال

ندى طلعت..

وانا واقف ف نهاية مربوعه
وهي وخرت وقاعدا عند الباب..

هي..شد حيلك..عندك خيتين معندهنش حد فالدنيا بعد ربي غيرك..

نا..ف داخلي..💔😔

هي..الفقد مش ساهل عارفه بس الواحد يصبر نفسه ويصبر الي معاه وإلا مش يلقوا بعضهم هكي..

نا..ان شاءالله..😔💔 ومعش بحتت فيها..

ندى..جت حكت اشوي وعدن جوا

قعدت ف مربوعه بس مش عارف ليش حسيت ب راحه..
شعور جاني وكأني كنت شايل شي وطلقته..

بعد المغرب جوني وحدين من المستشفى يعزو في..

وقعدت معاهم وجبت القهوا لهم..

بعد اشوي..شفت هنادي طالعه مروحه..
عقلي معاها مش عارف ليش..
ل لحظه هك استكيت..شردت.. وانتبهت لروحي💔🔥😔..

تصدقوا..بعد ساعه10معش نقدر نقعد واعي..
مش عارف التعب مزلت نحس ييه
ونرقد رقدت بطل والله..

وأيام وااااجد انتكوبس وانحس بروحي تعبااان..حتى بعد نوعا كان نلقى انرد نرقد..

4اشهور ونا 90%كنتهن فالمستشفى واعي راقد منفجع كويس نشرب نصلي ناكل فالمستشفى ..

4اشهور عايش ع رعايش والمستشفى والحالات والموت والخوف الي عشت عليه وطول فيا

خوفي من كل لحظه اتمر.رغم أن عارف الي يبي يصير بس مقدرتش م انتوترش وانخاف..(بوي ف نهايه..ومهما كان فينا داير..يعتبر سند

حتى لو في يوم صار شي ولا مرضت..نلقاه قاعد..مش هكي كل شي توا ف راسي..بروحي😔💔

وهالمره اقوا من الي مريت بيه

في ايام قعدت نحلم ب بوي وامي ف المستشفى ع سريرين وانا بينهم

نجري ع امي.. اتقولي شوف بوك
نجري ع بويا..ايقولي امك خير

وكل مره يتعبوا مع بعض
ويصحوا مع بعض
لدرجة انحس بالعجز معش نقدر نتحرك ناحية ولا حد فيهم

وايام واجد نتهترس وانعيط لشباب القسم وانقوللهم اسعفوه اسعفووه

خواتي يقعدن يوعن فيا عشان نقطع عالحاله الي قعدت فيها..

ومش مره ولا اثنين وعني فيها
ولما نوعا ..نوعا دااايخ ومنفجع..

حتى انتوضى ونرقد انتكويس
شي ملاحقني..
قعدت مضاايق ...حاجه ع صدري غاامه...

ليلتها ساعه 9 رقدت بلا عشاء
اوعيت ساعه 3...شاهق من نومي
فتحت الروشن مزلت مضااايق..

في حاجه مضااايقتني مش عارف شنو..

لقيت روحي طالع من مربوعه
فتحت باب الحوش.. ومشيت عند
هل بدر وانطق عليهم بكل قوتي..

ططقطققططققططقططققق

طلع الاب و اولده..

نا..ياعمي كلملي بدر بالله عليكم كلمولي بدر نبيه..
بدددررررر يا بددددددددرررررر

دفيتهم وخشيت من باب ونا نعيط بعلو حسي.. بدددددددررر تعال
اطلعلي يابددددررررررر

بوه.مسكني..(لف عليا)..قول لا اله الا الله قول لا إله إلا الله..
استهدى بالرحمان... بدر مش قااعد..
بدر ميت ي مهاب كنك ناااسي..

نا...وقتها زي النار واالعه ف صدري
نا اندف ف بوه ونبي انخش لدار بدر
وهوا يضبط في ويقولي والله بدر مش قاعد.. مهاب كنك مش واعي انت..استهدى بالله ي مهاب مش هكي..

م اقتنعتش...
خش اخ بدر صكر ادير صبايا وطلع قال لبوه خليه
يخش لدار مش يبي بدر.خليه يخش لداره..

وطول فلتت روحي منه وخشيت..

وصلت ف نص الدار لقيتها فاااااااااااااااااااااااااضيه💔

فيها خوه هذا مفرش يرقد فيها

#وهذي اول مره نخش لحوش هله بعد موته ( بدر ) 🔥💔

بحتت ف دار زييييننن وفعلا بدر مكنش قاعد..😔
حسيت بروحي انكسفت..انحرجت..
كنت ..🔥🔥🔥💔💔
خشيت وفي عقلي بدر
قاعد ونبي نمشي انوعيه نبيه

بس الواقع بدر متوفي..ومزلت مش مستعد نقعد بروحي ونكتم ومنلقش حد جنبي

(الخوات مهما كانن مش زي الصاحب.
مش ناقصات هن تحكيلهن ضيقتك
وتشغلهن عليك)

طلعت من الدار وراسي فالارض

اعتذرت منهم ع الي.درته.. والله اتقول مش نا بس الشخص الي دار هكي..

وطلعت بالخيبه الي مكنتش نبيها بكل..

و روحت للحوش
خشيت افراشي وقعدت بروحي..

حسيت بحاجتي له😔..قتلكم من قبل رفيق عمري/هو الروح ونا الجسد..

هو الي نمشيلا💔نطلع منه ❤️

بس توا كلا هك💔وهك💔وهك💔وهك💔🔥😔..

ودمعتي كل م تنزل نحولها..نمسحها منبيهاش..منش وليه نبكي..منبش نضعف منبش نبكي...

بنلهي روحي بندير اي شي فتحت ألموبايل ..

وكانت ف رساله معلقه ضمن رسائل الي جني من الكل و من هنادي(دازتها قبل م ايتوفى بيوم )بتطمن فيها ع بوي..

كتبتلها(الله يرحمه.مكنتش فاتح نا.
وطلعت من واتس

اشوي. وجت رساله..

هنادي..ولا يهمك..رساله قديمه.. وربي يغفرلا..

نا..اللهم امين

هي..كنك واعي توى.. انت بخير

وكأن سؤالها نغزني ف صدري

سكتت😔

هي..سامحني ع سؤالي.. مش قصدي ندخل فيك..بعتذر منك .تصبح على خير..

دقيقتين وانا انشوف ف مسجها وحاجه خانقتني وبتطلع من رقبتي نحسها الخنقه

اعيوني يغبشن من الدموع..ونكذب ع روحي وانقول لا مبكيتش ومنبش نبكي ومنبش نضعف مش ضعيف
نا..

بس قلبي نطق ورغبتي م سمعلها

قلبي..كتب..

نا..ردييت ..مضايق

هي..سلامتك من شنو..

نا..

هي..مهاب انت تبكي..؟؟

نا..
هي..مهاب..انت كويس..رد عليا

نا..نعم..ااه كويس.. مضايق بس
هي..مهاب

نا..نعم.
هي..تبي اتريح ابكي..

نا..
هي..صدقني..الضيقه الي تحس بيها من الضغط الي انت كنت فيه..
ابكي عشان الي جواك مضايقك يحول ..الكلام صعب يطلع بس دموع يطلعن كل شييي..

نا..💔نبي نحكي حجات وااااجد
بس مش قااادر شي مانعني..

هي..معلش عادي م قتلك ف لبكاء راحه.. ومش غلط لو بكيت عشان اتريح.. مش فرض تحكي شي

وقتها كنت نبي..بس انكااابر..
وياااريتني اقدرت..
لقيت روحي ضعفت ومعش قدرت قعدت نبكي..💔🔥

وكل م نبي نهدي روحي ونسكت
انزيد.. لاذان الفجر وع وضع هذا ومعش رديت عالبنت
وصكرت عليها

اذن الفجر..سمعته وكنت نبي انصبي انصليه..لقيت روحي راااااااااقد مفش حيييل

◇◇◇◇◇◇◇◇◇◇◇◇◇

#shosheta

عمرها م كانت بكية الراجل عيب
ولا ادل ع عدم رجولته ولا انعدام شخصيته..

بكية الراجل ادل على حجم الثقل الي شايلا.مش ع ضعفه

والدموع صح شي بسيط هن
بس قادرات انهن ايريحنك..
بدون م تحتاج لحد تحكيلا ولا تنذل قدام حد وانت معروف شنو

لما اتكونوا محتاجين اتنفسوا ارخوا ارواحكم متكابروش وانتم من جوا عباره عن (شي هفو..هش)يتكسر بكلمه..ولو بكيتو عادي تأكدوا انكم ثاني يوم ح اتكونوا اقوا من اليوم ب 100مره..
ومستعدين اتواجهوا واتكملوا من جديد بدون م تلقى روحك داير شي ف لحظه ضعفك ف ليلتك الصعبه

》》》》》》》》》》》》》》》》》》》》》》》》》》

مهاب..بدون م يقدر يقاوم أخرا انهار بكىِ(بكاء)..ولان كتم طول فتره العزاء وملقش الصدر الحنون الي يطبطب عليه
بكا ف الايام هذن بعد م خف التعزاي
وبعد م لقى روحه بروحه..
وقعد تعبان نفسياً/وفكرياً..

بكى ليلتها.. وصبح الصبح و وهوا اكويس واحسن من الليله الي مر بيها

فطر مع خياته..وصبى لروحه..
ودوبه تحسن نفسياً بدت زوجة الاب ف المطالبه ب حقها..
》》》》》》》》》》》》》

#هو

بدت مرت بوي ادزلي تبي رزق بوي..تبي راتبه
تبي افلوسه الي معقبهن.. تبي حوشنا..تبيني نقسم الورثه

الشخص الي جاني رديته قتله معندش لك شي ..وتهيالي المرحوم مطقش 40يوم بيش مرته تطلب هالكلام..

دزتلي اخرا صكرت الموضوع
درت دزت ثالث مره ع مدار اسبوع واحد قتلها قبل السنه متلقش مني شي وفوتيني..

مش عارف كيف هل بوي سمعوا بالموضوع ولقوني شاب بروحي يقعدوا يقولولي قسم الورثه نبو حقنا.. ولعنت امته بتقعد ساكت وواخذ كل شي

وقعدت ف صراع بين مرت بوي
واسيادي.. ع الي عند بوي

وكذا مره انقوللهم قبل السنه م اتكلمونيش..

لين جا يوم وطق الباب جيت فتحت.. نلقاها مرت بوي

خشت وما عقبت م قالت واطلبت
قتلها بيش تفهمي قتلك ف وصيه والوصيه مش ح نفتحها إلا بعد السنه
الي ميت بوي مش قطوس

بعد اعرفت في وصيه زادت اتلاطع في وتبي الوصيه هذا.. تبي تاخذها مني... وقالت نا الاحق بيها اتكون عندي ..ام اعويله ومش عارف شنو

انقنها زعمت كبدي ب الأخص بعد مواقفها ف عزاء بوي.. وفوقها م مسكتش عدتها عليه وبعيد عن الشرع (لدرجه هذي بوي ميسوش عندها شي وهو الي كان مفضلها علينا هي واعيالها معقولا حتى العده م مسكتها )) انقني مسحت كبدي فيها
ولزيتها...

بعد يومين لقيتها شاكيه فيا فالمركز
ومتهمتني ب اني واخذ افلوس بوي بروحي. وهي و اعيالها معطيتهمش.
وتعديت عليها..

وانحبست 3ايام بدون م نعرف شنو داير..

كلموني للقسم بعد م دزيتلههم ان وراي عائله وميعلموش علي عطوني حتى تليفون نكلمهم بس
دخلوني للغرفه وحكى معاي المسؤول ..
وقالي شاكيه فيك فلانه الفلاني..تعرفها..

نا..مرت بوي تقعد..والحق تفاجئت مكنتش مفكر انها توصل بيها تحبسني..

المسؤول..قالي شكوة الميراث وقالت اعتديت عليها..

نا..راجي اشوي..اعتداء معتديتش هي جت وهانتنا وسط الحوش وان وكالين الحرام وخذيتوا كل شي لكم قالت..

قلت للمسؤول نا مغلطتش فيها إلا بعد م هي غلطت فينا وحكيتلا بالتفصيل..الي صار وقتله ع قصة الميراث وحقي نفتحه الموضوع بعد سنه الي متوفي بوي مش اب حد

المسؤول كم له بوك متوفي
نا..مطقش حتى الشهرين..
المسؤول..من عندك فالحوش امك ومن..

نا..لا امي ميته لها اسنين عندي اختين بس

المسؤول..الله يرحمها وانت المسؤول عن خواتك.. هل بوك وامك وين..

نا..ميتين كلهم
هو..ميتين؟؟
نا..تأففت.. عايشين بس محد يدور إلا ساعة الموت يجو يجارو بس

المسؤول.. وبدا يسأل.
نا. لو الاسئله ميخصنش الموضوع ف اسمحلي مش ح انرد..

المسؤول ..لا لازم بنعرف معلوماتك ينطبقن مع معلومات الشاكيه ولالا..

نا..تمام عطيني فرصه بس بنحكي مع البنات عشان انقوللهم نا وين بس.

وعطاني موبايلي وكلمتهن بلغتهن عشان مينشغلنش

وكمل معاي تحقيق وقعدت من3ايام اسبوع فالحبس..

بعد قتله الوصيه عند المحامي كذا الي قالا لي المرحوم حكيتا كلا له

دزو للمحامي لقوه مسافر هذا الي خلاني محبوس ازياده..

بعد جا وعرفته عن نفسي..
حكى كل شي من بدايه
وكيف بوي تردد عنده وكتب وصيته بعد حكا كل شي للمحامي
ودارلا الازم ووثق الوصيه وقالا حتى بعد م يعرفوها الوصيه تقعد عندك متعطيهاش لحد..

المسؤول قالا احكي شنو قال فالوصيه..

وبما معناه

1.. بوي رد راتب ندى لها..وصارت هي المسؤوله فيه عن راتبها وسحبها..

2.. الحوش الي فيه نحن سجله ب اسمي نا وخواتي فقط

3..الحوش لاخر وضح ان ب اسم زوجته ثانيه ف هكي يكون عدل

4..السياره معروضه للبيع عند( ) والمبلغ الي يطلع ياخذا مهاب.. يسدد بيه ديون لو عليه..

5..المحل الي عنده مأجره قال ينباع وينقسم بالنص.. ولو قعد اقسموا بين اولاد زوجتي الاولى واولاد زوجتي ثانيه.

6..وعنده شقه كان شاريها جديد قبل وفاته بفتره ودفع المبلغ كلا الا《10.000》
موضح فيها انها بعد اتم صيانتها الي مدفوع حقها مسبقاً
متنباعش وتأجر والمبلغ الي يجي ينقسم بين لعيال10..

7.راتبي ينعطى لندى فقط ل غرض علاج الاعاقه التي تعاني منها..
وزوجتي عندها راتب اتكفل هي ب اولادها

8.منش مسامح اي حد ياخذ من الي ترككته للعيال لنفسه (من هلي)
ومنش مسامح اي حد ياخذ حق الثاني بعد م تنفتح وصيتي ويعلموها الكل..


نا..حسيت هم جديد وجاي ع راسي بعد م سمعت الي سمعته

وعن نفسي تمنيته لو م كتب شي بكل لان المصايب مش ح يبطلن هكي..وخصوصا زوجته طلعت ....... ...🤬

المحامي..قال مدام الوصيه انفتحت لازم ايتبلغوا كلهم توا..

نا..يعني انروح نا توا..

المسؤول..متبش اتبلغ ناسك بالوصيه

نا. لا اعفيني والله لاقابلهم ولا قابليني ربي يقدرني واندير المكتوب
خلي المحامي راجل قانون ..يبلغ هل بوي ومرته..

مسؤول بس مرت بوك بعدتها..

ب استهزاء قتله كان مسكتها حني هذك مسكتها مرت بوي هذي..
توصل على الله ي استاذ وبلغهم

واي شي يصير من نقاشات ومشاكل متبلغنش بيه
اي شي ثاني يخص الوصيه والمكتوب فقط نا حاضر.. وعقبتلا رقمي..

واصكر المحظر ع الي صار وقتلا حتى هو امتى م تبيني اتصل بيا وانا انجيكم..

وروحت للحوش وحكيت للبنات الي صار كلا..بيش يصير م يصير يكون عندهن علم

فتحت الواتس و (هالمره فتحته عشان هنادي.مش عارف ليش جت ف بالي وقلت نشوفها عالواتس بعد الليله المشؤومه هذك معش رديت عليها..

ودزيتلها وحكيت معاها اشوي وصكرنا..

بدون م نحكيلها شي ع الي صار.

وعطيت فرصة اسبوعين بنشوف رد فعل الباقي بعد الوصيه م وصلتهم

جت مرت بوي واتحلف واتقولي الوصيه كاتبها انت وداير اتفاقيه مع بوك ولا مع المحامي..بس والله ماني مخليتك اتهنى بيها..

وصارت اتحارب في واتعادي في من بعيد البعيد وادزلي ف ناس
بعد قتلها الي تبيها ديريها وكل شي نا المسؤول ع تطبيقه وتقسيمه والخ

وكل م ادزلي حد نرده

وهل بوي تهارجو مع المحامي وجوني فالحوش قتلهم كيفي كيفكم علمت بيها من محامي.. وتوا بنفذها
تعاركوا معاي وقاطعوني ع اساس كانو سألين علي هم اصلا🤨😏👊🏻

محسيتش فيهم لان من يومي معتمد ع روحي عمري م اعتمدت على حد ولا راجيت حسنه من حد
والحمدالله عيشتي مستوره ودوب حالي وصحتي ورزقي الي من جهدي .

مشيت باشرت فالعمل من جديد بس لقرايه معش قدرت نكملها نفسيه زفته

ومشيت شفت الشقه والسياره والمحل.. وحكيت مع الي مستلمينهن.. وعطيتهم
علم ان الوالد مات ونا ولده..

وبحيث بويا ميكونش عليه اديون
اول شي دورت شاري لسياره..

وخذت حاجة شهر بيش انباعت وحصلت فيها7000د..

وقعدت نلم من هنا من هنا بنوصل ل10.000
عشان انسلك حق الراجل..
شي من راتبي وشي من نجوى..
ندى مقربتش راتبها

وعشان نفتك بدري حطيت راتبي كلا..
ع مدار شهرين واشوي من نجوى والباقي نصرف من راتبها ع حوش..

ومشيت دورت صاحب الشقه ودفعتلا الدين.. وقالي حصلتلك حد يبي اجار ..قتلا توكل وخليه يكلمني
بعد يومين كلمني واحد واجرها..

والمحل عرضته للبيع بيش نفتك من سريبه..
معندش راس للمشاكل..

وحصلت شاري واتي الحمدالله..
وبعته له.. وثبتت البيعه ب اوراق
الواحد ميضمنش شنو يصير بعدين..
خصوصاً الناس صايرين امتاعين افلوس..

خذيت مبلغ المحل وقسمته بالنص
وراتب اول شهر قسمته والله بالنص.
ولميت لفلوس.. ومشيتلها ف نفس اليوم مرت بوي وقتلها ع الي درته بيش يكون عندها علم.(حقها

ف بدايه كلام معجبهش بس بعد م شافت لفلوس سكتت.. وفرحت..

واطمنت ع خوتي صح مش من قلبي شي هذا .بس خوتي ف نهايه..

وقتلها تبي شي كلميني.. وب نيه قلت كلامي..ويعلم الله

وروحت.. وكنت متريح وفي بالي ان الهم الي فالوصيه بنحاول ع قد م نقدر نخفف منه منبش يقعد ع رقبتي طول العمر ..

ومع مروش الشهور الي فاتن والي
توا
والي رديت فيهن للعمل..
لين وصلت لليوم هذا..

قلت انكمل السمستر الي وقفت عليه ف مرضت بوي الله يرحمه
و ب الاصح مشيت وعدته..
وقعدت بين شغلي فالمستشفى
وبين دراستي
وبين خواتي والحوش..

والحياه مشت تمام الحمدالله

غير راتب ندى الي بعد ردها لها بوي نززلها شهرين وانقطع وعليما جريت عليه يقولولي في لخبطه م لخبطه وكل مره كلمه شكل وسبله شكل وجيب ورقة كذا ورقم كذا..
لين كبدي زقت ومليت غميت عالموضوع..

وهكذا كنت ماشي.. وبديت ننسى ف الايام الصعبه المره المتعبه..
لين جاني اتصال من نرجس وقالت فيه...

🔥🔥🔥🔥🔥🔥🔥🔥
#يتبع..
#shosheta..
الاب ف وصيته حاول ايرد احقول وحاول يعدل بعد مماته ف الحجات الي سيبهن وقسمهن بين اعيالا..

هل زوجته الماديه الي تموت عالقرش ومستعدى تاخذا بالحرام..
هل ح اتسيب ارزاق اليتامه(مهاب وخواته..

ولا ح ادير لعبتها وتقلب كل شي وتاخذا لصفها..

نرجس..ياااانررجس تتوقعوا شنو تبي بعد هالوقت وهي حتى التعزايه م عزاته ف بوه متصله ب مهاب ساعه2..بالليل تتوقعوا شنو بتقولا...

ومهاب هل ح يسمع منها ويرد ع كلامها ولا اتقولوا هوا تغير وح يفوووتها؟؟

#بعرف ان حلقه اقصيره بس برضوا
حلقه اقصيره تتبع الي فات خير من تأجيل..❤️❤️

نتلاقوا بكرا ف باقي الاحداث والي ح اتعجبوا من الي فيها..
تصبحوا على خير وليلتكم😚😚


لقراءة باقي حلقات الرواية : اضغط هنا 
google-playkhamsatmostaqltradent