رواية نقيض بلهفة عاشق الحلقة الثانية عشر 12 كاملة

 رواية نقيض بلهفة عاشق الحلقة الثانية عشر 12 كاملة

رواية نقيض بلهفة عاشق الجزء الثاني عشر 

رواية نقيض بلهفة عاشق البارت الثاني عشر 

رواية نقيض بلهفة عاشق الحلقة الثانية عشر 12 كاملة


رواية نقيض بلهفة عاشق الفصل الثاني عشر 

رواية شاب واقعيه

#بعنوان_نقيض_بلهفة_عاشق_الحلقه_الثانيه_عشر_للكاتبه_shosheta..


شوفوا العبره من كل شي صار ف حلقه اليوم..


صح الاعتذار المتأخر خير من الي ميعتذرش بكل..

وصح الاعتذار المتأخر ميردش حق كل الي فات

وصح الاعتذار المتأخر ميداويش الكسور والجروح..


بس لما يكون الاب بينا وبين الموت شعره..

بطبيعة القلب الطيب الحنون

بطبيعة التربيه الزينه ح يقبلوا الاعتذار❤️🤚🏼💔.


بوي.. مكنش مسافر لمصر

ولا كان ف نفس المدينه..

هو سافر لمدينه ثانيه عشان يطمن على .......


تعالوا نعرفوا🔥🔥💔💔


هلبن4ايام وطق الباب ليلتها ساعه12بالليل..


صبيت فتحت لقيته بوي..

نا..😳..ك كيف..مش ف مصر انت


بوي.. لا مشيت لمكان ثاني وجيت


وخش..


هو..خواتك وين..

نا..راقدات..


هو..خش وعيهم وتعالو نبيكم..


نا..عليش كنك شنو في..


بوي.. بصوت هادي قال خش وعي خواتك وتعالوا لدار نبيكم ف موضوع ضروري..


نا..قلبي مش مطمن


مشيت وعيت البنات وجيت نا وجن بعدي متفاجأت كيف بوي روح

واكيد جيته ولمته لنا مش ل الله


جن وايديهن ع اقلوبهن باينات متفاجأت وخايفات


بوي.. تعالو قدامي انتم الثلاثه


نا والبنات جينا..

بوي.وجه اسود ويحكي ب تقطيع


بوي..نا قبل م انخشلكم ترردت وااااااجد..ولي ساعتين قاعد واقف عند الباب مقدرتش انطق ع بابكم


نجوى..عليش ..شنو في


بوي..متقاطعونيش خلوني نحكي..

ويمكن هذي اول مره نحكي فيها معاكم ونا ب نيه جايكم وقاصدكم..

ويمكن ح اتكون المره الا.. الا..الاخيره💔🔥


نحن..😨😳

نجوى..اشقصدك ي باتي..


بوي.قتلك متقاطعينش خليني نحكي


نا..نجوى خلاص اصبري بنسمعوا


بوي..خذا نفس.. وقال نا.مكنتش ف مصر...

نا كنت مساافر عشان شي معين

ومشيت درت اللازم وجيت وللاسف

روحت بنفس الظن الي مشيت بيه


نا..بدون م ننتبه..(قتلا اشقصدك


بوي..يعنى مشيت مع واحد صاحب.

لمدينة..( )

عشان نتأكد من سلامة الاوراق الي عندي.. والي هن مجموعه تحاليل وفحوصات درتهن هنا بعد مرتي وعدتهن مرتين

وبرضوا غادي عادوهن لي بعد م الدكتور سألني وطلب مني صور ل وطلعن نفس النتائج💔😔


وبتردد قال....(واقلووبنا يدقن)


قال..عندي سرطان فالكبد


نحن...😨😨😨😨😳😳😳😳😳

بوي...وانتم اكبار توا وتعرفوا شنو يعني الامراض هذن مش داعي نحكيلكم..

والي نبيه منكم..

اتخلوني بينكم لييييين....😔 وسكت


البنات ايتباكن.


نا..

بوي..وهالمره منبش نفرض عليكم..

قبل م انجيكم كنت عند( )#زوجته_الاولى.. وقتلها ع الي صار..مبتش تستقبلني وطردتي من حوشها..


قالتلي مش خاصني امعاناتك امشي لضناك ايعانوك .دوبي دوب اعيالي نا.


وجيتكم وعيني فالارض..

منبيكمش تشفقوا عليا ومنبيكمش اتجو ع انفسكم عشان مرضي نبي منكم تخلوني بينكم بس لو كنتوا موافقين ع قعدتي بينكم...


بوي..بغصه قال..عارف روحي شنو درت فيكم وعارف اني قصرت ف حقكم ياما... وعارف اني مدرتش فيكم خير بكل حتى تذكروني بيه بعد..بعدد..ب.ب..بعدد موتي😔💔


بس مكنتش عارف نهايتي هكي..

طول الطريق ونا مع صاحبي وفي عقلي مع من بنقعد.. من بيتحملني..

خاايف نموت وانا بروحي..

خايف حتى نرقد صرت..

خايف حتى نقعد بروحي ف اي مكان...

خايف من كل شي..

خااايف من عذاب ربي لاني مش داير خير ف ناس واجد واولهم ام..امم..امكم..وقعد يبكي هو..


معش قدر يكمل كلامه وانهار..بروحه


#تعرفوا بعد كل شي..صبت ندى حضناته.. وقعد يبكي اشر من ابكا الصبايا والله..


لقيت روحي نبكي ..بس راسي فالارض منبيش انبين..


نجوى تبكي


وندى مبكتش بعد حضناته.. قعدت اتسكت فيه.. وهوا كل اشوي يزييييد


بوي..عمري ف فكرت اني ننكسر لحد

طول عمري نتقاوى عالكل.. واكثر الناس امكم..الي كانت متحملتني وعمرها م عابت في ولا ردتني ولا كسرت كلمتي...

ايش م اندير فيها..شايلا وساكته مني..

وكل مره نلقاها ترحب بي وانقول عليها الوليه البارده الي مبت تشكي في ومتحملتني وقاااعدا..


حتى لما وصل بيا اني نضربها

تحملتني..

ريتها انقطعت يدي ولا مديتها عليها..

وقعد يبكي..


نا..بعد كلمته بديت نذكر ف كل موقف مزال ف راسي من ضربت بوي لامي..

وكل اشوي..نحس ف ضغط راسي يزييييييييييد


وخرت لاوره... وغطيت ع وجي ونسمع ف بوي وفي بالي امي..

الي والله كنت م انتحمل فيها حتى خرته وإهانته لها مش ضربها ووجعها


وياما حكى هو.. وقعدنا للفجر ورقد هو


بس م رقدنش نحن..


كل واحد فينا قاعد ف مكان وواعي


دوب حطيت راسي ساعه7صبح بعد حسيته اثقل من جسمي قعد وحتى دخان م دارلي شي.


رقدت...

ساعه9كنت واعي وكأني راقد لي اشهور..


وعيت مشيت شفت بوي لقيته مش قاعد..


وعيت البنات وسألتهن عليه قالن محسينش بيه وهو طالع..


خشيت ادوشت ولبست وجيت بنطلع بنمشي اندوره مش عارف عليش قالي عقلي دوره..

نا كنت طالع بنفتح طق الباب لقيته هو (جاء)..


نا..وين كنت شغلتني عليك


بوي..اطمن مزلت م طحت بيش تنشغل عليا..


نا..


بوي..عندي شغل درته.. وخش

جيت وراه وهوا يعيط للبنات ويقوللهن حطلي فطور بنفطر معاكم

وحسيته رااايق.. سألته لو في شي

قالي لالا مفش..


قعد نفطر بس عيني محولتهش من عليه نبي نعرف كنه شنو صاير


متقولوش هو بوي الي امس كان يبكي..


ثاني يوم برضوا طلع فالصبح بدري

وثالث يوم ورابع....

بدون م يقوللنا وين ماشي ولا شنو داير..


وفي كل مره كان يبي يلمنه حواليه بس مش قادر ينطقها..


#حسيته زي الي بيقول

ايام ونا صاح نبعد فيكم

وبعد اقريب نموت بنطلبها منهم

يسكت وخلاص


بس هالشي فضحه اعيونه وكلامه

البسيط وعزومته ع الفطره معاه وتغدايه..


مكنتش حاب نكسر بخاطره وع قد م نقدر كنت نحاول نقعد معاه


بعد طلعته قعد باقي الاسبوع ف الحوش ومرا مرا يكلم من رقم نجوى ف رقم معين ويحكي معاه ف مدخل الحوش ويصكر ويحذف الرقم.. وخلا الموبايل عنده

ويكرر فالشي كل يوم يومين هك لين كمل شغله وعطى نجوى موبايلها

[


: واشوي اشوي قعد يقول بنمشي نشوف هلي..

خوته وخواته..بس تردد واااااااجد وبطلها..


بعدها بكم يوم وعى فالصبح وقال بنمشي نشوف لعيال لخرين ونطمن عليهم..


وعدا وخذا الي فيها النصيب ومشى

روح بعد ساعه وجه ميتفسرش


روحت ف ليل نا..

قاللي البنات بوي من مرواحته وهوا ع وضع هذا حتى اكل مبش..

خشيت نحكي معاه مبش يقولي كنه حاولت واجد مبش..بس عرفناه من زوجته وضعه هذا..


ومر اول شهر وبوي صحته اكويسه نوعاً ما... وياما قتله نمشوا نعاالجو وانشوفوا ديكاتره بس هو راافض


شهر الاول تمام.. ودخان من60طرف قعد يالله5\10 يدخن..هك بروحه..


ثاني شهر بدا بوي يوسوس.. ويخاف زي العيل الصغير...


هو..ارقدوا معايا متخلونيش بروحي

وايام يجيني فالمربوعه يرقد معاي اندير ف روحي منتبهنش عشان منبش نحسسه بالاحراج والشفقه ع حالته..


قتلكم قعد زي العيل الصغير كان اتشيلا ف غمرك ميقولكش لالا...


في يوم وعانا ف ليل وقعد يحكي معانا..


بوي..عارف روحي بنموت وعارف ان قريب مش عارف امته بس نبي نشبع منكم بنحس اني قعدت معاكم..


عارف ان تحملتوني واجد بس نبيكم معايا ع الاقل الفتره هذي بس...


تعرفوا..امكم ربتكم احسن من اعيالي لخرين..

لما قعدت مع روحي اذكرت اني عمري م علمتكم حاجه ..


وكل شي فضلته عليكم وعطيته لمرتي ثانيه ولعيال بس مش باين فيهم شي


امكم عرفت اتربيكم..بس نا معرفتش انربي خوتكم..😔🔥💔


ديمه كنت نهرب من حوشي لاخر

وانجيكم هنا...


ديمه حوش امكم هادي ونظيف وريحته كويسه..


كنت كل م انخش للحوش هذا انتريح..مش عارف ليش..

يمكن لان امكم كانت فيه💔🔥😔


تصدقوا لما نقعد نذكر اين شي خير درته ف حياتي ملقيتش...

كل شي سلبي وغلط فغلط..حتى خوتي..علاقتي بيهم زي البراني..

عمري م كنت حنون..

وعارف ي مهاب ضربتك وااااجد

وانتي ي ندى..بس والله م عندي عذر انقولا لكم انبرر بيه ضربي وكرهي لكم من قبل..

سامحوني..كنت معاكم مش كويس بكل..


◇◇◇◇◇◇◇◇◇◇◇◇◇


وايام يوعينا وبدون م يحكي شي يقعد يقول خلوكم واعيين مرات الموت يجيني وانتم متحقوش متخلوش ياخذني..


ومن هالايام وبدا بوي مش تمام..

لا صحه ولا عقل..


قال منبش حد يعرف ب مرضي..او يسمعوا فيا هلي وايديرو فيا زي م درنا ف امكم زمان 💔🔥


متخلوهمش يعرفوا امانت الله عليكم منبيش حد يشمت فيا😔هلي عارفهم


ومرات.. يحكي ف كلام منفهموش منه شي..


ومرات يقعد يقول خاطري ف الاكله هذك ديروها لي.. وياكل منها وكلت الجعان الي له كذا يوم مش واااااكل


ومرات ميبش ياكل ويخش ف روحه..


واشوي اشوي صحته بدت توخر يعني بدت اتسوء.. حتى لما نطلع من الحوش نكلم فالبنات كل اشوي..

منشغل عليه لان مش عاجبني..


ودوبي دوب الشغل وانروح بسرعه معش انطول برا..


وهكذا لين ساء الحال..معش فيها

قعد يدور فالاكسجين..


خذيته وطول سعفته.. ..وقعدنا فالمستشفى 4 ايام وروحت بيه دكتور الي هنا قالي كويسه صحته روح بيه


قلت الاحسن نمشي بيه لمدينه ثانيا امكانيات احسن وديكاتره افضل..


حكيت للبنات والسفريه اول م تبي افلوس صح..


ونا يشهد علي ربي ماعندي ف جيبي غير70د.


قلت لنجوى شيك منك شيك مني بلكي يديرن حل ع الاقل حق الكشف..


مشيت ل مصرفنا النزيد..

مفش سيوله عليما حكيتلا وشرحتلا الوضع..قالي سامحني سيولا مفش


◇◇◇◇◇◇◇◇◇◇◇◇◇

الله يلعن كل مسؤول سبب ف تأخير رواتب الناس وما عجل بيهن👌🏼

◇◇◇◇◇◇◇◇◇◇◇◇◇


حسيت الي فالمصرف صكرها ف وجي..


روحت وقتلها الي صار..

وخطر علي ذهب امي الشي الوحيد الي ح يجيبلنا مبلغ اكويس

بس للاسف مضطر انبيع بالسعر الموجود نا معندش وقت انراجي يزيد


وبعت كم طرف وجابلي3480

خذيتهن وسافرت ب بوي ومشيت ب الاوراق ودارولا تحاليل...

دارولا دخول طول..بدأ يتعب عليا


قعدت حاجة14يوم وانا نرقد فالممر تبع العنايه ومرات ع كرسي كان حصلت..


وبوي صحته كل مالها فالنازل...


تعرفت..قصدي الحق تعرف علي شبوب غادي جاي مع امه ادير ف عمليه وحكينا وعرف اني مش من مدينته.. ولي ايام قاعد فالمستشفى نرقد ونوعا وناكل ومناكلش هنا..

قالي والله اتروح اتعشى عندي واتبات وثاني يوم انجي نا وياك هنا


ونا نحلف وهو يحلف..

ف نهايه حشمني وخذاني معاه..

بوي راقد وحالته هي هي..

كلم هله الشاب ودارولنا عشاء الله يبارك بس نا والنيه مش سواء..

متنكد ع صحة بوي..

بس تعرفوا عقب رقمي عند الممرضه بحيث لو صار شي اترن اتكلمني..


تعشيت ووخرت اشوي وسهريت مع الشبوب اشوي.. ولقيت روحي راقد رقدت بطل.. والله م نعلم بروحي لحد ثاني يوم ساعه11.


وعيت منفجع..

بوي ف راسي..دوب صليت وغيرت ادبشي.. ومبيتش نفطر.. وشكرته ع المبيت والعشاء وطلعنا طووول للمستشفى..

جيت للمرض وسألته قالي كويس الوالد من امس مفش جديد عليه..


بعد يومين صحصح..

ولا كأن فيه شي..


خشيتلا.. حكيت معاه طمنته..

واطمنت عليه..

قالي روح بيا نا كويس بالله عليك م اتخليني بعيد هكي..دكتور قالي عادي..


نا..كيف سألته من وراي

بوي..سألتهم امبدري..


مشيت لدكتور وحكيت معاه ع بوي

قالي بوك معش له عمر واجد بيعيشه


مزالا ايام يكمل فيهن بس

ادويه معش نقدروا نعطوه لان جسمه ضعيف بكل معش ايتحمل..


طلعت من دكتور ونا كلامه ف بالي..

طلعت بوي ودورت سيارة اجره وروحنا ف طريق..

نذكر قال..


دكتور..بوك اياما معدوده..

وح ايجيه وقت يتعب فيه

ووقت اخرا تحسه صاح مفيش مرض بكل..


وح ايتعرض للنسيان مرات

ومرات يفطنلكم..

نصيحه خوذه لهله..

باتك قالي عندي11 عيل..ف خاطري انشوفهم قبل م انموت..

شيله روح بيه..متعلمش ربي امته يبي ياخذ امانته..


كل م نذكر الكلام حاجه تعصر قلبي نحسها.. ونضااااااايق..


روحت بيه...دااااهش بروحه..

بس طول الوقت يضحك..


سلم عالبنات.. وقعدنا فالحوش يومين..اكويس بكل..+دهشه بس


بعدها اتعب مشيت بيه للمستشفى

وع علق اجهزه وتغذيه وقياس الضغط ونبض القلب الي كل مره يتغير..


والضغط معش انتظم مره يهبط ومرا يرقى..


قعدت معاه فالمستشفى عالق

ي اما عندي توكه وماسك ي اما فاك من توكتي وقاعد جنب باب العنايه


اول ايام اتعب واجد هو ف قعدت نمسك ف توكه24ساعه عالقه

حكيت مع واحد من شباب وقلته عشان بوي هنا ف ناخذ مكانك واندير بالي منه ومن المرضه لخرين مع الممرض لاخر...


وحاجة9ايام كانن من اصعب ايام..حتى انهن اصعب من ضرب من الامور الي صااارن كلهن


تعرفوا شنو الواعره فيها

انك اتكون عارف ان الشخص يبي يموت اقريب.. وفي كل لحظه يتعب فيها وتسمع صوت الاجهزه يصفرن اتهب تجري لناحيته وتقعد تسعف فيه واتشوف كنه

من داخلك عارف ومتأكد ان هو خلاص معش ينفع فيه شي


ومن ناحيه اخرا..مشغول وتجري وم تعقب م ادير متبش تخسره بينك وبين قلبك الي يقولك متستسلمش بوك هذا..حتى لو مريض عادي ارضى بيه المهم متخسرش..

وتهيالي مع كل مره يتعب فيها

تهيالي انقول لا مش توا مزلت مش مستعد نخسرك..

خليك اشويا

وربي م عندي حيل..💔🔥😔


خليك معاي اشوي...رغم م دار فينا إلا ف لحظه هذك مزلت نبيييييه


الشباب فالمستشفى مقصروش وصبو معايا الي ف العنايه وبعد تستقر الحالا يقولولي

روح ارقد اشوي وتريح.. ولا شوف هلك وطمنهم..


فترتها والله متنكد وتاااااعب بكل

نحس ف جسمي متكسر

عقلي مليارات لدرجه راسي اتقول حاط عليه ثقاالا..


نوم منرقدش واجد يمكن ساعتين ناخذ فيهن ب التقطيع كل بعد وقت نرقد اشوي..


يكلمن في بنات انطمن فيهن..


ينقصن علي حجات ونا فالمستشفى.. والله انقول ياريته بدر قاعد..💔

راهو دزيته وجابلي ولا طلقني واطمنت ع بوي ان بدر معاه..



نوصي طاقم العنايا ونطلع انجيب فالناقص..

وتهيالي كل م نطلع من جنبه ننشغل عليه..

نمشي اندير شغلي وانجيه جري

انجيب ف حجات ومسكنات من صيدليه..

نجيب ف دخان..

انجيبلا ف دبش..ونغير نا ودوبه ناكل شي عالواقف ونطلع نجري..


اخر فتره بعت م فضل من الذهب والي هن سلسله ب دلايتها..

واغويشة ذهب من الدق القديم..

وللاسف المبلغ الي جابنا لي دوب م مشى اخر فتره..


تصدقوا حتى الحوش والله معد دورته ولا جبتلا حاجه..


#صعب والله اتكون اليد الوحيده ف الحالا هذي..

ليش قتلكم تمنيت بدر معاي..هوا خوي وسندي هو قوتي الي بدت اتريح مني وتعبت نفسيتي من الي انشوف فيه..


#نصيحه عندك عيل خاويه بعيل لو ربي عطاك..

وكذالك بنت ب بنت..متعلموش لقدام ف ايش تلقوهم.


◇◇◇◇◇◇◇◇◇◇◇◇◇


جبت كل شي طلبه الدكتور مني وعرمته جنبه..


وجبت ل هلي خضره..

وطلعت.. رديت للعنايه


بعد 12 يوم..بوي فتح اعيونه وصحصح وقعد يسهري معاي ومع الي ف عنايه قاعدين.. ويسأل ويقولي امتى جيت ومن جابني..


والصدمه صح لما قالي

《إنت من 》💔🔥

《وعليش قاعد معاي》😔


صح الدكتور قالي يمكن يفقد ذاكرته بس القول مش زي الفعل لما اتعيشه...


نا..نا مهاب ي بوي معرفتنش ولدك نا


بوي..لا معندش عيل نا..انت كذاب..

روحوني للحوش شندير نا هنا..

وحاول يفك الحجات الي ع جسمه ومن خيوط..


ويقول بنروح ..مسكناه نا والي معاي.. وقعدنا نسايرو فيه وقعد يقولا الشاب باهي ي حاج مش ولدك هذا دكتور يشتغل بس هنا..


بوي..فكوني منه منبش يجي شوري يكذب عليا نا معندش اعيال نا مش متجوز..

ف لحظه هذي شي فيا جوا انهاااار ورحمة امي زي المبنى العالي الي كل شوي ايطيح منه شي..

انا هكي.. حسيت شي انهار فيا..

لدرجة جسمي افشل..


وراهو مش قصة عاطفه ولا منتحملش المواقف لا انتحمل بس من كثر شلت وتحملت وزمطت وسكتت.. صرت معش عندي قدره للي فاضل توا ولا للشي الي صار.


ويمكن بعد صراعه مع المرض..

متوقع انا ان يفتح اعيونه ويحكيني مش يقوللهم منبيش هذا بعدوه من عليا..

😔🔥💔

صح هو مريض ومش بوعيه بس والله درت من كلمته..


وحاولت منبينش بس هالشي مقدرتش اندسه..


قعدت نا انتابع ف حالات لخره وعيني ع بوي والممرض لاخر مع بويا..ومنسجم معاه..


نفس اليوم عالفجر روحت للحوش..

وتعبااااان بكل نبي انتريح حتى نص يوم بس. نبي انحس اني تمددت


بس...🔥🔥🔥


دوبني حكيت مع بنات.وادوشت ورقدت..ساعه9 كنت ف مستشفى..

سألت دكتور عليه مفش اي شي جديد غير المرض تمكن اكثر بالجسم وانتشر..


قلبي/نفسيتي.. وقتها💔

حكيت مع الممرض قالي باهي الي جيت باتك يسأل عليك..

..

فرحت وخشيتلا بسرعه..❤️❤️


وقعدت نسهري معاه.. ومتذكرني وسألني ع كل شي


وطلب يشوف خواتي..

واعيالا.. مقالش نبي نشوف هلي

وقالي قول ل نجوى اديرلي حساء ب الزعتر في خاطري.. زي م ادير فيه حياة امك الله يرحمها


مشيت ل هله وبلغتهم ان ع فراش الموت لو تبو اتجوه..

ومشيت لمرته وقتلها بوي يبيهم

لعيال قالت باهي وغمت..


جبت البنات لبوي

ومعاهن الحساء..

وطلعت الممرض لاخر عالباب برا عشان خواتي بيحكن مع بوي

اول م شافهن بكى.. وقعد يقوللهن سامحني..نا تعبتكن وظلمتكن.. وحتى انت ي مهاب..

عارف ان مليش حق نطلب هالشي منكم بس انحب ع ايديكم اتسامحوني انا غلطت واااجد

...........


اكيد امكم. سامحتني ..عارفها قلبها طيب..وهي ربتكم.. وانتم زي امكم

نا كابرت واااجد بس والله كل م انجيكم مضايق نلقى فيكم اترحبوا بيا ومتردوش علي زي اعيالي لخرين وامرتي..

في كل مره نشوفكم هكي تخطر علي هي..

عممري م ارتحت بكثر الراحه الي لقيتها عندكم..


سامحوني ع كل كلمه قلتها لكم وجرحتكم..


سامحيني ي (بنتي) ع الشي الي سببته لك..


سامحيني ي نجوى ع الرميه الي رميتها لك واخسرتي فيها ضناك(جنينها


سامحني ي مهاب ع كل شي درته فيك من صغري..


اليوم نا معاكم بكرا بلكي مش معاكم


طبعا ع كل كلمه البنات ينطقن ويحكن نا..ساكت مقلتش شي..


بوي..شفت امكم ف حلمي وجايبتلي حساء بالزعتر..في كل مره اديرلي فيه اتقولي تو تقعد كويس..غير كول منه

وعيت ع كلامها وخاطري فيه قعدت..


قعدن البنات جنبه اشوي.

بعدها جو هله هو..زياره5 دقايق قتلهم وحطيتها ف وجه الممرض وطلعت شلت البنات وجبت خوتي بعد اشياط ريق مع مرته..


جبتهم لقيته راقد..

روحت بيهم.. ورديت للمستشفى..

ساعه 2ف ليل قالي نبي ناكل..


جبتلا الحساء الي يبيه ودوبه خذاه كشيكين قالي خلاص معش نقدر انزيد..


وبدا يقولي ع محامي قالي بعد م انموت سيبت وصيتي عنده..

بعد العزاء خلوه يحضر ويبلغكم ب وصيتي...


حاولت نحكي معاه كان يقولي اسمعني..بس.


ودلني ع مكانه..بعدها سألني ع خوتي7..قتله جبتهم بس كنت راقد بكرا انجيبهم لك..


ثاني يوم جبتهم كان واعي بس مودر..

حتى لما خشيتهم عليه معرفهمش..يقول من الي جاييني..


حاولت نتماسك ونسايره وسميتهم له بس رافضهم هو يبحت فيهم وخلاص...


قربتهم منه وصورتهم له..

ويحكو معاه هم بس مش فاهمين كنه..


قالي تعبان بنرقد..

ع جيت سيدي اخ باتي دفيت لعيال معاه ونا قعدتت...

♤♤♤♤♤♤♤♤♤♤♤♤♤


من جانب ثاني


وانا فالفتره الي سافرت فيها مع بوي وقعدت 14،يوم فالممر المستشفى..


فتحت النت..

لقيت مسجات من جماعتي فالشغل

ومن ندى ومن((هنادي))


رديت عليها هنادي.. وقالتلي سمعتها من ندى/ان الوالد مريض وانا مسافر بيه


حكت معاي وسألتني ع حالته ووضعه ودعتلا ودعتلي..

قالت لو تبي شي دزلي مديرش غيبه


وبعد روحت بيه برضوا فتحت النت مره وحدا لقيت منها مسج تطمن على باتي..بعدها خلاص ف حالها

وانا ف حالي..


◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇


نرجس معش نعلم بشي عليها

حتى انها فكت ع خواتي


◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇


مرت بوي.. كلمتني مره وحدا بس بعد م سافرت..

والمرات لخرات قعدت اتقولي نبي افلوس وين افلوس باتك جيبهن لي هزبتها وصكرت عليها.

لانها مدورتش باتي ولا سألت

تبي افلوووسه بس..


◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇


#خالتي عندها علم ب مرضت بوي.بس مجتنش لا هي ولا خوتها الي هم خوالي


◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇◇


#هل بوي عطيتهم علم وجو ساولو ومش كلهم يسحابو ارواحهم يساولوا ف واحد جايته إنفلونزا..

5دقايق وعدو..


ومفش واحد فيهم قال بلكي تبو افلوس محتاجين شي..لا مقالوش..

دوب كلمتين وعدو..


كلهم خافوا يبتلو ف علاج بوي ولا مسكته ولا حتى لمنااااوبه عليه..


والي مطقوش جوه فالمستشفى

غصبن عندهم جو ف...........


♧♧♧♧♧♧♧♧♧♧♧♧♧♧♧♧♧♧♧♧♧♧♧♧♧♧


#ام بدر❤️💔

مسيبتش خواتي وجميلها ف رقبتي..

وفي جيران اخرا والله غير

ي مهاب احكي.. ويجوني فالمستشفى ب استمرار راجل وامرته ومرات رجالا بس

وبرضوا مننسش سؤالهم علي أن الوالد.. وجيتهم والله فرحت بيها..

ومكانتهم عندي خير من هل بوي وامي..


وعليما الله ضحكتهم ودعواتهم محتاجهن كنت..


◇◇◇◇◇◇◇◇◇◇◇◇◇

◇◇◇◇◇◇◇◇◇◇◇◇◇


نردوا ل بعد جيت البنات و وجيبت خوتي 7..ودزيتهم مع سيدي


بعدها

يومين وهوا مودر واعي ويقول ف خبر مش مفهوم بكل..


ثالث يوم ع الفجر صحصح.. سهريت معاه وكانت

أخر مره هذي💔😔


وريته اعيالا ف موبايل.. وقالي امته جوني كني مش متذكر..


وحسيته راااايق بكل..

قتلا اتحس ف شي تبي شي قالي لالا..وانحس بروحي كويس بكل..


مطقش ع كلمته3ساعات إلا وكان متوفي😔💔🔥..


بلغت البنات..

وغسلوه وكفناه ..

وجت الدنيا كلها انكبت فالحوش

ودرت اللازم.. ولا عرفت نجري ع اوراقه..ولا ع تغسيل ولا ع شنو ولا شنو..


شباب مستشفى تكفلوا ب الاجراءات.. وجيت للحوش بس عليما الله...


جثه اتحرك بلا روح..


اتقولي افف انطيح


درنا المعروف ف كل عزا..البعيد عليكم..


ودفناه..

وجيت للحوش ومدرتش خيمه

لان معش عندي قرش ولا نقدر ع مصاريف الديون وانا بروحي منهد حيلي... ومن جها ثانيه/بندين عشان خاطر من البراني جاي وماشي الي بندين عشانهم هم الاقارب الي جايبيهن دبشهم وجايين اتقول فرح


قالتلي اختي..

قتلها ح انجيب دوب المبلغ الي جاني من جيران..الي لمو فيه اما الباقي فخار يكسر بعضه..

هكي هكي..مش معترف بيهم نا ولا هم معترفين بينا..


هلبن اول يومين والتعب بدا يطلع عليا بشكل كبير لدرجه و الله رجليا معد قدرت نوقف عليهن.

قعدت ع كرسي ناس يعزو في


وكال مكليتش معندش نيه ف شي


دخنت مره وحدا ..بس يمكن...

وكراسي جنب الحوش


اسيادي يبو يديروا خيمه..

قتلهم منبش..

نا معندش هل ولا كثرت ناس

عندي جيراني والحوش سادني


والي بيدير وجيج وتعزاي ويقول الناس بيجوني تعتا يفتح مربوعة حوشه ويدير خيمه هنك..


هنا منبش اندير شي


لما دارو ارواحهم بيكثروا كلام ويقنعوني اندير وعيب م عيب


قتلهم انتم اصلا جيتوه فالمستشفى ولا دورتوه ولا سألتوا عليه

ولا توا مات جايين تاكلوا ف عزاه وتريحتو منه..


طفو كلهم..

وجاحة اسبوع هك كان كل الاقرباء مشفرين ومعش جا حد


كل حد سحب هله وروح


ونا غير معارفي وجيراني م عندي حد.


المهم..هلبن اول 4ايام..بعدها قيس لعشاء كنت بروحي ف مربوعه..

نحس ف روحي مش تمام ودوووخه بكل

صبيت بنقول للبنات يجيبلي حاجه


معش حسيت بروحي وطحت بطولي..


ومعش وعيت الا فالمستشفى عالقيلي تغذيه

وفقر دم حاد .. وضغط راسي مبطلش صداااع قوي بكل


دكتور كتبلي ع ادويه مخذيتش شي منهن..


قتلهم بنروح للحوش مش قادر نقعد فالمستشفى بعد......💔😔🔥


جيراني سعفوني..

واول م روحت رقدت 48ساعه بدون م نفطن لروحي.

من لفراش للحمام اكرمكم الله للفراش اخرا..


بطلااااااااااا💔اااااااااااان


تعبااااااااااااااااا💔😔اااااااااااااان


مش حااسس بشي غير نبي نرقد بس.. خلوني نرقد بالك انتريح وتحول كل الفتره الي كنت فيها نجري 😔..


صح ايقولو ياريتا عندك أخ ي مهاب

وانا انقول ياريت بدر معاي منبش اخ


راهو كان معاي وما تعبت هكي🔥💔😔


#اختي قالتلي وعيناك كم مره اتقول منبش نوعا..


نا..مش فاطن ان حكو معاي بكل..

حتى قالت خالي جا وقعد ع راسك ورديت عليه ومبيتش اتصبي..


نا..والله مش عارف بلكي نحكي ونا رااقد


المهم كيف صحصحت اشوي..

وجابولي اوكال..

وحتى جابولي واحد فك جهاز تغذيه وعلق غيره وفكه وقاس الضغط..ونا والله م نعلم بشي..


تحسنت اشوي اشوي الحمدالله ومن الحوش معش نطلع إلا للمحل بس انجيب حاجه وانجي..

اغلب الوقت قاعد بروحي ف مربوعه منديرش ف شي وامطفي الضي.صبح عشيه ليل ع وضع هذا..


بعد8\9ايام..

ف العشيه جبت قهوا يبنها البنات..


وبعد اشوي جت ندى ردت الباب.. وطلعت فتحت باب الحوش..

نسمع في حد جا بس مش عارف..من..


ندى..بس نسمع ف صووتها تبكي..

وبعدها نجوى...


كنت اندخن ف مربوعه جوا نا...


كملت دخان وقاعد مع روحي وجوي مش تمام بكل..


طق الباب..

ندى..مهاب


نا..نعم كنك..

هي....في من يبي يعزيك..


نا..من..💔

هي..هنادي


نا...سكتت


هي..هنادي تعالي هي اهو مهاب..


صبيت نا وعدلت جاكيتي... وراسي ف الارض.. ونفضت روحي..


ندى..خشي خشي..


هنادي... السلام عليكم


نا..


💔🔥💔🔥💔🔥💔🔥


#يتبع

#shosheta..


الظلم عند ربي وقدامه..

عمره م يدوم

ولابد من شخص ما يسلطه ربي ع الظالم وقتها لا يعرف يمارس سلطة ظلمه عالشخص ولا يعرف يفك روحه منه


اب مهاب..ياما دار ف مهاب وخواته وامه.. وجا اليوم وربي خذا حقهم بنفس الطريقه الي كان هو الاب السبب فيها..


وخلاه يحس ب اضعاف الالم ف جسمه من داخل قبل الخارج.. ومش لاقي له دواء.يوقفه..


كلنا نعرفوا ان الوصيه اتنفذ لو مهما قايل صاحبها

هل بوهم تغير صح ودار شي ولو ف اخر لحظه ف حياته ف الوصيه ع خاطر مهاب والبنات..


ولا ظلمه كتبه ف الوصيه وبيتعبهم من جديد حتى بعد موته..


و رد مهاب ع اسياده هل كان صائب فيه ولا غلطان...


وهنادي..الي مهاب يسمع بيها سمع وعمره م شافها..


هل تعزايتها له وقتها توا ولا.......


متنسوش تعليقكم ع الي صار

وياريت بدون غلط ف اب مهاب لان ف نهايه هذا بوه والشخص فينا ميقدرش يختار والديه بجوه صح


ف راعو هالنقطه..


نتلاقوا ف حلقه جايه ليلتكم

🔥🔥🔥🔥🔥🔥



لقراءة باقي حلقات الرواية : اضغط هنا 
google-playkhamsatmostaqltradent