رواية قدرا لطيفا الفصل الأول 1 بقلم أمل أحمد

رواية قدرا لطيفا الفصل الأول 1 بقلم أمل أحمد

رواية قدرا لطيفا البارت الأول

رواية قدرا لطيفا الجزء الأول

رواية قدرا لطيفا الحلقة الأولى

_ انت يا بنى ادم براس كلبه !
= بصلى بصدمه من طريقه كلامى معاه ..
_ انت ازاى يا راجل يا معفن ، تكلم ريم صحبتييي كدااا لاااا وايه كمان تعمل روش قدام صحابك وتقوم مكعبلها قدام الناس ..
: ر..ر..رحمه !!
_ اسكتى انتييي واركنى على جمبب!
= كان واقف باصصلى بدهشه ومش فاهم حاجه !
_ كملت كلامى بعصبيه عاميه ..بس هقول ما انت مهزق وعايز إلى يهزق..يا بنتى فى ايييه اصبررى ؟!
:مش دااا ،مش دااااا !!
_ اصل لو ماما وبابا عرفوا يربو.. انتى قولتى ايييييه؟!!
: وريم صحبتى بتلطم ، مش ده إلى عاكسنييى !!
_ اومال ده مين؟!!
: ده الدكتور الجديد !
_ بلعت ريقى بصعوبه ، وكنت خايفه ارفع راسى ، ما هو هرفع راسى ازاى بعد إلى قولته وهاها كمان طلع الدكتور ، الحمدلله يارب اتفصلت رسمى !!
حاولت ارفع راسى على الاقل عشان اعتذرله ، بعد العك إلى قولته ..احم لامؤاخذه يا بشمهندس حصل لاغبطه !
= بصلى من فوق لتحت واتكلم بضيق ، والله بعد كل قله الادب والغلط ده وتقوليلى لامؤاخذه ،كتر خيرك والله..وزعق مره واحده انتى ميييين؟!!
_ براحه طببب ، وبعدين انا افتكرتك..
= افتكرتك؟!
_ هوووف ..افتكرت حضرتك يعنى الواد المهزق إلى عاكس الحلوفه دى ، ومنها لله شاورتلى عليك ولبست أنا فى حيط فى الاخرر
= اممممم والمفروض اصدق الحوار السينمائي الهايل ده صح؟!
_ والله تصدق ما تصدقش دى حاجه ترجعلك وانا عموماً بعتذر على سوء التفاهم إلى حصل
= وانا مش هعدى قله الادب إلى حصلت دي ، وأما نشوف الجامعه إلى باينه من اولها دي !
_ هووووف ،اللهم طولك يا روووووح
: أنا..أنا..اسفه جداً لحضرتك يا دكتور ، والله انا شاورتلها على الشاب إلى وراه حضرتك ده بس هى افتكرته حضرتك ف أنا إلى اسفه وبعتذرلك عن إلى حصل
= انتى على عينى وعلى راسى ، بس انا لو رضيت أن كل حد ياخد حقه بلسانه ودراعه احنا كده هنبقى عايشين فى غابه ، اومال ايه لازمه المدير والرتب الأكبر مننا أن شاء الله ..ووجه كلامه لرحمه ..ولا ايه يا انسه يا متعلمه؟
: حضرتك معاك حق ، حقك عليا أنا يا دكتورر!
_ بصتله بضيق ، ومشيت من قدامهم من غير ولا كلمه
= رفع حاجبه ..ايه قله ذوق البنى ادمه دى؟
: لوسمحت يا دكتور ميصحش حضرتك تغلط فيها قدامى ، وهى مش قليله الذوق خالص على فكره هى بس كانت محموقه عشانى !
= حتى لو متضايقه عشانك تيجى وتقول للمدير أو لأى دكتور هنا إنما مش تروح تهزق نفسها مع واحد قليل الأدب ومش بعيد يمد أيده عليها والمشكله تكبر اكتر ، وعموماً أنا آسف انى قولت عليها كده بس عصبتنى
: فاهمه حضرتك ، وانا بعتذر تانى على إلى حصل
= خلاص حصل خير
: عن اذن حضرتك
= اتفضلى ..
________________
بعد دقايق
كنت قاعده فى كافيه الجامعة وجوايا نار قايده وعماله اقول لنفسى ..
أنا لييييه مردتش عليه وهزقته ده احرجنيييي !
أنا ليه سكتله؟!
= عشان انتى محترمه !
برقت عينى ، وبصيت ورايا بسم اللّٰه الرحمن الرحيم ده هووو !
لقيته سحب كرسى وقعد قصادى وعلي وشه ابتسامه برود مش طبيعيه أنا كنت مفكره أن أنا بس الى بارده طلع فى أبرد منى بمرااحل ..
= بتعملى ايه وسايبه محضراتك؟
رديت بسرعه وتلقائيه
_وانت مالك؟؟
=بصدمه ..افندم؟!!
_ ااااه ااقصد انت مال حضرتك!
= وايه لازمه حضرتك بقاا؟
_ عشان سيادتك بتضايق أما بتكلم من غير القاب ف بقول الى أنا عايزه بس بضيف “حضرتك”
لقيته ضحك عليا وبصلى بتركيز
= انتى اسمك ايه؟
_ رحمه
= عندك كام سنه؟
_ هو مش حضرتك كنت جاي تسألنى سايبه محضراتى ليه ، ليه بقى سايب محضراتك انت كمان وجاى تحقق معايا
= ممكن تردى من غير لماضه عشان متغباش عليكى!
_ اه ، انت هتتغابى عليا وانا هسكتلك صححح؟!
برق عينيه جامد وحسيت انى عكيت الدنيا تانى مره ، لاء تانى ايه ، تاسع مره !
_ اااه اقصد هسكت لحضرتك يعنى!
ضحك تانى بالرغم من أنى كنت حاساه دقيقه وهياكلنى قلم
= يابنتى انتى ليه واخداها عافيه؟!
_ عشان هى الدنيا كده ، إلى ميبقاش بجح فيها وياخد حقه يتاكل فى الزمن ده!
= مين قالك الكلام ده؟
_ أنا
= وايه إلى خالاه نظرتك عن الدنيا كده؟
_اهو بقى من المواقف إلى بمر بيها ، والناس آلى بعاشرها
= ياااه ده انتى شايله كتير بقى !
_ يعنى ، حاجه زى كده
لقيته بص فى الساعه السوداء الجامده بتاعته إلى عينى عليها من ساعه ما شوفته وقالى ..
= امممممم ، طب يلا عشان المحاضره هتبدأ
_ مش عاوزه احضر
قام من على الكرسى وهو بيلم حاجته
= انتى حره ، بس مفيش حد بيدخل المحاضره بعدى !!
ومشى من قدامى ، ثانيه هو يقصد ايه؟ فضلت دقيقتين استوعب كلامه لحد ما اكتشفت انه معاد محاضره الدكتور الجديد إلى هو كان قاعد معايا من دقيقتين …هو اسمه ايه؟!
__________________
اثناء المحاضره
كنت قاعده مركزه طول المحاضره فى شرحه ، حرفياً اول مره افهم علم النفس كده انا اكتشفت انى طول الثانوى مكنتش بفهم علم نفس ، يخربيت جمال الشرح وجماله هو كمان ، ما هو للأسف حلوو ايوه حلوو ، رغم انى مش من الطبيعي بنجذب لأى راجل لكن ده جذبنى ومش عارفه ازاى منك لله يابعيد !
وأثناء سرحانى ..
= رحمه !
سكوت تام عم المكان ، ولقيت الكل باصصلى ، اي ده فى ايه انا عملت ايه ، واخيراً استوعبت أنه قفشنى وانا سرحانه وحب يعمل نمره عليا قدام الطلاب ، ثانيه !!
ده قال رحمهه؟!
حفظ أسمى وندهلى بيه قدام القاعه كلهاا ، ارد ولا اكرفله ؟
= انتى يا انسههه ، أنا مش بندهلك؟
_ اااه احمم ، نعم !
= اي اخر حاجه أنا قولتها
هاهه بيختبرنى !
ميعرفش انى كنت مركزه معاه طول المحاضره ، بس ثانيه ايه اخر حاجه قالها ، أنا نسيت؟؟
= ما تردى !
_ احمم ، أن تشوه الإدراك بيأثر فى السلوك
= تمام ، وبعد كده؟!
_ اااه مش فاكره صراحه!
= والسبب؟
_ سرحت !
= وانا الى بسأله ومش بيجاوب فى محاضرتى لأى سبب من الأسباب بطرده !!
فى اللحظه دى اتصدمت من رده فعله وكنت حرفياً على تكه وهعيط بس مسكت نفسى لأخر لحظه
_ أخرج يعنى ولا ايه؟
= لو هتكملى الحصه بسرحان ف اخرجى احسن !
مقدرتش امسك نفسى من كتر الاحراج وقررت أخرج بهدوء وبدون اي كلمه تانيه ، وكنت ملاحظه انه مركز معايا جداً طول منا خارجه لحد ما اختفى من قدامى ، واول ما خرجت اتفتحت فى العياط وكنت متضايقه اووى منه ليه عمل كده؟
ده أنا كنت فاهمه منه وهبدأ احب الماده ، يقوم يحرجنى بالشكل ده وفى نفس اليوم ، أنا إلى غلطانه انى مردتش عليه لتانى مره !
عدى عليا عشر دقائق تقريباً ولقيتهم كلهم خارجين من المحاضره ، قومت بسرعه عشان محدش ياخد باله منى وخرجت برا فى الجنينه وربعت رجلى وقعدت وحطيت الهاند فرى عشان اسمع قرآن عشان اتلاشى إلى بيحصلى كل يوم كالعاده ، ما أنا متعوده ان لازم حاجه تحصل كل يوم تعكنن عليا يومى !
: رحمه !
_ ….
: رحمههه ، يابنتيي !
شلت الهاند فرى ، وبصيت لقيتها ريم ، مسحت دموعى بسرعه وبصتلها
_ نعم
: انتى فين يابنتى عماله ادور عليكى من الصبح من ساعه ما مشيتى
_ مفيش روحت الكافيه قعدت شويه وبعدها دخلت المحاضره
: مالك؟ فيكى حاجه؟
_ لا لا مفيش حاجه أنا تمام
: اومال وشك متضايق ليه؟
_ لا متضايق ولا حاجه!
: مممممم واضحح ، رحمهه قولى فيه ايه؟؟
_ مفييش يا ريييم وبس بقى عشان بجد مش طايقه نفسيييي !
حسيت انى احرجتها وزعقت فيها وهى ملهاش ذنب ، اتنهدت
_ حقك عليا مقصدش
: ولا يهمك يا حبيبى بس انتى اكيد متضايقه وفى حاجه ، احكيلى!
_ الحيوان دكتور الغابره ده احرجنييي
: يلهوى انتى لسه متضايقه منه !
_ هو انا كنت صفيتله اصلااا وبعدين انتى كنتى فين بعد ما مشيت وسبتكوا ؟
: أنا فضلت ادور عليكى ملقتكيش و وانا بدور عليكى الاقيلك مييين؟!
_ حموكشا بتاعك اكييد!
: اخويا مش صاحبييي
_ جتك نيله عليكى وعليه
: لوسمحت الا حموكشه
_ طب يختى
: المهممم ، انتى كنتى فين ؟
_ ما قولت كنت فى الكافيهه
: ااه صح نسيت ، وبعدين ايه
الى حصل خلاكى تضايقى كده
حكيتلها كل الى حصل وانا منفعله ومتعصبه وهى كانت بتضحك وفى نفس الوقت بتهدينى
: بضحك ..طب خلاص أهدى يخربيت إلى يزعلک
_ فعلاً ربنا يحرقه مش يخرب بيته بس
: أعوذ باللّٰه ، حرام عليكى يا شيخه مش للدرجادى ، بس مش غريبه يا بت يا رحمه أنه فضل فاكر اسمک وندهلك بيه كمان فى وسط القاعه كلها
_ ما هى دى الحاجه الوحيده إلى أنا مستغرباها ، بس عادى يا ريم يمكن هو بيحفظ اسماء الطلاب بتوعه عادى
: امممممم ، يمكن ..مش هتروحى؟
_ مستنيه زياد
: هيجى ياخدك النهارده؟
_ اه اخيراً خلاه عند أمه دم وقالى هاجى اخدك النهارده
: ههههه ، طب ماشى خلى بالك من نفسك وانا هروح مع حموكشها اااه قصدى محمد
_ شوفتى شوفتى ان حموكشا لايق عليه أكتر
: ههههه ، منک للّٰه !
____________________
عدى وقت مش فاكره قد ايه وانا مستنيه زياد اخويا يجى يروحنى ، بس كالعاده اتأخرر عليا وأخيراً جه ..
• انى اسف وربناا
_ اسفك معاك يا اخويا ، ايييه كلل ده!!
• الموتسكل كان فيه مشكله وروحت اصلحه والراجل ابن اللذينه أخرنى
_ يلا عادى أنا اتودعت خلاص
• اختى حبيبتييي
_ طب يا اخويا يلااا ، عشان أمك متزعلناش !
ركب زياد وركبت وراه على الموتوسيكل وبلمح بعينى لقيته واقف بعيد وبيبصلى !!
ايوا هو دكتور الغابره ، كان واقف بعيد ومعرفتش اشوف ريأكشن وشه بالضبط خاصه اننا كنا فى وقت الغروب ، استغربت اوى وخوفت فى نفس الوقت ، طب يمكن مش باصص عليا؟ ومركز فى حاجه ورايا
، ومشيت أنا وزياد لحد ما اختفينا من قدامه
روحت البيت اتغديت وصيلت ومسكت الدفتر إلى كنت بلخص فيه وراه وافتكرت الموقف تانى ، تلقائياً لقيت نفسى بضحك وبسأل نفسى هو انا من امتى من ساعه ما كبرت بعيط من اقل حاجه؟
ده أنا بمشى اتخانق مع دبان وشى وباخد حقى من عين التخين ، الف سؤال وسؤال فى بالى ، قررت اقفل كل حاجه قدامى وانام شويه يمكن انسى اليوم ده !
___________________
تانى يوم الصبح
قلقت على رنه ريم ، يلهوووى ده الساعه ٨ !!
قومت لبست وانا مش شايفه قدامى وعماله أجرى فى الشقه زى إلى بيقفش حرامى وخدت شطنتى بسرعه ومشيت ..وياريتنى ما مشيت!
وصلت الجامعه وكانت الساعه ٩ الا ربع ، ده أنا هتهان النهارده
خبطت على باب المحاضره وو …يختااااااى ، ده هو إلى علينا اول محاضره ، قولت فى بالى “اهلاً بيوم شبه وشه” قررت أكون هاديه وبارده عشان اعرف اتكلم واعدى يومى على خير ..
= افندم ، عايزه ايه؟!
_احم السلام عليكم ورحمه اللّٰه
= اللهم قوى ايمانك يا أختاه ، خير؟
_ عايزه ادخل
= هى وكاله من غير بواب ، تخشى وقت ما انتى عايزه وتخرجى زى ما انتى عايزه؟
استغفر اللّٰه العظيم يارب ، هنبدأ بقى غتاته ، ما هو بيحب يتروشن جته قرف !
رديت ببرود
_ معلش اتأخرت راحت عليا نومه !
= تمام ، روحى كملى نوم بقى ، نكمل يا شباب قولنا أن ال …
وكمل شرح عادى جداً ولا كأنى واقفه ، اتحرجت جداً وانسحبت بهدوء و خرجت قعدت برا على مقعد فى الجنينه ، واول ما قعدت انفتحت فى العياط ايوا بردو عيط وبضرب نفسى ١٠٠ جذمه انى عيطت
أنا بعيط ليييه؟!
عادى ما تغور المحاضره بالى فيها اهم حاجه نفسيتى وراحتى ، مش كل ما يكلمنى اقوم معيطه ، مش انا إلى اعيط من كلمتين !
وطبعاً قرآنى والهاند فرى كانوا اصدقائى فى اللحظه دى وعالمى التانى إلى خالى من المشاكل والحزن والهم !
___________________
حسيت بحد بيشيل الهاند فرى من ودنى اتنهدت وانا مغمضه عينى ..
_ سيبى الهاند فرى يا ريمم !
= بس انا مش ريم !
اى ده ! الصوت ده أنا عارفاه كويس ، ده صوتهه !
فتحت عينى بسرعه لقيته هو فعلاً
خدت الصدمه أنا بقاا
_ لوسمحت سيب الهاندى فرى !
= ده ايه الاحترام ده؟
_ أنا محترمه غصب عن أي حد
= هو فى محترمه بتركب وراه واحد الموتوسيكل؟
_ موتوسيكل ايييه و واحد مين انت بتقول ايهه؟!
= مش بحب الاستعباط ، عادى يعنى لو مرتبطه قولى ماهى كلها كده مجتش عليكى!
_ ارتباط ايه وزفت ايه ، ايه الى انت بتقوله ده يا عمنا انت تقصد ايه؟!
لثانيه افتكرت امبارح لما زياد جه خادنى وكان ساعتها واقف ، معنى كده أنه كان باصصلى أنا فعلاً ، يعنى انا مكنتش بتخيل !
= افتكرتى ولا لسه هتكملى كذب؟
_ أولاً أنا مبكذبش ثانياً لازم حضرتك تحترمنى وانت بتتكلم معايا ، مش تبقى عايز الكل يحترمك وانت متحترمش حد ثالثاً وده الأهم أن اعتقد سواء أنا مرتبطه أو مخطوبه أو حتى متجوزه دى حاجه تخصنى أنا ومش من حق أي حد يتدخل فيها وصلت؟
حسيت انى حرقت دمه وبارتياح اوى لما قولت الكلمتين دول ، حسيت كرامتى رجعتلى ، اخد الحق ده شعور جميل اوى وخاصه لو بحرفه زى ما بيقولوا ..
= لا جدعه عارفه حقوقك كويس ، طب علاقاتك الشخصيه ومليش فيها ، ممكن اعرف اتأخرتى ليه النهارده عن المحاضره؟
_ ما أنا قولتلك انى راحت عليا نومه وسيادتك مرضتش تدخلنى !
= ومتضايقه انى مدخلتكيش ، واحد غيرى كان هزقك على تأخيرك أصلاً بس أنا قولت خلينى محترم
_ قصدك خلينى روش!
=روش؟!
_ اه روش ، انت قصدى ..حضرتك معرفش ليه بتحب تتروشن خاصهً بيا
= وانا لو عايز اتروشن هتروشن بيكى ليه انتى مرات ابويا؟!
سكت وبصيت الناحيه التانيه بضيق .. واتكلم وقال
=بصى يا رحمه الأول حقك عليا انى احرجتك مرتين مره امبارح لما مكنتيش مركزه والنهارده لما تجاهلتك ، بس مسألنيش نفسك أنا بعمل كده ليه ؟
_ نفخت بضيق ، روشنه يمكن؟؟
ابتسم ..
= منا قولتلك انتى مش مرات ابويا عشان اتعامل معاكى كده وبعدين انا مش محتاج اتروشن لأنى جامد أصلاً ومش بحب النوعيه دى من الشباب ده مبدأياً كده ، انا عملت كده عشان أثبتلك أن مش كل حاجه بتتاخد عافيه وبالدراع زى ما انتى وناس كتير اوى فاكره كده ، طب أنا احرجتك اهو قدام القاعه كلها قدرتى تاخدى حقك بدراعك منى أو حتى بقله الادب أبداً ، ولو كنتى قليتى ادبك أو فيما ذلك كنتى هتطلعى فى الآخر غلطانه والكل هيجيب الغلط عليكى
_ اتنهدت وانا ابتديت اقتنع بكلامه وكمل وقال
= اخد الحق بيبقى بذكاء بيقى عايز تدبير ، صبر ، هدوء مش انفعال شديد وتهور وغضب وده كل الى أنا كنت عايز اوصلهولك من طريقتى معاكى ودلوقتي أنا بعتذرلك تانى ولو عايزانى اعتذرلك قدام الطالباه كلهم أنا موافق
كنت متأثره اوى بكلامه ، أنا ازاى فهمته غلط كده ، ازاى طلع عايز يعلمنى درس من كل ده وانا كل ده مكنتش فاهمه
_ لا عادى ملوش لوزم يا دكتور ، أنا اسفه لو فهمت حضرتك غلط بس انا اتضايقت انك احرجتى كان ممكن توعينى بطريقه افضل
= أنا دكتور علم نفس وعارف ايه الطريقه إلى من خلالها اقنعك بيها بسهوله وانتى من طلابى وواجب عليا لو لقيت عقليتك أو سلوكك خاطئ اعدلهولك اومال ايه رسالتى فى الحياه يابنتى
_ ماشى ياعم الدكتور تشكر على التهزيق إلى ادتهولى عشان تعلمنى بيه
=عم الدكتور !
لا كده عايزين تربيه من اول وجديد
_ ضحكت ، احم مقصدش بس دى طريقه كلامى يعنى اتعودت
= اتكلمى براحتك أنا فهمتك خلاص
_ طب وبالنسبه للمحاضرتين إلى فاتونى بسبب حضرتك ؟؟
= محاضرتين ؟
_ امبارح لما مخلتنيش أكمل والنهارده !
= اممممم طب تعالى
وقام وقف
_ اجى فين؟
= تعالى معايا اشرحالك فى المكتب
_ احم لا اسفه مش هينفع اقعد مع حضرتك فى المكتب لوحدنا
بصلى وابتسم اوى ، ونزل قعد وربع رجليه
= طب انزلى اقعدى هنا قدامى وهاتى دفتر
ضحكت اوى
_ هو حضرتك بتعمل ايه؟
= هشرحلك إلى فاتك ، هتجيبى دفتر ولا اغير رأيي وأقوم !
قعدت قصاده بسرعه
_ احم لا لا وعلى ايه ، اتفضل
= بصى يا ستى امبارح كنا بنتكلم عن السلوك وآثاره على حياه الفرد ..
فضل يشرحلى كل الى شرحه امبارح والنهارده وحرفياً شرحه جميل جداً ومبسط لأقصى درجه والحمدلله رجعت حبيت الماده تانى وعلى قد ما كنت فاهمه على قد ما كنت محرجه جدا من قعدتى معاه فى وسط الجامعه والى رايح والى جاى يبص علينا ، لكن قولت لنفسى مش مهم كلام الناس المهم الحقيقة المهم إلى ربنا شايفه طالما مش بعمل حاجه حرام ف مش مهم رأى الناس ، لكن لحظه أنا لسه معرفتش اسمه؟
بعد ساعه خلص شرح ..
= تمام ، فهمتى ؟
_ اه اه تمام
= طب كويس ، خدى
_ ايه ده ؟
= امتحان!
_ امتحان ايييه انا ملحقتش اذااكر ده انت لسه شارحلييي احنا هنهزرر
مسح على دقنه وهو بيحاول يمسك نفسه
= انت ! وهنهزر !!
_ احم لاؤاخذه نسيت
ضرب كف على كف
= استغفر اللّٰه العظيم ، حلى يا زفته الامتحااان ولو غلطتى هتزعلى منى !
بلعت ريقى ، ده الموضوع طلع بجد
_ طب طب بالله عليك همتحن أزاى فى وسط الوش ده والى رايح والى جاى يتفرج عليا وهتقلب ل ملاحِظ ومُلاحظ مش انت راجل علم نفس وفاهم؟!
= حليي يا رحمه بدل ما نزعل من بعض حليييي !
_ طب براحه ، بتزعقق لييييه ، هتنيل أحلل !
وبالفعل حليت امتحان المجنون ده وكنت مبسوطه اوى وانا عارفه احل لوحدى وبكل سهوله ، ولما وقف معايا سؤالين فضل يفهمهوملى بكل هدوء لحد ما خلصت الامتحان ، بصراحه كان معايا لحظه بلحظه ومسابش اي جزئيه مش فاهماها الا وفهمهالى ، طلع چنتل والله وانا الى كنت ظالماه انا ظالمه اصلاً !!
_ ممكن اسأل سؤال ؟
= وهو بيعلملى الامتحان ..امممم
_ هو حضرتك اسمك إيه لأنى لحد الان معرفش
=بابتسامه ..قوليلى يا چوو
_ نعم ؟؟
= احم ، يوسف اسمى يوسف
_ اممم اوكى
= رفع عينه عليا وهو بيصحح ، الله يرحممم !
_ تقصد ايه يا دكتور يوسففف؟
= الحمدلله كرهت أسمى !
_ احسن بردك ظلموه الإسم والله
= بمشاكسه ، ليه منا قمر اهو !
انت فعلاً قمر حد ينكر !
بس مش معنى كده انك تتنك على إلى جابونا وتعمل فيها كاريزماا
_ اتقى الله يا استاذ لقوح اتقى الله !
فطس ضحك حرفياً وانا كنت بضحك على ضحكته وكنا زى المجانين فى وسط الجامعه ،
جه وقت محاضره تانيه وكنت ظابطالها منبه عشان عارفه ذاكرتى السمكيه !
_ شكرا لتعب حضرتك معايا بجد
= حاجه بسيطه مقابل الى الاحراج إلى حصل ، بس طبعاً انتى فهمتى قصدى ومش زعلانه ولا ايه؟
_ اكيد يا عم حصل خير ، اطير انا بقى عشان متحرجش تانى
= ماشى ..رحمه !
_ نعم
= لو حد ضايقك أو دكتور كلمك ارجعيلى أنا لوسمحت ومترديش عشان يبقى ليكى حق تتكلمى
_ عيب يا دكتور ، ده انت إلى لسه معلمنى ازاى اخد حقى ..وابتسمت ومشيت
مشيت وانا كلى ثقه ويقين انى فعلاً اقدر اخد حقى بكل حرفه من غير اى تهورات ، وحضرت كل محضراتى وقابلت البت ريم اصل يومى ميكملش من غيرها وحكيتلها على كل الى حصل وكالعادة جوزتهولى وهى قاعده وسمت عيالنا ادم وبطه ورسمت احلام ورديه ماشاء الله عليها أصلها بينى وبينكم معتوهة بتحب الروايات والعالم الخيالى إلى مبيحصلش ده ، المهم خلص اليوم ولقيت الواد زياد استجدع معايا وجه ياخدنى تانى
_ ده إيه الجدعنه إلى نزلت عليك دى ياض ، يومين وراه بعض لا لا لا اكيد فى حاجه!
• دا انتى بنى ادمه مستفزه ، صحيح اعمل خيراً شراً تلقى ، اركبى يختى اركبى !
ركب زياد ولسه بمسك فيه وهركب لقيت ايد بتشدنى !
_دكتور يوسف ؟!
= ممكن اعرف انت مين؟!
نزل زياد بعصبيه وشدنى من يوسف
• انت إلى مييين وازاى تمسكها من ايديها كداااا؟
_ يا جماعه اهدوا انتوا فاهمين غلط ..يا زياد ده دكتور يوسف وده زياد اخويا !
= احم ..اهلا وسهلاً
• اهلاً بحضرتك ايه الداخله إلى حضرتك دخلتها علينا دى بس!
= أنااا ، اسف مقصدش بس معرفش انك أخوها
• ولايهمك يا دكتور عن إذنك !
وخدنى وركبنا ومشيت من غير اي كلمه ..
_________________
فى البيت
• رحمه !
_ يا نعم
• تعالى ثوانى
_ خير يارب؟
• هو انتى تعرفى الدكتور ده؟
_ اكيد عارفاه يا ابنى ، ايه السؤال ده !
• اقصد يعنى عارفاه شخصياً واتكلمتى معاه كتير قبل كده ، عشان يشدك بالعشم ده؟!
_ احم ، لا لا خالص ده أنا أصلا عارفاه من خناقه وعرفت أنه الدكتور الجديد بالصدفه
• اممممم وليه جه شدك كده لما لاقاكى بتركبى معايا ؟؟
اتوترت صراحه منا نفسى معرفش هو ليه عمل كده !
_ معرفش والله يا زياد ،بس هو ااااه ..
• هو ايه يا رحمه ؟! فى حاجه مخبياها عليا؟
_ اكيد لا يعنى انت عارف انك اول واحد بحكيله اي حاجه
• اومال في اييييه مالك متوتره كده ليه؟
_بص هو الصراحه كل الى حصل بينا أنه احرجنى امبارح قدام القاعه عشان مكنتش مركزه ولقيته جه النهارده اعتذرلى على إلى عمله وقعد شرحلى المحاضره إلى فاتتنى امبارح
• امممم شرحهالك ! شرحهالك فين بقى أن شاء الله؟!
_ فى الجنينه !
• جنينه ؟!!!
_ ايوه والله جنينه الجامعة ، منا مردتش يشرحلى فى مكتبه فقالى خلاص هشرحلك هنا
• ايوه بس ده صغير ، ازاى قعدتوا مع بعض كده لوحدكوا ؟
_ هو احنا قعدنا فى كافيه ده فى الجامعه ، وبعدين ده كان بيشرحلى إلى فاتنى كتر خيره الراجل
• تمام يا رحمه بس ياريت متتكررش تانى ، المره دى كلامكوا كان فى الشرح الله اعلم المره الجايه الكلام هيبقى على أيه !
_ ايه الى انت بتقوله ده يا زياااد انت عبيط؟! وانت تعرف عن اختك أنها بتتكلم مع حد خارج إطار الدراسه او الشغل أصلا!
• اكيد عارف يا رحمه وواثق فيكى ثقه عمياء كمان ، بس انا بحذرك عشان تخلى بالك الله اعلم بنوايا الناس يا حبيبي
_ لا يا اخويا متقلقش انا ناصحه أووى !
• ايوه منا عارف
_ بتتريق؟
• أنا أقدر ، بس سيبك انتى شكله واااقع
_ هو مين ده؟!!
• واضح أنك ناصحه!
_ لا بجد قصدك على اااه الدكتور ؟!
• امممم
_ واقع ايه يا عم وبتاع ايه ده لسه شايفنى امبارح وبعدين هيسيب كل المزز إلى فى الجامعة ويبصلى أنا ؟!
• زى ما انتى شايفه ، هقوم أنا بقى !
مسكته من أيده بسرعه
_ استنى بس قعد هناااا ، هو بجد ممكن يكون معجب بيا؟!
ابستملى بخبث
• اه يا سوسه شكلك انتى إلى واقعه
_ ولااا اتلم يااه ، المهم انت شايف أنه بيغير يعنى وكده ولا ايه رأيك؟
• لا اله الا الله يابت انتى هتجنينيييي !
_ يا عم قول بقاا
• أنتى إلى قوليلى ،انتى معجبه انتى كمان؟
احم لقد اتفضحت ،اتكسفت اوى الصراحه رغم من الطبيعي زى ما انتوا شايفين بهيمه!
_ احم ،لا يا ابنى اعجب يمين دااا ..
• خلاص خلاص تبقى معجبه ، عموماً الى عمله ده يدل على أنه كان غيران والى بيغير على حد يأما بيحبه يأما معجب بيه ف فى الحالتين لو شوفتك واقفه معاه تانى يارحمه هزعلك
_ الاااه ،ايه الرخامه بتاعه أهلك ديييي !
• بصدمه.. رخامه اهلييي؟!
_ ايوه انت عيل مستفززز وربنا ما هحكيلك حاجه تانى جتك البلاه …وقومت دخلت اوضتى
• خدى هنا يابتتتت !
__________________
صحيت الصبح الحمدلله روحت الجامعة فى معادها ومتأخرتش ولقيت دكتور كبير هو إلى دخل ،منكرش انى حسيت انى اضايقت ،كنت بصراحه عايزه اشوفه ، عايزاه هو ألى يشرحلى المواد كلهاا ، خلصت المحاضره
وقعدت على اول مقعد قابلنى ، وكلمت ريم عشان اشوفها مجتش ليه وقالتلى أنها معزومه اليوم كله عند خالتها وهياكلوا محشى وورق عنب بنت المحظوظه ، وفي عز قرى على البت ريم حسيت بشاب جه قعد جمبى ..
بصيتله باستحقار وقومت بهدوء ودخلت كافيه الكليه اقعد فيه احسن من العيال الملزقه دييي ،كنت قاعده عينى بتدور عليه مش عارفه أنا ليه بعمل كده مش بحب اتعلق بحد وفى الاخر يطلع حلم وينتهى !
قطع تفكيرى الأخ الملزق وهو جايبلى الجرسون لحد عندى وبيقوله ..
؛شوف الهانم تشرب ايه
_ والهانم مش عايزه تشرب حاجه وبعدين انت مين أنت عشان تشوفنى اطفح ايه او ادردع ايييه؟!
؛ طب هاتلنا اتنين مانجا
_ مانجا ايه هو الواد ده حمار ولا ايه ، يا ابنى هو أنا بتكلم هندى؟
؛ لا
_ اومال ايه البرود إلى فى أهلك ده يالاااه هو أنا خالتك عشان تطلبلى مانجا؟
؛ طب اطلبلك ايه برتقان؟
مسحت على وشى وانا بحاول امسك نفسى واكرر فى دماغى أن اخد الحق حرفه ومش بتهور زي ما چو قالى
_ طب بص هكلمك بالذوق ، اتفضل قوم من هنا ومتتكلمش معايا عشان مقلش منك واخليك شبه القنفد قدام الجامعة كلها
؛ تعرفى انى بعشق القنافد !
_ تعرف انك عيل مهزق
؛ حبيبتى الله يكرمك
_ يارب صبرنى على ما بليتنى ، ما تقوم يالاااااه !
؛ طب ايه رايك هقوم بس بشرط !
_ انت كمان هتشرط؟!
؛ اه ، تدينى رقمك
_ ده فى الشارع إلى وراه يا عينيا ..وخدت شنطتى وقومت عشان مرتكبش جريمه ولاحظت أنه ماشى ورايا ومبتسم وشكله اصلا ميطمنش ، جه فى بالى لما قالى لو حد ضايقك ارجعيلى عشان يبقى ليكى حق تتكلمى ولقيتنى بتجه ل أول مكتب للدكاتره وعلى حظى طلع مكتبه !
كان قاعد بيكتب حاجات و أول ما خبط قال “ادخل”
اول ما شافنى عينه اتسعت زى ما يكون أنصدم بس فرحان وقام من مكانه وهو بيقولى ..

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية قدرا لطيفا)