رواية لعبة الغدر 2 الفصل الثالث 3 بقلم محمد منصور
رواية لعبة الغدر 2 الفصل الثالث 3 بقلم محمد منصور
رواية لعبة الغدر 2 البارت الثالث
رواية لعبة الغدر 2 الجزء الثالث
رواية لعبة الغدر 2 الحلقة الثالثة
وبعدها بكام دقيقة يقعد شناوي في مكتب عجمي وعجمي بيبص له وبيقول له
ماكنتش هاسامح نفسي لو حصلك حاجه
فيبص له شناوي باستغراب شديد ويقول
أنت اللي ربنا سخرك علشان تلحقني. سبحانك يارب. انما اية اللي حصل في الدنيا. وخلاك تكون معايا. معقوله تكون صدقت أني مظلوم
عجمي
شناوي. ملهوش لزوم الكلام دة. وسبب اني بقيت معاك ان ظهر دليل يمكن يكون سبب برائتك من حكم الاعدام. ودلوقتي تروح تقلع البدله الحمراء دي علشان هانقعد مع بعض شويه في مكتبي،،،،،،،
وفي نفس الوقت تنزل واحدة في اخوار الخمسينات من عمرها اسمها نوال من عربية ملاكي موديل السنة وتقف قدام مصلحة الكهرباء وتدخل الي مصلحة الكهرباء علشان يقابلها عزت فيبص لها باعجاب شديد فتبص له وتقول له
لو سمحت عايزا مكتب المدير
عزت
لية بس كدة.
نوال
افندم
عزت
اقصد اني ممكن اساعدك. واعمل لك اللي انت عايزا واحسن من المدير
فتضحك نوال وتقول
كدة طيب كويس ممكن بس قبل ما احكي لك مشكلتي تخلي حد يركن العربية بتاعتي علي اي جنب
وتبص ناحية العربية الملاكي. فيبص عزت للعربية بطمع شديد ويقول
العربية دي انا هاشيلها علي راسي من فوق واحطها في عينية. علشان خاطر صاحبتها
فتضحك نوال.،،،،،،،،،
ومن جوة مكتب عجمي يقول عجمي لشناوي
يا شناوي لازم تساعدني. لية جابر عمل فيك كدة
شناوي
ماعرفش والله العظيم. وعمري ما اتوقعت ان جابر يغدر بيا
عجمي
طيب تفتكر ان عزت وراء كل اللي بيحصل لك
شناوي باستنكار
عزت. لا خالص. دة حتي هو اللي بيربي بنتي. يبقي ازاي بس عايز ليا الشر
عجمي
انا هتجنن واحد زيك طيب وفي حاله لية يتعمل في كدة. ولو ماقدرناش نوصل لدليل مادي واضح وصريح. مش هاعرف اطلعك براءة وهاتقضي احلي سنين عمرك هنا في السجن بس انا مش هاسكت وهاحارب لغاية ما وصل للحقيقة واجيب لك حقك ولو ماقدرتش سامحني علشان في يوم كنت ضدك مش معاك
شناوي
ربنا يسامحنا كلنا. ،،،،،،،،،،
وبعدها بشهر كان عزت قاعد مع جابر وجابر بيقول
واخرتها ايه
عزت بضيق
عايز ايه يا جابر
جابر
عايزك تفوق بقي من حوار اللي اسمها نوال دي اللي انت لازق لها ليل ونهار ومش عارف اخرتة اية.
عزت
اخرتة جواز. ماهو انا مش هاسيب كل الملايين اللي عند نوال دي.
جابر
يا عزت كل الفلوس اللي معانا خلصت ولازم بقي نرجع نشتغل تاني
عزت
تاني اسرق واخطف واعرض نفسي للخطر عشان كام الف بيرميهم لينا الدكتور نصر
جابر
يعني ايه هانفضل عايشين علي مرتب الحكومه اللي ما بيكفيش عيش حاف
عزت
اتكلم عن نفسك انا خلاص اتفقت انا ونوال علي الجواز. وهي مقطوعة من شجرة هاتعيش لها كام سنة وتموت.وتبقي معايا فلوسها. وتعدي السنين وتكبر جميلة ويبقي معايا كمان فلوس شناوي وابقي غني غني جدا
جابر بزهق
يووووووا انسي بقي فلوس شناوي الوحيده اللي تعرف مكان الفلوس جيهان وخلاص ماتت وانت عملت المستحيل عشان توصل للفلوس لدرجه انك كتبت جميله علي اسمك وبردو ما وصلتش لحاجه
عزت
مسيري هاوصل واعرف الفلوس دي فين. وابقي زي الجوكر بتاع الكوتشينة لميت كل اللي يقابلني،،،،،،،،،
وبعدها بكمان شهر يقف عجمي قدام شناوي في التخشيبة ويبص له وهو حزين ويقول له
انا اسف يا شناوي. كان نفسي تطلع براءة
شناوي
انا عارف ان حكم المحكمة كان قاسي اوي. و15 سنة سجن فترة كبيرة. لكن ربنا قادر يهون عليه كل اللي جاي لغاية ماخرج لجميلة بنتي
عجمي
انا مش عارف اقول اية. بس كان نفسي اعمل حاجة وماقدرتش رغم اني حطيت جابر تحت المراقبه 24 ساعه وما وصلتش لاي جديد. بجد انا اسف يا شناوي
وساب عجمي شناوي ومشي وشناوي بيبص عليه، ،،،،
وفي نفس الليلة ومن قاعة كبيرة كان عزت يحتفل بجوازة علي نوال. وبحضور عدد قليل من المعازيم تمت الجوازة. وخد عزت مراتة نوال وراح بيها علي فيلتها اللي هايعيشوا فيها وقدام باب الفيلا وقفت نوال وبصت لعزت فاستغرب عزت وقال
وقفتي لية
نوال بصوت غريب وغامض
لغاية هنا وماقدرش اكمل
عزت باستغراب
انتي بتقولي اية
نوال
الجنة اللي هاتشوفها جوة الفيلا جنة تخص شيطان زيك. وعيش في الجنة علي قد ما تقدر واتمتع بكل اللي فيها سنة اتنين تلاتة زي ما يكون مكتوب لك. وبعد ما تمتلك الجنة هايبدتي وقت الحساب
عزت بنظرة مريبة
انتي مين
نوال
انا ممكن اكون مرات سالم اللي انت قتلتة. او مرات رشدي اللي مات علي ايدك او مرات شناوي. جيهان
فيستعد عزت للهجوم علي نوال ولكن يخرج تلت رجال اقوياء ويقفوا وراء نوال وفي ايدهم سلاح ومرفوع في وش عزت فيرجع عزت مكانة ويقف ويبص لهم باستغراب شديد وهو رافع ايده لفوق ونوال تقول له
يخرج المظلوم وهايبدأ وقت الحساب
عزت بعصبية شديدة
انتي مين
نوال
اتمنيت الفلوس وعلشانها قتلت وظلمت
وتبص للفيلا وتقول
اهه الفلوس قدامك. الفيلا دي باسمك والعربية اللي واقفة دي بتاعتك. وكمان جوة الفيلا. خزنة مليانة فلوس حلال عليك. بس لما يبدا وقت الحساب ياريت كل الفلوس اللي هاتبقي معاك تنفعك. وصحيح انا مش مراتك. والماذون اللي كتب الكتاب دة. مش ماذون اصلا. سلام يا عزت
وتضحك نوال وتمشي وسط رجالتها وعزت بيبص لها وهو يقول بصراخ شديد
ردي علية انتي مين.
ولكن نوال تفضل تضحك لغاية متركب عربية تانية وتختفي من قدام عزت وعزت يستغرب بشدة ويبص للفيلا بخوف شديد ويسال نفسه قائلا
مين دي
ويبص للفيلا باستغراب شديد. ويقول بكبرياء وغرور
اية يا عزت هاتخلي واحدة ست مهما كانت مين هي تلعب بيك وتضحك عليك. دة حتي تبقي عيبة في وشك يا عزت يا حديدي.
ويفتح باب الفيلا ويدخل الي الفيلا ويبص للفيلا بطمع شديد وينسي تهديد نوال له ويظل يلف في الفيلا وهو منبهر ويفتح اوضة وراء اوضة الي ان يفتح اوضة فيها خزنة كبيرة فيروح ناحية الخزنة ويفتح باب الخزنة ويلاقي فلوس فيتسعر عزت وتلمع عيونة بالطمع ويمد ايدة ويمسك الفلوس وهو فرحان ولكنة يلاقي مكتوب علي الفلوس اسم شناوي وسالم ورشدي ونقط من الدم فيرمي الفلوس بعيد عنه وهو خايف ولكنة بمجرد ما يهدي يروح ناحية الفلوس تاني ويبص للفلوس بصة شخص ضميرة مات. وقال وهو يمسك الفلوس في ايدة
أية يعني عايزين تخوفوني عزت الحديدي ما بيخفش وهاكبر بالفلوس دي وهابقي غول ياكل اللي يقرب مني ولو كانت الجنة بفلوسكم يا اهلا بيها. وانا مستني وقت الحساب اللي بتقولي علية يا نوال. ومستني المظلوم اللي هايخرج. مستني اي حد يقرب مني علشان اخلص علية ويحصل كل اللي فاتو. ،،،،،،،،،،،،،
وعدت السنين وكبر عزت وبقي مليونير وكبر معه جابر وخد مراتة وابنة وعاشو في فيلا كبيرة ورغم كل الفلوس اللي مع الاثنين فضلو عايشين في الحرام. ،،،،،،،،
وخرج شناوي من السجن. وابتدأ وقت الحساب
ونرجع تاني. لمكتب عزت في فيلته وكان عزت قاعد علي كرسي مكتبه فتيفتح باب المكتب ودخل شناوي ومعه جميله اللي كانت في ايديها كلابشات في أيدها وكان في ايد شناوي كيس بلاستيك ويصرخ عزت لكن ماحدش كان سمعه ويلبس شناوي الكيس البلاستيك في راس عزت ويمنع عنه الهواء ويحاول عزت انه يشيل الكيس البلاستيك عن وشة. لكن جميلة تكلبش ايدة بالكبلاشات ويفضل عزت يحاول الخلاص لغاية ما يموت
،،،،،،،،،وفجاه يفتح عزت عيونه وهو بيتنفس وكان وشه مصفر من شده الخوف ولقي جابر قدام منه بيقول له
اهدئه يا عزت مالك
عزت
كابوس كابوس
جابر
خير
عزت
مش خير شناوي وبنته عايزين يقتلوني
جابر
هو فين شناوي ده
عزت
كان واقف قدام الفيلا انت ما شوفتهوش
جابر
وانا جاي ماكنش في حد واقف قدام الفيلا
عزت
معقوله يكون مشي
جابر
هيمشي ويسيب بنته
عزت
اومال يكون راح فين
جابر
مش مهم دلوقتي راح فين المهم انت ناوي علي ايه
عزت
ناوي عليه في ايه
جابر
في موضوع جميلة
عزت
جميلة دي بنتي وماحدش هياخدها مني
جابر ضاحكا
ايه يا عزت انت هاتكدب الكدبه وتصدقها
عزت بعصبية
كدبه ايه جميله بنتي غصب عن عين الطخين
جابر
عزت فوق جميله مش بنتك وانت عارف وانا عارف انت بتربيها ليه ومسير الايام تلف وتدور وجميله تعرف انك السبب في موت امها وسجن ابوها.
عزت
وهو انا عملت ده كله لية مش علشان انقذك من دخول السجن
جابر
لا انت من الاول كنت طمعان في مرات شناوي ولما ورث طمعت كمان في فلوسه وانا لو كنت دخلت السجن ما كنتش هاخش لوحدي
عزت
بص يا جابر من الاخر كده انا مش هاخلي شناوي يجي ياخد جميله ومعها الفلوس علي الجاهز
جابر
يعني ايه هتحرم جميله من ابوها. وتفتح علي نفسك ابواب جهنم. انت باين عليك نسيت اللي اسمها نوال واللي قالتة ليك من زمان فاكر.
عزت بغرور شديد
مش عزت. اللي يخاف واللي عايز يقرب مني او من جميلة هاحرقة. دة كلها سنتين وجميلة تتم 22 سنة. ويظهر اللي معه مفتاح الخزنة وامتلك فلوس شناوي
جابر بزهق
يادي فلوس شناوي. يا عزت انت بقي عندك اللي يكفيك وزيادة. انسي بقي فلوس شناوي دي
عزت
مش هانسي انا ربيت جميلة السنين دي كلها علشان اللحظة دي
جابر
بلاش تكذب علي نفسك. انت ربيت جميلة علشان تفضل قدام عينك وتشوف فيها جيهان حبيبتك. وياعالم هاتستحمل لغاية امتي قبل ما تطلب من جميلة العلاقة الل،،،،،،،
عزت مقاطعة له وبعصبية
اسكت. مش عايز اسمع ولا كلمة تاني. جميلة بنتي
جابر
تاني. دة انت بتبص عليها وهي نايمة. وهي ماشية وهي بتتكلم وهي بتضحك. بصة راجل لمراتة عشيق لعشيقتة وتقولي بنتي
عزت بانيهار
ايوة بعشقها وبحبها. واللي انا عايزة من جميلة هايتم ولو غصب عنها
جابر
انت حر. بس خليك فاكر الطريق دة اخرة عذاب ليك. وشناوي مش هايسيب بنتة
عزت بغضب مخيف
شناوي لو قرب تاني من جميلة هاقتلة،،،،،،،،،،
وتعدي الليله وتاني يوم الصبح من جوة قسم يقف شناوي قدام ظابط اسمه زكي وقدم شناوي بلاغ في عزت بانه خاطف بنته وبص له الظابط باستهزاء وقال
عزت الحديدي رجل الاعمال المشهور سرق بنتك انت
شناوي بصعوبه
اه خليتها معه لغايه ما اطلع من السجن وطلعت لقيته بيقول انها بنته هو
زكي
انت مجنون يا راجل انت يالا امشي غور من هنا هو انا فايق لك علي الصبح
شناوي بعصبيه وبتهتهة
هو ح حضرتك م. مش مصدقني ليه
زكي
عشان انت باين عليك متخلف ومش ناقصه شوف منظرك عامل ازاي وجاي تتبلي علي راجل زي عزت الحديدي
شناوي بصعوبه شديده
انا مش متخلف انا واحد مظلوم وعايز حقي واتكلم معايا باسلوب احسن من كده
فيقوم زكي من علي مكتبه منفعلا ويقول
انت يا عبيط يا ابن العبيط هاتعرفني انا اتكلم ازاي وحياه امك لعلمك الادب
ويهجم عليه زكي ويضربه بالقلم علي خده ويقع شناوي وهنا يدخل الي. المكتب بالصدفة ظابط تاني اسمه
صالح ويقف صالح قدام زكي ويمنعه من الوصول لشناوي ويقول. صالح لزكي وهو يبص بضيق
مش هاتبطل طريقتك دي بقي. عمل ايه الراجل ده عشان تضربه
زكي بمنتهي الغرور
العبيط ده جاي يقدم بلاغ في عزت الحديدي رجل الاعمال المشهور وبيقول في انه كتب بنته باسمه ولما بقول له ازاي واحد زي عزت يخطف بنتك بيقول لي اتكلم باسلوب احسن من كده
ويبص زكي لشناوي اللي لسة علي الارض ويقول بعصبية
وحياه امك لعرفك ازاي تتكلم مع زكي السماك
ويحاول زكي الهجوم علي شناوي مرة تانية لكن صالح يمنعه ويقول له
ايه انت مجنون عايز تضرب واحد من سن ابوك
زكي. لصالح
ابويا ايه يا صالح ما تظبط كلامك هو انا ابويا شحات زي ده
فيزق صالح زكي بعيد عن شناوي وهو يقول
طيب اهدئه وروح ااقعد علي مكتبك
زكي وهو رايح لمكتبه
مابقاش الا زباله الشارع كمان تقول لي اتكلم باسلوب احسن من كده
ويقعد علي مكتبه وهو يقول
وحياه امك لوريك يا رمه
فيبص صالح ناحيه شناوي اللي وقف وقاله صالح
حقك عليه يا حاج
زكي
وكمان بتتأسف له في ايه يا صالح
صالح بانفعال
ما خلاص يا زكي بقي اتعامل مع الناس احسن من كده يا اخي
زكي بتعالي وغرور
هما دول ناس ياما نفسي البلد تنظف من الاشكال دي بقي
فيبص له صالح ويقول
والله البلد دي عايزه تتنظف من اشكال تانيه
وياخذ صالح. شناوي ويقول له
تعالي معايا يا حج
زكي
مش هايروح معاك في حته الا لما اعلمه الادب
صالح
فكر كده تقرب منه وانا اللي هاعلمك الادب
ويبص صالح لزكي بص تحدي وياخذ شناوي ويخرج به من مكتب زكي وزكي يبص وهو مضايق،،،،،،،
ومن جوة مكتب صالح يقعد شناوي وصالح بيدي له كوبية شاي وبيقول له
حقك علي راسي من فوق يا حج.
شناوي باكيا
هو انا كنت عملت اية علشان يحصل فيا كدة
صالح
طيب ممكن تشرب الشاي وتهدئة. وعايزك تحكي لي حكاية بنتك دي يمكن اقدر اساعدك.
ويحكي شناوي حكايته كلها للظابط صالح ويقوم الظابط صالح بالاجرءات المطلوبه ويطلب عزت وعزت طبعا ينكر كل الكلام اللي بيقولو شناوي ويقدم الاوراق اللي تثبت ان فعلا جميلة بنته ومابقاش قدام صالح الا تحليل ال d n a
لاثبات النسب
ومن داخل فيلا عزت يقف الظابط صالح ومعه شناوي وامامهم عزت ويقول صالح لعزت
عم شناوي جه القسم وقدم بلاغ في ان بنته جميله موجوده عندك في الفيلا وانت كتبتها باسمك
عزت
مين شناوي ده
شناوي بتهتهة
انت مش عارف مين شناوي. ده العبيط اللي ساب لك بنته بايديه كان فاكر انك صاحبه واخوه وهتحافظ عليها
عزت للظابط صالح
حضره الظابط واضح ان شناوي ده غاوي افلام عربي قديمه انا اول مره اشوفه
شناوي
كداب
صالح
عزت بيه ممكن اشوف جميله
عزت
جميله بنتي فوق ممكن اندهه لحضرتك واجيب كل الاوراق اللي تثبت انها بنتي انا
وبالفعل يطلع عزت فوق وينادي جميلة من اوضتها ويجيب معه شهاده ميلاد جميلة وبطاقتها اللي تثبت انها بنته فينظر صالح الي الاوراق وعم شناوي بيبص لجميلة باشتياق شديد ويتمني ان ياخذها في حضنه وهي تنظر له فيقول صالح لشناوي
عم شناوي اوراق عزت بيه كلها سليمه والانسه جميله فعلا بنته يا تري معاك اي اوراق تثبت انها بنتك
شناوي وهو لسة باصص لجميله ولا يرد ويقول لنفسه وهو يبكي اشتياقا.
كبرتي يا جميله بابا وطالعه حلوه زي امك جيهان الله يرحمها
ويسمع صوت جميله في خياله وهي ترد قائلا
انا طالعه حلوة ليك انت يا بابا
شناوي
يا تري يا جميله بتحبي حد غير بابا
جميله
لا انا بحب بابا وبس
فيسمع صوت صالح وهو يقول بصوت عالي
عم شناوي رد عليه
فينظر له شناوي ويقول
هه انا معاك
صالح
بقول لك معاك اوراق تثبت ان جميله بنتك
شناوي
في شقتي شهاده ميلادها ومن غير شهاده الميلاد انا كنت ديما بقول لها جميله بابا وهي فاكرها
ثم ينظر لجميله ويقول
مش انتي فاكره مين بيقول لك جميله بابا
جميلة بانكار
انا أول مره اسمع الجمله دي
فيبص لها شناوي باستغراب شديد وعزت باستغراب اكثر لانها قالت لعزت من قبل انها سمعت جمله جميله بابا كثير ودلوقتي بتنكر فسأل عزت نفسه
ليه عملت كده
صالح
عموما. أن الانسه جميله تفتكر الجمله دي او لا ده مش دليل يا عم شناوي لازم دليل مادي
عم شناوي
انا حدفت ليها صوره ليا وانا معها وشايلها وهي صغيره
صالح. لجميله
حصل يا انسه جميله وحدف لك صوره
جميله
ما حصلش انا اصلا اول مره اشوف الراجل ده دلوقتي
عم شناوي
ازاي ده انا كنت واقف تحت بلكونتك
جميله
انا ما عرفكش
ثم تنظر جميله الي الظابط وتقول
في حاجه تاني مطلوبه مني
الظابط صالح
لا تقتدري تتفضلي
فتسيبهم جميلة وتطلع جري علي اوضتها وشناوي بيبص لها ويقول
هي بتقول ليه كده دي مش بنتي. انا عايز جميله بنتي
عزت
حضره الظابط ممكن تاخد الشخص ده وتكشف علي قواه العقليه
شناوي
انا مش مجنون جميله دي بنتي وممكن يا حضره الظابط نعمل تحليل يأكد الكلام ده
صالح
دة حل معقول. برضو، ،،،،،،،،
وبالفعل يلجا الظابط الي تحليل ال d n a. لاثبات النسب
ويمر كام يوم ويطلب صالح حضور عزت وشناوي عزت الي مكتب الظابط صالح. علشان نتيجة تحليل ال d n a ومسك صالح نتيجه التحليل في أيده وبص لشناوي وقال
جميله مش بنتك يا عم شناوي
عزت
صدقتني يا حضره الظابط لما قولت لك ده مجنون
فيبص صالح لي عزت ويقول
ولا بنتك انت كمان
فينصدم عزت وشناوي ويقول عزت
اومال بنت مين
فيتفتح باب المكتب صالح ويدخل رجل في الستينات من عمره ومعه اوراق وشهادة ميلاد تثبت نسب جميلة له ويقول
جميله بنتي انا، ،،
فيبصو كلهم باستغراب شديد ،،،،،،،،،،،
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية لعبة الغدر 2)