رواية أنارت عتمة قلبي الفصل الثاني 2 بقلم عائشة البشير

رواية أنارت عتمة قلبي الفصل الثاني 2 بقلم عائشة البشير

رواية أنارت عتمة قلبي البارت الثاني

رواية أنارت عتمة قلبي الجزء الثاني

رواية أنارت عتمة قلبي الحلقة الثانية

قراءة ممتعه💜
” عندما تكون نقياً من الداخل، يمنحك الله نوراً من حيث لا تعلم ، يحبك الناس من حيث لا تعلم ، و تأتيك مطالبك من حيث لا تعلم ..صاحب النيه الطيبه هو من يتمنى الخير للجميع دون استثناء .. ف سعادة الآخرين لن تؤخذ من سعادتك ، وغِناهم لن ينقص من رزقك ، وصحتهم لن تسلبك عافيتك ، واجتماعاتهم بأحبتهم لن يفقدك أحبابك .. دائما كن الشخص الذي يمتلك النيه الطيبه اللهم نسألك سلامة القلب..💙 ”
ثاني يوم الصبح في حوش الحاج الطاهر اللي كانو الكل فيه متأخرين على أشغالهم ومدارسهم ماطاوعهمش قلبهم يطلعو قبل مايطمنو على الطاهر بعد ماعرفو إنه مرض إمبارح
معتصم: هيا ربيع وريان أطلعو معاش وقت تأخرتو راهو،
ريان بدلع: ماهو ماقدرناش نطلعو إلا مانطمنو على جدو حبيبي
ربيع، بنص عين😒: بطلي تمستيك وأشحطي لسانك
ريان، بغضب😠: وأنت شني دخلك فيا صبح يافتاح

رويدا بتفنيصه: عيب أنت وياها جدو مريض وشوفوه كيف رقد تعبان ياناري خلاص أطمنتو عليه ولا لا هيا أطلعو وتو روحكم
طلعو ريان وربيع وكل واحد يطنفر على الثاني
رويدا، بضيق حتى أني تأخرت في جرتهم المصايب هاذم
معتصم يشوف لناديه اللي راقده على الكرسي، وأبتسم شوفيها ماشيه في سابع حلمه
رويدا، بحزن: ياناري مسكينه مارقدتش إمبارح ديمه وهوا جدو فاجعها غريبه ماجاهاش هيا السكر من الرعايش اللي تحصل فيهم
معتصم، بقلة حيله: والله ربي يكون في عونها وخلاص، هيا نوضي نطلعو
طلع معتصم أما رويده غطت ناديه وطفت الضي وطلعت وسكرت وراها الباب، ولحقت على خالها قبل مايخش للصاله: خالو
معتصم تلفت: نعم ياخالو تبي شي ناقصك شي
رويده هزت رأسها بالنفي: لا ياخالو مانبي شي بس بنسألك شني صار في الموضوع اللي قتلك عليه مش على أساس بتكلم جدو وتقنعه
معتصم حك شعره 😅: والله نسيت ياخالو عندي قضيه نستني حتى أسمي
رويده، بخوف: طمنتني هلبا ياخالو صعب هالمجال للدرجه هذي
معتصم، ضحك😁: هههههه نسيتك يادعوه لا لا ماتخافيش إنتي قدها وقدود عارفك تهني ماشاء الله بس ردي بالك توقفي في وجهي في المستقبل مانرحمكش راهو
رويده :هههههه غير تملي اللي قتلك عليه بس وكون هاني لو جيت أنت محامي الخصم نتنازل طول
معتصم😉: أيواه ماتحشميش خالك، لما شاف ريان وربيع طالعين، أبتسم😊: خلاص حاضر خليه يشد صحته وهاليومين يكون موضوعك كامل، هيا توكلو باش ماتتأخروش أكثر
طلعو هما، وهوا خش وقعد يضحك 😂على شكل محسن اللي دايخ في الصاله من سهر إمبارح
معتصم، بضحكه😅: صار حصلت أنت يامحسن
محسن عين مفتوحه وعين مسكره وبتعب: وأنت بايت في الملحق إمبارح مالقيتكش هارب صار
معتصم: تي عارفه بيديرها من الظهر واكل فازو شكلاطه بحاله ومن غير الشي الثاني باهي اللي ماتوكل بكل هالمره
محسن، بخوف: الحمدلله ألطف بينا ربي، وقام عيونه للباب لما شافه إنفتح بس بسرعه مانزلهم لما شاف نبيهه والصغار وقلب وجهه للجهه الثانيه
قربو أيهم وأيمن ونبيهه: صباح الخير

معتصم، بإبتسامه: صباح النور والزهور😁
محسن من غير مايرد فتح إيديه لولاده اللي قربو منه وحضنهم وباسهم من غير مايقيم عيونه لنبيهه أو يعيرها اي إنتباه
أيهم، بخوف: صح جدو مرض إمبارح
محسن، بضيق: وأنتم مني قاللكم
أيهم: توا تلاقينا مع رويده في الجنان وأحني طالعين وهيا قالت
محسن، بضيق: صح تعب شويه بس توا كويس
أيمن، ببراءه: يعني أنت رقدت لوطه على خاطر جدو مرض !!
محسن قام عيونه بضيق لنبيهه اللي واقفه ساكته جنبهم مايبيهاش تفكر أنه اللي داراته راح يمر بالساهل وأنه نومته في حوش أهله على خاطر بوه كان يبيها تحس بغيابه وتندم وتعتذر، ورجع نزلهم وتلفت لمعتصم اللي شاد ضحكته وعلى أساس لاهي بتليفونه، تنهد بضيق: يلا يابابا ماتعطلوش على مدرستكم
أيهم، بزعل☹: نبو نشوفو جدو قبل
معتصم: جدو توا خليته راقد بعد تروحو من المدرسه تعالو وشوفوه تمام😊
نبيهه لما شافت أنه محسن متجاهلها ومش معبرها وماكلفش نفسه حتى إنه يقيم عيونه فيها جبدت الصغار وهيا تقول بضيق: خلاص ماما هيا تعالو نمشو باش ماتتأخروش، إن شاء الله لاباس عليه، وطلعت وهيا شاده الصغار اللي كانو متلفتين لبوهم ويأشروله بإيديهم 👋، وهوا ردلهم نفس الحركه وهوا متصنع الإبتسامة
معتصم صفق إيديه في بعض وهوا يضحك😂: مراهقه متأخره أنت راهو أعبي بروحك
محسن، بغيض: تعرف تنو…….وقبل مايكمل كلامه سكته صوت مراد اللي خش وهوا يقول
مراد: صبح يافتاح ليش العياط
محسن، بغضب😠: خليناه الروقان ليك أنت ياباشا راقد من العصر لاتندري عليها خلت ولاعمرت
مراد، بإبتسامه😊: وأنت شني واجعك بالضبط!!
معتصم شد محسن من إيده وهوا فاتح عيونه على وسعهم، وبإستغراب🤔: هذي إبتسامه على وجهك ولا أني نتخيل، شوف يامحسن مراد مبتسم سجل الساعه والتاريخ بسرعه
محسن نفض إيد معتصم اللي شاد بيها إيده وناض وهوا معصب: أقعدو فيها، وطلع بيركب لشقته بعد ماأطمن إنه نبيهه والصغار طلعو للمدرسه
مراد، أبتسم بهزوه😏: يالطيف ماينقربش صايرله إلتماس على الصبح شكله، هذا كله على خاطر سهر في جنب بوه إمبارح
معتصم، بتساؤل: قصدك عندك علم بي بوي تعب إمبارح
مراد هز رأسه بالنفي: لا لا بس توقعت يصير هكي، شي طبيعي بعد اللي كلاه، أكيده قاعد راقد توا!!
معتصم هز رأسه بالإيجاب من غير مايتكلم
مراد تنهد بضيق على الحاله اللي كل ليله تصيب بوه واللي السبب فيها عمايل إيده، ولف متوجه لجناح صغار أخته
معتصم وقف: كأنك ماشي للصغار راهم طلعو
مراد من غير مايتلفت: عارفهم شفت منصور طالع بيهم، بس نبي نشوف نوال قبل مانطلع للشركه
معتصم بهزوه: برا شوفها في حوشها

مراد وقف وتلفت بإستغراب: ماتقولش روحت بس!!
معتصم، بضيق: أي ومن إمبارح جاها سي السيد وهيا طلعت من غير ماتعطي علم لحد بكل، لولا البنات قالو لرويده قبل مايطلعو راهو مافيش حد علم بيها
مراد زفر بغضب😠: نفس كل مره حالتها هذي معاش ينسكت عليها بكل، اليوم نمشيلها ونفهم منها بالضبط شني اللي قاعد يصير معاه
معتصم، بهزوه😏: هذا كان قالتلك الحق ومالفقتش كذبه زي كل مره،
مراد، بغضب: وحتى كان ماتبيش تتكلم أني توا نعرف بطريقتي، المره هذي مش راح نسكت ونسايرها
معتصم: دير اللي تعرفه صح حتى أني مش راضي على اللي قاعد يصير معاها لكن عارف بوك مايبيش من يدخل في الموضوع هذا
مراد كور قبضة إيده بغضب، ولف وطلع من الحوش ومعتصم وراه
معتصم، بغمزه😉: إلا ماقلتليش شني سر الإبتسامة العريضه اللي على الريق هذي مش من عوايدك
مراد، بنص عين😒: شني حرام ولا عيب، غير رقدت رقده مريحه بس
معتصم: لا حرام ولا عيب بس شي يحير بصراحه لازمه إستفسار وتحقيق وتدقيق من نوع خاص
مراد تنهد بملل: عاد أنت هذي خدمتك، ماقلتليش أمتي القضيه متاعك؟
معتصم، بجديه: الإربعاء بإذن الله معا الواحد أخر قضيه هيا، عارف متوتر على الأخر أول قضيه ليا بروحي وصعبه لأنها من نوع حساس هلبا
مراد: بالعكس هالقضيه هيا اللي راح تفتح الطريق قدامك وتشوف لو ربحتها كيف إسمك راح يرن رنان
معتصم ضحك: قالك رنان لا أنت مش طبيعي باللهي قولي ماتخلينيش محتار
مراد ضحك على شكل معتصم وهوا يحك في رأسه بحيره: أنت دوتك فاضيه وبتعطلني معاك هيا أقعد فيها وطلع متوجه لسيارته
مراد بحيره فيه حاجه خاشه في الطريق أكيده، الزفت نساني قبل بنقوله على موضوع رويده يلا حتى غذوه
********************************************

أما عند ملاك من لما صلت الفجر معاش قدرت ترقد هيا من اول الليل نومها متقلق ورأسها صداع من كثر البكي، قعمزت وقعدت تسبح في مكانها لين جي موعد المدرسه نوضت أدم باش يوتي روحه وهيا خشت للمطبخ باش توتيله فطوره هوا وأمها اللي على نوضه توا
عمار فتح الباب وخش في الممر: ملاك تعالي دخلي الصغار بسرعه مستعجل
ملاك طلعت من المطبخ، وبإبتسامة: صباح الخير كيف حالكم اليوم
عمار أكتفي بهز رأسه من غير مايتكلم
ملاك مدت إيديه وخدت رفيف منه، وتكلمت بتوتر لما شافاته بيطلع: قتلك مروه بتخطم عليا تبيني نمشي معاها للسوق ياريتكم الصغار ترفعوهم لخالاتهم مانقدرش نمشي ونخليهم معاي أمي مش راح تقدرهم
عمار، بغيض: توا وقته هالكلام ليش ماقلتي من إمبارح بري دخلي الصغار صقع وأجليها المشيه للسبت عبير عطله ودف الصغار وطلع وسكر الباب بقوة
ملاك أني مضايقه وزادت وجعتني روحي كيف يعاملو فيا هكي أستغفرت ربي ودخلت الصغار وأني ساكته
بعد مافطرتهم هما وأمي وسقدت أدم للمدرسه رجعت أمي إتكت وحتى الصغار رقدو يكملو نومهم وأني فتحت الفيس بعتت رساله لمروه أني مانقدرش نمشي على خاطر الصغار، وخشيت على الصفحه على أساس بنزل منشور بس ماعرفتش نكتب ولا حرف وكأنه دماغي تشتت ومش عارف يجمع الحروف مع بعض لما نكون مضايقه مانعرفش نعبر وحتي لو عرفت راح تكون كلماتي سلبيه وغير مبهجه للقارئ فلهذا سكرته وقلت أفضل شي نشتغل على التصميم وخلاص
بينما هوا كان مقعمز على مكتبه وعيونه على التليفون ويستني في أخر المنشورات وكل شوي يخش على الصفحه يتأكد لو فيه منشور جديد أو لا، هالشي اللي قاعد يصير معاه وكيفية تأثره بشي لهالدرجة خلاه هوا نفسه يستغرب من تصرفاته بس اللي عارفه أنه الرغبه اللي قاعده تتكون في داخله لإستكشاف شخصية اللي قادر يكتب هالكلام بالإيجابيه هذي أقوى من أي شي ثاني وأقوى حتى من غروره وكبريائه اللي مايسمحولاش من قبل يثأتر بشي مكتوب، بس الواضح أنه راح يبدأ يتنازل على هالغرور شيئا ف شي وبرضاه
” في غفلة منا نتغير نحن ومبادئ عاشت معانا عقود، ونتنازل عن بعض الأشياء التي كنا نظن أنه من المستحيل تركها ولكنً نصبح على قناعه بأنه القادم أجمل، وماأحزنك الله إلا ليسعدك ”
إطمئن❤
**********************************************

شقة في الدور الثالث ف أحدى العمارات، إنفتح بابها وخشت نوال بعد ماوصلت بناتها للمدرسه، وكملت حصصها في مدرستها اللي مش عارفه شني عطت فيهم أصلا وهيا مهمومه ومتضايقه وبالها مشغول في المديره اللي طلبت إنها تخلص أقساط هالسنه قبل نهاية هالإسبوع، ومن وين راح تجيب الفلوس بعد اللي صار، قعمزت على أول كنبه قابلتها والتفكير راح يفجر رأسها وهيا تذكر في يوم أمس
Flashback
نوال، بغضب: عادل قول الحق أني الفلوس كنت حاطتهم في الدولاب مني بيأخذهم غيرك يعني!!
عادل مقعمز يفطر ولا على باله، وبعدم مبالاه: مانعرفش شني مافيش غيري في الحوش شوفي روحك ولا بناتك مرات هما اللي خذوهم
نوال، بعياط: شني إنشوف روحي ماتهبلنيش أمس شفتهم قاعدات، والبنات نعرفهم مستحيل يأخذو حاجه من غير مايشاوروني، وبعدين حتى لو بيأخذو عشره عشرين مش سته ألاف راهو
عادل قام طاسة الشاهي وشربها مره واحده ولوحها تلويح في السفره، وبضحكه مستفزه: إيه أني خذيتهم وشني تبي أنتي توا أطلعي من دماغي ماتخلينيش نصبح عليك
نوال، بعصبيه: كيف تأخذهم نقولك أقساط مدرسة بناويتك وأني طالبتهم طلبه ويعلم الله قداش متحشمه وأني نمد في إيدي لبوي وأنت تقولي خذيتهم بدم بارد
عادل جبد المخده وإتكي ودف السفره برجله، بعدم مبالاه: وعادي شني يجو ستة ألاف في بحر الملايين متاع بوك أطلبي منه ثاني مش بنته المفروض مايشدش عليك
نوال، بغضب: عادل طلع الفلوس وأقصر الشر بنمشي نخلص مدرسة البنات وبنروح بيهم وقت
عادل، بهزوه: فلوس شني ألحسي ظهرك ياماما إمشو بحه
نوال، بصدمه: كيف مشو وين درتهم!! مشيت صرفتهم على شلة الخامرين اللي مصاحبهم، تتسمم في السم الهاري أنت وياهم على حساب بوي اللي لولاه راك ميت بالشر انت وبناتك
عادل ناض قعمز، وبغضب😠: أنتي تعايري فيا بالقرشين اللي تجيبي فيهم من بوك، كأنك مقومه راك ضاربه منه حاجه باهيه عليها القيمه ماتشوفيش فيه كيف معيش صغار أختك تقول صغار الوزير، الرزق اللي يتمتعو بيه هما حتى بناتي عندهم حصه فيه هذا رزق جدهم
نوال بهزوه😏: إما صحيح اللي إستحو ماتو فعلا، تقارن في الصغار اليتامي ببناتك اللي أمهم عايشه وبوهم هكي كبره يأكل ويتكي، كأنك راجل صح راك تخدم وأنت اللي تصرف على بناويتك وتخلص في مدرستهم مش طامع في فلوس غيرك وتخلي فيا نطايح للي يسوي واللي مايسواش، الله يلعن هذيكا الساعه اللي شفت فيها وجهك
عادل وقف بعصبيه😡: صار توا طلعتلك مش راجل يابنت ال……، وقرب وشدها من شعرها، وبعياط: أنتي شكله لازمك تأديب ليا فتره مخليك على راحتك، وطاح فيها عطاها طريحه وكان يتجنب في وجهها قدر الإمكان باش مايلاحظوش أهلها لأنه عارفها هيا مش راح تتكلم لو هما ماشافوش عليها شي، وبعد مافش غله فيها نزلها يشحشح فيها وخطم على بناته في المدرسه وطلعهم قبل ماينتهي الدوام ورفعها هيا وبناتها لحوش بوها

Now
نوال مسحت دموعها وهيا حايره كيف تتصرف ماتقدرش تحكي لخوتها اللي كل مره إدرق وتكذب عليهم عارفتهم مش راح يرضو ويخلوها عنده بعد مايعرفو بعمايله وإنه يمد في إيده عليها، وماتبيش تزيدهم حمل فوق حملهم ياسرهم متكفلين بصغار أختها اليتامي، مش ناقصهم تزيد عليهم حتى هيا ومعاها ثلاثه، وحتى فكرة الطلاق في نظرها مش ساهله بعد هالعمر وبناويتها صبايا بتتشوه صورتهم وتهتز نظرة الناس ليهم لما يعرفو أنه بوهم بهالشكل وفوقها أمهم مطلقه، وفي نفس الوقت تعبت وإستنزفت كل طاقتها وصبرها في قولت أصبري يامرأه أنتي مش صغيره باش تمشي وتحرجي وتشكي من أتفه شي، أصبري يامرأه وتحملي على خاطر هالصغار اللي درتيهم في رقبتك، أصبري يامرأه توا يجيه يوم ويتغير ويولي على تالياته، أصبري يامرأه وماتحشميش روحك وتقعدي مضحكه قدام الناس بعد هالعمر وبناتك كبرو وقريب يولو طولك، ماكانتش مفكره أنه الصبر هذا كله كان هوا السبب اللي قتلت بيه روحها بالعرق، خسرت بيه أحلى سنين عمرها، وساهمت في إنها تشتت بيه بناتها وهما عايشين هالعيشه مع أب مستهتر وغير مسؤول وأخر همه إذا كانو جعانين أو شبعانين، لابسين أو لا، دافيين أو صقعانين، متعلمين أو جاهلين سواء قرو في مدارس كويسه أو لا، كله عنده واحد
وقفت وهيا تتنهد لما سمعت الباب يطق لفت حجابها وقدمت وهيا مستغربه مني جايها في هالوقت، وتكلمت من وراء الباب: مني!!
مراد: أفتحي يانوال هذا أني ” مراد خوك ”
هالكلمه اللي كان هوا متقصد يقولها باش يحسسها بمعناها، قدرت تسكن قلبها وتزيل ضيقته وتحسسها إنها صعب تنكسر طول ماعندها عزوه وسند وراها، حاولت تمسك دمعتها على قد ماتقدر وفتحت الباب وهيا تتصنع في الإبتسامه
مراد، بشك: يعني هذا هوا كل الموضوع أقساط المدرسه!! وليش ماتكلمتي علاش إضايقي في روحك على خاطر وسخ إيدين مافيش حاجه تجيبها الفلوس وتستاهل تكدري روحك على خاطرها
نوال، بضيق: عادل عمله هالفتره بلهون واللي يحصله مع معاشي ياذوبك مكفينا مصروف، ماقدرناش نوفرو أقساط المدرسه، نفكر نحولهم في مدرسه عامه مادامنا قاعدين في بداية السنه
مراد، برفض: لا شني تحوليهم وبتول شهاده السنه هذي، وحتى بيلسان عندك ضعيفه شويه تحطيها في عامه تريح فيها البنت بكل، وبسنت صغيره وقدها بلهون المدرسه العامه ماتناسبهاش
نوال نزلت رأسها بأسف: وحتى أني هذا ليش فضلت الخاصه في الأول قلت لين يشدو روحهم شويه، وأني نقري في عامه وعارفه الوضع كيف، ولما حطيناهم وضعنا كان أفضل بس توا الله غالب الواحد مطر يمشي حاله كيف مايلقي
مراد: لا تحوليهم ولا تجي جيهتهم بكل البنات من السنه هذي لين يتخرجو من الثانوي أني اللي متكفل بأقساط مدرستهم وأي حاجه يبوها هذي وذني مش مسامحك راهو لو إضايقي روحك على خاطر الفلوس وأني موجود
نوال، بأسف: صحيت يامراد بس والله مالازم تكدر روحك عادي يقرو في مدرسه عامه زيهم زي الصغار
مراد، بتفنيصه: شني تكدر روحك هذي ماتخلينيش نحرج منك أحني خوتك شني تسوى عيشتنا لو واحده فيكم متكدره ومضايقه، أنتي ونهي ريحة الغاليه وأمي قبل ماتتوفي وهيا تقول مانوصيكمش على خواتكم ونوال بزايد
نوال نزلت دمعتها أمها الوحيده اللي كانت عارفه بالوضع اللي هي عايشاته، بدموع: ربي يرحمها ويغفرلها
مراد وقف وباس على رأس أخته، وقربز قدامها وبرجاء: ومعزتك عندي ماعاش اللي يهينك وعيني حيه ولاإضايقي روحك لا على فلوس ولا غيرها رقبتي ليك، بس ورحمة الغاليه ردي بالك إدرقي عليا حاجه أني خوك سترك وغطاك ومستحيل نرضي بأنك تنهاني حتى لو كان من أعز الناس على قلبي، ونأخذلك حقك قبل ماتبرد نارك اللي صار معاش نبيه يتعاود وأني معاش نغفل عليك وعلى بناتك بإذن الله
نوال حست من كلامه أنه هوا فعلا مش مصدق إنه حالتهم الماديه وأقساط المدرسه هما السبب الرئيسي اللي ديمه تحرج على خاطره، بس فضلت إنها تلبس قناع الإستغباء وتسكت، بإبتسامه😊: ربي مايحرمني منك ويفرحني بيك ونشيل صغارك بين إيديا عن قريب إن شاء الله
مراد وقف، وبنص عين😒: يعني مالقيتيش إلا هالدعوه شوفي واحده غيرها بسرعه
نوال، ضحكت😁: لا خلاص وصلت فوق وإن شاء الله يكون باب العرش مفتوح
**********************************************

يوم الجمعه اللي من خير الأيام وأبركها عند الخالق وتجتمع فيه الملائكه لتغفر سيئاتنا وتمحي ذنوبنا كل ماأستغفرنا ولهج لسانا بذكر الله، بس بعض الناس هداها الله تفوته في تحصيل الذنوب في الجمعات زي ماكان صاير في حوش الطاهر
العيله كلها متجمعه في حوش الطاهر اللي يعتبر خوهم الأكبر بعد وفاة خوهم الكبير ومن سنين ولت عندهم عاده جمعتهم عنده وبالأخص هالجمعه ماغاب فيها حد بعد ماسمعو بمرضته، خواته الإثنين ومرت خوه الهادي وبنتها هديل وبنات خوه المرحوم شعبان بو نبيهه، سبيل وسما، وهوا كان مقعمز بين خواته سعاد وربيعه
سعاد أخته: بعيد السوء عليك ياوخيي الغالي، من بعد ماغابت الباهيه وأنت صحتك كل يوم في النازل مش لاقي اللي قايماتك زيها، وهيا تشوف لناديه بنص عين
ربيعه، بحقد: الله غالب هذا حد يومها مسكينه خلتها واسعه وعريضه ياويله اللي مايشوف لهاليوم ويتعض منه
سعاد، بلوم: وأنتم خيركم يانهي يابنيتي أنتي ونوال ماتهتمو بي بوكم وإطلو عليه ديمه على مني عابيين تخلوه لين يريح منكم وأنتم تتفرجو
نهي، بإبتسامه: بعيد السوء عليه ياعمتي إن شاء الله بعد عمر طويل، وبعدين أحني متهنيين عليه وحاطين إيدينا ورجلينا في إميه بارده مادامه عمتي ناديه معاه يشهد الله إنها مش مقصره وقايماته على كفوف الراحه، غير هوا بوي يقيس في غلاه مره مره كلامي حق ولا لا يابوي!!
ناديه تنهدت براحه من كلام نهي بعد ماكان التوتر غالب على ملامحها ومضايقها كلام حمواتها اللي ديمه هذا حالهم كل مايجوهم وهما متقصدينها على تلقيح وتسهويك، ناضت للمطبخ قبل مايتكلم الطاهر خايفه منه يزيد يحرجها قدامهم
الطاهر، بتعب: كلكم خير وبركه وهذا مريض السكر ماينعرفله حاله يوم باهي ويوم بلهون الحمد لله على كل حال
ريان بضحكه😁 لرويده: شفتيه جدو تقول عليه مش إمدايرها بروحه العمله
رويده حطت إيدها على فمها باش ماتبينش ضحكتها🤭: ضمي فمك وفكينا من بلاك توا عمتي سعاد تنط فينا شني يسكتها بعدين
ريان، بحقد: بس مسحو على كبدي عماتي كيف يلقحو على ناديه
رويده، بتفنيصه: تحشمي عيب عليك باش واصله فيك المرأه باش تكرهها بالشكل هذا
ريان كيف بتتكلم بس سكتت وتلفتت لخالتها لما تكلمت
نهي: ريان رويده تعالو معاي خالتي نوتو السفر للغذي ونعاونو عميمه ناديه الجمعه قريب تكمل وخوالكم والرجاله على مرواحه
ناضو البنات مع نهي وناضت معاهم سبيل بنت عمهم بعد ماغمزتلها نبيهه أختها إنها تنوض معاهم، وشويه ولحقتها هديل، وسما نادت ريان ومشت هيا وياها للدار ولهو في النت، والباقي قعدو يحوسو في المطبخ ويوتو في الغذي
مراد من الباب الخارجي، بصوت عالي: نهي رويده
نهي تعالا مروده ماهناك حد براني
مراد خش وهوا مضايق: مش قتلك مليون مره الدلع هذا فكينا من…….. وسكت لما إنتبه لهديل وسبيل واقفين
هديل قربت منه ومدت إيدها وهيا مبتسمه😊: كيف حالك مراد عاش من شافك
مراد تفاجئت من حركتها معروف أني مانحبش نسلم على البنات ومش من النوع اللي نأخذ ونعطي معاهم، وهيا حطتني في موقف محرج بصراحه بس أكتفيت بالكلام من غير ماإنمد إيدي، بضيق: الحمد لله عمتي هيا سقدونا بالغذي، وطلعت بسرعه

هديل كانت ناويه تحطه قدام الأمر الواقع تحسابه بيتحشم وبيسلم عليها بس كان عكس توقعاتها، لما تجاهلها تمنت الأرض تنشق وتبلعها ووجهها ولا أحمر من الإحراج لما إيدها قعدت ممدوده في الهواء
نهي حاولت ترقع الموقف، بضحكه😅: سلامته مايحبش يسلم من يوم يومه ماتأخذيش عليه هدوله
هديل، بتوتر: لا عادي حصل خير وحاولت تخلي روحها عاديه وهيا من داخل بتموت من الحشمه وبالأخص مع نظرات سبيل المتشمته اللي كانت تبتسم بهزوه😏
مراد رجعت للمربوعه وقعمزت بحدا الشباب وفتحت النت، والإبتسامه شقت طريقها لملامحي لما وصلوني إشعارات من الصفحه اللي كنت نستني في تحديث ليها، ومن أمس وأني شبه كل ساعه نخش ونشوف لو فيه منشور جديد أو لا وكأني طفل قاعد يستني أمتي يبدأ عرض رسومه المفضله بلهفه وشوق، ماقدرتش نفهم السر وراء هالكلمات اللي قدرت تأسر شي في داخلي، فتحت الإشعار وكان أخر منشور
” أن أكتب وتسقط كتاباتي بين أصابع أحدكم؛ فيقرأ كلماتي؛ وتقع عينيه على أحد السطور فيجد نفسه بينها؛ فينبض قلبه؛ لأنه أحرفي لامست شي في داخله؛ وقتها فقط يكسوني شعور وكأني ألامس السحاب بكلتا يدي؛ أسعدكم الله متابعين صفحتي الأعزاء أين ماكنتم🧡 ”
#أبتسم_ماخلقت_لتعبس😊
وكأنه هالكلام يوصف في اللي قاعد يصير معاي لما نشوف واحد من المنشورات، فعلا حروفها البسيطه واللي مكتوبه بنظام في سطور ومبعثره وغير مرتبه في سطور أخري قدرت تلامس شي في داخلي وكأنها قاعده تسحبني بقوه لطريق أني ماكنتش متخيل أني نوقف فيه في يوم من الأيام، قعدت مركز على المنشور ونكرر في قرأته وكأني نبي نرسخ هالحروف في مكان يليق بيهم، وقفت وإنسحبت من بحدا الشباب لما كثرت دوشتهم وهالشي منعني نركز وأني في عز إنسجامي، طلعت وقعمزت في الجنان ونزلت للمنشور اللي قبله بلهفه وكان
” رب إمنحني من سعة القلب، وإشراق الروح، وقوة النفس، ما يعينني على ما تحبه من عبادك؛ من مواساة الضعيف والمكسور والمحروم والملهوف والحزين، واجعل ذلك سلوة حياتي، وسرور نفسي، وشغل وقتي، وقرة عيني يالله💙 ”
طيب الله جمعتكم أحبابي في الله💜
#أبتسم_ماخلقت_لتعبس😊
شفت المنشور نازل من حوالي ساعه ونص تقريبا وكان عليه حوالي 2000 إعجاب، سرحت بخيالي شويه لو كل واحد قري هالكلام حس باللي قاعد نحس بيه، وأثر فيه زي ماأثر فيا معناها كم واست من ضعيف، وكم جبرت من مكسور، وكم قوت من ضعيف، وكم فرحت من حزين، وكم أدخلت السعاده والهدوء والسكينه على قلب كل من مهموم ومحروم وملهوف، مما يعني أنها كسبت مئات القلوب بدقة إختيارها للموضع الصحيح للكلمات، بجد كم هيا عظيمه هالشخصيه اللي عندها القدره أنها إدير كل هذا بمجرد حروف، قعد خيالي يصورلي في صوره لصاحبة هالكلام وسرحت ونسيت كل ماكان شاغل بالي وكأني إنسان مجرد من كل شي روح ترفرف بسعاده
وفجأه هبطت بقوة على الأرض لما ناداني معتصم للغذي😅
*********************************************
مروه، بإمتنان وشكر: اااه الحمدلله ربي يدومها نعمه ويحفظها من الزوال، كسكسي جي زي العسل، شني رأيك ياخلوده؟؟
خالد، بإعجاب: من غير كلام أطلع طول عاد أنتي ماعندكش منازع في المسقي ماشاء الله عليك
حنان، بنص عين😒: وخيره تطيبي أني توا طلع أعوج
خالد: أستغفر الله العظيم وخلاص شني دخل هذا في هذا
مروه من جبد سيرة تطيبك توا أنتي؟؟ نوضي ياحنه حركي إيدياتك وشمري على ذرعانك وضمي المطبخ وديريلنا قهيوه نعدلو بيها رؤويساتنا سلم مريت خوي الباهيه نوضي نوضي

حنان فنصت في خالد تبيه يتكلم أو يقول لملاك تنوض بدلها زي كل مره، بس لما شافاته لاهي في تليفونه ماقدرتش إلا تستسلم للأمر الواقع وتنوض زيها زي المره الطيبه وهيا تسحن وتغلي على مروه اللي مافيش حد قدرها إلا هيا، قعدت تغسل في الماعين بغيض وهيا مره تدعي على مروه ومره تحمد في ربي إنه تزوجت وتفكت منها قبل ماتجي هيا وإلا كانت سودتلها عيشتها أكيد
ملاك هوا اليوم اللي نرتاح فيه لما تجينا مروه، هيا عكسي تمام قويه وتغلب الكل بلسانها اللي ينقط عسل وسم على حسب الحاله، والمحير في الموضوع إنه خوتي الإثنين يحبوها هلبا ويحترمو فيها وماعندهمش كلام معاها بعكسي أني، ماعرفتش نفسر تصرفاتي هذي بس كل مره ننسب في كرههم ومعاملتهم السيئه ليا أنهم يجازو فيا على اللي داره رايف فيهم على خاطري، أكيد كلكم تتسألو مني رايف هذا راح نقوللكم بس مازال شويه الصبر، بعد ماتغذينا لقيتها فرصه نكمل التصميم مادامني فاضيه خشيت لداري فتحت النت نزلت منشور وخليته مفتوح وقعدت نشتغل عليه حوالي ساعه كامله لين نادتني مروه باش نشرب معاهم قهوه
مروه وهيا تستطعم في القهوه، وبعدم إستصاغه: خيرها هكي لاطعم ولا ريحه ولا حتى وجه تقول عليها غساله
حنان، بغيض: هذي قهوتي من يوم يومي نحبها خفيفه
مروه: الله غالب وخلاص، وحطت الفنجان زي ماهوا، وأبتسمت بإستفزاز: أني هذي ماتمشيش معاي شويه ثانيه ملوكه إديرلنا إفنجين قهوه مقومه تمسح على الكبد مسح
ملاك أبتسمت وأني نشوف لحنان قريب تتفجر وتشبح لخالد من تحت لتحت تبيه يتكلم وهوا ولا معبرها ولاهي مع مروه ويضحك على حركاتها
مروه إلا ماقلتيليش ياحنان شني جو لمة أختك أمس؟
حنان، برفعة خشم: تهبل تقتل الناس كلهم قعدو فاتحين فمهم في الحوش النويزك والأثاث الفخم والتقديم الفاخر ولا الحار كلهم قريب ماتو فيه، والهدايا اللي عطتهم للضيوف كلهم عجبتهم الفكره لقطه راقيه
مروه، بهزوه😏: أها ماشاءالله من يوم يومكم راقيين ياحنه توقعتك إمبارح تخشي علينا وتقولي أهي حصتكم ياحمواتي ولاتحسبي حتى عمتك في حويجه هوا أحني مش شوفانين ولكن من الذوق والتربيه إنك تحسبي عزوزتك لإنها في مكان أمك
سليمه بلوية شارب: باللهي يابنيتي هالحاجات يفهموه المتأصلات مش هشك بشك
مروه وملاك فنصو في أمهم ماتوقعوش منها كلمه زي توا وبالأخص وخالد مقعمز وهما شادين ضحكتهم بالسيف
حنان، بغيض: توا طلعتلكم ماننفعش وبعدين أختي عند ناس برانيه مانقدرش نتصرف ونأخذ نتحشم قدام حمواتها لو كان المناسبه في حوش بوي راهو حسبتها عمتي

مروه 😒: لا ياحنه حتي أحني مش لايمين عليك غير كليمه طلعت وخلاص، إلا ماقلتيليش وين حق الترفل ولا معقوله صحاب الحوش النويزك والأثاث الفاخر والرقي والذوق مالقو مايأكلو إلا حق وخيتي اليتيمه ولافلوسهم تمو في الهدايا
حنان: لا ماتموش وأختي عطتني حقها والزايد مش بنات عمران اللي يأكلو حق الناس أحني متربيين كويس
خالد لما حس بأنه الجو تكهرب بزياده وقف: هيا نوضي نادي الصغار وأركبو بنقيل شويه
حنان وقف وهيا تشوف لمروه بنظرات زي السم، وبعياط: أدم رغد هيا أطلعو قدامي
مروه، بإبتسامه😊: مؤيد وليدي تعالا أركب مع مرت خالك تعطيك فلوس خالتك جيبهم منها، وتلفتت لحنان: باللهي ياحنونه ولا تصغري أعطيهم لمؤيد نخاف تستحقو وتغلطو وتصرفو منهم
حنان زفرت بغضب ومشت وهيا والعه فيها نار، ومشو وراها صغارها ومؤيد اللي شويه ونزل بي 300 لخالته
ملاك، بإبتسامه: والله ماك هوينه تعرفي كان مش منك راهو كلتهم وسكتت
مروه إيه طبيعي بتاكلهم مادامك أنتي ساكته وتهزي في رأسك زي النعجه، ومدت إيدها وخدت منها الفلوس: هاذم يقعدو عندي وكان نقصاتك حاجه أني نجيبلك، عارفاتك مضحكه يجو غذوه يأخذوهم منك، أشحطي دقنك ياوخيتي أشحطي
سليمه: علميها يامريوه هالمدقنه هذي
ملاك، بعتب: حتى أنتي ياأمي عليا
مروه، بغيض: أمك تبيك تاخذي حقك يامدقنه
ملاك: عارفتيني هذا أني من يوم يومي مانقدرش إندير زيك
مروه، ضحكت😂: باللهي ياأمي متأكده إنها هالمضحكه لينا هذي بالك بدلوهالك وأنتي إمبنجه في المستشفى وماتندريش عليهم
سليمه، بضحكه: يصير راهو ماتلوحي شي
ملاك وقفت أقعدو فيها هي
مروه جبدتها من إيدها، وبغمزه😉: قعمزي بلا جو عواويل جايبتلك عريس
***********************************************
فاتت أيام والحياه ماشيه والأيام تجري وتسحب من عمرنا وأحني في غفله لاهيين 😞
يوم الإربعاء
ملاك كنت في القسم بعد ماكملت طباعه على الكمبيوتر، سكرته وجي على بالي أني نوري للباش مهندس عماد التصميم ونأخذ رأيه قبل المحاضره
عماد، بإعجاب: ماشاء الله عليك ياملاك، بس معقوله من أول محاضره طلب منكم تصميم زي توا
ملاك هزت رأسها بالإيجاب: أي قال حاب يتعرف على مستوى كل واحد فينا، بس للأمانه هوا ماطلباش بيرفكت يعني قال حتى رسم مبدئى وخلاص
عماد: هوا ماشاءالله عليه من أفضل المهندسين في مجاله، بس فكرة المحاضرات هذي جديده عليه إن شاءالله غير تفهمو منه بس ويقدر يوصلكم المعلومه بطريقه سلسه
ملاك، بإبتسامه😊: بالعكس ماشاءالله عليه بجد تحسه خبره في هالمجال مش متعاون جديد
عماد، أبتسم ونزل رأسه للتصميم من جديد وهوا يحاول يدقق فيه أكثر: كويس بكل ياملاك كم خذي منك وقت هذا؟
ملاك، بتفكير: حوالي 4 ايام قعدت نخدم فيه على فترات قصيره في اليوم لأنه ماعنديش وقت، ولا كان هذا كملته في يومين لو كنت فاضيه

عماد قام رأسه للباب لما طق وأبتسم وهوا يشوف فيه كيف خاش بهيبه زي عادته، تلفت لملاك: أهو جي الباش مهندس وتقدري تستفسري لو فيه شي مش مضبوط منه بروحه
مراد خشيت وإستغربت🤔 وأني نشوف في نفس البنت اللي توزع في الإبتسامات واقفه جنب عماد وبرضو راسمه إبتسامه حلوه وعفويه على وجهها تخلي كل اللي يشوفلها يتوتر من إبتسامتها، تجاهلتها وقدمت وأني موجه كلامي لعماد بعد ماسمعته شني يقول: السلام عليكم، كيف الحال؟ وحطيت الشنطه وقعمزت بما أنه مازال وقت المحاضره
عماد: وعليكم السلام الحمدلله شايفك جاي بكري اليوم كويس الواضح إنك منسجم
مراد رفعت رأسي وشفتلها بنظرة إستفزاز: لا مش هكي بس تعرفني مانحبش نتأخر على شي
عماد: باهي مادامك جيت ترا شوفلنا هالتصميم بالك فيه غلطه هك ولا هك بالرغم من أنه ممتاز في نظري
ملاك قدمت بسرعه وشديت الورقه اللي عليها التصميم: لا ياباش مهندس عماد بعد إذنك سامحني بس أني مانبيش حد يصلحلي أخطائي أني بس عرضته عليك مجرد نبي نأخذ رأيك فقط لاغير، وبعدين الباش مهندس مراد زي ماقال يعني هوا متعاون فقط لاغير،مش ملزم يطلع على التصميم ويوريلي أخطائي، زي زي الباقي المفروض نأخذ درجه من غير تعديل من حد، وأبتسمت بهدوء
عماد شاف لمراد برفعة حاجب🤨 بعد اللي سمعه، عارفه مغرور بس مش لدرجة يقول للطلبه كلام زي هذا!!
مراد قعدت مركز عليها وهيا تتكلم بثقه رغم أنه اللقطة اللي دارتها لما سحبت الورقه من عماد ماعجبتنيش نهائي ولو كنت أني في مكانه كنت نطرتها لصقتها في الحيط، بس في لذة الإقناع في حديثها تخليك تصغيلها بإنتباه، بس كلامها كان مستفز نوعا ما وزادت ختمتها بالابتسامة متاعها، تكلمت بغرور: أيواه أهو فاهمه الدرس كويس فلهذا لو سمحتي ممكن تطلعي وتخلينا شويه
ملاك، بإبتسامه: حاضر عن أذنكم، خذيت شنطتي من على الطاوله اللي كنت نشتغل عليها وطلعت وسكرت الباب ورائ
عماد، بضحكه😅: أعصابك يارأس حسيتك على شوي بتنوض تخنقها
مراد 😒: وأنت شني اللي قاعد إدير فيه!!
عماد، بغضب: ماتشوفليش الشبحه هذي والنبي وفكني منك أنت وتفكيرك الخارب هذا البنت تشتغل معاي إهنايا في القسم، لجنة الجامعه هيا اللي رشحتها لتفوقها الملحوظ من بين الطلبه، وبعدين البنت بسم الله ماشاءالله قمه في الأدب وهذا ثالث سمستر معاي ماشفتش منها ربع غلطه
مراد،بهزوه😏: لا أني شكله عندي تقعميزه مع نهي عن قريب جدا
عماد، بتفنيصه: هني جمالك عندها علم أصلا وشايفتها كدا مره لما تجي إهنايا حتى أختك ماتفرقش عنك في الشك، بس ريح روحك هيا بروحها عاجبتها وديمه تسأل فيا عليها
مراد أكتفي بأنه يشوفله بشك وبعدها نزل عيونه يتفحص في تليفونه اللي ولا مايفارقش في إيده حتى دقيقه لأنه حاب يطلع أول بأول على كل جديد في الصفحه اللي قدرت تحيي فيه أشياء فكرها ماتت من سنين
عماد، برفعة حاجب🤨: بعدين تعالا جاي أنت كيف تقول للطلبه إنك مش ملزم بيهم، راهم هاذم طلبه مش عملاء عندك، واجبك إنك ماتقصرش معاهم
مراد بنص عين😒: ليش مني اللي شكالك مني ولا لتكون البنت هذي مقايلتلك شي كذبه وأنت صدقتها
عماد هز رأسه بالنفي: للأمانه مافيش حد شكي منك، وحتى ملاك قبل شويه كانت تشكر في عطائك بس أني عارفك مغرور وهالشي ماشي في دمكم صغار الطاهر أنتم مستحيل تتنازلو عليه

مراد في خاطره صار إسمها ملاك سبحان الله الإسم ليها فعلا، أبتسمت لما خطر في بالي شي، مستحيل نخليها تفوت حركتها اللي قبل شويه بالساهل أني تستفزني وقدام عماد لازم إنردهالها، وقفت وطلعت من غير مانرد على عماد اللي قعد ينادي فيا ويقولي وين ماشي مازال المحاضره
“إنها تمتلك مواهب عظيمة
– وما هم ..
– الإبتسامة ، نشر البهجه، توزيع السعاده، تنظر لعينيها لتجد بحر يأخذك من بؤسك إلي أعماق الحياة ويعود بك وأنت في عالم ملئ بالسعاده ❤”

يتبع…

• لقراءة الفصل التالي : اضغط هنا
• لقراءة باقي حلقات الرواية اضغط على (رواية أنارت عتمة قلبي)