رواية هي وكفى الفصل الخامس 5 بقلم فاطمة فوزي

_خلاص ايه.

_خلاص رديت الجميل زي ما بتقول فخير.

_القط.

_ماله وبعدين المفروض أختك اللي هتيجي مش إنت.

_ما هي هتيجي.

_يعني هي مش معاك.

_لأ بس هتيجي كمان شوية.

_طب وحضرتك هنا ليه.

_أنا اصل.

_اصل ايه.

_ريحانه.

_دكتورة ريحانه لو سمحت.

_من الآخر أنا آسف بقى.

***ترفع عيناها وتنظر إليه وهو يتحدث .

_والله مكنش قصدي أحرجكم أنا بُصي من غير لف ودوران مكنتش عايز أتجوز وعارفة الأمهات المصريين فرحت وأنا رافض ده عشان كدا اللي حصل بس دلوقت.

_دلوقت ايه بص يا أستاذ عمر اللي قولته ميشفعش ليك ده يضايقني اكتر منك 

إنك تدخل بيوت الناس وتتعامل معاهم كدا عشان إنت مش عارف تقول لمامتك لأ يبقى ده يغلطك أكتر

أنا عايزة أفهم ذنب الأب اللي عايز يفرح ببنته ايه ذنب البنت المبسوطة بالرؤية الشرعية ايه انت للأسف حياتك بره نسيتك عادات مصر .

_لأ إنتِ بتقولي ايه عادات مصر لسة جوايا ريحانه أنا مش زي ما إنتِ فاكرة.

_أولًا دكتورة ريحانه وتأني أتمنى مشفكش تاني أنا مش عارفة إنت عايز مني ايه موضوع وأنتهى في ايه بقى.

_عارفة لو واحدة غيرك كلمتني كدا كنت مشيت ولا فكرت اعبرها تاني .

_وايه اللي مسكك.

_لإنك مختلفة أنا بقالي كتير مشفتش واحدة زيك ناجحة دكتورة جدعة ومنتقبة إنتِ خلتيني أشوف المنتقبة بشكل تاني .

_بص يا أستاذ عمر بغض النظر عن كلامك بس مينفعش تتكلم معايا بالشكل ده وأحنا لوحدنا لان ده حرام شرعًا واكيد انت عارف ده.

_اكيد عارف طب ممكن طلب .

_اتفضل.

_فرصة.

_مش فاهمة.

_فرصة تانية أجاي البيت فيها وتبقى حقيقي رؤية شرعية والمرة دي أنا عايز ده مش مغصوب والله.

_مش عارفة أقولك ايه.

_عشان خاطري اديني فرصة .

_طيب تقدر تكلم بابا تاني ولو وافق معنديش مشكلة .

_بجد قولي والله العظيم.

***تبتسم من طريقته الطفولية وتلتفت إلى الجانب الآخر.

_أمشي بقى ياريت عشان مينفعش تفضل هنا .

_حاضر حاضر هكلمه أنهاردة أنهاردة ماشي يالا سلام .

***تبتسم ثم تدخل عيادتها ترجع رأسها إلى الخلف وتحمل هاتفها وتتحدث مع صديقتها.

_جالي الشغل.

_مين جالك .

_عمر .

_عمر مين معلش قصدك العريس.

_اه.

_وبعدين.

_اعتذر وعايز فرصة.

_قولي والله شكله وقع ومحدش سمى عليه.

_ايه يا بنتي الكلام ده .

***يقاطع حديثهم دخول بسمة شقيقته ومعها باقة من الأزهار الجميلة.

_مبارك جدا يا دكتورة ع العيادة.

_حبيبتي تسلمي ليا اخبار قطنا الجميل ايه .

_احسن بكتير يا دكتورة الفضل كله ليكي.

_قصدك لربنا ما أحنا سوى أسباب.

_ونعم بالله .

***تفحص القط ويجلسوا قليلًا معًا ثم تذهب 

تحمل الازهار وتستنشق رائحتها وتبتسم 

فِ الليل تجلس في غرفتها تنتظر دخول والدها ليخبرها عن عمر 

يمر اليوم ولا يأتي 

تنام من شدة الارهاق تستيقظ صباحًا تجهز الفطور لوالدها وتجلس أمامه تنظر إليه ما بين التارة والآخرى

ينظر إليه ويتحدث.

_مالك مش قعدة على بعضك ليه.

_أنا مالي يا بابا ما أنا قعدة كويس أهو.

_مالك يا حبيبتي مخبية عني حاجة.

_لأ وأنا من أمته بخبي ع حضرتك أنا هقوم بقى عشان الحق .

**تحمل حقيبتها وتتجه إلى الباب ثم ترجع من جديد وتضم والدها قائلة.

_اسفة يا بابا أنا كدبت عليك أنا فعلا خبيت عليك عمر جالي العيادة .

***تقص عليه كل ما حدث من وقت حملها عندما كانت تكاد أن تقع إلى خروجه من العيادة.

_أول مرة تخبي عني حاجة يا ريحانه وده شيء مش مبشر .

_يعني ايه يا بابا.

_يعني الانسان اللي يخلي بنتي تتغير للاسوء يبقى حد يخليني افكر اكتر من مرة قبل ما اسلمك ليه.

_بس يابابا أنا جيت قولتلك مقدرتش أكمل وأنا مخبية عنك شيء 

وهو قال هيكلمك مش عايز مني شيء وحش يعني.

_أتمنى يا بنتي إنه يكون تفكيري غلط وإنه ميخيبش ظنك.

_بابا لو إنت مش عايزه عادي والله أنا اسيب الدنيا كلها عشانك إنت أهم حد عندي.

_لأ يا بنتي وأنا برضو مش هحكم عليه من موقف هستنى اتصاله  ووقتها اللي ربنا كتبه يكون.

***تمر أيام ولا يتصل 

شقيقته تأتي تغير على جرح القط يوم ويوم 

تقرر ريحانه أن تسألها بطريقة غير مباشرة هل حدث شيء مثلاً جعله لا يتصل .

_احكيلي يا بسمة صح مامتك كويسة .

_اه الحمد لله .

_يدوم الحمد طب انتي بتيجي لوحدك ليه الطريق بعيد عليكي ليه اخوكي ميوصلكيش.

_لأ ما هو فعلًا بيوصلني.

_ازاي.

_ما هو واقف تحت بيوصلني ويستنى لما اخلص ويرجعني البيت وبعد كدا يشوف اللي وراه.