رواية يوم زفافي الفصل الرابع 4 بقلم مريم الشهاوي

رواية يوم زفافي الفصل الرابع 4 بقلم مريم الشهاوي

رواية يوم زفافي البارت الرابع

رواية يوم زفافي الجزء الرابع

رواية يوم زفافي الحلقة الرابعة

ناهد بعياط/هر بت…. اول ما صحيت قولت اعملها لقمه فتحت الباب ونزلت يا يامن… انا آسفة والله انا……
يامن بصدمة/ايييي! هربت ازااي؟؟
ناهد /ااما صحيت قعدت اكلمها شوية وبحاول اطمنها وقولتلها انك هتقدر تحميها وهتفديها بروحك لان دا واجبك وهي متكلمتش نهائي فضلت ساكته فقولتلها انا قايمة اعملك حاجه تاكليها ودخلت المطبخ يدوب احضر الاكل ولسه داخله عليها بالصنيه ملقتهاش…..
يامن بعصبية/ازاي ملقتهاش… ازاااي ملقتهاش…راحت فين يعنييي طب سلام يا عمتو
قفل السكة/ادور عليكي فين دلوقت…. ليه يا فرح مصرة تعذ بيني معاكي….
طلع بالعربيه وبقا مش عارف يسأل عليها هو ولا معاه صورة ليها ولا اي حاجه وبعدين هيلف اسكندرية كلها يدور على واحدة اسمها فرح!…. دور كتير اوي ملقهاش… معقوله خلاص كده… مش هيشوفها تاني…. طب ظهرت ليه في حياته في الاول مادام هتهر ب… لا وانا الي رايح ادورلها على حقها
اللوا سامح بعتله رسالة /قولت انك لقيت دليل عن عن فه للبنت
*يامن بعد ما اخد الفلاشه من عم منعم بعت رسالة لسامح علطول انه معاه دليل
يامن رد عليه بسرعة/فلاشه فيها تسجيل لكاميرة محطوطة في شقته هي معايا دلوقتي

سامح/طب ومستني ايه…. تعالى مكتبي انا مستنيك متروحش القسم تعالى على مكتبي
*اللوا سامح ليه مكتبه الخاص
يامن فعلا راح لمكتب سامح
سامح/ها بقا قولي تشرب اي
يامن بتعب/ولا حاجه والله… دماغي مشغولة بميت حاجه…..
سامح~يبقى نطلبلنا اتنين قهوة
سامح باهتمام/فين الفلاشه
يامن قدمهاله علمكتب/اهي
سامح بسرعة اخدها وحطها في اللاب /قولتلي زفه العروسه كانت الساعة كام
يامن/جم متأخر كانت على 12 او 11 ونص مش فاكر
سامح فتح تسجيل الساعة الي قالها يامن وفعلا لقا تسجيل الكاميرا وقتها بقا قاعد مركز ويامن شد كرسي وقعد جمبه وباقوا متابعين الي حصلها بتركيز
يامن كان مركز مع تصرفات فرح… وعجبه قوتها… عجبه دفاعها عن نفسها لاخر نفس بس بعد وقت الدموع رغرغت في عينه وهو شايفها بيجرها علأرض وضهرها بينز ف وعماد قاعد فوقيها عمال يضر ب فيها جمد على ايديه وقلبه وجعه عليها اوي وقال بزعيق ووجع في نبرة صوته/بص الحيوان

سامح /خليك قوي… مينفتش نضعف اما نشوف المشاهد دي… لازم نركن العاطفة عشان نعرف نفكر كويس الا بقا لو هي كانت تهمك؟
يامن بصله وللحظة استوعب كلمته تهمه؟ هي فعلا تهمه؟ يامن رجع بص للاب وبلع ريقه وهو بيكمل احداث التسجيل بالعافيه وفي مشاهد كان بيغمض عينه فيها زي مشهد اما عماد عن بيعور فرح بالازازة في جسمها
سامح بص ليامن وهو باصص للاب حاسس ان الحكاية مش هتخلص بسرعة ابدا… دا الحكاية لسه بتبتدي!
خلص التسجيل ويامن رجع شعره لورا نفسه يقوم يجيب عماد تحت رجله ويعرفه ازاي يستقوى على بنت…..
سامح/بكرة الصبح تجيبلي البنت… عاوز اخد اقوالها على المتهم
يامن /بس المشكله ان البنت….
سامح/مالها
يامن/هر بت
سامح بذهول/هر بت!… طب هر بت ليه؟
يامن/مش عارف مش عارف للأسف… مش عارف ادور عليها فين
سامح/اتصرف
يامن بضعف/اتصرف ازاي بس هدور عليها في محافظة كامله!

سامح/مش هينفع تاخد عساكر ولا تقدم بلاغ بفقدانها طب ما تحاول تكلم اصحابك…. ومحدش فيهم هيتهمك.. او هيبلغ عنك
يامن دخلت في دماغه الفكرة وعجبته وفعلا كلم اصحابه يقابلهم
ابراهيم/يعني البنت هر بت وعاوزنا ندور معاك عليها؟
يامن/ايوة
عيسى/مانت مش راضي تفهمنا من ساعتها مين دي
سعيد/تطلع مين واسمها اي عرفنا اي حاجه عنها عشان نقدر ندور ونلاقيها بإذن الله
يامن /ماشي… اسمها فرح
عيسى/فرح اي
يامن/معرفش فرح اي… هيه في كلية علوم هنا في اسكندرية
ابراهيم/ليها مواصفات محددة
يامن/ليها بس انا مش عارف هل نزلت بالنقاب ولا قلعته
عيسى/هي منقبه!
يامن بزهق/لا بس وديتها عند عمتي بالنقاب عشان محدش يشوفها معايا وخصوصا الجرو ح الي في وشها هيتشك فيا
سعيد/طب اتصل بعمتك…استفسر منها اذا كانت نزلت بالنقاب ولا قلعته
يامن اتصل بعمته

ناهد/اي يابني
يامن/عاوز استفسر عن حاجه الاوضة الي كانت قاعدة فيها فرح موجود فيها عباية ونقاب ولا مش موجودين
ناهد/لا انا قلعتهولها عشان تعرف تاكل ونقعد مرتاحة فضلت بالسويت شيرت والبنطلون الي كنت جايبهم بيها من عندك
يامن قفل مع ناهد وبصلهم /لا مش بالنقاب
كلهم قالوا الحمد لله
عيسى/قول بقا على مواصفاتها لابسه اي شعرها لونه اي… عينيها لون بشرتها كل حاجه
يامن اتضايق من كلام عيسى… هو مش عارف اتضايق ليه بس اتضايق انه عايز يعرف مواصفات عنها… طب لييييه… ميعرفش
يامن بانقضاب/لابسه سويت شيرت لونه بنفسجي وبنطلون لونه رمادي
عيسى/ها كمل
يامن بغضب/اكمل اي….
عيسى اتفاجئ من انفعاله/في اي؟ عاوز اعرف مواصفاتها عشان نسأل عليها
ابراهيم~يامن ساعدنا… احنا مش هنخطبها يعني

يامن سرح شوية وحاول يتذكر ملامحها وابتسم وهو بيتكلم /قصيرة شوية…. وشعرها لونه اسود ناعم وطويل…. وعينيها… عينيها سودة… ورموشها تقيلة.. عندها حسنة في خدها اليمين… وبشرتها بيضة… وشفايفها…..
بصلهم وقال بغضب/انتو مالكو ركزتوا كده ليه….
سعيد ضحك/اصلك سرحت يا باشا
عيسى/كمل ها وشفايفها…..
مثل توهان يامن وهو بيقولها
يامن ضربه في صدره
عيسى ضحك وكلهم ضحكوا
يامن/هي لسه جديدة علبلد ومش هتبعد اوي ممكن تبقى في المحيط دا متبعدش عنه ندور فيه وان شاء الله خير انتشروا في كل حته يدوروا فيها مسابوش ولا حتة في اسكندريه
عيسى رن على يامن وهو في مكان بيدور عليها /انت اقرب للبحر دور هناك وعلشواطئ وانا هطلع علاسواق ادور
يامن قفل معاه ومسك حته حته يسأل عليها.
يامن/لو سمحت ملقتش بنت بسويت شيرت بنفسجي وبنطلون رمادي شعرها اسود طويل قريبه من هنا او عدت من هنا
*اعتقد الي هناك دي بقالها كتير واقفة قدام البحر متحركتش وبنفس مواصفات الي بتقول عليها

يامن قلبه دق بسرعة وبص ناحيه ما بيشاور معرفش يوضح الصورة اوي لانها بعيدة قرب من الصخور لحد ما شافها ابتسم وقلبه دق بسرعة
فرح بتمشي وبتطوح اتكعبلت في الصخور وكانت هتقع
يامن بسرعة جري بخوف ولهفه /فرحححح
جري عليها وفرح بصتله بتوهان واستسلمت ولسه هتقع كان يامن لاحقها وشايلها من علأرض والموجه خبطت في الصخور تحت ضوء القمر ويامن حاضنها كان منظرهم تحفه يامن حضنها جامد اوي لو هاين عليه يدخلها بين ضلوعه كان عمل كده
فرح غرست راسها جواه ومسكت في الجاكت بتاعه جامد بايديها
فرح مش فاهمه هي ليه بترتاح اما بيقرب منها ليه بتحس بالأمان اما بيضمها
“اريد منك عناق يكسر ضلوعي، إن كان لي وطن فحضنك موطني، في دفئ حضنك يطمئن قلبي، ضمني على صدرك كي تهدأ روحي”
اما يامن كان في حالة لا يغنى عنها تماما مغمض عينه وبياخد نفسه بصعوبه زي الي كان جعان ومرة واحدة شبع بيتنفسها هي بيتنفس ريحتها ضاممها اوي ومرة واحدة سمع تأوه منها لانه شادد على ضهرها الي واجعها
يامن بعد مرة واحد وقال بلهفه وزعيق/اي الي عملتيه دا.. ازاي تمشي وانت في الحالة دي… انت عارفه اني بدور عليكي طول الليل لفيت اسكندرية كلها عليكي… فكرت انك….
سكت وحط ايديه على بوقه وبص لفوق وكمل بخوف مسكها من دراعاتها جامد /عارفه اي الي حصلي…عارفة قد اي خفت عليكي…فكرت حصلك حاجه
مسك وشها بإيديه الاتنين وقال بلهفه وشوق جواه/اي الي كان جرالي لو كان حصلك حاجه….كنت هخسركك….

فرح بزعيق بعدت ايده عنها/انت بتزعق كده ليه….انا مطلبتش منك تعمل كل دا…مطلبتش منك تدور عليا في اسكندرية كلها…وياسيدي شكرا…استغنيت عن خدماتك…انا بس كنت محتاجه اي حته استخبى فيها منه يوميها…وانا هعرف اعيش حياتي…هبعد عنهم وهبدأ حياتي مع نفسي…ابعد انت عني يا حضرة الظابط…وبلاش تقدم تضحيات عشان واحدة متعرفش عنها حاجه غير انها بس كانت متعرضة للعنف….انا مبطلبش مساعدة من حد انا بعرف اساعد نفسي كويس….هو بس ليلتها لاني كنت مجبورة…لكن انا طول عمري واقفه على رجلي لوحدي..ولو هاخد حقي انا الي هاخده مش هستنى حد ياخدهولي ويبقى ليه فضل عليا…روح كمل حياتك يا حضرة الظابط…وسيبني انا هكمل حياتي لوحدي منغير مساعدة حد
خلصت كلامها ومشيت من قدامه
يامن جري وراها بعصبيه وشدها من دراعها/انت مش شايفة حالتك…مينفعش تمشي وانت كدا سبق ونورا قالتلك امشي اما تتحسني انت معرضة للخط ر من البني ادم دا ممكن يمو تك…
فرح كملت زعيق على زعيقه/حتى لو مت ولا جرالي حاجه…انت مالك بيا
يامن بعصبيه/يعني اي انا مالي بيكي!
فرح بغيظ~ايوة…انا بعنيلك اي عشان تعمل عشاني كل دا بهمك في اي كنت من بقيت اهلك
يامن/انت……
سكت لانه مش عارف فعلا هي اي…هي تعنيله اي…ليه خاف عليها بالشكل دا لي زعق بالجنون دا
فرح/انا اي؟….اقولك انا.. انا مجرد بنت بتشفق عليها عشان ياحرام بتتضر ب ولازم تبان الظابط الشجاع الي بيدافع عن البنت واخدلها حقها…اسفة انا مبحبش حد يدافع عني او يشفق عليا مطلبتش مساعدة منك ولا هطلب…سيبني انا هعرف امشي حالي…وابعد عني..اديني حذرت ابعد عني يا حضرة الظابط بلاش تخليني استعمل معاك……..

مكملتش جملتها ولاقت يامن شالها زي العيل الصغير وماشي بيها
فرح عماله تضربه على ضهره /سيبني…اي الي بتعمله دا…سيبني انت بتخط فني يعني
يامن/اه يا فرح بخط فك…سميها زي ما تسميها…انا مش هسيبك ودا الي عندي
فرح/يااخي انا مطلبتش….
يامن /انا غتت
وهو ماشي الناس باقت بتبصلهم وفي الي مستغرب وفي الي بيضحك
*واخدها على فين يا جميل.. استنى هنا
يامن~انا ظابط… ودي تبقى مراتي وتايهه عني
الراجل خاف ورجع لورا والناس تجاهلت وقالت مشاكل عائليه
فرح بسرعة/انا مش مراته… سيبني… والله ما مراته حد ينجدني م البني ادم دا
اخدها العربيه وصحابه كانوا وافقين هناك وفطسوا على نفسهم ضحك وهما شايفنهم بالمنظر دا
فرح/انتو مين
ابراهيم~دوختينا عليكي يا شيخه
سعيد/الحمد لله انك بخير
يامن حط فرح في العربيه
وفرح بصت للشباب من الشباك/يا شباب حد يقول للمتخلف دا يسيبني انا مطلبتش من حد مساعدة…انا هعرف ا…..

يامن قفل ازاز شباك العربيه وكتم صوتها
عيسى ضحك/دي مسخرة يا جدع
يامن /لا تطاق بجد….انا آسف يا شباب بجد تعبتكوا معايا شكرا يا عيسى انك قولتلي على موضوع البحر دا لقتها هناك فعلا سلام
ابراهيم/عيب يا يامن بتشكرنا على اي احنا اخوات
حضنهم كلهم وبص لفرح الي مش مبطله زعيق من ورا الازاز
يامن ركب العربيه وطلع بيها
فرح/انت مجنون….مهو مفيش حد عاقل يأمن لبنت كده…انا حراميه يا سيدي وبضحك عليك……انا….
يامن شغل اغاني علكاسيت وعلى الصوت وبقا بيحرك ايده وبيرقص
فرح/والله العظيم مجنون…..
قعدت ساكته واستسلمت ومربعة ايديها وبتتفرج عليه وهو بيردد كلمات الاغنيه بصوت عالي
يامن /وبشوقك عيش بشوقك
ميل عليها وصوت في ودانها جامد~ودماااغك املاااها على ذووقك
فرح بعدت وبصتله ورجعت بصت للشباك وضحكة اترسمت على وشها بانت غمازاتها فرح بتضحك اوي من تصرفاته وباصه للشباك عشان ميشوفهاش بس مش ملاحظة ان هو شايفها من المراية الي قدامها الي بتكون في باب العربيه
قلبه نبض نبضة غير النبضة الطبيعيه بتاعته لا حس انه فرحان اوي شكلها جميل اوي وهي بتضحك رغم الجرو ح الي في وشها بس مازالت جميله برضو ياترى اي الشعور دا؟…ليه حاسس زي ما يكون بيملك الدنيا وما فيها…
بص قدامه ومبيفكرش غير في فرح♡
عماد كان في شقته وعاصي نايم

استغل الفرصة ودخل اوضته السريه زحزح البرواز ودخل الاوضة فتح الكمبيوتر بتاعه وبيبص على مهمته الجديدة وبيرتب شغله قعد علمكتب وفتح درجه وطلع ورق في صور بنات بيقلب فيهم وكإنه بينقي واحدة منهم
خلص شغله وجيه يطلع من الاوضة بس لقا……
يامن رجع بيت عمته ولقا نورا هناك
نورا اول ما شافت فرح حضنتها بشوق وحب/كنت فين قلقتيني عليكي
يامن بتريقة/جعري فيها زي ما عملتي معايا تقلقوا علياااا ليييه انا من بقيت اهلكوا
نورا ضككت على اسلوبه وفرح كانت هتموت وتضحك بس مسكت نفسها
نورا /يا هبلة انا مش لازم احبك عشان حاجه…. يعلم ربنا انت دخلتي قلبي ازاي
ناهد حضنتها/متمشيش تاني احسن ازعل منك والله
فرح/مهو انا مبحبش العب دور البنت الي بيشفق عليها الناس انا مبحبش حد يشفق عليا
نورا/ على الاقل لحد ما حالتك تتحسن
فرح/انا حالتي تمام
يامن/طبعا تمام اوي ولما حضنتك اتوجعتي كنت تمام برضو وانت بتطوحي علصخور كنت تمام
ناهد بابتسامه~حضنتها!
فرح اتكسفت اوي ودخلت الاوضة /انا رايحة اغسل وشي
نورا راحت وراها ويامن انفرد بعمته
ناهد/اي يا واد مالك ملهوف عليها كده ليه….
يامن /مفيش يا عمتو… مش ملهوف ولا حاجه انا بس قلقان عليها من جوزها ولازم احميها
ناهد/يا شيخ.. يعني مش خايف عليها عشان حاجه تانيه….

يامن باستفهام/حاجه تانيه زي اي؟
ناهد/ولا حاجه ياخويا… اما اقوم احضرلكوا الغدا لحسن انتو على لحم بطنكوا من الصبح
فرح دخلت الاوضة واخدت نفسها بالعافيه
نورا بقلق مسكت ايديها/انت كويسة… صدقيني يامن اخويا مش بيشفق على حد يامن اما بيخاف عليك بيكون عشان تهميه فعلا
فرح بصتلها بعدم فهم ونورا كملت/يعني يامن طلاما استقصديه في مساعدة فهو مش هيسيبك الا وهو واخدلك حقك هو خلاص اعتبرك واحدة مننا… وبعدين انت لازم ترتاحي يا قلبي انا كلمت هشام جوزي عن حالتك وقالي لازم ننقلك للمستشفى في اسرع وقت وتعملي تحاليل لانك نزفتي ومتعرفيش في نزيف داخلي مطرح الضرب ولا لا
نورا حضنت فرح/احنا كلنا معاكي ومش شفقة ابدا انت بقيتي اختي انا من زمان نفسي يبقى عندي اخت واهو ربنا استجاب وجابلي احلى فروحة في الدنيا
حضنتها وفرح بادلتها الحضن وبعدت عنها وقالتلها بقلق/يا نورا فهمي اخوكي انه مش قد عماد… دا راجل خط ير وممكن يإذ يكوا انا بعدت وهربت عشان مسببلكوش اذى صدقيني عماد مش سهل ولو هو وابويا اتحدوا هيدمروا يامن انا ببعده عني عشان كده…..

نورا ابتسمت/يابت يامن واخد رتبه عليا اي الي ميقدرش عليهم القانون مش بيقف مع الناس دي بيقف مع اخويا وبيدافع عن الي زيك
فرح بزعل/ما المشكله ان عماد مش بيمشي بقوانين لانه لو معرفش يرجعني بالقانون هياخدني بلوي الدراع والله اعلم هيعمل اي معاكوا انا بورطكوا معايا كدا خليني امشي ونبي
نورا/انا بأكدلك انه مش هيعمل حاجه… واخويا في امان لان ربنا معاه وربنا مش بيكسب ظالم على مظلوم وبعدين يامن معارفه الروح بالروح والي زي ابوه لوا في الشرطة فلو شعره لمست يامن هيجيبوه تحت الارض اتطمني احنا مش هنسيبك ابدا ابدا احنا عيلة لازقة اوي
فرح ضحكت وحاولت تطمن نفسها وحست بشعور حلو جواها نورا طلعت برا ولقت اخوها واقف على باب الاوضة طمنته بنظرة منها وهمست في ودانه/براحة عليها البنت بتعمل كده بحسن نية
يامن باقتضاب~سمعت
نورا مسكت ايده وجمدت عليها/هي محتاجه حد يحسسها بالامان
ناهد دخلت الاكل لفرح ويامن
ناهد/يلا يا يامن تعالى كل تلاقيك مكلتش انت كمان انا عارفاك
يامن~اه والله من الصبح… وكل دا عشان
وبص لفرح…..
فرح بصتله /عشان مين…. انا مطلبتش من حضرتك متاكلش… انا مقولتلكش تعالى دور عليا ولف اسكن…..
يامن /ياااا الله حد يسكتها لحسن دي لو فتحت مبتقفلش
فرح قعدت وضمت ايديها وهي مكشرة ويامن حط الاكل معاها وقعد قدامها
فرح~على فكرة انا بعرف اكل لوحدي ممكن تاخد اكلك وتاكل برا عادي
يامن/انا مش بعرف… لازم حد يشاركني وانا باكل… معلش طبع صعب فيا شوية وكلهم واكلين فمضطر اقعد اكل مع سيادتك منيش مغرم بحضرتك وهموت واكل معاك اوي

ناهد ضحكت هي ونورا
ناهد/نورا عايزاكي في كلمتين تعالي نشرب الشاي في البلكونه وخليهم يتصافوا هنا
…….
سامح رن على يامن بس كان تلفونه مقفول فرن على حد من صحابه
سعيد/اه يا باشا لقيناها الحمد لله هيه دلوقتي في بيت عمة يامن
سامح/تمام….
فضل يقلب في الفولدر كتير ولقى ان في تسجيلات للشقة من شهرين والتسجيلات دي فيها مكالمات عماد في التلفون وهو بيقول……
عماد نزل من شقته وشاف منى وهي بتذاكر على ترابيزة وعم منعم قاعد بيشرب الشاي قدام الجنينه
منى بلعت ريقها اول ما شافت عماد وبصت في كشكولها
عماد بخبث/الا صحيح ياعم منعم منى بنتك عامله اي
عم منعم بتوتر/الحمد لله يابيه … رايدها في حاجه
عماد~كنت عايز ارجعلها بس فردت الحلق بتاعتها لقتها في اوضتي السرية فوق تلاقيها وقعت منها ولا حاجه وهي بتفتش في الاوضة
عم منعم وشه جاب الوان و…….

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية يوم زفافي)