رواية كيد النساء وقهر الرجال الفصل السابع عشر 17 بقلم منى محمود

رواية كيد النساء وقهر الرجال الفصل السابع عشر 17 بقلم منى محمود

رواية كيد النساء وقهر الرجال البارت السابع عشر

رواية كيد النساء وقهر الرجال الجزء السابع عشر

رواية كيد النساء وقهر الرجال الحلقة السابعة عشر

كان لك معايا اجمل حكايه في العمر كله !!

❈-❈-❈

منار بعد ما ودت تيا في الكيدز ايريا رجعت و قعدت علي تربيزة هاديه منتظرة وصول المجهول .. ومفيش خمس دقايق ولاقت اللي بيقعد قدامها

_ هاي يا قمر … اتاخرت عليكي ؟ ولا ايه

ختم كلامة بغمزة وهي أول ما عينيها وقعت عليه تنحت … كان شاب باين عليه في الثلاثينات وسيم جدا وعيونة خضرا لبسه شيك ومهندم باين عليه أنه غني أو مرتاح ماديا

منار ابتسمت بإعجاب واضح اتعمدت تظهره :
هاي يا صياد .. تؤ تؤ متأخرتش ولا حاجة اتفضل

الصياد
طالما اتقابلنا وجها ل وجه بقا يبقي تقوليلي يا فريد بلاش الصياد دي

منار بدلع
انت اسمك فريد … مممم اسم علي مسمي فعلا

فريد ضحك بصوت عالي
والله انك ما سهله ابدا يا منار

منار ضحكت
ليه بس دا انا غلبانة اوي اوي انت بس اللي متعرفنيش كويس يا فري

لسه فريد هيرد … اتفاجاؤ هما الاتنين بصوت من ورا منار بيقول
لا لا لا مسمحلكيش تدلعي جوزي كدة انتي فكراه زي الرجاله الهبله اللي بتجري وراكي ولا ايه

منار لفت بصدمة كانت اتحركت الست بهدوء وقعدت جمب فريد وحطت أيدها علي كتفه واتكلمت بثقة

ايه … مصدومة صح ؟ هههههههههههههههه خيالك المريض في ثانيه خلاكي تفكري انك توقعيه ويبقي ضمن الليستة الطويلة اللي عندك مش كدة ؟ تؤ تؤ تؤ يا حرام يا فريد بجد شكلها صعبان عليا اوي بص مصدومة ازاي يا بيبي

فريد ضحك
كفايه يا تونا متبقيش شريرة اوي كدة يا قلبي

منار بغضب
انا عايزة افهم في ايه بيحصل هنا بالظبط ؟

فريد كشر
لا بقولك ايه صوتك ما يعلاش وما تنسيش نفسك

فاتن
خلصنا بقى يا فريد من الفيلم ده عشان انا بجد زهقت وورايا شوبنيج كتير عايزة اخلصه

فريد
ها يا منار الفلوس جاهزه ولا لا ؟ اديكي شايفه بنفسك أننا مش فاضيين

منار بغضب
مش قبل ما افهم انت مين وعرفتني منين ومين اللي زقك عليا وبعدين هديك الفلوس اللي انت عايزاها

فريد
هو انتي ليه مش قادره تصدقي ان انتي مش موضوع قوه ليه مش قادره تصدقي ان انا باشاره مني افضحك في الدنيا كلها فتتلمي بقى وتسمعي الكلام وتطلعي الفلوس وانتي ساكته خالص

منار ضحكت
انت اللي ما تعرفنيش كويس ما تعرفش ان منار عندها حل لاي مشكله بتقع فيها ما بيهمنيش .. فا يا تقول لي انت مين وعرفتني ازاي وتاخد فلوسك وفوقيهم بوسه كمان يا اما هقوم واخد بنتي واتكل على الله امشي

فاتن بسخريه
لا يا حبيبتي البوسه دي خليها لك

منار بسخريه مماثلة
والله يا عسل انا ما وجهتلكيش انتي اي كلام

فاتن بلويه وش
شوف ازاي

منار
ها هتقول ولا امشي

فريد
بصي يا منار رغم ان انتي فعلا مش في موضوع قوه ورغم كل اللي انتي قلتيه ده ولا يدخل في ذمتي ب بصلة حتي الا اني هريحك عشان انا عارفك فضوليه اوي … انا مين قلت لك انا الصياد …. عرفتك منين من على مواقع الشات اللي انتي بتخشي عليها عشان تصطادي الشباب اللي بتكلميها … عايز منك ايه اكيد يعني باين انها عمليه ابتزاز وان انا عايز منك فلوس مقابل ان انا اسكت وما اطلعش الداتا اللي معايا … اما بقى الداتا اللي معايا وصلت لي ازاي فده لان انا هكر يا منار هكر وهي دي شغلنتي اخش على الستات اللي زيك واقلب منهم قرشين وتونه حبيبتي تخش على الرجاله زي اللي بيكلموكي وبرده نهددهم بالحاجات اللي معانا وناخد منهم قرشين مقابل انهم ميتفضحوش قدام مراتتهم … ها جوابتك كده ؟

منار كشرت
ده انتم عصابه بقى

فاتن ببتسامة
اه يا حبيبتي احنا عصابه بقى … فين بقى الفلوس عشان نخلص

منار بصيت لها بغضب وطلعت الفلوس من شنطتها وحطيتها على الترابيزه فريد خد الشنطه بتاعه الفلوس فتحها بص فيها واداها ل تونا اللي حطيتها في شنطتها ورجع بص لمنار واتكلم

فريد
تمام كده يا منار قبل ما امشي اصل في حته صغيره انا ما قلتلكيش عليها هي ان بجانب ان ده شغلي انا عندي هوايه كده بعد ما بخلص الشغلانه لازم انفذ الهوايه دي فاستعدي النهارده بالليل عشان المفاجاه هتعجبك اوي

قام وقف هو وفاتن بس منار شدت ايد فريد وقالت له
استنى هنا يا جدع انت انا ما بحبش المفاجات … مفاجاه ايه اللي هتستناني النهارده بالليل انت بعد ما اخذت الفلوس عايز تخلع وتدبسني في حاجه ما اعرفهاش ولا ايه

فاتن شالت ايديها اللي ماسكه بيها ايد فريد واتكلمت بكل غضب

فاتن
هو انا مش قلت لك ما لكيش دعوه بيه ولا هو انتي ايه لا ليكي حاكم ولا رابط ولا حد مالي عينك ما تتلمي يا وليه انتي

منار بغضب
ولولو عليكي ساعه وسكتوا يا بعيده انا مش همشي من هنا غير لما اعرف انتم مخططين لي ايه بالضبط

فريد وهو بيبص ل ساعته
قلت لك دي مفاجاه وهتعجبك اوي ما تقلقيش خلال ساعتين بالظبط هتكون حصلت يلا بقى الحقي روحي انتي وبنتك عشان تبقي قاعده في استعداد المفاجاه اللي هتجيلك

منار لسه هتتكلم تاني بس كان فريد شد ايديه من ايديها بسرعه وقوه وخد فاتن ومشيوا من المكان

منار كانت قلقانه لاول مره تحس ان هي خايفه فعلا وقلقانه راحت اخذت تيا من الكيدز اريا وبدات تشوف هتعمل ايه قبل ما تروح البيت

ركبت اوبر ونزلت قبل البيت بشارعين دخلت الصيدليه وجابت الدوا بتاع الكحه كانت عارفه ان هو بينيم تيا اول ما بتاخده اول ما خرجت شربتها منه شويه ورمت الازازه في اقرب باسكت زباله واشترت كمان قطره من اللي بتدمع جامد جدا فضلت تحط منها كثير اوي وهي واقفه ورا عربيه في الشارع على معانيها احمرت من كتر ما هي مخلياها تدمع غصب عنها كانت تيا الدوا عمل معاها مفعول وبدات تحس ان هي مدروخه وعايزه تنام شالتها منار واتحركت ناحيه بيتها وقبل ما تخبط على الباب قطعت كم البلوزة اللي هي لابساها وقطعت الايد بتاعه الشنطه بمقص كان معاها جوه الشنطه وخدت نفس عميق وخبطت

❈-❈-❈

في شقه احلام واسماء بعد ما اتعشوا اسماء دخلت ولادها يناموا ورجعت تاني قعدت قصاد احلام وبدا يتكلموا

اسماء
هنعمل ايه دلوقتي يا احلام ؟

احلام
مش عارفه يا اسماء يمكن احنا ساعتها مش هنبقى بنروح ولا بنعمل حاجه تغضب ربنا بس بس بيتهيالي لو دفعنا لهم برده فلوس هنبقى برده بنغضب ربنا صح ولا ايه ؟ انا بصراحه مش فاهمه حاجه مش عارفه مش عارفه ايه الصح وايه الغلط

اسماء بحيرة
ولا انا عارفه … مش هقدر اخليكي ترجعي للي كنتي فيه تاني … ولا عايزه اديهم فلوس ونبقى تحت ضرسهم و يبقى في حرمانيه كمان مش عارفه

احلام
طب ايه هنعمل ايه مين ممكن يساعدنا ؟

اسماء بتفكير
مش عارفه طيب بقول لك ايه انا بصراحه فكرت في حد كده ممكن يساعدنا بس خايفه منك او يعني خايفه من رد فعلك

احلام استغربت
مين ده وليه خايفه مني ؟

اسماء
بصراحه كده انا فكرت في طنط نوال حماتك حاسه ان هي تقدر تساعدنا انا ما رضيتش اقول لك شريف عشان عارفه ان الموضوع هيبقى حساس اوي … ده غير أن انا عارفه ان شريف احتمال كبير ما يرضاش يساعدنا لكن حسيت ان طنط نوال يعني بغريزه انها ام وكده ممكن نصعب عليها وتساعدنا ايه رايك ؟

احلام عينيها دمعت
انت بتقولي ايه يا اسماء طنط نوال اه طيبه وعمري ما شفت منها حاجه وحشه بس استحاله تنسى اللي انا عملته في ابنها استحاله تساعدنا

اسماء بتوسل
طب خلينا نجرب عشان خاطري مش هنخسر حاجه بلاش نستسلم ان احنا نديهم الفلوس خلينا نحاول ونعافر

احلام بتعب
اعملي اللي انتي عايزاه يا اسماء اعملي اللي انتي عايزاه وانا ما عنديش اي مشكله انا كل اللي عايزاه اني انا انام بهدوء زي اي حد مش طالبه والله اكثر من كده

اسماء ابتسمت بحب
هتنامي يا حبيبتي وهنخلص من الكابوس ده وهنقعد انا وانت تاني وهنفتكر الايام دي كلها وهنضحك وهنقول قد ايه احنا بقينا اقويه ما تقلقيش وخلي عندك ثقه في ربنا كبيره

احلام بدموع
يا رب انت العالم بحالي يا رب انت عالم ان تبت وندمت وهفضل لاخر يوم في عمري بستغفرك يا رب خليك جنبي يا رب خليك جنبي وساعدني في اللي انا فيه

اسماء
انا انا هجرب بكره الصبح اتصل بيها وهشوف كده هتقول لي ايه اتفقنا

احلام هزت راسها بموافقه كانت من جواها بتدعي ان نوال تنسى الاذيه اللي هي اذيتها لهم وتقف جنبهم وتساعدهم لأنها حقيقي اخر امل ليهم

❈-❈-❈

منار ادعت الانهيار وخبطت على اهلها واول ما فتحوا وشافوا تيا على ايديها زي ما يكون مغمى عليها وهي عينيها حمراء من العياط شنطتها مقطوعه وهدومها مقطوعه كانوا باصين ليها بذهول … دخلوها وقعدوها وحاولوا يفهموا منها ايه اللي حصل

صلاح
يا بنتي بطلي عياط وفهمينا ايه اللي حصل لكم حرام عليكي القلق دا

منار ببكاء
ركبت التوك توك انا وتيا بعد ما فسحتها شويه ووديتها الملاهي حسيت ان سواق التوك توك شكله غريب كده ومره واحده راحت راكبه واحده ست جنبنا ورشت عليا انا وبنتي حاجه كده ما حسيتش بنفسي كل اللي انا كنت فاكراه ان هي كانت بتقرب مني عشان تشد مني السلسله اللي لابساها فانا كنت بقاومها على قد ما اقدر راحت شداني من التونيك وبعد كده ما حسيتش باي حاجه فوقت لقيت نفسي انا وبنتي على الرصيف بالمنظر اللي انتم شايفينه ده ولا معايا دهبي ولا معايا محفظتي ولا اي حاجة

مصطفي بشك
رصيف ايه اللي يسيبوكم عليه في حاجه مش مظبوطه في كلامك يا منار

منار عيطت اكتر
والله ده اللي حصل كل اللي انا فاكراه قلته انتم مش شايفين البهدله اللي انا فيها انا وبنتي ادي اليوم اللي قلت خدها افسحها بدل ما احنا محبوسين هنا بين اربع حيطان

محسن
طيب اهدي بس يا منار اهدي فداكم و حصل خير اي حاجه في الدنيا فداكي انتي وبنتك … خشي يلا حاولي تفوقي تيا ولو ما فاقتش اطلعي عرفيني عشان ناخدها نوديها لدكتور … يلا يا حبيبتي فداكم يا حبيبتي فداكم

منار خدت تيا واتحركت على اوضتها ومعاها امها ومراتات اخواتها الاتنين مصطفى كان واقف حاسس ان في حاجه غلط حاسس ان اخته بتكذب طول الوقت الاحساس ده جواه ويوم عن يوم بيكبر بس مش قادر يمسك عليها دليل

❈-❈-❈

محمود قاعد في اوضته مش عارف يطلع منها حاسس ان هو مش عارف يقول ايه او يعمل ايه فكر جديا انه هو يرجع مكان ما جه يرجع يسيب البنات تاني مسؤوليه هناء وهو يشتغل ويجيب فلوس وبس

وهو بيفكر الباب خبط ودخلت هند

هند بهدوء
بابا ممكن ادخل اتكلم معاك شويه

محمود
تعالي يا هند تعالي يا حبيبتي

هند
هو انا عايزه اتكلم مع حضرتك في موضوع بس خايفه من رد فعلك

محمود ابتسم بحب
ما تخافيش من حاجه يا هند قولي يا حبيبتي عايزه ايه

هند بخوف
بصراحه يا بابا يا عيني انا بصراحه يعني كنت يعني

محمود بتشجيع
اتكلمي يا حبيبتي وما تخافيش حتى لو ال انتي هتقوليه دة انا مش موافق عليه اوعدك اني مش هتعصب وهناقشك وهنتكلم مع بعض ب هدوء قولي في ايه

هند
بصراحة يا بابا انا مش عايزه اروح الكليه تاني على الاقل الفتره دي مش حاسه ان انا قادره ادخل الكليه والله … انا عارفه ان انا على طول منتظمه ودرجاتي كويسه … بس اوعدك ان انا هحاول اعمل كل ده من البيت انا كده كده كليتي مش عملي وما فيش حضور وانصراف كمان انا اللي كنت بحب احضر ودلوقتي مش عايزه عشان خاطري ما تزعلش مني بس والله العظيم ما قادره

محمود بحب
انا فاهم يا حبيبتي كل اللي انتي بتمري بيه واسف لو كنت اتعصبت عليكي في وقت انتي كنتي محتاجاني جنبك فيه معلش ابوكي بقى يعني ما بيعرفش يعمل ايه في الحاجات اللي زي دي … عموما لو هتوعديني ان درجاتك هتفضل هي هي وما تقلش انا ما عنديش مشكله

هند بسعادة
بجد يا بابا بجد مش هتزعل مني بجد انت موافق

محمود حضنها
بجد يا روح بابا … انا المهم عندي راحتك راحتك وبس

هند باستة في خده
ربنا يخليك ليا يا حبيبي وما يحرمنيش منك ابدا

محمود
ويخليكوا ليا يا حبيبتي

هند
ينفع ابقى طماعه واطلب منك طلب كمان

محمود ضحك
طلباتك كترت … قولي يا ستي عايزه ايه

هند
ممكن تنزل النهارده تتعشى معانا عشان خاطري يا بابا بقى لنا كتير اوي ما تجمعناش مع بعض

محمود
حاضر يا هند هنزل اتعشى معاكم

محمود حس ان دخول هند عنده في الوقت اللي كان بيفكر فيه يسافر ويرجع تاني اشارة من ربنا انه ما يهربش وان يحاول تاني مع بناته ويقرب منها و يبقى له مكان في وسطهم

❈-❈-❈

في فيلا احمد والد ياسمينه كانوا بيتعشوا مع بعض في هدوء قطعوا احمد

احمد
وبعدين يا ياسمينه هتفضلي سايبه شغلك وقاعده في البيت كده كتير ولا ايه

ياسمينه
مش قادره يا بابا لما احس ان انا قادره انزل واشتغل اكيد هعمل كده بس دلوقتي انا مش قادره لا اشوف حد ولا اتعامل مع حد

احمد
وده لغايه امتى ان شاء الله

ياسمينه
لغايه ما الاقي طريقه ارجع بيها جوزي ليا يا بابا انا ما عملتش كل ده عشان في الاخر اقعد من غيره كده

احمد بدهشه
نعم ترجعي مين معلش سمعيني تاني كده قلتي ايه ؟

ياسمينه
ارجع جوزي ليا يا بابا ايه اللي انا قلته غلط يعني

احمد
يظهر انك ناسيه ان هو طلقك

ياسمينه
وايه المشكله يردني تاني

احمد
ياسمينه ياسين طلقك بالتلاته ما ينفعش يردك خلاص يا حبيبتي خلصت كدة

ياسمينه بغضب
لا ينفع يا بابا ينفع انا بقى لي ثلاث ايام بدور على حد ينفع ان انا اتجوزه ويومين ويطلقني علشان اعرف بعد كده ارجع لياسين حبيبي تاني

احمد بغضب وصوت عالي
لا ده انت اتجننتي فعلا اتجننتي وجنانك ما بقاش له اخر انت واعيه بتقولي ايه

ياسمينه
اتجننت ليه اتجننت عشان عايزه ارجع جوزي ليا اتجننت عشان بحبه ومش قادره ابعد عنه وعايزه ارجع تاني اعمر بيتي اللي اتخرب ايه الجنان في كده

احمد
الكلام معاكي ما بقاش جايب نتيجه بجد يا ياسمينه لو ما ارتجعتيش على في دماغك انا هيبقى لي معاكي تصرف عمرك ما كنت تتخيلي ان انا اخده

ياسمينه بلا مبالاة
والله يا بابا انا مش هرجع اللي في دماغي ولو حضرتك عايز تعمله اعمله مش فارق معايا

احمد بتوعد
تمام يا ياسمينه بس ما تبقيش ترجعي تزعلي مني بعد كده انا قايمه انام تصبحي على خير

ياسمينه
ربنا ما يجيب زعل يا بابي وانت من اهل الخير

❈-❈-❈

منار كانت قاعده في اوضتها نايمه في حضن بنتها بتفكر في كل الاحداث اللي مرت عليها النهارده بتفكر في الخطوه الجايه تليفونها رن بصوت رساله على الوتساب من رقم فريد فتحتها بسرعه

فريد

مساء الخير يا منار يا رب تكوني روحتي وريحتي واستعديتي للمفاجاه بتاعتي المفاجاه بتاعتي يا ستي واللي هتموتي وتعرفيها هي ان كل الداتا اللي معايا وتخصك وصلت لكل الارقام اللي على تليفونك الاسكرين بتاع الشات اللي بينك وبين هبه اللي كنت بتتفقوا فيه على امير طليقك واسكرينات كثير لشتات كثير بينك وبين رجاله كتير اوي وفيديوهات وصور كل الداتا اللي قدرت اهكرها من تليفونك بعتها لكل الارقام اللي عندك على موبايلك وهي دي الهوايه اللي عندي بعد ما بخلص الشغلانه بتاعتي باخذ القرشين من هنا وبفضح البني ادم الوس_خ ده من هنا يلا عايزه اشوف منار القويه اللي ما فيش اي حاجه بتقدر عليها هتعمل ايه لما تتفضح الفضيحة الحلوة دي … باي باي يا قطه

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية كيد النساء وقهر الرجال)