رواية مذكرات حبيبة الفصل السابع 7 بقلم عادل عبدالله

رواية مذكرات حبيبة الفصل السابع 7 بقلم عادل عبدالله

رواية مذكرات حبيبة البارت السابع

رواية مذكرات حبيبة الجزء السابع

رواية مذكرات حبيبة الحلقة السابعة

: واشمعني عملت كده معايا انا ؟
: لتلات اسباب ، الأول انك قولتيلي انك مش بتفهمي فيهم ، والتاني لما قولتيلي انك شارياه علشان تكلمي جوزك المسافر عليه .
: والسبب التالت ؟
: علشان اقولك يا بخت جوزك بيكي .
استغربت اوي من الكلمة لانه كان واضح منه وهو بيكلمني في المحل عنده انه محترم ومش بتاع معاكسات وقلة ادب !!
قولتله : طيب عموما يا استاذ شكرا انا اتصرفت واخو جوزي علمني عليه وكلمت جوزي والحمد لله كله تمام .
: واخو جوزك علمك كويس يعني ؟
: ايوه ، عرفني كل حاجة وخلاص .
: طيب الحمد لله ، ده رقمي معاكي اهو يا قمر ياريت لو في اي حاجة محتاجاها في أي وقت كلميني وانا تحت امرك .
: متشكرة جدا لحضرتك .
قفلت معاه وانا مستغربة اوي من الرجل ده !!!
هو يبان من اسلوبه وكلامه ومظهره انه محترم وذوق اوي لكن اتصاله ده مش بيقول الكلام اللي قاله ده ابدا !! الرجل ده واضح من كلامه انه عايز حاجة تانية .
تاني يوم الصبح واحنا بنفطر كنت انا وولادي وحماتي ودياب وشهد وعاطف وعماد قاعدين كلنا بنفطر مع بعض فجأة حماتي سألتني : هي أمك في البيت النهاردة ؟
: ايوه اكيد في البيت ، اومال هتروح فين ؟
: اصل انا رايحة لها النهاردة .
: ليه ؟ خير يامه !!! في حاجة ؟
: عايزين ناخد اختك منال لعاطف ابني .
اول ما سمعت كده اتقبضت و اتضايقت اوي وقلبي اتخطف !!
لاني مش عايزة اختي تعيش في البيت ده مع الست دي .
مش كفاية الذل والأهانة والبهدلة اللي شوفتها انا هنا ؟!! حماتي عايزة كمان تعمل في اختي كده !!!
حماتي حسيت علي وشي اني اتغيرت ، سألتني : مالك يا بت !!! وشك اتقلب ليه ؟؟
: لا ابدا يامه ، ده يبقي من حظها وقسمتها الحلوة ، ده عاطف ابن حلال وشاب زي الفل والف واحدة تتمناه .
: اومال وشك اتخطف كده ليه لما قولتلك ؟!!
: لا ابدا ، بس كنت بفكر اصل انا اول مره اعرف ان عاطف بيفكر في الجواز دلوقتي !!!
: ليه ؟ ده ابني عاطف بقي راجل اهو ملو هدومه ومعاه ارض ميتجوزش ليه ؟
: طيب عموما روحي لأمي في اي وقت هتلاقيها .
دخلت قعدت في اوضتي وكنت متضايقة اوي .
يعني مش كفاية الذل والاهانة اللي انا شفتهم في الدار دي !!! عايزين ياخدوا اختي كمان يبهدلوها هي كمان !!!
حماتي اخدت ابنها عاطف وشهد مرات دياب وراحت لأمي القرية المجاورة اما دياب خرج وراح الارض ومعاه عماد اخوه الصغير وسبوني انا في الدار وحدي مع ولادي عمر وعمار .
وانا قومت ارتب الدار وألم الهدوم اللي عايزة تتغسل علشان اغسلها .
وبعد ما مشيوا بربع ساعة اتفاجئت بدياب راجع الدار لوحده !!!
قلبي اتخطف وجريت علي المطبخ ومسكت السكينة وسألته : ايه اللي رجعك لوحدك يا دياب ؟؟
: لا ابدا اصل نسيت السجاير بتاعتي ، مالك خايفة وماسكة السكينة كده ليه ؟؟
: طيب يلا خد سجايرك وامشي .
: طيب ادخلي الاوضة هاتيلي السجاير .
: لأ مش داخله ، يلا خلص احسن اصوت وألم عليك الناس .
: طيب خلاص انا ماشي .
خرج دياب بدون ما ياخد حاجة وأتأكدت ساعتها انه كان جاي يستفرد بيا !!
ولما دياب خرج قفلت علي نفسي الدار علشان ميرجعش تاني .
وفضلت في الدار لوحدي لحد ما حماتي رجعت وكنت خلصت كل الشغل اللي ورايا .
ولما رجعت حماتي سألتها : عملتي اي يامه ؟
: قابلت امك يا عين امك .
: وبعدين ؟ عملتوا اي ؟
: وافقت طبعا ، هو انتوا هتلاقوا احسن مننا ومن ابني فين ؟!!
مش قادرة اوصف ازاي احساس الذل والاهانة اللي كنت حاسة به وانا بسمع منها الكلام ده !!!
ورغم المرض اللي اصابها والشلل اللي في ايدها لكن لسانها فضل طويل ومع كل كلمة تنطقها كانت خنجر بيطعن في القلب !!!
وفضلت حزينة ومكسورة لحد ما دخلت اوضتي بالليل والكل نام .
وقعدت بشتكي همي لنفسي وبفكر لما اختي تتجوز عاطف هعمل اي ؟ ويا تري ده هيكون في صالحنا علشان نساعد بعض انا وهي ؟ ولا هتكون هي كمان عايشة في ذل واهانة ؟؟
جمال اتصل بيا ، كلمته فيديو وكنت فرحانه اوي .
لكن لما شوفته وكان واضح عليه الحزن والألم سألته : مالك يا جمال ؟؟ شكلك زعلان ومتضايق اوي !!!
: لا ابدا مفيش حاجة .
: اتكلم يا جمال ، طلع اللي جواك علشان ترتاح .
: اتطردت من شغلي البارح والنهاردة طول اليوم بدور علي شغل مفيش .
: طيب معلش يا جمال ، ما ضاقت الا ما فرجت .
: هتفرج امتي بس ؟؟ ده انا محتاج سنين كتير اشتغل فيها علشان اسدد بس الديون اللي عليا !!! وكمان مش لاقي شغل !!!
: ما انا ياما قولتلك بلاش الفشخرة الكدابة انت اللي حبيت تعمل فيها معلم وأدي اخرتها .
: اتتي شمتانة فيا يا حبيبة ؟!!
: لا ابدا ، عيب اللي بتقوله ده !! هو انت متعرفش مراتك ولا اي ؟!!!
: معلش يا حبيبة ، اصل انا مش طايق نفسي .
: طيب معلش يا جمال مسيرها تتعدل بأذن الله .فرفش بقي واضحك .
: تعرفي يا حبيبة انك وحشتيني اوي .
: وانت كمان .
: عارفة نفسي في اي ؟
: نفسك في اي ؟
: نفسي ترقصي لي .
: ارقصلك !!! ده انت عمرك ما طلبت مني ارقصلك وانت موجود معايا !!!
: طيب خلاص .
: انت زعلت ولا اي ؟
: لا ابدا ، بس كنتي وحشاني وانا متضايق قولت يمكن لما ترقصيلي اخرج من اللي انا فيه .
: طيب استني وانا هرقصلك ، بس انا مش هقلع هدومي علشان الجو برد .
: ماشي يا حبيبتي .
وفعلا قومت ورقصت له اكتر من ربع ساعة !!
وبعد ما. قفلت مع جمال كنت قاعدة متضايقة وحاسة ان مشكلتنا انا وجمال كل مدي ما بتتعقد !!!
صحيح انا مش بحبه وياما ظلمني وبهدلني !! ده غير اللي شوفته منه من ليلة الدخلة ، لكن مهما كان ده جوزي وابو ولادي !!!
وفضلت قاعدة بفكر هنخرج من اللي احنا فيه ده ازاي !!
وانا قاعدة لقيت رقم بيتصل بيا وكانت الساعة حوالي واحدة بعد نص الليل !!
لما بصيت كويس في الرقم افتكرت ان ده رقم شريف صاحب محل الموبايلات !!
عايز اي ده !!
قولت ارد عليه علشان اقوله ميتصلش بيا تاني .
: الو ، مين ؟
: انا شريف .
: تااني ؟ حضرتك عايز اي ؟
: كنت عايز اطمن عليكي .
: متشكرة اوي ، لكن اي السبب ؟؟ مفيش اي علاقة بينا علشان تتصل بيا في الوقت ده وتطمن عليا !!
: انتي اكيد بتهزري !!
: وانا اهزر معاك ليه ؟!!
: يعني انتي لحد دلوقتي مش فاهمة ؟؟
: فاهمة اي ؟؟ وضح تقصد اي ؟؟
: مش فاهمة اني من اول ما شوفتك وانا حبيتك .
: اقفل بعد اذنك ومتتصلش بيا تاني .
: استني بعد اذنك ، اسمعيني دقيتين بس .
:اسمع اي ؟؟ انا قولتلك اني ست متجوزة .
: انتي لسه عندك ٢٠ سنة وفي عز شبابك وجوزك سايبك وسافر !! وهو تلاقيه عايش حياته مع بنات اوروبا وانتي مضيعة شبابك في السجن اللي انتي عايشة فيه ده !!
: انت عايز مني اي بالظبط ؟ وبتقولي الكلام ده كله ليه ؟
: انتي صعبانه عليا ومن ساعة ما شوفتك وانا حبيتك واستخسرتك في اللي انتي فيه .
: طيب اقفل علشان عايزة انام ؟؟؟
: انتي لازم تطلقي منه ونتجوز !!

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية مذكرات حبيبة)