رواية 30 يوم حياة 2 الفصل الثاني عشر 12 بقلم أميرة أسامة
رواية 30 يوم حياة 2 الفصل الثاني عشر 12 بقلم أميرة أسامة
رواية 30 يوم حياة 2 البارت الثاني عشر
رواية 30 يوم حياة 2 الجزء الثاني عشر
رواية 30 يوم حياة 2 الحلقة الثانية عشر
في عصر يوم جديد
جهز كل من مديحه وحاج سعيد وست فاطمه وست نعمه وحاج فاروق وحاج حسني…للسفر لزياره بيت الله الكريم.
وبعد ما الجميع ودعهم و ستات الحاره ودعوهم بفرحه اللي بيزغرط واللي بيقولهم عقبال الحج..واخيرا
راح زين ووعد يوصلوا مديحه المطار بعد رفض زين ان منه تسيب بيتها
وراح صالح وصلاح يوصلوا والدتهم ووالدهم
وراح عامر وإيهاب يوصلوا والدهم
وراح عادل ومنار مع حاج سعيد وست فاطمه..
……….
في المطار كان واقف كل اسره لعيد عن التانيه مسافه مش كبيره…
زين…ايه يا امي الباسبور وكل حاجه تخصك فالشنطه تممي علي حاجتك كويس
مديحه…متقلقش يا زين كله تمام راجعت كل حاجه يجي ميت مره
زين…عينك علي حاجتك ديما وخلي بالك من الفلوس
مديحه….الفلوس دي كتير اوي يا زين خليهم معاك يا حبيبي انا مش محتاجه كل ده
زين…خليهم معاكي يا امي وجيبي كل اللي نفسك فيه عشان حتي لو حبيتي تستنصحي عليا يا مديحه وتوفريلي عشان ترجعي تديهملي مش هاخدهم دي خلاص فلوسك اكل الفندق مش عاجبك اطلبي من بره اللي يعجبك حاجه عجبتك وحبيتي تشتريها اشتري ولو لا قدر الله تعبتي يبقي معاكي فلوسك يا امي مش كفايه اني مش معاكي
مديحه…ربنا يكتبهالك يا زين انت وعد
وعد….بعيون بتلمع من الفرحه الله بجد يا خالتو ادعيلي والنبي نفسي اروح اوي
بصلها زين نظره حب وابتسم
مديحه…ربنا يكتبهالكم يارب انتوا وكل المسلمين عمره وحج اللهم امين
وعد…اللهم امين
زين….اول ما تنزلي اول حاجه تعمليها تفتحي الموبايل عشان اطمن عليكي
مديحه…حاضر يا حبيبي ربك يسترها…
………….
صالح….ادعولنا يا اما كتير
صلاح…اه والنبي يا اما ادعولنا كتير وادعي لشهد يا امي تحمل
نعمه…ياواد مستعجل علي ايه انتوا لسه مكملتوش شهر محسسني انها بقالها ميت سنه
صلاح…ايه يا نعمه مش عايزه تبقي جده واملالك انا وصالح البيت عيال ولا يه
أبتسم صالح نص ابتسامه وكأنه بيقوله مش لما اتجوز الاول😏
نعمه…ربنا يرزقكم بالخلف الصالح يا حبيبي انت واخوك طبعا ده يوم المني بس بلاش لهفتك دي يا حبيبي احسن تزعل شهد استني شويه انتوا مبقالكوش كتير وبعدين بلاش يا ابني تخليها تفكر كتير فالموضوع ده احسن الخلفه تتأخر خليها تيجي براحه ومن غير تفكير
صلاح…حاضر يا أما
فاروق….واحده واحده يا لاحه ربك كريم وان شاء الله قريب افرح بولادكم والسنه الجايه زي انهرده يبقي معاكم عيالكم
صلاح…بفرحه يارب يا حج
صالح…يارب يطولنا في عمركم دي اهم حاجه
نعمه…مالك يا صالح حساك مش مبسوط يا حبيبي انت زعلان انت وبوسي ولا ايه
حاج فاروق…واحنا مالنا يا نعمه حتي لو زعلان دي حياتهم ملناش اننا ندخل يحلوا امورهم بنفسهم
نعمه…طبعا يا حاج بس بطمن عليه
صالح…اطمني يا اما انا وبوسي زي الفل ربنا يخليها ليا انتي عارفه ان بوسي حبيبتي واكيد مش مزعلاني انا بس اللي حاسس ان داخل عليا دور برد جامد
نعمه…بعد الشر عنك يا حبيبي طيب الحق نفسك بقي بدل ما تتعب زي مراتك ما خدت الدور ده قبل كده
صالح…ربك يستر المهم خلينا فيكم خلوا بالكم من بعض كلكم وطمنونا عليكم اول بأول
حاج فاروق…وانتوا كمان خلوا بالكم من بعض انت واخوك واقفلوا الباب بليل متنسهوش كالعاده كنت بقفله و الوقت انا مش موجود
صلاح…متقلقش يا حاج كل حاجه هتمشي زي ما انت عايز
………………..
منار كانت واقفه حزينه وعينها كلها دموع مش عشان فرق والدها ووالدتها بس المكان كان بيفكرها باخر مره وقفت فيه مع عامر وكأن اللي حصل ده كان شريط وبيعدي من تاني
فضل عامر بين كل لحظه والتانيه يبصلها وعارف احساسها ايه فاللحظه دي وكان بيراقبها خايف تتعب او يجرالها حاجه…
فاطمه…حط اختك في عينك يا عادل
عادل…بتوصيني علي منار يا امي دي في عيني
فاطمه..ربنا يخليكم ليا يارب ويخليكم لبعض
فاطمه…وانتي يا منار خلي بالك من عادل وخلي بالك علي نفسك بلاش تعملي اي مجهود
منار…بألتسامه متقلقيش يا ماما
فاطمه…وبلاش اكل الشارع يا بنتي احنا مش ناقصين مرض
بصت منار وعادل لبعض وضحكوا بصوت عالي
سعيد…بضحك يبقوا اتفقوا ياكلوا من بره المجرمين دول
عادل…بصراحه اه اصلي ناوي ادلع منار الفتره دي واخليها هانم كده هي بس عليها الحلو
فاطمه…بأبتسامه شوف العيال يا حاج سعيد بيضحكوا علينا ازاي
منار…انا مالي انا كان عندي استعداد هو اللي عرض عليا
عادل…يعني انا باجي انام الصبح وشويه عالعصر وانزل المكتب وبرجع علي بعد العشا وساعات علي عشره وهي بترجع علي سبعه وساعات بعد كده لوفي شغل كتير بالزمه هتقدر تيجي تعمل اكل فولت اريحها
سعيد…ربنا يخليكم لبعض ومعلش استحماوا الكام يوم اللي هنغيبهم عنكم
عادل…متشيلوش همنا انتوا بس خلوا بالكم من بعض
فاطمه…ربنا يسترها يا حبيبي..
………..
حسني…مش كنت اعدت مع مراتك يا ابني انتوا لسه عرسان
ايهاب…مالك يا عم حسني مكبر الموضوع ليه وبعدين انا في دي الساعه وانا جاي اوصلك للمطار بنفسي
حسني….ربنا يخليك ليا يا حبيبي انت واخوك
عامر….خلي بالك من نفسك ياعم حسني واي حاجه تحتاجها قولي ولو عندك اي مشكله في اي حاجه عرفني وانا هبعتلك ناس حبايبي من السعوديه يظبطولك اي حاجه انت والجماعه
حسني…ان شاء الله مش هيحصل اي حاجه وهتبقي رحله حلوه
عامر…ان شاء الله يا حبيبي
بعد وقت بسيط وقفوا كلهم مع بعض لحد ما ينادوا علي ركاب الطياره…
وقفوا الشباب يتمموا علي حاجت الكل وسعيد وصاهم كلهم علي بعض
زين…متقلقش يا حاج سعيد ربك يسترها انتوا بس اللي خلوا بالكم من بعض
واوعي تبعدي عنهم يا امي احسن تتوهي
مديحه…بضحك يا واد هي روحيه أثرت علي دماغك ولا ايه.
وفجأه…ومالها روحيه يا وليه انتي جايبه سيرتي ليه
بصوا وراهم لقوا يوسف جاس وفي ايده روحيه
ضحكوا كلهم
مديحه…روحيه ايه اللي جابك هنا
زين…انت جيت امته
يوسف…انا حاولت ارجع بدري عشان اوصلكم بس ملحقتكم الطريق كان زحمه روحت خدت امي من عند خالتي ناريمان وقولتلها تعالي نطلع وراهم نعملهالهم مفجأه
مديحه…احلي مفجأه والله مشوفتش روحيه انهرده خالص وهما بيسلموا علبنا ناريمان قالتلي انها نايمه
فاطمه…فيك الخير يا يوسف يا ابني
يوسف….ماقوليش كده يا خالتي ربنا يعلم انكم هتضلموا الشارع
حاج سعيد…مكنتش تعبت نفسك يا ابني وانت جاي من الشغل كده
يوسف…متقولش كده يا ابا هتعب لاعز منكم
حسني….ابن اصول يا چو
زين…بغمزه…تربيتي😉
بعد وقت بسيط ابتدوا يسلموا عليهم ويتحركوا للداخل وبعد شويه كان الشباب خرجوا بره المطار
مال زين علي ودن عادل
زين…بقولك ايه انا كنت خارج اتغدي بره انا ووعد هقول لكم كلكم اننا نتغدي بس اخلع انت متجيش
عادل…ليه يعني
زين…بقولك ايه من غير اسئله كتير من الاخر كده اللي بيحصل بين عامر ومنار كتير لازم ننهيه ولازم ندبهم فرصه اختك بتهرب علي طول وبصراحه بقي عامر اللي طالب مني اني احاول اشوف فرصه تجمعهم ومش لاقي احسن من دي فرصه قولت ايه
عادل….قولت لا إله إلا الله اللي تشوفه صاحبي
زين…بس استني مترفضش علي طول اوك
عادل…اوك طب والباقي
زين….صالح ولاحه هيرجعوا عشان القهوه اكيد وايهاب مش هيخرج ويسيب مراته ويوسف راجع من الشغل تعبان مش هيقدر خصوصا ان معاه روحيه
عادل….اه صح وبعدين هو قال امبارح انه خارج هو ومريم يجيبوا حاجات فالشقه نقصاهم
زين…ايوه صح طيب خلصانه اهي
عادل…تمام.
خرجوا بره ووصلوا لعربيه يوسف…يلا مين اللي هيركب معايا
صالح…احنا جايين بالموتسكل عشان كنا عارفين اننا هنرجع علي رجلنا
يوسف…خلاص شوفوا اللي هيركب
زين….لا بقول ايه انا ناوي اخرج اتغدي انا ووعد بره وعازمكم
وعد…منار انتي معايا مليش دعوه انتي واخده اجازه من الشغل
منار…لا لا مش هينفع اخرجوا انتوا مع بعض
وعد…متبقيش رخمه بقي بقالي كتير مخرجتش معاكي عشان خاطري😔
منار…ايوه بس يا وعد.
قاطعها زين…مفيش بس يرضيكي كده تزعليهالي خلاص مفيش رفض انتي معانا
وعد…بأبتسامه هتيجي صح
منار…بأبتسامه بصت لعادل
عادل..بحب روحي طبعا بتبصيلي ليه
زين…مانت كمان معانا
عادل…لا انا مش قادر انا المفروض كنت نايم الوقت بس مش هلحق يادوب اروح اغير واطلع عالمكتب خدوا انتوا منار هي مش بتخرج خالص وبدل ما تأعد لوحدها
زين…طيب والباقي ايهاب وعامر انتوا معانا
عامر….ماشي انا فاضي
حست منار ان قلبها دق واتمنت انها ترجع في كلامها بس كان فات الوقت.
ايهاب…لا انا مش هقدر عشان رحاب متزعلش
زين…ياعم عادي مش هتزعل
ايهاب…لا والنبي خليني انا انا اصلا مش قادر وبعدين دي انهرده بتتمل الاكل بنفسها وبتجرب فيا لو خرجت هتفكر اني بتهرب ونبتدي في خناق المتجوزين
زين…بضحك لا وعلي ايه
صالح…وانا مش هقدر عشان القهوه
صلاح…وانا زيه مش هينفع خلينا يوم تاني نتجمع كلنا مع بعض كده كده الايام الجايه كلنا لوحدنا يعني هنتجمع كتير
بوسف…وانا معايا روحيه و ورايا مشوار انا ومريم
زين…طيب تمام خلاص نتجمع قريب
صالح ان شاء الله يلا يا صلاح اركب بقي
يوسف….طيب ايهاب وعادل انتوا معايا
عادل…انا معايا عربيتي
ايهاب…خلاص هركب مع عادل عشان ميبقاش لوحده
يوسف…تمام
سلموا علي بعض ومشيوا
عامر…كان طاير من الفرحه وحاسس ان الدنيا مش سيعاه من السعاده.
اما منار علي اد ما كانت فرحانه علي اد ما كانت متوتره
عامر…ايه علي فين فين العربيه اللي كانت معاك
زين…تعالوا نخرج بره شويه انا راكنها هناك كويس اني أجرت العربيه دي انهارده
عامر…اه نفعت هي وعربيه عادل
زين…طيب يلا العربيه هناك اهي
عامر…يلا
مشي هو وعامر جمب ببعض
ومنار ووعد مع بعض
منار…بصوت واطي وبغيظ مفقوسه اوي الحركه دي
وعد…بتمثيل 🙄حركه ايه مش فاهمه
منار…لا يا شيخه عايزه تقوليلي ان كلهم يرفضوا معادا عامر دي عادي
وعد…بخبث اه عادي ما كل واحد فيهم قال سبب رفضه
منار…لا وهما بصراحه مقنعين جدا
وعد…جدا🙄😁
منار…😡ماشي ياوعد
وعد…عايزه تقوليلي انك مش فرحانه🤔
منار…لا مش فرحانه و والله لا هردهالك😡
وعد….قصدك عالعزومه لو هتعزميني انا وزين ياريت
منار…رخمه
وعد…بحبك
أبتسمت منار غصب عنها ووصلوا للعربيه مع بعض
وبسرعه ركبت وعد ادام مع زين عشان متديش منار فرصه تعترض
منار…من بين سنانها…اه يا وعد الكلب😡
ركب زين وهو بيغمز لوحد بأبتسامه فتح عامر لمنار الباب من غير ولا كلمه
ركبت منار وركب هو بعدها
وانطلق زين.
………
في منزل عيسي
ناريمان…..يلا يا مريم جهزي السفره زمان يوسف وروحيه راجعين عشان تلحقوا تتغدوا
مريم….ماشي يا ماما
ناريمان….حاولي يا مريم تستقري بقي في شكل النجف اللي كل شويه تغيري رأيك فيه ده
مريم…بصراحه كل الاشكال حلوه اوي وكلها هتليق علي الشقه عشان كده محتاره
ناريمان…مفيهاش حيره ولا حاجه شوفي اكتر حاجه حلاها اوي ومقتنعه بيها وهاتي بقي مفيش وقت خلاص يا بنتي مفاضلش غير شهر وعشر ايام عايزين نلحق نخلص اكتر حاجه ممكنه عشان اول ما الجماعه هيرجعوا من السفر بأسبوع هيبقي فرح عادل وشمس وانتوا بعدهم علي طول
عشان ندي نفسنا فرصه للفرش ليكم انتوا الاتنين
مريم…متقلقيش يا ماما هحاول الكام يوم دول اخلص كل حاجه ناقصاني
ناريمان…علي خير
…………..
في العربيه اللي زين مأجرها
كان زين ووعد بيضحكوا بيتكلموا مع بعض في اي كلام وبيحاولوا يشركوا منار وعامر معاهم عشان يكسروا الصمت اللي بينهم.
وفالوقت ده رن تليفون عامر.
عامر….الوووو
سهر….ازيك يا فنان
عامر…الحمد لله يا دكتوره
منار…😡حست بغيره مجرد ما قال دكتوره وفضلت حاطه صوابعها في بوئها بغضب.
عامر…اه الحمد لله خلاص دخلوا وسبناهم زمانهم طلعوا الطياره
سهر…ربنا يوصلهم بالسلامه يارب
عامر…يارب
سهر…طيب انا مش هعطلك بقي انا بس كنت بطمن عليهم
عامر…ربنا يخليكي يا سهر
سهر…صحيح مش ناوي تيجي بقي عشان نبتدي اول كشف يمكن وشك يبقي حلو عليا ونبتدي شغل
عامر…بضحك هي لسه ناشفه ولا ايه
سهر…بضحك اه لسه ناشفه يا سيدي تعالي كده اعمل اي منظر يمكن تشجع الناس
عامر…بضحك علي اساس اني هجيلك بزفه
سهر…ياعم متقاطعش يمكن وشك يبقي حلو قول اه بقي هتيجي انهرده
عامر…بابتسامه طب خلاص خلينا بكره عشان انهرده مش فاضي
سهر…ماشي يا سيدي هستناك بكره باذن الله
عامر…ان شاء الله مش عايزه حاجه
سهر…عايزه سلامتك يلا سلام
عامر…سلام يا سهر
فالوقت ده كان زين ووعد اعدين يتكلموا مع بعض
قفل عامر وتلقائي اول ما قفل بص علي منار اللي كانت مكشره وشها وايدها في بوئها بتاكل في ضوافرها
حط عامر بسرعه ايدها مسك أيدها شالها من بوئها وهو رافع حواجبه بمشاكسه🤨🤨
بصتله منار بصدمه
عامر…..بنبره هاديه وابتسامه جميله عيب بقي كبرنا علي صوابعنا اللي في بوئنا دي🤨
بصتله منار بغضب وبصت بسرعه علي الشباك و أبتسمت منار غصب عنها ابتسامه بسيطه
بعد وقت بسيط وصل زين بيهم لمطعم جميل وبيبص عالنيل
اعد زين بعد ما شد كرسي لوعد والمقابل ليهم اعد عامر بعد ما شد كرسي لمنار
وعد….الله حلو اوي المكان ده
زين…عجبك
وعد…اوي والجو جميل جدا
عامر….حلو المكان فعلا
زين…ايه رأيك يا منار لو مش عاجبك فولي اغيره عشان خاطرك
منار…بابتسامه جميله ربنا يخليك يا زين لا والله المكان تحفه اوي ومنظر النيل جميل مع الغروب كده
زين…لا ولسه بس الشمس تروح والانوار اللي حاطينها دي تشتغل هيبقي احسن
وعد….بصوت واطي انا جيت هنا قبل كده😡
زين…بأبتسامه خبيثه كتيرررر
وعد…ومع مين بقي ان شاء الله🤨
زين…ملكيش دعوه😉
وعد…زين انا مش بهزر😔
زين…عايزه ايه
وعد…جيت مع مين
زين…اما بصراحه عشان مكدبش عليكي جيت هنا بتاع 3 مرات جيت مع مين بقي لما نروح هبقي اقولك😉
وعد….بأبتسامه ماشي يا زين
زين…ها تحبوا تاكلوا ايه
عامر…..انا اي حاجه المهم أكلوني عشان انا واقع من الجوع
زين….طيب شوف المنيو واطلب اللي علي مزاجك
عامر…انتوا هتاكلوا ايه
زين….انا بفكر اكل حمام نفسي فيه يعني وشويه حجات كده
وعد….وانا هاكل اسكالوب ومكرونه..
زين…وانتي يا منار
منار….انا هاكل مكرونه نجرسكوا
عامر….وانا هاكل زي منار
بصتله منار بطرف عينها بغيظ
عامر…😉
زين…طيب تمام وهطلبلكم معاه بانيه عشان انا عارف انك بتحبه
عامر….اه نسيته ده 😉
بلغ زين الويتر بكل طلباتهم
وبعد مده بسيطه جه الاكل وأبتدوا ياكلوا زين ووعد علي غير عادتهم كانوا بيتكلموا كتير وبيضحكوا وببهزروا اكتر عشان الجو بينهم يبقي احسن عامر كان داخل معاهم فالحوار واعد يضحك منار كانت مكتفيه بالابتسامه ولو لزم الامر توجه كلامها لوعد وزين وبتتعمد تتجاهل عامر
بعد مده بسيطه خلصوا الاكل وطلب كل واحد فيهم حاجه يشربها
وعد….زين ما تيجي تصورني فالمكان اللي هناك ده
شاورت وعد علي مكان كان عباره عن نافوره نافوره بتخرج من الحيطه وكلها انوار جميله وشكله هادي
زين…بس كده يلا
منار….انتوا رايحين فين
وعد…ايه هتصور هناك زين هيصورني هرجع علي طول
منار…وهي بصالها بغيظ ماشي 😒
عامر…كان كاتم ضحكه
راح زين ووعد وسابوهم لوحدهم فضلت منار ساكته وباصه عالنيل وشايفه خيال عامر اللي مركز معاها
فضل عامر باصصلها وساكت مش عارف يفتح كلام معاها خالص واول ما أبتدا يتكلم
رن موبايل منار واللي بمجرد ما شافت الاسم ارتبكت وملامحها اتغيرت ونسيت خالص انها مقالتش لانس اصلا انها خارجه
كان عامر مراقب تقسيمات وشها اللي اتغيرت. بترقب وكأنه اتاكد من اللي بيتصل بيها
فتحت بسرعه منار الخط
منار…الووووو ايوه يا انس
ولع عامر سيجاره بغضب ودي كانت اول مره منار تشوفه بيشرب سيجاره لانها لأختصار كانت عاده جديده عليه تقريبا من يوم ما عرف انها أتخطبت.
بصت منار بصدمه لايد عامر اللي فيها السيجاره وعلي ملامحه اللي انقبضت مره واحده وهو بياكل في جمب شفايفه بغضب والعرق الواضح جمب رقبته نافر وهو باصص عالنيل.
أنس…ايه يا حبيبتي روحتي خلاص
منار…بأرتباك لا لا لسه اصل اصل انا خرجت مع زين ووعد عشان صمم يعني يعزمنا بعد ما وصلناهم
انس….ومقولتليش ليه يا منار ده الليل ليل خلاص انا فاكر انك روحتي من شويه كمان وسبتك براحتك قولت هتخلصي اللي وراكي وتكلميني وانتي فالاخر خارجه ومهانش عليكي حتي تاخدي رايي
منار…في ايه يا انس مالك مكبر الموضوع ليه قولتلك مقصدتش يعني اني ما قولش الموضوع جه بسرعه وبعدين يعني مش هقولهم استنوا لحظه اخد الاذن من انس وارجع اقولكم عن رأيه عادل كان معايا اصلا وعارف ولولا انه عنده شغل كان جه معانا
أنس…لو انك بتقوليها بأستهزاء بس اظن لو كنتي عملتي كده مكانش هيبقي عيب انك تستأذني انتي عارفه اني عمري ما منت هقولك لا بس عالاقل كنت هحس أنك بتقدريني وان عادل بعرف دي حاجه كويسه بس انا كمان ليا حق التقدير والاحترام عندك يا منار زي ما بكلمك وانا رايح اي مكان بعرفك عشان بردو ده حقك عليا الاحترام والتقدير..
منار….أنس انا مقصدش علي فكره انا بس مضايقه انا ماما وبابا سافروا مش اكتر
أنس….ماشي يا منار ولا يهمك المهم انتي هتروحي امته
منار…لسه معرفش شويه يعني كده
أنس…انتب مع وعد وزين بس
منار…بأرتباك لا معانا كمان اا عامر كلهم عندهم حجات يعملوها ومعرفوش يجوا معانا
أنس….عامر طيب تمام سلميلي عليهم كلهم
منار…الله يسلمك
أنس…سلام يا منار واه صحيح لما تروحي ياريت بس تبقي تطمنيني عليكي حتي لو بماسدچ لو مشغوله يعني
منار…سكتت شويه واتأكدت انه زعل من طريقتها..حست منار أنها مضايقه من نفسها جدا لانها اتكلمت معاه بطريقه وحشه ولانها متعودتش تجرح حد وخصوصا انه ملوش ذنب في كل اللي هي بتمر بيه ده
حبت تعتذرله عشان ماتحسش بالذنب من ناحيته اكتر من كده
ونسيت تماما وجود عامر
منار…أنس.
أنس…ايوه يا منار
منار…معلش حقك عليا متزعلش انا عارفه اني كلمتك بطريقه مش ظريفه وعارفه انه كان لازم ابلغك اني خارجه…معلش صدقني مقصدتش اضايقك
أنس…بأبتسامه وانا مش زعلتن با حبيبي خلاص حصل خير المهم عندي انك تغيري جو وتتبسطي
منار…بأبتسامه شكرا يا انس
أنس….العفو يا حبيبي يلا روحي بقي اتبسطي واول ما تروحي عرفيني
منار….تمام ماشي
أنس…باي
منار…باي
قفلت منار الخط وهي مبتسمه وفرحانه انها عرفت تراضيه بعد ماضايقته بكلامها وطريقتها وعدم احترامها ليه…رفعت عينها ناسيه تماما وجود عامر ولسه الابتسامه علي وشها
لاكن اتقبض قلبها بخوف اول ما شافته باصصلها بنظره حاده الغضب والشرار طالع من عينه السيجاره في ايده.
…..
في نفس الوقت
كان زين بيبص لوعد بحب
زين…مكنتش اعرف انك سوسه كده وقصدتي تقومي عشان تسبيهم
وعد…هو مش انت قولتلي عايزين نقنعها تخرج ونحاول نفضيلهم الجو انا بسمع كلامك يا قلبي انت الاستاذ اللي خطط لكل ده
زين…وانا تلميذتي شطوره ومذاكره.
وعد…نفسي بجد اشوفهم مع بعض
زين…بحزن انا اللي نفسي اكتر انه يحصل بجد.مضايق ونفسي اعملهم اي حاجه
وعد…بس انا عندي احساس انهم هيرجعوا اصل لازم يعني حبهم يبقي اقوي
زين….اكيد ان شاء الله
وعد…شكل عامر مضايق ان منار بتتكلم في الموبايل شكله كده أنس
زين…فعلا واضح بقولك ايه خلينا باصين بعيد عنهم عشان منار متحسش اننا مركزين معاها ولا تحاول تستنجد بينا
وعد….ماشي
………..نرجع لمنار وعامر.
منار….حاولت تداري علي مكالمتها لانس وتداري خوفها من نظرات عامر
منار…هو انت بتشرب سجاير
عامر….بجمود انتي شايفه ايه
منار….انا اول مره اشوفك اصلا بتشرب سجاير عشان كده مستغربه
عامر…عادي طب مانا اول مره اشوفك خايفه علي زعل حد🤨
منار…بأرتباك وهي فاهمه قاصده..تقصد ايه
عامر….بتحبيه
منار….مين
عامر….بنبره خاليه من الهدوء وكأنه الهدوء الذي يسبق العاصفه…أنس هو في غيره
منار…بتوتر بتسأل ليه
عامر…عادي بطمن علي وكمل بتريقه علي اختي
أبتسمت منار بسخريه علي تريقته…ومالك بتقولها كده وكأن اللقب ده اتفرض عليك غصب عنك أمال لو مكنتش انت اللي اتمسكت بيه مش انت اللي مصمم علي اننا اخوات
عامر…بلاش استفزاز يامنار انا علي اخري
منار….وعلي اخرك ليه ايه اللي مضايقك اوي كده انت كنت لسه من كام دقيقه مبسوط وبتضحك حصل ايه
عامر….ردي علي سؤالي يا منار
منار…سؤال ايه يا عامر
عامر….بتحبي انس
منار….طيب ياتري قبل ما ارد عايزني أرد بأعتبارك اخويا
عامر…خد نفس طويل كله غضب وبنفاذ صبر منار بقولك انا علي اخري ومش عايز ازعلك
منار…طيب ما نقلب السؤال وتجاوب انت عليه
عامر…يعني ايه
منار…تقولي بتحب سهر
ابتسم عامر من سؤالها اللي اكدله غيرتها…وانتي ومالك ومال سهر
منار…بغضب تمام واظن أجابت سؤالك وصلتك انت مالك ومال أنس معلش بقي اصل احنا اخوات وكده وردنا واحد
عامر….منار لاخر مره هقولك بلاش تعصبيني انا علي اخري
منار…عايز يا عامر
عامر…بتحبيه
منار…أفتكرت وقفه المطار والمشهد اللي اتكرر ادام عينها من تاني ووجعها اللي حسته …منار بتحدي اه اه يا أنس بحبه
عامر…كدابه انتي عمرك ماحبيتي غيري عينك فضحاكي ضحكتك اللي بتحاولي تظهريها غصب عنك فضحاكي عينك اللي بتهرب مني كل ما تيجي في عيني فضحاكي وجودك معايا في مكان واحد يوم ما اتجمعنا عالسطح وانس معانا وتوترك
اللي كان لاين علي عينك فضحاكي عينكي فضحتك وانتي غيرانه عليا من سهر من اول يوم جت فيه المكان كل حاجه يا منار فضحاكي حتي صدمتك الوقت لما شوفتيني بشرب سجاير
منار….بأرتباك انت انت واهم نفسك علي فكره انت مش
قادر تقتنع اني كنت بحبك انت الوقت اخويا وبس يا عامر و انت اللي حكمت بده وانا وافقتك وبعدها قررت اعيش حياتي ومستسلمش بس الوقت انت اللي تعبان وحابب تغير حكمك اللي حكمته عليا بس انت أناني يا عامر عارف ليه عشان انت محبتنيش يمكن الاول صعبت عليك زي ما قولتها كتير بس لما لاقتني وقفت علي رجلي وابتديت اشوف حياتي بعيد عنك اضايقت وكأني لعبه راحت من ايدك وانت حالف ترجعها فوق يا عامر انا مش اللعبه دي انت اللي واجعك اوي اني ابتديت اشوف حياتي علي فكره انا لو مكنتش ارتبطت كنت هتفضل بعيد عني زي مانت شايفني اختك او البنت اللي ياحرام تعبت بسببي وهضطر اني اوافق امثل عليها اني لحبها عشان متموتش ولما لاقتني قررت اني اوافقك اني اعتبرك اخويا زي ماانت بتعتبرني اختك ولاقتني خفيت ولا قتني بعد ما خفيت اتخطبت انت وقتها اضايقت صح
عامر…انتي شيفاني وحش اوي كده يا منار انا حبيتك بجد يا منار حبيتك من قبل ما حتي انتي تحبيني
منار…اتجمعت الدموع في عينها كدااااب انت عمرك ما حبتني لو كنت حتي حبتني كأخت با اخي زي ما بتقول كنت صعبت عليك بس انا مصعبتش عليك للاسف
عامر…منار أفهمي كريم السبب
منار…بضحكه سخريه وهي بتمسح دمعه نزلت بسرعه كمان حابب تطلع كريم اللي غلطان عشان اصدقك
عامر…انا مش كداب يامنار انا بس عايز احكيلك
منار…وانا مش عايزه اسمع منك حاجه ابعد عني ياعامر شوف حياتك وسبني اشوف حياتي مع حد يقدرها بجد ويستاهل حبي ليه
عامر…ده لما تكوني بتحبيه
منار…بتحدي بحبه ولو مش بحبه فا اكيد هحبه عشان كفايه حبه ليا
عامر…بغضب مسك أيدها محدش بيحبك ادي يا منار وانتي عارفه اني بحبك وعارفه اني مش بكدب وعارفه انك مش اختي ولا صعبانه عليا ولا مضايق انك روحتي لحد تاني انا مش متملك يا منار انا بحبك وانتي عارفه بس بتكابري عشان اللي حصل بتكابري عشان اتوجعتي بتكابري عشان كرامتك اللي حساها اتوجعت واللي انا مستعد يا منار اعمل اي حاجه عشان ارجعلك كرامتك اللي اتوجعت مني بس متسبنيش يا منار
قوليلي عاللي يرضيكي وانا اعمله
منار….مسحت دموعها مفيش حاجه ترضيني ياعامر
حتي لو اعتذرت لي ادام كل الناس
عامر…..الناس كلها عارفه اني بحبك ومستعد اقولها بعلو صوتي ادام الكل معنديش مشكله انتي اللي رافضه.
منار انتي بتكابري انتي موجوعه وحالفه توجعيني وانا موافق هستحمل منك اي وجع
منار….سبني في حالي يا عامر ارجوك بلاش تتعبني اكتر من كده انا مصدقت احس اني بقيت احسن
عامر….انتي كدابه انتي بقيتي أسواء منار انا بحبك وبقولهالك من قلبي اللي انا واثق ان قلبك حاسسها بس مش هسمحله يرفضها..وهقولهالك تاني انا مستعد علي اي وجع إلا وجع أنك تكوني لحد تاني
منار….بتحدي وكانها بترجع جزء من كرامتها وهي قلبها رافض اللي بتعمله وبيصرخ وانا بقولهالك تاني يا عامر انا مش عيزاك و مبقتش بحبك
وبحب انس ولو انت اخر راجل فالدنيا مش هرجعلك …
واعمل حسابك أنس طلب انه يكتب كتابي لما بابا وماما ينزلوا من العمره وكملت بأبتسامه وجع ظاهره وانا كنت رافضه بس اوعدك اني هبلغهم بموافقتي وههلي كتب الكتاب يوم فرح عادل اخويا واتمني من قلبي انك انتي اللي تغنيلي في الفرح
يا اخويا
عامر…مسكها من ايدها وضغط علب ايدها بكل غضب أقسمت منار أن ايدها اتكسرت في ايده من شدت غضبه..
عامر…..فكري بس واعمليها صدقيني هيبقي اخر يوم في عمرك عمري و عمر اللي هيقرب منك..
ولو نفذتي حاضر يا منار اوعدك اني هغنيلك في فرحك بس بعد ما اغني متزعليش مني ساعتها انتي اللي هتبقي جبتيه لنفسك
ساب ايدها بغضب
حست منار بخوف من عامر لاول مره وحست اد ايه هي وجعته وكانت قاصده ده.
عامر…شاور لزين
جاله هو ووعد
زين…ايه في ايه
عامر…مش يلا بقي
زين….ليه في حاجه ولا ايه
عامر…لا ابدا بس منار حاسه انها تعلانه وانا قلقان تتعب فا نوديها يلا ترتاح احسن
وعد…مالك با منار حاسه بايه
بصتله منار …بطرف عينها بتوتر
لا ابدا بس محتاجه ارتاح تعبانه شويه
زين..طيب تمام جهزوا نفسكم لحد ما احاسب
بعد وقت بسيط خرجوا من المطعم وركبوا وطول الطريق الصمت كان هو الحديث وكل واحد فيهم بيحاول ازاي يضايق التاني
عامر…لنفسه استني عليا يامنار😡
منار….لنفسها استني عليا يا عامر😡
يتبع…
- لقراءة الفصل التالي : اضغط هنا
- لقراءة باقي حلقات الرواية اضغط على (رواية 30 يوم حياة 2)