رواية انتقام عاشقة الفصل التاسع 9 بقلم سلمى تامر

اتنهد واتكلم بجديةوعيون حزينة

_عمي…عمي لعب لعبة حقي.رة على بابا ومضاه على ورق يوديه ورا الشمس علشان ينتقم منه ومني على اني متجوزتش بنته وجر.حتها

بصتله شوية بصدمة وبعدها انفجرت في الضحك لدرجة ان عيونها دمعت

استغرب جدا رد فعلها ده واتكلم بقلق

_ايه ياعلياء انتِ اتجننتي

علياء وهي ماسكه بطنها وبتضحك جامد

_اسفه..اسفه والله العظيم مش قصدي اضحك على مشاكلك..بس انتوا بجد عيلة غريبة اوي

يعني مامتك واختك اتهموني بالسرقه وكانوا هيسجنوني ومش فاهمه لي لحد دلوقتي

زائد ان عمك عايز يسجن اخوك

و بنت عمك حاولت توقع مبينا وكنا هنطلق بسببها

فيه ايه!!!

بصلها شويه وبعدها انفجر في الضحك معاها ورد بسخرية

_عيلة كلها سوية نفسية ماشاء الله..لو فكرت في يوم اعزمهم هعزمهم عند دكتور نفساني

فضلوا يضحكوا لحد ما علياء وقفت ضحك واتكلمت بجدية

_اوكي…عارفه ان احنا دلوقت في مشكله بتهدد علاقتنا ولازم نحلها مع بعض بهدوء علشان محدش فينا يطلع خسران

دلوقتي عمك علشان يقطع الورق اللي معاه ده واللي اكيد فيه بينهم ورق مزور..يإما نلجأ للقانون وساعتها مش هتعرفوا تثبتوا حاجه..يإما نلجأ للحيلة ونستخدم نفس الاساليب اللي عمك استخدمها ونرجع حق ابوك

_فكرت في كده برضه..بس المشكله في ان الحاجه الوحيدة اللي تهم عماد المرشدي نور بنته..وانا مبقتش بطيق ابص في وشها حتى

علياء فكرت شوية وبصتله بقوة رغم غيرتها

_مفيش قدامك حل غير الطريقه دي..اللي انا واثقه منه ان نور وابوها متفقين على كل الحكاية دي علشان تتجوزها..ف انت مثل عليهم انك استسلمت وهترضى لطلباتهم لحد ما تعرف توقعه في شر اعماله

بصلها بإستغراب شديد

_انتِ عايزاني اقرب من نور ياعلياء !

_للأسف مفيش قدامك حل تاني يافارس..وبعدين ده هيبقى تمثيل..انا عارفه انك بتحبني وزعلي مهم عندك جدا..بس كمان انا مش هقدر اكون انانية معاك وامنعك من انك تنقذ والدك علشان غيرتي..انا اتعلمت من غلطي وبقيت واثقه فيك اكتر من الاول بكتير وعارفه انك مش عايز تعمل حاجه تجرحني

_مش هقدر…حاسس اني لو شوفتها هي او ابوها هق.تلهم

_مش ده الحل..صباع والدك تحت ضرسهم..واي غلطه هيتحبس

وكملت بكره شديد ليهم

_احنا هنلعب معاهم نفس لعبتهم الق.ذرة..وهنتغلب عليهم

واول خطوه انك ترجع تعيش معاهم في بيت العيلة علشان عينك تبقى عليهم الاتنين

فارس بصلها برفض شديد

_ده اللي هو ازاي يعني…وانتِ !

علياء حاولت تداري حزنها من بعده عنها واتكلمت بإبتسامه مصطنعه

_ياحبيبي منا هبقى في بيتنا وتبقى عدي عليا على طول عادي

_لأ طبعا..مش هسيبك بعيدة عن حضني..بصي تعالي عيشي معايا في بيت العيلة عقبال ما نحل الموضوع ده

_قدام نور!

_ما تتح.رق نور..انا مش هسيبك بعيدة عني

اتنهدت وهزيت راسها بموافقه

_طيب هاجي معاك..احنا المفروض نرجع القاهرة تاني علشان نبدأ في تنفيذ الخطه

_خلينا يومين..انا نفسياً مش قادر على اي حاجه دلوقت

هزيت دماغها بموافقه لأنها هي كمان مش مستعدة تشوف فارس مع نور..الموضوع هيبقى صعب عليها بس مش عايزة تبقى انانية معاه وتدمر عيلته وفكرت المرادي بعقلها..وكده كده واثقه في حب فارس ليها وعارفه انها مسألة وقت مش اكتر وهتتخلص من نور وشرها

عدى يومين وفارس وعلياء رجعوا على بيت العيلة واللي استقبلوهم بترحاب على عكس ما توقعت معادا ريم اللي متجهلاها تماماً

ميرفت بأسف ودموع

_انا اسفه يبنتي..فارس حكالي عن اللي قولتيهوله وانك بتحاولي تنقذي شريف معاه وبجد انتِ عليتي من نظري اوي..مكنتش متوقعه انك هتبقي بنت اصول كده

علياء بإبتسامه مصطنعه لأنها لسه مسمحتهاش على اللي عملته معاها

_مفيش داعي للشكر ياطنط..والد فارس زي والدي بالظبط ومستعده اعمل اي حاجه علشان انقذه

______________

فارس وعلياء كانوا قاعدين في اوضتهم وفارس ماسك التليفون بتردد وعلياء بتحاول تشجعه رغم غضبها وغيرتها

_يلا يافارس كلمها…ده هي مكالمه واحده

_مش قادر…بجد بقيت بكرهم خدي كلميها انتِ

_فارس متعصبنيش..انجز

نفخ بضيق ورن على نور اللي رديت بسرعه بسعادة وخبث

_كنت عارفه وواثقه انك هتتصل بيا وترجعلي تاني… وحشتني

مسكت علياء ايده وعضتها بعنف

كتم تأوهه وبصلها بغضب وهمس وهو بيبعد التليفون

_وانا مالي..مش انتِ اللي قولتيلي اعمل كده

علياء بغضب وهمس

_كمل يخويا كلامك

بصلها بمكر وحب غيرتها دي جدا ورجع كمل كلام

_باين اني وحشك..بدليل انك نستيني ومبقتيش تتصلي عليا خالص

نور بحزن

_وهو انت يعني اللي بتسأل…لولا موضوع بابا وعمي مكنتش هترجعلي تاني..بس مش مشكله..المهم انك رجعت وهسامحك

_انا رجعتلك بس بشروط.. الورق اللي مع عمي ده يتقطع

نور بخبث

_مش بالسهولة دي يافارس متستقلش بيا…الورق هيتقطع بمقابل انك تطلق علياء وتطلعها من حياتك نهائيا