رواية تزوجت اختها الفصل الثاني 2 بقلم همس حسن

بدر : انا مش هتجوز مها .. انا هتجوز زهرة أختها

مها وعاصم ابوها وعبير امها باصينله بصدمة !!

عاصم : نعم يااخويا ؟؟؟!!!

هو ايه اللي مش هتجوز مها هتجوز أختها ، انت اتجننت ولا ايه

عبير أمها : ايه اللي انا بسمعه ده ؟؟ بدر انت اكيد بتهزر صح

مها بتضحك : ما طبعاً بيهزر ياماما انتي بتاخدي علي كلامه زهرة ايه اللي يتجوزها

هو هيروح يتجوزها عشان حادثة عملوها عشان انا كنت مشغولة شوية وهي اللي راحت معاه يطبعوا الكروت يعني

بدر : لا ياجماعة انا مبهزرش انا بتكلم جد وجدا كمان

عبير : هو اااااايه الي بتكلم جد انت فاكرها سايبه ولا الدنيا ماشية علي مزاجك عشان تقعد خاطب بنتي سنتيييين وهوب يطلع في دماغك تتجوز اختها قبل فرحكو بأسبوع انت اتجننت ولا جرا لمخك حاجة !!!!

عاصم : بس ياعبير اسكتي

بيبص لـبدر : انت مش هتقول كدا ولا هتعمل كدا من غير سبب ، قولي سببك يابدر عشان انا لحد دلوقتي ماسك أعصابي بالعافيه

مها واقفة فطسانه من الضحك وكأنها في صدمة ومش مستوعبة اللي بيتقال

بدر : عمي انا عايزك خمس دقايق علي إنفراد

عبير : إنفراد ايه لا انا عايزة اسمع ال…

عاصم بيقاطعها : خلااااص ياعبير خلصنا.. هدخل اشوفه عايز ايه واخرجلكو

دخل عاصم وبدر علي أوضة جانبيه كدا يتكلموا

مها : يلا ياماما ندخل نشوف زهرة مش وقت هزار ده البت تعبانة جوا

عبير بتبصلها باستغراب !!

*في الاوضة*

عاصم : ها يابدر .. ممكن تفسرلي اللي قولته من شوية بقا ؟

بدر : انا مكنتش هاجيب سيرة الموضوع لحد ولا هتكلم فيه، بس بما إني عارف ان حضرتك اب متحضر وتفكيرك ناضج وعشان حضرتك لازم يكون عندك سبب منطقي عشان توافق اني اتجوز زهرة بدل اختها هقولك اللي حصل

بس تعاهدني عهد رجالة إن الكلام اللي هنقوله دلوقتي مش هيخرج برا ومحدش تالت هيعرفه

عاصم : ده الموضوع شكله كبير بقا !

بدر : زهرة كانت حامل وسقطت النهاردة

عاصم بيبرق وبيمسك بدر من التيشيرت : لا ده انت كدا زودتها اوووووي

بدر : تفتكر انا ممكن احور عليك في حاجة زي دي ياعمي ؟ دي زهرة اختي وحضرتك عارف كدا من اول ما دخلت بيتكو

عاصم بيهدي لثواني و بينزل ايده : اومال الي بتقوله ده اسميه ايه ؟؟

بدر : سميه اني اتصدمت النهاردة زيي زيك بالظبط لما لقيت الدكتور خارج بيقولي كدا ومن وقتها وانا مخي مهديش تفكير وانا بجمع كل الأحداث جنب بعضها

عاصم بيحط ايده علي دماغه : ازاي يعني .. ازااااي

بنتي اشرف من الشرف ومحدش لمسها يابدر

بدر : وده اللي جايبك هنا عشان اكلمك فيه

عاصم : استني بس ثواني .. ده ايه دخله بإنك تتجوز زهرة بدل مها ؟؟

رجولة وجدعنة منك يعني ولا ايه

بدر : لا ياعمي مش رجولة ولا جدعنة .. ده الحق واللي لازم يحصل

عاصم : يحصل بمناسبة اااايه ، ايه المنطق اللي يقول إنك تكسر قلب واحدة وتتجوز اختها لمجرد إن اختها حصل معاها حاجة مش قادرين نفسر هي ايه اصلا !

بدر : المنطق إني شبه متأكد ان مها هي السبب في اللي حصل لأختها واللي احنا لحد دلوقتي مش قادرين نفسر ده حصل ازاي .. وعشان كدا قررت اتجوز زهرة حتى لو لـفترة بس واحميها م الفضيحة اللي هتحصلها وفي نفس الوقت اعاقب مها علي اللي عملته في اختها وعلي قلة الضمير اللي عندها

مها مش بريئة زي مانت فاكر ياعمي وانا اكتر واحد عارفها وعارف هي ممكن تعمل ايه

عاصم : نعم ؟؟؟؟؟

يعني ايه مها السبب .. مها هتأذي اختها ليه وازاي اصلا هتعمل فيها حاجة زي كدا هو انت هتألف !! اشرحلي اكتر يابدر وقولي ايه شككك في كدا متخليش أعصابي تفلت وامسك فيك دلوقتي

بدر : هقولك ايه شككني في ده ياعمي وهقولك ليه ومين ساعدها في ده كمان

عاصم : سامعك .. اتفضل ؟؟

*بعد نص ساعة*

* في أوضة زهرة *

زهرة : معلش يا مها انا عارفة إن تعبي ده جه في وقت غلط خالص وانا المفروض أكون معاكي في تجهيزات فرحك كلها

مها : ولا يهمك ياختي بكرا تتخطبي وتيجي تتجوزي وهبقي انا حامل في البدر الصغنن ومش هاكون معاكي بردو

زهرة : هو يشرف بس البدر الصغنن ده وانا مش عايزاكي تعملي حاجة أصلا كفاية علينا حبيب خالته يبقى موجود

عبير قاعدة بصالهم وساكتة ومستغربة موقف مها وانها بتضحك وتهزر عادي بعد اللي سمعته ولسة مقتنعة انها هتتجوز بدر في معادها …

زهرة: ماما انتي كويسة ؟؟

عبير : كويسة يا زهرة

زهرة: مش حاسه كدا بصراح…

وهي بتتكلم لقوا الباب بيتفتح وعاصم وبدر داخلين

عبير اتعدلت بسرعة وبصت علي عاصم مستنياه يتكلم في اللي حصل ويحكي قالوا ايه

عاصم : لو خلصتوا ولبستوا زهرة يلا نمشي هي اتكتبلها علي خروج خلاص

بدر : تمام انا هوصلكو البيت واروح بيتي عشان اغير هدومي اللي مليانة دم دي

عاصم : لا يابدر انت هتيجي معانا البيت .. عايزك

مها بتمد ايديها عشان تسند زهرة وتقومها

عاصم بيشيل ايديها من علي زهرة : ابعدي يا مها انا همسكها

مها بتبعد باستغراب وعبير وزهرة كمان بيبصوا باستغراب

*بعد ساعة ونص في بيت عاصم *

زهرة قاعدة علي السرير وساندة دماغها علي السرير من التعب

امها وابوها وبدر قاعدين

مها جايبه صينية شاي وداخلة

عاصم : شدي حيلك بقا يازهرة واتجدعني كدا عايزك تخفي في خلال يومين بالكتير

بدر : اشمعنا يومين يعني يابابا

عاصم : عشان تكوني كويسة وواقفة علي رجلك في فرحك اللي كمان اسبوع بإذن الله

مها وقفت مكانها بصينية الشاي

زهرة باستغراب : فرحي ؟؟؟

فرحي ازاي يعني ياحج انت بتهزر عشان تفكني ولا انا اللي الخبطة اثرت علي دماغي

عاصم : لا مأثرتش علي دماغك .. انتي هتتجوزي بدر يوم الجمعة الجاية يازهرة

صينية الشاي وقعت من ايد مها لما استوعبت إنهم بيتكلموا بجد مش هزار زي ما كانت فاكرة

زهرة بتبصلهم من غير أي ريأكشنات ومش مصدقة اللي بيقولوه

بدر قام وقف وقلع الدبلة .. مسك ايد مها حط الدبلة في ايديها

بدر : انا آسف يا مها .. كل شيء نصيب واحنا مش نصيب بعض

انا هتجوز زهرة وانتي ربنا هيرزقك بواحد احسن مني

وبعد اذنك متسألنيش عن تفسير لأي حاجة

مها رفعت عينيها بصت لـ بدر .. وفي ثانية راحت رافعة ايديها ولاطشاه قلم بأقوى ما عندها ..