رواية طفلة أرهقت قلبي الفصل الثالث والعشرون 23 بقلم عائشة البشير

رواية طفلة أرهقت قلبي الفصل الثالث والعشرون 23 بقلم عائشة البشير

رواية طفلة أرهقت قلبي البارت الثالث والعشرون

رواية طفلة أرهقت قلبي الجزء الثالث والعشرون

رواية طفلة أرهقت قلبي الحلقة الثالثة والعشرون

كُلّما تشعُر بالإحباط؛ خُذ نفس عميق وتذكّر أنّك لست في سباقٍ مع أحد، ولست مُضطرًا لأن تُثبت أيّ شيء لأيّ أحد، وأن كُلّ شيء سيحدُث في وقته المُناسب، وأن الدُنيا ليست مكانًا للسعادة، إنّما هي دارَ بلاءٍ وابتِلاء، دارُ اختبار.. هذا امتحانك وليس نهايَتك.. ‏وتأكّد أن رزقكك لن يذهب لغيرك، لا رزقك في المال ولا في الناس، وكُلّنا فترات مهما كانت المحبّة، ومهما كانت الوعود، وكُلّ شيء يُنسى، وكُلّ شيءٍ يَمُرّ، السهل يَمُرّ، والصعب يَمُرّ.. بفضل الله كُلّ شيء يَمُرّ.. 🖤
” وتظنهُ صعباً وهو على الله هينْ، فقط قل يارب 🤍 ”
**********************************
المبروك، بصدمه😲: هاذم الصور منين جبتيهم؟؟
علا، بتوتر: أني اللي صورتهم بس الحق ماكنتش نبي نوريهم لحد فكرت نستر عليهم ونسكت بس بعدين لما بدت تتكرر المواقف وكل مره يكبر الموضوع خفت يشوفهم حد وسمعتنا تنضر قدام الناس وهذا شرف مايضرهمش بروحهم يضر كل العيله وأني واحده من العيله وهالشي راح يأثر على مستقبلي
المبروك شافلها بهزوه 😏ورجع نظره للتليفون وهوا في باله بيتأكد من شي بس ضيق عيونه بغضب لما لقاه تسكر برمز، وبضيق: تعالي جاي
علا قربت من عمها بتوتر
المبروك شد التليفون في إيده ووجهولها: ترا أفتحي الرمز ماشفتهمش كويس
علا فتحت الرمز وهيا متوتره ومرتبكه وكأنها كانت ناسيه وتوا بس تفكرت شني فيه ثاني في تليفونها من غير الصور
المبروك قعد يمشي في الصور لين وصل للمطلوب، وقف وبغيض شد علا من شعرها بقوه لين طاح الوشاح اللي على رأسها، وبغضب😠: ياكلبه ياللي ماتتحشمي أنتي تلعبي بعيله كامله أنتي ياواطيه، تحشمينا وتوطي رؤوسنا مع القريب والبعيد، تطعني في شرف بنت الناس وبنت عمك هذا كله علاش ها علاش، وهوا شاد على شعرها بالقوه وهيا تتألم وتتلوى من غير صوت
الكل كانو يشوفوله بصدمه وتوتر ومش فاهمين شني قصده بالكلام اللي يقول فيه
مفتاح وقف وبغضب😠: سيب البنت يالمبروك وفهمنا شني اللي تقول فيه!!
المبروك، بعصبيه😡: بنتك الحيوانه هذي لعبت علينا كلنا خلتنا مضحكه ونهزو في رؤوسنا، قرب منه بالتليفون بعد ماحذف علا اللي طاحت لوطه بقوه من حذفت عمها
المبروك قعد يوريله في الصور، وبغضب😠: شوف هاذم صور أيه ومحمد اللي وصلو لعريسها قبل الفاتحه وخلو العرس يتفركش، وهما نفسهم مع تغير الوجوه صور دنيا وحسام اللي ورهولكم على أساس أنهم إمدايرين شي غلط، وغير الصور، وبهزوه😏: وهاذم الصور الحقيقيات لحسام ودنيا اللي مافيهمش أي شي وعاديات جدا بس بنتك لعبت بيهم وقدرت تضحك علينا وعليكم
مفتاح قعمز على الكرسي بهدت حيل وهوا يشوف لعلا اللي طايحه على الأرض وتبكي بأسف
محمد إنصدم لما سمع كلام بوه عليه هوا وأيه وموضوع الصور اللي إنذكر توا، ولا في تليفون علا أخر شي كان ممكن يفكر فيه
قرب محمد وعامر وعصام وشافو على شني يحكي المبروك، والصدمه الكبرى كانت لما فتحو الماسنجر وشافو المحادثه اللي بينها وبين أسامه قبل وبعد العرس، واللي زاد الطين بله المحادثه اللي بينها وبين ولد عم أيه اللي قدرو يعرفوه من لقبه، وعرفو أنه المشكله الأخيره اللي صارت واللي وصل عنوان أيه لعمامها كانت هيا، إنكشف كل شي بلحظه، المبروك لوح التليفون وماقدرش يمسك أعصابه وطاح في علا ضرب، بس الغريب لا بوها ولاخوتها كانو عندهم الجرأه باش يدافعو عليها أو حتى يقولو كلمه بعد اللي شافوه بعيونهم

 

 

 

دنيا الكلام اللي سمعته خلاني في حالة عدم إستيعاب معقوله عادل يطلع منه هذا كله وين كان هالحقد مدسوس، كان أكثر واحد هادئ وعفوي وجوه حلو في ولاد العيله مش ممكن يكون وراء شخصيته الهاديه الحلوه شخص منافق وحقود لهالدرجه ولا قاتل نفس حتى، صدمتي كانت فيه كبيره، قعدت مقعمزه قدامه ونهز في رأسي بعدم إستيعاب لين فزيت بخوف على عياط علا، وقفت وطلعت بسرعه لما شفت عمي كيف يضرب فيها وهما قاعدين يتفرجو ولاحد فكر ينحيه من عليها
دنيا، بخوف😟: خلاص ياعمي بتموت تحتك، قلت هالكلام لما شفت علا خلاص معاش قادره حتى إطلع صوت وتعيط
المبروك وقف وهوا داهش ويلهث، وبعصبيه😡: عقاب الوقت رجاله بشناباتهم تلعب بيهم هالحقيره هذي، ياريتها الموت رفعاتك أنتي بدل عبير المسكينه
دنيا في خاطري مافيش حد مسكين بعد اللي سمعته، وبإستغراب🤔: خيرها ياعمي شني دارت باش تضربها هكي؟؟
المبروك، رفس علا اللي قاعده ملوحه في مكانها وتتوجع بألم، وبغضب😠: شوق ماإمدايره لاعبه في صورك أنتي وحسام، وهيا اللي إمدايره صور محمد وأيه وهيا سبب المشاكل والبلي كله الله لاتربحها وين مامشت
دنيا إنصدمت بقوه😲 معقوله هذا كله حقد أو كره أو شني بالضبط اللي يخلي واحده في عمر علا إدير هذا كله، يوم عن يوم تزيد صدمتي في الناس أكثر، إنسحبت من بحداهم من غير مانقول ولاكلمه اللي سمعته الليله كان كافي أنه يخدرني ويمنعني من الكلام
طلعو وراي محمد وعمي، وخلو مفتاح وولاده مصدومين في علا ويشوفولها بنظرات غضب وغيض ولا حد فيهم فكر يقيمها أو يطمن عليها، وفي نفس الوقت متحشمين من الشي اللي صار، وهما اللي كانو على حق أصبحو هما الباطل بحد ذاته
دنيا وقفت قدام الباب الخارجي لما سمعت الدوشه، وتلفتت لعمي ومحمد بأستفهام هل يسمعو حتى هما اللي نسمع فيه أو لا
المبروك، بتوتر: شني هالعياط هذا إن شاءالله خير
محمد، بقلق: هذا شكله في حوش عمي بشير يابوي
دنيا قعدت واقفه نشوف لعمي ومحمد اللي مشو بسرعه لما زاد صوت العياط وكترث الدوشه، ماعرفتش نقدم أو نوخر، وقفت في مكاني لما صار كل شي قدامي، طلع سامر وهوا يشح في بوه بالقوه وحذفه قدام الحوش، وفاطمه كانت تعيط وتقول في كلام مش مفهوم
المبروك قدم بسرعه لبشير اللي طاح قدامه من حذفت ولده، وبغضب😠: ياللي ماتتحشم هكي إدير لبوك
سامر، بعياط: ماهوش بوي فاهم، مادامه تزوج على أمي يمشي معاش يلزمنا يدور وين يعيش
سامح، بكره: اللي يبدل أمي بواحده بنت شوارع أحني معاش نبوه
فاطمه، بعصبيه😡: أني اللي خليتك راجل وأنت كلب ماتسواش شي، صبرت عليك وتحملتك بهمك وفقرك، صدق اللي قال رضينا بالهم وهوا مش راضي بينا
بشير وقف وهوا ينفض في روحه من التراب، هوا كان عارف أنه خبر زواجه لما يوصلهم مش راح يمر بالساهل وبالأخص من فاطمه بس كانت صدمته في ولاده كبيره هلبا ومش متوقعه
سامر، بغضب😠: وجهك معاش توريهولنا فاهم، وكأنك بتقول حوشي فخليني إنذكرك أنتي اللي تنازلتلي عليه على خاطر نبني وقف السطح، ف توا معاش عندك شي معانا إلا حوايجك البايدات كأنك تبيهم
فاطمه، بكره: والله ماهو ضايقهم لما إنولع فيهم النار ونحرقهم كيف ماحرق كبدي، أني تأخذ عليا واحده ثانيه برالها زي الكلب توا خليها ترضى بيك، وجبدت ولادها وخشت وسكرت الباب بالساقطه
محمد صدمة الصور واللي صار في حوش عمي مفتاح قاعده مسيطره على عقلي من قوتها، خبر زواج عمي البشير كان عادي جدا والكل متوقعه من زمان مأترش فيا بس إستغربت من ردة فعل سامر اللي حاسبينه هادئ وعاقل
المبروك، بأسف😞: غير علاش إمقايللهم توا فوتت شهر رمضان على الأقل وحتى حوش ثاني ماعندك وين تمشي
بشير، بكره: الله يلعنهم هما وأمهم ماقلت لحد أني أبصر منين عرفو أني كيف خشيت وهما طاحو فيا، الكلاب أني على أخر الوقت يلزوني من حوشي
المبروك، بضيق: هذا اللي أنت جريت عليه قلتلك من الأول أنت ماقادر على واحده كيف بتقدر إثنين وفاطمه مش ساهله وتسكت وترضي ببساطه توا درتها بإيديك حلها بسنونك
بشير، بغضب: توا نوريهم الكلاب هاذم، وأنتبه لدنيا اللي واقفه تشوفله بثبات، وبعصبيه: شني واقفه تشوفي أنتي ولا جايه تتشمتي يانعن🤬
دنيا هزيت رأسي بأسف وخشيت من غير مانتكلم
المبروك، بضيق: والنبي أسكت وخلي البنت في حالها وألهي في روحك والمصيبه اللي جبتها لعمرك
بشير، بغضب😠: لا مصيبه ولا شي أني متزوج على سنة الله ورسوله وين الغلط في الموضوع، وتلفتو على صوت سعد اللي جي من وراهم
سعد، بهزوه😏: هلا والله بالعريس أنستنا وين العروسه إمالا مش معاك، ولا طالعه تهيج في مكان ثاني
بشير، بعصبيه😡: سكر فمك ياحيوان مسرع قالولك حتى أنت!!
سعد، بهزوه😏: لا أني اللي قلتلهم وأنت الصادق

 

 

 

بشير، بصدمه😲: وأنت من وين عرفت؟
سعد، بضحكه😂: عرفت من العروسه نفسها ياحرام سخفتني خذيت مقلب قوي فيها، اللي تحسابها شريفه وعفيفه وخذاتك باللسان المعسول واللي بدلت بيها أمي برا أسأل على ماضيها وشوف العار المعرعر اللي كانت إدير فيه بنت الشوارع، متاعات الإستراحات العاهره هذي
بشير اللي ماتحملش هالكلام هجم على سعد وطاح فيه ضرب ومافكوه منه محمد والمبروك إلا بستين ألف واسطه، وخر بشير وهوا داهش
المبروك صلي على النبي ياراجل على شوي قتلته
محمد قرب من سعد بخوف وهوا يشوف فيهم كيف يرجع في الدم، وبخوف: سعد أنت كويس
بشير بغضب خليه إن شاءالله يموت هالكلب هذا ويلحقوه خوته ياخسارة ماربيت وتعبت عليكم تفوووو( حاشاكم ) عليكم وعلى أمكم، ومشي من جنبهم وهوا معصب
^^^^^^^^^^^^^^^^^^^^^^^^^^^^^^^
دنيا أول ماخشيت تلقوني مرت عمي وأيه والبنات بالأسئلة، بضيق باللهي خلوني توا يجي عمي ومحمد ويحكولكم، وخشيت للدار قعمزت وأني كلام عادل مسيطر على تفكيري
Flashback
عادل، بأسف😞: الغلط اللي درته مايتصلحش ومايمحيشي إعتذار، أني اللي سببت في موت بوك وأمك
دنيا، بصدمه😲: كيف!!
عادل، بأسف😞: أي أني اللي بعتت لعمي صور لأمك مع صاحبه ناصر وخليته يشك فيها، وأني اللي قتله على المكان اللي يقعمزو فيه ديمه، وشفته لما مشي وشافهم ولما سكت وماكلمهمش إستغربت فيه، ويوم اللي صار الحادث أني اللي بعتله رساله بمكانهم وأنهم طلعو في إتجاه ال…….
دنيا حسيت لساني إرتبط ماعرفتش شني نقول، نبي نلومه نسأله ليش دار هكي ماقدرتش إنخرست مره واحده
عادل، بحزن😔: بروحي مش عارف شني اللي خلاني إندير هكي، يمكن كنت نبي نسهل قربي منك فكرت لما تكوني بروحك والكل راح يكتشفو عملة أمك راح يفكرو أنك زيها ووقتها مافيش حد راح يفكر يتقدملك أو حتى يحبك وراح تقعديلي بروحي، كنت نذل وحقير بتفكيري وهذا باش ربي مانولنيش مرادي، وبالنسبه للصور متاعك أنتي وحسام كنت عارف أنهم ملعوبات أصلا، بس كان هدفي أني نبعده عليك وتقعديلي أني، اللي صار مش ذنبي بروحي حتى أنتي عندك ذنب فيه عشمتيني فيك بطريقه غير مباشره، أني الوحيد اللي كنتي تهدرزي معاي وتعاملي فيا كويس من دون ولاد عمك هالشي خلاني نفكر أنك عندك ميول ثاني من ناحيتي وماكنتش نبي نفرط فيك لحد أو نخسرك
دنيا نزلت رأسي بأسف لأني عارفه أنه هالشي صح عادل الوحيد من الشباب اللي كانت علاقتي بيه كويسه بس مش زي ماهوا فهم أبداً يعني كنت محترماته لأنه مافيش مره فات عليا أو أزعجني بكلمه أو حتى بنظره ماكنتش عارفه أنه هوا هكي يفكر
عادل، بأسف😞: سامحيني يادنيا على كل شي درته فيك، عذاب الضمير اللي حاسه بعد اللي درته هوا اللي خلا حالتي هكي ربي خذي حقك مني وخلاني نجرب العذاب اللي درته بإيدي، وقعد يشوف لإيديه بأسف: بإيديا هاذم قتلت أختي
دنيا حطيت إيديا على فمي باش نكتم شهقتي من اللي سمعته وقعدت نهز في رأسي بعدم تصديق
عادل، بغضب😠: أي أني اللي قتلتها الفاجره هذي، طول الليل وأحني إندورو عليها ماخلينا لا مركز ولاعياده ولا مستشفي إلا وسألنا عليها، صدفه بعد الفجر وأني راجع للحوش بخيبه شفتها نازله من سيارة واحد وهيا حالتها مبهدله وحذفلها ربطه فلوس وشافلها بهزوه ومشي، وهيا الحقيره الحيوانه اللي باعت شرفها ومافكرتش لا فينا ولا في بوها طبست تلقط في الفلوس اللي تشرتعو في الطريق، ماقدرتش نتحمل الموقف ولا قدرت نسيطر على غضبي مالقيتش روحي اللي عافس على السياره وضربتها بسرعه لين تنطرت قدامي، كنت في موقف صعب أي واحد كان في مكان راح يدير نفس اللي درته، وأني مش نادم لو يرجع الوقت راح نقتلها مره وإثنين وثلاثه بس لو نرتاح من عذاب الضمير اللي قاعد ينهش في قلبي، حتى النوم معاش نرتاح فيه كل ماتغفى عيني نشوف في بوك وأمك وعبير وكأنهم يلومو فيا على اللي صار، أني اللي قتلت أختي وكنت السبب في موت عمي ومرته، باللهي سامحيني يادنيا باللهي، وإنهار بالبكي
دنيا قعدت نهز في رأسي بعدم إستيعاب للكلام اللي سمعته، لين فزيت على عياط علا
Now
مسحت دموعي اللي خذلوني وتنهدت بضيق وأني نشوف للباب اللي طق طقتين وإنفتح وطلت منه أيه، نزلت رأسي لما قربت وقعمزت جنبي
^^^^^^^^^^^^^^^^^^^^^^^^^^^^^^^
فوزيه، بحزن😔: لا حول ولاقوة الابالله العلي العظيم ربي يهديهم إن شاءالله،
محمد بتساؤل: أنت كنت عارف بزواج عمي بشير يابوي؟
المبروك، بضيق: أني اللي شهدت على الفاتحه، على قد مانصحته مسكر رأسه وقال أني ماعشتش ومن حقي نرتاح ونشوف روحي ماعندي مانديرله يدبر رأسه
فوزيه، بأسف😞: ربي يستر من فاطمه وخلاص، باهي وشني صار في سعد كيف درتوله!!
محمد، بضيق: ماعندي مانديرله طقطقت على خوته طلعو دخلوه، يدبروله هما
سنيه، بضيق: أكيد عنده حاجه مادامه رجع دم ربك يستر
فوزيه، بحزن: إن شاء الله خير وخلاص، أستغفر الله العظيم شني هالليله هذي، باهي شني صار في عادل وشني قصة السحر اللي قالو عليه
المبروك، بغضب😠: دوه فاضيه ومافيش منها شي عبد الصمد يضحك عليهم مادابيه يحصل قرشين، الولد شكله مرضه نفسي ماليشي علاقه لا بسحر ولا شي ثاني
فوزيه، بحزن😔: ياناري ربي يفرج عليه ويشفيه إن شاءالله
المبروك، بضيق: شني قالت دنيا ماحكتلكم شي؟؟
فوزيه، بأسف😞: لا لا قالت يجي عمي ومحمد يحكولكم وخشت للدار من غير ماتقول كلمه ثانيه
سنيه، بإستغراب🤔: علاش تسأل يابوي شني اللي صار؟
المبروك وقف، وبحده: ماصار شي خلاص أنهو هالموضوع، أني خاش بنرتاح شويه وأنتم نوضو ديرولنا حاجه نأكلوها باش تبونا نصيمو غذوه، ومشي متوجه لداره
وقفت فوزيه وهيا تقول حاضر وتوجهت للمطبخ ولحقتها سنيه وسرور، أما أيه لما ناضت محمد شدها من إيدها، وبإبتسامة😊: أحني بنتسحرو فوق، بس قبلها شوفي دنيا شني جوها وتعالي نستني فيك
أيه هزت رأسها ومشت للدار اللي فيها دنيا
طبعا محمد والمبروك ماقالوش اللي داراته علا واللي صار في حوش مفتاح
^^^^^^^^^^^^^^^^^^^^^^^^^^^^^^^
أيه، بإبتسامه😊: خيرك شني فيه ليش خشيتي قعمزتي بروحك
دنيا، بضيق: مافيه شي بس مضايقه شويه مش عارفه بالضبط شني الإحساس اللي قاعده نحس فيه، مضايقه على خيبة ضني في أشخاص ماتوقعتش يطلع منهم هكي، وحاسه بشي في داخلي يقولي أحمدي ربك بأنه خلاك تكتشفي كل واحد على حقيقته وخذي حقك منهم
أيه، بإبتسامه😊: أكيد لازم تحمدي ربك يادنيا على أي شي خير كان أو شر، الإبتلاء منه سبحانه وتعالي والفرج منه، ومايضيقها على حد إلا مايفرجها عليه بزياده، وثقي وتأكدي أنه مادامك مؤمنه وعندك ثقه في الله، ورضيتي بحكمه ووكلتيه على شي أنتي مظلومه فيه، ربي راح يأخذلك حقك ويجبر بخاطرك ويرزقك فرحه أكثر ماتتمني، نوضي توضي وصلي ركعتين شكر لله حبيبتي، وزي ماديمه نقولك خلي ثقتك بالله قويه لأنه الوحيد اللي يكسرك وبصبرك ورضاك بحكمه راح يقويك أكثر من قبل
**********************************

 

 

 

” وماسر هذا الهدوء الذي في قلبك؟
منذ أن عرفت الله، ماأتاني خيراً إلا توضأت وصليتُ شكراً، وماأصابني ضراً إلا توضأت وصليتُ وطلبت صبراً، وماحارني أمراً إلا توضأت وأستخرتُ خيراً، وهكذا تنقلب حياتي بين شكر وصبر ودعاء، كن مؤدبا في حزنك حامداً في دمعتك أنيقاً في ألمك، فالحزن كالفرح هدية من رب العباد سيمكثُ قليلا ويعود إلي ربه حاملاً معه تفاصيل صبرك ”
#تأملوها_جيداً👌
**********************************
دنيا، بإبتسامه😊: والنعم بالله، مش عارفه لولاك أنتي شني كان صار فيا، بجد قصتك وتفركيسة عرسك وزواجك من محمد باش تجي من بنغازي لطرابلس كله حكمه من ربي بأنه سخرك وحطك في طريقي باش تنوري بصيرتي على هلبا حاجات، بصراحه كنت ناويه على شي والليله تأكدت من نيتي ونقدر نقول أني مستعده نفسيا ومقتنعه وراضيه كل الرضا على هالخطوه اللي كنت المفروض إنديرها من زمان، مشيت بسرعه للدولاب خديت شي ورجعت وقفت قدام أيه اللي كانت تشوفلي بإستغراب، مديتلها اللي في إيدي، وبفرحه: خوذي لفيلي الحجاب
أيه لمعو عيونها بدموع الفرحه: ياروحي أنلفلك ليش لا ربي ينور دربك ويهديك أكثر وأكثر، قعدت تلفلها في الحجاب وهيا دموعها ينزلو، كملت ومشت جابت مرايه صغيره من القجر ووجهتها لدنيا وهيا مبتسمه
دنيا أبتسمت بفرحه وأني نشوف لشكلي المختلف بالحجاب، فعلا هالشي ليه تأثير كبير على النفس، دمعو عيوني لما إذكرت حسام هوا أول واحد كان حاب هالشي كنت فاهمه عليه كيف كان يحاول يقنعني بيه بطريقه غير مباشره باش مايضايقنيش، توا بس فهمت معنى كلامه لما كان يقولي الورد في كل حالاته حلو بس لما يكون مغلف ومحمي من التراب والشمس والعوامل الخارجيه اللي ممكن تأثر على منظره يكون أحلى وأحلى، والجميله تكون أجمل بهلبا وهيا مستوره، قعدت نبكي بالعبره😭 ونشوف لأيه اللي واقفه قدامي وتبكي حتى هيا
أيه، بدموع😢: طالعه عليك ماشاء الله ياروحي ربي يكملك بعقلك ويهديك أكثر وأكثر يارب
دنيا، أبتسمت بفرحه من بين دموعي: يااااااارب
” من قال أن الأميرات لا يصبحن أميرات إلا بمال أو نسب!! لا بل أنتي برضا الله ملكه..أنت جوهره.. ولستِ أميره فقط… حجابك هو التاج الذي يزين رأسك وروحك معا… علمو بناتكم أن الحجاب لاينقص من جمالهم شيئاً، بل يجملهم أكثر وأكثر 💜
^^^^^^^^^^^^^^^^^^^^^^^^^^^^^^^
محمد، بضيق: هذا اللي صار ردي بالك حد يسمع بالموضوع فاهمه هالشي يموت إهنايا، أصلا بوي نبهني أني مانقول لحد بس قلتلك باش تأخذي حذرك منها في الأيام الجايه اللي زي هذي لفعه ماتعرفيش شني ممكن إدير ثاني
أيه فاتحه فمها بصدمه من اللي سمعاته، مش ممكن يخطر على بال حد أنه علا إدير هكي أبدا، وبأسف: باهي ليش إدير فيا هكي أني شني درتلها فاش ضريتها أصلا، أني بعد 5 أو 6 سنين نشوفها مره شني اللي يخليها إدير هكي
محمد، بإبتسامه😊: بصراحه أني على قد ماكرهتها بس توا حبيتها أضعاف
أيه فتحت عيونها بصدمه 😲
محمد، بضحكه: تشاينا راك ماتمشيش معاك فتحة العيون هذي راهم يتمزقو بس😂
أيه تلفتت للجهه الثانيه بغيض
محمد نضت قعمزت قدامها من الجهه الثانيه، وبحب: ياحليلي على الزعلانين أني، تي غير أسمعي ليش حبيتها
أيه، برفعة حاجب🤨: وليش إن شاءالله
محمد، بإبتسامه: لولا الشي اللي داراته راهو ماصارش اللي صار وقعدتي مرتي ياحلوه
أيه، بغيض: مهما كان هالشي مايعطيكش الحق انك تقولها في وجهي، وبنص عين😒: حبيتها أضعاف صار!!
محمد، بغمزه😉: نفهم أنه هذي غيره ولا شني!!
أيه، بنص عين😒: أفهم كيف ماتفهم، وقفت وشافت للطاوله اللي كانت محطوطه عليها الكيكه وتنهدت بضيق
محمد أبتسم لما عرف في شني تفكر هالليله كانت المفروض تكون الليله الأولى لزواجهم اللي ليه 9شهور، بس اللي صار خرب كل شي وفركس الموضوع قبل مايبدأ، وقف قدامها وشد إيديها وضغط عليهم بقوه، وأبتسم😊: أني راجل نحب نجمع قلبي وعقلي في مكان واحد اللعب والتشتيت مش ليا بكل، وأعرفي مادامني معاك فالإثنين ليك وماحد يقدر يأخذهم منك مادامك أنتي مافرطيش فيهم، من قبل كنت نحلم بحياه هاديه وسعيده ومثاليه ولما عرفتك تأكدت أنه هالأشياء مش راح تتحقق إلا معاك لأنك نادره فعلا ومش أي واحده عندها اللي عندك، قدرتي تسحريني بعفويتك والبراءه اللي في عيونك قدرتي تنعشي قلبي بأشياء بسيطه ممكن لو جت من غيرك مش ممكن تكون حلوه زي ماجت منك، من الغبي اللي يلقا سعاده مرسومه على هيئه إنسانه ويشوف لغيرها
” وحين يسألوني عنكِ سأقول… سعادة دخلت حياتي ولا أريدها أن تزول❤ ”
أيه نزلت رأسي، وبخجل: تأخذ فيا بالكلام عارفني مانقدرش نجاريك فيه
محمد، بغمزه😉: شني رأيك تجاريني في حاجه ثانيه، خلينا نكتشفو مهاراتك شني قلتي الساعه قاعده 3 والفجر ال…….
أيه جبدت إيديا وأني راسمه إبتسامة رض😊ا على وجهي، ومشيت وخليته واقف يشوفلي لين خشيت للدار
محمد، بفرحه: وأخيرا، رفع إيديه🤲، وبرجاء: يارب الفجر يعطل شويه الليله هذي على خاطري😅، وخش بسرعه
” إن الله يجمعنا بالطيبين دون سعيٍ منا.. فالقلوب على نقائها تقع❤.. مايعني أن لقاؤنا لم يكن صدفه بل كان ترتيب إلهَّي 🤍”
الزواج يابنات مش عرس كبير ولا شني درتو ولا شني قدمتو للضيوف ولا في إنك درتي حفلتك في أغلى وأرقي صاله ومش بكثرة البتات ولا بفيلو غالي ومكياج أخر موضه هذي كلها شكليات وسبب بسيط لسعاده مؤقته زائله بسرعه، الزواج أنك تعرفي حجم الحياه اللي راح تنتقليلها وكيف تتعاملي معاها، أنك تكوني على معرفه ودرايه في كيفية إختلاق سعاده دائمه مبنيه على أسس صحيحه من الأول، أنك تجعلي من نفسك نقطه هامه في حياة الشخص اللي ملكك وتعرفي كيف تأسريه بتفاصيلك البسيطه، السعاده مش هيا الشعور الحلو اللي نعيشه في بداية الحياه الزوجيه، السعاده الحقيقه معرفتك في المحافظه على هالشعور طول العمر
^^^^^^^^^^^^^^^^^^^^^^^^^^^^^^^
دنيا اليوم أول يوم في شهر رمضان المبارك، إمبارح ماقدرتش نرقد من فرحتي بالخطوه المهمه اللي درتها في حياتي، قعدت كل شويه نشوف في روحي في المرايه ونبتسم بفرحه، حتى عمي ومرت عمي والبنات كانت فرحتهم واضحه لما شافوني بيه على السحور، كنت طالعه بنتوضأ للظهر، بس وقفت في الممر وأني نسمع في صوت في الصاله
المبروك، بضيق: توا كلمني مفتاح وقالي مشي سلم روحه وأعترف أنه هوا اللي قتل أخته
فوزيه،بحزن😔: لا حول ولاقوة الابالله العلي العظيم، معقوله عادل يدير هكي وباهي شني السبب
المبروك شد رأسه بإيديه: الله أعلم مش عارف على كلام مفتاح قال ماباش يقول السبب، قالك طول الليل وهوا يقول قولو لدنيا تسامحني
فوزيه، بحزن: ربي يكون في عونهم مايطلعو من حاجه إلا ويطيحو في حاجه أكبر منها خلي إنوض نلبس عبايتي ونمشي نشوف سالمه
المبروك، بضيق: بري بري
^^^^^^^^^^^^^^^^^^^^^^^^^^^^^^^
فات إسبوع وإنتشر خبر عادل اللي سلم روحه وأعترف بأنه قتل أخته، والكل ماعرفوش السبب حتى أهله لأنه هوا اللي كان رافض أنه يفصح عليه ويفضح أهله أكثر من هكي
سعد لما عاينوه على ترجيعه للدم بعد ماتعب هلبا من ضرب بوه طلع عنده سرطان في المرئ اللهم عافينا وإياكم وقاعد من أول يوم رمضان راقد في العياده
بشير بعد اللي سمعه من سعد هذيكا الليله على مرته اللي ماليشي إسبوع متزوجها ماقدرش يرتاح والشك يلعب في عقله، فتش وراها وسأل وإستفسر أكثر لين عرف الشي اللي صدمه وخلاه يرمي عليها يمين الطلاق، طلعت فعلا زي ماقال عليها سعد والأغلب يعرفوها على أنها عواطف المتعه، بس هل بشير إنخدع ولا هوا إبتلاء من ربي باش يعلمه أنه اللي درته يوليلك وأنه قذف المحصنات شي مش ساهل أبدا ولا مني بنت خوه
مفتاح صحته إدهورت على الأخر وكل يوم أسوء من اللي قبله، الشي اللي صار مع صغاره مش هين أبدآ وأكيد هوا مش جبل باش يمر عليه كل هذا ويتحمله بالساهل
^^^^^^^^^^^^^^^^^^^^^^^^^^^^^^^

 

 

 

سناء، بأسف😞: ليهم إسبوع حاسبينها في الدار داب يحطولها ماكلتها من فم الباب ويسكرو عليها من جديد، باهي اللي فيه حمام في الدار وإلا كان هذا راهو أشبح شني صاير فيها
سنيه، بإستغراب🤔: وعلاش هذا كله باهي شني السبب
سناء، بضيق: واللهي ماني عارفه مافيش حد قال كلمه حتى عصام لما كلمته قالي سكري فمك وماتدخليش فيه هالموضوع، بس تسخف أمس نسمعو فيها تضحك بالصوت العالي وشويه وبدت تبكي
أيه، بضيق: ربي يفرج عليها، هيا خفو روحكم يابنات كملو اللي في إيديكم بسرعه باش مايفوتش عليكم عصر الجمعه وتصلوه في وقته
دنيا كنت نسمع ببرود كامل ولا كأنه هالشي يعنيني، وقفت ومشيت غسلت إيديا وبنطلع
سناء، بحزن😔: دنيا عمي اليوم لما قتله بنمشي نفطر في حوشناقالي سلميلي على دنيا وقوليلها تسامحني
سرور، بإستغراب🤔: شني قصة السماح اللي كل واحد يطلب فيه من دنيا، حتى عمي بشير إمبارح نسمع فيه يقول لبوي قول لبنت خوي دنيا تسامحني
دنيا تنهدت بضيق وطلعت من غير مانقول كلمه، قعمزت وقعدت نذكر في كل شي داروه ليا وكيف إنقلب عليهم، أني مش شمتانه لكن من حقي نفرح أنه ربي خذي حقي وطلعه من عيونهم، لما حسو بالعذاب وقتها بس عرفو أنهم غالطين في حقي ليش مافكروش من الأول أني إنسانه ونحس زيي زيهم ولا هما بشر ويتوجعو ويحسو وأني لا
من حقي نفرح وأني نشوف فيهم كيف نادمين ويتعذبو على اللي داروه فيا، بس لا أني مش راح تكون عندي أي ردة فعل إتجاه اللي صار فيهم لأنه إبتلاء ربي ليهم في صغارهم برد ناري وندمهم وعذاب الضمير اللي قاعد ياكل في قلوبهم وصلي ثأري، مانقدرش غير أني نحمد ربي ونشكره اللي خذي حقي وماخيبش رجائي فيه
” والجميل في الحياة أن الذي يؤذيك يتأذى مع الوقت ”
خشيت توضيت وصليت العصر وقعدت نحمد ونشكر في ربي على هالشي اللي وصلتله من غير مجهود مني خذي حقي وعذبهم بأفعالهم هما، هما نفسهم اللي ظلمو أنفسهم بظلمهم ليا، الحمدلله
” صبرا أيها المبتلي فلو علمت مالك عند الله لضحكت من شدة الفرح، لذلك دائما قل الحمد لله🤍🤍 “

أنت ﻻ تعلم إلى أيّ درجة الله رحيم بك ، لا تعلم كيف يُسَخِرُ لك الأشخاص، الأحداث، والمفاجآت.. لا تعلم كيف يصرف عنك ما تُحب لشَرٍ لا تعلمه، وكيف يُقرّب لك ما تكره لخير ﻻ تعلمه.. الله أكبر من أوجاعك التي لم يلتفت لها أحد فلا تقلق ولا تحزن.. “إنّ الله على كُلّ شيءٍ قدير”..
ليلة التاسعه والعشرون من شهر الخير
مقعمزين كلنا في جنان عمي المبروك
محمد، بإستغراب🤔: غريبه الليله مهفتين لا تبو سوق ولا عندكم حاجه ناقصه!!
سنيه، بضحكه😁: ماهو غدوة طلع متمم مش عيد، وتي روحك بكرا
محمد تلفت لأيه، وبإبتسامة😊: أنتي كملتي ولا لا!!
أيه: لا أني تمام التمام خلاص مش ناقصني شي
محمد، بغمزه😉: خلاص إمالا دورو مني يرفعكم غذوه أني العويله اللي عندي كملو
سنيه، برفعه حاجب🤨: أتجكتر علينا توا عاد، باللهي جو متاع بطلعنا في جرة مرتك فكنا منه، وأنتي تهني روحك خيرلك مادامه حمواتك ماكملوش حتى أنتي ماكملتيش ماتخلينيش نطلع الحمى الواعره أيواه😒
أيه فتحت عيونها وهيا تشوفلها بإستغراب
المبروك، بنص عين😒: خلوه يشد عويلته ويقعمز أني نرفعكم على مني يتجكتر هوا!!
سرور صفقت بحماس: أيواه أقوى يابوي إن شاء الله ربي مايغيبك
فوزيه وسنيه، بإبتسامه: إن شاءالله يارب
محمد، بضحكه😅: تي نبصر عليهم ياحويج خيركم تحسستو من كلمتي، توا طلعت أني ماننفعش ماكم ديمه إمبهدليني وراكم
سنيه، بإبتسامه: لا الحق ينقال ديمه وأحني مشحطينك معانا
فوزيه، بإبتسامه: ربي مايغيبك ياحميدا والله في الصبر ووسعة البال مافي زيك ربي يحفظكم كلكم
الكل، بأصوات متفاوته: أمين يارب
فوزيه، بضيق: زعما مايخلوش أحمد يروح حتى على خاطر العيد والله إستاحشناه حتى إتصال مايخلوه يتصل
المبروك، بحده: لا مايخلوشي ماعندك ماأديري بيه ولا بصوته، مادامك مطمنه أنه في مكان أمن خليه يتربي ويعرف كيف يعيش صح
فوزيه نزلت رأسها وتنهدت بحزن😔، ووقفت: أني بنمشي لسالمه نشوفها كيف حالها اليوم وبعدين بنفوت على فاطمه نسألها على سعد
سنيه وقفت: حتى أني بنمشي معاك لحوش عمي مفتاح، خلي نشوف علا بالك نقدر نغيرلها جوها شويه
المبروك ناض معاهم: باهي هيا حتى أني نشوف مفتاح ونهدرز عليه شويه
محمد قعد يشوفلهم لين طلعو، وبتساؤل: كيف حالها علا هيا شني صار فيها!!
أيه شافتله بضيق وتلفتت للجهه الثانيه
سرور، بأسف😞: قداش مره نمشو ماتطلعش من دارها بكل، لكن على حسب كلام سناء قالت إدير في حركات مش طبيعيه الله أعلم شني اللي صابها فجأة ربي يكون في عونها وخلاص
محمد، بضيق: إن شاءالله
دنيا كنت مركزه على أيه اللي إضايقت من سؤال محمد على علا، مانعرفش هيا شني حست، بتساؤل: شني صار يامحمد أكدلك حاتم على جيتهم؟؟
محمد، بإبتسامه😚: أي كلمني إمبكري بعد ماطلعت من صلاة العشي قال غذوه العصر يكونو إهنايا بإذن الله، باش يلحقو على زيارة حسام ثاني يوم العيد
دنيا نزلت رأسي بأسف وسكتت مازالو ثلاثة شهور شني يفوتهم، إندير في روحي عاديه ونتظاهر بالقوه بس من داخلي منهاره وقلبي مكسور والحزن واخذ الحصه الأكبر فيه، معاش هامني شي غير أني نشوفه قدامي بخير وسلامه
سرور، بتفكير🤔: حييي كيف فاتت علينا، توا مش كان يتنازل عادل يطلعو حسام
محمد، بنص عين😒: والنبي نوضي أنتي ورأسك المثلث أهوا من قدامي، عادل توا يتنازل أو لا معاش ينفع لأنه مدة الحكم متاع القضيه اللي رافعها عادل كملت ال 8 شهور من قبل رمضان
سرور، بشهقه😱: هيييييي وعلاش قاعدين حابسينه إمالا!!
محمد، بهزوه😏: ماهو عجبهم خذو عليه معاش يبو يطلقوه، ياأم دماغ مسكر أنتي ولدك عمتك المشاغب على خاطر العصبيه متاعته زادوه 4 شهور ثانيات إسترخاء
سرور، بغباء🙄: تي كيف قصدك حتى في الحبس فيه إسترخاء وإستجمام
محمد، بعصبيه😡: نوضي خير مانلفك بالطاوله اللي قدامي، أقلبي وجهك من عليا، ياخسارة عمرك اللي ضيعتيه ومازال بضيعيه في القرايه على الفاضي
سرور وقفت بغضب😠 وخشت تجري
أيه ودنيا قعدنا نضحكو على سرور😅

 

 

 

محمد، بنص عين😒: تضحكو أنتم كان نعرف لمني طالعه هالبنت ماتفهمهاش كيف، عبيطه ولا تستعبط مش عارف بالضبط
دنيا: ماهي مش سامعه بالمشاكل اللي دارهم حسام وزادو مدة حبسه
محمد، بإستغراب: علاش مش عايشه معاكم ولا كيف!!، عارفها ديمه لاهيه في التليفون البهيمه هذي لكن توا نحيه منها توا تشوف
أيه، بحزن: حرام عليك خلي البنت على حالها شني دارتلك هيا باش تأخذ تليفونها
محمد، بحده: هذا بدل ماتنصحيها تسيبه وتلتفت لمستقبلها وقرايتها اللي ماتفوت السنه إلا بالدفان وديمه تنجح على الحافه
أيه، بضيق: توا أني شني دخلني!! مش أني اللي نقوللها ماتقريش وبعدين الذكاء هذا لمني يعطيه ربي أرزاق حتى هوا مش بإيد حد
دنيا حسيت الجو توتر بينهم وهيا أيه مضايقه أصلا وقاعده على سبله، حولت نغير الموضوع بسرعه، وبإبتسامة😊: تعرف يامحمد مرات نقول اللي صار مع حسام وزيادة شهور الحبس كله حكمه من ربي
محمد شاف لأيه اللي تجاهلاته وتلفتت للجهه الثانيه، تنهد ورجع بنظره لدنيا، وبضيق: كيف!!
دنيا، بأسف😞: تعرف لو كان موجود وحضر المواقف والمشاكل اللي صارت هذي كلها راهو دار كارثه أكيد مستحيل يسكت، أحسن شي أنه مش موجود، شفت كيف بالهدوء أنتهي كل شي ببساطه
أيه: وعسي أن تكرهو شيئا وهوا خيرا لكم
محمد، بضيق: مش عارف مرات، وقام عيونه بصدمه لما لمح اللي خش من الباب
دنيا، بضيق: أي لله في حكمه شؤون، وزي مايقولو ربما ضرة نافعه، مرات نقول معليشي ينحبس 4شهور زياده خير ماحضر اللي صار راهو قتل حد وخذي مؤبد، ونزلت رأسي لما عيوني تعبو بالدموع
أيه تنهدت بضيق وناضت بتمد لدنيا طاسة الميه بس إنتبهت لمحمد اللي كان مركز بنظره على شي واحد، تلفتت وين مايشوف وإنصدمت هيا الثانيه
وقف محمد وهوا مبتسم وشد أيه من إيدها وجبدها معاه ومشو خشو للحوش بسرعه
دنيا قمت رأسي بخلعه على صوت باب الحوش اللي تسكر وتلفتت حواليا بإستغراب لما مالقيت حد: وين مشو هاذم وخلوني بروحي
……….: أنتي مش بروحك يادنيتي وأني وين مشيت❤
دنيا فزيت بسرعه لما سمعت الصوت من وراي توقعت أني من كثر ماأستاحشته بديت نتخيل أو يتهيألي أني سمعت صوته، بس قعدت نفتح ونسكر في عيوني بصدمه متوقعه مجرد مانسكر عيوني راح يختفي من قدامي بس لا كانت صورته ثابته ماتحركش من قدامي واقف يشوفلي وهوا مبتسم، شهقت وحطيت إيديا على فمي نمنع صوت شهقاتي يطلعو ودموعي نزلو سيل واحد وأني نهز في رأسي بعدم تصديق، حسيت بروحي راح ننهار وفي أي لحظه راح تتلقاني الأرض بس إيديه كانو أسرع من إختلال توازني لما مسكوني، تعلقو عيوني في عيونه برجاء وأني قاعده مش مصدقه نستني فيه يأكدلي اللي نشوف فيه هوا قدامي فعلا ولا أني نتخيل في وجوده من كثر شوقي، وبدموع😢: أنت فعلا موجود قدامي ياحسام🥺
حسام اليوم وبمناسبة العيد اللي يحسابوه غذوه صدر إعفاء عام بحق المسجونين اللي قضاياهم بسيطه ومدة إنتهاء حكمهم قريبه من ثلاثه شهور فما أقل، ومن حظي أني كنت منهم، أفرجو علينا بعد صلاة العشي أول ماطلعت من باب الحبس تنفست بقوه وزفرت براحه وكأنه الهواء اللي الداخل مش نفسه اللي برا فعلا هواء الحريه ليه طعم ثاني، هما صح 9 شهور مش هلبه مقارنة بالناس اللي تقعد سنين ويضيع عمرهم كله في الحبس، بس اللي كان واجعني ومعذبني أكثر شي هوا بعدي عليها وحرماني من شوفتها مش عارف هيا كيف عايشه وشني إمدايره وشني صاير فيها، الكلمتين اللي يقولي فيهم محمد كل شهر بخير وكويسه مايطمنونيش بكل لازم نشوفها ونتأكد من هالشي بروحي باش نرتاح ويطمن قلبي، طلعت ومابيتش نخبر حد قلت أحسن شي نخش عليهم فجأة ونشوف ردة فعلهم، خذيت تاكسي لنص الطريق وباقيتها كملتها كعابي ماكانوش عندي فلوس يوصلوني لقدام الحوازه، أول ماوصلت وخشيت تنهدت بضيق لما شفت سيارتي قاعده في مكانها اللي سيبتها فيه من تسعه شهور، قدمت وأني نشوف في حوشنا كيف مظلم معناها قاعدين ماروحوش أخر زياره لمحمد قبل رمضان قالي أنهم بيصيمو رمضان في مصر، بس ماكنتش متخيل أنه أمي ممكن تصيم رمضان مش في حوشها كانت ديمه تقول إلا رمضان مانحبش نقضيه في مكان ثاني غير حوشي كيف هان عليها وسيباته هالسنه، قدمت شويه وأبتسمت وأني نشوف لحوش خالي سعيد والمنور اللي كان أحلى مكان جمعني بيها في كدا موقف، كان هالمكان مكانها المفضل اللي تقعمز فيه كل صبح، ومن كثر ماكانت تفضله وتحبه خلتني نتعلق بيه ونحبه ونستاحشه حتى أني لما غبت عليه، صارت فيه هلبا مواقف وذكريات حلوه بيني وبينها بس ماقدرتش نوقف أكثر باش نذكر شي منهم لأنه شوقي غالبني وقاعد نعد في الثواني باش نشوفها، فتت على حوش خالي بشير ولفتت نظري السيارات اللي عندهم، بس فكرت انه رمضان عادي مرات صحاب عمي ساهرين عنده ولا خوالهم ملتمين عندهم أو شي، كملت لحوش خالى المبروك وأني حاس بخطواتي بدل المشي تحولو لجري من سرعتهم خشيت لما لقيت الباب مفتوح قابلني محمد أول شي، لما شفت صدمته بشوفتي قعدت نأشرله بصبعي أنه مايتكلمش🤫 قربت شويه وأني نسمع في صوتها اللي مافارقش صداه وذاني طول الشهور اللي فاتو، ضيقت عيوني لما سمعت كلامها الأخير شني قصدها باللي صار!! بس بسرعه أشرت لأيه اللي شافتني لما وقفت أنها ماتتكلمش🤫، وأشرت لمحمد بمعني خوذ مرتك وفارقونا بريحه طيبه😁
هذا كله وقاعد ماشفتهاش كرسي السعف اللي مقعمزه عليه كان أكبر منها الطشه هذي🤭، وقفت وراها مباشرة، وماتتخيلوش فرحتي لما فزت ووقفت لما أني تكلمت وشفتها بشكل أني كنت متمنيه من زمان بس ماكنتش متوقعه، الحجاب كان مجملها بزياده، حسيت بقلبي دقاته بدو مسموعات وأني نشوف فيها قدامي كانت لهفتي ليها فاضحتني، قربت بخوف وشديتها لما أنتبهت أنها راح إطيح، أبتسمت وأني نشوف لعيونها اللي تشوفلي بتفحص ورجاء وكأنها تبي تتأكد من وجودي
حسام، بلهفه: أستاحشتك ياطفلتي يادنيتي أنتي❤
دنيا هالكلمتين أكدولي أنه هوا فعلا، مش عارف شني اللي صار فيا توترت حاسه بقلبي يرجف بقوه معاش عرفت شني نقول
” لا أعلــــم مــا الـــذي حـدث لــي
عـندمــــا رأيتك ولكنـــي أشعـر بـوغـزة بـصـدري
أظــن أنــه قلبـي يركل أضلعـي يـريـد الهـروب اليكِ
كــ طفـــله رأت أمــــــها وأشتــاقت لأحـضـانهـــا♡❤. ”
دنيا، بإرتباك: أنت حققق ولا أني نتخيل، نشوف فيك قداامي حييي ولاميت ولاكيف!!
حسام، بحب❤: يادنيتي أنتي نظرة عيونك هيا اللي ردت فيا الروح، وحياتك كنت ميت من غيرك وشوفت عيونك أحيتني من جديد
دنيا ضحكت بفرحه ودموعي ينزلو وقعمزت بهدت حيل، تخلطت عليا نبكي ونضحك والفرحه مش سايعتني ومش عارفه كيف نعبر عليها، رجعت وقفت ثاني، وبلهفه: أنت كويس!! باللهي أنت واقف قدامي حق!! قاعده مش مصدقه عيوني
حسام، بإبتسامه: وليت كويس بشوفتك، صدقي يادنيتي أني بشحمي ولحمي ، غير الشحم ذاب شويه بس😁
دنيا قمت رأسي فوق، وبدموع😢: شكرا ياربي شكرا، نزلت رأسي وقعدت نتنفس بالقوه
حسام، بخوف😟: دنيا خيرك أنتي كويسه!!
دنيا هزيت رأسي، وأبتسمت: كويسه كويسه حاسه بنفسي ضاق من الفرحه والله
حسام شديت إيدها وقعمزت أني وياها مقابلين بعض: أرتاحي ياقلبي
دنيا، بفرحه: أصلا هذي حد راحتي والله أني شفتك بخير، وبعدم تصديق: باللهي أنت قدامي حق أني مانتخيلش صح!!
حسام، بضحكه😅: والله قدامك شوفي ها وهوا يأشر على روحه، نقرصك باش تصدقي ولا إنوض نرجع من وين ماجيت ونخليك تتخيلي على راحتك

 

 

 

دنيا شديت إيده بخوف😟: تسيبني ثاني والله تشوف بعدين، ماسدش هالفتره اللي خليتني بروحي فيها، ونزلت رأسي بأسف
حسام طبطت على إيدها بحنيه، وأبتسمت: على أساس أني مازال عندي قلب يقدر يسيبك خلاص شعفت ركبت عقلين ثانيات فوق عقلي باش نتحكم في تصرفاتي أكثر ومانتهورش ونخسرك من جديد، وبغمزه😉: بس أنتي شني هالتطورات الجديده وهوا يأشر على الحجاب
دنيا، بفرحه😍: حلو صح!! ووقفت بحماس: شوف غيرت حتى لبسي أطول وأوسع شني رأيك؟، ولفيت بإبتسامه
حسام، بحب❤: أحلى من الحلا نفسه ربي يهديك وينورلك بصيرتك أكثر وأكثر، والله هالمنظر فرحني أكثر من شوفتك نفسها ربي يكملك بعقلك
دنيا قعمزت ونزلت رأسي بخجل لما شفت محمد طالع وجاي جهتنا
محمد، بضحكه😁: قلت ياسرهم ربع ساعه عاد، نعتبروها نظره شرعيه وخلاص، أحنى راهو ماعندناش بناويت يقعمزو مع ولاد بروحهم أيواه باش تحطها في دماغك بس
حسام تلفت على الصوت ووقف، وبنص عين😒: غير تعالا توا نوريك نظره شرعيه كيف شكلها
محمد قرب وهوا يضحك على ملامح حسام، وإضبطته: الحمدلله على السلامه نورتنا، وبضحكه: والله الحوازه هاديه من غيرك 😅
حسام اللي ضغط على محمد بإيديه بقوه، وبحده: صار ماعندكمش بناويت يقعمزو مع ولاد أخر وقت مازال غير أنت بتتحكم فينا
محمد، بضحكه: غير حول راك تكسرلي عمودي الفقري وأني نسلمهالك بإيدي حلال عليك😁
حسام طلق محمد ووخر وهوا يشوف بإبتسامه لدنيا اللي مركزه معاه، رجع وقعمز قدامها، وتلاقت لمعة الفرحه اللي في عيونها مع لمعة الشوق واللهفه اللي واضحه في عيونه، أبتسم وهز رأسه بضحكه لما تحشمت من نظراته ونزلت رأسها بخجل
” ماكنتُ أؤمنُ بالعيونِ وسحرها، حتى دهتني بالهوى عيناكِ “❤
^^^^^^^^^^^^^^^^^^^^^^^^^^^^^^^
في حوش مفتاح
في الصاله اللي فيها سالمه وكناينها وفوزية تلفتو لسنيه اللي خشت عليهم وهيا تهز في رأسها بأسف
فوزيه: خيرك وليتي
سنيه، بضيق: على قد مادرتلها مابتش تفتح الباب حتى الردان ماردتش عليا
سالمه، بحزن😔: هذا حالها كل يوم ماتطلع وتأخذ هذاكا الفم إلا بطلوع الروح وتولى تخش وتسكر عليها لثاني يوم
فوزيه، بأسف😞: لا حول ولاقوة إلا بالله العلى العظيم، وبعدين الغلط منكم كيف تخلولها المفتاح لاقدر الله يصيرلها حاجه تقعد لين تريح فيها وهيا حتى الكلام ماتتكلمش
سناء: أحني ياأمي مانقدروهاش حولناه مره قعدت تعيط وتكسر رديناهولها وخلاص
فوزيه: المفروض واحد من الولاد ولا مفتاح ينحيه معاش تقدر تتكلم بعدين، عاد كيف تقعد هكي قريب الشهر وهيا حابسه روحها بين الأربعه حيوط لين تهبل ولا كيف، لا الغلط غلط على الأقل يفهمو منها شني اللي صابها باش إدير هكي
سالمه نزلت رأسها بحزن وسكتت هيا بروحها مش فاهمه شي ولادها ومفتاح ماحدش تكلم على قصة علا
في المربوعه
مفتاح، بضيق: معاش عندي وجه نقابل الناس بعد اللي صار فينا ياخوي
المبروك: الله غالب ياخوي هذا ماكاتب ربي توا الميت مايجوزش عليه إلا الرحمه، والمحبوس إدعيله ربي يغفرله هالذنب اللي داره ويفرج عليه، وأنت ماتهملش روحك شوف لصحتك ولمرتك والبنت اللي مازالت في رقبتك
مفتاح، بحزن: أي بنت باللهي ياخوفي نخسرها زي ماخسرت خوتها حتى هيا، وضعها مايطمنش بكل، أبصر شني اللي صابها حتى هيا، الباين ربي قاعد يجازي فيا على اللي درته في بنت خوي اليتيمه، خلص حقها مني لما قهرني في ولادي فلذة كبدي ياخوي، ونزل رأسه يداري في عيونه اللي تعبو دموع
المبروك، بحزن: وحد الله ياخوي وأستغفر ربك، أنت صح غلطت لكن باب ربي مفتوح وعمره مايرد عبد طلبه ورجاه، ربك غفور رحيم بعباده
مفتاح، بدموع😢: ربي يحبك يالمبروك اللي ماحضرتش هذاكا اليوم وشاركت معانا في اللي صار، شوف أني وبشير شني صار فينا كله درناه بإيديا، وعارف غير ربك قطع علينا وأني لهيت في وفاة عبير ومرضت عادل، وبشير لهاته المرأه اللي تزوجها وضحكت عليه وإلا قبل كنا ناويين على حاجات أكثر، لكن ربك ستر على البنيه المسكينه ونفذها من إيدينا ولهانا في أرواحنا
المبروك، بضيق: تعرف حتى كان الصغار هما اللي دارو هكي والله مايلتامو لكن المشكله أنتم الكبار اللي صغرتو عقولكم وشوف ربي فاش جزاكم ربي يهديكم إن شاء الله، والله ماعندي مانقول غير هكي وبس
مفتاح نزل رأسه وهوا يهز فيه بأسف والندم بيأكله مأكله على الشي اللي داره، شني اللي خلاه يوصل في شرف خوه الميت ويطعن في بنته اليتيمه، الله يلعن الفلوس اللي تغير النفوس وتسود القلوب وتعمي العيون، وتخلى الشيطان الراقد ينوض وتسول للإنسان أنه يبيع أقرب الناس ليه، وتنقطع الرحمه والحن من قلبه لدرجة يشوف أخته اللي قهرها في ولدها كبدها ملوحه قدامه وهوا مش معدل ولافكر حتى التفكير أنه يقربها، وقتها همه نفسه وبس، ماكانش متوقع أنه راح يطيح طيحتها وينقهر أضعاف القهر اللي سببهولها
ربي يغلبنا على هالنفس الطماعه، والله لايجعلنا نصيب في رزق غيرنا إلا بما يرضي الله
^^^^^^^^^^^^^^^^^^^^^^^^^^^^^^^

 

 

 

في حوش بشير
اللي كانت فيه فاطمه إمدايره مناحه على الإتصال اللي جاها من ولدها سامر من تونس وهوا يبكي ويقوللها ياأمي أدعي لولدك الدكتور قال روحو بيه راهو الأمل في الله
أختها، بحزن😔: وحدي الله ياوخيتي ماتقطعيش الأمل من ربك، وادعيله ربي يشبح فيه ويشفيه إن شاءالله
فاطمه، بعياط: وووووك وليدي ياوخيتي وليدي كبدي نار، سمعتيه قال الدكتور روحو بيه وخلوه على ربي
سامح اللي كان يشوف لأمه بحزن ويمسح في دموعه اللي غلبوه، ناض وقف وقرب من أمه وحضنها
فاطمه، بدموع😢: اااااااه وخيك ياسامح بيمشي وبيخلينا سعد خلاص بنوتوله قبره، ليش ياربي أني حتى كثر صغار ماعندي باش بتنقصهم حتى الفرح مافرحت بيهم علاش ياربي علاش
أختها، بضيق: أستغفري الله ياوخيتي شني هالكلام اللي تقولي فيه، وسيبي ولدك حرام عليك علاش ترعشي فيه، جبدت منها سامح اللي يبكي بالعبره، وبحزن: نوض ياوليدي نوض اغسل وجهك وتوضأ وأدعي لوخيك ربي يشبح فيه
سامح وقف وهوا يشوف لأمه اللي مستمره في نواحها
هالمواقف مافيش حد حاسبلها حساب كل واحد يجري في هالدنيا وهوا مش عارف ولافاهم أنه ممكن يضر نفسه وصغاره بيده ومن أفعاله، حتى التعدي على شخص بكلمه بس ربي مايسامحش فيها يابالك بالظلم والطعن في الشرف والحقد والغل اللي مالي قلوب الناس، واخذهم الجبروت والطغيان في هالدنيا وناسيين أنه فيه وقت تتصفي فيه الحسابات ويرتد حق المظلوم ويطيح الظالم مهما كانت قوته
الإبتلاء يختلف من شخص لشخص بس سبحان الله وكأنه لعنه صابت هالحوازه وخلت الحزن يسيطر على أركانها وزواياها
^^^^^^^^^^^^^^^^^^^^^^^^^^^^^^^
في حوش المبروك، اللي بعد ماروح المبروك وفوزية وشافو حسام وسلمو عليه وفرحو بسلامته، خشو باش يتسحرو، المبروك وحسام ومحمد على سفره في المربوعه، والبنات وفوزية على سفره في وسط الحوش
المبروك، بضيق: كان مايفرج ربي عليه ياودي بشير إمبكري قالي بلهون بكل، وقال الصبح طالعين بيه من تونس
محمد: ليش يروحو المفروض يشوفو دكتور وإثنين وثلاثه
المبروك: قالك شفنا فوق العشره وكلهم يقولو في نفس الكلام، منتشر المرض وحتى الكيماوي معاش يدير نتيجه غير بيعذبوه على الفاضي
حسام، بضيق: لا حول ولاقوة الابالله العلي العظيم، ربي يفرج عليه إن شاء الله، والله هالمرض ماتوده حتى لعدوك ربي يعافينا ويشفيه
المبروك تنهد بضيق: يستر الله وخلاص، وقف وهوا يقول: خليك الليله إهنايا ياحسام أرقد انت ومحمد في المربوعه لين غذوه يوصلو أهلك، وأبتسم: سبحان الله ربي كاتبلكم ترجعو للحوش مع بعضكم زي ماكتبلكم تطلعو منه مع بعضكم
حسام هز رأسه، وبإبتسامه: الحمدلله على كل حال
محمد: أي سبحان الله شوف الصدف
طلع المبروك وهوا يقول: هيا تصبحو على خير، وطلع من المربوعه وخش للحوش ومشي لداره طول
في وسط الحوش
فوزيه، بحزن😔: والله تقطع القلب مسكينه ياناري الكبد حاره
أيه، بأسف😞: ربي يشبح فيه وفي أهله ياناري، ويطمنهم عليه
سنيه، بضيق: أستغفر الله العظيم المصايب كلها جت وراء بعضها ربي يستر على اللي جاي
سرور، بإستغراب🤔: توا كيف لين ينتشر المرض وهوا يتحرك وعادي ومايندروش عليه، وبخوف😟: زعما حتى أحني فينا ومانندروش عليه نقعدو لين ينتشر ونموتو، رعشت مع بعضها: لا ياأمي أرفعونا ديرولنا تحاليل كيف تخلونا لين نموت هكي
فوزيه، بضيق: باللهي ياسرور ورأس بنيتي نوضي وفكيني من بلاك مش ناقصني هم في هالليل
دنيا، بإبتسامه😊: ماتخافيش مادامك ماتحسي في شي وحالك باهي فكك من الوسواس، وبالنسبه لسعد أكيد كان يحس غير هوا يتجاهل ويحسابه حاجه بسيطه وبعدين حتى الدخان والأرقيله يزيدو راهو وهوا من لما صغير نشوف فيه يدخن بالدرقه على أهله مايعرفش أنه يضر في روحه بهالشي
فوزيه، بحزن😔: ياكبدي عليه صغير ياناري ماشاف شي من هالدنيا ربي يشفيه إن شاءالله
الكل: إن شاء الله
وقفو البنات وقامو السفره وبعد ماضمو المطبخ كل واحده توجهت لمكانها، وأيه طلعت لما ناداها محمد لحظات ورجعت نادت على دنيا وطلعت هيا وياها من باب المطبخ الخارجي
دنيا، بخوف😟: شني فيه ياأيه خيرك مطلعتيني من إهنايا
أيه، بضحكه😅: أوامر عليا ياحنه وأني مانقدرش إلا أني إنفذ، وأشرت بصبعها على محمد اللي جاي جيهتهم
دنيا تلفتت لوين ماأشرت أيه وضيقت عيونها، وبإستغراب🤔: شني تبو مني أنت ومرتك تجرجرو فيا في هالليل، شني فيه!!
محمد قام كتافه بعدم معرفه وشد أيه من إيدها ورجع خش هوا وياها
دنيا، بضيق: مبردكم تي طلعتوني وخشيتو شني هالهبال هذا، وضربت رجلها في الأرض بعصبيه، وتلفتت بتوتر لما سمعاته يضحك وراها، وبرفعة حاجب🤨: هذا أنت نحسابك مشيت لحوشكم!! وبعدين شني اللي يضحك فيك!!
حسام قرب، وبحب❤: ماهانش عليا نفارقك حتى الليله بعد كل هالشهور اللي عشتهم بعيد عليك، وبعدين خالي قالي بات إهنايا وأني ماصدقت كنت إندور في سبله أصلا باش نقعد في نفس المكان اللي أنتي قاعده فيه، تعرغي أستاحشت حتى عصبيتك و حتى برودك ولقطة رفعة الحاجب هذي
دنيا، بإبتسامه😊: باهي تبي حاجه مني توا ولا نخش
حسام، ضميت شواربي بضيق: معقوله باعتلك وفد روسي مطلعك وأنتي تبي تخشي قاعد ماشبعتش منك إمبكري جي خالي وأنتي خشيتي ومعاش شفتك، وتنهد من قلبه: ااااه لو نقدر نوصفلك قداش مستاحشك، لو تقعدي واقفه قدامي زي توا طول عمري مش راح نمل، مازال ساعه على الفجر خليك معاي
دنيا هزت رأسها، وأبتسمت: حسام!!
حسام، بحب❤: عيونه أنتي!!

 

 

 

 

دنيا،بإبتسامه☺: ماأستاحشتش قهوتي
حسام تنهد بقوه وأبتسم: أجري بسرعه ماتعطليش
دنيا خشت للمطبخ بسرعه وهوا قعد يضحك عليها😁
” كم كان جميل حظي حينما عثرتُ عليكِ 🤍”
^^^^^^^^^^^^^^^^^^^^^^^^^^^^^^^
ثاني يوم العصر المبروك ومحمد توجهو للمطار باش يستقبلو عويلة مصر، كان مخليين طلعت حسام مفاجأة ومافيش حد قال عليها
والبنات اللي كانو واقفين في المطبخ من الصبح على قدماً وساق ويجهزو في الفطور والروائح الطيبه تفحفح من كل تركينه
فوزيه: خلاص يادنيا سيبي اللي في إيدك وبري انتي وسنيه ديرو دوره على حوش عمتك على السريع قبل مايوصلو
سرور، بضيق: ماهو نظفناه كله أمس ليش يمشو توا ويخلونا بروحنا مازال سته وستين حاجه تبي الديران أني إعييت راهو
فوزيه، بغضب😠: هذا فاش فالحه أنتي كان في النقان اخدمي وأنتي ساكته يابايره ندادك فاتحين حياش ويطيبو في فطور عيله بروحهم، وأنتي حاجه بروحك ماتكمليهاش وتقولي إعييت، وتلفتت لسنيه ودنيا اللي يلفو في البوريك، وبغضب: تي سيبو اللي في إيديكم وبرو بسرعه ديرو دوره وتعالو
سنيه ودنيا غسلو إيديهم وسنيه خشت بتجيب توب الصلاه باش تطلع بيه، أما دنيا طلعت ووقفت قدام الباب وتستني في سنيه، على طلعة حسام من المربوعه وأول ماشافها لف ورجع بسرعه وهوا يقول: أستغفر الله العظيم ياربي أستغفر الله، اللهم ماأني صايم
دنيا ضحكت 😅وطلعت بسرعه وقعدت تستني في سنيه قدام الباب الخارجي، شويه وطلعت سنيه ومشو مع بعض دارو دوره هوو الحوش وعطروه، وهوا أصلا كان نظيف ومش محتاج شي بس للتأكيد، ورجعو بسرعه باش يكملو الفطور قبل ماتوصل عمتهم والعيله
^^^^^^^^^^^^^^^^^^^^^^^^^^^^^^^
في المطار أستقبل المبروك بالأحضان أخته اللي كانت تمشي وهيا مستنده على عكازه وحالتها متحسنه على أخر مره شافها فيها، وسلم على مصطفي وحاتم وكانت معاهم حتى سندس اللي ليها سنين مازارتش ليبيا
المبروك، بإبتسامه: الحمدلله على سلامتكم نورتو وأنستو بلادكم
مصطفي: منوره بأهلها، ااااه واحد هذا وين إرتاح ويحس بأنه روحه ردتله
محمد، بإبتسامه😊: وطنك وطنك راهو كذب عليك مافيش بلاد ترتاح فيها كيف بلادك، وخبط حاتم على كتفه: ولا أنت شني رأيك يامهاجر
حاتم، بضحكه😅: لا مهاجر ولاشي، غير عجبني الجو بس طولت شويه وأهو رجعتلكم ماتخافش مانستغنوش راهو
محمد، بإبتسامه: مرحبتين بيك ياسي نورت أنت والبطل عليوه، وقام عليوه في غمره وهوا يقول: هيا ولا عجبتكم الوقفه قدام المطار
مصطفي، وهوا يأشر لحاتم وسعاد وسندس: برو أنتم مع محمد وأني والمبروك عندنا مشوار شويه ونلحقوكم
حاتم اللي كان عنده علم بهالمشوار أبتسم وهز رأسه، وقدم شد أمه من إيدها ووصلها للسياره ورجع هوا ومحمد بعد ماركب الصغار باش يجيبو الشناطي
أما مصطفي والمبروك توجهو لمشوارهم
المبروك: كان أجلته حتى بعد الفطور ولا حتى بعد العيد عادي
مصطفي: لا كل ماكان أسرع أفضل أنت جهزت ورقة المحكمه ولاه!!
المبروك: أي قداش ليها واتيه
مصطفي، بإبتسامه😊: خلاص على بركة الله
^^^^^^^^^^^^^^^^^^^^^^^^^^^^^^^
قبل مايوصلو محمد رن على أمه وخبرها بأنهم قدام البوابه، وطلعو باش يستقبلوهم قدام حوش سعاد وحسام كان معاهم اللي أصرو عليه يقعد في مربوعة حوشهم شويه لين يخشو ويسلمو قبل وبعدين يفاجئهم
بين أحضان وفرحه ودموع هكي كان اللقاء بعد الغياب اللي أمتد لأكثر من تسعه شهور بين دنيا وعمتها، والموقف أثر في الكل وخلا دمعتهم تنزل غصبآ عنهم
دنيا وهيا حاضنه عمتها وتبكي😭: باللهي معاش تسيبيني أنتي اللي قعدتيلي في هالدنيا ياعميمه
سعاد قاعد لسانها ثقيل شويه في الكلام، بدموع😢: اااااه ياااابنت الغالي شني دارو فيك من بعدي، سامحيني مشيت وخليتك بروحك يابنتي ماقدرتش نحميك منهم سامحيني يادنيا
حسام اللي كان يسمع فيهم تأثر على الأخر وماقدرش يسيطر على روحه ويقعد أكثر وشوقه لأمه غلبه وطلع بسرعه، وملامح الفرحه اللي على وجهه تحولو لصدمه لما شاف أمه مستنده على عكاز وساندتها دنيا من الجهه الثانيه، قرب بسرعه وبلهفه: أمي
بعدت دنيا لما شافت حسام جاي بسرعه ناحية أمه اللي ماكنتش مصدقه عيونها أنها قاعده تشوف فيه قدامها بخير وسلامه
وسندس اللي كانت تسلم على بناويت خالها تلفتت بصدمه على صوت حسام ومشت تجري لما شافاته حاضن أمه، وهالحضن ضم حتى حاتم اللي غلبوه دموعه وهوا يشوف في خوه اللي كان متوقعه قاعد في الحبس واقف قدامه، حضن جماعي ضم الولاد الثلاثه وأمهم اللي كانت راح أطيح بهدة حيل بينهم إلا أنه ولادها حاوطوها من جميع الجهات وهما ساندينها ولافينها بإيديهم هالشي اللي زاد قوتها وثبتها أكثر وفرح قلبها، وشني اللي تبيه الأم غير أنها أضم أولادها في حضنها وهيا مطمنه عليهم بأنهم بخير وكويسيين ومافيش شي مكدرهم ومضيق خاطرهم، ومن الجنان للحوش اللي قاعد مستمر فيه الأحضان من سعاد اللي مره تحضن حسام ومره دنيا وهيا الفرحه مش سايعتها وهيا بينهم وفي وسط حوشها بعد كل اللي صار معاهم
” ستأتي أياماً جميله وتنسينا كل هم وحزن عشناه “❤
** تمنوا ، وأبتسموا ، وتوُكلوا؛ فربُكم ربٌ كرِيم 💕 **

“أحيانًا تمرّ عليك ظروف تشعر أنها لن تنتهي من شدتها وقسوتها، ومع مرور الأيام تتلاشى بلُطف الله وطريقته وتدبيره لا بطريقتك وتدبيرك،
أغلق على شعورك السيّء وأبتسم😊
لذا… ما تأخر عليك شيء وطال انتظاره فاستبشر خيرًا وسيأتيك أجمل مما كنت تتخيل،
وثق بأن ربّك لا ينساك أبدًا. ”
بعد الإستقبال والتسليم والإطمئنان على الحال والأحوال رجعو فوزيه وأيه والبنات لحوشهم باش يكملو حوستهم قبل المغرب بعد ماقالو لسعاد وعيلتها أنهم حاسبينهم في الفطور
حسام، بلوم: معقوله هذا كله يصير وأني ماعنديش علم كيف هكي، تبعتولي في محمد يكذب عليا وخلاص، هذا باش أختفي هوا توا، لكن غير نحصل عليه هالبلعوط هذا لما نوريه حسابه
حاتم: محمد مادخلاش أحني قلناله مايقولكش، وبعدين حتى لو عرفت شني قدرك إدير وقتها، ماعندكش جهد غير بتقعد تخمم وتأكل في روحك وخلاص
حسام، بغيض: على المهم نعرف خليتوني زي العبيط

 

 

 

 

سندس: خلاص اللي صار صار توا المهم أنك طلعت بخير وأمي صحتها أحسن الحمد لله
دنيا، بإبتسامه: الحمدلله، والله ياعمتي الحوش ماينخش وأنتي مش فيه ربي مايغيبك ويطول في عمرك،
سعاد، بإبتسامه😊: ويحفظك يابنيتي ويفتحها عليك ويسعدك أكثر وأكثر، وهيا تشوف للحجاب اللي لابساته دنيا وعيونها يلمعو بفرحه
دنيا نزلت رأسها بخجل لما شافت نظرات حسام ليها، ووقفت بسرعه: نستأذنكم توا
سعاد، بإستغراب🤔: على خير يادنيا مكانك بينا قاعد راهو
حسام اللي إبتسم على كلام أمه شاف لدنيا بتركيز يستني في ردها
دنيا: أني بنمشي نساعد البنات، وأنتم إرتاحو توا أكيد تعبانين، وطلعت بعد ماطبست على عمتها وباست على رأسها
حسام تنهد بضيق لما ردت متجاهله اللي قالاته عمتها، وقف وطلع وراها وقعد يشوفلها من بعيد لين وصلت لحوش عمها وخشت، تنهد ورجع خش حتى هوا، لاقوه حاتم وولده طالعين، بإستغراب: على وين العزم؟
حاتم، بضيق: ماشي لحوش خالي مفتاح منه نعزيه ومنه نرفعلهم عليوه يشوفوه
حسام هز رأسه بأسف، وأبتسم لعليوه اللي شاد في إيد بوه، : هيا نمشي معاكم حتى أني
حاتم، بإستغراب🤔: قصدك مروح من إمبارح ومامشيتش عزيت خالك!! معقوله ياحسام خيرك؟؟
حسام، بغضب😠: بتحاسبني ولا كيف!! ناسي اللي داروه فيا، محلاني وأني كيف مروح وماشيلهم نجري والله لولا أنها موت بس وساكنين في نفس الحوازه وبنشوفهم راهو مامشيت وماعتبتهالهم بكل
حاتم تلفت وراه لما حس بحد وشاف سندس طالعه من دار أمها بعد مادخلتها، أبتسم😊: أحني ماشيين لحوش خالي مفتاح شويه ونجو، دف حسام قدامه وهوا شاد عليوه في إيده وطلعو وسكر الباب وراه
حاتم، بضيق: اللي صار صار توا وهذي موت ماتكافيش فيها، وبعدين كل واحد خذي جزاته، وزي ماتبلي عليك وحبسك أهو حتى هوا ربي جزاءه على اللي داره وكأن أنت إنحبست 9 شهور، هوا عمره كله بيقضيه في الحبس على اللي داره والرقبه اللي حطها في رقبته
حسام، بصدمه😲: كيف شني قصدك!! كيف عمره كله بيقضيه في الحبس شني اللي داره؟
حاتم، بضيق: قصدك أنت ماسمعتش باللي صار وحبست عادل
حسام هز رأسه بالنفي وهوا قاعد أثار الصدمه واضحه على وجهه
حاتم شاف لعليوه اللي مركز مع بوه وعمه أبتسمله، ورجع تلفت لحسام وتنهد بضيق وغمزله على عليوه، بمعني مايبيش يحكي قدامه: خلينا نمشو توا وبعدين نحكو، ومشو وحاتم رجل تقدم والثانيه تؤخر وهوا متوتر وخايف من ردة فعل خاله والولاد على شوفتهم وشوفت عليوه، رغم أنه هوا مش إمداير شي بس كانت عنده رهبه من المواجهه بعد اللي صار وغيابه كل هالفتره، أما حسام فالصدمه اللي سيطرت عليه من اللي سمعه قبل شويه والحيره اللي شغلت تفكيره، شني هوا الشي اللي ممكن يكون عادل داره ويكون جزاءه أنه ينحبس عليه طول عمره خلاته يمشي من غير عقل ومافكرش في ردة فعل حد بكل، بس الضيق والقلق والتوتر اللي كان حاسه حاتم ماكنش ليه أي داعي لأنه ردة الفعل كانت طبيعيه جدا، ومفتاح وسالمه وولادها فرحو هلبا بشوفت عليوه ولد بنتهم اللي خذتها الموت فجأه ومن غير سابق إنذار، وكانت الأحضان والدموع حاضره وبقوه من الكل وهما يشوفو في شكل بنتهم الميته في ملامح ولدها الطفوليه اللي سلمت فيه وزهدت بيه، وهوا عيل وماشبعش من حضن أمه ممكن هالشي اللي خلاه مايسألش حتى عليها يمكن نساها أو تعود على غيابها وتأقلم من غيرها
مفتاح مسح دموعه اللي غلبوه: كيف حالها أمك توا ياحاتم؟
حاتم، بإبتسامه😊: صح مارجعتش زي قبل لكن الحمدلله أحسن بهلبا من أول ماطاحت
مفتاح هز رأسه ونزله بأسف😞
سالمه وهيا حاضنه عليوه وتشم وتبوس، بحزن😔: ماعندناش علم أنكم بتروحو اليوم كان هذا راهو مشيت وشفتها
حاتم: معليشي حصل خير، هيا بروحها أمي قالت أنها بتجيكم بس المشوار وركبة الطياره تعبتها وخليت سندس كيف دخلتها لدارها باش ترتاح شويه، بالك بعد الفطور نوصلها بالسياره وتجيكم بإذن الله
مفتاح، بضيق: لا لا لاتجيبها ولا إتعبها أحني اللي ملزومين إنجوها ونطمنو عليها خليها ترتاح توا وبعد الفطور نجوكم إن شاء الله
حاتم، بإبتسامه: باهي على راحتكم، تفضلو في أي وقت
سالمه، بإبتسامه😊: حتى سندس جت معاكم؟
حاتم: أي قالت إستاحشت حسام والبنات والعويله ومنه تغير جو إسبوعين وراجعين بإذن الله
عامر، بضيق: وحتى أنت راجع غاذي!!
حاتم: واللهي ماني عارف قاعد ماخذيتش قرار نهائي
عصام: ياودي لوح عليك الغربه وخليك في بلادك وبين ناسك وأهلك
حاتم: يصير خير إن شاءالله
عامر، بضيق: وأنت أمتى طلعت ياحسام؟
حسام اللي كان ساكت ويراقب في الحديث بضيق، وقف وهوا حاس روحه مخنوق من المكان، وبنص عين😒: إمبارح، وتلفت لخوه بضيق: هيا ياحاتم

 

 

 

 

حاتم وقف، وأبتسم: هيا نستأذنوكم توا، إن شاءالله هذا حد السوء وهذي خاتمة الأحزان يارب
وقفو الكل ومن بينهم سالمه اللي شاده عليوه في إيدها شافتله وأبتسمت بحزن
حاتم قدم من ولده وقربز قدامه، وأبتسم: عليوه تقعد مع حنينه وجدو، ولو تبي تروح تكلم واحد من خوالك يوصلك باهي بابا
عليوه: باهي بابا
سالمه، أبتسمت بفرحه 😍وشدت عليوه وهيا تقول: هيا تعالا معاي ياحنينه نشوفو صغار خوالك وتلعب معاهم، طلعت هيا وياه من المربوعه وخشو الداخل وحاتم معاهم بعيونه لين تسكر الباب، وتلفت لخاله وولاده سلم عليهم بالتحيه وطلع هوا وحسام لحوشهم اللي لقو محمد قدامه يستني فيهم
^^^^^^^^^^^^^^^^^^^^^^^^^^^^^^^
في حوش المبروك
في المطبخ سرور وسنيه يغسلو في الماعين، وأيه ودنيا يسلفرو في الحافظات اللي بيرفعوهم لحوش سعاد
سنيه نفضت إيديها، وبضيق: ماتقوليليش توا روحت عمتى بترجعي عندها وتسيبينا يادنيا
دنيا، بإبتسامه😊: حسستيني بنسافر لأخر العالم حتى لو قعدت عند عمتي راهو قاعدين في نفس الحوازه دقيقه تكونو عندي أو نكون عندكم
سرور: مش هكي بس تعودنا على وجودك معانا، وخذينا عليك بيناتنا
دنيا، بإبتسامه: حتى أني خذيت عليكم ومرتاحه عندكم، بس مش عارفه الحق، والله بروحي قاعده مافكرت فيه هالموضوع هذا
أيه، بإبتسامه: الحق مادابينا تقعدي معانا لكن مادوريناش أحني اللي يريحك أنتي ديريه أهم شي تكوني مرتاحه، والباقي زي حوش عمتك زي حوش عمك مافيش فرق
فوزيه تنادي من برا: ياسرور ياسنيه
سنيه، بصوت عالي: نعم ياأمي نعم، أهو جايين
سرور، بغيض: ااااف كان سكرت رأسها على شي خلاص، توا بدل مانرتاحو بعد هالمجهود اللي درناه وواقفين من الصبح على رجل واحده، لا تبي إتعبنا أكثر، باللهي وقت تنكيت مربوعه هوا والمغرب مازال عليه أقل من ساعه
أيه، معليشي باش ترتاحو بعدين، خلوهم الماعيين توا نكملوهم أحني ونوتو السفر برو شوفو خالتي أنتم
سنيه مسحت إيديها وطلعت ولحقتها سرور اللي إتمتم ومش عاجبها
أيه، بضحكه: والله صدقت خالتي فاها بايره بكل سرور ولاتحب تتحرك ولاتخدم حتى دقيقه😅
دنيا جبدت الكرسي وقعمزت عليه بتعب
أيه، بشك: خيرك أنتي يادنيا من إمبكري شكلك مش طبيعيه
دنيا، بتعب: مش عارفه حاسه روحي فاشله ودايخه شويه يمكن من التعب والصيام
أيه، بغمزه😉: لا وأنتي الصادقه سهر إمبارح شكله أثر فيك ونزلت عليك الندوه إن شاء الله غير ماتمرضيش وغذوه عيد، أول ماتفطري خوذي حبتين بندول أسعفي روحك بسرعه
دنيا هزت رأسها ووقفت ورجعت تلف في الحافظه، وهيا تفكر في الموضوع اللي شاغل تفكيرها من لما وصلت عمتها، وين راح يكون مكانها هل راح ترجع لحوش عمتها ولا تقعد في حوش عمها
^^^^^^^^^^^^^^^^^^^^^^^^^^^^^^^
عند المبروك ومصطفي
المبروك: مش حاس روحك تسرعت في هالموضوع يامصطفي ومن غير ماتأخذ رأي حد
مصطفي: لا هذا الصح وأني عارف مصلحتهم وين
المبروك: تخاف تقعد عالق في أمور ثانيه بعدين، ياودي يستر الله وخلاص
مصطفي، بإبتسامه😊: لا أطمن بإذن الله مايصير إلا كل خير، غير أنت رد بالك تغلط وتزلق بالكلام مع أي حد
المبروك، بإبتسامه: ماتخافش هالموضوع يقعد بينا بإذن الله
مصطفي: أي وهذا اللي نبيه في الوقت الحالي لين يجي وقته
المبروك: إن شاءالله بإذن الله، إلا ماقلتليش شني صار في أرضك اللي في الجبل؟
مصطفي، بإستغراب: ماسمعتش بيها ماهو إنباعت في المحكمه والراجل عطاني شيك بالمبلغ حطيته في المصرف على طول
المبروك، بتساؤل: وخوتك سكتو عادي ومافيش حد أعترض
مصطفي: ماعندهم مايديرو ولدهم اللي موكلينه وجي حضر المحكمه وقع على تعاهد أنه مافيش حد يتعرض للشاري حتى بكلمه، وتبي الحق اللي صار لهاني ومعاش دورت الراجل ولا إتصلت وإستفسرت منه، لكن بإذن الله توا غير نروح ونرتاح ونفتح تليفوني ونكلمه نطمن عليه ونشوف شني دار معاهم
المبروك: إن شاءالله خير، ربي يهديهم وخلاص لكن أكيد مادامهم وقعو على تعاهد توا يخافو ومعاش حد يقدر يدير شي
مصطفي: إن شاء الله واللهي مادابيا نرتاحو ياسرنا تعبنا من الهم والمشاكل اللي معاهم عمرنا زاد الضعف
المبروك، بإبتسامه: لا ماشاءالله عليك قاعد شباب، الباين قعدتك في مصر نشطاتك أكثر، ياخوفي على أختي بس😁
مصطفي ضحك😅: لا أنت شكله الصيام مأثر فيك وبديت تفترش في الكلام، خف روحك خف وقت على المغرب
*********************************
بالنسبه لجماعة الجبل صارلهم زي المثل اللي يقولك أقطع الرأس ييبسو العروق، خليفه اللي كانو متقويين بيه قاعد محبوس وهما إطرو يستسلمو ويسلمو أمرهم للواقع اللي إنفرض عليهم لامحاله، هما أنفسهم كانو عارفين أنه الأرض مش ليهم بس كان عندهم حب التسلط زي هلبا ناس مسيطرين على الورث بعد وفاة بوهم وحارمين خوتهم وخواتهم من رزقهم اللي هما يتمتعو فيه، بس زي مانقول ديمه لكل ظالم نهايه مهما كان قوي فيه اللي أقوى منه، ومهما طغي وتجبر راح يجيه يوم وينهزم غصبآ عنه، زي ماصار لخوت مصطفي كأنو مسيطرين على أرض خوهم بالقوه بس بالقانون والتعاهد اللي وقع عليه خليفه برضاه خلاهم يرضو غصبآ عنهم، وحبس خليفه والحكم عليه في قضية مخدرات هز صورتهم في الجبل خلاهم صغار في عيون الناس، بعد ماصابهم التكبر والغرور وزاد جبروتهم لما خليفه دار كتيبه وبقوة السلاح سيطر على منطقتهم وشبه إستعبد الناس، بس ربي كبير وقدر ينهيهم ويكسر جبروتهم زي مانهي هلبا غيرهم، لكل ظالم نهايه ولازم الحق يرجع لصحابه ولو بعد حين
^^^^^^^^^^^^^^^^^^^^^^^^^^^^^^^
حسام، بصدمه😲: هذا كله صار وأني أخر من يعلم، وأنت ياسي محمد كنت تكذب وإدرق عليا وأني نهز في رأسي ونصدق فيك
محمد، بغضب😠: تي شني نكذب وإندرق عليك هذي، تي أصلا موضوع عادل سمعنا بيه أول يوم رمضان لما سلم روحه أنتشر الخبر وأني من قبل الرمضان معاش شفتك كيف تبيني إنقولك!!
حاتم، بضيق: خلاص ياحسام تي كبر عقلك أهو عرفت شني بدير توا هي، إرتاح أهو ربك جزاءه على اللي داره فيك، بس اللي مايخشش الرأس كيف هوا اللي قتل عبير مش قالو من الأول خبطتها سياره
محمد، بضيق: ماتفهم شي بكل ولا حتى تقدر تسأل كيف صار أصلا تحسهم العيله كلهم مايبوش يتكلمو في هالموضوع وكأنه في شي مش فاهمينه حتى هما ومش عارفين يبررو موقفهم للناس، بس على حسب كلام بوي قال كلهم مايعرفوش أنه عادل اللي قتلها لين مشي للمركز وأعترف وسلم نفسه، وهوا بروحه ماذكرش السبب اللي قتلها على خاطره ولا حتى قدم أعذار ودافع على روحه أستسلم للأمر الواقع ورضي بالحكم وخلاص
حسام، بشك🤔: فيه حلقه مفقوده في النص، وبعدين كيف صدقوه الشرطه أنه هوا اللي قتلها وهما ماعندهمش دليل عليه، لو في حاجه ضده راهو شدوه من الأول
محمد: حتى أني فكرت هكي ولما سألت بوي قالي هوا شرحلهم كيف دار كل شي، وقاللهم على مكان سيارته اللي ضربها بيها وإختفت من يوم الوفاه كان داسها عند واحد يعرفه، ولما خذو البصمات ولقو الدم على كرسي السياره وكندرتها وشنطتها اللي فيها بطاقتها وتليفونها في السياره، طلع بعد ماضربها رفعها في سيارته ولوحها قدام العياده وهرب، ولما رجعو للكاميرات متاع العياده تأكدو من كلامه
حاتم، بصدمه😲: تقول فيلم رعب الزفت، وكيف ماشافوش كاميرات المراقبه متاع العياده من الأول
محمد: هما العيله ماطالبوش بهالشي قاللهم عادل حادث صدقو وخلاص، وبعدين تشوف فيها البلاد كيف، وينها الشرطه والقانون اللي بتهتم بحاجات زي هذي، تي توا حتى يشوفوه يقتل قدام عيونهم يتلفتو للجهه الثانيه ويديرو روحهم لاشافو ولاروو
حسام، بأسف😞: تي مش مصدق الزفت معقوله عادل يطلع منه شي زي هذا، كيف يدير هكي كيف!! وين كان هالحقد والسوء مدسوس عنده تقول ربي خذي شخص وحط شخص ثاني بدله، لا حول ولاقوة الابالله العلي العظيم، لا والمصيبه الثانيه علا يطلع من تحتها البلي هذا كله يالطيف ألطف وخلاص
محمد تنهد بضيق: أي والله مني قال، بس الوقت هذا معاش تلوح شي خليك متوقع أي حاجه من أي شخص كان، معاش فيه ثقه في حد، بس ردو بالكم موضوع علا ماحد سمع بيه من النساوين من غير دنيا راهو الأفضل يقعد بينا مش ناقصنا فضايح
حاتم: أستغفر الله العظيم وأتوبُ إليه، ربي يعفينا مما إبتلاء بيه غيرنا
حسام، محمد: اللهم أمين، وتلفتو الثلاثه على صوت سيارة المبروك اللي خشت من البوابه، وقف حسام وهوا يشوف لبوه اللي قاعد ماأنتبهلاش بلهفه، وتلفت لحاتم ومحمد: وين كان بوي!! إن شاءالله غير ماتطلعوش إمدرقين عليا شي ثاني بعد هذا كله، وماأستناش ردهم وقدم بسرعه وحضن بوه اللي كان واقف مصدوم ومتفاجئ من وجوده وقعد دقايق باش إستوعب الموقف ولف إيديه وحضن حسام بقوه، وهوا متأثر بشوفت ولده بعد هالفتره
^^^^^^^^^^^^^^^^^^^^^^^^^^^^^^^

 

 

 

 

على سفرة الفطور اللي كانو متجمعين عليها حاتم وحسام وسعاد وسندس وولدها ومصطفي اللي فقد دنيا لأنه ماشافهاش وسأل عليها
سندس: من إمبكري لما وصلنا معاش شفناها
سعاد، بإستغراب🤔: إمالا مني جاب الفطور؟
حاتم: محمد وسرور اللي جابوه يا أمي
مصطفي، بشك: غريبه ماجتش سلمت عليا، ولا ماعندهاش علم أني جيت مرات
حاتم: سألت عليك إمبكري وقلنالها طلع هوا وخالي المبروك عندهم مشوار، وأكيد عرفت أنك روحت مادام روح خالي
سندس: عادي مرات غير توا وقت فطور
سعاد: توا تجي وتسلم عليك
حسام تنهد بضيق ومسح فمه وناض طلع
مصطفي، بقلق: زعما فيه شي صاير بينهم!!
حاتم اللي كان عارف بحب حسام لدنيا، هز رأسه بالنفي: لا لا ماأعتقدش، ماتشغلش بالك تعشي أنت، توا أني نشوفه، وقف وطلع حتى هوا
حسام اللي كان ماشي متوجه لحوش خاله المبروك لما طلع حاتم وناداه بصوت عالي: حسام أستني شويه، قرب منه بسرعه، وبإستغراب: وين ماشي في هالوقت الناس قاعده تفطر
حسام، بضيق: بنشوف محمد بنسأله على حاجه
حاتم، بشك: وليش ماكلمته بالتليفون، ولابتفطر على وجهها، وغمزله😉
حسام، بنص عين😒: باللهي مش وقت برادتك بكل، وبعدين شفرتي مسكره تبي تفعيل من الشركه
حاتم، بإبتسامه😊: باهي باهي غير تعالا نقعمزو نهدرزو شويه وخلي الناس تفطر على راحتهم
حسام زفر بضيق ورجع هوا وحاتم وقعمزو على الكراسي اللي في الفرانده
حاتم حط إيده على كتف حسام اللي كان منزل رأسه ويفرك في جبهته بإستمرار، وأبتسم😊: هونها وتهون ياخوي خيرك شني مازال مضايقك بعد اللي صار
حسام، بأسف😞: خايف نخسرها ياحاتم كل مانتفكر المشاكل اللي صارت وكيف قدرو يبعدوني عليه نخاف أكثر من اللي جاي
حاتم، بإبتسامه: بالعكس أنت المفروض تفرح مادامه بعد كل اللي صار أنت وياها قاعدين مع بعض معناها الشي اللي بينكم أكبر من أنه أي حد يقدر ينهيه، بس أنت تفائل وخليك متمسك باللي تبيه، نصيبك راح يصيبك ياخوي ولو هيا نصيبك وأنت نصيبها مستحيل يقدر حد يبعدكم عن بعض لو شني مادار، أنت خلي عندك ثقه في الله بس
حسام: والنعم بالله ياخوي بس أني مانبيش نخليها على النصيب هيا ليا يعني ليا لو أطريت نعارض الدنيا والكل علاها
حاتم، ضحك😅: ماأعتقدش توصل لهالدرجة بس يلا ربي يجمعكم بالحلال ياسي، غير أنت تحرك وشوف روحك عمرك 27 سنه وماعندك شي راهو البنات يحبو الراجل اللي عنده يابابا باش يلبيلهم طلباتهم ويقول حاضر على كل شي، وتنهد بضيق وهوا يذكر في طراطيش من حياته هوا وعبير وكيف كانت هالكاته بالطلبات ومش مراعيه ظروفه وهوا اللي كان يخدم من الصبح لليل على خاطرها وحارم روحه من كل شي حتى الراحه باش ماينقص عليها شي وياريتها حتى كانت مقايله بيه ومقدره تعبه، ربي يرحمها توا مايجوزش على الميت إلاالرحمه، زفر وهوا يمسح على وجهه بضيق ويستغفر بصوت عالي
حسام، بهزوه😏: شني قعمزت دقيقتين معاي دعيتك ولا شني، توا كان جوك مليح شني اللي جاك
حاتم وقف، وأبتسم😊: لا جوي تمام التمام هيا نوض نخشو ماتبيش تهدرز على بوك
وقف حسام وخشو الداخل
بعد صلاة العشي ألتمو الكل في حوش سعاد سالمه وكناينها وولادها ومفتاح، والمبروك وفوزية وأيه، وحتى فاطمه وسامح اللي جو يحمدو لسعاد على سلامتها، كانو الرجاله والولاد مقعمزين في جهه من الصاله والنساوين في الجهه الثانيه
حاتم، بتساؤل: إمالا وين محمد ياخالي؟
المبروك: والله طلع هوا والبنات قالو ناقصينهم شوية حاجات بيأخذوهم
مصطفي: وشني صار في بشير مش طالعين من الصبح هذا كله قاعدين ماوصلوش؟
المبروك: على جيه معاش يعطلو
عصام: إحتمال بيحطو سعد في العياده قبل مش إمروحين بيه للحوش، هكي قالي سامر لما كلمته قبل الفطور
مفتاح، بضيق: ربي يفرج عليه إن شاءالله، غير وين كان مدسوسلنا الهم هذا كله أستغفر الله العظيم
حسام بصوت واطي لحاتم: إيديروها بإيديهم وبعدين يقولولك منين جانا هالهم من عمايلكم اللي تسود الوجه
حاتم فنص في حسام وعض شاربه بمعني أسكت، حسام تنهد بضيق وناض طلع من الحوش بكل وهوا في باله يتوجه لأقرب موزع شفرات ويفعل شفرته
في الجهه الثانيه
سعاد، بأسف😞: كيف حال سعد توا يافاطمه؟
فاطمه، بحزن😔: على حاله كان مايفرج ربي إن شاء الله، أهو مروحين بيه توا قبل مانجي كلمتهم قالو ساعتين ونوصلو
سالمه، بحزن😔: ربي يشفيه ويطمنكم عليه إن شاءالله
الكل: إن شاءالله
سندس: إمالا وين البنات يامرت خالي؟ خيرهم ماجوش هدرزو
فوزيه: واللهي إلا طلعو مع محمد بيأخذو شوية حاجات، قالو مش معطلين شويه ويجو
سندس: حتى دنيا مشت معاهم؟

 

 

 

أيه: لا واللهي دنيا خليناها راقده تعبت هلبا اليوم قالت نرتاح شويه وتوا نلحقكم
سندس هزت رأسها وأبتسمت😊 لمرت خالها سالمه اللي تسأل على سلوى وسميره: كويسيين يامرت خالي الحمدلله، غذوه الصبح جايين قالو
سالمه، بإبتسامه: باهي يوصلو سالمين إن شاءالله
^^^^^^^^^^^^^^^^^^^^^^^^^^^^^^^
حسام اللي فعل شفرته وأتصل بمحمد على طول، خاله لما قال أنه محمد رافع البنات يحسابه حتى دنيا معاهم لأنها ماجتش مع مرت خاله وكنتها، بس إستغرب لما قاله محمد أنه رافع سرور وسنيه بس ودنيا مش معاهم، سكر بسرعه وأتصل بيها على طول ومرتين يرن لين يفصل ومافيش رد، زاد عاود مره ثالثه والقلق والخوف بدو يتسللو لقلبه ومع أخر رنه جاه صوتها الضعيف والمرهق
دنيا، بتعب: نعم!!
حسام، بخوف😟: أنتي كويسه خيره هكي صوتك!
دنيا حولت التليفون من على وذنها وتأكدت من الرقم اللي ماأنتبهتلاش من الأول لما ردت، أبتسمت😊: أهلين حسام تصدق في غيابك كنت كل يوم نستني في هالرقم ينور تليفوني
حسام، أبتسم😊: وأهو نوره وبإذن الله معاش ينقطع، بس أنتي خيره صوتك هكي مريضه!! وبعدين وين قاعده؟؟
دنيا: أني في الحوش، كنت راقده شكلي حصلت برده
حسام، بخوف😟: شني تحسي باهي!! تمشي تعايني!!
دنيا: لا لا مش مستاهله خذيت بنادول شويه ونولي أحسن إن شاءالله
حسام، بقلق: باهي بس المفروض ماقعدتيش بروحك في الحوش، جيتي رقدتي عندنا عادي
دنيا: مافكرتش والله كنت حاسه روحي فاشله رقدت طول حتى لما نوضوني قتلهم برو خلي نرتاح شويه وتوا نلحقكم بس شكله راحت عليا نومه
حسام، بإصرار: متأكده أنك كويسه مافيك شي!! في رأيي تمشي تعايني أفضل
دنيا: كويسه والله ماتخافش عليا، أنت وين حسه دوشة سيارات جنبك
حسام، بحب❤: لو ماخفتش عليك أنتي على مني بنخاف، أني في شارع ال……، كيف فعلت شفرتي وأهو مروح، تبي شي خاطرك في شي!!
دنيا: لا سلامتك، خلاص إمالا ماتتأخرش نستني فيكم في حوشكم
حسام: لا ماتطلعيش بروحك أستنيني ربع ساعه ونكون عندك
دنيا، بإبتسامه😊: خلاص نستني فيك
حسام، بحب❤: محلاك كيف إموليه تسمعي في الكلام ياقلبي
دنيا، بغيض: علاش قبل ماكنتش حلوه!!، خلاص بنمشي بروحي مش مستنياتك باهي
حسام، بغضب😠: نوريك تعتبي خطوه واحده برا الباب بروحك، أستنيني فاهمه!!
دنيا،بضيق: باهي خلاص نستني فيك
حسام، بإبتسامه😊: أيواه خليك حلوه وعاقله هكي وأسمعي الكلام، ياسر مادهشتيني قبل وأرهقتي قلبي
دنيا ضحكت بصوت عالي😂: ههههههههههه مانضمنلكش الدوام على هالحال بصراحه، بس حاضر نحاول نكون كيف ماتبي أنت
حسام حط أيده على قلبه اللي دار دوشه مع ضحكتها ودلكه بالشويه، وبحب❤: على شني ناويه بالضبط يادنيتي، نجي نخطفك توا ونريح روحي وخلاص
دنيا، بإبتسامه😊: خلاص مش ناويه على شي نستني فيك
حسام، بلوم: نوصل ونتفاهمو على الضحكه هذي هكي كنتي تضحكي قدام محمد إن شاء الله
دنيا، بتوتر: لا لا، ماهو ضحكتي كانت غايبه معاك أنت، وهذا وين رجعتلي😊
حسام،😍: شكلك مش ناويه تخليني نوصل فيك بالسلامه من كلامك اللي يذوب القلب، بصراحه يادنيتي مش متعود على الكلام الحلو هذا كله منك، أعطيني بالجرعه باللهي ماتقتلينيش مره واحده هكي
دنيا، بغضب😠: الحق مش فيك أصلا، توا تشوف كان مازال رديت عليك لما نسكر ونحطك في الحظر
حسام، ضحك😅: تسكري تشوفي تي توا كنت نقول في خاطري البنت شكلها كبرت وعقلت فكينا من لعب المفرخ أهوا
وأستمر الجدال بينهم بهالطريقه حتى بعد ماجاها ووصلها لحوشهم، وحتى لما روحت وأتصل يعاتب فيها كيف ماقعدتش عندهم وهيا قدرت تلهيه وتنسيه بكلمتين وغيرت الموضوع بسرعه، وهالحديث اللي دام لأذان الفجر كان ممزوج بنكهة الحب والغيره من حسام، هالشي اللي فرح دنيا ورد السعاده اللي كان فاقدها قلبها بغيابه وخلاها تتأكد بأنه مكانتها في قلبه قاعده زي قبل وأكثر❤❤
” وإني لم أختر أن أُحبُكَ يوماً ؛ وَلكن
” قُل لن يُصِيبنا إلّا ما كَتبَ اللّه لنَا ”
وَأنتَ أصبتني .. ❤🦋 ”
^^^^^^^^^^^^^^^^^^^^^^^^^^^^^^^

 

 

 

 

وبعد الفجر وفي ساعات الصباح الأولى ومع أول أصوات النداء لصلاة العيد تعالت أصوات العياط في حوش بشير اللي زاراته الموت وألم الفقد وحرقة القلب بعد ماوصلهم خبر موت سعد اللي من لما وصلو من تونس حطوه في عياده على طول لأنه حالته ماكنتش تسمح بأنه يرجع للحوش، والعيد بدل ماكان مبهج ومفرح وفيه القلوب تتصافي وتود، غيمت على الأجواء ريحة الموت والحزن
سعد اللي موته كان فاجعه، وجع قلوب هلبا ورغم علم أهله بهالنهايه من الدكاتره إلا أنه وفاته كانت صدمه مابعدها صدمه كل شي صار بسرعه قبل رمضان كان كويس وأموره تمام ومايشكي من شي كيف هكي وكأنه حلم وكأنه كل شي خيال،
” ونحنُ أقربُ إليكَ من حبل الوريد ”
^^^^^^^^^^^^^^^^^^^^^^^^^^^^^^^
فاتوا أيام العزي، واليوم موعد رجعة سندس وحاتم لمصر اللي قدر يقنع بوه وأمه أنه مرتاح في مصر أكثر وتأقلم وتكييف على العيشه فيها، وهما ماحبوش يضغطو عليه ويجبروه على شي هوا مايبيشي ووجود سندس وخالد معاه كان مطمنهم ومريح بالهم عليه، حسام بعد ماوصلهم هما وولادها للمطار وأطمن أنه أمورها تمام، أستناهم لين خشو لصالة الإنتظار وطلع رجع للمعمل اللي ليه من ثالث يوم من وفاة سعد وهوا يعاند فيه ماكانش محتاج حاجات هلبا لأنه محمد كان قاطع شوط كبير فيه، بس كانت فيه أمور هلبا تبي ترتيب من الرخصه والشهائد الصحيه وغيرها هلبا
في حوش المبروك
العشيه كانو مقعمزين يشربو في القهوه
أيه، بإستغراب🤔: وين دنيا إمالا خيرها مش معاكم ولا راقده
سنيه، بنفي: لا لا مش راقده، بعد مارقيتي أنتي مشت لعمتي بدير عليها دوره معاش جت
أيه، بتساؤل: سافرت سندس وخوها قصدك!!
سنيه: أي الظهر طيارتهم على أساس أكيد توا حتى وصلو
أيه: باهي كويس، وإتكت بظهرها للخلف بتعب
فوزيه، بقلق: ماكلمكش محمد ياأيه وينه هذا كله حتى الغذي ماضاقه
أيه، بضيق: توا كلمته وقال في الطريق قريب يوصل
سرور، بتوتر: ماقالك شي على النتيجه!!
أيه، بضيق: قالي الزوز ناجحين بس الواضح من كلامه وعصبيته على تقديرك أنه نسبة دنيا خير منك بهلبا
سرور، بعدم إهتمام: المهم نجحت وخلاص هذا المهم
فوزيه، بشك🙄: وخيرك أنتي هكي رايحه ليك إيامات مش عاجبتيني وجهك أصفر وحتى مأكلتك بالهون
أيه، بتعب: شكلي حصلت برده ياخالتي حاسه كبدي لاعبه وكان نلقي نرقد وخلاص
فوزيه، بفرحه😍: وشني تحسي ثاني!! إن شاءالله يطلع اللي في بالي صح ياربي
سرور، بفضول: وشني اللي في بالك ياأمي!!
فوزيه نطت فيها بغضب😠: أسكتي أنتي وألهي في التلفزيون، وتلفتت لأيه بتركيز: ها قوليلي شني تحسي ثاني؟
قعدت أيه تحكيلها وهيا كل مالها إبتسامتها تزيد وتتوسع أكثر
فوزيه، بفرحه😍: كلمي محمد قبل لايوصل بسرعه قوليله يجيبلك الإختبار المنزلي على طريقه
سنيه، بإبتسامه😊: قصدك حامل!!
أيه، بعبط: لا لا، قصدي مش عارفه، أني عندي واحد فوق ياخالتي خذيته في نهاية الرمضان لما تأخرت عليا بس مادرتاش لهينا في الوفاه وأنسيته
فوزيه: ياعليك دماغ عندك وهذي حاجه تنتسي هيا نوضي بسرعه جيبيه وتعالي فيسع
طلعت أيه ركبت جابت الإختبار ونزلت بسرعه، وخشت للحمام ( أكرمكم الله ) وفوزية ماشيه جايه قدام الحمام وهيا إتمتم بالدعاء وسنيه وسرور معاها بعيونهم ووقفو بلهفه لما إنفتح الباب وطلعت أيه اللي دمعو عيونها من الصدمه والفرحه في وقت واحد
أيه مسحت دمعتها، وأبتسمت😊: خطين ياخالتي
فوزيه شافت لسنيه بعدم فهم🙄
سنيه، بفرحه😍: معناها حامل ياأمي
فوزيه أضبطت أيه على طول، وبدموع😢: مبروك يابنيتي مبروك، والله لولا الوفاه والحشمه قدام الناس راهو زغرطت لين إعييت
سنيه، بفرحه: الف مبروك ياأيه ربي ينوضك أنتي وياه على خير
سرور صفقت بحماس👏: هييييي وأخيرا بنلقي مع مني نلعب
فوزيه خبطتها بقوه على كتفها، وبغيض: ياهمي ياقهرتي ندادك عندهم صغار وأنتي قاعده تبي تلع….. وسكتت لما سمعت الباب إنفتح
تلفتو الكل بفرحه لمحمد اللي خش فرحان حتى هوا وسكر الباب
محمد، بإبتسامه😊: السلام عليكم، شني فيه خيركم واقفين كلكم قدام الحمام( أكرمكم الله )
فوزيه، بإبتسامه😊: شوف مرتك عندها مفاجأه ليك، وتحولت الأنظار اللي كانت على محمد وحتى هوا معاهم لأيه اللي نزلت رأسها بخجل ☺
محمد، بفرحه: شكله كاثره المفاجأت اليوم حتى أني عندي مفاجأه
سنيه: ماشاءالله باهي هيا من اللي بيتكلم الأول
أيه ومحمد في نفس الوقت: هيا ، هوا
محمد، ضحك😁: باهي خلاص أني الأول، قدم وشد أيه من إيدها وجبدها معاه لين وقفو قدام الباب، وأبتسم: أفتحي الباب هيا
أيه شافتله بإستغراب🤔 وقدمت وفتحت الباب وإنفتحو عيونها بصدمه😲 لما شافت اللي واقفين قدامه، جرت بسرعه وأرتمت في حضن أمها ومنه لحضن بوه وبعده لخواتها اللي كانت راح تطلع من بينهم عروس وكانو ناويين يزفوها لعريسها على ” أختي حبيبتي ” بس شاء القدر أنها تطلع من بينهم مكسوره ومذلوله وتنحرم من شوفتهم قريب السنه، بعد التسليم والأحضان اللي مليانه شوق ولهفه، خشو الكل وفوزية فرحتها كانت مضاعفه بحمل أيه وزيارة أختها
أيه اللي كانت فرحانه بشوفت أهلها اللي معاش شافتهم من لما طلعت منهم باأبشع طريقه، تشوفلهم بفرحه وهيا مش مصدقه أنهم معاها وهيا بينهم، وحتى محمد كان فرحان وهوا يشوف في ضحكتها معبيه وجهها وأنه قدر يفرحها بهالشي اللي داره
فوزيه، بضحكه😁: أني والله معاذ نقدر نصبر راهو، وشافت لأيه وغمزتلها😉، قريب ياحنان بتولي حنينه وتي روحك عاد
محمد، بإبتسامه😊: ماشاء الله ياخالتي والله قاعده صغيره على كلمة حني…… وسكت وكأنه هذا وين إستوعب الكلام اللي سمعه، شاف لأمه بإستغراب🤔: شني قصدك ياأمي!!
فوزيه، بإبتسامه😊: أني وخالتك بنولو حنينات وأيه أم وأنت بابا
محمد توسعو عيونه بصدمه😲 وهوا قاعد مش مستوعب اللي سمعه، يشوف لخالته وبناويتها وراجلها اللي قاعدين يباركو لأيه ويحضنو فيه وهوا مش عارف كيف يوصل الإحساس اللي حاس بيه في هاللحظه، ناض بسرعه جبد أيه من بينهم وطلع وهوا يجبد فيها وراه
أيه، بتوتر: بالشويه يامحمد خيرك تجبد فيا شني فيه!!
محمد أشرلها تسكت وبس🤫 وراجع جبدها معاه وركبو لشقتهم، اللي أول مافتح بابها خش وجبد أيه في حضنه وقعد يبكي زي العيل😭
أيه، بخوف😟: محمد خيرك شني فيه!! معقوله مش فرحان بحملي
محمد بعد شويه وتكا رأسه على رأسها وقاعدين دموعه ينزلو😢: أنتي أكيد هبلتي كيف مش فرحان أنه بيكون عندي ولد أو بنت منك، كيف مش فرحان وأني بعد شهور راح نشد بين إيديا قطعه من روحي وروحك، كيف مش فرحان وأني من يوم ماأقتنعت بزواجنا وعرفت أنه قلبي بدي يميلك وأني نفكر في هالشي، كنت نفكر في سعادتي لما تكون عندي عيله حلوه منك، وأنتي اليوم خليتيني أسعد واحد في الدنيا، حط إيديه على بطنها وهوا يتحسس فيها بحنان، وبرجاء🥺: بجد فيه قطعه مني ومنك قاعده تكبر إهنايا
أيه مسحت دموعها اللي غلبوها وهيا تشوف لدموع محمد اللي ماقدرش يشدهم من الفرحه، هزت رأسها بالإيجاب وماحستش بروحها إلا وهيا طايره في الهواء ومحمد يلف بيها بفرحه، نزلها بعد كم لفه وأبتسم بفرحه: وعد على هالخبر نرفعك عمره لبيت الله أول ماتجيبي وتنوضي بالسلامه ياروحي
والحضن المره هذي كان من أيه اللي حضنت محمد وهيا فرحانه بهالوعد هلبا، وأنه في كل يوم يمر محمد قاعد يثبتلها أنه الراجل الأنسب ليها، وكل ماله الوقت يأكدلها أنه زواجها منه حتى لو كان بطريقة مش حلوه ولا لائقه أبدا بس بالرغم من هذا كله كان العوض الأجمل من الله اللي نور وزين بيه حياتها
” إن عوض الله إذا أحل أنساك كل مافقدت “🤍
^^^^^^^^^^^^^^^^^^^^^^^^^^^^^^^
في حوش سعاد
دنيا بعد ماعشت عمتها وعطتها دواها ودخلتها لدارها، طلعت حطت لمصطفي العشي في الصاله
مصطفي، بإبتسامه😊: صحيتي يابنتي سامحينا على تعبك
دنيا: أي تعب ياعمي باللهي معاذ تقولي هالكلام بالعكس والله على قلبي زي العسل أصلا ماصدقت أنكم روحتو والله بشوفتكم قدامي نحس وكأنه بوي وأمي قاعدين حيين
مصطفي: ربي يرحمهم ويغفرلهم، ربي يحفظك ويبارك فيك إن شاءالله، ربي وحده العالم معزتك عندنا كيف
دنيا، بإبتسامه😊: ربي يطول في عمركم إن شاء الله، هيا نستأذنك ياعمي أني بنروح
مصطفي: قاعده ماتبيش تقعدي معانا زي قبل!!
دنيا، بتوتر: هكي أفضل وأنسب للكل ياعمي
مصطفي: ديري اللي يريحك يابنتي
دنيا هزت رأسها وأبتسمت: تصبح على خير، وطلعت وقعدت واقفه قدام الباب وهيا تشوف في سيارة حسام خاشه من البوابه، تلفتت وراها ومشت جيهته
حسام درس ونزل بسرعه لما شافها جايه جيهتها، وأبتسم أول ماوصل فيها: أهلين يادنيتي، وين طالعه بروحك؟؟
دنيا أهلا الحمد لله على السلامة، كنت مروحه ولما شفتك خاش قلت نطمن عليك قبل
حسام، بضيق: قاعده مسكره رأسك على هالموضوع، ماتبيش ترجعي لمكانك، أهو حاتم اللي كنتي متحججه بيه سافر اليوم، يرضيك عمتك تقعد بروحها وهيا مريضه هكي
دنيا نزلت رأسها بأسف😞: باللهي ياحسام ماتحاولش تستعطفني بوضع عمتي، أني ماروحتش لين أطمنت عليها وعشيتها وخليتها بترقد وكل يوم راح نكون معاها من الصبح لليل بس وقت النوم خليني في حوش عمي صدقني هالوضع أفضل وأريح للكل والله، وحتى أقل مشاكل ومنه الناس ماتلقاش باش تدوي بينا
حسام، بضيق: من أمتي وأحني همنا الناس وكلامها!!، مش عارف ليش حاس أنك تتبعدي عليا وماتبيش تكوني معاي في نفس المكان

 

 

 

 

دنيا تنهدت بضيق: مش عارفه كيف بنفهمك ياحسام، بس حتى من ناحية الدين الصح نقعد مع عمي مش مع راجل عمتي، لا عمي مصطفي ولا حتى أنت محرم ليا يعني وجودي ومبيتي معاكم غلط وحرام حتي
حسام ضيق عيونه بصدمه😯: خايفه مني أني وبوي نضروك يادنيا هذا تفكيرك فينا!!
دنيا، بسرعه: لا مش هكي قصدي ياحسام أنت فهمتني غلط، أن…… وسكتت لما قطع عليها
حسام، بغضب😠: خلاص معاش نبي نسمع شي، بري قدامي نوصلك لحوش عمك المحرم ياأنسه دنيا
دنيا، بأسف😞: باللهي ياحسام ماديرش هكي خل…..
حسام، بعياط: قتلك خلاص أسكتي يادنيا وهيا بسرعه نوصلك وبنخش نرتاح تاعب ومش قادر واقف
دنيا نزلت رأسها بأسف😞 ومشت قدامه وكل شويه تتلفت بتتكلم بس هوا يصد فيها لين وصلو وأطمن أنها خشت للحوش، لف ورجع لحوشهم وبانت إبتسامته اللي كان يحاول أنه يداريها قدامها، عجباته فكرة أنها بدت تلتزم وتحافظ على نفسها من عيون غير المحارم ليها، رغم أنه بعدها عليه كان مش عاجبه، بس إلتزامها وتمسكها بالجانب الديني اللي باين أنها تحاول تنميه في داخلها أكثر وأكثر، والتغيير الجدري اللي لاحظه عليها في تفكيرها وتصرفاتها الأيام اللي فاتو كان مفرحه ومخليه مطمن عليها أكثر، ومافيش بأس من أنه يصبر باش ينول اللي في باله
” وأني أطلبكِ من الله في كل صلاة.. ربي لاتحرمني من أتمني دوما وجودها في قربي❤🤍 ”
^^^^^^^^^^^^^^^^^^^^^^^^^^^^^^^
في حوش مفتاح اللي خش من برا قابلاته سالمه مقعمزه في الصاله وتبكي بالعبره
مفتاح، بضيق: ياسرك يامرأه من البكي ماجفوش دموعك
سالمه، بدموع😢: الله غالب مكتوب أنه دموعي ينزلو بكثره باقي هالعمر اللي مازالي، ماتشوفش في الحوش كيف ولا موحش ومجوب علينا، عبير وعادل مخليين مكانهم فاضي في الحوش شني مازال يعبيه
مفتاح، بحزن😔: وحدي الله يامرأه، وبعدين هذا اللي كاتبه ربك لا إعتراض على حكمه، الحمدلله على كل حال
سالمه مسحت دموعها وتنهدت بحزن: لا إله إلا الله، والنعم بالله، خايفه حتى هالبنت إضيع من إيدينا زي ماضاعو خوتها وهيا كل يوم حالتها أسوء
مفتاح مسح على وجهه بضيق: سألت على شيخ كويس الكل يشكرو فيه وخذيت موعد غذوه الظهر نرفعوها بإذن الله، وإن شاءالله تتحسن على إيديه
سالمه: إن شاءالله يارب
ثاني يوم رفعو علا اللي كانت واضحه عليها علامات الإكتئاب والمفروض تنعرض على دكتور نفسي مش شيخ متشدد وملتزم بإسم الدين ظاهريا وهوا من داخل شيطان متخفي على هيئة إنسان، أستمر هالشيء قرابة الشهر وهما كل مايرفعوها بعد مايتم جلسة العلاج زي مكان مفهمهم يقوللهم لازم تستمر معاه ويردوها بعد غدوه، قعدو يرفعو فيها يوم بعد يوم وكل مايرفعوها يروحو بيها أسوء من قبل ديمه تبكي وتعيط وتترجا فيهم معاش تبي تمشي، بس مفتاح وسالمه كانو مصريين على هالشي ظننا منهم أنه عياطها ورفضها هذا لأنه في شي داخلها مانعها من العلاج بالقرآن، مافكروش أبدا أنهم لما كانو يحطو فيها عند الشيخ ويطلعو بناءا على طلبه بأنه كان يستغل فيها باأبشع الطرق النفسيه والجسديه مما زاد أزم حالتها أكثر وأكثر
للأسف اللي صار مع علا صار مع هلبا غيرها، والجهل اللي عند بعض الأباء والأمهات سامحهم الله كان أحدى الأسباب في ضياع معظم الأبناء بهالطريقه النجسه
^^^^^^^^^^^^^^^^^^^^^^^^^^^^^^^
اليوم موعد إفتتاح المعمل اللي كان كل شي فيه من أحسن مايكون، وحسام ماقصرش في ولا شي كان مرتبه ومدوكره بطريقه حلوه ومميزه، الكل كانو موجودين، حتى بشير وفاطمه وسامر وسامح اللي الكل أصرو عليهم أنهم يطلعو ويغيرو جوهم شويه وياسرهم من الحزن والنكد اللي دفنو فيه روحهم من بعد وفاة سعد
ومفتاح وولاده وكناينه كانو من الموجودين حتى هما، إلا سالمه اللي قعدت مع علا وماقدرتش تخليها بروحها لأنها حالتها النفسيه تاعبه وديمه وهيا تعيط وتبكي
مؤيد وناجيه وإنتصار وخوله اللي كانو من ضمن المشاركين في الإنتاج
المبروك وفوزية وسنيه وسرور ومحمد وأيه ومصطفي وسعاد اللي كل واحد فيهم كان ليه دور في هالمشروع
كان فيه حشد كبير من المعازيم والحضور اللي كانو من ضمنهم أشخاص من الحرس البلدي وأشخاص من مراقبة الأغذيه ومن اللجنه الصحيه وعدد من المصورين اللي وثقو لحظة إفتتاح * معمل دُنيانا للحلو والحار* اللي أفتتحاته دنيا وعمتها، وكل اللي حضر أعجب وأثني على مؤسسين هالمكان لأنه كان جد راقي ومميز ومزود باأحدث الألات والماكينات الكهربائيه، والترتيب فيه كان من أحلي مايكون والحلو والحار اللي فيه كان واضح من طعمتهم أنه مخدومين بحب وإتقان
كان المكان مقسم لجهتين جهة للحلو والشكلاطه وجهة للحار، وكان مكان العرض الأمامي مقسوم بحاجز عن المعمل اللي كان في الجهه الخلفيه، طبعا بالرغم من أنه نشاط المعمل كان عائلي إلا أنه كان لازم أنهم يستعينو بأشخاص عندهم خبره في هذا المجال وبالأخص في المعمل الداخلي، وكانو موجودين مجموعه من العاملات للبيع في الجهه الأماميه، حسام كان حريص كل الحرص أنه الكادر كله يكون نسائي باش الكل يقدرو يأخذو راحتهم في الخدمه أكثر
حسام قرب بالتليفون اللي في إيديه من دنيا اللي كان يشوف فيها واقفه هيا ومجموعه من الحضور اللي أستاذنو ومشو أول ماهوا قرب، وأبتسم😊: وهذي دنيانا، ووجه التليفون اللي كان فيه إتصال فيديو من حاتم وسندس لدنيا اللي كانت الفرحه معبيه وجهها، ومدهولها ومشي لما أشرله واحد من الحظور

 

 

 

 

حاتم، بفرحه: مبروك مبروك والله ماتوقعته يطلع منكم هذا كله، ربي يفتحها عليكم أكثر وأكثر
سندس: ألف مبروك يادنيا ربي يباركلكم فيه إن شاء الله ويكون فاتحة خير عليكم، صوت الباب أكيده الصغار روحو، ومشت وهيا تأشر لدنيا بإيدها
دنيا، بإبتسامه😊: الله إيبارك فيكم يارب تسلمولي، وتلفتت لإنتصار اللي جايه تجري جيهتها وماأنتبهتش للتليفون اللي في إيدها
إنتصار، بسرعه: تعالي بسرعه يادنيا شوفي معاش لحقنا على تسجيل الطلبات تقول الناس كلها مفجوعه على بطونها وماصدقو لقو مكان يأكلو منه
حاتم، بضحكه😂: علاش مني اللي مايفكرش في بطنه الوقت هذا، البطن قبل الوطن ولاتحسابي الناس كلها زيك ماتأكلش لين تولي جلد على عظم زيك
إنتصار تلفتت بإستغراب🤔 للصوت اللي تقريبآ أول مره تسمعه، وفي هاللحظه بس أنتبهت أنه دنيا تكلم في حد فيديو، بشهقه😱: هيييييي يعطيك الهني يادنيا مني هذا اللي تكلمي فيه توا نوريك حسابك عند حسام بعدين، ومشت بعد ماشافت بحده لحاتم اللي كان ميت بالضحك من طريقة كلامها وحركات إيديها اللي كانت تلاشي بيهم
دنيا، بإبتسامه😊: معليشي ياحاتم هذي إنتصار بنت خالتي هذا طبعها وهيا ماتعرفكش أصلا
حاتم، بإبتسامه: لا عادي أصلا جو عليها شكلها، زعما فاضيه ولا معبيه!! وحك رأسه بتوتر
دنيا ضحكت لما فهمت قصده: لا فاضيه 😁
حاتم، بضحكه😅: خلاص نقولو على بركة الله إمالا
حسام من وراء دنيا، بإستغراب🤔: شني هوا اللي على بركة الله
حاتم، برفعة حاجب🤨: أنت من وين طلعت وبعدين حاجه بيني وبين دنيانا خليك بعيد أنت
حسام، بنص عين😒: صار نقعد بعيد باهي ياسي حاتم توا نشوفو مني اللي يقعد بعيد، وجبد التليفون من دنيا وسكر المكالمه والنت بكل وحطه في جيبه وأبتسم لدنيا اللي تشوفله بضيق على حركته اللي داره، وبغمزه😉: ماقلتيش رأيك في ذوقي اللي الكل عجبهم تصدقي يحسابوني مهندس ديكور الكل يسألو فيا
دنيا، بإبتسامه😊: شكرا ياحسام على كل شي درته وقاعد إدير فيه على خاطري، مافيش كلام يقدر يوصف شكري وإمتناني ليك على الشي اللي قاعد
إدير فيه وعلى وقفتك معاي
حسام، بغمزه😉: عطيني شنطة إمبارح وأني مسامحك على تعبي كله
دنيا، بإبتسامه😊: مش خساره فيك والله وحتى أنها شويه عليك أصلا
حسام، بحب❤: أنتي هبله ولا تستهبلي عليا متوقعه أني نستني في شكر ولا جزاء لأني درت شي أنتي تبيه ويفرحك، عارفه إبتسامتك هذي تنسيني كل التعب اللي تعبته ولمعة الفرحه هذي اللي في عيونك تخليني مستعد إندير أي شي ونهون الصعب على خاطر نشوفها دوم، أنتي فرحتي اللي مستعد نسعي طول عمري باش نشوف ضحكة عيونها الحلوه هذي
دنيا، بفرحه: أنت حظي الحلو من هالدنيا😍
حسام، بحب❤: ياويل قلبي من كلامك لما تكوني فرحانه ورايقه تبهدلي فيه مسكين
دنيا ضحكت بخفه وقبل ماتتكلم تلفتو الإثنين لا مش هما بس وكل الموجودين شد إنتباهم صوت المبروك
المبروك اللي كان يتكلم بالتليفون، شهق بصوت عالي: هييييي لطفك يارب لطفك

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)