رواية والقاسية قلوبهم الفصل الخامس 5 بقلم نهاد خالد

رواية والقاسية قلوبهم الفصل الخامس 5 بقلم نهاد خالد

رواية والقاسية قلوبهم البارت الخامس

رواية والقاسية قلوبهم الجزء الخامس

رواية والقاسية قلوبهم الحلقة الخامسة

ورد
انتظرته لحد ما جه وأنا مقرره إني مش هنهي المناقشه غير بالطلاق، مهما كان اللي هعمله، سمعت صوت الباب بيتقفل، عرفت أنه رجع، دخل ورمي المفتاح علي الطربيذه وقال بسخريه:
_غريبه! قاعده النهاردة يعني! مش عامله نفسك نايمه زي كل يوم لي! عشان تهربي مني.
_قال يعني أنت بتسبني في حالي أوي، اقعد يا مصطفي احنا لازم نتكلم.
قعد ع الكرسي وقال بملل:
_ارغي.
تغاضيت عن طريقته وقلت:
_ مصطفى انت عاجبك وضعنا كده!؟
_وماله وضعنا عادي!
بصيتله بذهول ورديت :
_عادي! هو اي العادي!؟ القرف اللي احنا فيه كل يوم عادي! اننا علي طول بنتخانق وعلي طول ضرب ونكد وغم عادي!، انك تيجي آخر اليوم تغصبني إني أبقى معاك بدل ما ابقي معاك برضيا عادي!، ده احنا مش طايقين بعض، وانت شمت فيا في موت ابويا بدل ما تقف جنبي.
_كل ده بالنسبة لي عادي، يعني انا مش الراجل اللي هقلب علي ست واقعد اولول علي اللي بيحصل في حياتنا ولا اتحسر عليه، الوضع اتحسن عادي وأعتقد انك انتي الي هتكوني كسبانه، متحسنش اعملك اي يعني انا مستعد نفضل عايشين كده ولا هيهز مني شعره.

كنت بحاول انهي الموضوع بطريقه كويسه عشان ميعندش معايا، بس الواضح انه مش هينفع ده معاه، وكلامه عصبني جداً، وقفت وانا بزعق وبعلو صوتي:
_ااه عادي، عشان انت مش راجل أصلا، عرفت لي، عشان كده مش فارقة معاك، أصلا انت من الاول مش راجل، انك تمد ايدك علي واحده ست، و متبقاش جنبها في أي حاجه ولا تبقي سند لها، انك تقبل علي نفسك تكون معاها وهي مش طايقاك ولا طايقه نفسك، انك تبقي عاوزها تحمل منك حتي لو غصب، ومش فارق معاك وعادي، يبقي فين الرجولة دي قولي كده.
وقف قدامي بعصبيه وكالعاده، رده المعتاد ضربني بالقلم، وهو بيشدني من شعري وبيزعق :
_بقي انا مش راجل يابنت ال****.
– اخرص متجيبش سيرة ابويا علي لسانك ال**ده، ابويا الله يرحمه طول عمره راجل بجد، ودي غلطتي اني قبلت بواحد زيك رسم علينا الوش البرئ وخلانا نصدق انه انسان محترم، بس مطلعش عندك ذره احترام لنفسك حتي، طلقني واثبت ولو لمرة واحدة انك عندك كرامه.
_مش انا اللي هموت عليكي اوي، غوري في داهيه وشوفي هتعيشي ازاي ولا منين، أنتي طالق.
يااه علي الراحه اللي حسيت بيها، اخيرا، بعدت ايده عني ووقفت قدامه وقلت :
_ بالتلاته يا… ياراجل.
كنت قاصده اني استنذفه عشان ميرجعش في قراره.
_طالق… طالق.. بالتلاته اهو غوري بقي من وشي ومشوفش خلقتك هنا تاني.
شدني من دراعي وخرجني بره باب الشقه وقفله في وشي، خبط علي الباب وانا بصرخ فيه:
_هات شنطه هدومي هنزل كده ازاي.
_ملكيش حاجه عندي.
سمعتها منه ببرود وهو بيبعد عن الباب.
_____________________(بقلمي ناهد خالد)
نزلت لأمه وخبط علي الباب وملامحي جامده مبتدلش ابدا علي اللي حصل معايا من شويه..
_ورد.. اي اللي منزلك كده!
قالتها وهي بتبصلي باستغراب وانا لابسه عبايه بس بيتي وضيقه لحد ما وبشعري…
_ابنك طلقني…
شهقت بفزع وهي بتقول :
_يالهوي طلقك ازاي اي اللي حصل! تعالي تعالي ادخلي.
شدتني ودخلتني وهي بتقفل الباب وكملت :
_مصطفي غبي واكيد طلقك وقت عصبيه ابني متهور وانا عارفاه اهدي بس وانا هطلع اطين عيشته…
_مفيش داعي يا طنط، انا اللي طلبت الطلاق بمزاجي..
بصتلي باستغراب اكتر وقالت :
_لي يابنتي؟
بصتلها بصمت شويه وبعدين قلتلها بمغذي:
_سيبي حد غيرك يسأل السؤال ده، مش انتي قولتيله هييجي يوم وهتنفجر وتطفش منك، وهو مصدقكيش وقتها بس اهو اليوم ده جه.
ظهر عليها التفاجئ من اني عرفت اللي قالتهوله، وبعدها اتنهدت بحزن وعنيها فيها دموع :
_حقك عليا يابنتي… حقك عليا، انا عارفه ان ابني صعب وانك استحملتي معاه كتير، ياما كلمته وقلتله يلين طبعه شويه بس هو مبيسمعش لحد ومش شايف نفسه غلطان، طب… يعني… اقصد….
كان كلامها ملغبط وباين عليها التوتر من اللي عاوزه تقوله :

_قولي يا طنط عاوزه تقولي اي!؟
_يعني مينفعش تدي لحياتكم فرصه كمان.. وانا والله انا وابوه هنعلمه الأدب… اقولك روحي اقعدي في بيتكوا شهر اتنين لحد ما تهدي ويكون هو عرف قيمتك واحنا هن……
قاطعتها وانا بهز رأسي.بنفي :
_لا، مش هينفع، مصطفي رصيده عندي بقي تحت الصفر، انا مبقتش طايقاه فعلا ولا هقبل اعيش معاه انا ما صدقت اتحررت من سجنه..سامحيني بس مش هقدر…
مسحت دموعها بهدوء وقالت بحزن :
_مسامحكي يابنتي… معاكي حق..
_طيب ممكن عبايه وطرحه من عند حضرتك عشان امشي.
_هو نزلك كده؟
_طردني قصدك ومرضيش حتي يخليني البس حاجه مش قلتلك سحب رصيده من عندي..
الغصب ظهر علي ملامحها وهي بتقول:
_الله يسامحك يامصطفي علي اللي بتعمله فينا، استني هنا انا هطلع اجيبلك لبسك.
_بلاش ياطنط عشان ميحصلش مشاكل.
ردت بعصبيه:
_مشاكل اي لي هو اتهبل هيقف قدام امه طب والله اكون منصله شبشبي عليه… استني هنا قولتلك…
قالتها وطلعت وانا قعدت علي الكرسي بارهاق مستنياها تنزل..
___________________ (بقلمي ناهد خالد)
_انت اتجننت طب طلقتها ومش هقولك حاجه لانها هي اللي طلبت لكن تنزلها بهدومها دي وشعرها ومتديهاش حاجتها لي أن شاء الله الدم انعدم من عندك…
_يوووه، انتي عاوزه اي دلوقتي ياماما..
_هدخل الم هدومها وهتاخدها يامصطفي ولو طلبت حاجه تانيه هتاخدها وعفشها يومين وتوصلهولها انت سامع..
_عفش اي! هي اللي طالبه الطلاق يعني ملهاش حاجه.
_انت اي جبروت! مهو من عمايلك السودا وقسوتك حقها تولع فيك مش تطلب الطلاق بس…
_انتي امي ولا امها؟
_للاسف امك… انا هدخل الم حاجتها وابقي اسمعلك نفس..
مسك ايدها يوقفها وهو بيقول بنفس عصبيته:
_قلت ملهاش حاجه هنا ومش هتاخد حاجه وهدومها دي هولعلها فيها..
لفت له وبكل قوتها نزلت بكفها علي وشه وصرخت فيه:
_انت بتقف قصادي وبتمسك ايدي انت شكلك اتجننت تعالي اضربني يلا زي ماكنت بتضربها مانا مش مخلفه راجل انا مخلفه عربجي… اقسم بالله كلمه كمان منك وهرفع شبشبي وانزل بيه علي راسك اوعي تكون فاكر كبرت عليا..
بصلها بغضب جحيمي وعصبيه بس مقدرش يعمل حاجه فسابها ودخل اوضة الضيوف وهو بيرزع الباب بعصبيه
____________(بقلمي ناهد خالد)
ورد*

كنت سامعه صوت زعيق جاي من شقتي وعرفت انهم اتخانقوا مع بعض شويه ونزلت ومعاها شنطة هدومي..
_انا اسفه لو حصل مشكله بينكوا بسببي..
ردت عليا بدموع:
_مش بسببك…انا شكلي فشلت في تربيته ودلعته زياده عن اللزوم بس انا هعرف اتعامل معاه ازاي من هنا ورايح…
سابتني ودخلت اوضتها ثواني وطلعت وهي بتمديلي ايدها بفلوس :
_ امسكي ياورد دول ٢٠٠٠ جنيه خليهم معاكي عشان تعرفي تمشي حياتك لحد ماربنا ييسرها من عنده والله يابنتي لو معايا اكتر كنت اديتك، بس خلي دول معاكي وانا هعدي عليكي من وقت للتاني..
_لا ياطنط شكرا انا هشتغل واصرف علي نفسي و….
_ولحد ما تلاقي شغل هتاكلي وتشربي منين..
سكت ومعرفتش اقولها اي..
_امسكي بقي متتعبيش قلبي…
خدتهم باحراج وقلتلها:
_شكرا وانا اول ما اشتغل هردهم لحضرتك..
_مش هرد عليكي عشان انا مفيش فيا حيل ازعق… يلا تعالي أوصلك ومش عاوزه اسمع اعتراض يلا…
______________(بقلمي ناهد خالد)
روحت بيت ابويا خليت جاري كسر الباب ودخلت لاني طبعا ملحقتش اجيب المفتاح ونسيت اقول لطنط عليه ، وبعدها جبت نجار صلحه وغير الكالون، قررت أبدا من جديد من الأول خالص، هرجع اشتغل، واعيش حياتي ليا أنا وبس والشكل اللي يليق بيا ك إنسانه، مش ك حيوانه زي ما هو كان بيعاملني، (النهاردة أنا بتولد من جديد.)
#ولسه_للحكايه_بقيه
#والقاسية_قلوبهم
#حكاية_مصطفي_وورد
#ناهد_خالد
انتبهوا معايا لو سمحتوا الكلام ده مهم جداً…
الحكايه لسه منتهتش ولسه عوض ورد مجاش.. ناقص ٣ مشاهد في الحكايه دي بس مش هقدر انزلهم دلوقتي.. تعالوا اشرحلكم لي..

(والقاسيه قلوبهم) عباره عن ٣ قصص.. كان البارت بيجيب مشهد من كل قصه والخاتمه بتوصل ابطال ال٣ حكايات ببعض عشان كده مش هقدر انزلها دلوقتي…. لما جيت انزلها هنا قررت افصلهم عن بعض عشان اعرف رد فعلكم عن كل حكايه وتفاعلكم معاها… فهنعمل اي.. هنبدا الحكايه الجديده وهي حكاية ( كريم ونور)، وبعدها هنبدأ الحكايه التالته وبعد التالته هنزل الختام ل ال٣ قصص….. انا للاسف الروايه دي بقالها سنه مكتوبه واضطريت حاليا اعدل فيها وازود فيها مشاهد عشان تبقي القصه بارت لكن الخاتمه مش هعرف اعمل فيها حاجه….
اتمني تنتظروا المشهد الختامي ♥️واتمني تتابعوا الحكايه الجديده ( كريم ونور هتعجبكم اوي انا متأكده) ❤️دمتم بخير….. عاوزه كالعاده رأيكم في الحكايه دي وشايفين النهايه كويسه ولا لا ❤️

• لقراءة الرواية كاملة اضغط على : (رواية والقاسية قلوبهم)