رواية بائعة الورد الفصل الخامس 5 بقلم أسماء ابراهيم

بمطار قنا تعلن خطوط رحله الطيران عن وصول الطائره القادمه من القاهره هبطت الطائره ونزل يوسف الشناوي بطله رائعه تخطف الانظار فهو ذات هيبه عاليه وكان في انتظاره أخيه وابن عمه بالسياره خارج المطار.

معتصم: يوسف احنا هنا تعالي يابرنس حمدالله علي السلامه واحشني جدا.

يوسف يشاور له بيديه واول ما يصل إليه ينزل معتصم ومعه سالم ويتبادلون السلام.

سالم: حمدالله علي السلامه ياكبير واحشتنا ياجو ايه ياعم مش عاوز تيجي ولا الجو عجبك في القاهره.

يوسف: الله يسلمك ياسالم وانت كمان وواحشني هزارك والقعده معاك واكيد طبعا جو القاهره احلي وعجبني.

معتصم: اوباااا ياجو طيب اخبار القاهره ايه حلوه كده ولا 

يوسف: تعرفوا حاجه انتوا لو مش اخويا وابن عمي كنت رحبت بيكم في القسم وعملت معاكم الواجب.

سالم وهو يجري يركب السياره لا وعلي ايه الطيب احسن نورت البلد ياباشا مصر.

يضحك يوسف ومعتصم عليه ثم يصعدون السياره وينطلقوا بها الي قصر عائله الشناوي وبعد دقائق وصلوا الي البيت ونزل من السياره يوسف ومعه معتصم وسالم.

في الداخل كان يجمع الحج قاسم الشناوي باولاده وأهل البيت جميعا ينتظرون قدوم يوسف.

دخل يوسف وألقي عليهم السلام واقترب من جده وجدته وقبل رأسهم وبعدها قام باحتضان والده والدته وألقي السلام علي عمه وزوجته وابنته نغم ثم بعد ذلك احتضن زوجه عمه سالم والده ياسمين السيده مني فهو يعتبرها مثل والدته 

الحج قاسم: كيفك ياولدي اتوحشتك قوي .

يوسف: وحضرتك كمان ياجدي وكلكم وحشتوني جدا واطمن قاعد معاكم 48ساعه بحالهم.

لبني: يوسف يابني نفسي تقعد معانا اسبوع معانا مش كام ساعه وتسافر ياحبيبي بتقلقني عليك ما تقول حاجه ياطاهر .

طاهر: ابنك مش صغير علي كده ياأم يوسف ده راجل وشغلانته تشرف اي حد واطمني ولد بخير طول ما اني وانتي وجده وجدته راضين عنيه وبندعيله.

الحج قاسم كان يستمع إلي حوارهم بضيق فهو يريد أن يوسف يترك عمله في الشرطه ويشتغل مع والده.

الحجه حسيبه: طمني ياولدي علي ياسمين اتوحشتا قوي .

يوسف: ياسمين بخير ياجدتي وبتسلم عليكوا وبتقولكم هاتيجي يومين اخر الاسبوع الجاي بس ياريت ياسالم تسافر تجيبها عشان ماتبقاش لوحدها في الطريق.

سالم: حاضر يايوسف علم وينفذ ياباشا مصر.

يوسف: استأذنكم اطلع اخد دش دافي واغير هدومي وحياتك ياماما عايز اكل فطير مشلتت ومعاها عسل وقشطه .

إلهام: عيوني ياولدي انا عملت فطير مشلتت النهارده تاكل صوابعك وراه.

يوسف: تسلمي ياعمتي اكيد احلي فطير وصحيح يانغم ياسمين بعتالك معايا الكتب اللي طلبتيها.

##########################

في القاهره بفيلا مراد المرشدي كانت شدوي جالسه بغرفتها تتصفح بعض صفحات التواصل الاجتماعي فأخذها الفضول بالبحث عن الاكونت الخاص بدكتور سراج وبالفعل وجدت صفحته الشخصية وقالت لنفسها…

اخيرا لاقيتك لما ادخل بقي اتفرج علي الصفحه وأحاول اعرف معلومات كتير عنه.

وفي اثناء التصفح في صفحته لفتت انتباهها صوره له في المصيف فقامت بحفظها وبعدها أغلقت اللاب وامسكت الهاتف وقامت بالاتصال بصديقتها ياسمين.

شدوي: سو حبيبتي عندي ليكي مفجأه مش هاتصدقي انا وصلت لإيه.

ياسمين: وصلتي لإيه يامجنونه اوعي يكون اللي في بالي.

شدوي: هههههه اه وصلت لصفحته الشخصيه واو ياسو عليه وعلي جماله ولا صورته في المصيف حاجه وهم.

ياسمين: يابنتي اعقلي مش كده انا حاسه عقبال ما نخلص الجامعه هاتكوني اتجننتي رسمي.

شدوي: انتي تعرفي لما طلعت عنده المكتب انا كنت متوتره جدا وقلبي كان واقع في رجلي وفرحت اوي لما قالي انتي من التيم معايا.

ياسمين: مش بقولك مجنونه يالا بقي روحي نامي ونتقابل بكره في الجامعه تصبحي علي خير ياقلبي.

شدوي: وانتي من أهله يابيبي بااااي.

وبعد انتهاء المحادثه التليفونية بينهم اتصلت ياسمين بالاتصال علي يوسف للاطمئنان عليه وفي خلال ثواني كان يجيب عليها يوسف.

يوسف: حبيبي وحشتيني اوي ياسو .

ياسمين: ياسلام عشان كده اتصلت اول ما وصلت مش انا قولتلك تكلمني .

يوسف: قلب يوسف زعلانه ماقدرش انا علي كده بس حبيبي غصب عني خرجت من المطار لاقيت جوز الغراب واقفين .

ياسمين: اكيد معتصم وسالم صح حرام عليك يوسف ماتقولش عليهم كده.

يوسف: عيوني ليكي ياقمر صحيح كلهم هنا بيسلموا عليكي وعرفتهم انك جايه اخر الاسبوع الجاي وكمان قولت لسالم ينزل يجيبك من القاهره عشان ابقي مطمن عليكي.

ياسمين: حبيبي ياجو ربنا يخليك لقلبي .

يدخل معتصم وسالم علي يوسف الغرفه ويقول سالم…هاااا ياجو وصلت بالسلامه 

معتصم وهو يقلد ياسمين: كنت قلقانه عليك اوي ياجو .

يوسف يقوم برمي المخده عليهم وفي الناحيه الأخري تضحك ياسمين عليهم وتقول ليوسف سلام ياجو وابقي طمني عليهم اخدوا كام غرزه.

يوسف: سلام ياقلبي بقي انت وهو بتعملوا عليه حفله والله لعلقكم النهارده وخرج معتصم وسالم يركضون وخلفهم يوسف.

*********************”**************”*

في صباح اليوم التالي تشرق الشمس بنورها الساطع علي جميع ابطالنا 

في قنا كان يوسف استيقظ مبكرا وخرج اصطحب الخيل وركض به فهي عادته عندما يكون متواجد في قنا وبعد نصف ساعه رجع الي القصر وصعد غرفته وأخذ حمامه الدافئ ونزل ليتناول الفطار مع عائلته.

في مكان آخر القاهره كانت روضه تطرق باب الغرفه علي ياسمين لكي تستيقظ وتذهب الي جامعتها.

روضه وهي تفتح الشباك قومي ياسمين هاتتأخري كده علي الجامعه انا من بدري بصحي فيكي.

ياسمين: معلش ياروضه سهرت جامد بالليل وماسمعتش صوت المنبه هي الساعه كام.

روضه : ساعه قربت علي تسعه يالا بقي عشان نلحق محاضره الساعه 11.

ياسمين: ياخبر انا اتأخرت اوي في النوم ماتقلقيش نص ساعه وأكون جاهزه.

في فيلا مراد المرشدي كان فادي يجلس علي السفره يتناول الفطار ونزلت شدوي أخته وجلست معه 

شدوي: صباح الخير يافادي .

فادي: صباح الخير ياشدوي يالا افطري بسرعه عشان تلحقي المحاضره الأولي.

شدوي: عندك حق احسن الدكتور رخم اوي ومصر يحرجني كل شويه ماتوصيه شويه ده حتي انا زي اختك.

فادي: شدوي انتي عارفه رأيي في الموضوع ده مش عايز حد في جامعه يقول عشان أخته متحيز لها.

شدوي: اوكي يادكتور يالا شاو.

******”***””*****”””*****”””*****””*****

الحج قاسم: يوسف ياولدي خلص فطورك وحصلني علي المكتب عايزك .

يوسف: حاضر يا جدي انا قايم مع حضرتك الحمدلله فطرت.

محمود: في حاجه يابوي .

الحج قاسم: خير ياولدي تعالي انت وولدك وانت ياطاهر تعالي ومعتصم كماني.

كان توتر ظاهر علي الجميع وبدأ كل فرد ينظر إلي الآخر باستعجاب وفي ثواني كان الحج قاسم دخل مكتبه وخلفه أولاده وأحفاده.

الحج قاسم: اني خابر كل واحد فيكم بيقول في عقل باله اني عايزه ليه انا هقول كلمتين ولازمن تعملوا بيهم.

يوسف: خير ياجدي حضرتك طلبت مني اول واحد اجي لحضرتك.

الحج قاسم: خير ياولدي انا خابر زين انك رافض تشتغل مع ابوك وعمك انت حر ياولدي ومش هاجبرك تهمل شغلك اني عايزك ترتب حالك في اجازه السنه دي تعقد علي بت عمك ياسمين وانت ياطاهر اعمل حسابك علي أكده هي كلها السنه الجايه وبت اخوك تخلص الجامعه .

طاهر: حاضر يابوي اللي تأمر بيه نافذ مبروك يايوسف ياولدي.

الحج قاسم: وانت يامحمود اعمل حسابك ومعاك سالم ومعتصم مسؤولين قدامي علي كل كبيره وصغيره في الشركه والمخازن وطاهر مسئول عن المزرعه والديوان.

محمود بفرحه: ربنا يباركلك يابوي كلامك زين واني من دلوقك جاهز.

سالم: ياجدي بستأذنك اكون مع عمي طاهر في المزرعه وكفايه معتصم مع ابوي في الشركه ولو احتاجوا حاجه مني في اي وقت هاكون موجود لكن عايز ابقي مستقر في المزرعه.

الحج قاسم: بخاطرك ياولدي انت ومعتصم واحد وكلكم اخوات ومصلحتكم واحده وانت ياطاهر اول ما تقبض فلوس محصول الدره اعمل حساباتك وتقسم الفلوس بنص بين ياسمين ونغم.

طاهر: اطمن يابوي وفتحت حساب في البنك لياسمين ولنغم .

محمود: انت بتقول ايه يابوي فلوس ايه اللي بين نغم وياسمين وحق ولدي وولد اخوي فين مش كلهم واحد عنديك.

الحج قاسم: كلمه واحده تاني يامحمود وهقول كلام مايلدش عليك ويفتح في القديم وانت خابر واني خابر.

سالم ومعتصم تبادلوا النظرات بينهم واستأذنوا وخرجوا لكن يوسف نظر إلي عمه محمود وبدأت الشكوك تتحول إلي حقيقه بأن محمود عمه له حكايه ووعد نفسه أن يعرف كل شئ

يتبع..