رواية بائعة الورد الفصل التاسع 9 بقلم أسماء ابراهيم

وصل يوسف الي مطروح ومعه فريقه للقيام بالمهمة وهي القبض علي اهم العناصر الارهابيه التي تهدد أمن البلاد.

يوسف: حمدالله على السلامه يارجاله احنا المفروض نرتاح ساعتين وبعدها نتحرك علي الحدود بس المهم نخلي بالنا كويس أنها عمليه مش سهله ولازم نقبض علي ابو براء.

مصطفى: تمام يافندم .

شخص1: هنتجمع بعد ساعتين يافندم هنا في الفندق.

شخص2: اكيد عشان نتحرك مع بعض ونوصل للمكان المحدد.

يوسف: لا طبعا احنا هانتحرك في مجموعتين اول مجموعه مسئول عنها ملازم مصطفي وتتحركوا مع بعض عن طريق زوديك في البحر اما المجموعه التانيه هاتكون معايا انا وهندخل الصحرا عن طريق جمال كأننا من العرب وطبعا هنتخفي في لبس العرب ومجموعه مصطفي هاتلبسوا لبس الصيادين مفهوم.

رددوا جميعا مفهوم يافندم وبدأ كل واحد الصعود الي الغرفه المخصصة لهم للاستراحه قبل إتمام المهمه….

؛؛؛؛؛؛؛؛؛؛؛:::::::::::::::::::::::::::::::::::::::::::::؛؛؛؛؛؛؛؛؛؛؛؛؛

بشركه المرشدي وفي قاعه الاجتماعات تم الاتفاق علي مشاركه شركه الالفي في اقامه أكبر منتجع سياحي بمرسي مطروح وطلب السيد مراد المرشدي من مدير أعماله الاتصال بفؤاد الألفي ليتفق معه علي موعد لإمضاء العقود وترتيب اللازم لإتمام مشروعهم ….

مراد:كده تمام كل الملفات الخاصه بفندق اسوان خلصت اتفضل يا محسن ده شيك يستحق الصرف خلال يومين تقدر تصرفه وتدفع باقي حساب المهندسين هناك.

محسن: تحت امرك مراد باشا وماتقلقش خلال الشهر الحالي هانكون جمعنا كل الفلوس اللي في السوق وكمان السيوله المطلوبه لأول دفعه من مشروع شركه الالفي موجوده في خزنه الشركه.

مراد: تمام كده اتفضلوا ياجماعه كل واحد علي مكتبه وعايز افضل التصاميم للمنتجع. 

خرج الجميع وتوجه مراد الي مكتبه من خلال باب داخلي يفصل بين قاعه الاجتماعات ومكتبه دخل مراد وتفاجأ بابنته شدوي ومعها فتاه 

مراد: شوشو الجميله عندي في الشركه ايه المفاجأة الحلوه دي.

شدوي: ميرسي بابي انا كنت جايه عشان الإعلان اللي نازل علي النت مش الشركه عايزين مهندسين تحت التمرين وكمان طلبه جامعه بكالوريوس.

مراد: طيب وانتي ايه دخلك في الاعلان ده وبعدين مكانك محفوظ اول ما تخلصي الجامعه مكتبك هيكون جاهز.

شدوي: لا يابابي انا عايزه اكون مع المهندسين اللي هاتبقي تحت التمرين وكمان ليه طلب عنك اعرف الاول دي روضه صاحبتي وكانت شافت الاعلان وعايزه تقدم فيه ولما قالتلي انا قولتلها نروح مع بعض واكيد بابي مش هيرفض ولا ايه يامراد باشا.

مراد: هههههه ماشي ياشوشو عيوني ليكي طبعا واعتبري نفسك مهندسه في الشركه من بكره ياروضه وشوشو كمان بس بشرط.

روضه: متشكره لحضرتك جدا يافندم وتحت امرك في اي شرط.

مراد: الأمر لله ياروضه الشرط ده للانسه شدوي الشرط هو انك تعتبري نفسك موظفه هنا مش بنت صاحب الشركه يعني اي خطأ أو تجاوز فيها عقاب تمام.

شدوي: يووووو بقي انا اخلص من فادي في الجامعه تطلعي انت هنا يابابي .

روضه: اكيد موافقه طبعا ياشدوي الشغل شغل ياحبيبتي فاهمه.

مراد: برافو عليكي ويالا اتفضلوا وبكره كل واحده فيكم تقدم السي ڤي بتاعها في شئون العاملين عشان تعرفوا المواعيد….

تقف روضه وتشكر مراد وتأخذ شدوي من يدها وتخرج من المكتب بل من الشركه كلها…

بعد نصف ساعه كانت روضه وصلت إلي السكن وصعدت الي الشقه التي تسكن بها مع ياسمين تفتح الباب وتدخل تجد ياسمين نائمه علي الاريكه في الصاله تقوم روضه بإيقاظها…

ياسمين وهي تفوق من غفوتها انتي رجعتي امتي انا جيت من بدري مالقتش حد هنا فضلت قاعده مستنياكي وفي الاخر نمت.

روضه: حبيبتي ياسو معلش اتأخرت شويه روحت مع شدوي شركه بابها وقابلناه والحمدلله وافق علي طول وبكره هاقدم السي ڤي.

ياسمين: مبروك ياحبيبتي وربنا يوفقك دايما وانا معاكي ياروضه وجنبك في اي وقت.

روضه: حبيبتي تسلميلي والله انتي اختي مش صاحبتي وبس هاقوم اغير هدومي واجهز حاجه نأكلها احسن الواحد واقع من الجوع.

ياسمين: ياريت انا كمان جعانه جدا هاتصل علي ماما اطمن عليها وكمان عشان أفكرها تقول لسالم يجي ياخدني بعد بكره .

روضه: هاتسافري اكيد مش كنتي تستني يوسف وهو لما يرجع بالسلامه تسافروا.

ياسمين: يوسف في مأمورية ومالهوش مواعيد يعني ممكن يتأخر وانا هما يومين تلاته وارجع عشان الكليه وكمان عشان المحل.

روضه: ربنا معاكي ياحبيبتي ….

*”*”*”*’*’*’*'”*”*””*”*””**”*”*””*””*”*”*”*”*”

مني: خلاص بقي ياسمين دي عاشر مره تقوليلي فكري سالم .

ياسمين:…………..

مني: حاضر ياقلب ماما خلي بالك من نفسك في حفظ الله.

لبني: اتوحشتها قوي يامني هاتجي بعد يومين خلاص.

مني: اه هاتيجي بس بتقول هاتقعد يومين تلاته وهاتمشي نفسي بقي تخلص جامعتها وترجع في وسطنا 

لبني: باذن الله تخلص علي خير وترجع تنور الدنيا في بيتها مع جوزها.

مني: يااارب انا هقوم بقي انام عشان ألحق صلاه الفجر وماتروحش عليه تصبحي علي خير.

لبني: وانتي من أهله اني كمان هاطلع اطمن علي معتصم وادخل انام.

في غرفه نغم كانت تجلس مع والدتها بعد عودتهم من السوق فقد اشترت الكثير من الملابس والكتب وقد اشترت هديه لابنه عمها لتقدمها لها عند عودتها..

إلهام: مبارك عليكي يابتي تتهني بيهم .

نغم: ربنا يخليكي ليا ياماما ويخلي جدي بصي الهدوم دي بقي مش هالبسها تاني شوفي اللي يناسب بنت ام سعيد وايديهالها .

إلهام؛ ربنا يسعدك ويفرحك دايما وعقبال ما أنزل اشتري شوارك .

نغم: لسه بدري ياماما المهم ياتري الخاتم ده هيعجب ياسمين.

إلهام: ايوه هيعجبها طول عمرك انتي وياسمين اخوات واي حاجه منك ومنها بتعجبكم ويالا هملي كل حاجه ونامي عندك جامعه الصبح بدري تصبحي علي خير.

نغم: وانتي من أهله ياماما..

مر يومين وسافر سالم الي القاهره ليأخذ بنت عمه ياسمين وبعد ساعات وصل سالم الي العماره التي تسكن بها وأثناء صعوده الي المنزل كانت روضه تركض علي السلم للنزول فخبطت في سالم وكادت أن تقع ولكن يد سالم كانت الحاجز القوي التي استندت عليها.

روضه؛ انت يابني ادم مش تفتح واخد في وشك زي القطر وطالع كده لا أحم ولا دستور.

سالم؛ ده انا اللي زي القطر احترمي نفسك يابت وانتي بتتكلمي.

روضه: بت في عينك يابتاع انت ولا انت اهبل ولا عبيط.

سالم: اللهم طولك ياروح طيب ليه الغلط ده وبعدين انتي اللي نازله تجري زي البهيمه اللي فالته من الزريبه.

روضه: بهيمه مين ياحمار انت وبعدين تعالي هنا ازاي تطلع كده سكن بنات من غير ما تستأذن.

سالم: وانتي مالك يابارده بتتدخلي في أحوال غيرك ليه ويالا شوفي طريقك بدل ما طلع عليكي العرق الصعيدي.

روضه: صعيدي مين ياعم روح شوف جاي من انهي مصيبه تاخدك .

سالم بعصبيه وبصوت عالي: تعرفي انك عايزه تتربي ولولا انك بنت كنت مديت ايدي عليكي اكسرلك دماغك دي.

خرجت ياسمين علي الصوت العالي فوجدت ابن عمها سالم يقف أمام روضه وبينهم خناق.

ياسمين: سالم حمدالله علي سلامتك في ايه صوتك عالي ليه.

سالم؛ الله يسلمك البت دي مش عارف مالها ولسانها عايز القطع.

روضه: تاني بتقول بت انا أنت صحيح ماعندكش دم ياسمين هو انتي تعرفي البتاع ده

ياسمين: ايوه طبعا ده سالم ابن عمي ياروضه هو ايه اللي حصل.

روضه: ماحصلش حاجه بااااي وركضت مسرعه خارج المنزل .

ضحكت ياسمين عليها وسألت سالم علي ما حدث بينهم فقص عليها سالم وضحكت بشده وصعدت اخذت حقيبتها ونزلت مع ابن عمها لتسافر الي قنا…

أما سالم فقد أعجبته روضه وطريقتها والتحدي في كلامها معه وكان من وقت لآخر يبتسم علي ما دار بينهم.

يتبع..