رواية متيم بك الفصل الثاني 2 بقلم فرح وائل

رواية متيم بك الفصل الثاني 2 بقلم فرح وائل

رواية متيم بك البارت الثاني

رواية متيم بك الجزء الثاني

رواية متيم بك الحلقة الثانية

_ انت شوف حل في المجانين بتوعك دول انا مش عارفه انام يا اما تسكتهم يا اما توديني حته تانيه عشان زهقت
= طب وانا مالي
_ هو مش انت دكتور هنا في المستشفي ولا انت تمرجي ولا اي شغلتك في ام المخروبه دي.. انا من ساعه ما شوفتك وانا قولت انك دكتور كفته والله
= دا انا اللي هعملك كفته لو ممشتيش من قدامي دلوقتي
_ لا مليش دعوه انا مش هنزل اقعد مع المجانين دول تاني.. دول بيشدوني من شعري
” بصيت لشعرها المنكوش وضحكت جامد…”
= انتي شكلك عامله مصيبه سوده في حياتك عشان يحصل فيكي كده
” لقيتها بصت في الارض وسكتت ”
= دا انتي شكلك عامله مصيبه بجد.. قولي عملتي اي
_ مش لدرجه مصيبه يعني انا بس دغدغت العربيه بتاعه الدكتور بتاعي في الجامعه.. بس دي متتحسبش مصيبه صح!!
= لا مصيبه اي ربنا ما يجيب مصايب.. دي يادوبك فيها 10 الاف جنيه يعني مش حوار
_ يعني حد قاله يسقط الدفعه كلها
= ساقطه!! كمان.. يعني قليله الادب وقولنا معلش ممكن يتعملها تعديل سلوك مجنونه وقولنا مش مهم دا مرض نفسي ومش ب ايدها بجحه قولت يمكن جراءه لكن ساقطه كمان؟! لا كده كتير انتي فيكي اي عدل معلش
_ وانت مالك يعم هو انت هتتجوزني
= اتجوزك؟ ليه ماسكه عليا صور ولا ممضياني علي وصولات امانه
_ ولا هو انت عشان دكتور هتتنطط عليا.. اومال لو كنت بتفهم شويه كنت عملت اي
= لو كنت بفهم!!
_ دا لو بقا
= شهد غوري اطلعي برا
_ لا انا جعانه
= ما نعمات نزلت الاكل تحت للعنبر كله
_ ايوا بس انا مكلتش منه
= ليه؟!
_ اكل مستشفيات اوي
= فوقي انتي في مستشفي انا مش بفسحك
_ بس انا مبحبش الاكل دا.. اطلبلي شاورما
= انا بجد مشوفتش بجاحه كده.. انا دكتورك انتي مستوعبه.!
_ خلاص يعم روحني وانا هجيب اللي انا عيزاه لنفسي
= اه بالمناسبه انا شوفت ورقك
_ طب اي طلعت مخطوفه
= بس اوڤر بقا بس نفختي مراره اللي جابوني
_ اصل مفيش تفسير تاني غير كده
= يعني اللي هيخطفك هيجيبك مستشفي المجانين ليه بذمتك
_ اكيد حب يعاقبني بيك.. قال اكيد مفيش تعذيب نفسي اكتر من كده
= طب تصدقي بالله انا كنت ناوي اجيبلك اكل
_ بس هو طلع غلطان طبعا.. دا انت بركه المستشفي
= اي بركه المستشفي دي.. انتي شيفاني ماشي ببخر
_ يعم مش قصدي.. خلص بقا اطلبلي الاكل جعانه
= يستار يارب انتي هتتصعري ولا اي اهدي شويه
_ الصبرر يارب انجز
” سيبتها وقومت طلبت اكل لاني انا كمان كنت جعان اوي.. وفي خلال ما انا كنت بطلب الاكل كانت هي بتتمشي في المكتب وبتتفرج عليه وبعدين لقيتها وقفت عند المكتبه وقالتلي..”
_ اي دا انت عندك مكتبه!!
= اه عشان بحب القرايه
_ غريبه يعني ميبنش عليك.. بس انا كمان بحب القرايه
= مش باين ازاي يعني مش فاهم.. انا دكتور علي فكره
_ اهلا وسهلا يعني اعمل اي.. وبعدين هو انت دكتور مخ واعصاب!! ما انت دكتور مجانين
= دكتور نفسي يا جاهله
_ اناني يعني
= طب خفي استظراف
” مردتش عليا وكملت تقليب في الكتب لحد ما لقت كتاب معين ف بصتلي ب انبهار وحماس وقالتلي..”
_ انت بتقرأ لعمرو عبد الحميد!!
= اه بحب روياته اوي.. بحب الفانتزيا عمومًا
_ تيم بجد انت بقيت شخصي المفضل خلاص
= مش كنت مبفهمش من شويه!!
_ لا غيرت رأي اي حد بيقرأ لعمرو عبد الحميد جامد بجد
= طب كويس طلع فيه بينا حاجه مشتركه
_ ايوا فعلا.. طلبت الاكل
= دا انتي فصيله بجد.. ايوا طلبته
” هزت راسها بمعني ماشي.. وراحت قعدت ع الكنبه اللي في المكتب وبدأت تقرأ في الكتاب وانا كملت شغل علي المكتب وبين فتره والتانيه كنت ببص عليها واشوفها وهي مندمجه وهاديه كده علي عكس ما بتبقي دايما.. وفضلنا كده لحد ما وصل الاكل وبدأنا ناكل..”
= علي كده بقي انتي بتحبي كليتك يا شهد!!
” كنت عايز افتح اي موضوع واتكلم فيه معاها وخلاص لاني مش حاببها ساكته كده خالص..”
_ بحبها اوي.. كان حلمي انا اخش اعلام اصلا
= حاجه حلوه اوي انك تدخلي حاجه كان نفسك فيها
_ وانت كان في نفسك في طب برضه صح..!!
= لا انا كان نفسي ادخل شرطه بس مقبلتش
_ شرطه اي صلي ع النبي انت قادر تصلب طولك عشان تمسك سلاح وتنط من هنا ل هنا دا بركه انك مقبلتش
= كل ما بتفتحي بوقك ببقي عندي رغبه مُلحه بجد اني اكتمك العمر كله
_ اتكلم علي قدك يا شاطر
= طب اطفحي وانتي ساكته.. انا اصلا اللي جبته لنفسي
_ تيم انا زهقت انا عايزه اروح
= اه بالمناسبه.. انتي من اسكندريه!!
_ ايوا ليه.!!
= واي اللي جابك هنا.!
_ هنا فين
= شهد انتي في القاهره
_ القاهره!! ازاي
= مش عارفه فعلا.. بس الورق بيقول انك من اسكندريه وبيثبت فعلا انك مريضه نفسيه ومن تلت دكاتره مش من
دكتور واحد
_ ازاي يعني انا عمري ما روحت لدكاتره نفسيين
= الورق بيقول كده
_ طيب مين اللي جابني هنا؟!
= المستشفي استلمتك من واحد اسمه اشرف سالم
_ معرفش حد اسمه كده.. انا اول مره اسمع الاسم دا
= شهد في حاجه غلط.. معني انك تبقي نايمه في بيتك وتصحي تلاقي نفسك في المستشفي يبقي انتي كنتي متخدره
_ مين اللي ممكن يعمل كده طيب.. وليه يعمل كده انا مش فاهمه
= مش عارف بس انا هدور في الحوار دا
_ يعني انا هروح امتي
= مش عارف بس مش هينفع اخرجك من هنا من نفسي لانك رسميًا وبالاوراق مجنونه ف لو خرجتك انا ممكن اتحاكم فيها
” سكتت شويه وبعدها عينها اتملت دموع وقالت بحزن..”
_ يعني اي.. يعني انا هفضل هنا طول عمري!
= لا طبعًا انا هشوف الموضوع دا بنفسي وانتي هتفضلي هنا فتره مؤقته لحد ما نفهم اي اللي حصل ومتخافيش انا معاكي
” هدت شويه وهزت راسها ومسحت عنيها وراحت قعدت ع الكنبه وهي ضامه رجليها باصه للارض بحزن.. حبيت اسيبها براحتها ف اتحججت اني هنزل اشوف المرضي وطلعت بره الاوضه وانا بفكر لي ممكن حد يعمل كده..
«في الصباح»
” دخلت المكتب تاني يوم لقيتها لسه صاحيه من النوم..”
= صباح الخير
_ صباح النور.. هو انا نمت هنا!!
= اه وانا نمت بره
_ انا اسفه خليتك تبات بره مكتبك والجو برد
= دا اي الادب دا كله.. انتي سخنه ولا اي
_ تصدق انا غلطانه خساره فيك الاسف
= يارب الصبر.. انا جبتلك طفح تتطفحيه.. خلصيه وانزلي العنبر بتاعك
_ بس انا مش عايزه انزل العنبر دا تاني
= مينفعش تقعدي لاني انا ماشي اصلا
_ ماشي رايح فين
= هروح بيتنا يستي.. ما انا واخد شيفت بالليل كله
_ يبختك
” قالتها بحسره كده وبعدها قامت عشان تنزل..”
= اي مش هتاكلي.. انا جايب الاكل عشانك
_ لا مش جعانه
” قالت كده وسابتني ونزلت وانا فضلت باصص عليها شويه وبعدها نزلت عشان اغير هدومي واروح.. وبعدما خلصت قولت اعدي علي العنبر بتاعها اشوفها قبل ما امشي بس لقيتها بتجري في الممر بتاع المستشفي..”
= شهد شهد استني انتي بتجري لي في اي
_ سامر تحت سامر تحت وعايزني.. اكيد جه ياخدني
” قالت كده ونزلت جري وانا سمعت كلمه ياخدي واتصدمت ونزلت جريت وراها اشوف مين سامر واي الحوار دا.. وهي اول ما شافته جريت عليه ونطت حضنته جامد.. وفضلوا ع الوضع دا خمس دقايق لحد ما روحت عندهم..”
=……

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية متيم بك)