رواية العنيد 3 الفصل الثامن والعشرون 28 بقلم الشيماء محمد
رواية العنيد 3 الفصل الثامن والعشرون 28 بقلم الشيماء محمد
رواية العنيد 3 البارت الثامن والعشرون
رواية العنيد 3 الجزء الثامن والعشرون
رواية العنيد 3 الحلقة الثامنة والعشرون
حلقه خاصه بشم النسيم
بقلم / الشيماء محمد
آسيا : بابي يا بابي
ادهم فتح عنيه وبص حواليه لكن ليلي مش موجوده وآسيا فوق راسه : عايزه ايه علي الصبح كده وامك فين ؟
آسيا : مامي راحت المستشفي بتقول في حاله او جراحه مش فاكره
ادهم : وانتي عايزه ايه بدري كده ؟
آسيا : مش هنروح المدرسه ! يالا اصحي ! يوسف مشي من نص ساعه وانا مستنياك تصحي توديني وانت ما صحيتش واحنا اتأخرنا قوي
ادهم بص في ساعته : الساعه ٧:٣٠ ما اتأخرناش يا آسيا للدرجه دي ، اديني عشر دقايق اكون جاهز .. خرجت وسابته وهو اتعدل اتصل بليلي بس مردتش فعرف انها في عمليه اكيد .. لبس وجهز في ٨ دقايق ونزل لبنته واخدها وراحوا للمدرسه .. وهناك قابلهم محمود : متأخره ليه يا آسيا ؟
آسيا : بابي اخرني .. انا لازم اشوف حد تاني يوصلني غيره لانه لما بيسهر مع مامي بيصحي بالعافيه وبتيجي فوق راسي انا .. شوفولي وسيلة تانيه غير بابي
ادهم بيبصلها مذبهل وابوه بيضحك : ما ترد علي بنتك واقفل بوقك ده
ادهم بصله : البنت دي خطر .. هعمل اشتراك في الباص يا روح امك .. وابقي انزلي من الساعه ٦ ونص بقي انا غلطان لامك
آسيا بابتسامه : يس .. شكرا بابي
سابتهم ومشيت وهو واقف : البنت مبسوطه
محمود : هيا بتحب كل حاجه بيرفكت انت ايه اللي مضايقك !
ادهم : انا كنت بهزر في موضوع الباص ده .. وبعدين ليلي لو عرفت هتقتلني .. لان ده معناه انها تصحي ٦ الصبح تفطرها .. ليلي هتقتلني
محمود ضحك : دي مشكلتك انت مش مشكلتها هيا وبعدين اصحالها انت .. سلام عندي تدريب
اخر النهار ادهم رجع وكانت ليلي منتظراه وقابلته باحلي ابتسامه وحضن
ليلي : ما شوفتكش من الفجر وحشتني
ادهم : فعلا وحشتيني وافتقدتك الصبح لما صحيت ما لقتكيش جنبي .. وبنتك فوق راسي
ليلي ضحكت : تعال ناكل انا ميته من الجوع
ادهم : يوسف وآسيا فين ؟
ليلي : اتغدوا من بدري وبيعملوا واجباتهم
اكلوا مع بعض وادهم متردد يقولها علي موضوع الباص
ليلي : وبعدين قول علي طول اللي محيرك ده
ادهم ابتسم : حاضر .. بنتك معترضه انها بتروح متأخره الصبح والنهارده قدام ابويا قالتلي مش ذنبها تتأخر لما انا اسهر معاكي احب فيكي
ليلي ضحكت وادهم شاور بايده: استني مش كده وبس
ليلي : ايه تاني ؟
ادهم : سيادتها طلبت وسيلة مواصلات تانيه غيري توصلها المدرسه
ليل بحذر : اهممم وبعدين
ادهم : عملتلها اشتراك في باص المدرسه
ليلي : والباص ده بيعدي الساعه كام ؟
ادهم : الساعه ٦:٣٠
ليلي : امممم طيب مفيش مشكله .. انت هتصحي ٦ تفطر بنتك وتنزلها للباص وانا هصحي ٧ افطر ابني وانزله للباص ..( خبطت علي كتفه ) ولا يهمك حبيبي
وقامت تشيل الاكل وادهم باصصلها فليلي بصتله وهيا بتفسل الاطباق : مالك ؟ ايه ؟
ادهم : انتي قولتي مين هيصحي يفطر مين ؟
ليلي : سيادتك هتصحي تفطر بنتك لانه مش علشان انت مش قادر تصحي عشر دقايق بدري تصحيني انا ساعه كامله بدري .. انت بتجهز في اقل من عشر دقايق .. يعني المفروض تنزل من هنا ٧:٣٠ مش تصحي ٧:٣٠ معني كده مطلوب من سيادتك تصحي ٧:٢٠ دقيقه وبكده هتوصل في معادك .. لكن مش علشان تنام انت العشر دقايق دول يا حبيبي تصحيني انا من سته .. عندك اعتراض ؟
ادهم : ينفع اعترض ؟
ليلي بصرامه : لأ
ادهم سكت وهيا جابت طبق جاتوه وقربت وزقت ايده وقعدت علي رجليه: دوق حبيبي
ادهم بصلها باستغراب : ادوق ؟
ليلي : ايوه
ادهم : انتي من دقيقه كنتي بتزعقي وبتتخانقي علي الباص دلوقتي قاعده علي رجليا وبتقوليلي ادوق ؟
ليلي : ده موضوع وخلص وبعدين انا مكنتش بتخانق انا كنت بحط نقط علي الحروف مش اكتر دوق حبيبي .. هتعجبك
ليلي اخدت حته بصباعها وحطتها في بوقه باغراء
ليلي : تحب تطلع تكملها فوق .. في اوضتك ؟ في سريرك ؟ وانا معاك ؟؟
ادهم ابتسم : انتي مجنونه وانا بعشق جنونك ده
بعد فتره مع بعض
ادهم : انتي كنتي بتهزري لما قلتي انا هصحي مع آسيا صح !
ليل بصتله وباسته وبكل حب وهيام : لا يا قلبي مكنتش بهزر ..
ادهم اتعدل : ليلي
ليلي : نعم
ادهم : انا مقدرش اصحي ٦
ليلي : وانا مقدرش اصحي ٦ ..
ادهم : ماشي بس انتي مامتهم
ليلي باستغراب : وده معناه ايه ؟ انه فرض ان الام هيا اللي تصحي وتفطر وتأكل وتنزل الباص وبعدها تصحي جوزها تفطره وبعدها تنزل شغلها وبعدها ترجع تغدي وتذاكر .. ايه يا ادهم ؟ من امتي انت بتعاملني كده او انت من النوعيه دي ؟
ادهم : حبيبتي مش حكايه نوعيه دي وغيره .. حكايه انه مش هقدر .. انا بساعدك علي قد ما اقدر وانتي عارفه ده كويس ومعنديش نقطه ست وراجل بس ده !!
ليلي : ده ايه ؟ انت قررت توديها باص فانت تتحمل قرارك ده !
ادهم : خلاص هلغي ام القرار ده
ليلي : يبقي انت مسؤل توصلها بدري وفي معادها وما تأخرهاش
ادهم : انا ما بأخرهاش بمزاجي
ليلي : ولو
ادهم : الداده فين ! هيا تصحي تنزلهم
ليلي : انت عارف انها بتيجي علي الظهر ومش هتجيلك الفجر علشان تنزل بنتك المدرسه
ادهم : وبعدين يا ليلي ؟
ليلي : بعدين عندك انت .. يالا تصبح علي خير
ادهم : نعم ! اصبح علي خير السرعه ٩ الليل
ليلي : اه يدوب علشان تصحي الفجر
ادهم قام ولبس ونازل : انا خارج سلام
ليلي : ما تتأخرش حبيبي ..
ادهم بصلها وماردش ونزل لاخوه ايمن وحكاله وايمن ميت من الضحك عليه وساره بصاله قوي ولما لاحظ سكت وبص لمراته : ايه ؟
ساره : ايه اللي يضحك ! ليلي عندها حق ! ومن بكره هنبدأ يوم انت تصحي لعيالك تنزلهم ويوم انا او انت اسبوع وانا اسبوع .. ليلي دي ناصحه
ايمن بص لادهم : قوم اطلع بره وروح لمراتك هو انا ناقصك
المره دي كان ادور ادهم يضحك وقام فعلا : يالا هروح علشان ورايا صحيان بدري وانت كمان قوم نام
ايمن بغيظ : روح نام روح
ادهم استمر لمده اسبوع واحد في الصحيان بدري ينزل آسيا الشغل وللاسف مش بيعرف ينام تاني
مراته كانت نايمه فراح جنبها
ادهم : اصحي يا ليلي اصحي
ليلي فتحت عنيها : في ايه ؟
ادهم بغيظ : في اني مش بعرف ارجع انام تاني وبفضل قاعد صاحي وانتي نايمه فاصحي اقعدي معايا
ليلي ابتسمت ( بلهجه تريقه ): حبيبي !! مسكينه صغننه بيضا مش عارفه تنام
ادهم : لا وحياه طنط اصحي طالما مش هنام فانتي كمان مش هتنامي ..
شالها من السرير وفوقها تماما
ليلي : بعدين صحيت اهو عايز ايه
ادهم : نعمل اي حاجه .. جاتلي فكره تعالي
شدها ونزلها للجنينه والحو كان برد الصبح
ليلي : الدنيا برد يا ادهم
ادهم : برد ايه في شهر ٤ مفيش برد
ليلي : عايز ايه !
ادهم : هننزل البيسين
ليلي بصتله من فوق لتحت وراجعه علي البيت
ادهم وقفها : استني هنا
ليلي : الجو برد وانا مش هنزل البيسين الساعه ٦:٣٠ الصبح
ادهم : لحظه
راح ورجعلها بعد دقيقتين
ليلي : نعم
ادهم : عدلت ترموستات الميه .. خلتها دافيه يالا بقي بطلي رخامه يالا
ليلي اترددت بي راحت معاه وحطت ايدها في الميه : زود كمان درجتين
ادهم : اكتر من كده مش هستحملها انا وانتي عارفه مبحبش الميه السخنه .. ده اقصايا
ليلي بدلع : واحده بس كمان
ادهم قدامها مش بيقدر يقاوم فراح زودها درجتين
ونزلوا الميه
ليلي : علي فكره كنت هرضي بيها عادي
ادهم : وعلي فكره انا ممكن استحمل علشانك اي حاجه ..
قضوا ساعه في الميه لحد ما ليلي لمحت يوسف واقف لابس وباصصلهم
ليلي : يوسف ؟ هيا الساعه كام ؟
يوسف : الساعه ٧:٣٠ وانا نازل علشان الباص علي وصول .. حد ينزل الميه بدري كده
ادهم : وانت مالك ! المهم اخدت مصروفك !
ليلي : الفطار انت ما فطرتش
يوسف : مش لازم هشتري فطار في المدرسه .. انا اخدت مصروف زياده للفطار
ادهم : مش ناسي يعني !
يوسف : لا مش ناسي باي الباص وصل
ادهم : اطلع معاك لحد الباب ؟
يوسف : من غير هدوم ؟ لا شكرا مش عايز زمايلي يشوفوا ابويا الساعه ٧:٣٠ الصبح مبلول وعريان ويقولولي ابوك اتجنن
ادهم : امشي ياد من هنا انا غلطانلك
يوسف مشي بيضحك وادهم رجع ل ليلي
ادهم : البيت فضي علينا .. كنا بنقول ايه ؟
ليلي : انك مجنون .. وبتخليني اتجنن معاك
ادهم : وهو في احلي من الجنون مع حبيبك !! تعالي نكمل جنون في اوضتنا بما ان البيت بقي لينا لوحدنا .. يالا بيبي
شالها وطلع بيها اوضتهم …………..
ادهم مقدرش يستحمل الباص كتير ولغي اشتراك آسيا ووعدها انه هيوصلها في معادها ..
ليلي : بقولك
ادهم : قولي
ليلي : انا هعزم ايمن وميرا بعد بكره وبابا وماما ومحمود وهبه
ادهم باستغراب : العيله كلها ؟ اشمعني ؟
ليلي : شم النسيم بيبي
ادهم : شم النسيم ؟ وهو ده بيحتفلو بيه ؟
ليلي : تعرف اننا متجوزين بقالنا سنين كتيره جدا لكن تقريبا عمرك ما كنت موجود فيه معانا
ادهم : لا طبعا
ليلي : لا فعلا
ادهم : لا اكيد في عيد شم نسيم عدي واحنا مع بعض
ليلي : فكرني بواحد
ادهم فكر بس مالقيش فعلا : اممم
ليلي : ايوه امممم المهم اوك
ادهم : اوك بس بقولك ايه ! بلاش التقاليد الغريبه اللي بيعملوها في شم النسيم دي انا مبحبش الفسيخ ولا الرنجه ولا الكلام الفاضي ده .. احنا هنقضي يوم مع بعض اوك
ليلي بتردد : ماشي ماشي .. بس انت فعلا ما بتحبش الحاجات دي ؟
ادهم : عمرك شوفتيني اكلتها ؟
ليلي : مجتش مناسبه
ادهم : لا مبحبهاش .. يالا ورايا مشوار
ليلي وهو خارج : متنساش تقول لاريان يقضي معانا الاجازه
ادهم ابتسم : اوك بيبي ..
ادهم عزم الكل واريان كمان والكل الصبح اتجمع عنده
ميرا : انا متشوقه للرنجه والفسيخ امممم
ادهم بقرف : انتي بتاكلي الحاجات دي ؟
ميرا : طبعا
ايمن : اوعي تكون ما بتحبهاش ده احنا كنا بنستني شم النسيم ده من السنه للسنه علشان ناكل الحاجات دي ..
ادهم بقرف : مفيش الحاجات دي هنا .. مفيش الكلام ده
عم محمد : امال في ايه ! هو شم النسيم ايه غير فسيخ ورنجه وبصل وليمون
ادهم بقرف : بصل !! كمان بصل !!
عم محمد : طبعا ده اساسي
ادهم كان مشغول بموبيله وكل شويه يبص فيه او يبعد ويعمل مكالمه ويرجع
ايمن : في ايه التليفون النهارده ! انت مش مركز خالص معانا
ادهم بص وراه يتأكد : طالب هديه ل ليلي وما وصلتش
ميرا : طلبتلها ايه ؟
ادهم : وانتي مالك ؟
مصطفي : انا رايح ل ليلي اشوفها اتأخرت ليه جوه
ميرا : طلبت ايه بقي لازم تقولي
ادهم : دي مفاجأه ليها ما ينفعش حد يعرفها قبلها
ايمن : عارف لو كانت حاجه كبيره وقلبت مراتي عليا زي الصحيان بدري هعورك
ادهم ضحك : كبيره .. اديني قولتلك روح بقي هات هديه لمراتك ..
آسيا خرجت لابوها : بابي !! بابي
ادهم : نعم
آسيا : في ريحه شنيعه جوه عند مامي في المطبخ
ادهم : انا هتصرف استني
قام ادهم واول ما دخل باب الفيلا زعق : ليلي
ليلي طلعت بسرعه : حبيبي
ادهم : ايه الريحه دي ؟ احنا اتفقنا يا ليلي
ليلي : الناس اللي بره دي كلها شم النسيم بالنسبالهم هو كده ودي متعته حبيبي فمعلش
ادهم : يعني انا اخبط دماغي في الحيط صح !
ليلي : لا يا قلبي .. بس معلش استحمل وبعدين هتتبسط بالجو والاكل ومش بعيد يعجبك
ادهم : ليلي حبيبتي انا شامم ريحه سمك منتن .. رمه .. وتقوليلي هيعجبني .. انتي متخيله اني ممكن ادوق شيء بالريحه دي !
ليلي : من ايدي هتدوق
ادهم : لا لا انتي فاهمه الحب غلط يا لولتي .. انا هاخد بنتك واخرج
ليلي : مصر كلها بتاكل نفس الاكل ده .. انت بتبقي بره مصر في العيد ده .. البيت هيكون ارحم
الاكل اتحط والكل اتجمع بحماس وضحك الا ادهم وبنته واخدين جنب
اريان : اونكل ادهم
ادهم : اقعد يا اريان .. شويه كده واخدكم نتغدي بره في ماك ولا كنتاكي
اريان : لا لا .. انا عايز ادوق .. محستش بالجو ده قبل كده .. ينفع ادوق ؟
ادهم ضحك : اتفضل ومالو .. انت جاي تستأذني روح يا بابا دوق .. بس ما تقلش لو عجبك ليجيلك تسمم وانا معنديش استعداد اقضي باقي اليوم في المستشفي
اريان معجبوش الفسيخ بس عجبته الرنجه جدا
ليلي : هو ادهم مشغول بتليفونه ليه كده ؟
مصطفي : جايبلك هديه واتأخرت
الكل بص لمصطفي وهو استغرب مالهم
ميرا ضربته في كتفه : عليا النعمه انت دوش بجد وستين دوش
مصطفي : انا عملت ايه ؟
عم محمد : اما انت بأف صح يعني هو عاملها مفاجأه لمراته وانت قاعد بكل غبا تقولها جايبلك هديه .. انت غبي لمين ياد ؟
الكل بص لعم محمد فدافع عن نفسه : انا مش غبي ما تبصوليش انا اه كنت بغلس عليه بس مش غبي
ليلي ضحكت والكل وراها ضحك
ليلي : خلاص محدش يعرفه اني عرفت حاجه
الاكل استمر اكتر من ساعه وادهم بعيد هو آسيا لحد ما زهق
ادهم زعق وهو واقف عندهم : ده مكنش غدا ده ! ما تنجزوا بقي ! ايه النهار كله هتاكلوا !
عم محمد : وانت هتبصلنا في اللقمه ولا ايه ؟
ادهم : ولا ابصلك ولا تبصولي انجزوا بقي وقوموا
عم محمد : طيب روح اشتريلنا بيبيسي يالا علشان نحبس
ايمن : ولبان يا ادهم .. كتير هاه
ليلي : ونعناع يا حبيبي علشان الشاي
ميرا : ادهم انا عايزه لبان بالمستكه مش اي نوع
ساره : ومعطر جوي كتير جدا جدا هتحتاجه
يوسف : بابي هات معاك لب سوبر كتير ..
اياد : اونكل .. هاتلي ميراندا تفاح انا مش عايز بيبسي
ادهم واقف ساكت تماما ومره واحده بدون ولا كلمه سابهم ومشي وسمع الكل بيضحك
ادهم وهو ماشي : آسيا تعالي
خرجت مع ابوها وعزمها علي الغدا وطلبت تروح بيتزا هت واتغدوا الاتنين مع بعض في جو ظريف
وهما مروحين
آسيا : هتجيبلهم طلباتهم ؟
ادهم : انتي ايه رأيك ؟
آسيا : النهارده عيد خلينا نجيبلهم
ادهم : ماشي يالا
ادهم وصلوا السوبر ماركت وواقف بيفتكر مين طلب ايه فآسيا وقفت جنبه
آسيا : جدو عايز بيبسي .. مامي عايزه نعناع .. عمتو عايزه لبان بالمستكه عمو محددش النوع اللي عايزو .. يوسف عايز لب .. اياد عايز ميراندا تفاح عمتو ساره عايزه معطر جو .. اريان بيحب الشويبس جولد وانا هاخد شوكلاته مارس
ادهم كشر عنيه وبصلها باستفسار
آسيا : انت قولتلي ان الظابط الناجح لازم يركز في التفاصيل ويهتم بكل حاجه وتكون ذاكرته ديما حاضره
ادهم ابتسم : وانتي ذاكرتك ما شاء الله حاضره
آسيا : تلميذتك بابي .. تلميذتك
ادهم : انتي هتكوني عظيمه يا آسيا
بدؤا يجيبوا كل الطلبات وادهم مره واحده بص لآسيا اللي بتجيب الشويبس جولد : انتي عرفتي منين ان اريان بيحب الشويبس جولد
آسيا : لاحظت مش اكتر في المدرسه ديما بيشربه
ادهم : وانتي في المدرسه بتراقبي اريان كتير ؟
آسيا : قصدك ايه يا بابي .. احنا كتير بنكون مع بعض او بنقضي البريك مع بعض اوتدريبنا مع بعض
ادهم حس انها بريئه واهتمامها بريء
ادهم : لا ما اقصدش حاجه بيبي .. يالا بينا
آسيا وهيا ماشيه : بابي مش هتجيب لمامي كادبوري .. هيا بتحبها
ادهم ابتسم : عقابا ليها علي اللي عملته النهارده مفيش لها كادبوري
آسيا : بس يا بابي العيله كلها مامي جمعتها وعملتلهم حاجه بيحبوها فهل صح تعاقبها لانها راعت الكل حتي لو انت ما بتحبش ده ! يعني اقصد لو انا مش بحب حاجه المفروض اللي بيحبني ما بحبهاش زيي ! ولو ده صح ! ليه مش المفروض العكس ! يعني ليه انت ما تحبش اللي حبيبك بيحبه بدال ما تطلب منه يكره اللي انت بتكرهه !! يعني ايه الصح بابي ؟
ادهم بعد ما فاق من الجمله الطويله قوي اللي بنته قالتها : روحي هاتي علبه كادبوري
آسيا ضحكت وراحت جابتها وحاسبوا وخارجين
آسيا : بابي انت ما جاوبتنيش
ادهم ابتسم : هجاوبك .. اللي بيحب حد يا آسيا ما بيفرضش حاجه علي حبيبه بيكرهها وفي نفس الوقت الطرف التاني ما يطلبش انه يحبها .. الحب هو انك تراعي حبيبك سواء انت حبيت الشيء ده او محبيتوش .. محدش يفرض علي حد حاجه ما بيحبهاش .. جاوبتك كده !
آسيا : يعني انت ما تطلبش من مامي تكره الفسيخ او هيا تطلب منك تحبه وكل واحد يحترم اللي الطرف التاني بيحبه صح !
ادهم ابتسم : صح يا قلب باباكي
وصلوا البيت وكل واحد اخد طلبه وآسيا طلعت من الكيس علبه الكادبوري وعطتها لابوها : روح اديها لمامي
ادهم ابتسم واخدها منها ودخل يشوف مراته فين كانت بتنظف المطبخ من اي اثر علشان الريحه
ادهم ابتسم لها
ليلي : سوري حبيبي بس ان شاء الله مش هخلي اي اثر للريحه
ادهم قرب منها وابتسم وعطاها علبه الكادبوري : ولا يهمك يا قلبي المهم الكل اتبسط
قرب منها يبوسها بس بعدها بعد : من بعيد لبعيد يا قلبي
ليلي ضحكت وهو كمان : اتصرفي واتخلصي من ريحه البطل والفسيخ دي .. انا ممكن اقبلهم في البيت وممكن بسهوله اخرج من البيت لكن مش هقبلهم فيكي انتي او مش هينفع ابعد عنك انتي
ليلي ضحكت جامد : حاضر حبيبي .. صح ابنك حكالك اللي حصل وانت مفيش
ادهم : لا محكاش .. ايه اللي حصل
ليلي بدئت تحكيله وهو قعد يسمعها
الكل كان بياكل وليلي دخلت المطبخ وسابتهم في الجنينه ودخلت
اريان حط لقمه كبيره في بوقه وضحك فشرق وكان بيتخنق وكان جنبه يوسف اللي اخد باله
يوسف : اريان بيتخنق
الكل وقف وبيتفرج وايمن : حد ينادي ليلي .. مصطفي فين ؟
يوسف الوحيد اتحرك بسرعه ووقف وري اريان ومسكه من وري وخط ايديه علي صدره وبيضغط زي ما مامته علمته ازاي يسعف حد
ليلي هيا ومصطفي حم يجروا علي الدربكه والصوت واللي بينادي عليهم ..
ليلي شافت يوسف ماسكه بطريقه صح وبيتصرف صح وعقبال ما وصلتلهم كان اريان خلاص فاق ويوسف اسعفه بسرعه وقعدوا جنب بعض في الارض الاتنين ينهجوا
ليلي : اريان انت كويس !
اريان شاور بدماغه
ليلي : كلمني وسمعني صوتك
اريان : انا كويس ايوه .. يوسف شكرا جدا ليك
يوسف : اشكر ماما لانها هيا علمتني ازاي اتصرف وازاي اسعف حد
ليلي بتحكي لادهم اللي فخور بابنه وتصرفه السريع
ادهم : يوسف عرف يتصرف ورد فعله سريع
ليلي قربت : فعلا وده معناه
ادهم : معناه ايه !
ليلي : انه ميال لمجال الطب يا ادهم .. آسيا مياله لمجالك ويوسف ميال لمجالي
ادهم ابتسم : طيب كويس .. وهيكون عنده استاذه موهوبه تعلمه .. ركزي معاه بقي
ليلي قويت اكتر فادهم ضحك ورجع خطوه لوري : ركزي معاه هو مش معاا انا حاليا .. ( وهو خارج ) حاولي تتصرفي .. مش هقدر ما ابوسكيش كتير
ليلي ضحكت وادهم خرج لابنه قعد جنبه : سمعت اللي عملته
يوسف بحرج : معملتش حاجه
ادهم : انت انقذت حياه صاحبك
يوسف : لا ما اعتقدش كانت ماما هتيجي وهتنقذه
ادهم : يوسف اللحظات بتفرق في المواقف دي .. وكان في ناس كبيره وجمدوا مع انه معظهم يعرفوا الاسعافات الاوليه بس انت كنت اسرع حد اخد رد فعل واتصرف وده المهم ..المهم في المواقف اللي زي دي سرعه التصرف يا يوسف .. وانت اتصرفت بسرعه واتصرفت صح .. فانا فخور بيك جدا لاقصي حد ..
يوسف : بجد يا بابا
ادهم : طبعا حبيبي .. لو انت حابب مجال الطب فركز فيه وخليك ذكي وواثق من نفسك وديما خليك واثق من اني ديما هدعمك في اي مجال تختاره وهكون فخور بيك في اي وقت
يوسف : كنت متخيل انك هتزعل لاني مش زي اسيا ومش حابب اني اكون زيك
ادهم : لا طبعا يا حبيبي .. كل مهنه ولها اهميتها وانك تكون دكتور دي حاجه مش سهله ابدا وحاجه مهمه جدا والا مين هينقذنا احنا مثلا لما نتصاب ! ومين هيعالج الناس ! مهنه الطب دي مهنه مقدسه جدا يا يوسف .. وبعدين كام مره مامتك عالجتني هاه ! انت عارف مامتك عالجتني من قبل حتي ما نحب بعض وهيا بتعالجني .. حبيبي انت حبيت مجال خليك فخور بيه واوعي تختار حاجه ما بنحبهاش علشان ترضي حد تبدا اللي بيحبك هيحبك زي ما انت .. هيحبك انت .. ما تغيرش من نفسك علشان ترضي حد .. الاول ارضي ربنا وارضي نفسك الباقي مش مهم فاهم
يوسف : فاهم .. انا بحبك قوي يا بابا
ادهم : وانا بحبك انت واختك اكتر من اي شيء في الكون ده كله ..
ادهم بيبص علي اسيا كانت واقفه مع اريان واياد وبيهزروا التلاته مع بعض فابتسم ….
اخر الليل مع ليلي واول ما قعد جنبها ومسك ايديها : علي فكره
ليلي : حاولت .. غسلت ايديا مليون مره وعملت كل حاجه حد نصحني بيها والريحه برضه مش عايزه تروح ..
ادهم باس ايديها : حبيبتي انا بحبك في اي وقت وفي اي مكان ومهما يحصل وبعدين مش ده اللي ممكن يبعدني عن حضنك .. انتي عبيطه ولا ايه .. تعالي هنا
شدها لحضنه وقضوا احلي وقت مع بعض
ادهم : يوسف كان متخيل اني زعلان منه علشان مش زي اسيا
ليلي : هو شايفك مهتم بيها وبتدريبها فترجم ده غلط ومحتاج منك تفكره كل شويه انك بتحبه مهما تكون اختياراته
ادهم ضمها : اكيد طبعا هحبه مهما تكون اختياراته .. وهكون فخور بيه مهما يعمل .. ده ابني يا ليلي
ليلي : انا عارفه حبيبي الكلام ده لكن هو محتاح تفكره كل شويه وتهتم بيه زي ما بتهتم بآسيا
ادهم : حاضر .. هوزع اهتمامي ما بينهم .. المهم دلوقتي انتي في حضني ومش مبطله رغي
ليلي : انت سايبني ارغي الغلط عندك
ادهم : حقك عليا ودي غلطه مش هتتكرر ..
بعد فتره طويله
ليلي : الا انا سمعت اشاعه وشكلها فعلا اشاعه
ادهم : اشاعه ايه يا حبي ؟
ليلي : ان في هديه ليا بس اليوم خلص ومفيش هدايا
ادهم باستغراب : مين اللي قالك علي الاشاعه دي ؟
ليلي : مصطفي
ادهم : والله كنت عارف .. متخلف من يومه
ليلي ضحكت : المهم هيا فين ؟
ادهم : اتأخرت هتوصل الصبح
ليلي : ايه هيا بقي ؟
ادهم : يعني مش كفايا اخوكي حرق المفاجأه عايزه تكملي انتي عليها !! الصبح تشوفيها
ليلي : ادهمممممم
ادهم : مش هقول …. نامي يالا تصبحي علي خير
الصبح طلع اخيرا والكل صحي بدري متحمس
وادهم خرج ورجع بعد ساعه في ايده صندوق صغير علي شكل بيضه !!
عطاها ل ليلي ويوسف ماسك الموبيل بيصورهم
ليلي فتحت الصندوق وفتحته لقت جواه بيضه شوكولاته طلعت حته واكلتها
ادهم : افتحيها شوفي ايه اللي جواها
ليلي : هيا جواها حاجه ؟
ادهم : يعني اتأخرت من امبارح علشان بيضه شوكولاته كبيره حبتين ؟؟ افتحيها الله يهديكي
ليلي بتفتحها ولقت جواها مفتاح عربيه وبصت لادهم
ادهم : تعالي بقي نطلع بره تشوفي هديتك !
ليلي طلعت لقت عربيه بس متغطيه كلها وملفوفه زي الهديه
آسيا : وااااو بابي .. انا هاخد البلالين كلها
ادهم : ماشي حبيبتي البلالين بتاعتك
يوسف : يالا يا مامي افتحي هديتك
ليلي قربت وبتشد الغطا وادهم ساعدها وكشفت العربيه وصرخت ويوسف كمان
يوسف : واااو بورش بابي .. الصقف بيتفتح بابي ؟
ادهم : بيتفتح
ليلي : بورش يا ادهم .. انت مجنون
وقربت منه باسته عشرين مره : انت مجنون بس دي غاليه قوي
ادهم : ما تغلاش عليكي .. مافيش حاجه في الكون ده كله ممكن تغلي عليكي
ليلي : بس دي بورش
ادهم : والل بيركبوها احسن مننا في ايه .. اركبي عربيتك يالا
ليلي مسكت ايده : انا وانت يالا بس هيا سريعه صح ؟
ادهم : جدا .. هترضي غرورك وجنانك ما تقلقيش المهم بس تعرفي تتحكمي فيها
ليلي : ادهم انا مش عارفه اقولك ايه ! مش لاقيه كلام اصلا
ادهم : حبيبتي ما تقوليش.. ليلي انتي حياتي وروحي ومراتي وحبيبتي وام عيالي فلو قدمتلك حياتي مش كتير عليكي مش بس عربيه .. انا حياتي بدئت يوم ما انتي دخلتي حياتي
ليلي فرحت جدا بهديتها لانها كانت هديه كبيره فعلا والكل كان غيران منها …
واوعو حد يدعي عليا لان ادهم ده كائن غير موجود في الطبيعه ومش ممكن يكون في حد زيه
كل سنه وانتو طيبين
وده كان ادهم في شم النسيم هو ولوليتا اتمني تكون الحلقه عجبتكم .. وياريت تخرجوني من ادهم ولوليتا ونركز في حكايات تانيه ..
يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية العنيد 3)