رواية سيد القمر الأسود الفصل الخامس 5 بقلم زينب مصطفى

رواية سيد القمر الأسود الفصل الخامس 5 بقلم زينب مصطفى

رواية سيد القمر الأسود البارت الخامس

رواية سيد القمر الأسود الجزء الخامس

رواية سيد القمر الأسود الحلقة الخامسة

إلتفت عمر ونظر إلى حبيبة التي تقف صامتة وعلى وجهها إبتسامة مرتعشة وهو يشعر بتخبط في مشاعره ، فهو حتى هذه اللحظة ينكر مشاعره الخاصة نحوها ويرفض أن ينصاع لها في حين تابعت عصمت بقسوة:
= تقدري تعزمي خطيبك كمان .
سحب عمر يد مي من حول عنقه بعنف وهو يقول بإستنكار
= خطيبها؟!
ابتسمت عصمت في وجه حبيبة المصدوم
= إيه ده انت متعرفش أن حبيبة مخطوبة ، دي مخطوبة لواحد شغال عندك .. اسمه على ما أظن … آه .. اسمه شريف.
ثم نظرت إلى حبيبة بتحدي
= مش كده يا حبيبة؟
ثم تابعت وهي تتابع بتشفي وجهها الذي شحب دون أن تستطيع الرد.
= أصله أتصل بيكي هنا من شوية وعرف نفسه ليا لما سئلته هو مين وقالي إنه عاوز يكلمك بس للأسف مكنتيش فاضية.
شعرت حبيبة بالدوار يستولي على رأسها وبـ أن الكلمات تاهت منها ، وهي تنظر لجدة عمر التي قالت بدهشة:
= هو إنتي مخطوبة يا حبيبة!!
حبيبة بتلعثم وعقلها يرفض العمل أو إسعافها بالكلام
= آه .. أقصد .. لأ.
صرخ فيها عمر بغضب عنيف
= هو إيه اللي آه و لاء ما تردي عدل مخطوبة ولا مش مخطوبة!؟
ابتعدت مي عنه بخوف في حين نظرت عصمت هانم لمي بطرف عينيها وكأنها تأكد على كلامها السابق بإهتمام عمر بحبيبة
ثم قالت بمرح مصطنع
= خلاص بقى يا عمر متكسفهاش يمكن مكنتش عاوزة تعرف حد.
نظر عمر بغضب لها نظرة أخرستها ثم توجه إلى حبيبة وسحبها من ذراعها بعنف وهو يجرها ورائه إلى غرفة المكتب وهو يقول بغضب:
= تعالي معايا.
تابعتهم مي بغضب لتقول بإستنكار
= هو واخدها ورايح على فين وماله مهتم بخبر خطوبتها أوي كده!
تراجعت الجدة للخلف براحة في كرسيها الوثير وهي تقول بإبتسامة ماكرة:
= عندك حق .. فعلاً عمري ماشفته غضبان أوي كده .. بس يا ترى ليه؟!
أغلق عمر باب المكتب من الداخل وهو يواجه بغضب حبيبة التي وقفت تنظر إليه بإرتباك شديد وهو يقول بحدة :
= الكلام ده حقيقي انتي فعلاً مخطوبة؟!
تراجعت حبيبة قليلاً للخلف وعقلها يعمل في كل إتجاه ..
هل تعلم عصمت هانم بالأسباب الحقيقية لوجودها هنا وتورطها في حادث إصابة عمر! .. أم انها لا تعلم !؟
ولماذا قام شريف بالإتصال بالقصر و إخبارهم بانها خطيبته
وما الذي سيستفيده من ذلك؟؟
عمر بغضب :
=إيه إتخرستي ليه السؤال صعب أوي كده ؟
مخطوبة و لا لاء؟!!
انتفضت حبيبة بغضب وهي تتذكر كلمات عصمت المسمومة بموعد خطوبته على مي التي كانت تحتضنه وتقبله
=حضرتك بتكلمني كده ليه مخطوبة و لا مش مخطوبة حضرتك دخلك إيه !؟
إقترب عمر منها بتحذير
=إنطقي يا حبيبة وبلاش تطلعي جناني عليكي.
تراجعت حبيبة للخلف بخوف وهي تحاول إظهار تماسكها
=جرى إيه ياعمر بيه ما أنا قلتلك قبل كده إني .. إني مخطوبة.
عمر بقسوة
=كدابة.
حبيبة بإرتباك
=تقصد إيه !!
عمر بجدية غاضبة
=إيه اللي مش مفهوم في كلامي!
انتي كدابة يا حبيبة .. لو مخطوبة فعلاً إيه اللي خلاكي تكدبي على جدتي وتفهميها إنك قولتي كده علشان كنتي متدايقة من طريقة معاملتي ليكي في أول مقابلة لينا ولا كنتي بتكدبي عليها!
ابتلعت حبيبة ريقها وهي تقول بتوتر :
=أنا مكدبتش عليها .. انا .. أنا ..
اقترب عمر منها بعصبية و جذبها إليه من ذراعها بعنف وهو يقول بقسوة
=هتفضلي تقولي أنا .. انا كتير .. انتي إيه إنطقي!
رفعت حبيبة عينيها إليه وهي تقول بتحدي يغذيه نيران الغيرة التي تشتعل بداخلها بعد سماعها بخبر خطوبته الوشيكة
= أنا مكدبتش على دولت هانم أنا فعلاً لسه مش مخطوبة ..
جذبها عمر بقسوة أقرب إليه وهو يقول بغضب :
=ولما انتي لسه مش مخطوبة الحيوان اللي اسمه شريف بيقول عليكي خطيبته ليه؟!
ارتبكت حبيبة وهي تقول بتوتر وتحاول نزع ذراعها من بين يده بدون فائدة
= هو بيقول كده عشان .. عشان كان .. كان طالبني للجواز ومستني … ردي عليه.
ترك عمر يدها وتراجع للخلف وهو ينظر إليها بغضب بارد
=و هو اعتبرك موافقة من غير ما يستنى ردك وعلشان كده قال إنك خطيبته!
ليتابع بغضب ساخر
=ده كده يبقى متأكد من مشاعرك نحيته ومن موافقتك عليه.
تراجعت حبيبة للخلف قليلاً وهي تقول بتحدي وقد إستفزتها طريقته الغريبة في الحديث معها :
= أنا مش فاهمة حضرتك بتتكلم معايا كده ليه كأنك بتحاسبني .. أنا مش فاهمة انت إيه اللي يهمك في إني أكون مخطوبة أو مش مخطوبة أظن دي حاجه تخصني لواحدي وملهاش علاقة بالشغل!
اقترب عمر منها وهو يقول بغضب
=بقى كده .. بقى دي حاجه تخصك ومليش دعوة بيها طيب أنا ..
إلا أن إرتفاع رنين هاتفه قاطعه فحاول تجاهله وهو يتابع بغضب :
=انتي لازم تفهمي أن أي حاجة تخصك تبقى تخصني أنا كمان ، مفهوم ولا لاء !!
تراجعت حبيبة للخلف وهي تقول بتوتر
=تخصك إزاي يعني .. أنا مش فاهمة!!
أقترب عمر منها وهو يقول بتأكيد :
= إيه اللي مش مفهوم في كلامي!!
أظن كلامي واضح أنا ….
ولكن قبل أن يكمل أرتفع رنين هاتفه مرة أخرى ليتنهد بضيق وهو يجيب بغضب
= إحنا مش هنخلص .. في إيه يا كامل خمسين إتصال ورا بعض !!
مردتش عليك مرة يبقى أكيد مشغول .. في إيه خلصني!!
لتضيق عينيه بحدة وهو يستمع إليه وعينيه تتركز على وجه حبيبة بغضب
=إقفل إنت دلوقتي وأنا هشوف الإميل حالاً.
وقفت حبيبة تراقبه و الخوف والتوتر يسيطرون عليها وهي تراه يطالع الإميل المرسل إليه على هاتفه بهدوء قاتل إلا أن توترها تصاعد إلى قمته وهي تراه يغلق عينيه بألم ويده تضغط على الهاتف تكاد أن تحطمه.
فإقتربت منه بتوتر ووضعت يدها على ذراعه وهي تقول بتردد
= عمر بيه في حاجة .. انت كويس!
إلاّ أنها تفاجئت بيده تدفع يدها بقسوة وغضب وهو يقول بإحتقار :
= إبعدي إيدك .. إيه انتي أتجننتي نسيتي نفسك ولا إيه!!
تراجعت حبيبة بخوف وإرتباك إلى الخلف وهي تقول بصدمة :
= أنا مقصدش .. أنا .. أناا …
أشار لها عمر بالصمت وهو يتأملها بغضب تحول لبرود غريب وهو يجلس ببرود على إحدى المقاعد ويضع ساق فوق الأخرى وهو يقول بتكبر وقسوة :
= اسمعيني كويس وإفهمي أنا هقولك إيه .. طريقة كلامك وتلميحاتك مش عجباني .. انتي الظاهر معاملتي الكويسة معاكي خلتك تنسي نفسك وتنسي انتي بتتكلمي مع مين !
ثم تابع وهو يتأملها ببرود وقسوة
= انتي هنا مجرد واحدة شغالة زيك زي كل اللي بيشتغلوا هنا زي الطباخة والسفرجي والجنايني وكلامي معاكي دلوقتي ومحاسبتي ليكي مش عشان أنا مهتم بيكي زي ما بتقولي .. !
لاء دا عشان انتي كدبتي ومش مرة واحدة لاء مرتين ؛ مرة عليا لما قولتي إنك عاوزة تسيبي الشغل علشان مخطوبة ، ومرة على جدتي لما قولتي إنك مش مخطوبة وخبيتي عليها موضوع خطوبتك من شريف … وده مش مسموح عندي.
ثم تابع بقسو أكبر
= أي حد بيشتغل عندي لو كدب عليا أي كدبة حتى لو كدبة ملهاش دخل بشغله ومتضرنيش في حاجة أو ملهاش دخل بيا زي ما انتي بتقولي بيتطرد برة و فوراً ، ومن غير نقاش بس قبل ما يتطرد بيتحاسب .. وبشدة على كدبته .
أنا مبعترفش باللون الرمادي يا إما أبيض أو أسود وده مبدئي في حياتي ، بطبقه من غير تفكير أو رحمة .. عندي اللي يكدب مرة حتى لو في شئ تافهة ممكن يكدب ألف مرة وده بنفيه وبطرده برة دنيتي من غير تفكير.
ثم تابع بقسوة كالثلج أذابت عظامها من شدة الخوف
= بس برضه بعد ما يتحاسب و مش حساب عادي لأ دا بيتحاسب حساب شديد كمان.
ثم تأملها من فوق إلى أسفل بطريقة مهينة وهو يتابع بإستهزاء
= فبلاش خيالك يصورلك أوهام انتي مش قدها وإعرفي حجمك كويس وإعرفي إنتي بتتكلمي مع مين !!
رفعت حبيبة رأسها بتحدي وقد لمعت عينيها بالدموع المحبوسة من أثر كلماته المهينة لتقول بكبرياء
= أولاً أحب أطمن حضرتك أنا عارفة حجمي كويس و معنديش أي أوهام أو خيالات تخص أي حد ، وعارفة إني أنا بشتغل عند حضرتك زي كل الشغالين اللي في الفيلا ومش محتاجة حد يفكرني بده.
ثانياً أنا مكدبتش لا عليك ولا على دولت هانم أنا فعلاً لسه متخطبتش وكنت لسه بفكر ..
لتتابع بإرتجاف
= بس أنا فعلاً أخدت القرار وهتخطب لإبن عمي فـ ياريت توافق على الإستقالة اللي كنت قدمتها قبل كده علشان زي ما قلت لحضرتك قبل كده خطيبي مش موافق على شغلي هنا.
إشتعلت عيون عمر بالغضب ولكنه تلاشى سريعاً وحلت مكانه نظرة غير مفهومة وهو يقف يتأملها ببرود
= وأنا سبق وقلتلك قبل كده إن طلبك مرفوض .. انتي مضيتي على عقد شغل وهتحترميه.
ثم تابع بسخرية باردة
= بس لو خطيبك عايزك فعلاً تسيبي الشغل يبقى يطلب ده مني أنا شخصياً .. وساعتها هـافكر و ممكن جداً أوافق.
ابتلعت حبيبة ريقها بتوتر وهي تفكر بردة فِعل شريف إن علم بمحاولتها مغادرة الفيلا.
= بس هو .. هو .. يعني ممكن يتحرج علشان .. علشان بيشتغل عند حضرتك في الشركة و ممكن يخاف إنك تزعل منه.
ابتسم عمر بقسوة وهو يتأمل إرتباكها الواضح بسخرية
= انتي بتقولي إيه !!
.. أنا أزعل من شريف !
.. أنتي متعرفيش شريف غالي عندي قد إيه ، دا أنا محضرله مكافئة كبيرة على المجهود الخرافي اللي بيبذله في الشغل عندي.
ثم تابع بسخرية وهو يشاهد نظرة عدم التصديق في عينيها
= دا أنا كمان بجهزه علشان يبقى دراعي اليمين في الشغل و عموماً أنا مقدر حُبه و غِيرته عليكي وعشان كده بقولك لو عايزة تمشي من هنا أنا مش ممانع بس خطيبك هو اللي يطلب مني ده.
حبيبة بإرتباك:
= بس…….
عمر بحدة:
= مفيش بس ودا آخر كلام عندي في الموضوع ده.
ثم أشار لباب الغرفة
= اتفضلي على شغلك وأجهزي علشان هنروح بجدتي للمستشفى.
نظرت حبيبة إليه بإرتباك والخوف يسيطر عليها وهي تخرج من الغرفة وتتوجه إلى غرفتها للإستعداد للذهاب بصحبته إلى المشفى.
لتدخل سريعاً إلى غرفتها وتبدأ بإرتداء ملابسها وهي تشعر بالإرتباك والخوف يسيطرون عليها فـ كَلماته وطريقة حديثه معها تشعرها بعدم الإطمئنان فهي متأكدة من أنه لا يثق أبداً في شريف.
فكيف تصدق أنه يعد شريف ليصبح ذراعه اليمين بالشركة وهو قد قام من أقل من شهرين بطرده خارج الشركة بعد أن ا
أكتشف إختلاسه من أموال الشركة.
تنهدت حبيبة وهي تنظر لإنعكاس صورتها بالمرآة بخوف
= إزاي عارف إنه سرقُه و إنه كان بيخرج وبيسهر مع مي خطيبته وضربه وطَرده برة الشركة ، وإزاي دلوقتي بيقول عليه إنه غالي عنده وعاوز يخليه دراعُه اليمين في الشركة الكلام ده ميطمنش واستحالة حد يصدقه.
ثم إتجهت إلى فراشِها وجلست على طرفه وعقلها يعمل بكل إتجاه.
= وليه مصمم إن شريف هو اللي يطلب إني أسيب الشغل .. يكون عارف إن شريف هو اللي باعتني أشتغل عنده هنا في الفيلا ولا بيقول كده علشان فاكرني بكدب عليه وبتحجج بشريف وإنه مطلبش مني أسيب الشغل ولا حاجة
ثم تنهدت بألم ودموعها تسيل بالرغم عنها
= أنا إيه اللي دخلني في كل ده أنا مش قد أي حد فيهم
لا انا قد شريف ولا قد عمر .. اعمل إيه يارب!
ثم إنتفضت واقفة و ركضت بإتجاه خزانة ثيابها وأخرجت حقيبة يدها ووضعت بها بطاقتها الشخصية و دفتر التوفير الخاص بها ، والذي يحمل القليل من المال وسلسال رفيع من الذهب يعود إلى والدتها الراحلة.
ثم تنهدت وهي ترتدي ثيابها وقد عقدت العزم على المغادرة اليوم وترك الفيلا قبل أن تتعقد الامور أكثر من ذلك لتسيل دموعها وتغرق وجنتيها وهي تقول بخوف :
= أنا همشي وهسيب القرف ده كله أنا اعصابي خلاص تعبت ومبقتش متحملة كل حاجة حواليا متلخبطة حتى مشاعري مبقتش فاهماها ..
إزاي بخاف منه و بحس بأمان الدنيا كلها وهو جنبي ..
إزاي بحب وجوده حواليا وعنيا مبتقدرش تفارقه وأنا في نفس الوقت بخاف من وجوده وببقى عاوزاه يختفي من قدامي و يختفي من حياتي كلها ..
إزاي بعشق تفاصيله كلها ” ضحكته ، حنانه ، قسوته و حتى غضبه ” وأنا عارفة إنه إستحالة يفكر فيا ..
فوقي يا حبيبة انتي فين وهو فين دا كلها كام يوم ويعلن خطوبته على واحدة من مستواه مش واحدة زيك تربية ملاجئ زي مابيقولوا عليكي.
ثم حاولت مسح دموعها التي تسيل بالرغم عنها
= هتستني إيه تاني دا قالهالك في وشك إنك حتة شغالة عنده وحذرك إنك تعيشي نفسك في الأوهام وده كله وهو ميعرفش إن ليكي يد في المصيبة اللي حصلتله أومال لو عرف هيعمل فيكي إيه!
لتمسح دموعها بإصرار وقد أرتدت معطفها فوق فستانها المحتشم الطويل وتناولت حقيبتها وقد عقدت العزم على المغادرة اليوم.
لتقول بإصرار :
= دي أحسن فرصة أقدر أمشي فيها من غير ما حد ياخد باله طول ما أنا هنا مش هقدر أخرج من غير ما هو يعرف .
هنتهز فرصة خروجي معاه و إنه هيكون مشغول بجدته و بالإطمئنان عليها وساعتها ههرب وعلى أما يكتشف إني مش موجودة ، هكون إختفيت وسافرت أي مكان بعيد عنه وعن الزفت اللي اسمه شريف.
ثم مسحت دموعها جيداً وتوجهت إلى الخارج وهي ترتب خطة هروبها في عقلها وقلبها يرجف من شدة الخوف
بعد قليل ..
جلست حبيبة في المقعد الخلفي من السيارة ، وبجانبها جلست دولت هانم وعمر الذي تأملها قليلاً ،
ثم قال بهدوء:
= انتي لابسه البالطو التقيل ده ليه في الجو الحر ده!
إرتبكت حبيبة وهي تنظر إلى معطفها الشتوي الذي إشترته في موسم التخفيضات وقد عز عليها أن تتركه مع ملابسها الأخرى التي تركتها خلفها في القصر وهي تدرك أنها لن تستطيع شراء معطف آخر مثله فقررت إرتدائه فوق ملابسها لتقول بصوت خفيض وهي تتفادى النظر إليه :
= أصلي حاسة إني بردانة الظاهر داخلة على دور برد.
تأملها عمر قليلاً وهي تخفض رأسها للأسفل وتتفادى النظر إليه ثم قال بتهكم :
= برد .. عموماً إحنا رايحين المستشفى وهناك هخليهم يكشفوا عليكي ويكتبولك علاج.
إنتفضت حبيبة وقالت بتسرع خوفاً من ضياع فرصة هروبها :
= لاااا أنا كويسة دول شوية برد ومش مستاهلة إني أكشف.
ربتت دولت هانم على يد حبيبة بحنان
= ليه يا حبيبتي إحنا كده أو كده هنكون في المستشفى فخلينا نطمن عليكي.
إبتلعت حبيبة ريقها بتوتر وهي ترفض النظر إليهم
= أنا الحمد لله كويسة أخدت حباية وحاسة إني بقيت أحسن .
دولت هانم وهي تتأمل وجه حبيبة الشاحب
= بس انتي شكلك لسه تعبانة تحبي نرجعك الفيلا ترتاحي.
حبيبة بلهفة خوفاً من ضياع فرصة الهرب منها:
=لا انا هاجي معاكم أنا حقيقي بقيت أحسن.
عمر مقاطعاً لها ببرود :
=خلاص كفاية كلام في الموضوع ده إحنا في الأصل مش رايحين علشانك إحنا رايحين نطمن على جدتي ومش هنقضي الطريق نتكلم في مواضيع تافهة وملهاش لازمة.
نظرت له حبيبة بغيظ ثم أدارت وجهها للناحية الأخرى بغضب تمنع دموعها من النزول بصعوبة وهي تتظاهر بالنظر من نافذة السيارة في حين نظرت دولت هانم لحفيدها بإستغراب وهي تشعر بموجات الغضب التي تحيط بهم لتهمس له بصوت خفيض :
= بالراحة يا عمر في إيه مش كده هي مقالتش حاجة لكل ده
تراجع عمر للخلف وأغمض عينيه بتعب وهو يتجاهل النظر إليها أو الرد على حديث جدته له .. فهو يشعر بنار تشتعل بداخله لا يستطيع إخمادها بعد سماعه منها عن خبر خطوبتها الوشيكة يشعر إنه على وشك أن يجن من قوة مشاعره نحوها .. مشاعر لم يختبرها أبداً سيطرت عليه بسرعه وقوة وجعلته يفقد السيطرة على أفعاله. وتصرفاته ..
تصرفات لا تليق به أبداً ، أو بمكانته ولكن لابد أن ينهي كل ذلك مرة وللأبد فهو يدرك أكثر من أي شخص آخر إنها لا تناسبه و لا تناسب مركزه أو مكانته ، و لا يجوز أن يفكر بها أو ان تسكن افكاره وتسيطر على مشاعره التي تشتعل بمجرد النظر إليها .. إنه حقا لا يستوعب ما يحدث له فقد جعلته من مرات معدودة رآها بها يشتاق ويعشق كالمراهقين.
يشعر بالسعادة والراحة لمجرد وجودها في محيط تواجده.
ما الذي يحدث له هل جن كيف ينجذب رجل بمكانته لفتاة مثلها .. فتاة حولها اكثر من علامة إستفهام وتعمل كمجرد مرافقة لجدته بينها وبين عالمه ملايين الأميال ولكن أكثر ما يثير جنونه أنه يدرك جيداً انه ليس مجرد إنجذاب بل عشق .. عشق تغلغل بداخله وسيطر على جميع حواسه ، عشق يشعره بالحيرة والضعف وهو ما يرفضه نهائياً و لذلك فقد أتخذ قراره … سيسحق مشاعره ويسحق أي شعور قد يساوره تجاهها فهو عمر الرشيدي الرجل الذي يدب الرعب في قلوب أعتى الرجال بمجرد تواجده في المكان والذي يسيطر على أسواق المال يرفعها ويخفضها بمجرد قرار صغير منه ولن يسمح بأن يصبح أُلعوبة في يد إمرأة مهما كلفه الأمر.
إنتبه عمر على لمسه رقيقة من يد جدته وهي تقول بصوت خفيض :
= عمر إحنا خلاص وصلنا المستشفى.
فتح عمر عينيه ثم إبتسم في وجه جدته برقة وهو يتفادى النظر إلى حبيبة :
= طيب يلا ياست الكل علشان نطمن عليكي.
ثم ترجل من السيارة وهو يساعد جدته على النهوض والصعود على الدرج المؤدي إلى داخل المشفى وهو يتجاهل حبيبة التي وقفت في الخلف تراقبهم بألم وهي تدرك أنها قد تكون المرة الأخيرة التي قد تراهم فيها.
ثم همست لنفسها بتشجيع :
= يلا يا حبيبة إمشي قبل ما يحس إنك مش موجودة معاهم ؛ فتراجعت للخلف بهدوء في محاولة منها للهرب دون ان يشعر بها أحد وهي تراقب عمر وجدته بتوتر حتى أختفوا بداخل الباب المؤدي إلى المشفى وهي ماتزال تقف على بداية الدرج ، لتتراجع سريعاً وهي تكاد تجري في محاولة منها للإختفاء سريعاً.
إلا أن السائق الخاص بعمر إستوقفها وهو يقول بدهشة
= هو انتي رايحة فين مش هتدخلي معاهم !!
حبيبة وهي تنظر لباب المشفى بتوتر
= انا هروح اشتري حاجة ليا وهـارجع قبل مايخلصوا .
فحاول السائق الحديث إلا أنها تجاهلته وهي تركض إلى الجانب الآخر من الطريق في محاولة منها لإيقاف اي سيارة تَقِلها إلى محطة القطار ، وهي تقول بصوت مرتفع ومتوتر
= عمر بيه عارف أنا واخدة إذن منه متقلقش.
ثم حاولت بتوتر إيقاف عدة سيارات أجرة حتى إستجابت لها احدهم و جلست بداخلها وهي تقول بتوتر :
= محطة القطر بسرعة يا اسطى لو سمحت .
أشار لها السائق بالادإيجاب وأنطلق بالسيارة وهي تنظر إلى الخلف بخوف حتى تأكدت من إبتعادهم عن المشفى ؛
فتنهدت براحة وهي تضم حقيبتها إلى صدرها بتوتر وتمسح دموعها التي تسيل بالرغم عنها وهي تتخيل أنها لن تراه أبداً بعد اليوم.
لتهمس لنفسها بألم ودموعها تسيل بالرغم عنها :
= حتى لو كنت مش هشوفه تاني لازم أحذره من التعابين اللي حواليه و أحكيله على كل حاجه .. لا يمكن أسيبه عايش مغشوش فيهم ..
ثم تابعت بإرتجاف :
= هقوله .. هقوله على كل حاجه .. بس أوصل لمكان بعيد محدش يقدر يوصلي فيه.
إلا إنها إستفاقت من خيالاتها على صوت مكابح السيارة التي تحملها تتوقف فجأة بعد إعتراض سيارة أخرى لها أجبرتها على التوقف وسط صراخ السائق وسبابه….
شهقت حبيبة بخوف وهي ترى باب السيارة يُفتح عنوةً ويظهر على بابه عمر الذي أشار لها بغضب
= إنزلي …
صرخ السائق بغضب :
= إنت يا عم إنت بتعمل إيه .. إنت مجنون كنت هتضيعنا وتضيع العربية.
ثم تابع الصراخ بعنف وهو يراه يُخرج حبيبة الخائفة ويضعها بقسوة بداخل سيارته :
= إنت واخد الزبونة ورايح بيها على فين ! إيه اليوم اللي مش فايت ده .. إنت يا جدع إنت بتعمل إيه !!
إنت خاطفها ولا إيه؟
عاد عمر للسائق ورمي إليه بعض المال
وهو يقول بجدية :
= روح شوف حالك يا أسطى .. دي أمور عائلية ومتتدخلش فيها.
نظر السائق بذهول لكمية المال الكبيرة الملقاه بين يديه ، ثم نظر إلى سيارة عمر باهظة الثمن وإلى عمر الذي يظهر عليه معالم الثراء الشديد ثم قال بإرتياح :
= أنا آسف يا باشا مكنتش أعرف إنها مراتك وخفت يعني لتكون لا مؤاخذة خاطفها ولا حاجة!
ثم أضاف بسرعة وهو يتأمل المال بسعادة:
= بس طبعاً هيئتك وشكلك متقولش إنك كده أبداً .. أتفضل يا باشا طريق السلامة.
تجاهل عمر كلماته وعاد بغضب إلى سيارته وجلس بجانب حبيبة التي كانت تجلس بجواره ودموعها تسيل بصمت.
عمر بغضب بارد :
= إيه اللي ركبك العربية دي .. كنتي رايحة على فين!
إستمرت حبيبة في البكاء دون أن تجيبه..
عمر بغضب :
= ردي عليا وبعدين كملي عياط براحتك كنتي راكبة العربية ورايحة على فين !
ثم صرخ فيها بعنف بعد إستمرار صمتها
= ردي . . كنتي رايحة فين !!!
إنتفضت حبيبة بخوف وأجابت من خلال شهقاتها
=كنت .. كنت همشي وهسيب الشغل إرتحت.
عمر بغضب
= تقصدي بكلمة تسيبي الشغل إنك بتهربي مش كده ما هو اللي عملتيه ده مالوش إسم غير كده.
عقدت حبيبة حاجبيها بغضب وهي تزيل دموعها بإرتباك :
= وأهرب ليه و من إيه وبعدين أقعد و لا أسيب الشغل أنا حرة هو إنت إشترتني !!
جذبها عمر إليه من ذراعها وهو يقول بغضب يحاول السيطرة عليه :
= لا أنا مشترتكيش بس انتي ماضية على عقد ولازم تحترميه ، ولسانك الطويل ده أنا هعلمك إزاي تظبطيه وانتي بتتكلمي معايا.
سحبت حبيبة يدها منه بعنف وهي تقول بغضب
= عقد .. عقد .. كل شوية تقولي مضيتي على عقد .. أنا مضيت على عقد شغل مش مضيت على عقد بيع لحريتي ،
ثم اضافت وهي تمسح دموعها وتتظاهر بالقوة
= لو سمحت سيبني أمشي أنا مش عاوزة أشتغل عندكم تاني.
ضغط عمر على كف يدها بعنف حتى شعرت أن عظام يدها ستتحطم وهو يقول بغضب أعمى :
= كل اللي بتعمليه ده علشان حبيب القلب غيران ومش عاوزك تكملي شغل عندي مش كده !
نظرت حبيبة إليه بحيرة وقد نسيت حديثها الكاذب عن خطيبها الزائف ورغبته في تركها لعملها :
= حبيب القلب مين أنا مش فاهمة إنت بتتكلم عن إيه!
جذبها عمر إليه فجأة حتى أصبحت بداخل ذراعيه وهو يميل عليها ويده تلتف حول خصرها تضمها إليه حتى أصبحت ملتصقة به والغضب والغيرة تعمي عينيه
= بقى مش عارفة حبيب القلب مين .. شريف .. خطيبك ولا نسيتيه !!
إبتلعت حبيبة ريقها بتوتر خائف وهي تدرك خطئها وتحاول التخلص من ذراعيه التي تحيطان بها..
= آه شريف .. فعلاً أنا .. أنا عملت كده علشانه .. بس ..
لتشعر بالخوف يستولي عليها وعمر يتابع بسخرية سامة وشفتيه تمر بنعومة ورقة على وجنتيها الملطختان بالدموع كأنه يتذوقهم بشفتيه :
= مفيش بس .. وعموما أنا مبسوط إنك مش فكراه .
ثم مرر شفتيه برقة على شفتيها ويده تتحكم بقوة برأسها فجعلتها غير قادرة على الهروب منه وهو يقول بغيرة شديدة لم يستطع التحكم بها :
= بس أنا هاعلمك إن اسمه ميتنطقش على شفايفك من تاني ..
ثم إنقض على شفتيها فجأة معاقباً لها يـ*قبلها بقسو*ة شديدة يغذيها غيرته المدمرة عليها.
في حين حاولت حبيبة مقاومته و الهروب من بين ذراعيه فلم تستطع ودموعها تسيل بقوة وهي تشعر بيده تضمها بقوة إليه فلا تستطيع الفِكاك منها وقد تشباكت أصابعه في خصلات شعرها بعد أن وقع حجابها أرضا فجعلت الخلاص منه مستحيلاً .. ولكن مابدأ كـعقاب سرعان ما تحول إلى شغف وعشق جارف حَوَّل قـ*بلته إلى قـ*بله حانية رقيقة مُتَطلَّبة ، وقد سيطر عِشقه لها على كل مشاعره و جعله ينسى جميع قرارته الماضية وهو ينهال بشغف من بين شفتيها وكأن شفتيها تحملان إليه إكسير الحياة .
إرتعشت حبيبة بتأثر بين ذراعيه فضمها بعشق أكثر إليه ، وهو يدفن رأسه في عُـنقها يُـ*قبل بشغف وحنان الشريان النابض بقوة في عنقها ، ثم رفع رأسه إليها بحب وهو يمرر إصبعه برقة على وجنتيها الساخنتان ثم على شفتيها المتورمتان من أثر قـ*بلاته وهو يقول بتحذير :
= اسمه ميتنطقش على لسانك تاني ولا شفايفك تنطق بيه إنسيه .. إنسيه يا حبيبة وخرجيه برة حياتك وإلا مش هكون مسئول عن اللي هعمله.
تضاربت مشاعر حبيبة مابين الخجل الشديد والغضب و دموعها تنساب على وجنتيها وهي تقول بإرتعاش وتقطع من شدة الغضب ويدها تضرب صدره بعنف :
= إنت .. إنت بتقول إيه أنا مش فاهمة حاجة.
ثم تابعت بإستنكار وألم
=و إزاي تعمل فيا كده .. أنا مش فاهمة إنت فاكرني إيه !
ثم إنهارت بالبكاء وهي تقول بإرتعاش
= أنا مش كده فاهم .. مش كده.
إحتضنها عمر مرة أخرى بحنان وهي تحاول مقاومته وهو يمرر يده على ظهرها برقة مهدئاً
= أنا عارف ومتأكد إنك مش كده.
ثم أبعدها قليلاً عنه وهو يقول بتحذير ويده تمر على خصلات شعرها ترتبها بحنان ورقة خلف أذنها :
= أنا عارفك يا بيبة ويمكن أكتر من ما انتي عارفة نفسك .
وللمرة التانية بقولك إسمه متنطقهوش تاني سواء قدامي أو من ورايا .. تخرجيه من حياتك نهائياً .. وده آخر كلام عندي فياريت تنفذيه وبلاش تتحديني أحسنلك علشان ساعتها مش هبقى ضامن رد فعلي هيبقى إيه .
نظرت حبيبة إليه بدهشة وهي لا تستوعب معنى كلماته ، لتشعر بالغضب يستولي عليها من جديد وعقلها يعيد كلماته مرة تلو الأخرى ..
أيطالبها بالتخلي عن خطيبها المزعوم ومحوهُ من حياتها وهو في نفس الوقت سيعلن خطوبته على إبنة خالته ..
يسمح لنفسه بتقبيلها معاقباً لمجرد ذكرها اسم شريف أمامه ويهددها بمعاودة عقابها مرة أخرى بهذه الطريقة المهينة إن ذكرت اسمه أمامه مجدداً ..
لتصرخ فيه فجأة بعنف أثار دهشته
وهي تقول بغضب :
= إنت فاكر نفسك إيه .. ها .. فاكر إن أنا الجارية اللي إشترتها من سوق العبيد !!
إنت تأمر وأنا أنفذ مش كده !!
لتتابع بغيرة وغضب :
= هتعلن خطوبتك كمان يومين وفي نفس الوقت عاوزني أسيب خطيبي ومقولش اسمه كمان وإلا هـتعاقبني بطريقتك .. بطريقتك المقر*فة دي ؟!
ثم تابعت بتحدي غاضب
= إيه فاكرني ضعيفة وهسيبك تعمل فيا كده تاني .. طب .. شريف … شريف .. شريف .. ولما أشوف هتعمل إيه …. آااه …..
لتتفاجأ بعمر يجذبها مرة أخرى بين ذراعيه وهو يقول بنبرات عاشق تستولي الغيرة عليه :
= مش قُلتلك بلاش تتحديني ..!
ثم همس برقة على شفتيها
= عموماً خسارتك يا بيبة .. مكسب ليا …
ثم إنقض على شفتيها يلتهمهم في قـ*بلة عاصفة أذابت رغماً عنها مشاعرها وأستولت على جميع حواسها..

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية سيد القمر الأسود)